ߊ߬ ߞߍߣߍ߲߫ ߦߏ߫ ߖߌ߬ߣߍ߫ ߘߐ߬ߕߊߡߌ߲ ߞߊ߲ߕߌ߮߸ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߘߊ߫ ߥߴߊ߬ ߟߊ߫ ߡߊ߬ߡߌ߬ߘߊ߬ߟߌ߬ ߛߓߍ ߟߊߘߏ߲߬ ߂߀߂߅ ߞߏߟߌ߲ߞߏߟߌ߲ ߕߋ߬ߟߋ߫ ߂߈ ߞߊ߲ߕߌ߯ ߢߣߊߕߊߟߌ߫ ߞߏ ߘߐ߫، ߡߙߌߘߐ ߏ߬ ߡߍ߲ ߡߊߞߐ߬ߣߐ߲߬ߣߍ߲߫ ߕߘߍ߬ ߓߍ߯ ߟߊߘߍ߬ߣߍ߲ ߓߟߏ߫߸ ߞߟߊߦߊ ߓߘߊ߫ ߓߐ߫ ߝߌ߬ߘߌ ߘߐ߫ ߛߍߣߍ߲߬ ߝߛߊߦߌ߫، ߘߐ߬ߕߊߡߌ߲ ߡߍ߲ ߘߊߡߌ߬ߣߊ߬ ߘߴߊ߬ ߓߟߏ߫ ߂߀߂߁ ߠߊ߫߸ ߏ߬ ߟߋ ߛߋߕߐ߫ ߊ߬ ߞߎ߲߬ߝߊ߮ ߡߊ߬ ߣߌ߲߬ ߛߍߣߍ߲߬.
ߡߊ߬ߡߌ߬ߘߊ߬ߟߌ ߛߓߍ߫ ߟߊߘߏ߲ ߞߎ߲߬ߘߏ߲ ߠߋ߬ ߓߌ߬ ߘߊ߫߸ ߊ߬߬ ߞߍߣߍ߲߫ ߞߊ߬ߝߏ߬ߖߊ߬ߛߏ߲߬ߠߊ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߘߊ߫ ߥߴߊ߬ ߟߊ߫ ߡߊ߬ߡߌ߬ߘߊ߬ߟߌ߬ ߛߓߍ ߟߊߘߏ߲߬ ߞߕߌߖߌ߲ ߛߊ߲ߘߐߕߊ ߟߊ߫ ߂߀߂߅ ߣߍߣߍߓߊ ߕߋ߬ߟߋ߫ ߃ ߣߌ߲߬ ߡߊ߬߸ ߓߊ߬ߛߊ߲߬ ߜߍߡߊ߲ ߦߴߊ߬ ߞߊ߲ߠߊ߸ ߊ߬ ߝߊ߬ߘߌ߬ ߞߣߐ߬ߜߍ߲߬ߘߋ߲ ߝߊ߲߬ߓߊ ߕߎ߲߬ ߦߋ߫ ߞߏ߬ߛߊ߬ߓߊ ߟߋ߬ ߘߐ߫߸ ߏ߬ ߡߍ߲ ߠ߬ߎ ߖߌ߰ ߘߊ߫ ߞߕߌߖߌ߲ ߛߊ߲ߘߐߕߊ ߟߊ߫ ߦߋ߲߬ ߓߌ߬ ߦߏ߫ ߡߢߊ߫، ߊ߬ ߕߊ߯ ߘߴߊ߬ ߟߊ߫ ߡߊ߬ߡߌ߬ߘߊ߬ߟߌ߬ ߛߓߍ ߟߋ߬ ߟߊߘߏ߲߬߸ ߞߏߟߌ߲ߞߏߟߌ߲ ߕߋ߬ߟߋ߫ ߂߈ ߞߊ߲ߕߌ߯ ߢߣߊߕߊߟߌ߫ ߣߊ߬ߕߐ ߘߐ߫߸ ߞߊ߬ ߞߟߊߦߊ ߓߐ߫ ߝߌ߬ߘߌ ߘߐ߫ ߞߊ߬ ߡߐ߱ ߟߎ߬ ߓߐ߫ ߞߎ߲ߝߊ߲ ߘߐ߫.
ߛߌߟߊߓߐߛߐ߯ߣߊ߫ ߞߏ߬ߣߌ߲ ߞߊ߬ ߞߎߡߊ ߦߋ߫ ߦߙߐ ߡߍ߲ ߘߐ߫ ߛߊ߫߸ ߥߎ߬ߣߎ߲߬ߥߎ߬ߣߎ߲߬ ߞߎߡߊ ߟߎ߫ ߟߋ߬ ߟߊߛߙߋߦߊ ߦߴߌߘߐ߫ ߓߍ߯ ߓߟߏ߫߸ ߞߏ߫ ߊ߬ ߓߘߴߊ߬ ߟߊ߫ ߡߊ߬ߡߌ߬ߘߊ߬ߟߌ ߟߊߘߏ߲߬، ߣߴߏ߬ ߕߍ߫߸ ߊ߬ ߘߏ߲߬ ߘߊ߫ ߟߋ߬ ߞߊ߬ ߓߐ߫߸ ߊ߬ ߡߊ߫ ߞߎߡߊ߫ ߝߐ߬ߓߍ߬ߦߊ߬ߟߊ߫ ߝߍ߬߸ ߊ߬ ߞߙߍ߬ߝߍ߬ ߡߐ߯ ߘߏ߲߬ ߡߊ߫ ߞߎߡߴߊ߬ ߕߐ߯ ߘߐ߫. ߞߵߊ߬ ߓߍ߲߬ ߞߏ ߣߴߊ߬ ߞߍߢߊ ߡߊ߬߸ ߡߐ߰ ߘߴߊ߬ ߝߐ߫ ߞߏ߫ ߊ߬ ߕߊ߯ߣߍ߲߫ ߊ߬ ߟߊ߫ ߡߊ߬ߡߌ߬ߘߊ߬ߟߌ ߟߋ ߟߊߘߏ߲߬ ߠߊ߫.
ߒ߬ߓߊ߬߸ ߖߡߊ߬ߣߊ߬ߘߋ߲ ߠߎ߬ ߥߊ߯ߕߌ߫ ߦߙߌߞߊ ߦߋ߫ ߡߍ߲ ߞߎߡߊ ߟߊ߫߸ ߏ߬ ߞߣߐ߬ߘߐ߬ߝߟߌ ߓߘߊ߫ ߓߊ߲߫߸ ߞߎ߲ߝߊ߲ ߓߘߊ߫ ߓߊ߲߫، ߞߊ߬ߝߏ߬ ߖߊߛߏ߲ ߡߍ߲ ߞߍ߫ ߘߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߟߏ߫ ߂߀߂߁ ߠߊ߫߸ ߏ߬ ߟߋ ߞߵߊ߬ ߟߊߣߊ߬ ߖߡߊ߬ߣߊ ߞߎ߲߬ߠߊ߫߸ ߊ߬ ߞߵߊ߬ ߦߌ߬ߘߊ߫ ߕߎ߬ߡߊ ߏ߬ ߟߊ߫ ߛߍ߲ߞߊ߲ߠߊ ߘߐ߫ ߖߡߊ߬ߣߊ ߛߍ߲ߣߌ߲ ߞߍߢߊ ߡߊ߬߸ ߞߏ߫ ߊ߬ߟߋ ߓߊ߬߸ ߊ߬ ߣߴߊ߬ ߟߊ߫ ߡߐ߰ ߛߌ߫߸ ߞߏ߫ ߊ߬ߟߎ߬ ߝߋ߲߫ ߕߍߣߊ߬ ߞߍ߫ ߟߊ߫ ߡߊ߬ߡߌ߬ߘߊ߬ߟߌ߬ߟߊ߫ ߘߌ߫ ߘߐ߬ߕߊߡߌ߲ ߟߊߓߊ߲߫ ߕߎߡߊ ߟߊ߫، ߓߊ߬ߙߌ߬ ߥߊߦߌߞߊ߫߸ ߛߌ߰ߞߊ߲߬ ߞߎߘߊ ߡߍ߲ ߕߊ߬ߣߍ߲߫ ߣߌ߲߬߸ ߏ߬ ߓߘߊ߫ ߣߊ߬ ߦߟߍ߬ߡߊ߲ ߘߏ߲߬ ߞߏ ߟߎ߬ ߘߐ߫߸ ߛߌߟߊ ߟߊߞߊ߬ ߖߌ߬ߣߍ߬ߞߊ ߓߍ߯ ߦߋ߫߸ ߕߎߟߊߝߌ߲ ߕߋ߬ߟߋ߫ ߂߆ ߡߊ߬، ߒ߬ߓߊ߬߸ ߛߌߟߊ ߟߊߞߊ߭ ߞߐ߫ ߖߌ߬ߣߍ߬ߞߊ ߓߍ߯ ߦߋ߫߸ ߊ߬ ߝߣߊ߫ ߡߊ߫ ߛߌߣߌ߲߫ ߡߊߞߐ߬ߣߐ߲߬ ߜߘߍߞߍ߫߸ ߊ߬ ߞߊ߬ ߓߍ߲߬ߒ߬ߛߋ߲߬ߡߊ ߏ߬ ߟߋ ߕߣߐ߬ߓߐ߫ ߞߊ߬ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫، ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߣߊ߲߬ߕߌ߮ ߕߍ߫ ߞߍ߫ ߟߊ߫ ߓߘߍ߬ߓߘߍ߬ߟߌ߬ߟߊ߫ ߘߌ߫ ߛߊ߫߸ ߓߊ߬ߙߌ߬ ߊ߬ߟߋ߫ ߞߏ߬ߣߌ߲ ߓߘߊ߫ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫߸ ߊ߲ ߘߏ߲߬ ߡߊ߫ ߘߊ߬ߟߎ߫ ߛߐ߬ߘߐ߲߫ ߊ߬ ߓߙߐߕߐ߫ ߞߏ ߡߊ߬ ߡߎߣߎ߲߬.
ߊߟߎ߫ ߦߴߊ߬ ߟߐ߲߫߸ ߡߊ߬ߡߌ߬ߘߊ߬ߟߌ߬ߟߊ߬ ߛߋߦߌ߲߫ ߜߘߍ߫ ߓߐ߫߸ ߏ߬ ߟߎ߬ ߓߘߴߊ߬ߟߎ߬ ߕߐ߮ ߟߊߘߏ߲߬ ߡߎߣߎ߲߬߸ ߎߛߑߡߊߣߌ߲߬ ߞߊ߬ߓߊ ߦߴߏ߬ ߘߐ߫߸ ߟߊ߲߰ߛߣߊ߬ ߞߎߦߊߕߍ߫ ߦߴߊ߬ ߘߐ߫߸ ߡߊ߬ߞߊߟߋ߫ ߞߡߊ߬ߙߊ߬߸ ߊ߬ ߣߌ߫ ߝߊ߭ߦߊ߬ ߡߟߌ߬ߡߣߏ߫، ߞߟߊߦߊ߫ ߜߘߍ߫ ߓߍߣߊ߬ ߓߐ߫ ߝߌ߬ߘߌ ߘߐ߫ ߣߍߣߍߓߊ ߣߌ߲߬ ߕߟߋ߬ ߁߃ ߣߊ߬ߕߐ ߡߊ߬߸ ߏ߬ ߟߏ߲ ߠߋ߬߸ ߞߕߌߖߌ߲ ߛߊ߲ߘߐߕߊ ߓߍߣߊ߬ ߡߊ߬ߡߌ߬ߘߊ߬ߟߌ߬ߟߊ߫ ߕߊ߬ߣߍ߲ ߠߎ߬ ߛߙߍߘߍ ߟߊߥߊ߲߬ߞߊ߲߬.
ߊߟߎ߫ ߞߏ߬ߣߌ߲ ߦߴߊ߬ ߟߐ߫߸ ߖߌߘߊ߲ ߦߋ߫ ߥߊ߬ߣߊ ߡߍ߲ ߠߎ߬ ߣߴߊ߬ߟߎ߬ ߟߊ߫ ߞߙߎߞߊ ߟߊ߫ ߖߌ߬ߣߍ߬ ߞߣߐ߫߸ ߏ߬ ߟߎ߫ ߛߋ߲߬ ߕߍ߫ ߢߌ߬ߣߊ߲߬ ߢߣߊߕߊߟߌ ߢߌ߲߬ ߘߐ߫، ߖ.ߡ.ߟ߸ ߖߓߝߘ߸ ߊ߬ ߣߌ߫ ߞߝߘ߸ ߊߟߌߝߊ߫ ߞߐ߲ߘߍ߫߸ ߛߋߟߎ߫ ߘߊߟߍ߲߬ ߖߊߟߏ߫߸ ߊ߬ ߣߌ߫ ߛߘߌߦߊ߫ ߕߎ߬ߙߋ߬߸ ߏ߬ ߟߎ߬ ߡߊߕߊ߯ߣߍ߲߫ ߠߋ߬߸ ߛߊ߬ߙߌ߬ߦߊ߫ ߖߍ߬ߘߍ ߝߣߊ߫ ߟߊ߫ ߡߊ߬ߕߊ߰ߟߌ ߘߐ߫ ߞߊ߬ߣߌ߲߬، ߓߊߏ߬߸ ߊ߬ ߝߐߣߍ߲߫ ߠߋ߬ ߞߏ߫ ߌ ߓߊ߯ ߛߊ߲߬ ߈߀ ߓߐ߫߸ ߌ ߕߴߛߋ߫ ߞߍ߫ ߟߊ߫ ߡߊ߬ߡߌ߬ߘߊ߬ߟߌ߬ߟߊ߫ ߘߌ߫، ߖߌ߬ߣߍ߬ ߞߣߐ߫ ߕߋ߲߬߸ ߝߊ߲߬ߞߊߛߌ߬ߣߊ ߘߏ߫ ߟߎ߫ ߦߋ߫ ߢߊߣߌ߲ߡߊߓߏߙߌ ߘߐ߫߸ ߘߏ߫ ߟߎ߫ ߦߋ߫ ߥߛߎ ߟߊ߫.
ߢߣߊߕߊߟߌ ߣߌ߲߬ ߘߐ߫߸ ߞߎ߲߬ߞߘߐ߬ߛߌ߮ ߞߍ߫ ߘߊ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߫ ߉߀߀ ߟߋ߬ ߘߌ߫߸ ߏ߬ ߞߊ߬ ߛߌߟߊ ߕߍ߰ ߡߊ߬ߡߌ߬ߘߊ߬ߟߌ߬ߟߊ߬ ߛߌߦߊߡߊ߲߫ ߠߋ߬ ߦߋ߫، ߓߊߏ߬߸ ߊ߬ߟߎ߬ ߞߊ߲߫ ߠߋ߬ ߞߏ߫ ߣߌ߲߬ ߢߐ߲߰ ߡߊ߫ ߞߍ߫ ߡߎߣߎ߲߬، ߘߏ߫ ߟߎ߫ ߝߣߊ߫ ߓߍ߫߸ ߏ߬ ߟߎ߬ ߡߊ߫ ߛߋ߫ ߞߐߡߊߓߌ߲ߓߌ߲ߓߊ߯ ߛߐ߬ߘߐ߲߬ ߠߊ߫߸ ߣߊߟߌ߬ߡߎ߲߫ ߖߘߍ߬ߦߋ߬ ߡߊ߬ߡߌ߬ߘߊ߬ߟߌ߬ߟߊ ߟߎ߬ ߘߌ߫.
ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫߸ ߣߴߊ߬ ߟߊ߫ ߡߊ߬ߡߌ߬ߘߊ߬ߟߌ߬ ߞߏ ߣߌ߲߬ ߕߏ߫ ߘߴߊ߬ ߡߊ߬߸ ߡߐ߰ ߘߌ߫ ߛߐ߬ߘߐ߲߬ ߜߏߦߊ߫߸ ߡߍ߲ ߘߌ߫ ߛߌߟߊ ߕߍ߰ ߊ߬ ߦߋ߫، ߝߣߊ߫߸ ߊ߬ ߓߘߴߊ߬ ߛߍ߲ߞߊ߲ߠߊ ߛߐ߬ߛߐ߬߸ ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߖߡߊ߬ߣߊ߬ߘߋ߲߬ ߛߌߦߊߡߊ߲߫ ߞߵߊ߬ߟߎ߬ ߞߊ߲ߠߊߘߴߊ߬ ߡߊ߬߸ ߞߏ߫ ߊ߬ ߦߋ߫ ߣߊ߬ ߞߊ߲ߕߌ߯ߦߊ ߞߐ߫، ߏ߬ ߟߋ ߞߏߛߐ߲߬߸ ߘߏ߫ ߟߎ߫ ߞߊ߲߫ ߠߋ߬߸ ߞߏ߫ ߞߊ߲ߕߌ߯ߦߊ߫ ߓߊ߲ߓߊߟߌ ߟߋ߬ ߘߊߡߌ߬ߣߊ߬ߕߐ߫ ߣߌ߲߬߸ ߡߍ߲ ߓߟߏ ߘߌ߫ ߓߐ߫ ߜߏߦߊ߫ ߖߡߊ߬ߣߊ ߞߊ߲ ߘߐ߫ ߞߏߛߓߍ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.