ߒߞߏ ߟߊ߫ ߡߊ߲߬ߕߏ߲߬ߕߍ߬ ߜߙߊ ߡߍ߲ ߦߴߊ߬ ߞߊ߲߬ ߜߋ߲ߞߐ߰ߖߌ߬ߘߊ ߟߊ߫ ߕߎߟߊߝߌ߲ ߕߋ߬ߟߋ߫ ߂߇ ߣߌ߲߬ ߡߊ߬ ߊߓߌߖߊ߲߬ ߞߣߐ߫ ߖߐ߫، ߟߊ߬ߘߍ߬ ߓߟߋߓߟߋ߫ ߟߋ߬ ߝߣߊ߫ ߞߍ߫ ߘߊ߫ ߛߌ߲߬ߝߏ߲߬ߘߊ߬ ߛߣߍߡߊߣߍ߲ ߠߎ߬ ߓߟߏ߫ ߜߙߊ߬ ߘߊߞߎ߲ ߘߐ߫ ߓߌ߬، ߓߍ߯ ߞߵߊ߬ ߟߊ߫ ߞߍߣߍ߲߫ ߝߐ߫߸ ߞߵߊ߬ߟߎ߬ ߟߊ߫ ߜߟߍ߬ߦߊ߬ ߝߐ߫߸ ߞߵߊ߬ߟߎ߬ ߟߊ߫ ߟߊ߬ߢߌ߬ߣߌ߲߬ ߝߐ߫ ߒߞߏ ߛߓߍߟߌ ߟߊߥߙߎߞߟߌ ߓߊ߯ߙߊ ߟߎ߬ ߘߐ߫ ߘߎߢߊ߫ ߞߣߐ߫߸ ߊ߬ ߕߌ߯ߕߌ߯ ߡߊ߲߬ߘߋ߲߬ ߖߡߊߣߊ ߟߎ߬.

ߖߊ߲߬ߖߏ ߘߟߊߞߊ߬ ߘߊ߫ ߡߊ߲߬ߘߋ߲߫ ߖߋ߬ߟߌ߬ߓߊ ߞߎߦߊߕߍ߫ ߟߋ߬ ߓߟߏ߫߸ ߞߊ߬ ߝߘߊ߬ߝߌ߲߬ߠߊ߫ ߡߐ߰ߓߊ ߟߎ߬ ߡߊߛߎ߬ߞߎ ߟߊ߫، ߏ߬ ߞߊ߬ ߞߎߡߊ ߘߌߦߊ߫ ߖߊ߬ߡߊ ߓߟߏ߫ ߞߏߛߓߍ߫.

ߓߊ߬ ߛߘߌߞߌ߬ ߛߊ߬ߣߐ߫ ߞߊ߬ ߓߐ߫ ߓߙߎߞߌߣߊ߫ ߝߊ߬ߛߏ߬߸ ߏ߬ ߡߍ߲ ߦߋ߫ ߡ߃ ߞߐߦߌߘߊ ߘߌ߫߸ ߏ߬ ߞߵߊ߬ߟߎ߬ ߟߊ߫ ߘߍ߭ ߟߊ߫ ߛߋ߲߬ߕߊ߬ ߞߍߣߍ߲ ߠߎ߬ ߢߊߝߐ߫ ߢߎߡߍߙߋ߲ߦߊߟߌ ߘߊߞߎ߲ ߘߐ߫. ߊ߬ߟߋ ߟߋ߬ ߞߵߊ߬ ߦߌ߬ߘߊ߬ ߞߏ߫: <<ߞߊ߲ ߠߎ߬ ߡߐ߬ߟߐ߲ ߦߋ߫ ߕߊ߬ ߟߴߊ߬ߟߎ߬ ߟߊ߫ ߓߍߓߊ߯ߦߊ ߣߴߊ߬ߟߎ߬ ߟߊ߫ ߞߐߓߊ߯ߦߊ ߟߋ߬ ߡߊ߬ ߓߟߐߟߐ ߞߊ߲߬ ߓߌ߬.>> ߊ߬ ߞߵߏ߬ ߟߋ ߝߐ߫. ߡ߃ ߓߘߊ߫ ߛߋ߫ ߟߥߊߟߌߟߊ߲߫ ߛߌߦߊߡߊ߲߫ ߠߊߘߊ߲߫ ߠߊ߫ ߒߞߏ ߘߐ߫߸ ߞߵߏ߬ ߟߊ߫ ߞߎ߬ߙߊ߬ߣߊ ߟߥߊߟߌߟߊ߲ߡߊ ߟߊߘߊ߲ ߞߊ߲߬߸ ߊ߬ ߣߌ߫ ߡߍ߲ߕߊߦߋߕߊ ߘߏ߫ ߟߎ߫ ߘߟߊߡߌ߬ߣߊ ߘߐ߫، ߊ߬ߟߎ߬ ߛߋ߫ ߘߊ߫ ߝߣߊ߫ ߞߊ߬ ߒߞߏ ߥߞߌߔߘߋߞߎ ߡߊߛߐ߫߸ ߏ߬ ߡߍ߲ ߞߍ߫ ߘߊ߫ ߛߋ߲߬ߕߊ߬ߓߊ߫ ߘߌ߫ ߒߞߏ ߘߐ߫ ߂߀߁߉ ߟߊ߫߸ ߒߞߊ߬ߙߊ߲߬ߡߐ߯ ߓߊ߬ߓߊ߫ ߡߊ߬ߡߊߘߌ߫ ߖߊ߰ߣߍ߬ ߟߊ߫ ߘߍ߬ߡߍ߲ ߞߣߐߡߊ߬.

ߜߋ߲ߞߐ߰ߖߌ߬ߘߊ ߞߣߐ߫߸ ߛߓߍߦߟߊ߫ ߝߐ߰ߓߍ߬ߦߊ߬ߟߊ߫ ߝߊߕߎߡߊ߫ ߟߎ߲ߛߋߣߌ߲߫ ߛߘߌ߬ߓߋ߫ ߞߊ߬ ߦߟߌߓߌߟߊߟߌ ߞߍ߫ ߒߞߏ ߛߓߍߟߌ ߟߊ߫߸ ߞߵߊ߬ ߦߌ߬ߘߊ߬ ߞߏ߫ ߟߐ߲ߞߏ ߟߋ߬ ߦߴߊ߬ ߘߌ߫߸ ߊ߬ ߕߍ߫ ߘߌ߯ߣߊ߫ ߘߌ߫: <<ߒߞߏ ߕߍ߫ ߘߍ߲߬ߞߣߍ߬ߦߊ ߓߏߟߏ߲߫ ߛߌ߫ ߘߐ߫߸ ߊ߬ ߦߋ߫ ߡߎ߬ߙߊ߲߬ ߖߊ߯ߓߟߊߞߊ ߟߋ߬ ߘߌ߫߸ ߡߍ߲ ߘߌ߫ ߛߋ߫ ߓߍ߯ ߟߊߘߍ߬ߣߍ߲ ߡߊ߬ߞߏߢߊ߬ ߟߊ߫.>>

ߒ.ߥ.ߛ.ߖ ߟߊ߫ ߞߎ߲߬ߠߊ߫߸ ߊ߬ߟߎ ߡߍ߲ ߠߎ߬ ߦߋ߫ ߖߊ߲߬ߖߏ߲ ߣߌ߲߬ ߛߌ߲߬ߝߏ߲߬ߧߊ߬ߓߊ߮ ߟߎ߬ ߘߌ߫߸ ߊ߬ ߞߊ߲ߕߌ߯ ߛߙߍߞߍ ߛߏ߬ߟߏ߫ ߝߙߊ߬ߓߊ ߺ ߘߐ߫ ߛߌ߬ߛߋ߫ ߞߵߊ߬ ߢߌߣߌ߲߫ ߝߘߊ߬ߝߌ߲߬ߠߊ߫ ߞߎ߲߬ߠߊ߬ߛߌ߮ ߟߎ߫ ߝߍ߬߸ ߞߏ߫ <<ߒߞߏ ߦߋ߫ ߞߍ߫ ߝߘߊ߬ߝߌ߲߬ ߞߊ߲ ߠߎ߬ ߛߓߍߟߊ߲ ߘߌ߫߸ ߦߏ߫ ߟߊ߬ߕߍ߲ ߦߋ߫ ߋߙߐߔߎ߬ ߞߣߐ߫ ߢߊ ߡߍ߲ ߡߊ߬.>>

ߖߌ߬ߣߍ߬ ߘߊ߲ߘߊߟߌߟߊ߫ ߞߏ߲ߓߏ ߞߏߕߍߓߊ߲߫ ߞߡߊ߬ߙߊ߫ ߞߵߊ߬ ߡߙߌߦߊ ߟߎ߫ ߦߌ߬ߘߊ߫ ߝߘߊ߬ߝߌ߲߬ ߘߊ߲ߘߊߟߌ ߟߊ߫ ߞߏ ߘߐ߫߸ ߊ߬ ߣߌ߫ ߓߊߛߌ ߟߎ߬ ߓߐߛߎ߲߫ ߘߊ߲ߘߐ: <<ߝߍߘߍ߲ߝߋ߲ ߠߎ߬ ߣߌ߫ ߘߎ߰ߘߐ߬ߝߋ߲ ߠߎ߬ ߣߌ߫ ߣߌߡߊ ߟߎ߬ ߟߋ߬ ߓߊߛߌ ߟߎ߬ ߞߐߞߟߏ ߘߌ߫، ߝߘߊ߬ߝߌ߲߬ ߘߊ߲ߘߊߟߌ ߣߴߊ߬ ߟߊ߫ ߓߟߏߡߞߊߘߊ߫ ߟߋ߬߸ ߊ߬ ߓߊߛߌ ߟߎ߫ ߕߊ߬ߕߊߓߍ߬ߙߍ ߟߊߕߍ߰ߣߍ߲߫ ߠߋ߬߸ ߡߐ߰ ߛߌߦߊߡߊ߲߫ ߦߴߊ߬ ߖߌ߰ ߟߊ߫ ߢߊ ߡߍ߲߸ ߊ߬ ߕߍ߫ ߕߋ߲߬.>>

ߖߊ߲߬ߖߏ߲ ߣߌ߲߬ ߕߘߍ߬ߒ߬ߘߐ߬ߓߊ߰ ߜߘߍ߫ ߟߎ߫ ߞߊ߬ ߒߞߏ ߛߘߊߟߊ ߜߟߍ߬ߦߊ߬ ߞߏ߬ ߜߘߍ߫ ߟߎ߫ ߘߊ߲߭ߕߍ߰، ߦߏ߫ ߓߙߎߞߌߣߞߊ߫ ߘߎ߲ߓߎ߫ ߛߘߊߡߊ߫ ߘߊ߲߬ߓߟߍ߫ ߞߵߊ߬ ߦߌ߬ߘߊ߬ ߞߏ߫: <<ߡߊ߲߬ߘߋ߲߬ߞߊ ߝߊ߲߬ߓߊ ߟߋ߬ ߖߍ߬ߘߍ ߡߊ߫ ߒߞߏ ߟߐ߲߫ ߡߎߣߎ߲߬.>> ߏ߬ ߟߋ ߞߏߛߐ߲߬߸ ߊ߬ ߞߊ߬ ߞߟߌߟߌ ߞߍ߫ ߛߌ߲߬ߝߏ߲߬ߧߊ߬ߟߌ߬ ߤߏߞߌ ߡߊ߬ ߒߞߏ ߘߐ߫.

ߡߊ߬ߟߌ߬ߞߊ߫ ߦߎ߯ߓߊ߬ ߖߌ߯ ߞߋߕߊ߬߸ ߞߊ߬ ߝߘߊ߫ ߒߞߏ ߟߐ߲ߞߏ߫ ߘߎ߲ߓߎ ߟߊ߫ ߡߊ߲߬ߘߋ߲߫ ߡߊ߬ߟߌ߸ ߏ߬ ߞߎߡߊ߫ ߘߊ߫ ߘߎ߲ߓߎ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߞߊ߲߬߸ ߞߵߊ߬ ߓߍ߲߬ ߒߞߏ ߟߊߘߏ߲߭ ߡߊ߬ ߖߊ߯ߓߘߊ ߘߏ߫ ߟߎ߫ ߟߊ߫ ߡߊ߬ߟߌ ߞߣߐ߫߸ ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫: <<ߒߞߏ ߦߋ߫ ߟߐ߲ߠߌ߲߫ ߠߋ߬ ߘߌ߫߸ ߡߍ߲ ߘߌ߫ ߛߋ߫ ߡߊ߲߬ߘߋ߲߬ ߠߊߕߊ߯ ߟߊ߫ ߢߍ߫.>> ߊ߬ ߝߊ߬ߛߏ߬ߘߋ߲߬ߢߐ߲߯ ߛߎ߬ߟߋ߬ߡߊߣ ߖߓߊ߬ߕߍ߫ ߞߊ߬ ߒߞߏ ߛߋߞߏߦߊ ߦߌ߬ߘߊ߫ ߡߊ߲߬ߘߋ߲߬ ߞߊ߲ߓߏߟߏ߲ ߠߎ߬ ߛߓߍ ߘߐ߫.

ߖߌ߬ߣߍ߬ߞߊ ߟߎ߬ ߘߐ߫߸ ߟߊ߱ߖߌ߬ ߡߊ߬ߡߊߘߌ߫ ߛߎ߬ߥߊ߬ߙߋ߫ ߞߵߊ߬ ߟߊ߫ ߛߍߥߊ ߦߌ߬ߘߊ߬ :<<ߒ ߓߘߊ߫ ߛߍߥߊ߫߸ ߓߊߏ߬ ߖߊ߲߬ߖߏ߲ ߣߌ߲߬ ߓߘߴߊ߬ ߦߌ߬ߘߊ߬ ߒ ߠߊ߫ ߞߏ߫ ߒߞߏ ߦߋ߫ ߕߊ߮ ߞߊ߲߬ ߢߍ߫، ߡߊ߲߬ߘߋ߲߫ ߠߋ߬ ߒߞߏ ߥߟߏߛߟߎ ߘߌ߫߸ ߏ߬ ߟߋ ߘߐ߫߸ ߊ߬ ߞߊ߬ߙߊ߲ ߕߐ߬ߣߐ ߓߏ߲߬ߓߊ߫ ߦߊ߲߬ ߠߋ߬ ߦߙߐ߫ ߜߘߍ ߟߎ߬ ߘߌ߫.>>

ߞߊ߲ߜߍߦߟߊ߫ ߣߊ߲ߛߊ߬ߘߌ߬ ߞߋߕߊ߬ ߞߎߡߊ߫ ߘߊ߫ ߒߞߏ ߛߋߞߏߦߊ ߟߎ߫ ߞߊ߲߬ ߞߊ߲ߜߍ߫ ߞߏ ߡߊ߬ߘߎ߮ ߘߐ߫߸ ߞߊ߬ ߞߎߡߊߛߓߏ ߣߴߊ߬ ߓߛߏ߫ ߢߊ ߟߎ߬ ߢߊߝߐ߫߸ ߞߵߏ߬ ߟߊ߫ ߞߎ߲߬ߞߎߘߎ߲ ߠߎ߬ ߡߊ߬، ߢߊ߰ߡߊ߬ ߛߟߏߡߣߊ ߕߙߊߥߟߋ߫ ߡߊ߬ߟߌ߬ߞߊ ߝߣߊ߫ ߞߊ߬ ߛߊ߲߬ߘߊ߬ ߞߋߟߋ߲߫ ߕߎ߲߰ ߏ߬ ߟߊ߫߸ ߞߏ߫ <<ߣߌ߫ ߖߋߟߌ߫ ߛߌߦߊߡߊ߲߫ ߦߴߌ ߡߊ߬߸ ߡߍ߲ ߦߴߌ ߕߙߐ߫ ߓߘߍߞߍ߭߸ ߏ߬ ߝߟߐ߫ ߘߊ߲ߘߊ߫ ߡߎߣߎ߲߬.>>

ߘߎ߰ߛߐ߬ߛߓߍ߬ߟߊ߫ ߎߛߑߡߊߣ ߓߖߊ߫ ߞߎ߬ߟߌߓߊ߬ߟߌ߫ ߡߍ߲ ߦߋ߫ ߕߏ߰ߝߏ ߘߏ߫ ߞߊ߲ߕߌ߯ ߘߌ߫ ߡߊ߬ߟߌ ߟߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߝߏ߫ ߞߊ߬ ߛߌߟߊ߫ ߖߐ߲ߖߐ߲߫ ߠߋ߬ ߕߊ߬ ߝߘߊ߬ߝߌ߲ ߠߎ߬ ߓߟߏ߫߸ ߓߊߏ߬ <<ߝߘߊ߬ߝߌ߲߬ߠߊ߫ ߡߊ߬ߞߏ ߦߋ߫ ߡߍ߲ ߠߊ߫ ߕߋ߲߬ ߓߊߞߍ߭߸ ߏ߬ ߟߋ ߟߐ߲ߞߏ ߘߌ߫، ߡߟߋߞߎߦߊ ߞߋߟߋ߲߫ ߞߎ߲߬ ߞߋߟߋ߲ ߡߊ߫ ߘߎߢߊ߫ ߖߡߊ߬ߣߊ߬ ߛߌ߫ ߟߊߕߊ߯ ߢߍ߫ ߡߎߣߎ߲߬.>>

ߟߊߓߋߙߌߦߞߊ߫ ߛߊߘߊ߲ߝߌ߲߫ ߡߊߡߊߘߌ߫ ߕߊ߲߬ߘߏ߬ߕߊ ߞߋߕߊ߬ ߞߊ߬ ߒߞߏ ߛߋߞߏߦߊ ߦߌ߬ߘߊ߬ ߞߊ߲ ߠߎ߬ ߛߓߍ ߣߌ߫߫ ߞߎߡߊߘߋ߲ ߠߎ߬ ߛߏ߯ߙߏ߫ ߢߊ ߘߐ߫߸ ߞߊ߬ ߟߊߒߡߊ ߕߊ߬ ߝߘߊ߬ߝߌ߲߬ ߞߊ߲ ߘߏ߫ ߟߎ߫ ߡߊ߬.

ߟߏ߲߫ ߝߌߟߊߣߊ߲ ߣߌ߲߬ ߞߣߐ ߘߐߘߎ߲߬ߧߊ߬ ߘߊ߫ ߒߞߏ ߛߓߍߟߌ ߟߊߥߙߎߞߌߓߊ߮ ߟߎ߬ ߓߟߏ߫ ߡߙߌߦߊ߫ ߛߊߣߌ߲߫ ߛߌߦߊߡߊ߲߫ ߠߋ߬ ߟߊ߫߸ ߡߍ߲ ߠߎ߬ ߞߵߊ߬ߟߎ߬ ߤߊߞߟߌ ߟߎ߬ ߟߊ߫ ߢߐ߲߮ ߞߊ߲߬ ߥߙߎߞߌ ߛߌߟߊ ߕߊ߯ߡߊ ߘߐ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.