ߛߎ߬ߡߊ߲ ߞߍߣߍ߲߫ ߖߡߊ߬ ߛߌߦߊߡߊ߲߫ ߠߋ߬ ߛߕߊ ߘߌ߫ ߊ߲ߘߋ߫ ߘߎ߰ߣߍ߲ ߞߣߐ߫߸ ߡߍ߫ ߕߌ߲߬ߞߎߘߎ߲ ߘߐ߫߸ ߞߊ߬ ߡߐ߰ ߞߐ߬ߣߐ߲߬ߘߐ߫ ߓߐ߬ߣߐ߫ ߊ߬ ߣߌ ߘߐ߫߸ ߘߋ߲ߣߍ߲߫ ߡߐ߰ ߛߋߦߌ߲߫ ߦߴߏ߬ ߘߐ߫، ߊ߬ ߟߊߞߙߐ߬ߛߌ߬ ߘߊ߫ ߞߏ߫ ߊ߬ߟߎ߫ ߞߊ߬ ߛߊ߬ߘߌ ߟߋ߬ ߡߌ߲߬߸ ߡߐ߰ ߗߡߍ߬ ߣߌ߫ ߞߐ߫ ߟߋ߬ ߞߊ߬ ߣߌ߲߬ ߡߊ߲߬ߕߙߐ ߛߐ߬ߘߐ߲߬، ߞߍ߲ߘߍߦߊ ߞߣߐ߬ߜߍ߲ ߝߊ߰ߡߊ ߟߎ߬ ߓߘߊ߫ ߓߟߏߘߐߓߍ߲߫ ߛߌ߰ ߛߋ߲߬ߠߊ߫ ߣߌ߲߬ ߞߏ ߟߊߘߊ߲߬ ߞߊ߲ߡߊ߬߸ ߞߵߊ߬ ߛߏ߰ߟߊ߬ߓߊ߰ߕߐ ߟߎ߬ ߡߞߊߘߊ߲߫ ߞߊߟߌߦߊ߫ ߘߐ߫. ߞߏߕߌ߯ߘߊ ߓߘߊ߫ ߖߡߊ߬ߣߊ߬ߘߋ߲ ߠߎ߬ ߞߟߌ߫ ߖߊ߲߬ߕߏߒߖߘߍ߬ߘߐ ߡߊ߬.
ߞߏߢߊ ߣߌ߲߬ ߞߍ߫ ߘߊ߫ ߓߌߟߏ߲ ߠߋ߬߸ ߂߀߂߅ ߞߏߟߌ߲ߞߏߟߌ߲ ߕߟߋ߬ ߁߁߸ ߊ߲ߘߋ߫ ߘߎ߰ߣߍ߲ ߞߣߐ߫߸ ߏ߬ ߡߍ߲ ߦߋ߫ ߊߜ߭ߎ߫ ߞߊ߬ߝߏ߬ߙߋ߲ ߘߐ߫߸ ߡߍ߫ ߕߌ߲߬ߞߎߘߎ߲ ߘߐ߫߸ ߜߋ߲ߞߐ߰ߖߌ߬ߘߊ ߟߊ߫، ߊ߲ ߠߊ ߟߌ߬ߤߟߊ߫ ߛߐ߬ߘߐ߲߬ߣߍ߲߫ ߞߎ߲߬ߝߟߐ ߟߎ߬ ߘߐ߫߸ ߛߊ߬ߘߌ ߣߌ߲߬ ߡߌ߲߬ ߘߊ߫ ߡߐ߱ ߡߍ߲ ߠߎ߬ ߓߟߏ߫߸ ߊ߬ߟߎ߫ ߞߊ߬ ߞߏ ߘߏ߫ ߟߎ߫ ߟߊߞߏߟߐ߲ ߘߊߡߌ߬ߣߊ߬߸ ߡߍ߲ ߢߐ߲߰ ߕߎ߲߬ ߡߊ߫ ߘߋ߬ߙߌ߫ ߊ߬ߟߎ߫ ߡߌ߬ߣߊ߬ ߟߊ߫، ߛߘߊߓߊ߫ ߟߋ߬ ߘߏ߲߬ ߦߋ߫ ߛߊ߬ߘߌ߬ߕߌ߮ ߏ߬ ߟߊ߫ ߦߋ߲߬߸ ߡߐ߰ ߛߌߦߊߡߊ߲߫ ߦߋ߫ ߡߍ߲ ߛߊ߲߬ ߠߊ߫ ߞߵߊ߬ ߡߌ߲߬.
ߡߐ߱ ߟߎ߬ ߞߙߌ߬ߞߙߊ ߘߊߡߌ߬ߣߊ ߌߞߘߐ߫߸ ߊ߬ߟߎ߫ ߞߊ߬ ߛߏ ߝߊ߰ߡߊ ߟߎ߬ ߟߊߟߐ߲ߠߌ߲ ߘߊߡߌ߬ߣߊ߬߸ ߞߵߏ߬ ߞߎ߲߭ ߞߍ߫ ߛߊ߬ߘߌ ߣߌ߲߬ ߡߌ߲߬ߓߊ߮ ߟߎ߫ ߝߊ߬ߘߌ ߕߍ߱ ߘߴߊ߬ߟߎ߫ ߞߊ߲߬، ߞߊ߬ߕߎ߲߯߸ ߓߊ߯ߖߌ߸ ߞߣߐߓߏߙߌ߸ ߝߊ߬ߘߌ߬ ߞߟߊߦߊ߸ ߞߵߏ߬ ߟߊ߫ ߛߍ߰ ߞߐߝߌ ߞߊ߲߬߸ ߏ߬ ߓߍ߯ ߟߋ߬ ߕߍ߬ߘߍ߫ ߣߌ߲߬ ߝߍ߬، ߊ߬ ߞߏ ߟߊ߲߬ߓߏ߲ ߠߊ߫ ߥߊ߬ߙߊ ߞߏߛߐ߲߬߸ ߡߙߌߘߐ߫ ߞߊߟߌ߲ ߘߏ߫ ߟߎ߫ ߕߊ߬ ߘߊ߫ ߌߞߘߐ߫.
ߛߌ߬ߣߌ߲߬ߟߏ߲ ߂߀߂߅ ߞߏߟߌ߲ߞߏߟߌ߲ ߕߟߋ߬ ߁߂߸ ߊ߬ ߞߏ ߘߌ߯ ߘߊ߫ ߡߍ߲ ߠߎ߬ ߟߊ߫ ߓߊߞߍ߬߸ ߏ߬ ߟߎ߫ ߕߊ߬ ߘߊ߫ ߞߵߊ߬ ߥߴߊ߬ߟߎ߬ ߘߌ߫ ߕߌ߲߬ߞߎߘߎ߲ ߘߊ߲ߘߊߟߌ߫ ߕߊ߲ߓߊ߲ ߠߊ߫ (Centre hospitalier régional) ߊߘߑߖ߭ߏߔߋ߫، ߔߊ߬ߕߙߌߞ ߊߛ߭ߌ߫ ߡߍ߲ ߦߋ߫ ߕߌ߲߬ߞߎߘߎ߲ ߞߏߟߊߕߍ߯ߘߊ ߞߊ߲ߕߌ߮ ߘߌ߫߸ ߏ߬ ߞߵߊ߬ ߥߌ߬ߟߌ߫ ߟߋ߬ ߒߕߟߋߡߊ߬ ߞߊ߬ ߥߊ߫ ߛߋ߫ ߞߏߕߐ ߟߎ߬ ߝߍ߬߸ ߞߵߊ߬ߟߎ߫ ߟߌ߬ߤߟߊ ߟߐ߲߫߸ ߊ߬ ߣߌ߫ ߞߊ߬ ߟߐ߬ ߞߍ߫ ߊ߬ߟߎ߬ ߟߊ߫ ߞߏ ߞߘߐ߫.
ߟߊ߬ߛߋ߬ߟߌ ߘߏ߫ ߞߍ߫ ߘߊ߫ ߜߋߙߋ߲ߜߋߙߋ߲ߧߊ ߞߏߕߌ߯ߘߊ ߓߟߏ߫߸ ߏ߬ ߡߍ߲ ߘߐ߱ߘߏ߲߬ߣߍ߲߫ ߝߘߏ߬ߓߊ߬ ߓߛߍ߬ߦߊ ߣߌ߫ ߖߊ߯ߓߊ߫ ߖߊ߲ߞߊߙߏ ߟߎ߬ ߟߊߝߏ߭ ߟߊ߫߸ ߏ߬ ߟߎ߫ ߞߊ߬ ߖߊ߬ߕߋ߫ ߞߎ߲߬ߝߟߐ ߟߎ߬ ߟߊߓߐ߫، ߞߵߊ߬ ߦߌ߬ߘߊ߬ ߞߏ߫ ߡߐ߰ ߉߇ ߟߋ߬ ߓߍ߫߸ ߡߍ߲ ߠߎ߬ ߕߍ߫ ߟߌ߬ߤߟߊ߬ ߢߌߡߊ߫ ߘߐ߫߸ ߘߋ߲ߣߍ߲߫ ߅߄ ߣߌ߫ ߡߐ߰ߓߊ߬ ߄߃߸ ߊ߬ ߓߍ߯ ߕߊ߬ ߘߊ߫ ߞߊ߬ ߥߴߊ߬ߟߎ߬ ߘߌ߫ ߊߘߑߖ߭ߏߔߋ߫ ߘߊ߲ߘߊߛߏߓߊ ߟߊ߫، ߞߏߕߌ߯ߘߊ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߞߵߊ߬ ߓߍ߲߬ ߊ߬ ߞߏ ߜߟߍ߬ߦߊ ߡߊ߬߸ ߊ߬ߟߎ߬ ߓߘߊ߫ ߞߙߎ ߘߏ߫ ߟߎ߫ ߟߊߥߟߌ߬ ߌߞߘߐ߫ ߞߵߊ߬ߟߎ߬ ߟߊߕߊ߯ ߡߊ߬ߜߍ߲ ߠߊ߫ ߞߊߟߌߦߊ߫ ߓߟߏ ߡߊ߬߸ ߘߊ߲ߘߊߟߌߟߊ ߛߎ߯ߦߊ߫ ߛߌߦߊߡߊ߲߫ ߕߘߍ߬ ߡߍ߲ ߘߐ߫߸ ߡߍ߲ ߠߎ߬ ߜߎ ߘߌ߫ ߛߴߊ߬ ߞߏ ߡߊߣߐ߬ ߟߊ߫ ߞߊߟߌߦߊ߫ ߘߐ߫.
ߘߐ߬ߖߊ ߏ߬ ߓߍ߯ ߣߴߊ߬ ߕߊ߫ ߡߐ߱ ߟߎ߬ ߡߞߊߘߊ߲ ߘߐ߫߸ ߊ߬ ߝߊ߰ߓߊ߰ߕߐ ߛߌߦߊߦߊߣߍ߲߫ ߞߏߛߓߍ߫، ߓߊߏ߬߸ ߡߐ߰ ߞߐ߬ߣߐ߲߬ߘߐ߫ ߟߋ߬ ߛߊ߬ ߞߏ ߔߘߋߔߘߋߟߊߕߍ߰ߣߍ߲߫߸ ߘߋ߲ߣߍ߲߫ ߛߋߦߌ߲߫ ߦߴߏ߬ ߘߐ߫߸ ߊ߬ ߣߌ߫ ߡߐ߰ߓߊ߬ߞߘߐ߬ ߞߋߟߋ߲߫، ߘߋ߲ߣߍ߲ ߘߏ߫ ߓߍ߫߸ ߏ߬ ߡߊ߫ ߛߊ߲߬ ߥߐ߯ߙߐ ߓߐ߫ ߡߎߣߎ߲߬߸ ߏ߬ ߕߊ߬ ߘߊ߫ ߞߊ߬ ߥߴߊ߬ ߘߌ߫ ߞߏߞߏߘߌ߫ ߘߋ߲ߣߍ߲߫ ߘߊ߲ߘߊ߫ ߦߙߐ ߘߐ߫.
ߊ߲ ߧߋ߫ ߦߙߐ ߡߍ߲ ߘߐ߫ ߕߋ߲߬߸ ߊ߬ ߞߏ ߞߎ߲߬ ߖߐ߲ߖߐ߲߫ ߟߐ߲ߣߍ߲߫ ߕߍ߫ ߡߎߣߎ߲߬߸ ߊ߬ ߡߊ߫ ߟߐ߲߫ ߝߋ߲߫ ߞߋߟߋ߲ ߡߍ߲ ߕߍ߬ߘߍ߫ ߛߊ߬ߘߌ ߣߌ߲߬ ߘߐ߫، ߢߊߢߌߣߌ߲ߠߌ߲ ߞߏ߬ߣߌ߲ ߦߴߌߘߐ߫، ߞߊ߬ ߞߐ߲߰ ߊ߬ ߞߏ ߢߊߘߐߜߍ ߟߐ߲ ߢߍ߫߸ ߞߎ߲߬ߠߊ߬ߛߌ߮ ߓߘߴߊ߬ ߞߊ߲ߠߊߘߌ߫ ߖߡߊ߬ߣߊ߬ߘߋ߲ ߠߎ߬ ߡߊ߬߸ ߞߏ߫ ߓߍ߯ ߦߴߊ߬ ߘߐߖߊ߬ ߞߊ߬ ߛߋ߫ ߓߊߟߏ ߟߊ߫ ߛߊߣߌ߲ߧߊ ߟߊߕߊ߲߬ߞߊ߬ ߟߊ߫߸ ߡߍ߲ ߘߏ߲߬ ߓߊ߯ ߛߌߞߊ߫ ߊ߬ ߖߍ߬ߘߍ߫ ߡߊ߬ ߌߞߘߐ߫߸ ߏ߬ ߦߋ߫ ߘߊ߲ߘߊߛߏ ߡߊߜߍ߲߫.
ߞߏߕߌ߯ߘߊ ߞߵߊ߬ ߟߊ߫ ߛߊ߲߬ߞߊ߬ ߝߏߟߌ ߟߐ߬ ߛߊ߬ߓߊ߰ߕߐ ߟߎ߬ ߞߐߙߍ ߡߊ߬߸ ߞߊ߬ ߖߊ߲߬ߞߊ߬ߙߏ߬ߕߐ ߟߎ߬ ߝߣߊ߫ ߡߊ߬ߤߌ߬ߣߊ߬ ߟߊߡߌ߬ߣߊ߬، ߞߊ߬ ߓߍ߯ ߞߟߌ߫ ߡߊ߬ߝߊ ߡߊ߬߸ ߢߐ߲߯ߘߍߡߍ߲ ߡߊ߬߸ ߊ߬ ߣߌ߫ ߓߍ߯ ߟߊ߫ ߞߏߟߊߘߍߢߐ߲߯ߦߊ߫ ߞߏߢߌߡߊ، ߊ߬ߟߎ߬ ߓߊ߲߫ ߘߊ߫ ߞߵߊ߬ ߝߐ߫ ߝߣߊ߫ ߞߏ߫ ߊ߬ߟߎ߬ ߓߍߣߊ߬ ߓߍ߯ ߟߊߟߐ߲ߠߌ߲߫ ߞߏ ߟߎ߬ ߗߏ߯ߦߊ ߟߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.