ߟߊ߬ߛߋ߬ߟߌ߬ ߞߟߊߒߞߋ߫ ߟߋ߬ ߟߊߖߍ߲ߛߍ߲ߣߍ߲߫ ߞߊ߲ߓߍ߲ ߞߊ߲ߕߌ߯ߘߊ ߓߟߏ߫߸ ߞߊ߬ ߝߘߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫߸ ߞߏ߫ ߊ߬ ߓߘߊ߫ ߛߐ߲߬ ߞߎ߲߬ߠߊ߬ߛߌ߮ ߟߊ߫ ߓߙߐߕߐߟߌ ߡߊ߬߸ ߊ߬ ߣߴߊ߬ ߓߊ߲߫ ߘߊ߫ ߞߊ߬ ߢߣߊߕߊߟߌ߫ ߣߊ߬ߕߐ ߟߎ߬ ߓߐ߫ ߢߐ߲߯ ߞߘߐ ߝߐ߫ ߞߵߊ߬ ߓߍ߲߬ ߊ߬ߟߎ߬ ߞߍ߫ ߥߊ߯ߕߌ߫ ߞߏ ߡߊ߬، ߊ߬ ߓߊ߲߫ ߘߊ߫ ߞߊ߬ ߖߊ߬ߡߊߙߌ ߘߌ߫߸ ߞߏ߫ ߖߡߊ߬ߣߊ ߓߊ߯ߙߊ ߕߍ߫ ߟߊߟߐ߬ ߟߊ߫߸ ߦߊ߬ߣߌ߫ ߞߎ߲߬ߠߊ߬ߛߌ߰ ߞߎߘߊ߫ ߟߊߛߌ߰ߕߐ߫.

ߞߊ߲ߓߍ߲ ߞߊ߲ߕߌ߯ߘߊ ߣߐ߬ ߟߊ߬ߛߋ߬ߟߌ߬ ߞߟߊߒߞߋ߫ ߟߋ߬ ߞߍ߫ ߟߊ߫ ߞߵߊ߬ ߟߊߛߋ߫ ߖߡߊ߬ߣߊ ߞߣߐߟߊ ߣߴߊ߬ ߞߐߞߊ߲ߠߊ ߡߊ߬߸ ߏ߬ ߡߍ߲ ߞߍߣߍ߲߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߡߙߌߘߐ߫ ߕߊ߬ߣߍ߲߬ ߝߟߐ ߘߌ߫ ߊ߬ ߟߊߛߌ߱ ߣߌ߫ ߛߌߛߍ߲߬ ߕߍ ߣߌ߲߬ ߘߐ߫ ߞߊ߬ߣߌ߲߬، ߏ߬ ߡߍ߲ ߟߊ߬ߛߌ߰ߟߌ ߖߊ߲߬ߖߏ߲ ߞߍ߫ ߘߊ߫ ߂߀߂߆ ߓߌ߲ߠߊߥߎߟߋ߲ ߕߟߋ߬ ߁߇ ߡߊ߬ ߣߐ߲ߜ߭ߐ߫ ߓߙߊߞߣߍ߫ ߟߊ߲߰ߛߣߊ߬ ߞߐ߲ߕߍ߬ ߟߊ߫.

ߘߐ߬ߛߙߋ ߣߌ߲߬ ߞߣߐ߫߸ ߞߊ߬ߝߏ߬ ߞߎ߲ߕߌ߮ ߞߵߊ߬ ߟߊ߫ ߥߊߟߢߌߡߊߟߐ߲ ߝߏ߬ߟߌ ߟߊߛߋ߫ ߞߏߟߊߘߍߢߐ߲߮ ߠߎ߬ ߣߌ߫ ߡߌ߬ߙߌ߲߬ߘߌ ߡߊ߬، <<ߞߊ߲ߓߍ߲ ߞߊ߲ߕߌ߮ ߟߊ߫ ߞߏߢߌߡߊߟߐ߲ ߝߏ߬ߟߌ߬ ߞߙߍߞߙߍߣߍ߲ ߦߋ߫ ߛߋ߫ ߟߊ߫ ߞߊ߬ߝߏ߬ ߞߎ߲ߕߌ߮ ߟߎ߫ ߡߊ߬߸ ߡߊ߲߬ߕߏ߲߬ߕߍ߬ ߛߌ߲ߝߏ߲ߘߊ ߟߎ߬ ߞߐߦߌߘߊ ߡߊ߬߸ ߏ߬ ߟߎ߬ ߡߍ߲ ߠߎ߬ ߞߊ߬ ߞߊ߲ߕߌ߯ ߟߊߛߌ߯ߟߌ ߖߊ߲߬ߖߏ߲ ߡߐ߬ߟߐ߲߬ߡߦߊ߬.>> ߟߊ߬ߛߋ߬ߟߌ ߣߌ߲߬ ߞߵߏ߬ ߝߐ߫ ߞߵߊ߬ ߟߊߕߍ߰، ߊ߬ ߞߊ߬ ߝߏ߬ߟߌ ߟߊߛߋ߫ ߌߞߐ߫ <<ߖߌ߬ߣߍ߫ ߡߌ߬ߙߌ߲߬ߘߌ ߡߊ߬߸ ߊ߬ߟߎ߬ ߟߊ߫ ߓߐߟߌ߫ ߞߐߟߌߞߐߟߌ߫ ߟߊߘߍ߲߰ߕߊ ߟߊ߫.>> ߖߊ߲߬ߖߏ߲ ߣߌ߲߬ ߝߍ߬.

ߛߌ߲߬ߝߏ߲߬ߘߊ ߟߎ߬ ߟߊ߫ ߞߎ߲߬ߠߊ߫߸ ߞߊ߲ߓߍ߲ ߞߊ߲ߕߌ߮ ߞߵߊ߬ ߦߌ߬ߘߊ߬ ߞߏ߫ ߊ߬ <<ߓߘߊ߫ ߛߐ߲߬ ߞߎ߲߬ߠߊ߬ߛߌ߮ ߟߊ߫ ߓߙߐߕߐߟߌ ߡߊ߬߸ ߏ߬ ߡߍ߲ ߦߌ߬ߘߊ߬ ߘߴߊ߬ ߟߊ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߓߟߏ߫߸ ߛߟߊߕߌ߯ ߊߡߊߘߎ߫ ߎ߯ߙߌ߬ ߓߊ.>> ߞߊ߲ߕߌ߯ߘߊ ߞߵߊ߬ ߦߌ߬ߘߊ߬ ߞߏ߫ ߡߙߌߘߐ ߏ߬ ߦߋ߫ <<ߞߊ߲ߓߍ߲ ߓߊ߯ߙߊ ߟߋ߬ ߘߌ߫.>> ߡߍ߲ ߦߋ߫ <<ߛߋ߲߬ߕߊ߬ ߞߎߘߊ߫ ߦߌ߬ߘߊ߬ ߟߊ߫ ߞߊ߲ߕߌ߯ ߢߣߊߕߊߟߌ ߞߐ ߣߌ߲߬ ߘߐ߫߸ ߡߍ߲ ߞߍ߫ ߘߊ߫ ߂߀߂߅ ߞߏߟߌ߲ߞߏߟߌ߲ ߕߋ߬ߟߋ߫ ߂߈ ߡߊ߬.>>

ߞߊ߬ ߞߐ߲߰ ߞߎ߲߬ߠߊ߬ߛߌ߰ ߞߎߘߊ ߛߏ߯ߙߏ ߢߍ߫߸ ߞߊ߬ߝߏ߬ ߞߎ߲ߕߌ߮ ߞߊ߬ ߖߡߊ߬ߙߌ߬ ߟߊߕߍ߰ߣߍ߲ ߘߏ߫ ߟߎ߫ ߘߌ߫. <<ߞߊ߲ߓߍ߲ ߞߊ߲ߕߌ߮ ߓߘߴߊ߬ ߢߌߣߌ߲߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߣߌ߫ ߞߏߕߌ߯ ߓߙߐߕߐߓߊ߯ߕߐ ߟߎ߬ ߝߍ߬߸ ߊ߬ߟߎ߬ ߟߊ߫ ߘߎ߰ߞߎߟߎ߲ ߎ߬ ߦߋ߫ ߕߏ߫ ߊ߬ߟߎ߬ ߓߟߏ߫߸ ߊ߬ߟߎ߬ ߟߊ߫ ߟߎ ߟߎ߬߸ ߊ߬ ߣߴߊ߬ߟߎ߬ ߣߌ߫ ߟߊ߬ߞߊ߲߬ߘߊ߬ߟߌ ߡߍ߲ ߦߊ߫ ߞߊ߲߫ ߞߵߊ߬ ߓߍ߲߬ ߞߏ ߣߴߊ߬ ߞߍߢߊ ߡߊ߬.>> ߏ߬ ߞߊ߬ߙߊ߲߬ ߘߴߊ߲ ߓߟߏ߫ ߟߊ߬ߛߋ߬ߟߌ߬ ߛߓߍ ߣߌ߲߬ ߞߣߐ߫߸ ߛߊ߫ ߝߘߏ߬ߓߊ߬ ߓߊ߯ߙߊ ߟߎ߬ ߞߊߣߊ߬ ߟߊߟߐ߬ ߢߊ ߡߍ߲ ߡߊ߬.

ߘߐ߬ߛߙߋ߬ ߞߋߟߋ߲ ߣߌ߲߬ ߞߵߊ߬ ߝߐ߫ ߞߵߊ߬ ߟߊߕߍ߰ ߝߣߊ߫߸ ߞߏ߫ ߞߊ߲ߓߍ߲ ߞߊ߲ߕߌ߮ ߓߍߣߊ߬ ߟߊ߬ߕߍ߰ߦߊ߫ ߝߌ߬ߟߊ߫ ߕߊ߬: <<ߝߟߐߡߊ ߞߍߕߐ߫ ߘߊ߲߭ߛߌ߱ ߟߋ߬ ߘߌ߫ ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߛߌ߲߬ߝߏ߲ ߕߐ߭ ߟߎ߬ ߟߊ߫ ߓߊ߯ߙߊ ߟߊ߫، ߊ߬ ߝߌߟߊߣߊ߲ ߠߋ߬ ߞߍߕߐ߫ ߖߊ߬ߡߊߙߌ ߘߌ߫ ߟߊ߫ ߡߊ߬ߡߙߊ߬ߟߌ߬ ߞߏߟߊߕߍ߮ ߘߏ߫ ߟߎ߫ ߡߊ߬߸ ߞߊ߬ ߕߋ߲߭ߕߋ߲߭ ߛߋ߲߬ߠߊ߬ ߞߏ ߟߎ߬ ߟߊߕߊ߯ߡߊ߫ ߦߊ߬ߣߌ߫ ߞߎ߲߬ߠߊ߬ߛߌ߰ ߞߎߘߊ ߟߊߛߌ߰ߕߐ߫.>>

ߓߘߍ߬ߓߘߍ߬ߟߌ ߡߊ߬ߘߎ߮ ߘߐ߫߸ ߞߊ߬ߝߏ߬ ߞߎ߲ߕߌ߮ ߞߵߊ߬ ߦߌ߬ߘߊ߬ ߞߏ߫ ߊ߬ ߓߘߊ߫ ߞߏ ߘߏ߫ ߞߊ߬ߙߌ߬ߝߊ߬ ߊߡߊߘߎ߫ ߎ߯ߙߌ߬ ߓߊ ߟߊ߫ <<ߞߊ߬ ߛߋ߫ ߓߘߍ߬ߓߘߍ߬ߟߌ߬ ߕߏ߯ߝߏ߫ ߥߙߎߞߌ ߣߌ߫ ߞߊ߬ߞߎ߬ߘߦߊ߬ߟߌ ߓߐ߲ߛߐ߲ߘߊ (ߥߞߓ) ߟߊ߫ ߓߊ߯ߙߊ ߟߎ߬ ߘߊߓߊ߲߫ ߠߊ߫.>> ߢߣߊߕߊߟߌ߫ ߣߊ߬ߕߐ ߟߎ߬ ߘߐ߫߸ ߦߏ߫ ߥߛߊ߬ߘߋ߲߬ ߢߣߊߕߊߟߌ.

ߟߊ߬ߓߊ߲ ߘߐ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߝߐ߫ ߛߓߍ ߣߌ߲߬ ߞߣߐ߫߸ ߞߏ߫ <<ߢߣߊߕߊߟߌ߫ ߣߊ߬ߕߐ ߕߎ߬ߡߊ߬ߘߊ ߘߌߣߊ߬ ߟߊߕߍ߰ ߞߊߙߏ߫ ߓߕߐ ߟߊ߫߸ ߞߵߊ߬ ߓߍ߲߬ ߢߣߊߕߊߟߌ ߛߊ߬ߙߌ߬ߦߊ߬ߛߎ߲ ߕߐ߲ߛߋ߲ ߇߄߲ ߡߊ߬.>> ߊ߬ ߞߵߊ߬ ߝߐ߫ ߝߣߊ߫ ߞߏ߫ ߊ߬ ߦߋ߫ ߘߐ߬ߕߊߡߌ߲ ߞߏߟߊߕߍ߯ߘߊ ߞߟߌ߫ ߟߊ߫߸ ߊ߬ߟߎ߬ ߦߋ߫ <<ߛߊ߬ߙߌ߬ߦߊ߬ ߛߌ߲߬ߝߏ߲߬ߠߊ߬ߞߊ ߟߎ߬ ߟߊߘߊ߲ ߛߋ߲߬ߠߊ߬ߞߊߟߌߦߊ߫ ߡߎ߬ߕߎ߲߬߸ ߞߊ߬ ߛߋ߫ ߖߡߊ߬ߣߊ ߛߌ߲߬ߝߏ߲߬ߘߊ ߟߎ߬ ߟߊ߫ ߓߊ߯ߙߊ ߟߎ߫ ߛߋ߲߬ߠߊ߬ߞߊߟߌߦߊ߫ ߟߊ߫.>>

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.