ߞߵߊ߬ ߓߍ߲߬ ߥߊߟߌߘߊ߫ ߖߌ߰ߡߝߊ߬ ߟߊ߫ ߕߍߛߘߌ ߡߊ߬ ߒߞߏ ߟߊߥߙߎߞߌ ߓߊ߯ߙߊ ߘߐ߫߸ ߊ߬ߟߎ߫ ߞߊ߬ ߞߓߊ߫ ߝߟߐ߫ ߛߌ߮ ߟߋ߬ ߞߍ߫ ߛߌ߬ߣߌ߲߬ߟߏ߲߫ ߕߊ߬ߡߌ߲߬ߣߍ߲߸ ߂߀߂߅ ߣߍߣߍߓߊ ߕߋ߬ߟߋ߫ ߂߈߸ ߞߊ߬ ߓߊߖߎ߫ ߞߊߙߊ߲ߕߊ ߘߏ߫ ߟߐ߬ ߞߏ ߛߌ߰ ߛߋ߲߬ߠߊ߫ ߡߌ߬ߛߊ߬ߡߊ߲߰ߠߊ߬ ߛߏ ߞߣߐ߫.

ߞߏߓߊ߫ ߟߋ߬ ߕߎ߲߬ ߦߋ߫ ߛߋ߲߬ߠߊ߫ ߡߌ߬ߛߊ߬ߡߊ߲߰ߠߊ߫ ߡߙߊ߬ߘߊ߬ߙߋ߲ ߞߣߐ߫ ߣߍߣߍߓߊ ߕߋ߬ߟߋ߫ ߂߈ ߡߊ߬߸ ߣߊߟߌ߬ߡߎ߲߬ ߒߞߏ ߞߊߙߊ߲ߕߊ ߘߏ߫ ߞߓߊ߫ ߝߟߐ߫ ߛߌ߮ ߘߌ߫߸ ߥߊߟߌߘߊ߫ ߖߌ߰ߡߝߊ߬ ߓߟߏ߫، ߊ߬ߟߎ ߓߟߏߡߊߞߊ߬ߣߍ߲߫ ߒߞߏ ߛߘߊߟߊߟߌ ߟߋ߬ ߞߊ߲ߡߊ߬ ߘߊߞߎ߲ ߓߍ߯ ߘߏ߫ ߘߐ߫߸ ߖߌ߰ߡߝߊ߬ ߟߊ߫ ߓߊ߯ߙߊ ߝߊ߲߬ߞߊ ߓߏ߲߬ߓߊ߫ ߘߎ߰ߣߍ߲ ߠߎ߬ ߞߣߐ߫ ߥߙߎߞߌ ߛߌߟߊ ߝߍ߬ ߞߏߛߓߍ߫߸ ߦߏ߫ ߡߎ߬ߛߊ߬ߘߎ߯߸ ߓߙߊߣߡߊ߬߸ ߊ߬ ߣߌ߫ ߡߌ߬ߛߊ߬ߡߊ߲߰ߠߊ߫߸ ߊ߬ߟߎ߫ ߕߍ߬ߘߍ߫ ߏ߬ ߡߍ߲ ߞߣߐ߫ ߛߌ߬ߣߌ߲߬ߟߏ߲.

ߞߊ߲ߕߌ߯ ߛߙߍߞߍ߸ ߝߊ߲ߕߊ߬ ߛߎ߯ߟߊ߲ߘߌ߫ ߞߊ߬ߞߙߐ ߞߊ߬ ߛߙߊ߬ߣߎ߲ ߕߊ߬ ߛߍߥߊ ߟߋ߬ ߘߐ߫߸ ߞߵߊ߬ ߡߙߌߦߊ ߦߌ߬ߘߊ߫ ߣߌ߲߬ ߞߏ ߞߊ߲߬: <<ߞߟߊߓߎ ߦߋ߫ ߛߏ ߡߍ߲ ߠߎ߬ ߟߊ߫ ߓߊߞߍ߭߸ ߢߍߓߊ߯ߦߊ ߦߋ߫ ߘߌ߫ ߟߴߏ߬ ߟߎ߫ ߟߋ߬ ߡߊ߬، ߡߌ߬ߛߊ߬ߡߊ߲߰ߠߊ߬ߞߊ ߟߎ߬ ߟߊ߫ ߘߐ߬ߖߊ ߣߴߊ߬ߟߎ߬ ߟߊ߫ ߞߟߊߓߎ ߞߏߛߐ߲߬߸ ߊ߲ ߓߘߊ߫ ߣߊ߬ ߦߊ߲߬ ߞߓߊ߫ ߝߟߐ߫ ߛߌ߮ ߟߊ߫ ߓߌ߬.>>

ߖߊ߬ߕߋ߬ߘߐ߬ߛߌ߮ ߣߌ߲߬ ߥߊߘߌ ߦߋ߫ ߓߐ߫ ߟߊ߫ ߖߌ߰ߡߊ߬ߝߊ߫ ߖߍ߬ߘߍ ߟߋ߬ ߟߊ߫ ߞߏ߲߬ߘߏ ߟߊ߫߸ ߊ߬ߟߎ߬ ߦߋ߫ ߡߊߘߍ߬ߡߍ߲߬ ߠߴߊ߬ߟߎ߬ ߓߊߘߋ߲ߡߊ߫ ߥߎ߬ߦߊ߲߬ߞߌ߬ߣߍ߲߫ ߞߓߊ߬ ߓߟߏ߫ ߕߎ߬ߡߊ ߘߏ߫ ߟߎ߫ ߟߊ߫ ߛߐ߲߬߸ ߞߵߊ߬ ߓߍ߲߬ ߞߝߊ߬ ߞߏ ߡߊ߬، ߓߊ߬ߙߌ߬߸ ߡߊ߬ߞߏ ߦߋ߫ ߓߍ߯ ߟߊ ߘߍ߬ߡߍ߲ ߠߊ߫ ߣߌ߲߬ ߞߏ ߘߐ߫، <<ߊ߲ ߧߴߊ߬ ߝߍ߬ ߟߋ߬ ߛߏ ߣߌ߲߬ ߘߋ߲ ߓߍ߯ ߦߋ߫ ߞߊ߬ߙߊ߲߬߸ ߓߍ߯ ߦߋ߫ ߟߐ߲ߠߌ߲߫ ߝߊ߬ߞߊ߲ ߘߐ߫߸ ߞߊ߬ ߛߋ߫ ߣߊ߬ ߟߊ߫ ߓߊ߯ߙߊ ߞߍ߫ ߟߊ߫ ߛߏ ߡߌ߬ߛߊ߬ߡߊ߲߰ߠߊ߬ ߞߣߐ߫ ߥߊ߯ߕߌ߫ ߣߊ߬ߕߐ߫߸ ߝߏ߫ ߦߊ߲߬ ߦߋ߫ ߞߍ߫ ߛߏ ߕߐ߭ ߟߎ߬ ߟߊ߫ ߟߊߒߡߊ ߘߌ߫.>> ߞߊ߲ߕߌ߯ ߛߙߍߞߍ ߟߊ߫ ߞߎߡߊ ߞߊ߲߬ߟߊ ߟߵߏ߬ ߘߌ߫.

ߘߎ߰ ߡߐ߮ ߟߎ߬ ߛߍߥߊ߫ ߘߊ߫ ߣߌ߲߬ ߞߏ ߟߊ߫ ߞߊߕߌ߫، ߡߌ߬ߛߊ߬ߡߊ߲߰ߠߊ߫ ߒߞߏ ߞߎ߲߬ߕߌ߮߸ ߛߣߊ߬ ߡߏߙߌ ߞߏ߬ߣߊ߬ߕߍ߫ ߞߊ߬ ߣߌ߲߬ ߞߏ ߕߊ߲߬ߘߏ߬: <<ߊ߲ ߘߋ߲ ߠߎ߬ ߘߴߊ߬ߟߎ߫ ߖߘߍ߬ ߟߐ߲߫߸ ߊ߲ ߘߏ߲߬ ߦߴߏ߬ ߟߋ ߝߍ߬.>> ߡߊ߬ߡߊ߬ߘߌ߫ ߞߓߊ߬ ߝߣߊ߫ ߞߵߊ߬ ߦߌ߬ߘߊ߬ ߞߏ߫ ߞߊ߬ߙߊ߲߬ߕߊ߬ ߞߏ ߣߌ߲߬ ߘߌ߫ ߞߍ߫ ߕߙߎ߬ ߘߌ߫ ߞߊ߬ <<ߞߎ߲߬ߝߌ߲߬ߧߊ ߞߟߍ߬.>> ߘߋ߲ߡߌߛߍ߲߫ ߞߎ߲ߕߌ߮ ߦߊ߬ߞߎߓߊ߬ ߞߏ߬ߣߊ߬ߕߍ߫ ߞߊ߬ ߘߎ߬ߥߊ߬ߥߎ ߟߋ߬ ߞߍ߫ ߞߏ ߣߌ߲߬ ߓߐ ߟߊ߫ ߢߟߊ߫߸ ߊ߬ ߣߌ߫ ߞߵߊ߬ߟߎ߬ ߟߊ߫ ߛߍߥߊ ߦߌ߬ߘߊ߬.

ߖߊ߲߬ߖߏ߲ ߘߟߊߞߊ߬ ߘߊ߫ ߘߍ߰ߡߊߡߌ߲߫ ߞߊ߬ߙߊ߲߬ߕߊ ߞߊ߬ߙߊ߲߬ߘߋ߲ ߠߎ߬ ߟߋ߬ ߓߟߏ߫߸ ߞߊ߬ߙߊ߲߬ߜߍ ߟߎ߬ ߣߌ߫ ߛߎ߬ߞߎ ߟߎ߬ ߟߊ߫، ߏ߬ ߟߎ߬ ߡߍ߲ ߠߎ߬ ߞߊ߬ߙߊ߲߬ߡߐ߰ ߦߋ߫ ߟߊ߱ߦߌ߬ ߡߎߛߊ߫ ߖߊߥߙߊ߫ ߘߌ߫߸ ߏ߬ ߟߎ߬ ߡߍ߲ ߠߎ߬ ߟߊ߫ ߛߊ߯ߘߊ ߦߋ߫ ߛߓߊߣߊ߲ ߘߐ߫ ߕߋ߲߬.

ߖߊ߲߬ߖߏ߲ ߣߌ߲߬ ߘߐ߫߸ ߞߓߊ߫ ߝߟߐ ߛߌ߰ ߘߊ߫ ߛߏߕߌ߮ ߞߐߦߌߘߊ ߟߋ߬ ߓߟߏ߫߸ ߝߊ߬ߞߏߦߌ߫ ߞߙߏ߬ߡߊ߬߸ ߏ߬ ߞߊ߬ ߘߎ߬ߥߎߊ߬ߥߎ ߟߋ߬ ߕߎ߲߰ ߏ߬ ߟߊ߫߸ ߊ߬ ߣߌ߫ ߛߏ ߢߍߓߊ߮߸ ߞߵߏ߬ ߟߊ߫ ߗߋߘߋ߲߫ ߣߊ߬ߣߍ߲ ߘߏ߫ ߟߎ߫ ߞߊ߲߬ ߞߊ߬ ߓߐ߫ ߦߋ߲߬ ߠߊߡߌߣߌ߲ ߠߎ߬ ߘߐ߫.

ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߕߐ߯ ߘߐ߫߸ ߗߋߘߋ߲߫ ߓߍ߯ߓߊߖߘߍ߬ߦߋ߫ ߞߡߊ߬ߙߊ߫ ߞߊ߬ ߣߌ߲߬ ߞߏ ߕߊ߲߬ߘߏ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ <<ߓߊߛߓߊ߬ߕߌ߫ ߛߘߌ߬ߓߋ߫ ߞߎ߲߬ߠߊ߬ߦߋߙߋ߲ ߠߋ߬ ߘߌ߫، ߓߊ߸ ߊ߬ ߞߍߣߍ߲߫ ߏ߬ ߕߋ߬ߟߋ ߟߋ߬ ߘߐ߫، ߓߍ߯ ߦߴߊ߬ ߞߍ߫ ߦߏ߫ ߞߊ߬ߙߊ߲߬ߕߊ߬ ߜߘߍ ߕߐ߭ ߟߎ߬ ߞߵߊ߬ ߞߍ߫ ߢߊ ߡߍ߲ ߡߊ߬߸ ߞߊ߬ߙߊ߲߬ߕߊ ߒߝߊ߲߬ߘߋ߲߬ߡߊߙߌ߫ ߞߡߊ߬ߙߊ߬ ߣߌ߫ ߞߊ߬ߙߊ߲߬ߕߊ߫ ߟߊ߲߱ߛߌ߬ߣߍ߬ ߓߙߋߕߋ߫ ߓߎ߬ߙߋ߬ ߓߎߞߊߙߌߦߊ߫.>>

ߖߊ߲߬ߖߏ߲ ߣߌ߲߬ ߞߍ߫ ߘߊ߫ ߘߐ߬ߝߐ ߟߊ߫ ߞߙߐ߬ߛߌ߬ߟߌ ߖߊ߲߬ߖߏ߲ ߠߋ߬ ߘߌ߫߸ ߡߍ߲ ߕߐ߬ߣߐ ߘߌߣߊ߬ ߛߋ߫ ߒߞߏ ߡߊ߬ ߟߏ߲߫ ߣߊ߬ߕߐ ߟߎ߬ ߘߐ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߟߎ߬ ߟߊ߫ ߘߊ߲߬ߕߍ߰ߟߌ ߟߋ߬.