ߓߌ߬ߟߊ߬ߒ߬ߘߐ ߘߏ߫ ߓߘߊ߫ ߞߍ߫ ߖߌ߬ߣߍ߬ ߜߍߞߊ߲ߠߊ ߘߐ߫ ߌߞߐߕߎ߲߯߸ ߛߊߣߌ߲߫ ߘߊߡߊ߲ ߘߏ߫ ߞߣߐ߫، ߡߏ߬ߛߏ߫ ߡߐ߰ ߟߏ߯ߟߎ߫ ߟߋ߬ ߓߣߐ߬ ߘߴߊ߬ ߣߌ ߘߐ߫ ߞߎߣߎ߲߬ ߞߐ߬ߓߊ߬ߟߏ߲ ߡߊ߬ ߂߀߂߆ ߕߙߊߓߊ ߕߋ߬ߟߋ߫ ߉߸ ߞߵߏ߬ ߞߎ߲߭ ߞߍ߫ ߘߊ߬ߡߊ߲ ߘߏ߫ ߓߋ߭ ߘߌ߫ ߞߊ߲ߕߍߘߎ߰ߓߊߟߊ߲ߘߎ߯߸ ߖߟߊߞߘߐ߫ ߡߙߊ߬ߘߊ߬ߙߋ߲ ߞߣߐ߫߸ ߡߊ߲߬ߖߊ߲߬ߠߊ߫ ߡߙߊ߬ߓߊ߰ߘߊ ߘߐ߫.

ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫ ߘߌ߲߬ߞߌߙߊ ߏ߬ ߘߐ߫ ߦߋ߲߬߸ ߡߏ߬ߛߏ ߢߌ߲߬ ߠߎ߫ ߕߎ߲߬ ߦߋ߫ ߓߊ߯ߙߊ ߟߋ߬ ߟߊ߫ ߘߊߞߎ߲ ߘߏ߫ ߘߐ߫߸ ߦߋ߲߬ ߡߍ߲ ߦߋ߫ ߞߟߌ߫ ߟߴߊ߬ߟߎ߬ ߓߟߏ߫ ߞߏ߫ ߖߜ߭ߐ߬ߟߊ߫߸ ߊ߬ߟߎ߬ ߦߋ߫ ߥߊ߫ ߟߊ߫ ߓߍ߬ߙߍ ߞߏ߬ ߟߊ߫ ߔߕߌ ߞߣߐ߫ ߦߋ߲߬ ߠߋ߬߸ ߞߊ߬ ߛߊߣߌ߲ ߓߐ߫ ߊ߬ ߘߐ߫، ߊ߬ߟߎ߫ ߕߘߍ߬ ߓߊ߯ߙߊ߫ ߟߊ߫ ߘߋ߲߬ߞߊ߬ߞߎߘߎ߲ ߘߏ߫ ߟߋ߬ ߞߣߐ߫ ߦߋ߲߬߸ ߜߊ߲ߜߘߊ ߥߊ߬ߟߏ߲߬ ߢߊ ߟߋ߬ ߞߍߣߴߏ߬ ߘߌ߫ ߞߊ߬ ߣߊ߬ ߓߋ߬߸ ߞߵߊ߬ ߛߐ߬ߘߐ߲߬ ߡߏ߬ߛߏ߫ ߡߐ߰ ߟߏ߯ߟߎ ߏ߬ ߟߎ߬ ߦߴߊ߬ ߞߣߐ߫ ߦߋ߲߬. ߡߊ߬ߛߎߓߊ ߣߌ߲߬ ߞߍ߫ ߘߊ߫ ߁߃ߙߋ߲ ߝߊ߲߭ ߝߍ߬ ߟߋ߬߸ ߡߍ߲ ߞߊ߬ ߡߐ߱ ߟߎ߫ ߓߌ߬ߟߊ߫ ߛߎ߬ߣߎ߲ ߘߐ߫ ߞߏߛߓߍ߫.

ߊ߲ ߞߊ߬ ߘߙߌߛߊ߬ ߞߊ߲ߕߍ߫ ߞߟߌ߫߸ ߊ߬ߟߋ ߟߊ߫ ߓߐ߬ߟߐ߲߬ߞߊ߬ ߞߋߟߋ߲߫ ߦߋ߫ ߛߊ߬ߓߊ߰ߕߐ ߟߎ߬ ߘߐ߫߸ ߏ߬ ߕߐ߯ ߞߏ߫ ߞߎ߲߬ߓߊ߬ ߞߊ߲ߕߍ߫، ߘߌ߬ߙߌߛߊ߬ ߞߊ߲ߕߍ߫ ߞߊ߬ ߢߊߝߐߟߌ߫ ߞߍ߫ ߊ߲ ߦߋ߫߸ ߞߵߊ߬ ߓߍ߲߬ ߊ߬ ߕߊ߫ ߟߐ߲ߕߊ ߡߊ߬ ߣߌ߲߬ ߞߏ ߘߐ߫߸ ߊ߬ ߟߊߟߐ߲ߠߌ߲ ߞߐߝߍ߬ ߡߊ߬ߛߎߓߊ ߢߌ߲߬ ߠߊ߫.

 <<ߓߌ߬ߟߊ߬ߒ߬ߘߐ ߣߌ߲߬ ߡߊ߫ ߞߍ߫ ߒߠߋ ߢߣߊ߫، ߒ ߓߐ߫ ߘߊ߫ ߟߎ ߡߊ߬ ߟߋ߬ ߞߵߊ߬ ߒ ߡߏ߬ߛߏ ߕߏ߫ ߦߋ߲߬، ߞߐ ߟߋ߬ ߝߍ߬ ߛߊ߫߸ ߊ߬ߟߎ߫ ߞߊ߬ ߒ ߥߟߋ߫ ߞߊ߬ ߓߌ߬ߟߊ߬ߒ߬ߘߐ ߣߌ߲߬ ߕߊ߬ߡߌ߲߬ ߢߊ ߢߊߝߐ߫ ߒ ߧߋ߫.>>

ߊ߬ߟߋ ߟߊ߫ ߝߐߟߌ߫ ߘߐ߫߸ ߞߏߕߐ ߟߎ߬ ߦߋ߫ ߡߐ߰ ߟߏ߯ߟߎ߫ ߟߋ߬ ߘߌ߫߸ ߡߍ߲ ߓߍ߯ ߕߍ߬ߘߍ߫ ߡߏ߬ߛߏ ߘߌ߫: ߡߛߏ߬ ߝߘߎߣߍ߲߫ ߡߐ߰ ߣߊ߯ߣߌ߲߫߸ ߊ߬ ߣߌ߫ ߘߋ߲ߡߛߏߣߍ߲߫ ߞߋߟߋ߲߫.

<<ߡߏ߬ߛߏ ߡߍ߲ ߠߎ߬ ߕߘߍ߬ ߓߊ߯ߙߊ߫ ߟߊ߫ ߘߊ߬ߡߊ߲ ߣߌ߲߬ ߞߣߐ߫߸ ߊ߬ߟߎ߫ ߡߐ߰ ߟߏ߯ߟߎ߫ ߟߋ߬ ߕߘߍ߬߸ ߡߛߏ߬ ߝߘߎߣߍ߲ ߣߊ߯ߣߌ߲߫߸ ߊ߬ ߣߌ߫ ߘߋ߲ߡߛߏߣߍ߲߫ ߞߋߟߋ߲߫، ߒ ߡߏ߬ߛߏ ߦߋ߫ ߡߐ߰ ߣߊ߯ߣߌ߲ ߏ߬ ߟߋ ߘߐ߫.>> ߊ߬ ߞߵߏ߬ ߝߐ߫ ߞߵߊ߬ ߟߊߕߍ߰.

<<ߘߊ߬ߡߊ߲߬ߓߋ ߞߐ ߘߐ߫߸ ߦߋ߲߬ ߛߏ߫ ߞߣߐ߫ ߡߐ߮ ߟߎ߬ ߕߊ߬ߣߍ߲ ߞߵߊ߬ ߟߊ߫ ߟߊ߬ߡߌߣߌ߲ ߘߋ߲ߡߌߛߍ߲ ߠߎ߬ ߞߊ߲߬߸ ߏ߬ ߟߎ߬ ߓߐ߫ ߘߊ߫ ߞߊ߬ ߥߊ߫ ߞߏߕߐ ߟߎ߬ ߡߞߊߘߊ߲߫ ߞߊ߲ߡߊ߬.

<<ߓߌ߬ߟߊ߬ߒ߬ߘߐ ߞߍ߫ ߘߊ߫ ߁߃ߕߎߡߊ ߝߊ߲߭ ߝߍ߬ ߟߋ߬، ߓߊ߬ߙߌ߬߸ ߛߎ߭ ߓߍ߯ ߛߋ߫ ߘߊ߫ ߦߋ߫ ߟߊ߫ ߞߊ߬ ߓߍ߲߬ ߁߇ߕߎߡߊ ߟߋ߬ ߡߊ߬߸ ߡߞߊ߬ߘߊ߲߬ߠߌ߲߬ߠߊ ߟߎ߬ ߟߊ߫ ߘߐ߬ߖߊ ߞߏߛߐ߲߬، ߘߋ߲ߡߌߛߍ߲ ߘߏ߫ ߟߎ߫ ߓߐ߫ ߘߊ߫ ߓߊߟߊ߲ߘߎ߯ߓߊ߫ ߞߊ߬ ߣߵߊ߲ ߡߊߘߍ߬ߡߍ߲߫ ߛߎ߭ ߟߎ߬ ߟߊߓߐ߫ ߟߊ߫ ߝߎ߯ߘߌ ߞߘߐ߫.>> ߘߙߌߛߊ߬ ߞߊ߲ߕߍ߫ ߟߋ߬ ߞߊ߲߫ ߕߋ߲߬.

ߛߎ߭ ߓߍ߯ ߕߊ߬ ߘߊ߫ ߏ߬ ߢߊ ߟߋ߬ ߡߊ߬ ߞߊ߬ ߥߴߊ߬ߟߎ߬ ߘߌ߫ ߘߊ߲ߘߊߛߏ ߟߊ߫߸ ߞߣߊ߬ߕߏ߫ ߊ߬ߟߎ߬ ߘߌ߫ ߟߴߊ߬ߟߎ߬ ߟߊ߫ ߞߐߙߍ ߡߊ߬ ߛߎ߬ߞߏ߬ߦߊ ߞߍ߫ ߞߊ߲ߡߊ߬.

ߊ߲ ߠߊ߫ ߞߟߌߟߌ ߛߋ߫ ߘߊ߫ ߖߟߊߞߘߐ߫ ߞߊ߬ߝߏ߬ߙߋ߲߬ߕߌ߮ ߡߊ߬߸ ߏ߬ ߝߣߊ߫ ߞߊ߬ ߞߎߡߊ߫ ߞߋߟߋ߲ ߢߌ߲߬ ߠߋ߬ ߟߊߛߙߋߦߊ߫߸ ߞߊ߬ ߓߍ߲߬ ߞߏ ߕߊ߬ߡߌ߲߬ ߢߊ ߡߊ߬.

ߊߟߎ߫ ߦߴߊ߬ ߟߐ߲߫߸ ߊ߬ ߕߋ߬ߟߋ߫ ߡߎ߬ߥߊ߲߫ ߖߊ߬ߕߋ߫ ߟߋ߬ ߕߋ߲߬߸ ߡߏ߬ߛߏ߫ ߡߐ߰ ߕߊ߲߫ ߢߐ߲߰ ߝߣߊ߫ ߓߣߐ߬ ߘߴߊ߬ ߣߌ ߘߐ߫ ߘߊ߬ߡߊ߲߬ߓߋ ߘߏ߫ ߘߐ߫ ߞߏ߲߬ߖߊ߲߬ߠߊ߬ߞߎߘߊ߫߸ ߊ߬ߟߋ߬ ߡߙߊ߬ߓߊ߰ߘߊ߬ ߞߋߟߋ߲ ߘߐ߫ ߦߋ߲߬ (ߡߊ߲߬ߖߊ߲߬ߠߊ߫ ߞߊ߬ߣߌ߲߬).

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.