ߕߙߊߓߊ ߕߟߋ߬ ߈ ߦߋ߫ ߡߏ߬ߛߏ ߟߎ߬ ߕߐ߯ߟߊ߫ ߟߏ߲ߓߊ ߟߋ߬ ߘߌ߫ ߘߎߢߊ߫ ߞߣߐ߫، ߏ߬ ߢߊ߰ߢߊ߮ ߣߌ߫ ߛߎ߲ߞߊߙߏ ߟߊ߫ ߓߍ߲߭ ߞߏߛߐ߲߬߸ ߊ߬ߟߎ߬ ߓߘߴߊ߬ ߞߕߐߙߐ߲ߘߓߐ߫ ߞߵߊ߬ ߟߊߕߊ߯ ߞߏ߲ߞߏߘߓߌ ߕߟߋ߬ ߁߅ ߘߐ߫، ߓߊ߬ߙߌ߬߸ ߊ߬ߟߎ߬ ߡߊ߫ ߕߙߊߓߊ ߕߟߋ߬ ߈ ߘߐߞߏߟߏ߲߫ ߕߏ߫ ߘߋ߬߸ ߞߊ߲ߞߊ߲߫ ߡߏ߬ߛߏ ߟߎ߬ ߓߐ߫ ߘߊ߫ ߟߋ߬ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲߬ ߞߊ߲ߡߊ߬، ߖߐ߲߰ߛߊ߫ ߡߏ߬ߛߏ ߟߎ߬ ߘߌ߫ ߛߋ߫ ߛߐ߬ߘߐ߲߬ ߠߊ߫ ߝߘߏ߬ߓߊ߬ ߞߏ ߟߎ߬ ߘߐ߫ ߢߊ ߡߍ߲ ߡߊ߬߸ ߓߘߍ߬ߓߘߍ߬ߟߌ߬ ߞߏ ߟߎ߬ ߘߐ߫ ߢߊ ߡߍ߲ ߡߊ߬߸ ߊ߬ ߣߌ߫ ߞߊ߬ ߕߋߟߋ߲߫ ߞߍ߫ ߊ߬ߟߎ߬ ߣߌ߫ ߢߐ߲߯ ߕߍ߫.
ߢߐ߲߯ߓߍ߲ ߣߌ߲߬ ߞߍ߫ ߘߊ߫ ߞߊ߲ߞߊ߲߫ ߘߋ߲ߡߌߛߍ߲ ߠߎ߬ ߟߊ߫ ߓߏ߲ߓߊ ߟߋ߬ ߟߊ߫، ߡߙߌߘߐ ߝߘߊ߫ ߘߊ߫ ߖߐ߲߫ ߠߎ߫ ߟߊ߫߸ ߏ߬ ߟߋ ߞߊ߲ߞߊ߲߫ ߡߙߊ߬ߓߊ߰ߘߊ ߘߋ߲ߡߛߏߣߍ߲ ߠߎ߬ ߣߴߊ߬ ߡߏ߬ߛߏ ߟߎ߬ ߟߊ߫ ߞߏߟߊߕߍ߯ߘߊ߫ ߝߊ߬ߛߏ߬ߟߊ߬ߞߊ ߘߌ߫߸ ߊ߬ߟߎ߬ ߣߌ߫ ߘߌ߲߬ߞߌߙߊ ߝߊ߰ߡߊ ߟߎ߬ ߟߊ߫ ߓߟߏߘߏ߲ߢߐ߲߯ߓߟߏ ߞߣߐߡߊ߬، ߟߊ߬ߢߌߣߌ߲ ߡߍ߲ ߕߍ߬ߘߍ߫ ߊ߬ߟߎ߬ ߟߊ߫ ߢߐ߲߯ ߠߊߘߍ ߢߌ߲߬ ߠߊ߫߸ ߏ߬ ߟߋ ߡߏ߬ߛߏ ߟߎ߬ ߤߊ߲ߞߟߌ ߟߊߞߊ߭ ߘߌ߫߸ ߖߐ߲߰ߛߴߊ߬ߟߎ߬ ߘߌ߫ ߛߋ߫ ߛߐ߬ߘߐ߲߬ ߠߊ߫ ߝߘߏ߬ߓߊ߬ ߞߏ ߟߎ߬ ߘߐ߫ ߢߊ ߡߍ߲ ߡߊ߬߸ ߞߵߏ߬ ߕߐ߬ߣߐ ߢߊߝߐ߫ ߊ߬ߟߎ߬ ߦߋ߫، ߊ߬ ߕߌ߯ߕߌ߯߸ ߛߴߊ߬ߟߎ߬ ߘߌ߫ ߛߋ߫ ߞߍ߫ ߟߊ߫ ߡߊ߬ߡߌ߬ߣߊ߬ߟߌ߬ߟߊ߫ ߘߌ߫ ߢߣߊߕߊߟߌ߫ ߣߊ߬ߕߐ ߟߎ߬ ߘߐ߫ ߢߊ ߡߍ߲ ߡߊ߬.
ߞߣߍ ߞߊ߲߬ ߦߋ߲߬߸ ߓߐ߬ߟߐ߲߬ߞߊ߫ ߛߎ߬ߥߊ߬ߙߋ߫߸ ߊߡߌߣߊߕߊ߬ ߞߊ߬ߓߊ ߕߘߍ߬ ߞߣߍ ߞߊ߲߬߸ ߊ߬ߟߋ ߡߍ߲ ߦߋ߫ ߡߙߊ߬ߓߊ߰ߘߊ ߗߋߕߌ߯ ߘߌ߫߸ ߣߴߊ߬ ߖߊ߲߬ߕߏ߬ߣߍ߲߫ ߡߏ߬ߛߏ ߟߎ߬߸ ߞߐߙߍ ߟߎ߬߸ ߊ߬ ߣߌ߫ ߢߐ߲߯ߘߍߡߍ߲ ߞߏߢߊ ߟߎ߬ ߟߊ߫، ߏ߬ ߞߊ߬ ߡߏ߬ߛߏ ߟߎ߬ ߟߊ߫ ߓߐߟߌ߫ ߞߐߟߌߞߐߟߌ ߝߏ߬߸ ߞߵߊ߬ߟߎ߫ ߝߏ߬ ߊ߬ߟߎ߬ ߟߊ߫ ߕߘߍ߬ߒ߬ߘߐ߬ߟߌ ߟߊ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߘߌ߫ ߡߍ߲ ߦߌ߬ߘߊ߫ ߡߏ߬ߛߏ ߟߎ߬ ߟߊ߫߸ ߊ߬ߟߎ߬ ߦߴߊ߬ ߟߐ߲߫ ߞߏ߫ ߟߐ߬ߘߎ߰ߓߊ߫ ߦߴߊ߬ߟߎ߬ ߟߊ߫ ߥߙߎߞߌ ߛߌߟߊ ߕߊ߯ߡߊ ߘߐ߫ ߘߍ߭ ߞߣߐ߫߸ ߊ߬ ߣߌ߫ ߊ߬ߟߎ߬ ߞߊ߫ ߞߊ߲߫ ߞߊ߬ ߛߐ߬ߘߐ߲߬ ߡߙߌߘߐ ߟߎ߫ ߕߊ߬ߟߌ ߘߐ߫ ߡߎ߬ߕߎ߲߬.
<<ߊ߲ ߛߍߥߊߣߍ߲ߓߊ ߟߋ߬ ߓߌ߬، ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߊ߲ ߓߘߊ߫ ߢߊ߰ߢߊ߮ ߟߊߕߊ߯ ߞߏ߲ߞߏߘߓߌ߫ ߞߊߙߏ ߘߐ߫߸ ߊ߲ ߕߴߛߋ߫ ߕߏ߫ ߟߊ߫ ߛߌ߰ ߘߐ߫ ߓߌ߬ ߢߐ߲߰ ߟߏ߲߫߸ ߣߴߊ߲ ߡߊ߫ ߞߏߣߍ߲߫ ߞߍ߫، ߏ߬ ߟߋ ߞߏߛߐ߲߬߸ ߘߋ߲ߡߛߏߣߍ߲ ߠߎ߬ ߣߌ߫ ߡߏ߬ߛߏ ߟߎ߬ ߟߊ߫ ߞߏߟߊߕߍ߯ߘߊ߫ ߝߊ߬ߛߏ߬ߟߊ߬ߞߊ ߞߵߊ߬ ߦߋ߫ ߞߍߕߊ߫ ߘߌ߫߸ ߞߊ߬ ߛߋ߫ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲߬ ߢߐ߲߯ߓߍ߲ ߘߏ߫ ߛߌ߰ ߟߊ߫ ߛߋ߲߬ߠߊ߫߸ ߞߵߊ߬ ߓߍ߲߬ ߡߏ߬ߛߏ ߟߎ߬ ߟߊ߫ ߞߏ ߡߊ߬.>> ߊ߬ ߞߵߏ߬ ߟߋ ߦߌ߬ߘߊ߬.
ߘߊߘߐߖߊߥߏ ߞߊ߬ߘߊ߲ ߞߣߐ߫߸ ߞߎߡߟߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߥߊ߯ߕߌ ߓߘߊ߫ ߛߋ߫ ߡߎ߬ߕߎ߲߬߸ ߡߏ߬ߛߏ ߟߎ߬ ߦߋ߫ ߛߐ߬ߘߐ߲߬ ߡߙߌߦߊ ߟߎ߫ ߕߊ߬ߟߌ ߘߐ߫߸ ߞߊ߬ ߛߐ߬ߘߐ߲߬ ߢߣߊߕߊߟߌ ߘߐ߫߸ ߊ߬ߟߎ߬ ߞߊߣߊ߬ ߕߏ߫ ߡߐ߱ ߟߎ߬ ߢߣߊߕߊ߭ ߞߊ߲߬ ߦߋ߲߬ ߕߋ߲߬߸ ߡߐ߰ ߜߘߍ߫ ߟߎ߫ ߝߣߊ߫ ߦߋ߫ ߊ߬ߟߎ ߛߎߥߊ߲ߘߌ߫، ߞߵߊ߬ ߕߊ߬ ߞߌ߲߬ߘߊ ߟߎ߬ ߞߣߐ߫߸ ߞߊ߬ ߘߏ߲߬ ߞߊ߬ߝߏ߬ߙߋ߲ ߞߣߐ߫߸ ߞߵߊ߬ ߛߌ߰ ߥߛߊ߬ߘߋ߲߬ߧߊ ߟߊ߫.
<<ߊ߬ ߕߍ߫ ߡߍ߲߫ ߡߎ߬ߕߎ߲߬߸ ߢߣߊߕߊߟߌ ߘߌ߫ ߛߋ߫، ߊ߲ ߧߋ߫ ߡߍ߲ ߝߍ߬ ߏ߬ ߘߐ߫߸ ߡߏ߬ߛߏ ߟߎ߬ ߦߴߊ߬ ߟߐ߲߫ ߞߏ߫ ߊ߬ߟߎ߬ ߝߣߊ߫ ߘߌ߫ ߛߴߊ߬ߟߎ߬ ߛߊ߯ߛߊ߯ ߟߊ߫ ߢߍߡߐ߯ߦߊ ߞߐ߫ ߘߋ߬، ߞߊ߲ߞߊ߲߫ ߦߋ߫ ߞߌ߲߬ߘߊ߬ ߅߇ ߡߍ߲ ߘߌ߫߸ ߊ߲ ߧߴߊ߬ ߝߍ߬ ߡߏ߬ߛߏ ߟߎ߬ ߝߣߊ߫ ߦߋ߫ ߛߋ߫ ߞߐߦߌ߬ߘߊ߬ ߟߊ߫ ߞߌ߲߬ߘߊ ߏ߬ ߟߎ߬ ߓߍ߯ ߞߣߐ߫.>> ߏ߬ ߟߋ ߝߐ߫ ߘߊ߫ ߡߙߊ߬ߓߊ߰ߘߊ ߗߋߕߌ߮ ߣߌ߲߬ ߓߟߏ߫.
ߢߐ߲߯ߓߍ߲ ߣߌ߲߬ ߘߐ߫߸ ߞߎߡߊ ߓߏ߬ߙߌ߬ ߘߊ߫ ߛߊ߬ߙߌ߬ߦߊ߬ ߞߏ ߡߊ߬ߘߎ߮ ߘߐ߫߸ ߞߊ߬ ߛߋ߫ ߕߋߟߋ߲߫ ߞߍ߫ ߟߊ߫ ߡߏ߬ߛߏ ߟߎ߬ ߕߍ߫߸ ߜߊ߰ߢߊ߬ߜߊ߯ߢߊ ߣߌ߫ ߖߊ߲߰ߞߕߊ ߡߍ߲ ߦߋ߫ ߟߊ߫ ߟߴߊ߬ߟߎ߫ ߞߊ߲߬߸ ߞߊ߬ ߛߴߏ߬ ߟߊߕߐ߲߫ ߠߴߊ߬ ߢߌ߬ߡߊ ߟߊ߫.
ߏ߬ ߟߋ ߘߐ߫߸ ߓߐ߬ߟߐ߲߬ߞߊ߫ ߛߎ߬ߥߊ߬ߙߋ߸ ߊߡߌߣߊߕߊ߬ ߞߊ߬ߓߊ ߞߵߊ߬ ߦߌ߬ߘߊ߬ ߞߏ߫ <<ߕߋߟߋ߲߫ ߞߊ߫ ߞߊ߲߫ ߞߊ߬ ߞߍ߫ ߡߏ߬ߛߏ ߟߎ߬ ߟߊ߫ ߞߏ ߘߐ߫، ߢߌ߬ߣߊ߲߫ ߛߊ߲߭ ߢߌ߲߬ ߠߊ߫ ߖߍ߬ߘߍ߸ ߊ߬ ߞߎ߲߬ߕߐ߮ ߟߋ߬ ߛߊ߬ߙߌ߬ߦߊ߬ ߟߊߕߊ߯ߡߊ ߘߌ߫ ߡߏ߬ߛߏ ߟߊ߫ ߞߏ ߘߐ߫، ߏ߬ ߟߋ ߞߏߛߐ߲߬߸ ߊ߲ ߘߌ߫ ߡߏ߬ߛߏ ߟߎ߬ ߟߊߛߏ߬ߓߌ߬߸ ߞߊ߬ ߢߊߝߐߟߌ߫ ߞߍ߫ ߊ߬ߟߎ߬ ߦߋ߫߸ ߞߏ߫ ߓߊ߯ ߞߴߌ ߟߊ߫߸ ߊ߬ ߞߍ߫ ߘߊ߫ ߞߏ߫ ߢߣߊߕߐߡߐ߲߫ ߘߌ߫ ߓߊ߬߸ ߥߟߊ߫ ߖߊ߲߰ߞߕߊ߬ ߜߘߍ߫߸ ߌ ߞߊ߫ ߞߊ߲߫ ߞߊ߬ ߓߐ߫ ߛߌߟߊ ߡߍ߲ ߠߎ߬ ߘߌ߫߸ ߖߐ߲߰ߛߊ߫ ߏ߬ ߞߏ ߘߌ߫ ߛߋ߫ ߘߊ߲ߘߊ߫ ߟߊ߫ ߢߊ ߡߍ߲ ߡߊ߬.>> ߊ߬ ߞߵߏ߬ ߔߘߋߔߘߋߟߊߕߍ߰.
ߓߐ߬ߟߐ߲߬ߞߊ߬ ߝߊߕߎߡߊߕߊ߬ ߖߊ߰ߓߌ߸ ߊ߬ߟߋ ߡߍ߲ ߘߐ߱ߘߏ߲߬ߣߍ߲߫ ߖߊ߬ߕߋ߬ߘߐ߬ߛߌ߮ ߟߎ߬ ߟߊ߫ ߞߊ߲ߞߊ߲߫ ߞߊ߬ߝߏ߬ߙߋ߲ ߞߏߟߊߕߍ߯ߘߊ ߞߣߐ߫߸ ߏ߬ ߞߊ߬ ߡߏ߬ߛߏ ߟߎ߬ ߝߏ߬ ߊ߬ߟߎ߬ ߟߊ߫ ߓߐߟߌ߫ ߞߐߟߌߞߐߟߌ ߟߊ߫، ߊ߬ߟߋ ߢߣߊ߫߸ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲߬ ߛߎ߮ ߢߌ߲߬ ߠߎ߫ ߕߐ߬ߣߐ ߞߊ߫ ߓߏ߲߬ ߓߊߟߋ߬߸ ߊ߬ ߦߋ߫ ߕߊ߬ߡߌ߲߬ ߠߊ߫ ߡߏ߬ߛߏ ߟߎ߬ ߤߊ߲ߞߟߌ ߟߊߞߊ߬ ߟߊ߫ ߟߋ߬߸ ߞߵߊ߬ߟߎ߬ ߟߊ߫ ߟߊߒߠߦߊ ߟߴߊ߬ߟߎ߫ ߖߘߍ߬ ߘߐ߫߸ ߞߊ߬ ߛߋ߫ ߛߌߟߊ߫ ߓߌ߬ߟߊ߬ ߟߴߊ߬ߟߎ߬ ߞߘߐ߫߸ ߡߍ߲ ߘߴߊ߬ ߞߍ߫ ߊ߬ߟߎ߬ ߘߌ߫ ߟߊ߫ ߛߊ߬ߙߌ߬ߦߊ߬ ߓߏ߲߬ߘߊ ߟߎ߬ ߟߊ߫.
<<ߓߌ߬ ߢߐ߲߰ ߟߏ߲߫߸ ߒߠߋ ߛߍߥߊߣߍ߲߫ ߠߋ߬، ߊ߲ ߣߊ߬ߣߍ߲߫ ߠߋ߬ ߞߊ߬ ߣߊ߬ ߡߏ߬ߛߏ ߟߎ߬ ߤߊ߲ߞߟߌ ߥߊ߯߸ ߊ߬ߟߎ߬ ߘߌ߫ ߛߋ߫ ߞߍ߫ ߟߊ߫ ߡߊ߬ߡߌ߬ߣߊ߬ߟߌ߬ߟߊ ߘߌ߫ ߢߣߊߕߊߟߌ߫ ߝߌ߬ߟߊ߫ ߣߊ߬ߕߐ ߢߌ߲߬ ߠߎ߬ ߘߐ߫ ߢߊ ߡߍ߲ ߡߊ߬، ߓߊߏ߬ ߕߎ߬ߢߊ ߦߋ߫ ߡߍ߲ ߘߌ߫߸ ߊ߲ ߕߴߊ߲ ߕߍ߮ ߝߐ߫ ߟߊ߫ ߡߐ߰ ߦߋ߫ ߡߎ߬ߕߎ߲߬߸ ߊ߲ ߓߘߴߏ߬ ߘߊߓߌ߬ߟߊ߬، ߊ߲ ߧߴߊ߲ ߖߛߎ߬ߟߊߕߍ߰ ߡߎ߬ߕߎ߲߬߸ ߞߊ߬ ߛߓߍ ߟߎ߬ ߢߌߣߌ߲߫߸ ߞߊ߬ ߛߋ߫ ߞߍ߫ ߟߊ߫ ߞߊ߬ߝߏ߬ߙߋ߲߬ߕߌ߮ ߘߌ߫߸ ߞߌ߲߬ߕߌ߮ ߘߌ߫. ߊ߬ ߘߏ߲߬߸ ߊ߲ ߕߊ ߟߋ߬ ߢߣߊߕߊߟߌ ߢߌ߲߬ ߘߌ߫ ߢߌ߬ߣߊ߲߬ ߝߋߎ߫.>>
ߊ߬ ߞߎߡߊ߫ ߘߊ߫ ߡߏ߬ߛߏ ߟߎ߬ ߟߊ߫ ߞߏ߫ ߜߘߍ߫ ߝߣߊ߫ ߞߊ߲߬߸ ߞߊ߬ ߓߍ߲߬ ߥߛߎ߫ ߞߣߐ߫ ߡߛߏ ߟߎ߬ ߟߊߞߐ߯ ߞߏ ߡߊ߬.
<<ߢߌ߬ߣߊ߲߫ ߛߊ߲߭ ߣߌ߲߬ ߞߎ߲߬ߕߐ߮ ߦߋ߫ ߡߏ߬ߛߏ ߣߌ߫ ߘߋ߲ߡߛߏߣߍ߲ ߠߎ߬ ߡߊߞߟߌ߫ ߟߊ߫ ߟߋ߬߸ ߡߍ߲ ߠߎ߬ ߦߋ߫ ߥߛߎ ߟߊ߫߸ ߊ߬ߟߎ߬ ߦߋ߫ ߛߴߊ߬ߟߎ߬ ߟߊ߫ ߞߏ ߟߎ߬ ߟߊߕߊ߯ߡߊ߫ ߢߊ ߟߐ߲߫ ߠߊ߫ ߥߛߎ ߞߣߐ߫ ߦߋ߲߬߸ ߞߊ߬ ߛߴߊ߬ߟߎ߬ ߤߊߞߍ ߡߊߞߊ߲ߞߊ߲߫ ߠߊ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.
ߣߴߌ ߘߏ߲߬ ߞߊ߬ ߓߐ߬ߟߐ߲߬ߞߊ߫ ߖߎ߬ߓߊ߬ߕߍ߫ ߡߊߙߌߦߊߡ ߞߊ߬ߓߊ ߕߊ߬߸ ߊ߬ߟߋ ߡߍ߲ ߦߋ߫ ߞߊ߲ߞߊ߲߫ ߡߙߊ߬ߓߊ߰ߘߊ ߘߋ߲ߡߛߏߣߍ߲ ߠߎ߬ ߣߌ߫ ߡߏ߬ߛߏ ߟߎ߬ ߟߊ߫ ߞߏߟߊߕߍ߯ߘߊ߫ ߝߊ߬ߛߏ߬ߟߊ߬ߞߊ ߞߊ߲ߕߌ߮ ߘߌ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߢߐ߲߯ߓߍ߲ ߣߌ߲߬ ߞߍ߫ ߘߊ߫ ߛߊߓߎ߫ ߘߌ߫ ߝߣߊ߫߸ ߞߊ߬ ߛߋ߫ ߡߏ߬ߛߏ ߟߎ߬ ߟߊߟߐ߲ߠߌ߲߫ ߠߊ߫߸ ߞߏ߫ ߊ߬ߟߎ߬ ߝߣߊ߫ ߘߌ߫ ߛߋ߫ ߡߏ߬ߛߏ ߟߎ߬ ߞߐߦߌ߬ߘߊ߬ ߟߊ߫ ߢߣߊߕߊߟߌ߫ ߣߊ߬ߕߐ ߟߎ߬ ߘߐ߫.
<<ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߕߙߊߓߊ ߕߟߋ߬ ߈ ߢߊ߰ߢߊ߮ ߓߘߊ߫ ߟߊߕߊ߯ ߞߏ߲ߞߏߘߓߌ ߕߟߋ߬ ߁߅ ߘߐ߫߸ ߏ߬ ߕߍ߫ ߛߴߊ߲ ߞߢߊ߬ ߟߴߊ߲ ߠߊߘߍ߬ ߟߊ߫ ߓߌ߬ ߢߐ߲߰ ߟߏ߲߫ ߞߊ߬ ߡߏ߬ߛߏ ߟߎ߬ ߛߏ߬ߓߌ߬ߟߊ߬ߞߎߣߎ߲߫߸ ߊ߬ߟߎ߬ ߘߌ߫ ߛߋ߫ ߛߐ߬ߘߐ߲߬ ߠߊ߫ ߢߣߊߕߊߟߌ߫ ߣߊ߬ߕߐ ߘߐ߫ ߢߊ ߡߍ߲ ߡߊ߬߸ ߊ߬ ߣߌ߫ ߕߐ߬ߣߐ ߡߍ߲ ߦߋ߫ ߡߏ߬ߛߏ ߟߎ߬ ߟߊ߫ ߡߙߌߦߊ ߟߎ߫ ߕߊ߬ߟߌ ߘߐ߫.>> ߊ߬ ߞߵߏ߬ ߦߌ߬ߘߊ߬.
ߊ߬ ߞߵߊ߬ ߦߌ߬ߘߊ߬ ߞߏ߫ ߘߊ߲߬ߝߘߊ߬ߓߐ߬ ߕߍ߫ ߡߐ߰ ߣߌ߫ ߡߐ߰ ߕߍ߫ ߡߎ߬ߕߎ߲߬، ߞߵߊ߬ ߝߐ߫ ߞߏ߫ ߟߐ߬ߦߙߌ߬ߕߐ ߟߵߌ ߘߌ߫ ߥߟߊ߫ ߏ߬ ߕߴߌ ߘߌ߫߸ ߓߍ߯ ߞߊ߫ ߞߊ߲߫ ߡߎ߬ߕߎ߲߫ ߡߏ߬ߛߏ ߟߎ߬ ߟߊ߫ ߞߏ ߘߐ߫.
<<ߒߠߋ ߖߍ߬ߘߍ ߦߋ߫ ߟߐ߬ߦߙߌ߬ߕߐ ߟߋ߬ ߘߌ߫، ߏ߬ ߟߋ ߘߐ߫ ߓߌ߬ ߢߐ߲߰ ߟߏ߲߫߸ ߊ߬ ߞߊ߫ ߞߊ߲߫ ߞߊ߬ ߟߊ߫ ߓߍ߯ ߞߎ߲߭ ߘߐ߫ ߞߏ߫ ߘߍ߭ ߞߣߐ߫߸ ߊ߲ ߓߍ߯ ߞߊ߫ ߞߊ߲߫߸ ߖߐ߬ ߡߊ߲߫ ߞߊ߲߫ ߞߊ߬ ߞߍ߫ ߘߏ߫ ߡߊ߬ ߡߎ߬ߕߎ߲߬، ߏ߬ ߟߋ ߖߍ߬ߘߍ ߞߏߛߐ߲߬߸ ߊ߬ߟߎ߬ ߓߘߴߊ߲ ߠߊ߫ ߞߏߕߌ߯ߘߊ ߕߐ߮ ߡߊߝߊ߬ߟߋ߲߬߸ ߞߵߊ߬ ߞߍ߫ ߢߐ߲߯ߘߍߡߍ߲ ߞߏߕߌ߯ߘߊ ߘߌ߫.>>
ߊ߬ߟߎ߬ ߟߊ߫ ߢߐ߲߯ߓߍ߲ ߣߌ߲߬ ߘߐ߫ ߞߊ߲ߞߊ߲߫ ߘߋ߲ߡߌߛߍ߲߫ ߓߏ߲ߓߊ ߟߊ߫߸ ߛߌ߲߬ߝߏ߲߬ߧߊ߬ߟߌ߬ߟߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߴߊ߬ ߝߍ߬ ߟߋ߬ ߞߊ߬ ߡߏ߬ߛߏ ߟߎ߬ ߝߊ߲߬ߞߊ ߡߊߞߊ߬ߝߏ߫ ߞߵߊ߬ ߓߍ߲߬ ߊ߬ߟߎ߫ ߛߐ߬ߘߐ߲߬ ߞߏ ߡߊ߬ ߝߘߏ߬ߓߊ߬ ߞߏ ߟߎ߬ ߣߌ߫ ߓߘߍ߬ߓߘߍ߬ߟߌ ߘߐ߫، ߞߊ߬ ߓߊ߲߫߸ ߞߵߊ߬ߟߎ߬ ߤߊ߲ߞߟߌ ߟߊߞߊ߬߸ ߊ߬ߟߎ߬ ߟߊ߫ ߤߊߞߍ ߣߴߊ߬ߟߎ߬ ߟߊ߫ ߞߍߕߊ ߟߎ߬ ߘߐ߫، ߊ߬ ߣߌ߫ ߞߊ߬ ߛߌߟߊ ߟߊߞߊ߬ ߡߏ߬ߛߏ ߟߎ߬ ߣߌ߫ ߛߊ߬ߙߌ߬ߦߊ߬ ߕߍ߫߸ ߊ߬ߟߎ߬ ߘߌ߫ ߛߴߊ߬ߟߎ߫ ߖߘߍ߬ ߡߞߊߘߊ߲߫ ߠߊ߫ ߢߊ ߡߍ߲ ߡߊ߬߸ ߣߴߊ߬ ߓߍ߲߬ ߘߊ߫ ߖߐ߬ߡߊ߬ߦߊ߫ ߡߊ߬߸ ߥߟߊ߫ ߞߏ߫ ߘߕߐߡߐ߲߫ ߡߊ߬ ߞߵߊ߬ ߟߐ߬ ߡߛߏ߬ߦߊ߫ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.