ߖߌ߬ߦߊ߬ߖߟߎ ߘߏ߫ ߟߋ߬ ߟߊߖߍ߲ߛߍ߲߫ ߘߊ߫ ߋߟߌ߫ ߞߡߊߣߏ߫ ߓߟߏ߫ ߂߀߂߆ ߓߌ߲ߠߊߥߎߟߋ߲ ߕߋ߬ߟߋ߫ ߂ ߣߌ߲߬ ߡߊ߬߸ ߖߌ߬ߣߍ߫ ߘߐ߲߬ߞߟߌ߬ߟߊ߬ߟߊ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߲ߞߍ߲ߘߍ߫ ߝߋߝߋ߫߸ ߏ߬ ߘߏ߲߬ ߕߍ߫ ߞߏ߫ ߢߌߡߊ߫ ߘߌ߫ ߖߡߊ߬ߣߊ ߡߊ߬، ߊ߬ ߞߊ߲߫ ߏ߬ ߘߐ߫ ߞߏ߫ ߣߊ߲߬ߕߌ߮ ߟߎ߬ ߦߋ߫ <<ߊ߬ߟߎ߫ ߟߐ߬ ߊ߬ߟߎ߫ ߟߐ߬ ߦߌ߬ߟߊ߬ ߖߐ߲ߖߐ߲>> ߘߐ߫، ߊ߬ ߟߊ߫ ߞߎߡߊ ߣߌ߲߬ ߦߋ߫ ߡߊ߬ߝߌ߲߬ߞߊ߲߬ߠߊ߬ߓߊ߫ ߟߋ߬ ߘߌ߫߸ ߡߍ߲ ߘߊ߬ߟߎ߬ ߡߊ߫ ߛߐ߬ߘߐ߲߫ ߞߎ߲߬ߠߊ߬ߛߌ߮ ߟߎ߬ ߟߊ߫ ߞߎ߲߬ߠߊ߫ ߡߎߣߎ߲߬.
ߘߐ߲߬ߞߟߌ߬ߟߊ߬ߟߊ߫ ߋߟߌ ߞߡߊߣߏ߫߸ ߖߌ߬ߣߍ߬ ߣߌ߫ ߓߙߎߞߌߣߊ߫ ߝߊ߬ߛߏ߬ߦߊ߬ ߝߌ߬ߟߊ߬ ߕߌ߮߸ ߏ߬ ߣߐ߬ ߖߌ߬ߦߊ߬ߖߟߎ ߘߏ߫ ߟߋ߬ ߟߊߖߍ߲ߛߍ߲߫ ߠߊ߫ ߓߌ߬ ߛߌ߬ߣߌ߲߬ߟߏ߲ ߣߌ߲߬ ߡߊ߬߸ ߡߍ߲ ߦߋ߫ ߛߌߞߊ ߟߊߘߏ߲߬ ߠߊ߫ ߖߌ߬ߣߍ߫ ߞߎ߲߬ߠߊ߬ߛߌ߮ ߟߎ߬ ߟߊ߫ ߞߏ ߘߐ߫، ߊ߬ ߞߎߡߊ߫ ߘߊ߫ ߞߵߊ߬ ߕߏ߫ ߢߊߣߌ߲ߡߊߓߏߙߌ ߟߋ߬ ߘߐ߫ ߖߡߊ߬ߣߊ ߞߐߞߊ߲߬߸ ߊ߬ ߞߊ߲߫ ߞߏ߫ ߞߘߊ ߡߍ߲ ߦߴߊ߬ ߞߐ߫ ߖߌ߬ߣߍ߫ ߞߎ߲߬ߠߊ߬ߛߌ߮ ߟߎ߬ ߓߟߏ߫߸ ߊ߬ ߖߍ߬ߘߍ ߡߊ߬ߡߐ߮ ߘߏ߫ ߟߎ߫ ߛߋ߲߬ ߦߴߊ߬ ߘߐ߫، ߊ߬ ߞߊ߲߫ ߞߏ߫ ߊ߬ ߘߋ߲ ߡߍ߲ ߠߎ߬ ߖߊ߬ߛߏ߬ߣߍ߲߫߸ ߊ߬ ߟߊ߫ ߡߐ߱ ߘߏ߫ ߟߎ߫ ߛߋ߲߬ ߦߴߏ߬ ߞߏ ߘߐ߫߸ ߞߏ߫ ߊ߬ ߘߌߣߊ߬ ߏ߬ <<ߡߍ߲ߞߊ߲>> ߘߏ߫ ߟߎ߫ ߦߌ߬ߘߊ߬ ߥߊ߯ߕߌ߫ ߣߊ߬ߕߐ ߟߎ߬ ߘߐ߫ <<ߘߊ߬ߟߎ>> ߘߌ߫.
ߊ߬ ߟߊ߫ ߞߎߡߊ ߣߌ߲߬ ߘߐ߫߸ ߊ߬ ߓߘߊ߫ ߖߡߊ߬ߣߊ ߞߎ߲߬ߠߊ߬ߛߌ߮ ߟߎ߬ ߡߊߝߌ߲߬ ߝߋߝߋ߫߸ ߞߵߊ߬ ߦߌ߬ߘߊ߬ ߞߏ߫ ߘߐ߬ߕߊߡߌ߲ ߞߊ߲ߕߌ߮ ߖߊ߬ߞߊ߬ߙߏ߬ߕߐ߬ ߘߐ߲ߘߐ߲ ߠߋ߬߸ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫، ߋߟߌ߫ ߞߡߊߣߏ߫ ߟߊ߫ ߝߐߟߌ߫ ߘߐ߫߸ ߞߏ߫ ߞߊ߬ߝߏ߬ ߞߎ߲ߕߌ߮ <<ߖߊ߲߬ߞߊ߬ߙߏ߬ߕߐ߬ ߘߐ߲ߘߐ ߠߋ߬ ߕߋ߲߬߸ ߊ߬ ߕߴߊ߬ ߖߍ߬ߘߍ߫ ߞߊ߬ߟߊߡߊ߬ ߝߋߎ߫߸ ߏ߬ ߕߟߋ߬ ߘߊ߲ߘߐ ߟߋ߬ ߕߋ߲߬.>> ߊ߬ ߞߊ߲߫ ߞߏ߫ ߣߴߌ ߞߵߊ߬ ߦߋ߫ ߛߊ߲߬ ߞߎߘߊ ߓߋߟߋ߲ߠߊ߫ ߡߊ߫ ߞߍ߫߸ ߏ߬ ߞߎ߲߭ ߞߍߣߍ߲߫ ߖߊ߲߬ߞߊߙߏ ߢߌ߲߬ ߠߋ߬ ߘߌ߫، ߊ߬ ߞߊ߲߫ ߝߣߊ߫߸ ߞߏ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊߡߌߣߌ߲ ߡߐ߱ ߘߏ߫ ߟߎ߫ ߖߍ߬ߘߍ ߕߎ߲߬ ߦߴߊ߬ ߝߍ߬߸ ߞߊ߬ ߞߊ߲ߕߌ߮ <<ߟߊ߬ߡߌ߲߬ ߓߌ߲߬ߘߌߓߊ߲߬ߘߊ߲>> ߠߊ߫߸ ߛߴߊ߬ ߘߌ߫ ߛߋ߫ ߓߐ߫ ߟߊ߫ ߢߊ ߡߍ߲ ߡߊ߬ ߞߊ߬ ߘߏ߫ ߝߐ߫، ߓߊ߬ߙߌ߬߸ ߝߊ߲߬ߝߘߊ ߏ߬ ߡߊ߫ ߓߍ߲߬، ߊ߬ ߞߊ߲߫ ߞߏ߫ ߘߎ߲߬ߓߎߦߊ߬ ߡߏ߬ߛߏ ߟߋ߬ ߡߊ߫ ߛߐ߲߬ ߏ߬ ߡߊ߬ ߝߋߝߋ߫.
ߘߐ߲߬ߞߟߌ߬ߟߊ߬ߟߊ ߞߊ߲߫ ߞߏ߫ ߓߊ߬ߟߊ ߛߊ߬ߡߎߙߊ߬ ߣߌ߫ ߖߌ߯ߓߊ ߖߊ߬ߞߌ߬ߕߋ߫߸ ߖߡߊ߬ߣߊ ߦߋ߫ ߡߐ߰ ߝߌ߬ߟߊ ߏ߬ ߟߎ߫ ߟߋ߬ ߓߟߏ߫، ߊ߬ ߞߊ߲߫ ߞߏ߫ ߕߋ߲߭ߕߋ߲߭ ߣߌ߲߬ ߘߐ߫ <<ߞߊ߲ߕߌ߯ ߕߍ߫ ߖߌ߬ߣߍ߫ ߞߎ߲߬ߠߊ߫ ߕߋ߲߬>>߸ ߞߏ߫ ߖߡߊ߬ߣߊ ߦߋ߫ <<ߖߡߊ߬ ߜߍ߲߬ߛߍ߲߬ߞߍ߬ߙߍ߲߬ߣߍ߲߫>> ߠߋ߬ ߕߊ߫ ߓߟߏ߫ ߡߊ߬ ߕߋ߲߬߸ ߓߊ߬ߙߵߊ߬ ߕߍ߫ ߡߐ߰ ߓߟߏ߫߸ ߡߍ߲ ߠߊߛߌ߰ߣߍ߲߫ ߖߡߊ߬ߣߊ ߞߊ߲ߕߌ߯ߦߊ ߟߊ߫.
ߋߟߌ߫ ߞߡߊߣߏ߫ ߞߵߊ߬ ߞߊ߲ߠߊߘߌ߫ ߖߌ߬ߣߍ߫ ߣߊ߲߬ߕߌ߮ ߟߎ߫ ߡߊ߬߸ ߞߏ߫ ߊ߬ߟߎ߬ ߦߋ߫ ߣߊ߬ ߖߏߣߊ߫، ߊ߬ ߟߊ߫ ߞߎߡߊ߫ ߘߐ߫߸ ߊ߬ߟߎ߬ ߦߋ߫ ߣߊ߬ <<ߞߊ߲ߠߊߓߌߟߊ ߘߌ߫ ߖߡߊ߬ߣߊ߬ߘߋ߲ ߠߎ߫ ߡߊ߬.>> ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߞߙߎߝߊߟߌ ߣߌ߫ ߥߙߎߞߌ ߘߍ߬ߘߊ߫ ߝߊ߬ߛߏ߬ߟߊ߬ߞߊ (ߞ.ߥ.ߘ.ߝ) ߛߌ߲߬ߝߏ߲ ߠߎ߬ ߦߋ߫ ߕߡߊ߬ߖߌ ߓߐ߫ ߊ߬ߟߎ߫ ߖߘߍ߬ ߘߐ߫߸ ߞߵߊ߬ ߝߐ߫ ߞߏ߫ ߊ߬ߟߎ߬ ߘߌ߫߬ ߛߋ߫ ߝߊ߲߬ߞߊ ߟߊߕߊ߬ߡߌ߲߬ ߠߊ߫ ߢߐ߲߮ ߡߊ߬ ߦߋ߲߬، ߓߊߏ߬߸ ߟߊߒߠߦߊ ߡߍ߲ ߟߊ߫ ߘߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߐ߫ ߂߀߂߁ ߞߊ߬ߝߏ߬ ߖߊߛߏ߲ ߝߍ߬߸ ߏ߬ ߕߴߊ߬ ߕߐ߭ ߢߌ߲߬ ߠߎ߬ ߛߌ߫ ߘߐ߫.
ߊ߬ ߟߊ߫ ߖߌ߬ߦߊ߬ߖߟߎ ߣߌ߲߬ ߦߋ߫ ߝߌߙߌ߲ߝߌߙߌ߲ ߞߊ߲߬ ߘߍ߬ߞߙߏߝߏ ߟߎ߫ ߞߊ߲߬ ߕߎ߬ߡߊ ߡߍ߲ ߠߊ߫ ߣߌ߲߬߸ ߖߌ߬ߣߍ߫ ߝߊ߰ߡߊ ߟߎ߬ ߡߊ߫ ߝߏߦߌ߬ ߝߐ߫ ߊ߬ ߡߙߌߦߊ ߞߊ߲߬ ߡߎߣߎ߲߬، ߊ߬ ߣߐ߬ ߡߊ߬ߝߌ߲߬ߠߌ߲ ߡߍ߲ ߞߍ߫ ߟߊ߫ ߣߌ߲߬߸ ߡߐ߰ ߜߘߍ߫ ߝߣߊ߫ ߡߊ߫ ߛߐ߬ߘߐ߲߬ ߡߎߣߎ߲߬ ߡߍ߲ ߣߐ߬ ߊ߬ ߟߊߛߙߋߦߊ߫ ߟߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.