ߟߊ߬ߛߋ߬ߟߌ ߘߏ߫ ߟߋ߬ ߟߊߖߍ߲ߛߍ߲ߣߍ߲߫ ߓߌ߲ߠߊߥߎߟߋ߲ ߕߟߋ߬ ߈ ߣߌ߲߬ ߡߊ߬ ߥߊ߱ߘߎ߰ ߞߣߐ߫߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߞߞߢ ߛߌ߲߬ߝߏ߲߬ ߖߡߊߣߊ ߟߎ߬ ߓߘߊ߫ ߥߊ߫ ߝߊ߲߫ ߞߋߟߋ߲߫ ߕߊ߬ ߣߌ߲߬ ߞߏ ߘߐ߫߸ ߣߌ߫ ߕߡߊ߬ߖߌ߬ ߕߍ߫، ߞߊ߬ߕߎ߲߯߸ ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ ߣߐ߬ ߊߡߙߌߞߌ߬ ߟߊ߫ ߣߊ߲߬ߕߌ߰ ߦߙߍߞߍߟߌ ߣߌ߲߬ ߦߋ߫ ߟߊ߫ ߛߊ߬ߙߌ߬ߦߊ߬ ߛߐߛߐ ߟߋ߬ ߘߌ߫ ߝ߭ߣߋߖ߭ߎߥߋߟߊ߫ ߞߣߐ߫߸ ߊ߬ߟߎ߫ ߣߐ߬ ߊ߬ߟߎ߬ ߞߊ߲ߠߊߘߌ߫ ߟߊ߫ ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߛߌ߲߬ߝߏ߲߬ߧߊ߬ߟߌ ߡߊ߬ ߏ߬ ߟߋ ߘߐ߫߸ ߞߏ߫ ߊ߬ߟߎ߬ ߦߋ߫ ߘߏ߫ ߝߐ߫ ߊ߬ ߞߏ ߘߐ߫، ߊ߬ߟߎ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߋ߫ ߝ߭ߣߋߖ߭ߎߥߋߟߊ߫ ߞߐߡߊߓߌ߲ߓߌ߲߫ ߠߊ߫ ߓߘߍ߬ߓߘߍ߬ߟߌ ߕߊ߫ ߓߟߏ ߡߊ߬ ߣߌ߲߬ ߞߏ ߘߐ߫߸ ߡߊ߲߬ߕߏ߲߬ߕߍ߬ ߛߊߙߌߦߊ ߟߎ߬ ߡߊߓߏ߲߬ߧߊ ߕߐ߯ ߘߐ߫.
ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ (ߞߞߢ) ߓߘߴߊߡߙߌߞߌ߬ ߟߊ߫ ߦߙߍߞߍߟߌ ߞߐ߲߫ ߞߵߊ߬ ߟߊߜߏߦߊߢߍ߫ ߣߌ߫ ߕߎ߲߬ߞߎ߬ߙߎ߲߬ ߕߍ߫߸ ߊ߬ߟߎ߫ ߞߊ߬ ߡߍ߲ ߞߍ߫ ߝ߭ߣߋߖ߭ߎߥߋߟߊ߫ ߞߊ߬ߣߌ߲߬، ߊ߬ߟߎ߬ ߞߊ߲߫ ߞߏ߫ ߡߍ߲ ߞߍߣߍ߲߫ ߏ߬ ߘߌ߫߸ ߏ߬ ߦߋ߫ <<ߞߟߍ߬ߓߋ>> ߟߋ߬ ߘߌ߫߸ ߊ߬ ߣߌ߲߫ <<ߛߐ߲߬ ߕߴߛߋ߫ ߞߍ߫ ߟߊ߫ ߞߏߟߊߒߘߌߦߊ>> ߡߍ߲ ߡߊ߬ ߝߋߎ߫، ߞߊ߬ߕߎ߲߯߸ ߞߏ߫ ߝ߭ߣߋߖ߭ߎߥߋߟߊ߫ ߦߋ߫ ߞߊ߬ߝߏ߫ ߖߘߍ߬ߕߌ߮ ߟߋ߬ ߘߌ߫߸ ߡߐ߰ ߟߊ߫ ߘߊ߲߬ߞߏ߬ߟߊ߬ߓߊߟߌߦߊ߫ ߡߊ߲߫ ߞߊ߲߫ ߞߊ߬ ߛߋ߫ ߡߍ߲ ߡߊ߬، ߊ߬ߟߎ߬ ߟߊ߫ ߟߊ߬ߛߋ߬ߟߌ߬ ߛߓߍ ߣߌ߲߬ ߞߣߐ߫߸ ߏ߬ ߡߍ߲ ߠߊߖߍ߲ߛߍ߲߫ ߘߊ߫ ߓߌ߲ߠߊߥߎߟߋ߲ ߕߟߋ߬ ߈ ߣߌ߲߬ ߡߊ߬ ߥߊ߱ߘߎ߰߸ ߛߌ߲߬ߝߏ߲߬ߘߊ ߞߵߊ߬ ߞߊ߲ߠߊߘߌ߫ ߡߟߛ ߟߊ߬ߞߊ߲߬ߘߊ߬ߟߌ ߞߏߟߊߕߍ߯ߘߊ ߡߊ߬߸ ߞߏ߫ ߊ߬ ߦߋ߫ ߣߌ߲߬ ߞߏ ߘߐߜߏߦߊ߫ ߝߋߝߋ߫߸ ߞߊ߬ ߓߊ߲߫ ߞߊ߬ ߞߊߘߊ߲߫ ߞߍ߫ ߞߊ߬ ߛߋ߫ ߛߊ߬ߙߌ߬ߦߊ߬ ߛߐ߬ߛߐ߬ ߞߏ ߣߌ߲߬ ߠߊߛߊ߬ߦߌ߲߬ ߠߴߊ߬ ߢߊ ߡߊ߬.
ߊ߬ߟߋ߬ ߟߊ߬ߛߋ߬ߟߌ߬ ߛߓߍ ߞߟߊ߬ߣߐ߬ߦߊ߬ ߘߊ߫ ߢߍߡߌߘߊ߫ ߌߓߙߊߤߌߡ ߕߙߊߥߟߋ߫ ߟߋ߬ ߓߟߏ߫߸ ߊ߬ߟߋ ߡߍ߲ ߦߋ߫ ߝߊ߬ߛߏ߬ ߞߊ߲ߕߌ߮ ߘߌ߫߸ ߊ߬ ߣߌ߫ ߞߞߢ، ߞߟߏߜߍ ߣߌ߲߬ ߞߵߊ߬ ߝߐ߫߸ ߞߏ߫: ߞߊ߲ߕߌ߯ ߣߌߞߏߟߊ߫ ߡߊߘߎߙߏ߫ ߣߴߊ߬ ߟߊ߫ ߓߐ߬ߟߐ߲߬ߞߊ ߡߌ߬ߣߊ ߞߍߣߍ߲߫ <<ߛߊ߬ߙߌ߬ߦߊ߬ ߛߐ߬ߛߐ߬ ߡߌߣߊߟߌ>> ߟߋ߬ ߘߌ߫، ߊ߬ߟߎ߬ ߞߊ߲߫ ߞߏ߫ ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߟߊ߫ ߟߊ߬ߞߊ߲߬ߘߊ߬ߟߌ ߞߏߟߊߕߍ߯ߘߊ ߛߌ߲߬ߝߏ߲ ߘߏ߫ ߟߋ߬ ߣߐ߬ ߣߌ߲߬ ߞߍ߫ ߟߴߊ߬ ߖߘߍ߬ ߢߍ߫ ߦߋ߲߬ ߕߋ߲߬߸ ߊ߬ ߘߏ߲߬ ߡߊ߫ ߓߍ߲߬ ߢߊ߫ ߛߌ߫ ߟߋ߬ ߡߊ߬، ߞߞߢ ߟߊ߫ ߝߐߟߌ߫ ߘߐ߫߸ ߏ߬ ߦߋ߫ <<ߘߎߢߊ߫ ߟߊߡߊ߰ ߞߏ ߟߋ߬ ߘߌ߫ ߞߊ߬ ߡߊ߲߬ߞߊ߲ ߠߊߘߏ߲߬>> ߊ߬ ߣߌ߫ ߞߏ߫ <<ߞߐߝߟߌ߫ ߖߎ߯ ߦߴߊ߬ ߟߊ߫ ߞߌߢߍ߲߫ ߠߊ߫ ߓߊߛߌ߯ߟߌ ߘߐ߫.>>
ߊ߬ߟߎ߬ ߟߊ߫ ߟߊ߬ߛߋ߬ߟߌ ߣߌ߲߬ ߘߐ߫߸ ߊ߬ߟߎ߫ ߞߊ߬ ߦߟߌߓߌߟߊߟߌ ߞߍ߫ ߞߵߊ߬ ߓߍ߲߬ ߡߊ߲߬ߕߏ߲߬ߕߍ߬ ߞߎߙߎ߲ߘߎ ߕߊ߲ߓߊ߲ ߡߊ߬: ߣߊ߲߬ߕߌ߰ ߝߊ߲ߞߊ ߟߊߓߊ߯ߙߊ ߖߘߍ߬ߕߌ߰ߦߊ ߞߊ߲ߡߊ߬߸ ߘߎ߰ߞߣߍ ߡߎ߰ߡߍ ߞߊ߲ߡߊ߬߸ ߥߟߊ߫ ߖߡߊ߬ߣߊ߫ ߘߏ߫ ߟߊ߫ ߓߘߍ߬ߓߘߍ߬ߟߌ ߖߘߍ߬ߕߌ߰ߦߊ ߞߊ߲ߡߊ߬߸ ߏ߬ ߦߋ߫ ߞߟߍ߬ߓߋ ߟߋ߬ ߘߌ߫߸ ߥߟߊ߫ ߓߋ߬ߒ߬ߞߊ߲߬ߠߌ߲߸ ߏ߬ ߘߏ߲߬ ߡߊ߫ ߓߍ߲߬ ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߓߊߛߌ߯ߞߊ߲ ߡߊ߬ ߡߎ߰ߡߍ߫، ߏ߬ ߟߋ ߘߐ߫߸ ߞߞߢ ߞߊ߲߫ ߞߏ߫ ߊ߬ߟߎ߬ ߦߋ߫ <<ߓߊ߯ߙߊ߫ ߖߎ߯ߓߊ>> ߣߌ߲߬ ߞߎ߬ߡߊ߲߬ߘߌ߬ ߟߊ߫ ߟߋ߬ ߝߋߝߋ߫߸ ߊ߬ ߣߌ߫ ߞߏ߫ ߊ߬ߟߎ߬ ߦߋ߫ ߝ߭ߣߋߖ߭ߎߥߋߟߊ߫ ߡߌ߬ߙߌ߲߬ߘߌ ߞߐߡߊߓߌ߲ߓߌ߲߫ ߠߴߊ߬ ߞߏ ߘߐ߫߸ ߏ߬ ߟߎ߬ ߡߍ߲ ߠߎ߬ ߟߊ߫ ߖߘߍ߬ߕߌ߰ߦߊ ߓߘߊ߫ ߓߐ߬ߘߍ߬ߓߐ߫ ߕߋ߲߬ ߞߊ߬ߣߌ߲߬.
ߊ߬ߟߎ߫ ߞߊ߬ ߞߏ߫ ߛߊ߬ߓߊ߫ ߟߋ߬ ߘߌߦߊߜߏߦߊ߫ ߣߌ߲߬ ߞߏ ߘߐ߫: ߟߊ߬ߞߊ߲߬ߘߊ߬ߟߌ ߞߏߟߊߕߍ߯ߘߊ ߦߋ߫ ߊߡߙߌߞߌ߬ ߣߊ߲߬ߕߌ߮ ߟߎ߬ ߟߊ߫ ߓߊ߯ߙߊߣߐ ߣߌ߲߬ ߘߐߜߏߦߊ߫߸ ߞߊ߬ ߛߐ߲߬ ߘߎߢߊ߫ ߓߍ߲߬ߞߊ߲߬ߡߊ߬ ߛߊߙߌߦߊ ߘߏ߫ ߡߊ߬߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߖߡߊ߬ߣߊ ߓߍ߯ ߞߊ߫ ߞߊ߲߫ ߖߘߍ߬ߕߌ߰ߦߊ ߘߐ߫߸ ߊ߬ ߣߌ߫ ߞߏ߫ ߊ߬ߟߎ߬ ߦߋ߫ ߡߍ߲ ߞߊ߲߬߸ ߊ߬ ߣߴߊ߬ߟߎ߫ ߛߐ߲߬ߣߍ߲߬ ߡߍ߲ ߡߊ߬߸ ߏ߬ ߟߋ ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߛߌ߲߬ߝߏ߲߬ߧߊ߬ߟߌ ߓߊߛߌ߯ߞߊ߲ ߞߣߐ߫ ߞߎߡߊ ߟߎ߬ ߟߊߓߊ߬ߕߏ ߘߌ߫ ߝߍ߲ߝߍߘߍ߲߫، ߊ߬ߟߎ߬ ߞߎߡߊ߫ ߢߊ ߣߌ߲߬ ߓߘߴߊ߬ߟߎ߬ ߟߊߕߊ߬ߡߌ߲߬ ߛߘߋߦߊߥߏ ߟߊ߫، ߓߊߏ߬߸ ߏ߬ ߘߊ߲߬ ߘߴߊ߬ ߝߐ ߡߊ߬ ߟߋ߬ ߘߐߙߐ߲߫߸ ߞߏ߫ ߊ߬ ߞߏ ߦߴߊ߬ߟߎ߬ ߓߟߏ߫ ߓߊ߫ ߘߐ߫߸ ߊ߬ߟߎ߬ ߢߊ ߦߴߊ߬ ߝߍ߬߸ ߞߊ߬ ߓߊ߲߫ ߞߵߊ߬ ߝߐ߫ ߞߏ߫ ߊ߬ ߤߊߞߍ ߦߋ߫ ߖߡߊ߬ߣߊ ߓߍ߯ ߓߟߏ߫߸ ߞߊ߬ ߡߊ߲߬ߕߏ߲߬ߕߍ߬ ߞߎ߲ߞߏ ߟߎ߬ ߞߟߍ߬.
ߊ߬ߟߎ߬ ߟߊ߫ ߟߊ߬ߛߋ߬ߟߌ ߣߌ߲߬ ߞߍߣߍ߲߫ ߥߊ߯ߕߌ ߡߍ߲ ߠߊ߫ ߕߋ߲߬߸ ߡߊ߲߬ߞߊ߲ ߦߋ߫ ߣߌ߲߬ ߞߏ ߟߊ߫ ߞߏߛߓߍ߫، ߞߊ߬ߕߎ߲߯߸ ߊߡߙߌߞߌ߬ ߞߊ߲ߕߌ߮ ߘߏߣߊߟ ߕߑߙߐ߲ߔ ߓߘߴߊ߬ ߦߌ߬ߘߊ߬߸ ߞߏ߫ ߝ߭ߣߋߖ߭ߎߥߋߟߊ߫ ߞߓߊߕߟߎ ߝߍߙߍ߲ߘߎ߲߫ ߞߋ߲߬ߥߟߎ߬ ߃߀ ߤߊ߲߯ ߅߀ ߓߘߊ߫ ߟߊߘߏ߲߬ ߞߊ߬ߝߏ߫ ߘߍ߬ߣߍ߲ ߞߣߐ߫ ߕߋ߲߬߸ ߥߊ߲ߛߌ߲ߕߐ߲߫ ߠߊ߫ ߜߋ߬ߟߎ߲߬ߠߌ߲ ߞߣߐߡߊ߬، ߣߊ߲߬ߕߌ߰ ߦߙߍߞߍߟߌ ߡߍ߲ ߞߍ߫ ߘߊ߫ ߓߌ߲ߠߊߥߎߟߋ߲ ߕߋ߬ߟߋ߫ ߃ ߡߊ߬ ߞߊ߯ߙߞߊߛ߸ ߣߊ߲߬ߕߌ߰ ߅߅ ߟߋ߬ ߝߊ߰ ߘߊ߫ ߝ߭ߣߋߖ߭ߎߥߋߟߊ߫ ߣߊ߲߬ߕߌ߮ ߟߎ߬ ߣߌ߫ ߞߎ߳ߓߊ߫ ߣߊ߲߬ߕߌ߮ ߟߎ߬ ߘߐ߫، ߊ߬ߟߋ߬ ߖߊ߲߬ߖߏ߲߬ ߞߋߟߋ߲ ߠߋ߬ ߞߏߛߐ߲߬߸ ߊ߬ߟߎ߬ ߓߘߊ߫ ߘߍߟߑߛߌ ߙߏߘߙߌߖߍߖ߭ ߞߙߍߞߙߍ߫ ߞߵߏ߬ ߞߍ߫ ߞߊ߲ߕߌ߯ ߘߍ߲߬ߞߍ߬ߕߎ߬ߣߍ߲ ߘߌ߫، ߏ߬ ߞߵߊ߬ ߦߌ߬ߘߊ߬ ߞߏ߫ : <<ߝ߭ߣߋߖ߭ߎߥߋߟߊ߫ ߞߎ߲߬ߠߊ߬ߛߌ߮ ߟߋ߬ ߒ߬ ߠߊ߫ ߖߡߊ߬ߣߊ ߡߊߡߙߊ߬ ߟߊ߫߸ ߡߐ߰ ߜߘߍ߫ ߛߌ߫ ߕߴߊ߬߬ ߡߙߊ߬ ߟߊ߫.>>
ߣߴߌ ߞߊ߬ ߝߘߊ߬ߝߌ߲߬ߠߊ߫ ߕߊ߬߸ ߞߞߢ ߣߌ߫ ߖߡߊ߬ߣߊ߬ ߛߌߦߊߡߊ߲߫ ߠߋ߬ ߓߘߊ߫ ߥߊ߫ ߡߙߌߦߊ߫ ߞߋߟߋ߲߫ ߞߊ߲߬ ߣߌ߲߬ ߞߏ ߡߊߞߕߌ ߘߐ߫߸ ߦߏ߫ ߜ߭ߊ߯ߣߊ߬߸ ߗߊߘ߸ ߝߘߊ߬ߝߌ߲߬ߠߊ߫ ߥߙߏ߬ߘߎ߮߸ ߊ߬ ߣߌ߫ ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ߸ ߏ߬ ߟߎ߬ ߡߍ߲ ߠߎ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߢߊ ߦߋ߫ ߣߌ߲߬ ߞߏ ߝߍ߬߸ ߊ߬ ߣߌ߫ ߞߏ߫ ߟߊ߬ߞߊ߲߬ߘߊ߬ߟߌ ߞߏߟߊߕߍ߯ߘߊ ߦߋ߫ ߟߊ߬ߘߍ ߡߊߞߟߌ߫، ߞߞߢ ߟߋ߬ ߕߊ ߘߐ߫ ߛߊ߫߸ ߊ߬ߟߎ߬ ߞߊ߲߫ ߞߏ߫ ߝ߭ߣߋߖ߭ߎߥߋߟߊ߫ ߞߏߢߊ ߣߌ߲߬ ߓߘߊ߫ ߕߊ߬ߡߌ߲߫ ߓߘߊ߫ ߞߏ ߟߊ߫߸ ߊ߬ ߓߘߊ߫ ߓߌ߬ߟߊ߬ ߘߎߢߊ߫ ߟߋ߬ ߖߍ߬ߘߍ ߞߊ߬ߛߌ ߘߐ߫ ߡߎ߬ߕߎ߲߬.
ߞߎ߲߬ߝߊ߮ ߘߐ߫߸ ߞߌ߬ߢߍ߬ߞߏ߲ߞߏ߫ ߛߌ߲߬ߝߏ߲߬ߘߊ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߋ߫ ߡߍ߲ ߞߋߟߋ߲ ߞߊ߲߬߸ ߏ߬ ߟߋ ߘߎߢߊ߫ ߛߊ߬ߙߌ߬ߦߊ ߡߊߓߏ߲߬ߧߊ ߘߌ߫߸ ߊ߬ ߣߌ߫ ߖߊ߬ߡߊ ߟߊ߫ ߟߊ߬ߞߊ߲߬ߘߊ߬ߟߌ ߛߙߊߕߌ ߟߎ߬߸ ߏ߬ ߡߍ߲ ߜߘߌߛߌ߰ߣߍ߲߫ ߞߊ߬ߝߏ ߟߎ߬ ߟߊ߫ ߖߘߍ߬ߕߌ߰ߦߊ ߞߊ߲߬ ߞߢߊߟߌ߫ ߓߟߏ ߡߊ߬.
ߦߟߌߓߌߟߊߟߌ߫ ߓߟߏ ߡߊ߬ ߝߣߊ߫߸ ߊߟߎ߫ ߦߴߊ߬ ߟߐ߲߫ ߖߡߊ߬ߣߊ߫ ߛߊ߬ߓߊ ߢߌ߲߬ ߠߎ߬ ߓߊ߲߫ ߛߊ߲ ߠߋ߬ ߊ߬ߟߎ߬ ߕߊߢߐ߲߯ ߠߴߊߡߙߌߞߌ߬ ߟߊ߫ ߣߌ߲߬߸ ߞߵߊ߬ ߓߍ߲߬ ߏ߬ ߟߎ߬ ߟߊ߫ ߘߌ߬ߢߍ߬ߡߊ߬ߛߓߍ߬ ߞߏ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.