ߘߎ߰ ߞߏ߬ ߡߊ߲ߞߊ߲ ߣߌ߲߬ ߡߊ߫ ߘߊߡߌ߬ߣߊ߫ ߓߌ߬߸ ߛߊ߬ߙߌ߬ߦߊ߫ ߕߎ߲߬ ߓߘߴߊ߬ ߞߏ ߞߕߌߕߍ߰ ߞߘߐ߬ߡߊ߲߬، ߒ߬ߓߊ߬߸ ߏ߬ ߟߋ ߡߊ߲߬ߞ߲ߊ ߥߟߌ߬ߣߍ߲߫ ߣߌ߲߬ ߕߎ߲߲߯߸ ߝߏ߫ ߞߊ߬ ߡߙߊ߬ߒ߬ߡߊ߬ߝߋ߲߬ ߠߊ߬ߓߊ߯ߙߊ ߓߐ߫ ߊ߬ ߘߐ߫߸ ߞߊ߬ ߘߏ߫ ߓߐ߬ߣߐ߫ ߊ߬ ߣߌ ߘߐ߫ ߓߌߟߏ߲ ߂߀߂߆ ߓߌ߲ߠߊߥߎߟߋ߲ ߕߋ߬ߟߋ߫ ߂߂ ߡߊ߬ ߖߟߊߞߘߐ߫ ߡߙߊ߬ߘߊ߬ߙߋ߲ ߞߣߐ߫߸ ߡߊ߲߬ߖߊ߲߬ߠߊ߫ ߡߙߊ߬ߓߊ߰ߘߊ ߘߐ߫، ߝߐߢߐ߲߯ߞߐ ߣߌ߲߬ ߦߋ߫ ߖߟߐ߬ߞߐ߬ ߣߌ߫ ߞߊ߲ߕߍߘߎ߰ߓߊߟߊ߲ߘߎ߯ ߟߋ߬ ߕߍ߫߸ ߡߐ߰ ߞߋߟߋ߲߫ ߠߋ߬ ߓߣߐ߬ ߘߴߊ߬ ߣߌ ߘߐ߫߸ ߞߊ߬ ߡߐ߰ ߛߌߦߊߡߊ߲߫ ߖߐߞߌ߫، ߟߊ߬ߞߙߐ߬ߛߟߌ߬ ߛߌߦߊߡߊ߲߫ ߞߏ߬ߣߌ߲ ߞߍ߫ ߘߴߊ߬ ߘߐ߫ ߞߵߊ߬ ߓߍ߲߬ ߟߊ߬ߞߊ߲߬ߘߊ߬ߟߌ ߝߛߏ߬ߝߛߊ ߡߊ߬߸ ߊ߬ ߣߌ߫ ߛߊ߬ߙߌ߬ߦߊ߬ ߟߊ߫ ߓߍ߲߬ߞߊ߲߬ߡߊ ߟߎ߬ ߡߊߛߐ߬ߛߐ ߕߊ߬ߣߍ߲ ߞߵߊ߬ ߟߊ߫ ߞߎߡߊ߫ ߓߐߣߍ߲߫ ߢߐ߲߰ ߡߊ ߘߏ߫ ߟߎ߫ ߞߊ߲߬߸ ߏ߬ ߟߋ ߟߊߓߊ߲߫ ߘߊ߫ ߡߊ߬ߙߌ߬ߝߊ߬ ߜߊߛߌ ߡߊ߬.
ߣߌ߲߬ ߞߏ ߞߍ߫ ߘߊ߫ ߖߟߐ߬ߞߐ߫ ߟߋ߬߸ ߊ߬ߟߎ߬ ߟߊ߫ ߓߎ߰ߘߊ ߘߏ߫ ߟߊ߫߸ ߥߐ߬ߦߐ ߦߴߏ߬ ߟߎ߬ ߡߍ߲ ߠߎ߬ ߣߌ߫ ߓߊߟߊ߲ߘߎ߯ߞߊ ߟߎ߬ ߕߍ߫ ߞߊ߬ߣߌ߲߬، ߖߟߐ߬ߞߐ߫ ߛߣߍ߬ߞߍ߬ ߝߘߏ ߘߏ߫ ߟߋ߬ ߞߐ߬ ߞߐߡߊ߬߸ ߡߍ߲ ߥߊߣߍ߲߫ ߝߏ߯ ߓߋ߬ߝߘߍ߫ ߁߇߄ ߢߐ߲߰߸ ߡߊ߲߬ߞߊ߲ ߦߴߏ߬ ߟߋ ߝߍ߬، ߛߌ߬ߘߌߞߌ߬ ߞߎ߬ߟߌߓߊ߬ߟߌ߬ ߡߍ߲ ߦߋ߫ ߊߟߌߝߊ߫ ߦߊߦߊ߫ ߁߭ ߘߎ߰ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߛߣߍ߬ߞߍ߬ ߝߘߏ ߏ߬ ߦߋ߫ ߖߟߐ߬ߞߐ߫ ߕߊ ߟߋ߬ ߘߌ߫، ߊ߬ߟߎ߬ ߓߋ߲ߓߊ߫ ߛߓߊ߬ ߓߘߊ߫ ߛߍ߬ߣߍ ߞߍ߫ ߦߋ߲߬ ߞߊ߬ߦߌ߯ ߥߊ߯ߕߌ߫ ߖߊ߲߫.>> ߛߌ߬ߘߌߞߌ߬ ߟߋ߬ ߞߊ߲߫ ߕߋ߲߬߸ ߞߵߊ߬ ߦߌ߬ߘߊ߬ ߞߏ߫ ߛߣߍ߬ ߝߘߏ ߏ߬ ߟߋ ߓߘߊ߫ ߞߍ߫ ߛߌ߰ߢߐ߲߮ ߘߏ߫ ߟߎ߫ ߓߟߏ߫ ߘߊ߬ߡߊ߲߬ߘߊ ߘߌ߫ ߛߍߣߍ߲߬.
ߊ߬ߟߋ ߟߊ߫ ߝߐߟߌ߫ ߘߐ߫߸ ߡߊ߲߬ߖߊ߲߬ߠߊ߫ ߞߕߌߘߊ ߞߊ߬ ߣߌ߲߬ ߞߏ ߞߕߌߕߍ߰ ߟߋ߬߸ ߞߵߊ߬ ߥߐ߬ߦߐ ߝߐ߫ ߞߵߊ߬ ߓߊ߲߫ ߞߊ߬ ߖߏ ߘߌ߫ ߖߟߐ߬ߞߐ߫ ߡߊ߬، ߓߊߏ߬ ߛߊ߬ߙߌ߬ߦߊ߫ ߞߵߊ߬ ߦߌ߬ߘߊ߬ ߞߏ߫ ߕߐ߰ߡߊ߬ߛߙߋ ߘߏ߫ ߟߎ߫ ߦߋ߫ ߞߣߍ ߞߊ߲߬߸ ߡߍ߲ ߠߎ߬ ߦߋ߫ ߕߐ߰ߡߊ߬ߛߙߋ߫ ߟߎ߫ ߘߌ߫ ߞߵߊ߬ ߦߌ߬ߘߊ߬ ߞߏ߫ ߖߟߐ߬ߞߐ߬ ߕߊ ߟߋ߬ ߦߋ߲߬ ߘߌ߫، <<ߛߋ߬ߘߊ߬ߖߎ߬ ߥߐߙߐ߲ߝߌ߬ߟߊ߬ ߣߌ߫ ߣߊߞߐ߫ ߛߋߦߌ߲߫ ߦߋ߫ ߦߋ߲߬.>> ߊ߬ ߞߵߏ߬ ߟߋ ߝߐ߫.
ߛߌ߬ߘߌߞߌ߬ ߞߎ߬ߟߌߓߊ߬ߟߌ߫ ߞߊ߬ ߣߊ߲ߛߙߌߡߊ߲ߠߊ ߣߐ߬ߘߎ߰ߕߌ߮ ߡߊߝߌ߲߬߸ ߞߏ߫ ߊ߬ ߦߋ߫ ߘߊ߬ߡߊ߲߬ ߓߊ߯ߙߊ ߘߌ߬ߢߍ߬ߛߓߍ ߟߎ߬ ߘߌ߫ ߟߊ߫ ߸ ߞߵߊ߬ ߛߐ߬ߘߐ߲߬ ߦߋ߲߬ ߠߎ߬ ߦߋ߫ ߖߟߐ߬ߞߐ߬ߞߊ ߟߎ߬ ߓߟߏ߫ ߛߣߍ߬ ߝߘߏ ߟߋ߬ ߘߌ߫، ߏ߬ ߟߋ ߘߐ߫߸ ߖߟߐ߬ߞߐ ߞߵߊ߬ߟߎ߬ ߡߊߞߊ߬ߛߌ߫ ߛߊ߬ߙߌ߬ߦߊ߬ ߟߊ߫، ߏ߬ ߟߎ߬ ߟߊ߫ ߡߞߊ߬ߛߟߌ߬ ߛߓߍ ߖߋ߬ߓߌ߬ߓߊߟߌߦߊ ߞߏߛߐ߲߬ ߞߎ߲߬ߘߊ߬ ߣߐ߬ߘߎ߰ߕߌ߮ ߣߴߊ߬ ߛߋ߲߬ߘߏ߲߬ߢߐ߲߮ ߠߎ߬ ߓߟߏ߫߸ ߞߟߍ߬ߡߐ߰ߘߊ ߕߊ߯ ߘߊ߫ ߡߌ߬ߘߊ߬ߟߌ ߞߍ߫ ߖߍ߲ߓߎߙߍ߲ ߝߍ߬ ߂߀߂߆ ߓߌ߲ߠߊߥߎߟߋ߲ ߕߋ߬ߟߋ߫ ߂߂ ߃ߙߋ߲ ߡߊ߬߸ ߞߊ߬ ߟߊ߬ߛߏ ߞߊ߲ߕߍ߫ ߡߌ߬ߣߊ߬.
ߖߟߊߞߘߐ߫ ߡߙߊ߬ߓߊ߰ߘߎ߯ߟߊ߸ ߡߙߊ߬ߓߊ߯ ߟߊ߬ߦߌ߬ߓߊ ߞߐ߲ߘߍ߫ ߞߵߊ߬ ߦߌ߬ߘߊ߬ ߞߏ߫ ߡߌ߬ߣߊ߬ߟߌ ߏ߬ ߞߍߣߍ߲߫ ߛߊ߬ߙߌ߬ߦߊ߫ ߟߋ߬ ߞߣߐ߫ ߝߛߊߦߌ߫، ߓߊߏ߬߸ ߊ߬ ߞߍ߫ ߘߊ߫ ߞߕߌߞߊ߲ߘߊ ߟߊ߫ ߖߊ߬ߡߊߙߌ ߟߋ߬ ߞߣߐߡߊ߬، ߓߊߏ߬߸ ߡߞߊ߬ߛߟߌ߬ ߛߓߍ ߕߎ߲߬ ߓߘߊ߫ ߟߊߕߊ߯ ߛߋ߲߬ߢߊ߬ ߞߋߟߋ߲߫߸ ߝߌ߬ߟߊ߬߸ ߤߊ߲߯ ߣߊ߯ߣߌ߲߫߸ ߏ߬ ߛߌ߫ ߡߊ߫ ߖߋ߬ߓߌ߬، ߏ߬ ߘߏ߲߬ ߘߊ߬ߟߎ ߛߐ߬ߘߐ߲߬ ߘߴߊ߲ ߓߟߏ߫ ߞߊ߲ߕߎߘߎ߰ߓߊߟߊ߲ߘߎ߯ ߘߎ߰ߕߌ߮ ߊ߲߬ߛߎ߬ߡߊߣ ߞߊ߲ߕߍ߫ ߞߙߊ߫ ߘߐ߫߸ ߏ߬ ߡߍ߲ ߞߵߊ߬ ߦߌ߬ߘߊ߬ ߞߏ߫: <<ߣߴߌ ߛߊ߲ߘߐ߫ ߡߐ߮ ߞߵߌ ߞߟߌ߫ ߛߋ߲߬ߢߊ߬ ߕߊ߲߫߸ ߌ ߞߊ߫ ߞߊ߲߫ ߞߵߊ߬ ߟߊߡߌ߬ߣߊ߫ ߛߋ߲߬ߢߊ߬ ߕߊ߲߫، ߓߊߏ߬߸ ߛߊ߬ߙߌ߬ߦߊ ߟߋ߬.>>
ߓߊ߬ߙߌ߬߸ ߡߌ߬ߣߊ߬ߟߌ ߏ߬ ߟߋ ߞߍߣߍ߲߫ ߛߊ߫߸ ߦߏ߫ ߞߟߍ߬ߕߍ߰ߟߊ߲، ߞߊ߬ߕߎ߲߯߸ ߛߌ߬ߘߌߞߌߌߌ߬ ߞߎ߬ߟߌߓߊ߬ߟߌ߬ ߟߊ߫ ߝߐߟߌ߫ ߘߐ߫߸ ߡߊ߬ߓߊ߰ߓߊ߰ߟߌ߬ ߞߊ߲߬ ߛߌߦߊߡߊ߲߫ ߠߋ߬ ߝߐ߫ ߘߊ߫، <<ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߣߴߊ߬ߟߎ߬ ߟߊ߫ ߞߎ߲߬ߕߌ߮ ߡߊ߫ ߓߌ߬ߟߊ߬߸ ߞߏ߫ ߊ߬ߟߎ߬ ߓߍߣߊ߬ ߖߟߐ߬ߞߐ߫ ߖߋ߬ߣߌ߲߬.>> ߊ߬ ߞߵߏ߬ ߟߋ ߝߐ߫. ߊ߬ ߞߵߊ߬ ߦߌ߬ߘߊ߬ ߞߏ߫ ߇ߙߋ߲ ߠߋ߬ ߡߊ߬߸ ߊ߬ ߞߊ߬ ߞߟߌߟߌ߫ ߛߐ߬ߘߐ߲߫ ߞߵߊ߬ ߦߌ߬ߘߊ߬ ߞߏ߫ ߓߊߟߊ߲ߘߎ߯ߞߊ ߟߎ߬ ߦߴߊ߬ ߝߍ߬ ߞߊ߬ ߣߊ߬ ߖߟߐ߬ߞߐ ߞߊ߲ߡߊ߬.
߇ߙߋ߲ ߣߌ߫ ߁߆ߙߋ߲ ߕߍߟߊ ߡߎ߰ߡߍ ߞߍ߫ ߘߊ߫ ߟߋ߬߸ ߛߌ߬ߘߌߞߌ߬ ߞߎ߬ߟߌߓߊ߬ߟߌ߬ ߦߋ߫ ߞߟߌߟߌ ߞߊ߲߬ ߝߊ߰ߡߊ߬ ߓߏ߲߬ߘߊ ߓߍ߯ ߟߊ߫߸ ߊ߬ ߣߌ߫ ߟߊ߬ߞߊ߲߬ߘߊ߬ߟߌ ߡߊ߬ߘߎ߮ ߘߐ߫، <<ߒ ߞߊ߬ ߞߊ߬ߝߏ߬ߙߋ߲߬ߕߌ߮ ߞߟߌ߫߸ ߞߊ߬ ߡߙߊ߬ߓߊ߰ߘߎ߯ߟߊ ߞߟߌ߫߸ ߞߊ߬ ߞߟߍ߬ߡߐ߰ߘߊ ߞߟߌ߫، ߝߏ߫ ߒ ߞߊ߬ ߖߌ߬ߣߍ߬ ߕߊߡߊ߲ ߁ ߅߀߀ ߀߀߀ ߟߊߕߊ߯ ߖߋ߬ߣߌ߲߬ߕߊ߬ ߛߐ߲ߞߐ ߘߌ߫߸ ߛߊ߫ ߜߋ߬ߕߋߜߋ߭ ߘߌ߫ ߛߋ߫ ߟߊߣߊ߬ ߟߊ߫ ߢߊ ߡߍ߲ ߡߊ߬ ߞߊ߬ ߣߊ߬ ߦߙߐ ߟߊߞߊ߲ߘߊ߫، ߒ߬ߞߊ߬߸ ߝߏߦߊ߲߫߸ ߝߏߦߌ߬ ߡߊ߫ ߓߐ߫ ߏ߬ ߘߐ߫.>> ߊ߬ ߛߎ߬ߣߎ߲߬ߣߍ߲ ߠߋ߬ ߞߊ߬ ߞߎߡߊ ߏ߬ ߝߐ߫߸ ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߞߏ߫: <<ߞߟߍ߬ߡߐ߰ ߞߋߟߋ߲߫ ߣߌ߫ ߕߐ߲ߓߟߏߡߊ߫ ߞߋߟߋ߲߫ ߔߋ߫ ߟߋ߬>> ߖߟߊߞߘߐ߫ ߓߟߏ߫، ߟߊ߬ߞߊ߲߬ߘߊ߬ߟߌ ߞߎߡߊ ߟߊߛߙߋߦߊ߫ ߘߊ߫ ߡߙߊ߬ߓߊ߰ߘߎ߯ߟߊ ߟߊ߬ߦߌ߬ߓߊ ߞߐ߲ߘߍ߫ ߓߟߏ߫߸ ߞߏ߫ <<ߒ ߞߊ߬ ߞߏ߲߬ߖߊ߲߬ߠߊ߬ߞߘߐ߫ ߡߙߊ߬ߓߊ߮ ߞߟߌ߫߸ ߖߐ߲߰ߛߴߊ߬ ߘߌ߫ ߡߐ߱ ߟߎ߬ ߟߊߣߊ߬ ߢߊ ߡߍ߲ ߡߊ߬، ߝߏ߫ ߊ߲ ߞߊ߬ ߥߊߘߌ ߓߍ߯ ߟߊߕߊ߯ ߖߋ߬ߣߌ߲߬ߕߊ߬ ߛߐ߲ߞߐ ߘߌ߫، ߓߊ߬ߙߌ߬ ߕߎ߬ߡߊ߬ߙߋ߲߬ ߞߋߟߋ߲߫ ߏ߬ ߞߐߝߍ߬߸ ߊ߬ ߞߊ߬ ߒ ߞߟߌ߫ ߞߏ߫ ߊ߬ ߓߘߊ߫ ߖߡߊ߬ߙߌ߬ ߞߐ߬ߞߊ߬ߘߌ߬ ߖߡߊߙߌ ߛߐ߬ߘߐ߲߬߸ ߞߏ߫ ߊ߬ߟߎ߬ ߞߊߣߊ߬ ߣߊ߬߸ ߞߏ߫ ߊ߬ߟߎ߬ ߦߋ߫ ߛߊ߬ߦߌ߲߬.>> ߞߊ߬ߕߎ߲߯߸ ߡߙߊ߬ߓߊ߮ ߏ߬ ߞߵߊ߬ ߘߊ߬ߟߎ ߞߍ߫ ߟߋ߬߸ ߞߏ߫ ߖߊ߬ߡߊߙߌ ߝߘߊ߫ ߘߴߊ߬ ߛߊ߲ߘߐ߫ ߡߐ߮ ߟߎ߫ ߟߋ߬ ߟߊ߫߸ ߏ߬ ߡߍ߲ ߓߊ߬ߟߌ ߞߊ߬ ߡߙߊ߬ߓߊ߰ߘߎ߯ߟߊ ߛߐ߬ߘߐ߲߬.
ߊ߲߬ߛߎ߬ߡߊߣ ߞߊ߲ߕߍ߫ ߡߍ߲ ߦߋ߫ ߞߊ߲ߕߍߘߎ߰ߓߊߟߊ߲ߘߎ߯ ߘߎ߰ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߝߣߊ߫ ߞߵߊ߬ ߛߋߞߏ ߞߍ߫ ߞߏ ߘߐߛߎߡߊ ߘߐ߫، ߊ߬ ߞߵߊ߬ ߝߐ߫ ߞߊ߲ߕߍߘߎ߰ߓߊߟߊ߲ߘߎ߯ ߘߋ߲ߡߌߛߍ߲ ߠߎ߬ ߦߋ߫߸ ߞߏ߫ ߊ߬ߟߎ߬ ߞߊߣߊ߬ ߓߌ߬ߟߊ߫ ߖߟߐ߬ߞߐ߫ ߘߋ߬߸ ߊ߬ ߣߌ߫ ߞߏ߫ ߊ߬ ߞߊ߬ ߗߋߘߋ߲ ߠߎ߬ ߟߊߕߊ߯ ߞߊ߬ ߕߊ߯ ߔߏߔߏ߫ ߡߌ߬ߣߊ߬ߣߍ߲ ߠߎ߬ ߣߌ߫ ߝߋ߲߫ ߡߌ߬ߣߊ߬ߣߍ߲ ߠߎ߬ ߟߊߛߊ߬ߦߌ߲߬. <<ߞߏ ߞߍߢߊ߫ ߓߘߍ ߕߘߍ߬ ߡߍ߲ ߘߌ߫߸ ߏ߬ ߟߋ ߕߊ߯ߟߌ ߘߌ߫ ߞߟߍ߬ߡߐ߰ߘߊ ߟߊ߫، ߊ߬ ߡߊ߫ ߛߋ߫ ߡߙߊ߬ߒ߬ߡߊ߬ߟߌ߬ ߘߐ߫ ߡߐ߰ ߟߎ߬ ߞߊ߲ߡߊ߬߸ ߡߍ߲ ߠߎ߬ ߞߵߊ߬ߟߎ߬ ߡߊߞߊ߬ߛߌ߬.>> ߊ߲߬ߛߎ ߟߋ߬ ߞߊ߲߫ ߕߋ߲߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ߫ ߞߊ߬ ߞߟߌߟߌ ߞߍ߫ ߛߊ߬ߙߌ߬ߦߊ߬ ߡߊ߬ߓߏ߲ߧߊ ߟߋ߬ ߡߊ߬.
ߌߞߏߡߌ߲߬ ߓߐ߫ ߓߘߊ߫ ߞߍ߫ ߘߊߞߎ߲ ߓߍ߯ ߘߌ߫߸ ߢߊ߫ ߡߊ߫ ߛߐ߬ߘߐ߲߬ ߞߏ ߟߎ߬ ߡߊ߬߸ ߖߊ߲߬ߖߏ߲ ߦߟߍ߬ߡߊ߲߬ ߘߴߊ߬ ߢߊߖߎ߮ ߡߊ߬، ߞߊ߬ߕߎ߲߯߸ ߡߙߊ߬ߓߊ߰ߘߎ߯ߟߋ ߞߋߟߋ߲߫ ߣߴߊ߬ ߟߊ߫ ߟߊ߬ߓߏ߬ߙߟߌ߬ߟߊ ߞߵߊ߬ ߥߌ߬ߟߌ߫ ߞߵߊ߬ߟߎ߫ ߞߎ߲߬ߛߌ߲߫ ߖߟߐ߬ߞߐ ߟߊ߫߸ ߞߏ߫ ߊ߬ߟߎ߬ ߕߊ߯ߕߐ߫ ߡߊ߲߬ߞߊ߲߬ ߦߙߐ ߏ߬ ߘߐ߫߸ ߞߊ߬ ߥߊ߫ ߘߏ߫ ߝߐ߫ ߡߐ߱ ߟߎ߬ ߦߋ߫، ߊ߬ߟߋ ߥߊ߫ ߘߊ߫ ߟߋ߬߸ ߟߊ߬ߞߊ߲߬ߘߊ߬ߟߌ߬ߟߊ߬ ߡߊ߫ ߥߴߊ߬ ߞߐ߫߸ ߊ߬ ߣߌ߫ ߛߏ ߞߏߟߊߕߍ߯ ߜߘߍ߫ ߡߊ߫ ߥߊ߫ ߞߊ߬ ߓߐ߫ ߖߟߊߞߘߐ߫، ߞߏ ߞߍߢߊ ߏ߬ ߟߋ ߡߊ߫ ߓߊ߲߫ ߢߊߦߋ߫ ߟߊ߫ ߡߐ߰ ߛߌߦߊߡߊ߲߫ ߓߟߏ߫، ߏ߬ ߟߋ ߘߐ߫߸ ߛߌ߬ߘߌߞߌ߬ ߞߎ߬ߟߌߓߊ߬ߟߌ߫ ߞߵߊ߬ ߖߘߍ߬ ߡߊߢߌ߬ߣߌ߲߬ߞߊ߬߸ ߞߏ߫ <<ߊߟߎ ߡߐ߰ ߛߊ߬ߓߊ ߛߋߕߐ߫ ߥߊ߫ ߟߊ߫ ߖߡߊ߬ ߕߍߡߊ߬ ߘߌ߫ ߡߍ߲ ߠߎ߬ ߘߌ߫ ߡߐ߰ ߃߀߀ ߢߐ߲߰ ߓߐ߫߸ ߊ߬ߟߎ߬ ߕߍ߯ ߦߋ߫ ߣߌ ߘߐ߫߸ ߘߏ߫ ߟߎ߫ ߣߌ߫ ߡߙߊ߬ߒ߬ߡߊ߬ߝߋ߲ ߦߋ߫؟>> ߛߌ߬ߘߌߞߌ߬ ߞߵߊ߬ ߖߍ߬ߘߍ߫ ߢߌ߬ߣߌ߲߬ߞߊ߬ ߞߊ߲ ߏ߬ ߟߋ ߟߊ߫، ߡߙߊ߬ߓߊ߰ߘߎ߯ߟߊ ߟߊ߫ ߞߎ߲߬ߠߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ <<ߒ ߞߵߊ߬ ߦߋ߫ ߟߋ߬ ߞߏ ߦߋ߫ ߕߊ߬ߡߌ߲߬ ߠߊ߫ ߥߙߊ߬ ߟߊ߫߸ ߟߊ߬ߞߊ߲߬ߘߊ߬ߟߌ߬ߟߊ ߟߎ߫ ߘߏ߲߬ ߦߋߣߍ߲߫ ߕߍ߫، ߏ߬ ߟߋ ߘߐ߫߸ ߒ ߞߊ߬ ߞߊ߬ߝߏ߬ߙߋ߲߬ߕߌ߮ ߟߊߟߐ߲ߠߌ߲߫߸ ߞߏ߫ ߒ ߧߴߊ߬ ߝߍ߬ ߞߊ߬ ߥߊ߫ ߛߋ߫ ߦߋ߲߬، ߏ߬ ߞߵߊ߬ ߝߐ߫ ߞߏ߫ ߊ߬ߥߊ߬، ߓߊ߬ߙߌ߬߸ ߊ߬ ߡߴߊ߬ ߝߐ߫ ߞߏ߫ ߊ߲ ߧߋ߫ ߥߊ߫ ߢߐ߲߯ ߝߍ߬، ߞߟߍ߬ߡߐ߬߬ ߞߋߟߋ߲ ߡߍ߲ ߝߣߊ߫ ߕߎ߲߬ ߦߋ߲߬߸ ߏ߬ ߡߊ߫ ߛߋ߫ ߡߊߛߐ߬ߘߐ߲߬ ߠߊ߫ ߒ ߓߟߏ߫، ߏ߬ ߟߋ ߘߐ߫߸ ߒ ߥߊ߫ ߘߊ߫ ߏ߬ ߢߊ ߟߋ߬߸ ߞߊ߬ ߘߏ߲߬ߛߏ߬ ߞߎ߲ߕߌ߮ ߟߊ߫ ߒ ߞߊ߬ ߞߏ߫ ߊ߬ߟߎ߬ ߦߋ߫ ߦߙߐ ߦߌ߬ߘߊ߬ ߒ ߠߊ߫.>> ߡߙߊ߬ߓߊ߰ߘߎ߯ߟߊ ߟߋ߬ ߞߊ߲߫ ߕߋ߲߬.
ߡߍ߲ ߠߎ߬ ߕߊ߯ ߘߊ߫ ߞߏߢߊ ߣߌ߲߬ ߘߐ߫ ߞߏ߫ ߊ߬ߟߎ߬ ߞߍߕߐ߫ ߕߊ ߟߊߛߊ߬ ߟߊ߫߸ ߏ߬ ߟߎ߫ ߜߊ߰ߢߊ߬ߜߊ߰ߢߊ߬ ߘߊ߫ ߟߋ߬ ߦߋ߲߬ ߞߏߛߓߍ߫، ߡߎߛߊ߫ ߞߊ߲ߕߍ߫ ߡߍ߲ ߦߋ߫ ߖߟߐ߬ߞߐ߫ ߛߌ߰ߓߊ߮ ߘߏ߫ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߘߏ߲߬ߛߏ߬ ߞߎ߲ߕߌ߮ ߖߍ߬ߘߍ ߥߊ߬ߟߏ߲߬ ߘߊ߫ ߜߟߋ߬ߞߋ ߟߋ߬ ߟߊ߫߸ ߊ߬ ߣߌ߫ ߡߙߊ߬ߒ߬ߡߊ߬ߝߋ߲ ߠߎ߬߸ ߏ߬ ߟߎ߬ ߡߍ߲ ߠߎ߬ ߕߎ߲߬ ߕߍ߫ ߘߏ߲߬ ߠߴߊ߬ ߡߊ߬ ߞߊ߬ߣߌ߲߬.>> ߛߌ߬ߘߌߞߌ߬ ߞߎ߬ߟߌߓߊ߬ߟߌ߫ ߞߵߊ߬ ߦߌ߬ߘߊ߬ ߞߏ߫ ߡߙߊ߬ߒ߬ߡߊ߬ߟߌ ߘߊߡߌ߬ߣߊ߬ ߘߊ߫ ߟߋ߬ ߞߊ߬ ߡߙߊ߬ߓߊ߰ߘߎ߯ߟߊ ߖߍ߬ߘߍ ߢߊ ߕߏ߫ ߜߍ ߘߐ߫ ߦߋ߲߬.
ߡߙߊ߬ߓߊ߰ߘߎ߯ߟߊ ߖߍ߬ߘߍ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ߟߋ߫ ߞߵߊ߬ ߞߎ߲߬ ߢߌߣߌ߲߫ ߠߋ߬߸ ߓߊߏ߬ ߡߊ߲߬ߞߊ߲߬ ߓߘߎߓߘߎ ߟߎ߫ ߕߎ߲߬ ߓߘߊ߫ ߥߌ߬ߟߌ ߘߊߡߌ߬ߣߊ߬߸ ߞߏ߫ ߊ߬ ߟߊ߫ ߕߊ߯ߟߌ ߞߐ ߟߋ߬ ߞߍߣߍ߲߫ ߞߏ ߟߊߖߎ߯ߦߊ ߘߌ߫.
ߛߙߋ߫ ߛߌߦߊߡߊ߲߫ ߞߏ߬ߣߌ߲ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߞߊ߬ ߡߊ߬ߙߌ߬ߝߊ߬ ߡߊ߲ߞߊ߲ ߠߎ߬ ߡߍ߲߫ ߠߋ߬، ߛߌ߬ߘߌߞߌ߬ ߞߎ߬ߟߌߓߊ߬ߟߌ߫ ߞߵߊ߬ ߦߌ߬ߘߊ߬ ߞߏ߫: <<ߓߊߟߊ߲ߘߎ߯ߞߊ ߟߎ߫ ߟߋ߬ ߞߊ߬ ߡߊ߬ߙߌ߬ߝߊ ߝߋ߬.>> ߞߊ߬ ߘߏ߫ ߟߎ߫ ߡߊߘߌߡߌ߲߫߸ ߝߏ߫ ߞߊ߬ ߡߐ߰ ߞߋߟߋ߲߫ ߓߐ߬ߣߐ߫ ߊ߬ ߣߌ ߘߐ߫، ߡߎߛߊ߫ ߞߊ߲ߕߍ߫ ߝߣߊ߫ ߞߵߏ߬ ߞߎߡߊ߫ ߞߋߟߋ߲ ߠߋ߬ ߟߊߛߙߋߦߊ߫߸ ߞߏ߫: <<ߖߟߐ߬ߞߐ߬ߞߊ ߟߎ߬ ߣߌ߫ ߡߙߊ߬ߒ߬ߡߊ߬ߝߋ߲߫ ߕߎ߲߬ ߕߍ߫.>>
ߓߊ߬ߙߌ߬߸ ߊ߲߬ߛߎ߬ߡߊߣ ߞߊ߲ߕߍ߫ ߡߍ߲ ߦߋ߫ ߓߊߟߊ߲ߘߎ߯ߓߊ ߘߎ߰ߕߌ߮ ߘߏ߫ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߖߟߊߞߘߐߞߊ ߟߎ߫ ߣߊ߭߸ ߏ߬ ߟߎ߫ ߟߋ߬ ߡߎ߮ ߟߊߥߟߌ߬.>> ߏ߬ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߝߐߢߐ߲߯ߞߐ ߦߋ߫ ߡߊ߬ߙߌ߬ߝߊ߬ ߕߋ ߟߊߝߟߐ߫ ߢߊ ߘߐ߫.
ߕߌߢߍߟߌ ߡߍ߲ ߞߍߣߍ߲߫ ߊߘߡߊߦߊ ߡߊ߬߸ ߏ߬ ߞߏߢߊ ߟߎ߬ ߝߣߊ߫ ߘߐߝߌ߲߬ߣߍ߲߫ ߏ߬ ߢߊ߫ ߞߋߟߋ߲߫ ߔߋ ߟߋ߬ ߡߊ߬، ߓߊߏ߬߸ ߛߏ ߘߌ߲߬ߞߌߙߊ ߞߏߟߊߕߍ߮ ߟߎ߬ ߟߊ߫ ߝߐߟߌ߫ ߘߐ߫߸ ߡߐ߰ ߣߊ߯ߣߌ߲߫ ߠߋ߬ ߖߐߞߌ߫ ߘߊ߫߸ ߞߊ߬ ߞߋߟߋ߲߫ ߓߐ߬ߣߐ߫ ߊ߬ ߣߌ ߘߐ߫ ߞߌ߬ߛߍ ߞߏߛߐ߲߬، ߖߟߊߞߘߐ߫ ߞߊ߬ߝߏ߬ߙߋ߲߬ߕߌ߮߸ ߓߊߞߊ߬ߙߌ߫ ߞߎ߬ߟߌߓߊ߬ߟߌ߫ ߞߵߊ߬ ߦߌ߬ߘߊ߬ ߞߏ߫: <<ߡߐ߰ ߣߊ߯ߣߌ߲߫ ߠߋ߬ ߖߐߞߌ߫ ߘߊ߫ ߞߌ߬ߛߍ ߟߊ߫߸ ߞߋߟߋ߲߫ ߡߊ߫ ߛߴߊ߬ ߟߊ߫ ߖߐߞߟߌ ߟߊߥߟߌ߬ ߟߊ߫߸ ߊ߬ ߕߐ߬ ߛߊ߬ߓߊ ߕߊ߬ ߘߊ߫ ߞߵߊ߬ߟߎ߬ ߟߊߕߊ߯ ߛߌ߯ߙߌ߲߫ ߊ߬ߟߎ߬ ߘߊ߲ߘߊ߫ ߞߊ߲ߡߊ߬.>>
ߒ߬ߞߊ߬ ߣߴߌ ߛߋ߫ ߘߊ߫ ߞߣߍ ߞߊ߲߬߸ ߘߎ߰ߘߋ߲ ߠߎ߬ ߟߊ߫ ߖߊ߬ߕߋ߬ ߝߐߣߍ߲ ߦߟߍ߬ߣߍ߲߫ ߠߋ߬ ߝߙߋߟߋ߲߫، ߡߎߛߊ߫ ߞߊ߲߫ ߕߍ߫ ߞߵߊ߬ ߦߌ߬ߘߊ߬ ߞߏ߫: <<ߡߐ߰ ߞߋߟߋ߲߫ ߠߋ߬ ߛߊ߬ ߘߊ߫߸ ߞߊ߬ ߡߐ߰ ߥߐ߯ߙߐ߫ ߖߐߞߌ߫، ߡߍ߲ ߓߣߐ߬ ߘߴߊ߬ ߣߌ ߘߐ߫߸ ߏ߬ ߕߐ߯ ߞߏ߫ ߊߘߡߊ߫ ߞߎ߬ߟߌߓߊ߬ߟߌ߬߸ ߛߊ߲߬ ߃߃ ߢߐ߲߰߸ ߡߏ߬ߛߏ߫ ߝߌ߬ߟߊ߬ ߦߴߊ߬ ߞߎ߲߬߸ ߊ߬ ߣߌ߫ ߘߋ߲߫ ߡߐ߰ ߥߐ߯ߙߐ߫.>> ߛߌ߬ߘߌߞߌ߬ ߞߎ߬ߟߌߓߊ߬ߟߌ߫ ߞߵߊ߬ ߦߌ߬ߘߊ߬ ߞߏ߫: <<ߖߟߊߞߘߐ߫ ߘߎ߰ߘߋ߲߬ ߣߊ߯ߣߌ߲߫ ߠߋ߬ ߟߊߟߊ߫ ߘߊ߫ ߘߊ߲ߘߊߛߏߏ ߟߊ߫߸ ߕߐ߭ ߟߎ߬ ߟߊ߫ ߖߐߞߟߌ ߡߊ߫ ߖߎ߯ߦߊ߫. ߡߐ߰ ߞߋߟߋ߲߫ ߠߋ߬ ߓߣߐ߬ ߘߴߊ߬ ߣߌ ߘߐ߫߸ ߡߏ߬ߛߏ ߦߴߊ߬ ߞߎ߲߬߸ ߘߋ߲ ߦߴߊ߬ ߓߟߏ߫.>>
ߛߌߟߊߓߐߛߐ߯ߣߊ߫ ߞߊ߬ ߡߐ߱ ߟߊߕߊ߯ ߛߌ߯ߙߌ߲߫ ߡߙߊ߬ߓߊ߰ߘߊ ߘߊ߲ߘߊߛߏ ߟߊ߫߸ ߞߐߦߌߘߊߓߊ߮ ߏ߬ ߞߵߊ߬ ߦߌ߬ߘߊ߬ ߞߏ߫ ߡߐ߰ ߣߊ߯ߣߌ߲߫ ߠߋ߬ ߟߊߟߊߣߍ߲߫ ߘߊ߲ߘߊߛߏ ߟߊ߫߸ ߛߓߊ߬ ߦߋ߫ ߓߐ߫ ߟߊ߫ ߖߟߐ߬ߞߐ߸ ߞߋߟߋ߲ ߦߋ߫ ߓߐ߫ ߟߊ߫ ߞߊ߲ߕߍߘߎ߰ߓߊߟߊ߲ߘߎ߯، ߡߍ߲ ߓߍ߯ ߦߴߊ߬ ߦߌ߬ߘߊ߬ ߟߊ߫ ߞߏ߫ ߖߊ߬ߕߋ߬ ߝߐߣߍ߲ ߠߎ߬ ߓߐߣߍ߲߫ ߢߐ߲߮ ߡߊ߬ ߝߐߣߍ߲ ߣߌ߫ ߦߋߣߍ߲ ߠߎ߬ ߘߐ߫.
ߕߋ߲߭ߕߋ߲߭ ߣߌ߲߬ ߞߐ߬ߣߌ߲ ߘߐ߫߸ ߖߛߎ߬ߛߎߡߊ ߓߘߊ߫ ߘߏ߲߬، ߟߊ߬ߞߊ߲߬ߘߊ߬ߟߌ߬ߟߊ ߟߎ߬ ߓߘߊ߫ ߓߐ߫ ߡߊ߲߬ߖߊ߲߬ߠߊ߫ ߞߊ߬ ߥߊ߫ ߖߟߐ߬ߞߐ߫߸ ߞߊ߬ ߢߊߢߌߣߌ߲ߠߌ߲ ߛߌ߰ ߛߋ߲߬ߠߊ߫ ߞߊ߬ ߕߌߢߍߟߌߟߊ ߟߎ߫ ߡߌ߬ߣߊ߬، ߝߊ߰ߡߊ ߟߎ߬ ߛߋ߫ ߘߊ߫ ߛߎ߬ߕߌ߮ ߟߎ߫ ߝߍ߬߸ ߞߊ߬ ߛߦߊ߬ߝߏ ߞߍ߫߸ ߞߊ߬ ߓߊ߲߫ ߞߊ߬ ߛߎ߭ ߘߏ߲߬ ߞߏ ߖߊ߬ߡߊߙߌ ߘߌ߫، ߛߎ߬ߘߏ߲ ߏ߬ ߞߍ߫ ߘߊ߫ ߓߌ߬. ߡߙߊ߬ߓߊ߰ߘߎ߯ߟߊ ߞߊ߲߫ ߞߏ߫ ߊ߬ߟߋ ߥߊ߫ ߘߊ߫ ߦߋ߲߬ <<ߞߏ ߘߐߛߎߡߊ߫ ߞߊ߲ ߠߋ߬ ߡߊ߬߸ ߊ߬ ߡߊ߫ ߥߊ߫ ߕߊߛߎ߫ ߞߊ߲ߡߊ߬.>> ߞߏ߫ ߊ߬ߟߋ߫ ߞߏ߬ߣߌ߲ ߞߵߊ߬ ߞߎ߲߬ ߢߌߣߌ߲߫ ߠߋ߬ ߞߊ߬ ߓߐ߫ ߦߋ߲߬.
ߝߊ߰ߡߊ ߟߎ߫ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߬ ߘߌ߫ ߣߌ߲߬ ߞߏ ߢߊߢߌߣߌ߲߫߸ ߞߵߊ߬ ߕߌߢߍߟߌ ߞߍߓߊ߮ ߟߎ߫ ߡߌ߬ߣߊ߫ ߞߊ߬ ߞߏߟߊߕߐ߲߫ ߊ߬ߟߎ߬ ߟߊ߫.
ߛߌ߬ߘߌߞߌ߬ ߞߎ߬ߟߌߓߊ߬ߟߌ߫ ߞߊ߬ ߖߊ߬ߡߊ ߞߟߌ߫ ߡߊ߬ߝߊ ߟߋ߬ ߡߊ߬، ߞߏ߫ ߤߊߟߌ߫߬ ߣߴߊ߬ ߛߐ߬ߘߐ߲߬ ߘߊ߫ ߞߏ߫ ߛߊ߬ߙߌ߬ߦߊ߬ ߡߊ߬ߓߏ߲ߧߊ ߞߐߝߟߌ ߟߋ߬ ߛߋߣߴߊ߬ߟߎ߫ ߡߊ߬߸ ߊ߬ߟߎߎ߬ ߦߴߊ߬ߟߎ߫ ߡߎ߬ߢߎ߲߬، <<ߣߌ߫ ߛߊ߬ߙߌ߬ߦߊ߬ ߞߎߡߊ߫ ߞߊ߲ ߡߊ߫ ߡߊߓߏ߲߬ߧߊ߬߸ ߞߎ߲߬ߊߠ߬ߛߌ߮ ߟߎ߬ ߝߣߊ߫ ߡߊ߫ ߛߊ߬ߙߌ߬ߦߊ ߟߊߕߊ߯ߡߊ߫߸ ߖߡߊ߬ߣߊ߬ߘߋ߲ ߠߎ߬ ߟߵߊ߬ ߕߙߐߦߊ ߡߊߜߙߏ߬ ߟߊ߫.>>
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.