ߞߵߊ߬ ߕߏ߫ ߓߋߟߋ߲ߠߊ ߟߊ߫ ߔߊ߬ߙߌ߬ ߞߣߐ߫߸ ߖߌ߬ߣߍ߬ ߞߏߕߌ߯ ߝߟߐ߫ ߞߘߐ ߞߎߡߊ߫ ߘߊ߫ ߖߌ߬ߣߍ߫ ߘߐ߬ߕߊߡߌ߲ ߞߏߟߊߕߍ߮ ߟߎ߫ ߡߊ߬، ߊ߬ ߣߡߌߛߊߣߍ߲ ߠߋ߬ ߞߊ߬ ߞߎߡߊ ߣߌ߲߬ ߞߍ߫߸ ߡߊ߬ߓߎ߬ߙߎ߲߬ߕߌ߬ߟߌ ߣߌ߫ ߖߊ߲߬ߕߏ߬ߒߖߘߍ߬ߘߐ ߞߎߡߊ ߘߌ߫߸ ߊ߬ ߞߊ߬ ߘߎ߲߬ߓߎߦߊ߬ ߣߴߊ߬ ߟߊ߫ ߡߐ߱ ߟߎ߬ ߡߊߝߌ߲߬߸ ߞߏ߫ ߊ߬ߟߎ߬ ߓߘߴߊ߬ߟߎ߬ ߟߊ߫ ߟߊ߬ߤߘߌ ߕߌߢߍ߫߸ ߞߵߊ߬ߟߎ߬ ߗߋ ߞߍ߫ ߡߐ߰ ߟߊ߬ߕߎߣߎ߲ ߘߌ߫.
ߌߞߏߡߌ߲߬ ߓߍ߯ ߟߊߘߍ߬ߣߍ߲ ߦߴߊ߬ ߞߊ߬ߟߊߡߊ߬ ߢߊ ߡߍ߲ ߡߊ߬߸ ߡߊߡߊߘߎ߫ ߛߋߟߎ߫ ߘߊߟߍ߲߬ ߖߊߟߏ߫ ߡߍ߲ ߦߋ߫ ߖߌ߬ߣߍ߬ ߞߏߕߌ߯ ߝߟߐ߫ ߞߘߐ߬ߡߊ߲ ߠߎ߬ ߘߏ߫ ߘߌ߫߸ ߊ߬ߟߋ ߟߊ߫ ߢߊߣߌ߲ߡߊߓߏߙߌ ߘߌ߫ ߥߊ߯ߕߌ߫ ߖߊ߲߫ ߓߐ߫ ߡߎ߬ߕߎ߲߬، ߏ߬ ߟߋ ߘߐ߫߸ ߊ߬ ߟߊ߫ ߞߎߡߊ ߓߍ߯ ߦߋ߫ ߞߍ߫ ߟߊ߫ ߖߡߊ߬ߣߊ ߞߐߞߊ߲߬ ߠߋ߬، ߒ߬ߓߊ߬߸ ߞߵߊ߬ ߕߏ߫ ߞߐߞߊ߲ߠߊ߫ ߞߋߟߋ߲ ߏ߬ ߟߋ ߘߐ߫ ߣߌ߲߬ ߝߣߊ߫߸ ߞߊ߬ ߘߎ߲߬ߓߎߦߊ߬ ߣߴߊ߬ ߟߊ߫ ߞߎ߲߬ߠߊ߬ߛߌ߮ ߡߊߓߎ߬ߙߎ߲߬ߕߌ߬ ߞߏߛߓߍ߫߸ ߞߵߊ߬ߟߎ߬ ߡߊߞߕߌ߫، ߌߞߏߡߌ߲߬ ߡߐ߰ ߛߌߦߊߡߊ߲߫ ߦߴߊ߬ ߝߐ߫ ߟߴߊ߬ ߡߊ߬߸ ߞߏ߫ ߊ߬ ߞߎߡߊ߫ ߞߊ߲ ߠߋ߬ ߘߏ߲߬ߣߴߊ߬ ߘߊ߫߸ ߓߊߏ߬ ߊ߬ ߞߵߊ߬ ߕߍ߯ߜߊ߬ߛߌ߫ ߣߊ߲߬ߕߌ߮ ߢߌ߲߬ ߠߎ߬ ߟߊ߫ ߞߊ߬ߝߏ߬ ߖߊߛߏ߲ ߠߊ߫߸ ߊ߬ ߞߎߡߊ߫ ߘߊ߫ ߞߊ߬ ߡߐ߱ ߏ߬ ߟߎ߫ ߖߋ߬ߓߌ߬߸ ߞߵߊ߬ ߦߌ߬ߘߊ߬ ߞߏ߫: ߊ߬ ߞߊ߬ ߂߀߂߁ ߕߎߟߊߝߌ߲ ߕߟߋ߬ ߅ ߞߊ߬ߝߏ߬ ߖߊߛߏ߲ ߛߍߥߊ ߞߍ߫ ߟߋ߬ ߝߛߊߦߌ߫߸ ߕߡߊ߬ߖߌ߬ ߕߴߏ߬ ߘߌ߫، ߓߊ߬ߙߌ߬߸ ߞߏ߫ ߊ߬ ߞߵߊ߬ ߛߍߥߊ ߞߍ߫ ߞߵߊ߬ ߓߍ߲߬ ߏ߬ ߟߎ߬ ߘߊߘߐߞߊ߲ ߠߋ߬ ߡߊ߬ ߘߋ߬، ߓߊߏ߬ ߥߊ߯ߕߌ ߏ߬ ߟߊ߫߸ ߏ߬ ߟߎ߬ ߟߊ߫ ߞߎߡߊ ߏ߬ ߓߐߣߍ߲߫ ߕߍ߬ߘߍ߫ ߕߎ߬ߢߊ ߟߊ߫ <<ߡߍ߲ ߘߌ߫ ߖߡߊ߬ߣߊ߬ߘߋ߲ ߠߎ߬ ߡߊ߬ߞߏߢߊ߬.>> ߊ߬ ߞߏ߲߬߸ ߞߏ߫ ߡߊ߬ߞߏ ߕߘߍ߬ ߦߋ߫ ߞߎߡߊ߫ ߛߎ߮ ߏ߬ ߟߎ߫ ߟߋ߬ ߟߊ߫ ߥߊ߯ߕߌ ߏ߬ ߟߊ߫.
ߊ߬ ߟߊ߫ ߞߎߡߊ߫ ߘߐ߫: <<ߊ߬ߟߎ߬ ߓߘߊ߫ ߖߌ߬ߣߍ߬ߞߊ ߟߎ߫ ߖߊ߲߬ߝߊ߬.>> ߊ߬ ߞߵߊ߬ ߦߌ߬ߘߊ߬ ߞߏ߫ ߌ ߓߴߊ߬ ߦߋ߫ ߊ߬ ߛߐ߰ ߘߊ߫ ߣߊ߲߬ߕߌ߮ ߢߌ߲߬ ߠߎ߬ ߞߐߡߊߓߌ߲ߓߌ߲ ߡߊ߬߸ ߊ߬ߟߎ߬ ߟߊ߫ ߞߎߡߊ߫ ߝߟߐ ߏ߬ ߟߎ߫ ߟߋ߬ ߞߵߊ߬ߟߋ ߘߌߦߊ߫، ߓߊ߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߕߎ߬ߢߊ߬ ߕߍ߫ ߝߐ߫ ߟߊ߫ ߒ߬ ߠߊ߫ ߞߕߌ ߟߎ߬ ߘߐ߫ ߡߎ߬ߕߎ߲߬߸ ߡߐ߱ ߟߎ߬ ߤߊߞߍ ߡߊߓߏ߲߬ߧߊ߬ߣߍ߲߬ ߕߍ߫߸ ߊ߬ ߣߌ߫ ߞߏ߫ ߊ߬ߟߎ߬ ߘߌ߫ ߞߎ߲߬ߠߊ߬ߛߌ߮ ߟߊ߫ ߗߋߘߊ ߟߎ߬ ߓߍ߯ ߟߊ߫ ߞߏ ߟߊߕߊ߯ߡߊ߫ ߊ߬ ߢߌ߬ߡߊ ߟߊ߫، <<ߓߋߟߋ߲ߠߊ ߏ߬ ߡߍ߲ ߏ߬ ߘߌ߫ ߗߐ߫߸ ߊ߲ߠߎ߬ ߞߵߏ߬ ߟߋ ߞߐߡߊߓߌ߲ߓߌ߲߫߸ ߓߊߏ߬ ߊ߲ ߞߵߊ߲ ߘߌߦߊߣߊ߲ ߦߴߊ߬ ߞߣߐ߫߸ ߊ߬ ߞߵߊ߲ ߣߌߟߊߞߟߌ߫ ߦߙߐ߫ ߓߐ߫ ߓߍ߯ߦߊ ߕߊ߫ ߝߊ߲߭ ߝߍ߬.>> ߘߊߟߍ߲߬ ߠߋ߬ ߞߊ߲߫ ߕߋ߲߬.
ߊ߬ ߞߵߊ߬ ߦߌ߬ߘߊ߬ ߞߏ߫ <<ߛߍ߲ߠߌ߲>> ߡߍ߲ ߞߍ߫ ߘߊ߫ ߞߊ߬ߝߏ߬ ߖߊ߬ߛߏ߲߬ߠߊ ߓߟߏ߫߸ ߊ߬ ߞߊ߬ ߟߊ߬ߤߘߌ ߡߍ߲ ߕߊ߬ <<ߡߌ߬ߙߌ߲߬ߘߌ ߓߍ߯ ߢߣߊ߫߸ ߊ߬ ߣߌ߫ ߖߡߊ߬߬ߣߊ ߛߊ߬ߙߌ߬ߦߊ߬ ߓߏ߲߬ߓߊ ߢߊߞߘߐ߫.>> ߊ߬ ߣߐ߬ ߊ߬ ߞߎߡߊ߫ ߞߊ߲ ߏ߬ ߟߋ ߛߐ߬ߛߐ߬ ߟߊ߫ ߣߌ߲߬ ߓߌ߬߸ ߞߊ߬ ߓߍ߯ ߖߊ߲߬ߝߊ߬، <<ߓߊ߬ߙߌ߬߸ ߌߞߏߡߌ߲߬ ߒ߬ߠߎ߬ ߦߋ߫ ߤߙߐ ߟߋ߬ ߘߌ߫߸ ߖߓߝߘ ߝߣߊ߫ ߦߴߊ߬ ߖߌ߰ ߟߊ߫ ߞߏ߫ ߓߍ߯ ߦߴߏ߬ ߢߊ߫ ߞߋߟߋ߲ ߠߋ߬ ߡߊ߬، ߖߊ߰ ߒ߬ ߘߊ ߦߋ߫ ߖߟߊ ߟߋ߬ ߟߊ߫ ߏ߬ ߘߌ߫.>> ߊ߬ ߣߡߌߛߊߣߍ߲ ߞߵߏ߬ ߟߋ ߝߐ߫.
<<ߝߏߣߌ߲ߞߋ߫ ߡߍ߲ߖߍ߬ ߣߌ߫ ߓߌߟߐ߬ ߓߊ ߣߌ߫ ߡߊߙߎߥߊߣ ߞߡߊ߬ߙߊ߬ ߣߌ߫ ߛߊ߯ߘߎ߬ ߣߌ߬ߡߜ߭ߊ߬ ߟߎ߬ ߦߋ߫ ߡߌ߲߫؟>>
ߛߋߟߎ߫ ߘߊߟߍ߲߬ ߖߊߟߏ߫ ߟߊ߫ ߞߎߡߊ߫ ߘߊ߫߸ ߞߏ߫ ߊ߬ ߞߊߙߏ߫ ߦߙߌߞߊ ߟߋ߬ ߕߋ߲߬߸ ߟߊ߬ߕߎ߬ߣߎ߲߬ߠߌ߲߬ ߘߌߦߊߜߏߦߡߊ ߓߘߊ߫ ߞߍ߫ ߖߌ߬ߣߍ߬ ߥߊ߫ ߢߊ ߘߌ߫ ߓߘߍ߬ߓߘߍ߬ߟߌ ߘߊߞߎ߲ ߘߐ߫، ߝߏߣߌ߲ߞߋ߫ ߡߍ߲ߖߍ߬ ߓߊ߬߸ ߓߌߟߐ߬ ߓߊ ߓߊ߬߸ ߡߊߙߎߥߊߣ ߞߡߊ߬ߙߊ߫ ߓߊ߬߸ ߛߊ߯ߘߎ߬ ߣߌ߬ߡߊ߬ߜ߭ߊ߫ ߓߊ߬߸ ߊ߬ ߣߌ߫ ߕߐ߯ ߛߌߦߊߡߊ߲߫ ߜߘߍ߫ ߟߎ߫߸ ߊ߬ ߞߊ߬ ߡߍ߲ ߠߎ߬ ߓߍ߯ ߝߐ߫ ߞߋߟߋ߲ߞߋߟߋ߲߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߕߴߛߋ߫ ߢߌ߬ߣߊ߬ ߟߴߏ߬ ߟߎ߬ ߟߊ߫ ߞߏ ߟߊ߫ ߡߎ߰ߡߍ߫.
<<ߏ߬ ߟߎ߬ ߦߋ߫ ߡߌ߲߫ ߓߌ߬؟ ߡߐ߰ ߛߌ߫ ߡߴߊ߬ߟߎ߬ ߣߴߊ߬ߟߎ߬ ߦߋ߫ ߓߊߟߏ߫ ߘߐ߫، ߊ߬ ߦߋ߫ ߘߌߦߊߜߏߦߊ ߟߋ߬ ߘߴߊ߲ ߞߊ߲߬ ߞߊ߬ ߞߎߡߴߊ߬ߟߎ߬ ߟߊ߫ ߞߏ ߞߊ߲߬߸ ߞߊ߬ ߕߋߟߋ߲ߓߊߟߌߦߊ߫ ߞߏ ߟߎ߬ ߦߌ߬ߘߊ߬ ߘߎߢߊ߫ ߟߊ߫߸ ߡߍ߲ ߟߊ߫ ߘߴߊ߬ߟߎ߫ ߞߊ߲߬، ߣߴߊ߲ ߡߴߏ߬ ߞߍ߫߸ ߏ߬ ߦߋ߫ ߖߊ߲߬ߝߊ ߟߋ߬ ߘߌ߫.>> ߝߊ߲߬ߞߊߛߌ߬ߣߊ ߣߌ߲߬ ߞߵߏ߬ ߟߋ ߝߐ߫߸ ߞߊ߬ ߣߊ߲߬ߕߌ߰ ߝߊ߲ߞߊ ߣߌ߲߬ ߡߊߓߎ߬ߙߎ߲߬ߕߌ߬߸ ߞߏ߫ ߊ߬ߟߎ߬ ߓߘߊ߫ <<ߞߎ߲߬ߠߊ߬ߓߌߟߊ ߛߌ ߓߙߎ߬ߞߎ߬.>>
ߊ߬ ߞߎߡߊ߫ ߘߊ߫ ߊߟߌߥߎ߬ ߓߊ ߟߊ߫ ߞߏ ߞߊ߲߬߸ ߏ߬ ߡߍ߲ ߖߊ߲ߞߌߣߍ߲߫ ߛߊ߲߭ ߝߌ߬ߟߊ߬ ߥߛߎ߫ ߟߊߘߏ߲ ߠߊ߫ ߞߊ߬ߣߌ߲߬، <<ߓߊߏ߬ ߊ߬ ߓߘߊ߫ ߞߍ߫ ߓߘߍ߬ߓߘߍ߬ߟߌ߬ ߥߣߊ ߘߌ߫.>> ߘߊߟߍ߲߬ ߢߣߊ߫߸ ߟߊ߬ߤߘߌ ߡߍ߲ ߕߊ߬ ߘߊ߫ ߞߏ ߘߊߡߌߣߊ ߟߊ߫߸ ߊ߬ ߣߌ߫ ߊ߲ ߧߋ߫ ߥߊ߯ߕߌ ߡߍ߲ ߘߐ߫ ߕߋ߲߬߸ ߏ߬ ߥߟߏߣߍ߲߫ ߡߍ߲ ߠߊ߫߸ ߏ߬ ߟߋ: ߡߐ߰ ߡߌߘߊ ߛߊ߬ߙߌ߬ߦߊ߬ ߛߐߛߐ ߞߊ߲߬߸ ߔߔߊߞߌߛߦߊߟߊ ߟߎ߫ ߞߎ߲߬ߠߊ߬ߕߊ߲ߞߌ߲߸ ߞߕߌߓߏ߲ ߠߎ߬ ߟߊ߫ ߡߊ߬ߞߎ߲ ߕߐ߬ߢߍ߬ߓߊ߰ߕߐ ߟߎ߬ ߟߊ߫ ߕߐ߬ߢߍ߮ ߞߊ߲߬.
<<ߝߏ߫ ߊ߲ ߧߋ߫ ߥߊ߫ ߢߌ߲߬ ߠߋ߬ ߡߊ߬߸ ߞߵߊ߬ߟߎ߬ ߟߊ߫ ߕߋ߬ߟߋ ߟߊ߫، ߤߊߟߵߊ߲ ߓߊ߯ ߕߏ߫ ߞߎߡߊ߫ ߞߋߟߋ߲ ߠߋ߬ ߡߊߛߊ߬ߦߌ߲߬ ߠߊ߫ ߞߘߊߎ߫߸ ߝߏ߫ ߞߵߏ߬ ߟߋ ߞߍ߫.>>
ߛߋߟߎ߫ ߘߊߟߍ߲߬ ߖߊߟߏ߫ ߞߊ߬ ߞߟߌߟߌ ߞߍ߫ ߡߍ߲ ߡߊ߬߸ ߏ߬ ߟߋ ߖߡߊ߬ߣߊ߬ߘߋ߲ ߠߎ߬ ߡߊߞߟߌ ߘߌ߫߸ ߞߊ߬ ߡߐ߰ ߟߊߕߎߣߍ߲ ߠߎ߬ ߟߊ߫ ߞߏ ߕߎ߬ߢߊ ߟߊ߫ ߜߍ ߘߐ߫߸ ߞߊ߬ ߝߏߣߌ߲ߞߋ߫ ߡߍ߲ߖߍ߬ ߟߎ߫ ߓߌ߬ߟߊ߬. <<ߊ߬ߟߎ߬ ߦߋ߫ ߡߐ߱ ߘߍ߲߬ߞߣߍ߬ߦߊ߬ߣߍ߲ ߠߎ߫ ߟߋ߬ ߘߌ߫، ߊ߬ߟߎ߬ ߞߊ߫ ߞߊ߲߫ ߞߵߊ߬ ߟߐ߲߫ ߞߏ߫ ߊ߲ ߡߊ߫ ߢߌ߬ߣߴߊ߬ߟߎ߬ ߟߊ߫ ߞߏ ߟߊ߫.>> ߊ߬ ߞߵߏ߬ ߟߋ ߞߍ߫ ߞߎߡߊ ߞߎ߲߬ߘߏ߲ ߘߌ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫
Aucun commentaire pour le moment.