ߣߌ߲߬ ߦߋ߫ ߓߡߊ߬ߞߐ߫ ߞߕߌߛߏ ߟߊ߫ ߟߊ߬ߕߍ߰ߦߊ ߟߋ߬ ߘߌ߫߸ ߣߊ߲߬ߕߌ߰ߦߊ߬ ߖߐ߯ߙߊ߲ ߘߏ߫ ߟߎ߫ ߛߊ߲߬ߣߌ߲ ߞߏߛߐ߲߬ ߔߙߊߡߐ߲ߕ ߞߙߎ ߣߌ߫ ߊ߲ߓߙߊߦߍߙ ߖߟߐ߬ߞߐ ߟߎ߬ ߓߟߏ߫ ߂߀߁߅ ߟߊ߫، ߞߕߌ ߣߌ߲߬ ߠߊߛߌ߰ ߘߊ߫ ߞߏߟߌ߲ߞߏߟߌ߲߫ ߕߊ߬ߡߌ߲߬ߣߍ߲ ߠߋ߬ ߟߊ߫߸ ߓߎߓߎ߫ ߛߌ߬ߛߋ߫ ߣߴߊ߬ ߛߋ߲߬ߘߏ߲߬ߢߐ߲߮ ߠߎ߬ ߖߙߊ߬ߞߌ߬ߣߍ߲߫ ߦߙߎ߬ߞߎ߬ߦߙߎߞߎ ߣߌ߫ ߡߎ߬ߙߊ߲߬ ߛߊ߲ ߘߏ߫ ߟߎ߫ ߟߋ߬ ߞߏߛߐ߲߬߸ ߊ߬ ߘߏ߲߬ ߘߊ߲߬ ߕߍ߫ ߏ߬ ߘߐߙߐ߲߫ ߘߌ߫ ߘߋ߬߸ ߛߓߍ߫ ߞߏߙߏ߲߫ ߠߊߘߊ߲߸ ߘߊ߲ߕߌߢߍߟߌ ߝߘߏ߬ߓߊ߬ ߣߊ߲ߝߟߏ ߟߊ߫.
ߥߊߘߌ߫ ߢߌߣߌ߲ ߞߏߙߏ߲ߧߊ ߛߌߟߊ ߞߊ߲߬، ߒ߬ߓߊ߬߸ ߏ߬ ߟߋ߬ ߞߏߛߐ߲߬߸ ߓߎߓߎ߫ ߛߌ߬ߛߋ߫߸ ߕߌߦߍߡߊ߲߫ ߤߎߓߍߙߕ ߞߎ߬ߟߌߓߊ߬ߟߌ߫߸ ߡߊߡߊߘߎ߫ ߟߑߜ߭ߐߙ ߖߊ߬ߙߊ߫߸ ߓߊߓߊߟߌ ߓߊ߸ ߊ߬ ߣߌ߫ ߡߊߡߊߘߎ߫ ߟߊߡߌߣ ߖߊ߬ߞߌ߬ߕߋ߫، ߡߐ߰ ߡߊߘߊ߲ߣߍ߲߫ ߏ߬ ߟߎ߬ ߖߊ߲ߞߌ߲߫ ߘߊ߫ ߛߊ߲߬ ߂߀ ߥߛߎߟߊߘߏ߲ ߠߋ߬ ߟߊ߫߸ ߞߊ߬ ߛߊ߲߬ ߥߐߙߐ߲ߝߌ߬ߟߊ߬ ߥߛߎ ߟߊ߫ ߡߐ߰ ߣߊ߯ߣߌ߲߫ ߜߘߍ߫ ߟߎ߫ ߞߎ߲߬ ߣߴߏ߬ ߦߋ߫ ߕߌߦߍߣߊ߫ ߞߎ߬ߟߌߓߊ߬ߟߌ߫߸ ߛߎ߬ߟߋ߬ߡߊ߯ߣ ߓߊ߲߬ߓߊ߸ ߒߓߋ߲ߓߊ߫ ߡߎߛߊ߫ ߞߋߕߊ߬߸ ߡߎߛߑߕߊߝߊ߬ ߘߙߊߓߏ߫ ߘߌ߫، ߛߊ߲߬ ߇ ߥߛߎ ߟߊ߫ ߘߊ߫ ߡߐ߰ ߣߊ߯ߣߌ߲߫ ߏ߬ ߟߎ߫ ߟߋ߬ ߞߎ߲߬߸ ߡߐ߰ ߞߋߟߋ߲߫ ߠߋ߬ ߦߴߊ߬ ߘߐ߫.
ߡߍ߲ ߠߊ߫ ߖߊ߲߬ߞߌ߬ߟߌ ߖߌ߰ ߘߊ߫ ߣߍ߲ߞߍ߫߸ ߏ߬ ߟߋ߬ ߦߋ߫ ߢߍߡߌߘߊ߫ ߡߊߖ߭ߐߙ ߊߡߌߣߊߕߊ߬ ߘߤߏ߫ ߘߌ߫߸ ߞߊ߬ߕߎ߲߯߸ ߊ߬ߟߋ ߖߊ߲ߞߌ߲߫ ߞߎ߲ ߞߍ߫ ߘߊ߫ ߥߊߘߌ ߢߌߣߌ߲߫ ߠߋ߬ ߘߌ߫ ߛߌߟߊ߫ ߞߏߙߏ߲ ߞߊ߲߬߸ ߒ߬ߓߊ߬߸ ߊ߬ߟߋ ߓߌ߲߬ߓߊ߬ߥߏ߬ ߘߊ߫ ߛߊ߲߬ ߞߋߟߋ߲߫ ߥߛߎ ߟߊ߫ ߏ߬ ߟߋ߬ ߘߐ߫߸ ߊ߬ ߣߌ߫ ߞߊ߬ ߛߍߝߊ߫ ߥߊߘߌ ߡߟߌߦߏ߲߫ ߟߏ߯ߟߎ߫ ߛߙߊ߬ߟߌ ߓߌ߲߬ߓߊߏ ߟߴߊ߬ ߞߎ߲߬، ߏ߬ ߓߍ߯ ߞߐߝߍ߬ ߛߊ߫߸ ߓߟߏߓߐ߫ ߘߊ߫ ߡߐ߰ ߥߐߙߐ߲ߝߌ߬ߟߊ߬ ߘߐ߫߸ ߞߏ߫ ߊ߬ߟߎ߫ ߛߐ߲߬ ߕߍ߫ ߝߏߦߌ߬ ߘߐ߫߸ ߖߊ߲߬ߞߌ߬ߟߌ ߡߍ߲߬ ߠߎ߬ ߞߍ߫ ߘߊ߫ ߕߟߋ߬ ߦߙߌߞߊ߫ ߘߊߘߐߖߊߥߏ ߟߎ߬ ߞߐ ߟߋ߬ ߘߐ߫.
ߟߊ߬ߛߋ߬ߟߌ߬ ߛߓߍ ߣߌ߲߬ ߕߘߍ߬ ߦߋ߫ ߣߊ߲߬ߕߌ߰ ߞߐ߲ߛߏ ߥߊߜߏߡߊ߲߫ ߓߌߛߓߊ߬ ߣߌ߫ ߥߐ߯ߙߐ߫ ߟߋ߬ ߛߊ߲߬ߣߌ߲ ߞߏߝߐ߫ ߟߊ߫ ߛߍߝߊ߫ ߥߊߘߌ ߡߟߌߦߊߙߌ߫ ߁߁ ߠߊ߫، ߞߟߍ߬ߞߍ߬ ߛߊ߲ߡߊߞߎߟߎ߲߫ ߥߐ߯ߙߐ߫ ߡߟߌߦߊߙߌ߫ ߥߐߙߐ߲ߝߌ߬ߟߊ߬ ߣߌ߫ ߓߘߎ߬ߓߘߎ߫߸ ߓߊ߬ߙߌ߫߸ ߝߙߋߞߋ ߦߋ߫ ߦߙߐ ߡߍ߲ ߘߐ߫߸ ߝߋ߲߫ ߛߊ߲߬ߣߍ߲ ߡߍ߲߬ ߠߎ߬ ߛߌ߫ ߟߋ߬ ߡߊ߫ ߦߋ߫ ߢߊ ߟߊ߫߸ ߒ߬ߓߊ߬߸ ߣߘߐ߬ߓߌ߬ߟߊ߬ߟߌ ߡߍ߲ ߦߋ߫ ߢߌߣߌ߲߫ ߠߊ߫ ߞߕߌ߫ ߕߌ߰ߟߊ߬ߡߐ߮ ߟߎ߫ ߝߍ߬߸ ߏ߬ ߦߋ߫ ߓߍ߲߬ ߠߊ߫ ߛߍߝߊ߫ ߥߊߘߌ ߡߟߌߦߊߙߌ߫ ߃߃ ߟߋ߬ ߡߊ߬.
ߞߵߊ߬ ߟߴߊ߬ ߞߊ߲߬ ߞߕߌ ߣߌ߲߬ ߞߍߣߍ߲߫ ߣߐ߬ߝߍ߬ ߡߌ߬ߣߊ߬ߓߊ߰ߕߐ ߡߍ߲ ߠߎ߬ ߞߐ߫ ߕߋ߲߬߸ ߦߏ߫ ߞߏߕߌ߯ ߝߟߐ ߞߘߐ߸ ߓߎߓߎ߫ ߛߌ߬ߛߋ߫߸ ߡߊߡߊߘߎ߫ ߟߑߜ߭ߐߙ ߖߊ߬ߙߊ߫߸ ߕߌߦߍߡߊ߲߫ ߤߎߓߍߙߕ ߞߎ߬ߟߌߓߊ߬ߟߌ߫߸ ߊ߬ ߣߌ߫ ߓߊߓߊߟߌ ߓߊ، ߞߕߌ߫ ߕߌ߰ߟߊ߬ߡߐ߮ ߟߎ߬ ߡߊ߫ ߛߐ߲߬ ߊ߬ߟߎ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߬ ߦߴߊ߬ߟߎ߫ ߞߐߦߌ߬ߘߊ߫.
ߛߎ߯ߟߊ߲ߘߌ߫ ߛߊ߬ߞߐ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.