ߞߊ߬ߦߌ߯ ߕߎ߲ߓߊ߬ ߟߊߓߐ߫ ߟߏ߲ ߠߋ߬ ߡߊ߬ ߞߐߣߊߞߙߌ߫ ߥߛߎߖߌ߲ߓߊ ߟߊ߫ ߞߵߊ߬ ߟߊߕߊ߯ ߞߐ߰ߦߊ߬߸ ߊ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊߓߐߣߍ߲߫ <<ߛߊ߬ߙߌ߬ߦߊ߬ ߛߐߛߐ>> ߟߋ߬ ߞߊ߲߬، ߒ߬ߓߊ߬߸ ߏ߬ ߟߋ ߞߏߢߊ ߓߘߊ߫ ߛߋ߫ ߓߟߏ߫ ߞߎߘߊ߫ ߞߘߐ߫ ߕߋ߲߬، ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߬ ߡߍ߲ ߞߊ߲߬ߕߐ߮ ߦߋ߫ ߕߎ߲ߓߊ߬ ߘߌ߫߸ ߊ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߬ ߓߘߊ߫ ߞߕߌߞߊ߲ߘߊ ߣߌ߫ ߥߛߎ߫ ߞߎ߲߬ߠߊߛߌ߰ߓߊ߮ ߟߊߛߌ߰ ߖߐ߲ ߘߐ߫ ߕߎ߲ߓߊ߬ ߟߊߞߎ߬ߘߎ ߞߏߛߐ߲߬ ߊ߬ߟߎ߬ ߓߟߏ߫ ߛߊ߬ߙߌ߬ߦߊ߬ ߛߐߛߐ ߞߊ߲߬.

ߞߐ߬ߟߏ߲ ߣߌ߲߬ ߡߊ߬ ߂߀߂߆ ߕߙߊߓߊ ߕߟߋ߬ ߁߇߸ ߛߞߌ߫ ߝߟߌ ߟߋ߬ ߕߎ߲߬ ߦߴߌߘߐ߫ ߞߐ߰ߦߊ߫ ߞߕߌߘߊ ߦߌߟߡߊ߫ ߝߟߐ ߟߊ߫، ߖߐ߲߫ ߠߊߛߌ߮ ߏ߬ ߓߍ߲߬ߒ߬ߛߋ߲߬ߡߊ ߟߋ߬ ߞߏߛߐ߲߬߸ ߞߊ߬ߙߊ߲߬ߡߐ߰ ߔߏߟ ߦߏ߲߬ߓߊ߫ ߞߙߎ߬ߡߊ߬ ߣߌ߫ ߟߊ߲߱ߛߌ߬ߣߍ߫ ߛߌ߬ߟߊ ߡߍ߲ ߠߎ߬ ߦߋ߫ ߕߎ߲ߓߊ߬ ߟߊ߫ ߟߊ߬ߝߛߊ߬ߟߌ߬ߟߊ ߘߌ߫߸ ߏ߬ ߟߎ߫ ߞߵߊ߬ߟߎ߬ ߟߊ߫ ߘߊ߬ߟߎ߬ ߦߌߘߊ ߟߎ߬ ߞߍ߫߸ ߞߵߊ߬ ߟߊ߲ߞߣߍߡߊ߫ ߜߍ ߘߐ߫ ߥߛߊߞߙߊ߫ ߞߏ߫ ߊ߬ߟߎ߬ ߟߊ߫ ߟߊ߬ߝߛߊ߬ߕߊ ߦߋ߫ ߟߊ߬ߡߙߊ ߘߐ߫ ߛߊ߬ߙߌ߬ߦߊ߬ ߛߐ߬ߛߐ߬ ߓߟߏ ߟߋ߬ ߡߊ߬ ߞߐ߰ߦߊ߬ ߥߛߎߖߌ߲ߓߊ ߟߊ߫.

<<ߊ߬ ߕߍ߫ ߡߌ߬ߣߊ߬ ߞߏ߬ ߢߌߡߊ߫ ߘߐ߫ ߊ߬ ߟߊߡߙߊ߬ ߦߙߐ ߣߌ߲߬ ߘߐ߫ ߝߋߝߋ߫، ߊ߬ ߘߏ߲߬߸ ߞߎߡߊ߫ ߞߍ߲ߘߍ߫ ߛߌ߫ ߕߴߦߋ߲߬߸ ߡߍ߲ ߘߌ߫ ߡߐ߰ ߘߊ߬ߟߎ߬ ߓߐ߫ ߊ߬ ߟߊߓߐ ߘߐ߫ (ߞߐߣߊߞߙߌ߫ ߥߛߎߖߌ߲ ߠߊ߫ ߞߵߊ߬ ߟߊߕߊ߯ ߞߐ߰ߦߊ߬)، ߕߎ߬ߢߊ ߟߋ߬ ߝߋߎ߫߸ ߝߘߏ߬ߓߊ߬ ߞߕߌߞߊ߲ߘߊ ߞߵߊ߬ ߦߌ߬ߘߴߊ߬ ߟߊ߫ ߟߊ߬ߛߋ߬ߟߌ ߘߐ߫ ߞߏ߫ ߥߛߎ ߡߊ߬ߡߙߊ߬ߟߌ ߡߙߌߘߐ ߟߋ߬߸ ߒ߬ߞߊ߬ ߏ߬ ߞߎߡߊ ߡߊ߫ ߢߊߝߐ߫ ߘߋ߬، ߞߋߟߋ߲߫߸ ߡߙߊ߬ߓߊ߰ ߕߎ߲ߓߊ߬ ߡߊ߫ ߟߊߟߐ߲ߠߌ߲߫߸ ߊ߬ ߟߊ߫ ߟߊ߬ߝߛߊ߬ߟߌ߬ߟߊ ߦߴߊ߲ߠߎ߬ ߡߍ߲ ߠߎ߬ ߝߣߊ߫ ߘߌ߫߸ ߊ߲ߠߎ߬ ߝߣߊ߫ ߡߊ߫ ߟߊߛߏ߬ߓߌ߫ ߊ߬ ߞߏߢߊ ߟߊ߫.>> ߊ߬ߟߎ߬ ߣߡߌߛߊߣߍ߲ ߠߋ߬ ߞߊ߲߫ ߕߋ߲߬.

ߘߊ߬ߟߎ߬ ߜߘߍ߫ ߟߎ߫ ߝߣߊ߫ ߟߊߓߐ߫ ߘߊ߫ ߟߊ߬ߝߛߊ߬ߟߌ߬ߟߊ ߟߎ߬ ߓߟߏ߫ ߞߎߡߊ߫ ߘߊߞߎ߲ ߘߐ߫ ߞߕߌߘߊ ߟߊ߫ ߦߋ߲߬߸ ߞߊ߬ ߓߍ߲߬ ߘߊ߬ߘߌߛ ߟߊ߫ ߗߡߍ߬ ߓߙߋߡߊ߫ ߞߘߐ߬ߡߊ߲ ߝߊ߬ߘߌ߬ ߞߘߐ߬ ߞߏ ߡߊ߬، ߞߊ߬ߙߊ߲߬ߡߐ߰ ߔߏߟ ߦߏ߲߬ߓߊ߫ ߞߙߎ߬ߡߊ߫ ߞߵߊ߬ ߦߌ߬ߘߊ߬ ߞߏ߫ ߞߍ߬ߙߍ߲߬ ߖߊ߲ߞߊߙߏ ߟߋ߬ ߕߎ߲ߓߊ߬ ߞߊ߲߬߸ ߊ߬ ߣߌ߫ ߖߋ߬ߟߌ߬ߞߐ߬ߕߊ߲߫ ߦߟߍ߬ߕߊ߸ ߏ߬ ߟߎ߬ ߓߍ߯ ߛߙߋߦߊ ߕߍ߬ߘߍ߫ ߊ߬ ߕߍ߯ ߞߘߐ߫ ߘߊ߲ߘߊߟߌ߫ ߛߓߍ ߘߌ߫.

<<ߊ߲ ߣߊ߬ߣߍ߲߫ ߕߎ߲ߓߊ߬ ߛߐ߬ߘߐ߲߬ ߠߊ߫ ߟߋ߬߸ ߊ߬ ߓߘߊ߫ ߛߍ߰߸ ߊ߬ ߓߟߏ ߖߊ߬ߣߴߊ߬ ߞߣߐ ߘߐ߫߸ ߊ߬ ߟߊߝߟߌ߬ߣߍ߲߫ ߘߎ߱ ߡߊ߬߸ ߓߐߒߡߊߟߌ߫ ߛߌߟߊ ߓߍ߯ ߕߍ߰ߣߴߊ߬ ߡߊ߬، ߘߊ߲ߘߊߟߌ߫ ߦߙߐ߫ ߕߴߦߋ߲߬ ߡߍ߲ ߘߌ߫ ߛߴߊ߬ ߟߐ߬ ߟߴߊ߬ ߟߊ߫ ߞߏ ߟߊ߫߸ ߣߴߊ߬ ߓߍ߲߬ ߘߴߊ߬ ߖߎ߯ߦߊ ߡߊ߬ ߏ߬ ߘߐ߫߸ ߊ߬ ߘߌߣߊ߬ ߖߎ߯ߦߊ߫ ߘߋ߬.>> ߟߊ߬ߝߛߊ߬ߟߌ߬ߟߊ ߞߵߏ߬ ߟߋ ߝߐ߫߸ ߖߐ߲߰ߛߊ߫ ߕߊ߲߬ߞߊ߬ ߘߌ߫ ߞߍ߫ ߞߍߓߊߟߌ ߡߊ߬.

<<ߊ߲ߠߎ߬ ߕߴߊ߬ ߢߌߣߌ߲߫ ߠߊ߫ ߞߏ߫ ߞߵߊ߬ ߓߌ߬ߟߊ߫ ߘߋ߬، ߊ߬ ߞߊ߫ ߞߊ߲߫ ߞߵߊ߬ ߟߊ߫ ߥߛߎ߫ ߟߊߣߍ߲ ߞߍ߫߸ ߏ߬ ߖߍ߬ߘߍ ߓߘߊ߫ ߛߴߊ߬ ߓߊ߲߫ ߝߙߊ ߟߊ߫، ߊ߲ ߧߋ߫ ߡߍ߲ ߘߐߙߐ߲߫ ߢߌߣߌ߲߫ ߠߊ߫߸ ߊ߬ ߕߘߍ߬ ߦߙߐ ߡߍ߲ ߘߐ߫߸ ߞߵߊ߬ ߟߊߛߊ߬ߦߌ߲߫ ߦߋ߲߬، ߓߊߏ߬߸ ߦߋ߲߬ ߠߋ߬ ߛߎ߬ߘߎ߲߬ߡߊ߲߫ ߘߊ߲ߘߊߟߌ߫ ߦߙߐ߫ ߟߊ߫߸ ߡߍ߲ ߘߌ߫ ߛߴߊ߬ ߟߊ߫ ߞߏ ߞߘߐ߫.>> ߔߏߟ ߦߏ߲߬ߓߊ߫ ߞߵߏ߬ ߟߋ ߡߊ߬ߘߌ߬ߦߊ߬ߟߌ ߞߍ߫.

ߡߊ߬ߞߊ߲߬ߞߊ߲߬ߠߌ߲߬ߠߊ ߡߍ߲ ߠߎ߬ ߝߣߊ߫ ߕߍ߬ߘߍ߫ ߦߋ߲߬߸ ߡߍ߲ ߠߎ߬ ߕߘߍ߬ ߞߎߡߊ߫ ߟߊ߫ ߞߕߌߞߊ߲ߘߊ ߣߌ߫ ߥߛߎ߫ ߞߎ߲ߠߊߛߌ߯ߟߊ ߟߊ߫ ߕߐ߬ߣߐ ߞߊ߲߬߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߕߎ߲ߓߊ߬ ߡߌ߬ߣߊ ߞߊ߬ ߥߴߊ߬ ߘߌ߫ ߞߐ߰ߦߊ߫ ߦߋ߲߬߸ ߏ߬ ߕߍ߫ ߛߊ߬ߙߌ߬ߦߊ߬ ߛߐߛߐ߫ ߘߌ߫ ߢߊ߫ ߛߌ߫ ߡߊ߬، ߓߍ߲߬ ߞߍ߫ ߘߊ߫ ߡߍ߲ ߡߊ߬ ߡߎ߬ߕߎ߲߬ ߛߊ߫߸ ߏ߬ ߟߋ ߞߎߡߊ ߟߊߘߎ߲ ߘߌ߫ ߞߐ߬ߟߏ߲ ߣߌ߲߬ ߡߊ߬߸ ߞߵߊ߬ ߟߊߕߊ߯ ߕߙߊߓߊ ߕߋ߬ߟߋ߫ ߂߄ ߣߊ߬ߕߐ ߘߐ߫، ߏ߬ ߟߏ߲ ߠߋ߬߸ ߞߕߌߕߍ߯ߟߊ ߘߌ߫ ߞߊ߲߫ ߞߋߟߋ߲߫ ߝߐ߫߸ ߞߊ߬ ߓߍ߯ ߥߊ߫ ߝߊ߲߫ ߟߐ߲߫ ߊ߬ ߞߏ ߘߐ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.