ߞߵߊ߬ ߓߍ߲߬ ߞߎ߲߬ߠߊ߬ߛߌ߮ ߟߊ߫ ߡߊ߬ߞߎ߲ ߡߊ߬ ߊ߬ߟߎ߬ ߟߊ߫ ߡߞߊ߬ߛߟߌ߬ ߞߙߎ ߞߊ߲߬߸ ߟߞߊ߬ߙߊ߲߬ߠߌ߲߬ߠߊ ߟߎ߬ ߞߊ߬ ߝߎ߬ߙߎ߲߬ߞߎ߬ߟߌ߬ ߞߏ߬ ߛߓߍ ߘߏ߫ ߘߐߓߍ߲߬ ߣߍߣߍߓߊ ߕߟߋ߬ ߅ ߣߌ߲߬ ߡߊ߬، ߓߊ߯ߙߊ ߞߏߕߌ߯ ߝߣߊ߫ ߓߘߊ߫ ߟߊ߬ߘߍ߬ ߟߊߓߙߊ߬ߣߍ߲ ߘߏ߫ ߡߊߞߟߌ߫ ߣߍߣߍߓߊ ߕߟߋ߬ ߆ ߡߊ߬.

ߞߏ ߟߎ߬ ߓߘߊ߫ ߕߊ߲ߛߊ߲߫ ߖߌ߬ߣߍ߫ ߟߞߊ߬ߙߊ߲߬ߠߌ߲߬ ߞߏ ߘߊߞߎ߲ ߘߐ߫، ߓߊߏ߬߸ ߞߎߣߎ߲ߟߏ߲ ߣߌ߲߬ ߡߊ߬ ߂߀߂߅ ߣߍߣߍߓߊ ߕߟߋ߬ ߅߸ ߟߞߊ߬ߙߊ߲߬ߠߌ߲ ߕߐ߰ߕߐ߰ߟߌ߬ߘߊ ߟߎ߬߸ ߡߍ߲ ߠߎ߬ ߟߊߞߊ߬ߝߏ߬ߣߍ߲߫ ߍߝ.ߍߛ.ߔߋ.ߋ߸ ߛߑߟߍߜ߭߸ ߊ߬ ߣߌ߫ ߛߑߣߋ، ߏ߬ ߟߎ߫ ߞߊ߬ ߝߎ߬ߙߎ߲߬ߞߎ߬ߟߌ߬ ߞߏ ߖߊ߲߬ߘߐ߬ߓߌߟߊ ߟߋ߬ ߞߍ߫߸ ߡߍ߲ ߞߍߕߐ߫ ߊ߬ߟߎ߬ ߓߟߏ߫ ߖߡߊ߬ߣߊ ߘߎ߰ߞߣߍ ߡߎ߰ߡߍ ߞߊ߲߬، ߏ߬ ߝߐ߫ ߘߴߊ߬ߟߎ߬ ߓߟߏ߫ ߟߊ߬ߛߋ߬ߟߌ߬ ߛߓߍ ߘߏ߫ ߟߋ߬ ߞߣߐ߫߸ ߡߍ߲ ߞߟߊ߬ߣߐ߬ߦߊ߬ ߘߴߊ߬ߟߎ߬ ߓߍ߯ ߓߟߏ߫، ߊ߬ߟߎ߫ ߞߊ߬ <<ߞߎ߲߬ߠߊ߬ߛߌ߮ ߟߊ߫ ߓߊ߲߭ ߞߐߘߊ߲ ߠߋ߬ ߝߐ߫ ߊ߬ߟߎ߬ ߟߊ߫ ߘߊߘߐߖߊߥߏ ߞߙߎ߫߫ ߟߊߘߊ߲ߣߍ߲ ߞߊ߲߬.>> ߊ߬ߟߎ߫ ߞߊ߬ ߡߞߊ߬ߛߟߌ߬ ߞߊ߲ ߡߍ߲ ߠߎ߬ ߝߐ߫ ߦߋ߲߬߸ ߞߎ߲߬ߠߊ߬ߛߌ߮ ߟߊ߫ ߕߌ߬ߦߊ߬ ߝߏߦߌ߬ ߡߊ߫ ߞߍ߫ ߏ߬ ߟߎ߬ ߟߊ߫߸ ߞߵߊ߬ ߕߊ߬ ߕߎߟߊߝߌ߲ ߕߟߋ߬ ߁߭ ߡߊ߬ ߤߊ߲߯ ߕߋ߲߬.

ߏ߬ ߘߐ߫߸ ߊ߬ߟߎ߫ ߞߊ߬ ߞߏߓߊ߫ ߛߊ߬ߓߊ߫ ߟߋ߬ ߝߐ߫ ߝߎ߬ߙߎ߲߬ߞߎ߬ߟߌ߬ ߞߏ ߣߌ߲߬ ߘߐ߫:

  • ߘߊߘߐߖߊߥߏ ߞߍߓߊߟߌߦߊ߸ ߊ߬ߟߎ߬ ߟߊ߫ ߞߟߌߟߌ߫ ߛߌߦߊߡߊ߲ ߣߴߊ߬ ߕߊ߫ ߝߘߏ߬ߓߊ߬ ߞߟߊ߬ߕߌ߰ߘߊ ߟߎ߬ ߟߊ߫.
  • ߟߊ߬ߤߘߌ ߡߍ߲ ߕߊ߬ ߘߊ߫ ߞߊ߬ߝߏ߬ߙߋ߲ ߟߞߊ߬ߙߊ߲߬ߠߌ߲߬ߠߊ߫ ߛߊߛߋ߫ ߕߌ߮ ߟߎ߬ ߦߋ߫߸ ߏ߬ ߟߎ߬ ߡߝߊߓߊߟߌߦߊ.
  • ߊ߬ ߣߌ߫ ߞߐߣߊߞߙߌ߫ ߞߣߐߟߊ ߖߍ߬ߘߍ ߟߞߊ߬ߙߊ߲߬ߠߌ߲߬ߠߊ ߟߎ߬ ߝߣߊ߫ ߟߌ߬ߤߟߊ.

ߊ߬ߟߎ߬ ߟߊ߫ ߛߓߍ ߣߌ߲߬ ߞߣߐ߫߸ ߕߐ߰ߕߐ߰ߟߌ߬ߟߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߓߊ߯ߙߊ ߛߌ߲߬ߝߏ߲߬ߘߊ߫ ߡߊ߲߬ߕߏ߲߬ߕߍ߬ߟߊ߬ߞߊ ߓߍ߲߬ߡߊ߬ߞߊ߲ ߈߇ ߣߌ߫ ߉߈ ߞߊ߬ ߡߍ߲ ߝߐ߫߸ ߊ߬ߟߎ ߦߴߏ߬ ߟߋ ߞߊ߲߬߸ ߖߌ߬ߣߍ߫ ߖߡߊ߬ߣߊ ߛߐ߲߬ߣߍ߲߫ ߓߍ߲߬ߡߊ߬ߞߊ߲ ߏ߬ ߡߍ߲ ߡߊ߬ ߞߊ߬ߣߌ߲߬، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߕߍ߫ ߥߙߐ߬ ߣߌ߫ ߡߊ߲߬ߞߊ߲߫ ߝߍ߬ ߖߡߊ߬ߣߊ ߞߣߐ߫، ߏ߬ ߟߋ ߘߐ߫߸ ߌߞߏߡߌ߲߬ ߞߊ߬ߦߌ߯ ߕߎߟߊߝߌ߲ ߕߟߋ߬ ߁߭ ߡߊ߬߸ ߊ߬ߟߎ߬ ߡߊ߫ ߖߋ߬ߓߌ߬ ߞߊ߲߫ ߖߐ߲ߖߐ߲߫ ߠߊ߫، ߒ߬ߓߊ߬߸ ߛߓߍ ߣߌ߲߬ ߗߋߣߍ߲ ߞߐߝߍ߬߸ ߣߌ߫ ߞߊ߲߫ ߞߋߟߋ߲߫ ߡߊ߫ ߝߐ߫ ߊ߬ߟߎ߬ ߦߋ߫ ߕߟߋ߬ ߁߀ ߞߣߐ߫߸ ߡߍ߲ ߘߴߊ߬ߟߎ߬ ߟߊߛߍߥߊ߫߸ ߊ߬ߟߎ߬ ߘߌ߫ ߝߎ߬ߙߎ߲߬ߞߎ߬ߟߌ߬ ߓߟߏߕߍ߰ߓߊߟߌ ߛߌ߰ ߛߋ߲߬ߠߊ߫.

ߞߵߊ߬ ߓߍ߲߬ ߡߊ߲߬ߞߊ߲ ߡߊߕߊ߲߬ߞߊ ߡߊ߬߸ ߞߎ߲߬ߠߊ߬ߛߌ߮ ߞߵߊ߬ ߓߟߏߟߞߊߟߌߦߊ߫ ߞߊ߬ ߞߎߡߊ߫ ߖߏߣߊ߫، ߘߐ߬ߛߙߋ ߛߎ߲ ߘߏ߫ ߦߴߊ߬ ߦߌ߬ߘߊ߬ ߟߊ߫ ߞߏ߫ ߝߘߏ߬ߓߊ߬ ߗߋߘߊ ߣߌ߫ ߓߊ߯ߙߊ ߞߏߕߌ߮߸ ߝߊ߬ߙߊ߲߬ߛߎߥߊ ߓߙߎߣߏ߫ ߞߊ߬ ߛߓߍ ߣߌ߲߬ ߠߊߛߐ߬ߘߐ߲߬ ߡߍ߲ߞߍ߬߸ ߊ߬ ߞߊ߬ ߢߐ߲߯ߦߋ߫ ߞߏ ߘߏ߫ ߟߐ߯ߟߊ߫ ߛߌߣߌ߲߫ ߣߍߣߍߓߊ ߕߟߋ߬ ߆ ߡߊ߬߸ ߞߏߕߌ߮ ߣߌ߫ ߕߐ߰ߕߐ߰ߟߌ߬ߟߊ ߟߎ߬ ߟߊ߫ ߞߐߦߌߘߊ ߕߍ߫. ߞߵߊ߬ ߦߌ߬ߘߊ߬ ߞߏ߫ <<ߢߊ ߘߌ߫ ߡߊߖߌ߰ ߡߞߊ߬ߛߟߌ߬ ߞߊ߲ ߠߎ߬ ߞߘߐ߫ ߢߐ߲߯ߦߋ ߏ߬ ߘߐ߫.>>

ߊ߬ߟߎ߬ ߟߊ߫ ߟߊ߬ߢߌߣߌ߲ ߠߎ߬ ߘߐ߫߸ ߟߞߊ߬ߙߊ߲߬ߠߌ߲߬ߠߊ ߟߎ߬ ߟߊ߫ ߛߌ߰ߞߊ߲ ߞߟߊ߬ߣߐ߬ߦߊ߬ ߞߏ ߦߴߊ߬ ߘߐ߫߸ ߏ߬ ߡߍ߲ ߝߐ ߞߊߙߏ߫ ߦߙߌߞߊ ߦߋ߫ ߕߋ߲߬، ߘߊߘߐߖߊߥߏ ߟߋ߬ ߞߏ߬ߣߌ߲ ߘߌ߫ ߛߋ߫ ߣߌ߲߬ ߞߏ ߘߐߛߎߡߊ߫ ߟߊ߫ ߕߋ߲߬، ߓߊߏ߬߸ ߣߌ߫ ߝߎ߬ߙߎ߲߬ߞߎ߬ߟߌ ߞߏ ߣߌ߲߬ ߕߏ߫ ߘߴߊ߬ ߡߊ߬߸ ߊ߬ ߟߊߓߊ߲ ߓߍߣߊ߬ ߝߛߏ߬ߝߛߊ ߟߊߘߏ߲߬ ߖߡߊ߬ߣߊ ߞߊ߬ߙߊ߲߬ ߞߏ ߘߐ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.