ߓߍ߯ ߞߊ߬ ߓߊ߬ߣߊ߲߬ߞߐ߬ߣߍ߲ ߡߍ߲ ߡߊߟߐ߲߫ ߞߟߏ߫ ߞߊߘߌߓߊ߯ߕߐ ߟߎ߬ ߣߌ߫ ߡߎ߬ߥߊ߬ߓߊ߰ߕߐ ߟߎ߬ ߣߌ߫ ߜߎ߬ߛߎ߲߬ߞߎ߬ߓߊ߰ߕߐ ߟߎ߫ ߖߌ߰ߦߊ ߟߊ߫߸ ߣߴߊ߬ ߣߌ߫ ߞߊ߲ߞߊ߲߫ ߕߍ ߦߋ߫ ߞߎߘߍ߫ ߘߊ߲ߘߐ߫ ߘߌ߫߸ ߏ߬ ߟߎ߬ ߦߋ߫ ߞߊ߬ߛߌ߬ ߟߊ߫ ߞߊ߬ߙߊ߲߬ߡߐ߰ ߞߏ߬ߖߊ ߣߌ߫ ߖߌ߫ ߞߏߖߊ ߟߋ߬ ߟߊ߫ ߕߋ߲߬ ߞߏߛߓߍ߫.

ߞߊ߬ߙߌ߬ߝߊ߬ߡߘߎ߬ߦߊ߫ ߘߎ߰ߣߍ߲ ߘߏ߫ ߟߋ߬ ߓߊ߬ߣߊ߲߬ߞߐ߬ߣߍ߲ ߘߌ߫߸ ߞߊ߲ߞߊ߲߫ ߘߊߝߍ߬ ߞߎߘߍ߫ ߘߊ߲ߘߐ߫ ߟߊ߫߸ ߊ߬ ߡߊߟߐ߲ߣߍ߲߫ ߓߍ߯ ߟߊߘߍ߬ߣߍ߲ ߓߟߏ߫ ߞߏ߫ ߞߋߟߋ߲߫ ߘߐ߫: ߏ߬ ߟߋ ߓߋ߲ߓߊ ߟߎ߬ ߟߊ߫ ߟߐ߲ߠߌ߲߫ ߞߘߐ߬ߡߊ߲ ߘߏ߫ ߘߌ߫߸ ߞߊߘߌ߫ ߘߊ߲ߘߊ߸ ߜߎ߬ߛߎ߲߬ߞߎ ߣߌ߫ ߡߎ߬ߥߊ ߟߎ߬߸ ߞߵߏ߬ ߟߎ߬ ߘߊ߲ߘߊ߫ ߣߌ߫ ߘߙߐߡߍ ߕߍ߫ ߡߌ߬ߣߊ߬ ߟߊ߫، ߖߊ߲߬ߞߊ߬ߙߏ߬ߕߐ ߓߌ߫ ߦߙߌߞߊ߫ ߟߋ߬ ߦߊ߲߬߸ ߡߍ߲ ߠߎ߬ ߓߐߣߍ߲߫ ߛߏ߫ ߛߌߦߊߡߊ߲߫ ߞߣߐ߫ ߞߊ߬ ߣߊ߬߸ ߞߍ߲ߘߍߦߊ ߢߌߣߌ߲߫ ߞߊ߲ߡߊ߬߸ ߡߍ߲ ߠߎ߬ ߖߍ߬ߘߍ ߣߐ߬ ߊ߬ߟߎ߬ ߞߐ߲ߓߐ߫ ߟߊ߫ ߘߊ߲ߘߊߛߏ ߘߐ߫ ߞߊ߬ ߥߊ߫ ߦߋ߲߬ ߞߊ߬ߣߌ߲߬، ߓߊ߬ߣߊ߲߬ߞߐ߬ߣߍ߲ ߠߊ߫ ߞߊߘߌ߫ ߘߊ߲ߘߊ ߏ߬ ߣߴߊ߬ ߕߊ߫߸ ߜߟߍ߬ߦߊ߬ ߜߘߍ߫ ߦߴߊ߬ߟߎ߫ ߞߊ߲߬߸ ߡߍ߲ ߖߎ߯ߡߊ߲߫ ߞߏߛߓߍ߫߸ ߏ߬ ߟߋ ߞߊ߬ߙߊ߲߬ߡߐ߰ ߞߏ߬ߖߊ ߘߌ߫߸ ߊ߬ ߣߌ߫ ߖߌ߫ ߞߏߖߊ߫ ߘߊ߲߬ߠߊߕߊ߬ߡߌ߲߬ߣߍ߲.

ߡߊ߬ߡߎߘߎ߬ ߞߡߊ߬ߙߊ߬ ߡߍ߲ ߦߋ߫ ߓߊ߬ߣߊ߲߬ߞߐ߬ߣߍ߲ ߛߌ߰ߓߊ߮ ߘߏ߫ ߘߌ߫߸ ߊ߬ ߞߊ߲߫ ߞߏ߫ ߊ߬ߟߎ߬ ߟߊ߫ ߞߊ߬ߙߊ߲߬ ߞߏ ߦߋ߫ ߞߌ߬ߣߌ߲߬ߞߌ߬ߣߌ߲߬ ߞߏ ߣߌ߫ ߡߊ߬ߢߌ߬ߡߊ߬ߞߏ ߟߋ߬ ߕߍߡߊ߬ ߕߋ߲߬، <<ߞߊ߬ߙߊ߲߬ߕߊ ߦߴߊ߲ ߓߟߏ߫ ߦߊ߲߬߸ ߓߏ߲ߞߣߐ߫ ߥߐ߯ߙߐ߫ ߢߐ߲߰߸ ߓߊ߬ߙߌ߬ ߞߊ߬ߙߊ߲߬ߡߐ߯ ߟߋ߬ ߕߴߦߊ߲߬ ߝߊߦߌߘߊ߫، ߓߊߏ߬ ߝߌ߬ߟߊ ߡߍ߲ ߦߊ߲߬߸ ߞߋߟߋ߲ ߡߊ߲߫ ߞߍ߲ߘߍ߫߸ ߊ߬ ߕߐ߬ ߞߋߟߋ߲ ߖߍ߬ߘߍ ߡߊ߫ ߕߊ߬ ߊ߬ ߢߌ߬ߡߊ ߟߊ߫، ߊ߲ߠߎ߬ ߘߋ߲ߓߊߕߌ߮ ߟߎ߫ ߟߋ߬ ߖߍ߬ߘߍ ߞߵߊ߬ ߡߙߌߘߐߕߊ߬ ߞߐ ߟߊ߫߸ ߞߏ߫ ߊ߲ ߧߋ߫ ߥߊߘߌ ߟߊߘߍ߬ ߞߵߊ߬ ߘߴߊ߬ ߡߊ߬ ߛߴߊ߬ ߘߌ߫ ߛߐ߲߬ ߘߋ߲ ߠߎ߬ ߞߊ߬ߙߊ߲ ߡߊ߬، ߣߌ߫ ߞߎ߲߬ߠߊ߬ߛߌ߮ ߟߎ߫ ߘߍ߬ߡߍ߲߬ ߘߴߊ߲ ߞߊ߲߬ ߞߊ߬ ߣߊ߬ ߞߊ߬ߙߊ߲߬ߡߐ߮ ߘߴߊ߲ ߡߊ߬߸ ߏ߬ ߘߌ߫ ߘߌߦߴߊ߲ ߧߋ߫ ߞߏߛߓߍ߫، ߘߋ߲ߓߊߕߌ߮ ߟߎ߬ ߓߌߣߍ߲߫ ߞߵߊ߬ߟߎ߬ ߘߋ߲ ߠߎ߬ ߟߊߘߏ߲߬ ߞߊ߬ߙߊ߲ ߠߊ߫߸ ߘߋ߲ߣߍ߲ ߠߎ߬ ߝߣߊ߫ ߓߌߣߍ߲߫، ߓߊ߬ߙߌ߬߸ ߞߊ߬ߙߊ߲߬ߡߐ߰ ߞߏ߬ߖߊ ߟߵߊ߲ ߞߊ߲߬.>>

ߖߌ߫ ߞߏ ߝߣߊ߫ ߛߐ߬ߘߐ߲ ߦߋ߫ ߓߊ߲߬ߓߊ߬ ߓߏ߬ ߟߊ߬ߦߟߍ ߟߋ߬ ߘߌ߫ ߓߊ߬ߣߊ߲߬ߞߐ߬ߣߍ߲ ߠߊ߫، ߡߊ߬ߡߎߘߎ߬ ߞߏ߬ߣߊ߬ߕߍ߫ ߞߵߊ߬ ߦߌ߬ߘߊ߬ ߞߏ߫ ߞߊ߬ߦߌ߯ ߞߐ߲ߕߍ߫ ߕߟߋ ߟߋ߬ ߘߐ߫߸ ߖߌ߫ ߥߙߏߝߋ߫ ߞߋߟߋ߲߫ ߟߐ߬ ߘߊ߫߸ ߞߊ߬ߦߌ߯ ߏ߬ ߕߌߢߍ߫ ߘߊ߫߸ ߊ߬ߟߎ߬ ߡߊ߫ ߘߏ߫ ߜߘߍ߫ ߛߐ߬ߘߐ߲߫ ߏ߬ ߞߐ߫. <<ߊ߬ ߕߘߍ߬ ߘߐߓߍ߲߬ ߠߴߊ߲ ߓߟߏ߫ ߛߋ߲߬ߢߊ߬ ߛߌߦߊߡߊ߲߫߸ ߓߊ߬ߙߴߊ߲ ߛߋߞߏ ߡߊ߫ ߛߴߊ߬ ߞߘߐ߫، ߊߟߌߝߊ߫ ߕߟߋ ߘߐߐ߫߸ ߖߌ߫ ߥߙߏߝߋ߫ ߞߋߟߋ߲߫ ߟߐ߬ ߘߊ߫ ߖߊ߰ߣߍ ߓߟߏ߫ ߖߊ߲߬ߞߊ߬ߙߏ߬ߕߐ ߟߎ߬ ߦߋ߫߸ ߏ߬ ߟߋ ߞߋߟߋ߲߫ ߔߋ߫ ߦߋ߫ ߛߏ߫ ߡߐ߮ ߟߎ߫ ߖߌ߰ ߘߐ߫ ߦߊ߲߬ ߕߋ߲߬، ߖߌ߫ ߞߏ߫ ߜߟߍߦߊ ߦߴߊ߲ ߞߊ߲߬ ߞߏߛߓߍ߫߸ ߓߊ ߞߋߟߋ߲ ߏ߬ ߕߍ߫ ߓߍ߯ ߘߓߐ߫ ߟߊ߫، ߝߏ߫ ߞߊ߲ߡߋߙߋ߲ ߠߎ߬ ߞߊ߬ ߞߐ߬ߟߐ߲ ߡߍ߲ ߛߋ߲߬߸ ߏ߬ ߟߋ ߦߋ߫ ߡߊ߬ߘߍ߬ߡߍ߲߬ߠߌ߲߬ ߞߍ߫ ߟߊ߫ ߕߎ߬ߡߊ ߘߏ߫ ߟߎ߫ ߟߊ߫، ߡߍ߲ ߠߎ߬ ߦߋ߫ ߝߎߥߊ ߞߊ߲߬߸ ߏ߬ ߟߎ߬ ߦߋ߫ ߥߊߟߌߥߊߟߌ ߟߋ߬ ߕߊ߬ ߟߊ߫ ߛߐ߲߬߸ ߊ߬ߟߎ߬ ߓߊ߯ ߘߎ߲ ߠߝߊ߫߸ ߞߊ߬ ߣߵߊ߬ ߕߊ߬ ߞߊ߬ ߥߴߊ߬߬ ߘߌ߫، ߊ߲ ߡߊ߬ߞߏ ߦߋ߫ ߥߙߏ߬ߝߋ ߟߊ߫ ߦߊ߲߬߸ ߞߋߟߋ߲߫ ߕߍ߫ ߝߌ߬ߟߊ߬ ߕߍ߫.>>

ߓߊ߬ߣߊ߲߬ߞߐ߬ߣߍ߲ ߕߍ߫ ߛߏ߫ ߜߊ߲ߛߊ߲߫ ߘߌ߫ ߘߋ߬، ߞߵߏ߬ ߞߎ߲߭ ߞߍ߫ ߛߋ߲߬ ߓߊ߯ߙߊ ߡߍ߲ ߦߋ߫ ߞߍ߫ ߟߴߊ߬ߟߎ߬ ߓߟߏ߫ ߦߋ߲߬߸ ߏ߬ ߓߘߴߊ߬ߟߎ߬ ߟߊߞߏߟߐ߲߫ ߓߍ߯ ߓߟߏ߫߸ ߡߐ߱ ߟߎ߬ ߦߋ߫ ߓߐ߫ ߟߊ߫ ߦߙߐ߫ ߛߌߦߊߡߊ߲߫ ߠߋ߬ ߘߐ߫ ߖߡߊ߬ߣߊ ߢߊߝߍ߬ ߞߵߊ߬ߟߎ߬ ߛߌ߲߫ ߦߋ߲߬ ߠߊ߫߸ ߊ߬ߟߎ߫ ߘߏ߲߬ ߦߋ߫ ߞߊߙߏ߫ ߦߙߌߞߊ߫ ߟߋ߬ ߞߍ߫ ߟߊ߫ ߦߋ߲߬، ߦߏ߫ ߝߊ߲ߕߊ߬ ߖߊߥߙߊ߫ ߦߴߏ߬ ߟߊߛߙߋߦߊ߫ ߟߊ߫ ߢߊ ߡߍ߲ ߡߊ߬߸ ߏ߬ ߡߍ߲ ߣߊ߬ߣߴߊ߬ ߘߋ߲ ߘߊ߲ߘߊ߫ ߦߌߟߊ ߓߊ߬ߣߊ߲߬ߞߐ߬ߣߍ߲ ߠߊ߫߸ ߘߊ߬ߡߊ߲ ߠߋ߬ ߓߋ߬ ߘߴߊ߬ߟߋ ߘߋ߲ ߞߊ߲߬، <<ߒ ߘߋ߲ ߞߐ ߟߋ߬ ߞߊߘߌ߫ ߘߊ߫ ߘߊ߬ߡߊ߲ ߓߟߏ߫، ߊ߬ߟߎ߫ ߞߵߊ߬ ߝߐ߫ ߒ ߧߋ߫ ߞߏ߫ ߒ ߧߋ߫ ߣߊ߬ ߓߊ߬ߣߊ߲߬ߞߐ߬ߣߍ߲ ߠߊ߫߸ ߞߏ߫ ߒ ߞߊ߫ ߥߊ߫ ߘߊ߲ߘߊߛߏ ߟߊ߫ ߘߋ߬، ߓߌ߬ ߕߋ߲߬߸ ߊ߲ ߛߊ߲߬ ߞߋߟߋ߲ ߠߋ߬ ߦߊ߲߬ ߣߌ߲߬߸ ߒ ߘߋ߲ ߓߘߴߊ߬ ߕߊ߯ߡߊ ߘߊߡߌ߬ߣߊ߬، ߘߊ߲ߘߊߟߌ ߦߋ߫ ߞߍ߫ ߟߴߊ߬ߟߎ߬ ߓߟߏ߫ ߝߌߛߙߌ ߟߋ߬ ߟߊ߫ ߦߊ߲߬߸ ߓߊ߬ߙߌ߬ ߝߋ߲ ߓߍ߯ ߟߋ߬ ߞߏߖߊ ߦߋ߫ ߦߊ߲߬: ߟߊ߫ ߦߙߐ߫ ߞߏ߸ ߖߌ߫ ߞߏ.>>

ߡߏ߬ߛߏ ߣߌ߲߬ ߞߊ߬ ߝߏ߬ߟߌ ߟߊߛߋ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߬߸ ߏ߬ ߡߍ߲ ߦߋ߫ ߖߌ߬ߣߍ߫ ߘߐ߬ߕߊߡߌ߲ ߞߊ߲ߕߌ߮ ߘߌ߫، <<ߞߊߙߏ ߺ ߞߊߙߏ߫߸ ߊ߲ ߘߌ߫ ߡߊ߬ߟߏ ߛߐ߬ߘߐ߲߬߸ ߕߌ߬ߦߊ߬ ߕߟߎ߸ ߊ߬ ߣߌ߫ ߥߊߘߌߣߍ߲߫߸ ߛߏ߬ߓߏ ߖߍ߬ߘߍ ߦߋ߫ ߟߊߣߊ߬ ߟߴߊ߲ ߡߊ߬ ߛߐ߲߬، ߊ߲ ߧߴߊ߬ ߝߏ߬ ߟߴߏ߬ ߟߊ߫، ߓߊ߬ߙߌ߬ ߓߏ߲ ߡߍ߲ ߟߐ߬ߣߴߊ߬ ߓߟߏ߫߸ ߏ߬ ߘߐ߯ߡߊ߲߫ ߤߊ߲߫، ߞߊ߬ߕߎ߲߯߸ ߡߐ߰ ߅ ߤߊ߲߯ ߡߐ߰ ߕߊ߲߫ ߘߌ߫ ߛߋ߫ ߛߌ߬ ߟߊ߫ ߓߏ߲߫ ߞߋߟߋ߲ ߞߣߐ߫، ߏ߬ ߟߋ ߞߘߐ ߦߋ߫߸ ߞߏ߫ ߝߏ߫ ߘߏ߫ ߜߘߎ߫ ߟߋ߬ ߦߋ߫ ߟߐ߬.>>

ߓߊ߬ߣߊ߲߬ߞߐ߬ߣߌ߲ ߓߘߊ߫ ߞߍ߫ ߡߐ߱ ߟߎ߫ ߖߌ߱ ߘߌ߫ ߞߍ߲ߘߍߦߊ ߛߌߟߊ ߝߍ߬، ߓߊ߬ߙߌ߬߸ ߕߙߐߦߊ ߣߌ߫ ߛߍ߱ ߡߍ߲ ߦߴߊ߬ߟߎ߫ ߞߊ߲߬߸ ߊߟߎ߫ ߕߟߏ߫ ߦߴߏ߬ ߟߊ߫ ߘߋ߬߸ ߏ߬ ߘߏ߫ ߟߋ߬ ߞߊ߬ߙߊ߲߬ߡߐ߰ ߞߏ߸ ߖߌ߫ ߞߏ߸ ߓߏ߲߫ ߞߏ ߞߟߏ߫ ߞߊߘߌߓߊ߯ߕߐ ߟߎ߬ ߦߋ߫߸ ߏ߬ ߛߍ߱ ߦߴߊ߬ߟߎ߫ ߞߊ߲߬ ߓߌ߬ ߞߏߛߓߍ߫، ߒ߬ߓߊ߬߸ ߊ߬ ߥߊ߯ߕߌ ߓߘߊ߫ ߛߋ߫߸ ߊ߲ ߠߊ߫ ߞߎ߲߬ߠߊ߬ߛߌ߮ ߟߎ߬ ߦߴߊ߬ߟߎ߬ ߢߊ ߟߐ߬ ߝߊ߬ ߓߘߊ ߘߊ߲ߘߊߟߌ ߘߐ߫߸ ߞߊ߬ ߛߋ߫ ߘߍ߬ߡߍ߲ ߠߊߛߋ߫ ߟߊ߫ ߡߐ߰ ߟߎ߫ ߡߊ߬߸ ߡߍ߲ ߠߎ߬ ߦߴߊ߬ߟߎ߬ ߡߊߘߍ߬ߡߍ߲߬ ߠߊ߫ ߖߡߊ߬ߣߊ ߟߊߥߙߎߞߌ ߓߊ߯ߙߊ ߟߎ߬ ߟߊ߫.

ߣߊߡߊ߲߬ߖߊ߲߫ ߡߐ߰ߟߊ߲߬ߘߌ߫ ߡߊ߰ߛߎ߬ߓߊ߬ ߣߌ߫ ߛߎ߯ߟߊ߲ߘߌ߫ ߛߊ߬ߞߐ߬ ߟߎ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.