ߞߊ߬ ߓߍ߲߬ ߞߙߊߟߊߕߎ߲߮ ߡߊ߬߸ ߊ߲ ߧߴߊ߬ ߝߍ߬ ߞߊ߬ ߛߌߟߊߓߐߛߐ߯ߣߊ߫ ߟߊߡߍ߲ߓߊ߮ ߟߎ߬ ߡߊߜߍ߲߫ ߛߌ߬ߟߡߊ߬ߦߊ ߛߊ߬ߙߌ߬ߦߊ ߟߎ߬ ߥߟߊߥߟߊ ߟߴߊ߲ ߟߐ߲߫ ߞߊ߲ ߘߐ߫ ߊ߲ ߟߐ߲ߕߊ߫ ߓߍ߬ߙߍ ߟߊ߫

ߏ߬ ߘߐ߫ ߊ߲ ߧߋ߫ ߡߍ߲ ߢߌߣߌ߲߫ ߠߊ߫ ߟߊ߬ߡߍ߲߬ߠߌ߲߬ߠߊ ߟߎ߫ ߝߍ߬߸ ߏ߬ ߟߋ ߊ߲ ߠߊ߫ ߞߎߡߊ ߟߎ߬ ߟߊߘߌߦߊߢߍ ߣߴߊ߬ߟߎ߬ ߘߐߕߟߊ ߘߌ߫߸ ߛߊ߫ ߡߐ߰ ߛߌߦߊߡߊ߲߫ ߘߴߊ߬ ߟߊߛߐ߬ߘߐ߲߫ ߊߟߎ߫ ߛߘߊ߫ ߘߐ߫، ߊ߬ ߣߌ߫ ߣߴߊ߬ߟߎ߫ ߞߊ߬ ߝߍ߬ ߦߴߊ߲ ߞߎߡߊ ߦߙߐ ߡߍ߲ ߠߎ߬ ߟߊ߫߸ ߊ߬ߟߎ߬ ߦߴߊ߲ ߘߍ߬ߡߍ߲߬ ߏ߬ ߘߊ߲ߘߊ߫ ߟߊ߫ ߊߟߊ߫ ߣߌ߫ ߓߊߘߋ߲ߧߊ߫ ߦߋ߫ ߖߊ߰ߣߌ߲߬، ߞߏ߬ߣߌ߲߬߸ ߊ߲ ߡߊ߬ߞߏ ߦߋ߫ ߡߊ߬ߞߕߌ߬ߟߌ߫ ߘߊ߬ߟߎ߬ߡߊ ߟߋ߬ ߟߊ߫.
ߊ߲ ߧߋ߫ ߛߐ߰ ߟߴߊߟߊ߫ ߕߊ߲߬ߘߏ ߡߵߊ߬ ߟߊ߫ ߣߍߡߊ߫ ߝߟߐ ߟߊ߫߸ ߊ߲ ߞߍ ߘߐ߫ ߡߐ߱ ߘߌ߫߸ ߊ߬ ߣߌ߫ ߓߍ߯ ߓߋ߲ߓߊ߫ ߊߘߡߊ߫ ߤߊ߲ߞߕߌߡߊ ߓߐ߲ߛߐ߲ ߘߌ߫ (ߞ. ߣ)، ߊ߲ ߧߋ߫ ߡߊ߰ߙߌ߬ ߝߎߣߎ߲ߛߙߋ ߞߏߢߌߡߊߟߐ߲߫ ߠߴߊ߬ ߟߊ߫ ߣߍߡߊ߫ ߝߌߟߊߣߊ߲ ߠߊ߫߸ ߊ߲ ߞߍ ߘߐ߫ ߛߌ߬ߟߊ߬ߡߊ ߘߌ߫߸ ߊ߬ ߣߌ߫ ߞߋߟߊ߫ ߟߊߓߊ߲ ߡߊ߲߬ߕߏ߲ ߘߌ߫ (ߞ. ߣ)، ߊ߲ ߧߋ߫ ߘߎߓߊ߫ ߟߊ߫ ߊߟߊ߫ ߦߋ߫ ߒ߬ ߓߊߘߋ߲߫ ߛߌ߬ߟߡߊ߬ ߝߙߋ ߓߍ߯ ߡߊߣߍߡߴߊ߬ ߟߊ߫ ߤߌߣߊ ߟߊ߫߸ ߊ߬ ߣߌ߫ ߞߊ߬ ߒ߬ ߖߍ߬ߘߍ ߣߌ߫ ߒ ߓߐ߲ߛߐ߲ ߠߎ߬ ߞߊ߲ߘߊߣߍ߲ ߕߏ߫ ߞߎ߬ߙߊ߬ߣߊ ߛߌߟߊ߫ ߕߋߟߋ߲ߣߍ߲߫ ߓߐߚߐ ߞߊ߲߬ ߞߘߊߎ߫، ߊ߲ ߧߋ߫ ߡߊ߰ߙߌ߬ ߝߎߣߎ߲ߛߙߋ ߕߙߊ߫ ߟߊ߫߸ ߊ߬ ߦߋ߫ ߘߎ߬ߥߊ߬ߎ ߣߌ߫ ߝߏ߬ߟߌ ߟߎ߫ ߟߐ߬ ߊ߬ ߟߊ߫ ߣߊ߬ߓߢߌ߬ߡߊ߬ ߟߊ߬ߓߊ߲ ߣߴߊ߬ ߟߊ߫ ߞߋߟߊߡߐ߮ ߟߎ߬ ߛߟߊߕߌ߯ ߡߊ߬ߡߊߘߌ߫ ߡߊ߬߸ ߊ߬ ߣߵߏ߬ ߡߍ߲ ߗߋ߫ ߟߊ߫ ߞߵߊ߬ ߞߍ߫ ߣߍߡߊ ߘߌ߫ ߡߐ߱ ߟߎ߬ ߦߋ߫، ߊ߬ ߣߌ߫ ߞߵߊ߬ ߟߊߞߎߡߊ߫ ߞߊ߲ߘߦߊ ߣߌ߫ ߞߏߟߐ߲ ߣߌ߫ ߛߥߊ߬ߓߊ ߟߊ߫، ߊ߲ ߧߋ߫ ߘߊ߲ߠߌ߲ߓߊ߯ ߞߊ߯ߣߌ߲ߒߞߋ ߡߊߘߌߦߊ߫ ߟߊ߫ ߝߣߊ߫߸ ߊ߬ ߦߋ߫ ߞߛߌ ߣߌ߫ ߘߌ߬ߢߍ ߣߌ߫ ߦߊ߬ߝߊ ߞߍ߫ ߞߋߟߊ ߘߏ߲߬ߞߏ ߟߎ߬ ߣߴߊ߬ ߘߍ߬ߢߐ߲߮ ߠߎ߬ ߦߋ߫߸ ߏ߬ ߟߎ߬ ߡߍ߲ ߠߎ߬ ߞߵߊ߬ ߟߊ߫ ߣߐ߯ߙߐ ߦߋ߫ ߞߵߊ߬ ߟߊߓߊ߬ߕߏ߬߸ ߊ߬ ߣߴߊ߬ߟߎ߫ ߞߵߊ߬ ߟߊ߫ ߞߊ߲ߘߦߊ ߕߵߊ߬ߟߎ߫ ߛߍ߬ߓߍ ߣߴߊ߬ߟߎ߬ ߛߍ߲ߓߍ ߟߊ߫ ߞߵߊ߬ ߟߊߛߋ߫ ߢߣߊߓߊ߮ ߣߌ߫ ߞߐߟߊ߫ ߡߐ߮ ߓߍ߯ ߟߊߘߍ߬ߣߍ߲ ߡߊ߬.
ߏ߬ ߕߊ߬ߡߌ߬ߣߍ߲ ߞߐ߫߸ ߞߊ߬ ߓߍ߲߬ ߞߙߊߟߊߕߎ߲߮ ߕߣߐ߬ߓߐ ߡߊ߬ ߛߌߟߊߓߐߛߐ߯ߣߊ߫ ߣߴߊ߬ ߟߊߡߍ߲ߓߊ߮ ߟߎ߬ ߓߟߏ߫߸ ߊ߲ ߧߴߊ߬ ߝߍ߬ ߞߊ߬ ߞߎߡߊ߫ ߛߎ߲ߞߊߙߏ ߕߣߐ߬ ߛߐ߬ߘߐ߲߬ ߢߊ ߟߋ߬ ߞߊ߲߬߸ ߛߴߊ߬ ߕߐ߬ߣߐ ߘߌ߫ ߛߐ߬ߘߐ߲߬ ߛߌ߬ߟߊ߬ߡߊ ߟߎ߬ ߓߟߏ߫، ߓߊ߬ߙߌ߬ ߦߊ߬ߣߌ߲߫ ߊ߲ ߧߴߊ߲ ߘߊ ߛߎ߫ ߏ߬ ߘߐ߫߸ ߊ߲ ߘߴߊ߬ ߦߌ߬ߘߊ߬ ߊߟߎ߫ ߟߊ߫ ߡߎߣߎ߲߬ ߞߏ߫ ߖߘߍ߬ߞߟߏ߬ߓߊ߰ߦߊ ߟߋ߬ ߘߌ߯ߣߊ ߜߍߣߍ߲ ߣߴߊ߬ ߕߋߟߋ߲ ߘߌ߫߸ ߓߊߏ߬، ߊ߬ߟߋ ߖߏ߯ ߢߌߡߊ ߘߝߊߣߍ߲ ߘߌ߫، ߊ߬ߟߋ ߟߋ߬ ߘߌ߯ߣߊ߫ ߘߌ߫ ߊߟߊ߫ ߞߵߊ߬ ߝߐ߫ ߡߍ߲ ߡߊ߬ ߞߎ߬ߙߊ߬ߣߊ ߞߣߐ߫ ߞߏ߫ ߊ߬ߟߋ ߟߋ߬ ߦߴߊ߬ ߓߘߊ، ߊ߬ ߞߊ߲߫ ߏ߬ ߘߐ߫ ߞߏ߫ ﴿ߘߌ߯ߣߊ ߡߍ߲ ߊߟߊ߫ ߓߟߏ߫߸ ߏ߬ ߟߋ ߛߌ߬ߟߡߊ߬ߦߊ ߘߌ߫﴾ ߌߡߎ߬ߙߊ߲߬ ߞߐߙߍ ߟ. ߁߉
ߒ߬ߓߊ߬߸ ߊ߲ ߧߋ߫ ߛߎ߲ߞߊߙߏ ߡߍ߲ ߘߐ߫ ߣߌ߲߬߸ ߊ߬ߟߋ ߦߋ߫ ߛߌ߬ߟߡߊ߬ߦߊ ߓߊ߬ߕߏ ߢߌ߬ߡߊ߲߬ ߘߌ߫؟
ߢߌ߬ߣߌ߲߬ߞߊ߬ߟߌ ߏ߬ ߖߋ߬ߓߌ ߘߐ߫߸ ߊ߲ ߘߴߊ߬ ߦߌߘߊߞߊ߬ ߊߟߎ߫ ߟߊ߫ ߞߏ߫ ߛߌ߬ߟߡߊ߬ߦߊ ߦߋ߫ ߞߛߊߞߊ߫ ߛߊ߬ߓߊ߫ ߟߋ߬ ߘߌ߫߸ ߥߟߊ߫ ߕߐ߯ ߛߊ߬ߓߊ߫ ߟߋ߬ ߖߘߍ߬ߞߟߏ߬ߓߊ߰ߦߊ ߟߊ߫، ߏ߬ ߟߎ߫ ߟߋ߬߸ ߘߍ߲߬ߞߣߍ߬ߦߊ߸ ߖߘߍ߬ߞߟߏ߸ ߢߌ߬ߡߊ߬ߦߊ، ߞߵߏ߬ ߟߎ߫ ߓߍ߲߬ ߞߏ߫ ߛߊ߬ߓߊ߫ ߡߊ߬߸ ߥߊ߬ߣߌ߬ߢߍ ߣߌ߫ ߓߊ߬ߕߏ ߣߌ߫ ߟߊ߬ߛߐ߲، ߓߊ߬ߙߌ߬ ߞߎߡߊ߫ ߟߊߛߎߘߎ߲ߧߊ߫ ߟߊߘߌߦߊߒߢߍ ߡߊ߬߸ ߕߐ߮ ߕߍߡߕߊ ߟߋ߬ ߡߊߟߐ߲߫ ߘߊ߫ ߓߍ߯ ߓߟߏ߫ ߞߏ߫ ߛߌ߬ߟߡߊ߬ߦߊ.
ߊ߲ ߠߊ߫ ߘߌ߯ߣߊ ߕߐ߯ ߛߊ߬ߓߊ ߝߟߐߡߊ ߦߋ߫ ߘߍ߲߬ߞߣߍ߬ߦߊ ߡߍ߲ ߘߌ߫߸ ߏ߬ ߟߋ ߛߌ߬ߟߡߊ߬ߦߊ ߛߡߊ߬ߛߋ߲߬ ߝߟߐ ߘߌ߫، ߣߊߟߌ߬ߡߎ߲߬ ߛߙߋߕߋߕߋߦߊ߫ ߝߌ߬ߟߊ߬ߣߍ߲ ߢߌ߲߬ ߘߌ߫:
ߊ ߺ ߒ ߓߘߊ߫ ߛߙߋߕߋߕߋߦߊ߫ ߞߏ߫ ߡߊ߰ߙߌ߬ ߓߊ߬ߕߏ߬ߕߊ߬ ߜߘߍ߫ ߕߴߊߟߊ߫ ߞߐ߫.
ߋ ߺ ߒ ߓߘߊ߫ ߛߙߋߕߋߕߋߦߊ߫ ߝߣߊ߫ ߞߏ߫ ߡߊ߬ߡߊߘߌ߫ ߦߴߊߟߊ߫ ߟߊ߫ ߞߋߟߊ ߟߋ߬ ߘߌ߫.
ߘߍ߲߬ߞߣߍ߬ߦߊ ߦߋ߫ ߓߏߟߏ߲߫ ߥߐ߯ߙߐ߫ ߟߋ߬ ߘߌ߫߸ ߊ߲ ߓߍߣߊ߬ ߊ߬ߟߎ߫ ߕߐ߬ߝߍ߬ߦߊ߫ ߕߎ߬ߡߊ߫ ߣߊ߬ߕߐ ߟߎ߬ ߘߐ߫ ߣߴߊߟߊ߫ ߛߐ߲߬ ߘߊ߫، ߓߏߟߏ߲߫ ߥߐ߯ߙߐ ߏ߬ ߟߎ߬ ߝߟߍ߫ ߣߌ߲߬:
ߞߊ߬ ߘߍ߲߬ߞߣߍ߬ߦߊ߬ ߊߟߊ߫ ߡߊ߬، ߞߊ߬ ߘߍ߲߬ߞߣߍ߬ߦߊ߫ ߡߟߍ߬ߞߊ ߟߎ߫ ߡߊ߬، ߞߊ߬ ߘߍ߲߬ߞߣߍ߬ߦߊ߫ ߖߌ߰ ߟߍߙߊ ߟߎ߫ ߡߊ߬، ߞߊ߬ ߘߍ߲߬ߞߣߍ߬ߦߊ߬ ߞߋߟߊ ߟߎ߫ ߡߊ߬، ߞߊ߬ ߘߍ߲߬ߞߣߍ߬ߦߊ߬ ߟߏ߲ߠߊߓߊ߲ ߡߊ߬، ߞߊ߬ ߘߍ߲߬ߞߣߍ߬ߦߊ߫ ߟߊ߬ߕߍ߮ ߢߌ߬ߡߊ ߣߴߊ߬ ߖߎ߯ߡߊ߲ ߠߎ߫ ߡߊ߬.
ߟߊ߬ߕߍ߮ ߘߏ߲߬ ߞߘߐ ߟߋ߬ ߞߏ߫ ߝߋ߲ ߺ ߋ ߺ ߝߋ߲߫ ߞߊ߬ ߖߐ߲߭ ߛߐ߬ߘߐ߲߬ ߢߌ߬ߡߊ߬ ߣߌ߫ ߖߎ߯ߡߊ߲߫ ߘߐ߫߸ ߥߟߊ߫ ߤߙߊ߫ ߣߌ߫ ߕߣߊ߬ ߘߐ߫߸ ߏ߬ ߛߓߍߣߍ߲߫ ߠߋ߬ ߖߐ߲߭ ߡߊ߬߸ ߊ߬ ߓߍ߯ ߟߊߕߍ߰ߣߍ߲߬ ߞߘߐ ߟߋ߬ ߊߟߊ߫ ߓߟߏ߫߸ ߏ߬ ߘߏ߲߬ ߝߋ߲ ߺ ߋ ߺ ߝߋ߲߫ ߡߊߕߊ߲߬ߞߊ߬ ߢߊ߫ ߕߍ߫ ߖߐ߲߭ ߞߣߐ߫߸ ߤߙߊ߫ ߟߊߕߍ߰ߓߊߟߌ ߝߣߊ߫ ߡߊߛߊ߬ߡߊ߲߬ ߢߊ߫ ߕߍ߫ ߊ߬ ߞߣߐ߫.
ߘߌ߯ߣߊ ߕߐ߮ ߕߍߡߕߊ ߦߋ߫ ߖߘߍ߬ߞߟߏ߬ߓߊ߰ߦߊ ߡߍ߲ ߘߌ߫ ߛߍߣߍ߲߬ߛߊ߫، ߏ߬ ߦߋ߫ ߕߎ߲ߞߎ߲߫ ߟߏ߯ߟߎ߫ ߟߋ߬ ߘߌ߫߸ ߥߟߊ߫ ߛߡߊ߬ߛߋ߲߬ ߟߏ߯ߟߎ߫߸ ߏ߬ ߟߎ߫ ߟߋ߬: ߛߙߋߕߋߕߋߦߊ߫ ߝߌ߬ߟߊ߬ߣߍ߲ ߣߌ߫ ߛߊߟߌ ߣߌ߫ ߖߞߊ ߣߌ߫ ߛߎ߲ ߣߌ߫ ߤߖߌ ߘߌ߫.
ߘߌ߯ߣߊ ߕߐ߮ ߛߓߊߣߊ߲ ߦߋ߫ ߢߌ߬ߡߊ߬ߦߊ ߡߍ߲ ߘߌ߫߸ ߕߎ߲ߞߎ߲߫ ߞߋߟߋ߲߫ ߔߋ߫ ߟߵߏ߬ ߘߌ߫: ߏ߬ ߟߋ ߕߋߟߋ߲ߓߊ߯ߦߊ ߘߌ߫.
ߓߊߏ߬ ߞߋߟߊ ߖߍ߬ߘߍ ߞߵߏ߬ ߝߊ߬ߛߊߙߌ ߞߍ߫ ߡߍ߲ ߘߌ߫߸ ߞߏ߫ ߛߌ߬ߟߡߊ߬ ߓߘߍߓߘߍ ߦߴߊ߬ ߟߊ߫ ߓߊ߬ߕߏ ߣߴߊ߬ ߟߊ߫ ߞߏ ߓߍ߯ ߞߍ߫ ߟߋ߬߸ ߦߏ߫ ߊ߬ ߢߊ߯ ߊߟߊ߫ ߟߊ߫ ߜߍ ߘߐ߫ ߟߋ߬، ߓߊߏ߬ ߤߟߴߊ߬ߟߋ߬ ߢߊ߫ ߡߊ߫ ߞߍ߫ ߊߟߊ߫ ߟߊ߫߸ ߊ߬ ߦߴߊ߬ ߟߐ߲߫ ߞߏ߫ ߊߟߊ߫ ߢߊ߯ ߊ߬ߟߋ ߟߊ߫ ߛߋߚߋ߫، ߏ߬ ߘߐ߫߸ ߢߌ߬ߡߊ߬ߦߊ ߞߘߐ ߟߋ߬ ߊߟߊ߫ ߢߍߛߌߟߊߒߢߍ ߖߊ߯ߕߋ ߘߌ߫، ߏ߬ ߟߋ ߘߏ߲߬ ߦߋ߫ ߕߋߟߋ߲ ߘߌ߫.
ߒ߬ߓߊ߬ ߣߌ߫ ߡߐ߰ ߘߴߊ߬ ߡߊߛߐ߬ߘߐ߲߬ ߞߵߊ߬ ߟߊߓߐ߫ ߞߎߡߊ߫ ߝߍ߬߸ ߊ߲ ߓߘߴߊ߬ ߟߐ߲߫ ߢߊߝߐߟߌ ߢߌ߲߬ ߠߎ߫ ߡߊ߬ ߞߏ߫ ߞߙߊߟߊߕߎ߲߮ ߦߋ߫ ߛߌ߬ߟߡߊ߬ߦߊ ߕߎ߲ߞߎ߲ ߘߏ߫ ߟߋ߬ ߘߌ߫، ߡߍ߲ ߛߎ߲ ߦߋ߫ ߘߌߦߊߜߏߦߊ ߘߌ߫.
ߛߌ߬ߟߡߊ߬ ߘߋ߲ߡߌߛߍ߲ ߓߊ߯ ߓߊ߲߫ ߞߐ߯ ߟߊ߫ ߞߊ߬ ߞߎ߲߬ߡߊߞߘߎ߬߸ ߛߎ߲ߞߊߙߏ ߡߎ߰ߡߍ ߛߎ߲ ߓߘߊ߫ ߞߴߊ߬ ߡߊ߬ ߘߌߦߊߜߏߦߊ ߘߌ߫، ߏ߬ ߘߐ߫ ߛߎ߲ ߓߘߴߊ߬ ߝߘߎ߫، ߞߊ߬ߕߎ߲߯ ߛߎ߲ ߠߋ߬ ߛߌ߬ߟߊ߬ߡߊ ߝߘߎ߫ ߟߊ߫߸ ߡߍ߲ ߛߌ߬ߞߛߊߓߌ ߓߊ߯ ߛߋ߫ ߊ߬ ߡߊ߬ ߞߊ߬ߣߌ߲߫، ߓߊ߬ߙߌ߬ ߡߐ߰ ߕߍ߫ ߛߎ߲ ߝߘߎ߫ ߟߊ߫ ߘߋ߬، ߊ߬ ߕߎ߲߬ ߓߊ߯ ߞߍ߫ ߞߏ߫ ߡߐ߰ ߟߋ߬ ߊ߬ ߝߘߎ߫ ߟߊ߫߸ ߛߊ߫ ߤߊߟߌ߬ ߓߌ߬ ߒߠߋ ߞߎߡߟߊ ߓߊ߬ ߊߟߎ߫ ߟߊ߬ߡߍ߲߬ߠߌ߲߬ߠߊ ߓߊ߬߸ ߛߴߊ߬ ߡߊ߫ ߝߘߎ߫ ߊ߲ ߝߋ߲߫ ߓߟߏ߫ ߡߎߣߎ߲߬.
ߛߎ߲ ߦߋ߫ ߊߙߊߓߎ߫ ߞߊ߲ ߠߋ߬ ߘߌ߫߸ ߡߍ߲ ߞߘߐ ߦߋ߫ ߓߟߏ߫ ߘߌ߯ ߖߘߍ߬ ߘߐ ߘߌ߫ « ߥߟߊ߫ ߞߙߊߟߊߕߎ߲߮ » ߏ߬ ߟߋ ߞߏߛߐ߲߬ ߛߎ߲ ߕߊ߬ߣߊ ߟߋ߬ ߣߊ߬ߦߌ߬ߣߊ߲߬ ߞߏ ߟߎ߬ ߓߍ߯ ߟߋ߬ ߘߌ߫: ߘߊߥߎ߲ߠߌ߲߸ ߡߌ߲߬ߠߌ߲߸ ߗߍ߬ߣߌ߬ߡߛߏ߬ߦߊ ߣߴߊ߬ ߡߊߛߎ߬ߘߎ߲߬ߧߊ߬ ߞߏ ߟߎ߬߸ ߖߊ߲߬ߓߊ߬ ߦߟߍ ߊ߬ ߣߴߊ߬ ߛߌ߬ߛߌ߬ ߝߌߙߏ߲، ߏ߬ ߓߍ߯ ߦߋ߫ ߛߎ߲ ߕߌߢߍ߫ ߟߊ߫ ߟߋ߬، ߊ߬ ߣߌ߫ ߝߣߊ߫ ߡߏ߬ߛߏ ߓߊ߯ ߦߟߌߛߌ߫ ߊ߬ ߣߴߊ߬ ߓߊ߯ ߡߏߦߌ߫߸ ߏ߬ ߓߊߛߌ߫ ߝߌ߬ߟߊ ߓߍ߯ ߛߊߟߌ ߣߌ߫ ߛߎ߲ ߕߌߢߍ߫ ߟߊ߫ ߟߋ߬߸ ߞߏ߬ߣߵߊ߬ ߘߌ߫ ߛߎ߲߫ ߖߟߎ ߛߙߊ߬߸ ߊ߬ ߕߍ߫ ߛߊߟߌ ߟߋ߬ ߖߎ߬ߟߎ ߛߙߊ߬ ߟߊ߫.
ߊ߲ ߓߍߣߊ߬ ߞߎߡߊ߫ ߛߎ߲ ߞߊ߲߬߸ ߊ߲ ߠߊ߫ ߥߟߊ߬ߘߊ߫ ߣߊ߬ߕߐ ߘߐ߫، ߊ߲ ߞߏ߬ߣߌ߲ ߦߴߊ߬ ߟߐ߲߫ ߞߏ߫ ߢߌ߬ߡߊ߬ߦߊ ߞߊߙߏ ߟߋ߬ ߛߎ߲ߞߊߙߏ ߘߌ߫߸ ߢߊ߬ߟߌ ߣߌ߫ ߤߌߣߊ ߣߌ߫ ߓߐߒߝߘߎߘߐ߫ ߞߊߙߏߓߊ ߟߋ߬، ߓߙߊ߬ߖߌ ߓߎ߯ ߞߊߙߏ߫ ߡߊ߫ ߕߊ߬ߡߌ߲߬ ߞߊߙߏ ߣߌ߲߬ ߞߊ߲߬߸ ߊ߬ ߞߏ߫ ߢߌߡߊ ߟߎ߬ ߣߌ߫ ߞߊߙߏ ߕߐ߭ ߟߎ߬ ߞߏ߫ ߢߌߡߊ ߡߊ߲߫ ߞߊ߲߫ ߝߋߎ߫، ߖߘߍ߬ ߘߐ߬ߡߌ߬ߘߊ߬ ߞߊߙߏ ߟߋ߬ ߞߊ߬ ߓߐ߫ ߞߎ߬ߕߊ߬ ߞߏ ߡߎ߰ߡߍ ߡߊ߬߸ ߏ߬ ߟߋ ߟߊ߬ߕߐ߲߬ߣߍ߲ ߠߎ߬ ߞߍ ߘߌ߫، ߡߐ߰ ߡߊ߬ߝߐ߸ ߢߊ߬ߡߐ߰ߦߊ߸ ߖߌߝߊ߫ ߛߓߏ߸ ߟߍ߬ ߛߓߏ߸ ߜߙߐ߬ߞߐ߸ ߛߏ߬ߝߘߊ߬ߓߋ߸ ߛߏ߲߬ߧߊ߬ߟߌ߸ ߞߝߊ ߣߌ߫ ߞߊ߬ߙߏ߲ ߣߌ߫ ߞߊ߲ߛߏ߲߸ ߥߎߦߊ߫ ߝߐ߸ ߝߣߊ߬ߦߊ߸ ߡߍ߲߬ߘߍ߬ߦߊ߸ ߥߎߦߊ ߛߙߋߦߊ߸ ߕߐ߬ߢߍ߮߸ ߢߊ߲ߜߏߦߊ ߡߊ߬ߝߐ߬ߟߌ߸ ߞߘߐߡߊߕߍ߯ߟߌ߸ ߝߌߛߙߌߥߊߟߋߦߊ߸ ߢߡߊߞߏߖߎ߯ߦߊ߸ ߞߎ߲߬ߘߐ߬ߞߏ߬ߖߎ߰ߦߊ߸ ߡߊ߬ߜߍ߬ߙߍ߲߬ߞߍ߬ߟߌ߸ ߟߊ߬ߤߘߌ߬ ߕߌߢߍ߸ ߛߊߣߌ߲ ߣߌ߫ ߖߟߐߞߌ ߘߏ߫ ߘߐ߫ ߞߋߟߋ߲߫ ߥߟߴߊ߬ ߝߌ߬ߟߊ ߓߌ߬ߟߊ ߗߍ߭ ߝߊ߬ߘߌ ߡߊ߬، ߛߌ߲ߖߌ߫ ߕߍ߮߸ ߡߏߦߌߓߊ߯ ߛߐߛߐ߸ ߊ߬ ߣߌ߫ ߞߏ ߡߍ߲ ߕߍ߫߫ ߓߍ߲߬ ߌ ߡߊ߬ ߞߵߏ߬ ߞߍ߫ ߡߐ߰ ߜߘߍ߫ ߟߊ߫߸ ߊ߬ ߣߌ߫ ߝߏ߬ߟߌ߬ ߟߊ߬ߡߌ߬ߘߊ߬ߓߊߟߌߦߊ ߟߊ߬ߜߏߦߊߢߍ ߡߊ߬. ߏ߬ ߟߎ߬ ߣߴߊ߬ߟߎ߫ ߢߐ߲߰ߘߐ ߓߍ߯ ߦߋ߫ ߕߏߕߊ ߟߋ߬߬ ߘߌ߫ ߞߘߐ߬ߡߊ߲߫ ߞߊߕߙߍ߬ߕߍ߫ ߛߎ߲ߞߊߙߏߓߊ ߣߌ߲߬ ߡߊ߬.
ߊ߬ߟߌ߫ ߞߙߊ߬ߞߐ߬ߞߊ߫ ߞߊ߬ߟߐ ߓߟߏ߫ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫ .