ߞߙߎߞߊ߫ ߛߌߦߊߡߊ߲߫ ߠߋ߬ ߓߘߊ߫ ߟߊߓߋ߬ ߖߌ߬ߣߍ߬ ߞߣߐ߫ ߕߋ߲߬߸ ߏ߬ ߘߏ߫ ߟߋ߬ ߖߌ߬ߣߍ߫ ߡߌ߬ߙߌ߲߬ߘߌ߬ ߟߊ߬ߘߍ ߞߟߐ߬ߟߐ߬ߓߊ ߘߌ߫ (ߖߡߟ ߞߟߐ߬ߟߐ߬ߓߊ)، ߒ߬ߓߊ߬߸ ߟߊ߬ߓߋ߬ߟߌ ߏ߬ ߞߎߡߊ ߓߘߊ߫ ߛߌߦߊߦߊ߫ ߢߊ߫ ߛߌߦߊߡߊ߲߫ ߡߊ߬ ߞߙߎߞߊ ߛߍ߬ߘߏ߲߬ߠߊ ߟߎ߬ ߣߌ߫ ߞߙߎߞߊߘߋ߲ ߠߎ߬ ߓߟߏ߫، ߞߊ߲ߞߊ߲߫ ߡߍ߲ ߦߋ߫ ߖߡߟ ߞߏ ߛߍ߬ߘߏ߲߬ ߦߙߐ߬ ߓߟߋߓߟߋ ߘߏ߫ ߘߌ߫ ߘߐ߬ߝߐ ߞߣߐ߫߸ ߊ߬ ߞߏߢߊ ߝߐ߫ ߢߊ ߛߌߦߊߦߊ߫ ߘߊ߫ ߦߋ߲߬ ߞߣߐ߫ ߞߏߛߓߍ߫.

ߊ߲ ߠߊ߫ ߢߌ߬ߣߌ߲߬ߞߊ߬ߟߌ ߛߋ߫ ߘߊ߫ ߟߊ߱ߖߌ߬ ߛߏ߬ߙߌ߫ ߛߊ߬ߣߐ ߡߊ߬߸ ߊ߬ߟߋ ߡߍ߲ ߦߋ߫ ߖߡߟ ߞߟߐ߬ߟߐ߬ߓߊ ߘߏ߲߬ߖߟߎ߬ߡߊ߬ߟߌ߬ߟߊ ߘߌ߫ ߜߍߞߊ߲ߠߊ ߘߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߞߙߎߞߊ ߟߊߓߋ߭ ߕߍߣߊ߬ ߞߙߎߞߊߘߋ߲ ߠߎ߬ ߡߙߌߦߊ ߝߊ߬ߟߋ߲߬ ߠߊ߫.

<<ߊ߲ ߠߊ߫ ߞߙߎߞߊ ߘߌ߫ ߛߋ߫ ߟߊߓߋ߬ ߟߊ߫ ߝߊ߲߬ߞߊ ߟߊ߫ ߞߍ߬߸ ߥߟߊ߫ ߛߊߊ߬ߙߌ߬ߦߊ߬ ߛߐߛߐ ߟߊ߫، ߓߊ߬ߙߌ߬ ߞߊ߬ߙߊ߲߬ߝߊ ߊߟߌߝߊ߫ ߞߐ߲ߘߍ߫ ߟߊ߫ ߞߏ ߡߍ߲ ߦߴߊ߲ ߞߎ߲߭ ߘߐ߫߸ ߡߐ߰ ߕߍ߫ ߛߴߏ߬ ߓߐ߫ ߟߊ߫ ߦߋ߲߬.>> ߊ߬ ߞߵߏ߬ ߟߋ ߝߐ߫.

ߊ߬ߟߋ ߟߊ߫ ߝߐߟߌ߫ ߘߐ߫߸ ߟߊ߬ߓߋ߬ߟߌ ߡߙߌߘߐ ߣߌ߲߬ ߡߊ߫ ߓߙߊ߬ ߖߡߟ ߞߟߐ߬ߟߐ߬ߓߊ ߘߐ߫، ߞߊ߬ߕߎ߲߯߸ ߞߵߊ߬ ߕߊ߬ ߞߊ߬ߝߏ߬ ߖߊߛߏ߲ ߞߍ ߡߊ߬ ߂߀߂߁ ߕߎߟߊߝߌ߲ ߕߟߋ߬ ߅ ߤߊ߲߯ ߕߋ߲߬߸ ߓߘߍ߬ߓߘߍ߬ߟߌ߬ ߞߏ߬ ߥߦߐ ߦߴߊ߬ߟߎ߬ ߣߌ߫ ߖߡߊ߬ߣߊ ߕߌ߰ ߞߎߘߊ ߢߌ߲߬ ߠߎ߬ ߕߍ߫.

<<ߞߊ߬ߦߌ߯ ߞߊ߬ߝߏ߬ ߖߊߛߏ߲ ߞߍ߫ ߘߊ߫ ߂߀߂߁ ߕߎߟߊߝߌ߲ ߕߟߋ߬ ߅ ߡߊ߬߸ ߘߏ߲߬ߒ߬ߞߘߐ߬ߓߐߒߞߘߐ ߛߌߦߊߡߊ߲߫ ߠߋ߬ ߓߘߊ߫ ߞߍ߫، ߥߛߎߟߊߘߏ߲ ߠߎ߬ ߕߊ߬ߣߍ߲ ߞߵߊ߬ ߟߊ߫ ߡߐ߰ ߟߊߕߎߣߎ߲ ߞߊ߲߬߸ ߏ߬ ߓߍ߯ ߓߘߊ߫ ߟߴߊ߲ ߞߊ߲߬، ߊߟߎ߫ ߦߴߊ߬ ߟߐ߲߫߸ ߟߊ߬ߓߋ߬ߟߌ ߣߌ߲߬ ߕߍ߫ ߛߊ߬ߙߌ߬ߦߊ߬ ߞߏ߫ ߘߌ߫߸ ߊ߬ ߦߋ߫ ߓߊ߰ߒ߬ߡߊ ߣߋ߫ ߛߊ߬ߙߌ߬ߦߊ߫ ߕߊ߬ߣߊ ߟߋ߬ ߘߌ߫.>>

ߟߊ߱ߖߌ߬ ߛߏ߬ߙߌ߫ ߛߊ߬ߣߐ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߖߡߟ ߕߍ߫ ߞߙߎߞߊ߫ ߘߌ߫߸ ߡߍ߲ ߦߋ߫ ߛߊ߬ߙߌ߬ߦߊ߬ ߛߐ߬ߛߐ߬ ߞߙߎߞߊ ߘߌ߫߸ ߞߟߍ߬ߞߍ߬ ߞߙߎߞߊ߫ ߘߏ߲߬ ߕߍ߫، ߏ߬ ߘߐ߫߸ ߓߍ߯ ߦߴߊ߬ ߛߓߊߙߌ߫.

ߊ߬ ߞߊ߲߫ ߞߏ߫ ߣߴߌ ߞߊ߬ ߟߊ߬ߓߋ߬ߟߌ ߣߌ߲߬ ߞߍߣߍ߲ ߦߋ߫߸ ߊ߬ ߘߌ߫ ߛߋ߫ ߞߍ߫ ߟߊ߫߸ ߊ߬ߟߎ߬ ߦߴߊ߬ ߝߍ߬ ߞߊ߬ ߞߙߎߞߊ ߘߏ߫ ߟߎ߫ ߟߋ߬ ߟߊߓߋ߬ ߢߣߊߕߊߟߌ ߢߊߞߘߐߟߊ ߣߌ߲߬ ߘߐ߫߸ ߖߐ߲߰ߛߊ߫ ߞߙߎߞߊ߫ ߟߊߓߋ߬ߣߍ߲ ߏ߬ ߟߎ߬ ߟߊ߫ ߖߊ߬ߡߊ ߘߌ߫ ߛߋ߫ ߡߊߛߐ߬ߘߐ߲߬ ߠߊ߫ ߢߊ ߡߍ߲ ߡߊ߬߸ ߞߵߏ߬ ߟߴߊ߬ߟߎ߬ ߟߊ߫ ߞߙߎߞߊ߫ ߞߎߘߊ ߞߊ߲߬.

<<ߣߴߊ߬ߟߎ߬ ߡߊ߫ ߞߙߎߞߊ ߢߌ߲߬ ߠߎ߬ ߟߊߓߋ߬߸ ߛߊߣߌ߬ ߢߣߊߕߊߟߌ ߦߋ߫ ߞߍ߫߸ ߊ߬ߟߎ߬ ߕߍ߫ ߡߐ߱ ߛߐ߬ߘߐ߲߫ ߊ߬ߟߎ߬ ߕߊ߫ ߡߙߌߦߊ ߘߐ߫، ߏ߬ ߟߋ ߞߏߛߐ߲߬߸ ߞߙߎߞߊ ߢߌ߲߬ ߠߎ߬ ߟߊߓߋ߬ߣߍ߲߫߸  ߞߏ߫ ߕߎ߬ߡߊ߬ߘߐ߫߸ ߊ߬ߟߎ߬ ߘߌ߫ ߏ߬ ߟߎ߬ ߞߙߎߞߊߘߋ߲ ߠߎ߬ ߡߊߛߐ߬ߘߐ߲߬߸ ߞߊ߬ ߥߴߊ߬ߟߎ߬ ߟߊ߫ ߖ߭ߋ.ߍߡ.ߘߋ ߘߐ߫߸ ߊ߬ߟߎ߬ ߦߋ߫ ߞߙߎߞߊ ߡߍ߲ ߠߊߘߊ߲߫ ߞߏ ߘߐ߫، ߥߟߊߞߏ߬ ߊ߬ߟߎ߬ ߦߋ߫ ߖߊ߬ߡߊ ߛߐ߬ߘߐ߲߬، ߣߴߏ߬ ߡߙߌߦߊ ߞߍ߫ ߘߴߊ߬ߟߎ߬ ߟߊ߫߸ ߊ߬ߟߎ߬ ߦߴߊ߬ ߟߐ߲߫ ߞߏ߫ ߊ߬ߟߎ߬ ߓߟߏ ߦߋ߫ ߝߢߐ ߟߋ߬ ߟߊ߫ ߏ߬ ߘߌ߫.>>

ߡߍ߲ ߓߍ߲߬ߕߐ߫ ߊ߬ߟߎ߬ ߘߡߊߞߊ߬ߛߌ߬ ߞߏ ߞߊ߲߬ ߛߊ߬ߙߌ߬ߦߊ߬ ߞߎ߲ߘߊ߫߸ ߕߌ߲߬ߞߎߘߎ߲ ߘߏ߲߬ߖߟߎ߬ߡߊ߬ߟߌ߬ߟߊ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߡߊ߫ ߘߊߘߐߖߊߥߏ߫ ߞߍ߫ ߏ߬ ߞߏߢߊ ߞߊ߲߬ ߡߎߣߎ߲߬.

ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߋ߫ ߗߋߕߌ߯ߘߊ ߝߊ߬ߛߏ߬ߟߊ߬ߞߊ ߟߊ߫ ߟߊ߬ߛߌ߲߬ߠߌ߲ ߠߋ߬ ߡߊߞߐ߬ߣߐ߲ ߞߊ߲߬ ߦߋ߲߬߸ ߊ߬ ߣߌ߫ ߘߐ߬ߢߌ߬ߡߌ߲߬ߠߌ߲ ߓߍ߯ ߞߐߝߍ߬ ߛߊ߬ߙߌ߬ߦߊ߬ ߞߎ߲ߘߊ߫߸ ߞߵߊ߬ ߓߍ߲߬ ߞߙߎߞߊ ߖߍ߬ߘߍ ߛߌ߰ ߞߎ߲ߧߊ ߣߴߊ߬ ߛߌ߰ߝߊߘߌ ߡߊ߬.

<<ߊ߲ ߡߊ߫ ߢߣߊߕߊߟߌ ߛߊ߬ߙߌ߬ߦߊ߬ߛߎ߲߬ ߞߎߘߊ ߡߊߝߟߍ߫ ߡߎߣߎ߲߬߸ ߞߎߡߊߕߍ߫ ߞߙߎߞߊ ߟߎ߬ ߟߊ߫ ߛߊ߬ߙߌ߬ߦߊ߬ߛߎ߲߬ ߞߎߘߊ ߡߊ߬، ߣߴߊ߲ ߞߵߊ߬ ߦߋ߫ ߞߏ߫ ߡߞߊ߬ߛߟߌ߬ ߛߌߟߊ߫ ߦߋ߫ ߦߋ߲߬߸ ߊ߲ ߘߴߏ߬ ߞߏߢߊ ߘߐߢߌߡߌ߲߫.>>

ߟߊ߱ߖߌ߬ ߛߏ߬ߙߌ߫ ߛߊ߬ߣߐ߬ ߟߊ߫ ߛߙߊ߬ߣߎ߲ ߘߐ߫߸ ߊ߬ ߞߵߊ߬ ߞߊ߲ߠߊߘߌ߫ ߖߡߟ ߞߟߐ߬ߟߐ߬ߓߊ ߞߙߎߞߊߘߋ߲ ߠߎ߬ ߡߊ߬߸ ߞߏ߫ ߊ߬ߟߎ߬ ߦߴߊ߬ߟߎ߬ ߡߝߊ߫߸ ߞߊ߬ ߕߏ߫ ߞߙߎߞߊ ߗߋߕߌ߯ߘߊ߫ ߝߊ߬ߛߏ߬ߟߊ߬ߞߊ ߞߐ߫.

<<ߊ߲ ߧߋ߫ ߘߍ߬ ߞߊ߬ ߞߍ߫ ߞߋߟߋ߲߫ ߘߌ߫߸ ߞߊ߬ ߕߏ߫ ߗߋߕߌ߯ߘߊ߫ ߝߊ߬ߛߏ߬ߟߊ߬ߞߊ ߞߐ߫߸ ߞߊ߬ ߕߏ߫ ߊߟߌߝߊ߫ ߞߐ߲ߘߍ߫ ߡߙߌߦߊ ߞߐߝߍ߬، ߤߊߟߵߊ߲ ߓߊ߯ ߟߊߓߋ߬ ߟߋ߬߸ ߣߌ ߡߍ߲ ߦߴߊ߲ ߘߐ߫ ߞߙߎߞߊ߫ ߞߏ ߣߌ߲߬ ߘߐ߫߸ ߏ߬ ߕߴߛߋ߫ ߖߐ߰ߖߐ߰ ߟߊ߫.>> ߊ߬ ߞߵߊ߬ ߟߊ߫ ߞߎߡߊ ߞߎ߲߭ߝߊ߰ ߏ߬ ߟߋ ߟߊ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.