ߓߌ߬ ߞߐ߬ߟߏ߲ ߣߌ߲߬ ߡߊ߬ ߀߃߲/߁߀/߂߀߂߆ ߸ ߒߞߏ߫ ߘߍߞߙߎ ߡߍ߲ ߦߋ߫ ߒߛߙߍߜߘߍ߬ ߣߊߟߌ߬ߡߎ߲߫ ߒ ߢ ߦ ߘ ߛߏ߬ߝߊ߬ߘߋ߲ ߠߎ߬ ߘߌ߫ ߸ ߏ߬ ߟߎ߫ ߞߊ߬ ߛߋ߲߬ߠߊ߬ߓߐ߬ߟߌ߫ ߞߍ߫ ߛߘߊߟߊߟߌ߫ ߞߊ߲ ߠߋ߫ ߡߊ߬ ߘߋ߬ߞߌ߬ߛߏ ߘߏ߫ ߟߎ߫ ߟߊ߫ ߸ ߦߏ߫ ߞߊߛߌߡ ߛߊ߬ߞߐ߫ ߸ ߊ߬ ߣߌ߫ ߙߡߊߕߎߟߊߦߌ߬ ߞߋߕߊ߬. ߏ߬ ߟߎ߬ ߡߍ߲ ߠߎ߬ ߦߋ߫ ߖߘߍ߬ߞߊ߬ߣߌ߲߬ ߘߋ߬ߞߌ߬ߘߊ߬ ߡߊߟߐ߲ߣߍ߲ߓߊ ߘߏ߫ ߟߎ߫ ߘߌ߫ ߒߛߙߍߜߘߍ߬ ߛߏ ߞߣߐ߫.

ߛߘߊߟߊߟߌ ߣߌ߲߬ ߓߎ߲ߓߎ߲ߣߍ߲߫ ߕߘߍ߬ ߒߞߏ ߣߌ߫ ߒߞߏ ߡߐ߬ߟߐ߲ ߣߴߊ߬ ߕߐ߬ߣߐ ߟߋ߫ ߦߌ߬ߘߊ ߡߊ߬ ߘߋ߬ߞߌ߬ߘߋ߲ ߠߎ߬ ߟߊ߫ ߸ ߊ߬ ߣߌ߫ ߞߟߊߓߎߘߏ߲ߠߌ߲ ߒߞߏ ߞߊ߬ߙߊ߲ ߠߴߊ߬ ߕߐ߬ߣߐ ߞߏߛߐ߲߬ ߒ߬ ߖߍ߬ߘߍ ߞߊ߲߬ ߊ߬ ߣߴߊ߲ ߝߊ߬ߖߡߊߣߊ ߞߊ߲߬ ߸ ߟߐ߲ߞߏ ߣߌ߫ ߟߐ߲ߠߌ߲ߦߊ ߡߊ߬ߘߎ߮ ߘߐ߫. ߛߘߊߟߊߟߌ ߣߌ߲߬ ߘߏ߲߬ ߕߊ߬ߡߌ߲߬ ߘߊ߫ ߟߋ߬ ߞߏߢߌ߬ߡߊ߬ ߞߏߛߓߍ߫ ߞߊ߬ߡߊߛߐ߬ߘߐ߲߬ ߘߋ߬ߞߌ߬ߘߊ ߢߌ߲߬ ߓߍ߯ ߕߌ߱ ߟߎ߫ ߞߊ߬ ߒߞߏ߫ ߘߋߞߌߘߋ߲ ߢߌ߲߬ ߠߎ߬ ߟߊߞߢߐ߬ߡߊ߫ ߟߋ߬ ߞߏߢߊ߬ ߞߏߛߓߍ߫ ߸ ߏ߬ ߘߏ߲߬ ߞߍ߫ ߕߙߎ߬ ߘߌ߫ ߸ ߛߘߊߟߊߟߌ ߛߋ߫ ߘߊ߫ ߞߍ߫ ߟߊ߫ ߞߊ߬ߙߊ߲߬ߓߏ߲ ߞߋ߬ߟߋ߲߬ߞߋ߬ߟߋ߲߬ߠߊ ߞߣߐ߫ ߦߏ߫ ߊ߬ ߞߊ߫ ߞߊ߲߫ ߞߊ߬ ߞߍ߫ ߢߊ ߡߍ߲ ߡߊ߬.

ߛߘߊߟߊߟߌ ߓߊ߲ ߞߐ߫ ߸ ߞߊ߬ߙߊ߲߬ߕߊ߬ߕߌ߮ ߟߎ߫ ߞߵߊ߬ߟߎ߬ ߟߊ߫ ߣߌߛߐߘߌߦߊ ߟߋ߬ ߢߌ߬ߘߊ߬ ߸ ߊ߬ ߣߌ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߞߊ߬ߙߊ߲߬ߛߏ ߢߌ߲߬ ߠߎ߬ ߟߊߓߌ߬ߟߊ߬ߣߍ߲߫ ߒߞߏ߫ ߘߋߞߌߘߋ߲ ߠߎ߬ ߦߋ߫ ߝߊ߲ߛߊ߲߫ ߸ ߊ߬ ߣߌ߫ ߕߎ߬ߡߊ߬ߓߍ߯. ߙߡߊߕߎߟߊߦߌ߬ ߞߋߕߊ߬ ߞߋߕߌ߮ ߖߍ߬ߘߍ ߞߵߊ߬ ߢߌߣߌ߲߫ ߞߏ߫ ߞߊ߬ ߥߎ߬ߙߟߊ߬ ߟߊߞߊߙߊ߲ߠߌ߲ ߘߏ߫ ߛߌ߰ ߛߋ߲߬ߠߊ߫ ߊ߬ߟߎ߬ ߟߊ߫ ߞߊ߬ߙߊ߲߬ߛߏ ߞߣߐ߫ ߦߋ߲߬. ߏ߬ ߞߘߐ ߟߋ߬ ߞߏ߫ ߛߘߊߟߊߟߌ ߢߌߣߌ߲ߞߏ ߓߍ߫ ߞߊ߬ ߓߐ߫ ߜߍ߫ ߟߊ߫.

ߡߎߛߑߕߝߊ߬ ߛߎߥߊ߲ߘߌ ߛߊ߰ߣߐ߫߸ ߒߛߙߍߜߘߍ߬.