ߖߌ߬ߣߍ߬ ߞߊ߲ߓߍ߲ ߞߊ߲ߕߌ߮߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߘߊ߫ ߝߊ߬ߛߏ ߖߏ߲߬ߖߏ߲ ߘߏ߲߬ ߣߊ߲߬ߕߌ߰ ߞߙߎ ߘߏ߫ ߟߎ߫ ߓߟߏ߫߸ ߞߵߊ߬ߟߎ߬ ߟߊ߫ ߕߊ߯ ߝߊ߬ߛߏ ߘߎ߰ߞߟߏ ߡߊߞߊ߲ߞߊ߲߫ ߞߊ߲ߡߊ߬، ߖߏ߲߬ߖߏ߲߬ ߠߊ߬ߕߊߡߌ߲ ߖߊ߲߬ߖߏ߲ ߞߍ߫ ߘߊ߫ ߖߡߊ߬ߓߊ߫ ߟߋ߬ ߢߣߊ߫߸ ߣߊ߲߬ߕߌ߰ ߕߊ߯ߓߊ߯ߕߐ ߟߎ߫ ߕߊ߬ߣߍ߲ ߞߵߊ߬ ߟߊ߫ ߖߡߊ߬ߣߊ߬ߘߋ߲ ߠߎ߬ ߞߊ߲߬.

ߖߌ߬ߣߍ߫ ߣߊ߲߬ߕߌ߰ ߝߊ߲ߞߊ ߣߐ߬ ߛߏ߬ߙߌ߬ߡߊ߬ߘߋ߲߬ ߞߙߎ ߘߏ߫ ߟߎ߫ ߟߋ߬ ߟߊߥߟߌ߬ ߟߊ߫ ߕߋ߲߬ ߞߏߞߎߘߊ߫߸ ߞߵߊ߬ߟߎ߬ ߟߊߕߊ߯ ߖߡߊ߬ߣߊ ߡߞߊߘߊ߲߫ ߞߊ߲ߡߊ߬، ߕߊ߯ߟߌ ߖߊ߲߬ߖߏ߲ ߣߌ߲߬ ߞߍ߫ ߘߊ߫ ߞߊ߲ߓߍ߲ ߞߊ߲ߕߌ߮ ߖߍ߬ߘߍ ߢߣߊ߫ ߟߋ߬߸ ߣߊ߲߬ߕߌ߰ ߝߊ߲ߞߊ ߡߙߊ߬ߓߊ߰ ߛߊ߲ߘߐߕߊ߸ ߡߊ߬ߡߊ߬ߘߌ߬ ߘߎ߲ߓߎߦߊ߫߸ ߊ߬ߟߋ߫ ߖߍ߬ߘߍ ߟߋ߬ ߣߊ߬ ߘߊ߫ ߞߊ߬ ߖߏ߲߬ߖߏ߲ ߘߏ߲߬ ߗߍ߬ߘߋ߲ ߠߎ߬ ߓߟߏ߫.

ߣߊ߲߬ߕߌ߮ ߡߍ߲ ߠߎ߬ ߟߊߕߊ߯ߣߍ߲߫ ߠߋ߲߬߸ ߊ߬ߟߎ߬ ߝߘߊߣߍ߲߫ ߛߏ߬ߙߌ߬ߡߊ߬ߘߋ߲ ߓߏߟߏ߲߫ ߛߘߍߡߊ߲߫ ߠߋ߬ ߟߊ߫߸ ߡߍ߲ ߠߎ߬ ߟߊߞߐ߯ߣߍ߲߫ ߊ߬ ߢߊ ߡߊ߬ ߜߊߟߌߜߊߟߌ߫߸ ߞߊ߬ ߓߊ߲߫ ߞߊ߬ ߞߟߍ߬ߡߎߙߊ߲߫ ߠߎ߫ ߘߏ߲߬ ߊ߬ߟߎ߬ ߓߟߏ߫߸ ߡߍ߲ ߘߴߊ߬ ߞߍ߫ ߊ߬ߟߎ߫ ߞߢߊ߬ߡߊ߬ ߞߏ߫ ߕߍ߫ ߛߐ߬ߘߐ߲߫ ߟߊ߬ߞߊ߲߬ߘߊ߬ߟߌ ߜߟߍ߬ߦߊ ߣߌ߲߬ ߘߐ߫، ߝߊ߰ߡߊ ߟߎ߫ ߖߍ߬ߘߍ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ߟߎ߬ ߟߊ߫ ߕߊ߯ߟߌ ߣߌ߲߬ ߦߋ߫ ߖߌ߬ߣߍ߫ ߣߊ߲߬ߕߌ߮ ߘߋ߬ߙߌ߬ߣߊ߲߬ߞߏ߬ ߞߘߐ ߟߋ߬ ߘߌ߫߸ ߓߊߏ߬ ߝߟߐ߫ ߤߊ߲߯ ߓߌ߬߸ ߖߌ߬ߣߍ߫ ߣߊ߲߬ߕߌ߮ ߟߎ߬ ߟߊ߫ ߓߊ߯ߙߊ ߕߍ߫ ߘߏ߫ ߜߘߍ߫ ߘߌ߫ ߝߊ߬ ߖߡߊߣߊ ߣߌ߫ ߝߊ߬ ߘߎ߯ߞߟߏ ߡߊߞߊ߲ߞߊ߲ ߞߐ߫߸ ߊ߬ ߣߌ߫ ߞߊ߬ ߝߘߊ߬ߝߌ߲߬ߠߊ߫ ߡߌ߬ߙߌ߲߬ߘߌ߫ ߕߐ߬ߢߍ߰ߣߍ߲ ߠߎ߬ ߞߐߡߊߓߌ߲ߓߌ߲߫، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߖߌ߬ߣߍ߫ ߣߊ߲߬ߕߌ߮ ߟߎ߫ ߛߐ߲߬ ߕߍ߫ ߞߐ߲ߛߐ߲ߧߊߟߌ߫ ߘߌ߫߸ ߞߎߡߊߕߍ߫ ߓߊ߰ߒ߬ߡߊ߫ ߡߊ߬.

ߖߡߊ߬ߣߊ ߞߊ߲ߕߌ߮ ߟߊ߫ ߛߙߊ߬ߣߎ߲ ߘߐ߫߸ ߊ߬ ߞߊ߬ ߗߍ߬ߘߋ߲ ߠߎ߫ ߝߏ߬߸ ߊ߬ߟߎ߬ ߞߍ ߘߐ߫ ߞߵߊ߬ߟߎ߬ ߓߌ߫ ߛߎ ߣߌ߫ ߕߋ߬ߟߋ، ߞߊ߬ ߓߊ߲߫ ߞߵߊ߬ ߦߌ߬ߘߴߊ߬ߟߎ߬ ߟߊ߫߸ ߞߏ߫ ߓߊ߯ߙߊ߫ ߕߐ߰ߡߊ߬ߛߙߋ߬ߡߊ߬ߓߊ߫ ߟߋ߬ ߘߏ߲߬ߣߍ߲߫ ߊ߬ߟߎ߬ ߓߟߏ߫ ߣߌ߲߬߸ ߡߍ߲ ߕߍ߫ ߞߏߣߍ߲߫ ߘߌ߫.

<<ߊߟߎ߸ ߊߟߎ߬ ߖߌ߬ߣߍ߫ ߛߏ߬ߙߌ߬ߡߊ߬ߘߋ߲ ߠߎ߬߸ ߊߟߎ ߟߋ߬ ߊ߲ ߠߊ߫ ߞߋ߬ߟߋ߲߬ߧߊ ߕߐ߰ߡߊ߬ߛߙߋ ߘߌ߫߸ ߊߟߎ ߟߋ߬ ߊ߲ ߝߊ߲߬ߞߊ ߘߌ߫߸ ߊߟߎ ߟߋ߬ ߊ߲ ߠߊ߫ ߘߐ߬ߖߊ ߘߌ߫، ߊ߲ ߧߋ߫ ߥߊ߯ߕߌ ߡߍ߲ ߘߐ߫ ߕߋ߲߬߸ ߜߟߍ߬ߦߊ ߓߘߴߊ߬ ߞߎ߲߬ߛߌ߲߫ ߊ߲ ߝߊ߬ߛߏ ߟߊ߫߸ ߏ߬ ߘߐ߫ ߓߌ߬ ߢߐ߲߰ ߟߏ߲߫߸ ߊߟߎ߫ ߟߊ߫ ߞߟߊߓߎ߸ ߊߟߎ߫ ߟߊ߫ ߖߘߍ߬ߘߌ߸ ߏ߬ ߟߋ ߕߐ߬ߣߐ ߓߏ߲߬ߓߊ߫ ߞߏ ߓߍ߯ ߘߌ߫ ߕߋ߲߬.

ߒ ߧߋ߫ ߖߏ߲߬ߖߏ ߣߌ߲߬ ߞߊ߬ߙߌߝߊ߬ ߟߴߊߟߎ߫ ߟߊ߫߸ ߏ߬ ߡߍ߲ ߦߋ߫ ߕߐ߰ߡߊ߬ߛߙߋ߬ ߜߌߟߌ߲߫ ߘߌ߫߸ ߊ߬ ߣߴߊ߬ ߦߋ߫ ߖߋ߬ߓߌ߬ߦߊ߬ߟߌ ߕߐ߰ߡߊ߬ߛߙߋ߬ ߞߍ߲ߘߍ ߟߋ߬ ߝߣߊ߫ ߘߌ߫ ߞߵߊ߲ ߠߊ߫ ߘߎ߰ߞߣߍ ߡߊߞߊ߲ߞߊ߲߫߸ ߞߵߊ߲ ߟߊ߲߬ߓߋ ߣߴߊ߲ ߠߊ߫ ߛߌߣߌ߲߫ ߣߊ߬ߕߐ ߡߞߊߘߊ߲߫، ߒߠߋ ߡߊ߬ߡߊ߬ߘߌ߬ ߘߎ߲ߓߎߦߊ߫߸ ߒ ߧߋ߫ ߕߡߊ߬ߖߌ ߓߐ߫ ߟߊ߫ ߖߌ߬ߣߍ߫ ߡߌ߬ߙߌ߲߬ߘߌ ߘߐ߫߸ ߊߟߎ߫ ߦߋ߫ ߟߴߊ߬ ߟߊ߫߸ ߞߏ߫ ߊ߲ ߓߋ߲ߓߊ ߟߎ߫ ߞߊ߬ ߘߎ߰ߞߟߏ ߡߍ߲ ߕߏ߫ ߊ߲ ߓߟߏ߫߸ ߘߎ߱ ߏ߬ ߣߐ߲߬ߞߐ߲ ߢߊ߫ ߞߋߟߋ߲ ߕߍ߫ ߞߐ߲ߛߐ߲ߧߊ߫ ߊߘߡߊߘߋ߲߫ ߛߌ߫ ߓߟߏ߫.>>

ߣߊ߲߬ߕߌ߰ ߞߙߎ ߡߍ߲ ߠߎ߬ ߟߊߕߊ߯ߣߍ߲߫ ߕߋ߲߬߸ ߛߊ߲ߡߊ߫ ߣߊ߲ߕߌ߮ ߟߎ߬ ߝߣߊ߫ ߕߍ߬ߘߍ߫ ߊ߬ߟߎ߬ ߞߐ߫߸ ߞߟߍ߬ߞߙߎ ߢߌ߲߬ ߠߎ߬ ߓߐ߫ ߘߊ߫ ߖߡߊ߬ߣߊ ߞߎߓߋߘߊ ߟߋ߬ ߟߊ߫߸ ߖߡߊ߬ߣߊ߬ߘߋ߲ ߠߎ߬ ߦߴߊ߬ߟߎ߬ ߕߍ߯ߜߊ߬ߛߌ ߣߌ߫ ߛߍߥߊ ߞߊ߲߬ ߊ߬ߟߎ߬ ߞߐ߫߸ ߘߎߓߊ ߣߌ߫ ߟߊߒߠߦߊ ߘߌ߫߸ ߞߵߊ߬ߟߎ߬ ߞߟߊߓߎߘߏ߲߬ ߛߌߟߊ߫ ߖߊ߲ ߣߌ߲߬ ߕߊ߯ߡߊ ߘߐ߫، ߣߊ߲߬ߕߌ߮ ߡߍ߲ ߠߎ߬ ߟߊߕߊ߯ߣߍ߲߫ ߕߋ߲߬߸ ߏ߬ ߟߎ߬ ߞߊ߲߫ ߞߏ߫ ߊ߬ߟߎ߬ ߟߊ߫ ߕߊ߯ߟߌ ߣߌ߲߬ ߕߍ߫ ߘߋ߬߸ ߓߊ ߞߏ߫ ߊ߬ߟߎ߬ ߦߋ߫ ߣߊ߲߬ߕߌ߮ ߟߋ߬ ߘߌ߫، ߓߊ߬ߙߵߊ߬ ߦߋ߫ ߖߘߍ߬ߘߌ ߟߋ߬ ߘߌ߫߸ ߞߵߌ ߖߘߍ߬ ߡߊߛߘߊߞߊ߫ ߝߊ߬ ߓߘߊ ߞߏߛߐ߲߬.

ߖߊ߲߬ߖߏ߲ ߞߎ߲߭ߝߊ߰ ߘߊ߫ ߛߍߥߊ ߟߋ߬ ߟߊ߫߸ ߞߊ߲߫ ߞߋߟߋ߲߫ ߔߋ߬ ߊ߬ߟߎ߬ ߘߊ߫: <<ߊ߲ ߝߊ߬ߛߏ߸ ߊ߲ ߓߐ߫ ߞߎ߲ ߠߵߏ߬ ߘߌ߫.>>

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.