ߒߞߏ ߟߊ߫ ߡߊ߲߬ߕߏ߲߬ߕߍ߬ ߜߙߊ ߓߘߊ߫ ߞߎ߲߭ߝߊ߰ ߕߎߟߊߝߌ߲ ߕߋ߬ߟߋ߫ ߂߈ ߣߌ߲߬ ߡߊ߬ ߊߓߏߓߏ߬ ߞߊ߬ߝߏ߬ߙߋ߲ ߝߏ߯ߓߊ ߞߣߐ߫߸ ߊߓߌߖߊ߲߬، ߕߋ߬ߟߋ߫ ߛߓߊ߬ ߖߌߖߊ߬ߣߍ߲ ߞߣߐ߫߸ ߗߋߘߋ߲߫ ߈߂߸ ߡߍ߲ ߠߎ߬ ߓߐ߫ ߘߊ߫ ߡߊ߬ߟߌ ߟߊ߫߸ ߖߌ߬ߣߍ߬ ߞߣߐ߫߸ ߟߌߓߋߙߌߦߊ߫߸ ߝߊ߬ߙߊ߲߬ߛߌ߬߸ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲߸ ߛߙߊ߬ߟߏ߲߫߸ ߜ߭ߊ߲ߓߌ߫߸ ߊ߬ ߣߌ߫ ߓߙߎߞߌߣߊ߫ ߝߊ߬ߛߏ߬߸ ߞߊ߬ ߣߊ߬ ߒߞߏߞߏ ߜߊ߬ߙߊ ߘߐ߫߸ ߞߊ߬ ߡߙߌ߫ ߡߝߊߟߋ߲ ߠߎ߬ ߞߍ߫ ߒߞߏ ߟߊ߫ ߜߟߍ߬ߦߊ߬ ߞߏ ߟߎ߬ ߣߴߊ߬ ߟߊ߫ ߛߌߣߌ߲߫ ߣߊ߬ߕߐ ߞߏ ߟߎ߫ ߞߊ߲߬.

ߗߋߘߋ߲ ߓߍ߯ ߞߵߊ߬ ߕߊ߫ ߡߙߌߦߊ߫ ߦߌߘߊ߫ ߞߍ߫߸ ߡߐ߰ߓߊ߬ ߞߟߊߒߞߋ߫ ߛߌߦߊߡߊ߲߫ ߠߋ߬ ߕߘߍ߬ ߞߣߍ ߞߊ߲߬߸ ߡߍ߲ ߠߎ߬ ߞߊ߬ ߛߙߊ߬ߣߎ߲ ߕߊ߬.

ߜߋ߲ߞߐ߰ߖߌ߬ߘߊ ߟߊ߬ߞߟߏ߬ߞߟߏ߬ߟߌ ߞߏߕߌ߯ߘߊ ߞߐߦߌߘߊߓߊ߮ ߕߘߍ߬ ߞߣߍ ߞߊ߲߬߸ ߏ߬ ߞߊ߬ ߒߞߏ ߛߍ߬ߘߏ߲߬ߠߊ ߟߎ߬ ߞߎߟߎ߲ߖߋ߫ ߊ߬ߟߎ߬ ߟߊ߫ ߘߐ߬ߖߊ ߟߊ߫: <<ߞߊ߲ ߕߍ߫ ߓߌ߬ߟߊ߬ߢߐ߲߰ߡߊ ߡߎ߬ߙߊ߲ ߘߐߙߐ߲߫ ߘߌ߫ ߘߋ߬߸ ߊ߬ ߦߋ߫ ߟߐ߲ߠߌ߲ߦߊ ߟߎ߬ ߜߍ߲߬ߜߍ߲߬ߟߊ߲ ߠߋ߬ ߘߌ߫߸ ߊ߬ ߣߌ߫ ߟߐ߲ߠߌ߲ ߣߌ߫ ߡߐ߬ߟߐ߲ ߠߎ߬، ߒߞߏ ߦߋ߫ ߛߓߍߟߌ߫ ߞߊ߲ߞߋ߫ ߟߋ߬ ߘߌ߫߸ ߡߍ߲ ߠߊߘߊ߲ߣߍ߲߫ ߡߊ߲߬ߘߋ߲߬ ߞߊ߲ ߠߎ߬ ߟߊߣߌߡߦߊ߫ ߞߊ߲ߡߊ߬߸ ߞߵߊ߬ߟߎ߬ ߟߊ߫ ߡߊ߲߬ߕߎ߬ߙߋ߬ߦߊ ߘߏ߲߬ ߊ߬ߟߎ߬ ߓߟߏ߫߸ ߞߵߊ߬ߟߎ߬ ߟߖߊߙߌ߫ ߘߎߢߊ߫ ߟߊ߫، ߏ߬ ߘߐ߫߸ ߒߞߏ ߢߌ߲߬ ߣߌ߫ ߞߐߡߊߓߌ߲ߓߌ߲ߠߌ߲ ߠߋ߬ ߦߊ߫ ߞߊ߲߫.>>

ߡߊ߬ߟߌ ߟߊ߫߸ ߞߏ߲߬ߓߏ ߌߓߙߊߤߌߡ ߞߋߕߊ߬ ߞߵߊ߬ ߦߌ߬ߘߊ߫ ߜߙߊ߬ ߓߟߋߓߟߋ ߣߌ߲߬ ߞߣߍ ߞߊ߲߬߸ ߞߏ߫: <<ߊ߲ ߧߋ߫ ߒߞߏ ߘߍ߬ߡߍ߲߬߸ ߊ߬ ߦߋ߫ ߢߝߍߟߊ ߟߊߛߐ߬ߘߐ߲߬߸ ߖߐ߲߰ߛߴߊ߬ ߘߌ߫ ߞߍ߫ ߝߘߊ߬ߝߌ߲߬ ߞߊ߲ ߠߎ߬ ߛߓߍߟߊ߲ ߘߌ߫.>>

ߊ߬ ߞߎߡߊ߫ ߘߊ߫ ߛߎߥߟߊߛߐߝ ߞߊ߲߬߸ ߏ߬ ߡߍ߲ ߦߋ߫ ߥߊߟߌߘߊ߫ ߘߌ߫߸ ߡߍ߲ ߓߘߊ߫ ߟߥߊߟߌߟߊ߲ ߠߎ߬ ߟߊߘߊ߲߫߸ ߞߊ߬ ߓߊ߲߫ ߞߊ߬ ߟߍߙߘߊ߫ ߢߎߡߍߙߋ߲ߡߊ ߛߌ߰߰ ߛߋ߲߬ߠߊ߫ ߒߞߏ ߛߓߍߟߌ ߟߊߥߙߎߞߌ߫ ߞߊ߲ߡߊ߬.

ߊߡߙߌߞߌ ߛߌ߰ߓߊ߯ ߡߎߛߊ߫ ߞߐ߲ߘߍ߫ ߡߍ߲ ߦߋ߫ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲ ߒߞߏ߫ ߕߐ߲ ߞߊ߲ߕߌ߮ ߘߌ߫߸ ߏ߬ ߞߊ߬ ߢߊߝߐߟߌ߫ ߞߟߊ߬ߟߡߊ߬ ߞߍ߫ ߊ߬ߟߎ߬ ߟߊ߫ ߘߐ߬ߖߊ߬ ߞߍߣߍ߲ ߠߎ߬ ߞߊ߲߬ ߒߞߏ ߟߊߘߏ߲߬ ߞߏ ߘߐ߫ ߊߡߙߌߞߌ߬ ߖߊ߯ߓߘߊ ߘߏ߫ ߟߎ߫ ߟߊ߫߸ ߦߏ߫ ߤߊ߯ߙߑߝ߭ߊ߯ߙ ߣߌ߫ ߝߌߟߊߘߍߟߑߝߌ߫ ߣߌ߫ ߞߏߟߐ߲ߓߌ߫ ߟߎ߫ ߘߐ߫.

ߛߌ߲߬ߝߏ߲߬ߧߊ߬ߟߌ߬ߟߊ ߟߎ߬ ߟߊ߫ ߞߎ߲߬ߠߊ߫߸ ߒ.ߥ.ߛ.ߖ ߞߊ߲ߕߌ߮ ߡߍ߲ ߦߋ߫ ߊߓߌߖߊ߲߬߸ ߏ߬ ߞߊ߬ ߝߏ߬ߟߌ ߟߊߛߋ߫ ߜߋ߲ߞߐ߰ߖߌ߬ߘߊ ߞߎ߲߬ߠߊ߬ߛߌ߮ ߡߊ߬߸ ߞߊ߬ ߓߊ߲߫ ߞߊ߬ ߞߟߌߟߌ ߞߍ߫: <<ߒߞߏ ߛߌ߲ߘߌ߫ ߘߊ߫ ߜߋ߲ߞߐ߰ߖߌ߬ߘߊ ߟߊ߫ ߦߊ߲߬ ߠߋ߬، ߏ߬ ߟߋ ߘߐ߫߸ ߊ߲ߠߎ߬ ߟߋ߬ ߝߟߐ߫ ߞߊ߫ ߞߊ߲߫ ߞߊ߬ ߞߍ߫ ߛߓߍߛߎ߲ ߣߌ߲߬ ߡߊߘߍ߬ߡߍ߲߬ߓߊ߮ ߘߌ߫.>>

ߜߋ߲ߞߐ߰ߖߌ߬ߘߊ ߢߍߓߊ߮ ߟߎ߬ ߟߊ߫ ߞߏߟߊߕߍ߯ ߛߊ߲ߘߐ߫ (ߞߏߖ߭ߌߡ) ߝߘߏ߬ߓߊ߬ ߞߟߊ߬ߕߌ߮ ߢߍߓߊ߯ ߘߊ߬ߎߘ ߞߐ߲ߘߍ߫߸ ߏ߬ ߞߊ߬ ߛߙߊ߬ߣߎ߲ ߕߊ߬ ߢߣߊߓߊ߮ ߟߎ߬ ߓߍ߯ ߟߊߘߍ߬ߣߍ߲ ߝߏ߬.

ߞߎߡߟߊ ߟߎ߬ ߘߐ߫߸ ߓߊ߲ߜ߭ߎߟߌ ߒߞߊ߲ߜ߭ߎߦߌ߫ ߖ߭ߏ߬ߗ߭ߍߝ ߛߑߕߋߝߊߣ ߞߊ߬ ߖߊ߬ߡߊ ߢߊߞߘߐߛߋ߫ ߋߓߙߋ߫ ߞߊ߲ ߣߌ߫ ߒߞߏ ߛߓߍߟߌ ߟߊߢߐ߲߯ߡߊ ߘߐ߫ ߞߏߛߓߍ߫߸ ߞߊ߬ ߡߐ߬ߟߐ߲ ߘߌ߫ ߝߘߊ߬ߝߌ߲߬ ߞߊ߲ ߠߎ߬ ߡߊ߬߸ ߛߏߡߐ߯ߦߊ ߕߊ߬ߝߋ߲ ߘߌ߫.

ߞߎߡߊ߫ ߟߊߓߊ߲߫ ߘߐ߫߸ ߝߏߘߋ߫ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߡߍ߲ ߦߋ߫ ߞߊ߲ߞߊ߲߫ ߒ.ߢ.ߦ.ߘ ߖߋ߬ߕߌ߰ߘߊ ߞߎ߲߬ߕߌ߰ ߛߙߍߞߍ ߘߌ߫߸ ߏ߬ ߞߊ߬ ߛߓߍߟߌ ߕߐ߬ߣߐ ߦߌ߬ߘߊ߬ ߟߐ߲ߠߌ߲ ߠߎ߬ ߟߊߛߋ ߘߐ߫: <<ߡߌ߬ߙߌ߲߬ߘߌ ߦߋ߫ ߞߎ߬ߛߊ߲߬ߧߊ߬ ߞߏ ߡߍ߲ ߠߎ߬ ߞߍ߫ ߟߊ߫߸ ߏ߬ ߟߎ߫ ߟߴߊ߬ ߟߊ߫ ߟߐ߲ߠߌ߲ߦߊ ߘߌ߫، ߟߐ߲ߠߌ߲ߦߊ ߡߍ߲ ߏ߬ ߘߌ߫߸ ߏ߬ ߦߋ߫ ߟߊߕߊ߬ߡߌ߲߬ ߠߊ߫ ߞߊ߲ ߘߏ߫ ߟߋ߬ ߛߌߟߊ ߝߍ߬߸ ߊ߬ ߞߍ߫ ߘߊ߫ ߛߓߍߟߌ߫ ߘߌ߫߸ ߥߟߊ߫ ߘߊ߫ ߘߐ߫ ߞߎߡߊ߫ ߘߌ߫، ߒ߬ߓߊ߬߸ ߥߊߟߌ߫ ߛߓߍߛߎ߲ ߠߎ߬ ߡߊ߫ ߛߋ߫ ߒ߬ߠߎ߬ ߕߊ ߏ߬ ߟߋ ߟߊߡߊ߲߬ߘߌ߬ ߟߊ߫߸ ߝߏ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߣߐ߬ ߒߞߏ ߛߓߍߟߌ ߡߍ߲ ߛߌ߲ߘߌ߫ ߟߊ߫.>>

ߢߌ߬ߣߌ߲߬ߞߊ߬ߟߌ߬ ߖߋߓߌ ߟߎ߬ ߞߍ߫ ߘߊ߫ ߏ߬ ߟߋ ߞߐ ߘߐ߫߸ ߊ߬ ߣߌ߫ ߛߙߋߓߍ߫ ߟߕߊߡߌ߲ ߠߎ߬߸ ߞߵߏ߬ ߘߌ߫ ߡߐ߰ ߞߟߊߒߞߋ ߘߏ߫ ߟߎ߫ ߡߊ߬߸ ߞߵߏ߬ ߞߍ߫ ߘߊߘߐߖߊߥߏ ߞߎ߲߭ߝߊ߰ߣߍ߲ ߘߌ߫، ߡߍ߲ ߞߏ߬ߣߌ߲ ߡߊߜߟߍ߬ߦߊ߬ ߘߊ߫߸ ߏ߬ ߟߋ ߛߍ߬ߘߏ߲ ߞߍߟߌ ߘߌ߫߸ ߛߊ߫ ߒߞߏ ߘߌ߫ ߞߍ߫ ߛߓߍߛߎ߲߫ ߖߊ߯ߓߊߟߞߊ ߘߌ߫ ߝߘߊ߬ߝߌ߲߬ߠߊ߬ ߞߣߐ߫ ߢߊ ߡߍ߲߸ ߞߊ߲ ߠߎ߬ ߛߓߍ ߘߐ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.