ߞߊ߬ߦߌ߯ ߂߀߂߁ ߕߎߟߊߝߌ߲ ߕߟߋ߬ ߅ ߡߊ߬߸ ߖߌ߬ߣߍ߫ ߖߡߊ߬ߣߊ ߘߏ߲߬ ߘߊ߫ ߘߐ߬ߕߊߡߌ߲ ߘߐ߫߸ ߡߍ߲ ߢߍߡߌ߬ߣߊ߬ߣߍ߲߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߟߏ߫، ߊ߬ ߓߘߊ߫ ߖߡߊ߬ߣߊ ߓߊߛߌ߰ ߓߘߍ߬ߓߘߍ߬ߟߌ߬ ߞߏ ߡߊ߬ߝߊ߲ ߝߍ߬߸ ߞߊ߬ ߦߙߎ߬ߞߎ߬ߦߙߎߞߎ ߞߟߍ߬߸ ߞߊ߬ ߖߡߊ߬ߣߊ ߟߊߗߋ߲߰ߧߊ߫ ߟߐ߬ߟߌ ߘߏ߫ ߟߎ߫ ߟߊ߫، ߊ߬ ߟߊ߫ ߛߊ߲߬ ߣߊ߯ߣߌ߲ ߣߌ߲߬ ߞߣߐ߫߸ ߊ߬ ߓߘߊ߫ ߛߋ߫ ߓߊ߯ߙߊ߫ ߛߌߦߊߡߊ߲߫ ߞߍ߫ ߟߊ߫߸ ߡߍ߲ ߠߎ߬ ߕߍ߫ ߞߣߐߘߌߡߌ߲߫ ߘߌ߫߸ ߝߏ߫ ߢߊߘߌߡߌ߲.
߂߀߂߁ ߕߎߟߊߝߌ߲ ߕߟߋ߬ ߅ ߟߋ߬ ߡߊ߬߸ ߕߎ߬ߡߊ ߡߍ߲ ߠߊ߫߸ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߝߊߙߌ߲ ߘߌ߫߸ ߊ߬ߟߋ ߟߋ߬ ߕߍ߬ߘߍ߫ ߝߊ߲߬ߞߊ߬ ߓߟߏߡߊߞߊ߬ߣߍ߲ ߠߎ߬ ߡߙߊ߬ߓߊ߮ ߘߌ߫ ߥߊ߯ߕߌ ߏ߬ ߟߊ߫، ߏ߬ ߟߏ߲ ߠߋ߬߸ ߊ߬ ߞߊ߬ ߞߊ߲ߕߌ߯ ߞߊ߬ߙߊ߲߬ߝߊ ߊߟߌߝߊ߫ ߞߐ߲ߘߍ߫ ߟߊߥߟߏ߫߸ ߞߵߏ߬ ߟߊ߫ ߡߙߊ߬ߞߊ߲ ߘߊߝߘߌ߫ ߞߎߜߋ߫، ߊ߬ ߟߊ߫ ߞߎߡߊ߫ ߝߟߐߝߟߐ ߞߍ߫ ߘߊ߫ ߡߍ߲ ߘߌ߫߸ ߞߏ߫ ߊ߬ ߘߌ߫ <<ߜߘߌߛߌ߯ߟߌ>> ߘߐ߬ߕߊߡߌ߲ ߛߌ߰ ߛߋ߲߬ߠߊ߫߸ ߡߍ߲ ߘߌ߫ ߖߌ߬ߣߍ߫ ߖߡߊ߬ߣߊ ߡߊߦߟߍ߬ߡߊ߲߬، ߒ߬ߓߊ߬߸ ߞߵߊ߬ ߕߊ߬ ߏ߬ ߡߊ߬ ߞߵߊ߬ ߛߌ߰ ߂߀߂߅ ߞߏߟߌ߲ߞߏߟߌ߲ ߕߟߋ߬ ߃߁ ߠߊ߫߸ ߞߎ߲߬ߠߊ߬ߛߌ߮ ߓߘߊ߫ ߞߏ ߡߍ߲ ߠߎ߬ ߞߍ߫ ߘߐ߬ߕߊߡߌ߲ ߓߊ߯ߙߊ ߘߐ߫ ߖߡߊ߬ߣߊ ߟߊߥߙߎߞߌ ߘߊߞߎ߲ ߘߐ߫: ߓߘߍ߬ߓߘߍ߬ߟߌ ߓߘߊ߫ ߓߊߛߌ߰߸ ߡߊ߬ߙߊ ߞߍߢߊ ߓߘߊ߫ ߡߊߝߊ߬ߟߋ߲߬߸ ߡߊ߬ߡߙߊ߬ߟߌ ߓߘߊ߫ ߢߊߞߎߘߦߊ߫߸ ߣߊ߲߬ߝߟߏ ߓߘߊ߫ ߘߏ߲߬ ߟߐ߬ߟߌ߬ ߞߏ ߟߎ߬ ߘߐ߫߸ ߟߊ߬ߥߟߏ߬ߟߌ ߣߌ߫ ߕߍߓߊ߯ߦߊ ߟߎ߬ ߓߘߊ߫ ߝߊ߲߬ߞߊߘߏ߲߬.
ߞߊ߬ߦߌ߯ ߞߊ߬ߝߏ߬ ߖߊߛߏ߲ ߞߊߙߏ߫ ߝߟߐ ߟߋ߬ ߡߊ߬߸ ߞߙߎߝߊߟߌ ߣߌ߫ ߥߙߎߞߌ ߘߍ߬ߘߊ߫ ߝߊ߬ߛߏ߬ߟߊ߬ߞߊ (ߞߥߘߝ) ߞߵߊ߬ ߖߌߖߊ߬ ߡߍ߲ ߞߊ߲߬߸ ߏ߬ ߟߋ ߓߘߍ߬ߓߘߍ߬ߟߌ ߓߊ߱ ߡߊߝߊ߱ ߘߌ߫، ߞߊ߬ߕߎ߲߯߸ ߊ߬ ߛߐ߰ ߘߊ߫ ߛߌ߰ߞߊ߬ߝߐ ߡߊ߬ ߏ߬ ߟߋ ߘߐ߫߸ ߞߊ߬ ߖߡߊ߬ߣߊ ߓߟߏ ߟߊ߫ ߢߐ߲߮ ߞߊ߲߬، ߊ߬ ߞߊ߬ ߜߋ߬ߟߎ߲߬ߠߌ߲ ߥߛߊ߬ߓߊ߰ߦߊ ߟߊߘߊ߲߫߸ ߡߍ߲ ߠߎ߬ ߘߌ߫ ߘߊߘߐߖߊߥߏ ߟߎ߬ ߡߊߛߊ߲߬ߛߊ߲߬ ߞߏߢߊ߬߸ ߛߊ߫ ߜߐ߬ߛߐ߲߬ߞߐ ߘߌ߫ ߡߊߕߊ߲߬ߞߊ߬، ߞߏ ߟߎ߬ ߘߐߛߎߡߊ ߛߌߟߊ߫ ߞߋߟߋ߲ ߏ߬ ߟߋ ߞߊ߲߬߸ ߊ߬ߟߎ߫ ߞߵߊ߬ ߝߐ߫ ߞߏ߫ ߡߍ߲ ߠߎ߬ ߦߋ߫ ߓߘߍ߬ߓߘߍ߬ߟߌ ߢߊߣߌ߲ߡߊߓߏߙߌ ߘߐ߫߸ ߏ߬ ߟߎ߬ ߦߋ߫ ߘߏ߲߬ ߖߡߊ߬ߣߊ ߞߣߐ߫، ߊ߬ߟߎ߬ ߓߊ߲߫ ߘߊ߫ ߞߵߊ߬ߟߎ߫ ߡߊ߰ߦߊ߬ ߝߣߊ߫߸ ߝߏ߫ ߞߊ߬ߙߊ߲߬ߝߊ ߊߟߌߝߊ߫ ߞߐ߲ߘߍ߫ ߛߋ߫ ߘߊ߫ ߓߐ߫ ߟߊ߫ ߖߡߊ߬ߣߊ ߞߣߐ߫߸ ߞߊ߬ ߥߴߊ߬ ߘߊ߲ߘߊ߫ ߞߊ߲ߡߊ߬ ߞߐߞߊ߲߬߸ ߏ߬ ߞߵߊ߬ ߦߌ߬ߘߊ߬ ߓߍ߯ ߟߊ߫ ߞߏ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߴߊ߬ ߟߊ߫ ߖߊ߬ߡߊ ߦߋ߫ ߖߡߊ߬ߣߊ ߟߊ߫ ߖߛߎ߬ߛߎߡߊ ߟߋ߬ ߝߍ߬، ߊ߬ߟߎ߫ ߞߊ߬ ߛߌ߰ߞߊ߲߬ ߞߎ߬ߘߊ߬ ߞߏ ߝߐ߫߸ ߡߍ߲ ߠߊߘߌ߬ߢߍ߬ ߘߊ߫ ߂߀߂߅ ߟߊ߫߸ ߞߊ߬ ߓߊ߲߫ ߞߊ߬ ߢߣߊߕߊߟߌ ߕߎ߬ߡߊ߬ߘߊ ߟߊߕߍ߰߸ ߂߀߂߅ ߞߏߟߌ߲ߞߏߟߌ߲ ߕߋ߬ߟߋ߫ ߂߈߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߴߊ߬ ߝߍ߬ ߟߋ߬ ߡߎ߬ߕߎ߲߬ ߝߋߎ߫߸ ߖߡߊ߬ߣߊ ߦߋ߫ ߟߊߕߊ߬ߡߌ߲߫ ߣߊ߲߬ߒ߬ߕߊ߲ ߠߎ߬ ߡߊ߬߸ ߞߊ߬ ߘߏ߲߬ ߓߍ߯ߦߊ ߞߣߐ߫.
ߞߥߘߝ ߟߊ߫ ߓߊ߯ߙߊ߫ ߝߟߐ ߘߏ߫ ߞߍ߫ ߘߊ߫ ߡߍ߲ ߘߌ߫߸ ߏ߬ ߟߋ ߞߍ߫ ߘߊ߫ ߖߡߊ߬ߣߊ ߦߌߟߡߊߦߊߟߌ ߘߌ߫، ߊ߬ߟߎ߫ ߞߊ߬ ߝߘߏ߬ߓߊ߬ ߗߋߘߊ ߟߎ߬ ߛߊߣߌ߲ߧߊ߫߸ ߟߐ߬ߘߎ߰ ߘߐ߬ߞߏ߬ߟߏ߲߬ ߞߏ ߓߊ߲߫ ߘߊ߫߸ ߡߐ߰ ߞߋߟߋ߲ ߡߍ߲ ߠߎ߬ ߕߍ߬ߘߍ߫ ߛߊ߬ߙߊ߫ ߝߌ߬ߟߊ߫ ߕߊ߬ ߟߊ߫߸ ߏ߬ ߓߊ߲߫ ߘߊ߫ ߖߡߊ߬ߣߊ ߞߣߐ߫ ߝߋߝߋ߫، ߂߀߂߂ ߟߊ߫߸ ߗߋߘߊߕߌ߯ ߁߁߇ ߀߀߀ ߡߍ߲ ߕߍ߬ߘߍ߫ ߖߡߊ߬ߣߊ ߞߣߐ߫߸ ߏ߬ ߛߊߣߌ߲ߧߊ߫ ߘߊ߫ ߞߵߊ߬ ߕߏ߫ ߁߀߁ ߀߀߀ ߢߐ߲߰ ߡߊ߬، ߏ߬ ߞߍ߫ ߘߊ߫ ߕߙߎ߬ ߘߌ߫߸ ߞߎ߲߬ߠߊ߬ߛߌ߮ ߛߋ߫ ߘߊ߫ ߕߐ߬ߣߐ ߘߏ߫ ߛߐ߬ߘߐ߲߬ ߠߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߊߞߎ߲ ߘߐ߫߸ ߡߍ߲ ߥߊߣߍ߲߫ ߝߏ߯ ߖߌ߬ߣߍ߬ ߕߊߡߊ߲ ߥߟߎ߬ߡߊ߬ ߃߂، ߛߊߣߌ߲ߧߊ߬ߟߌ ߏ߬ ߞߍ߫ ߘߊ߫ ߕߙߎ߬ ߘߌ߫߸ ߣߊ߲߬ߕߌ߰ ߛߌߦߊߡߊ߲߫ ߟߊߣߡߐ߬ ߘߊ߫߸ ߕߐ߲ߓߟߏߡߊ ߟߎ߬ ߘߐ߫ ߓߊ߬߸ ߊ߬ ߣߌ߫ ߤߊߟߌ߬ ߕߊ߬ߡߌ߲߬ߘߊ߬ߕߌ߮ ߟߎ߬ ߘߐ߫߸ ߝߏ߫ ߡߊ߬ߡߙߊ߬ߟߌ߬ߘߊ ߟߎ߬ ߟߛߊߣߌ߲ߧߊ߫ ߘߊ߫߸ ߞߊ߬ ߘߋ߲ߡߌߛߍ߲ ߛߌߦߊߦߊ߫ ߦߙߐ ߟߎ߬ ߘߐ߫، ߊ߬ߟߎ߬ ߓߊ߲߫ ߘߊ߫ ߞߊ߬ ߖߡߊ߬ߣߊ ߛߏ߬ߙߌ߬ߡߊ߬ߘߋ߲ ߠߎ߬ ߞߍ߫ ߛߏ߬ߙߌ߬ߡߊ߬ߘߋ߲߬ߧߊ ߢߊߟߐ߲ߓߊ߮ ߟߎ߬ ߘߌ߫.
ߦߙߎ߬ߞߎ߬ߦߙߎߞߎ ߞߍ߬ߟߍ ߘߊߞߎ߲ ߘߐ߫߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߣߊ߲߬ߝߟߏ߬ ߞߏ ߣߌ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߞߎ߬ߕߊ߬ ߞߏ ߟߎ߬ ߟߊߕߐ߲ ߞߕߌߖߌ߲ (ߞߙߌߦߍߝ) ߟߊߘߊ߲߫߸ ߞߊ߬ ߣߊ߲߬ߝߟߏ߬ ߖߊ߬ߛߌ߬ߟߊ ߟߎ߬ ߣߌ߫ ߖߘߍ߬ ߟߊ߬ߓߣߊ߬ߦߊ߬ߟߊ ߟߎ߬ ߣߌ߫ ߜߍߟߊߜߍ ߞߟߍ߬، ߊ߬ ߡߊ߫ ߘߊ߲߬ ߏ߬ ߘߐߙߐ߲߫ ߡߊ߬ ߘߋ߬߸ ߞߵߊ߬ ߟߊߥߟߌ߬ ߞߙߌߦߍߝ ߡߊߘߍ߬ߡߍ߲ ߡߊ߬߸ ߊ߬ ߞߊ߬ ߛߌ߲߬ߝߏ߲߬ߘߊ߬ ߜߘߍ߫ ߟߊߘߊ߲߫߸ ߞߏ߫ ߓߟߏߝߋ߲߫ ߡߌ߬ߣߊ߬ߣߍ߲ ߠߎ߬ ߟߊߘߍ߭ ߣߴߊ߬ߟߎ߬ ߡߊߡߊ߬ߙߊ ߖߋ߬ߕߌ߰ߘߊ، ߛߌ߲߬ߝߏ߲߬ߘߊ߫ ߝߌ߬ߟߊ ߏ߬ ߟߎ߫ ߞߊ߬ ߓߊ߯ߙߊ ߘߊߡߌ߬ߣߊ߬߸ ߞߵߊ߬ߟߎ߬ ߢߊ ߡߊߖߌ߰ ߖߡߊ߬ߣߊ ߡߙߊ߬ߓߊ߰ ߞߘߐ ߟߎ߬ ߟߊ߫ ߞߏ ߞߘߐ߫، ߏ߬ ߞߍ߫ ߘߊ߫ ߕߙߎ߬ ߘߌ߫߸ ߡߍ߲ ߠߎ߬ ߦߋ߫ ߖߡߊ߬ߣߊ ߞߎ߲߬ߠߊ߫ ߕߋ߲߬߸ ߞߵߏ߬ ߟߎ߬ ߝߣߊ߫ ߦߟߌߓߌ߬ߟߊ߬ ߞߏ߫ ߖߊ߰ ߣߴߌ ߞߊ߬ ߕߌߢߍߟߌ ߞߍ߫߸ ߣߴߌ ߕߴߦߋ߲߬ ߟߏ߲ ߡߍ߲߸ ߌ ߘߌ߫ ߞߕߌ߫، ߒ߬ߓߊ߬߸ ߞߙߌߦߍߝ ߟߊߘߊ߲߸ ߊ߬ ߣߌ߫ ߖߡߊ߬ߣߊ ߟߊ߫ ߝߛߎߞߎ ߞߏߢߊ ߟߎ߬ ߟߊߜߍ ߞߍ߫ ߘߊ߫ ߕߙߎ߬ ߘߌ߫߸ ߞߊ߬ ߖߌ߬ߣߍ߬ ߦߋߝߊߘߌ ߡߊߦߟߍ߬ߡߊ߲߬ ߞߐߞߊ߲߬، ߞߊ߬ߕߎ߲߯߸ ߡߊ߲߬ߕߏ߲߬ߕߍ߬ ߛߎߋߛߎߋߦߊ (Transparency International) ߟߊ߫ ߝߐߟߌ߫ ߘߐ߫: ߖߌ߬ߣߍ߫ ߞߊ߬ ߕߏ߲ߘߋ߫ ߂߈ ߛߐ߬ߘߐ߲߫ ߁߀߀ ߘߐ߫߸ ߞߵߊ߬ ߞߍ߫ ߘߎߢߊ߫ ߕߋߟߋ߲߫ ߖߡߊߣߊ ߁߃߃߲ ߘߌ߫ ߁߈߀ ߘߐ߫ ߂߀߂߄ ߠߊ߫، ߞߵߊ߬ ߛߐ߬ߘߐ߲߬ ߂߀߂߃ ߟߊ߫߸ ߊ߬ ߟߊ߫ ߕߏ߲ߘߋ ߕߍ߬ߘߍ߫ ߂߆ ߟߋ߬ ߘߐ߫ (߁߄߁)߸ ߊ߬ ߕߘߍ߬ ߂߅ ߟߋ߬ ߝߣߊ߫ ߘߐ߫ (߁߄߇) ߂߀߂߂ ߟߊ߫.
ߞߎ߲߬ߠߊ߬ߛߌ߮ ߞߊ߬ ߝߙߍ߬ ߞߍ߫ ߝߣߊ߫߸ ߞߊ߬ ߡߊ߬ߡߙߊ߬ߟߌ ߢߊߞߎߘߦߊ߫߸ ߞߵߊ߬ߟߎ߬ ߞߍ߫ ߢߎߡߍߙߋ߲ߡߊ ߟߎ߬ ߘߌ߫، ߞߎ߲߬ߠߊ߬ߛߌ߮ ߟߊ߫ ߝߘߏ߬ߓߊ߬ ߞߟߊ߬ߕߌ߮ ߟߊ߫ ߓߋߟߋ߲ߠߊ ߘߐ߫߸ ߢߊߞߎߘߦߊߟߌ ߏ߬ ߞߊ߬ ߕߐ߬ߣߐ ߟߊߘߏ߲߬ ߖߡߊ߬ߣߊ ߞߎ߲߬، ߊ߬ ߞߍ߫ ߘߊ߫ ߕߙߎ߬ ߘߌ߫ ߝߣߊ߫߸ ߖߐ߰ߣߍ ߟߎ߬ ߛߋ߫ ߘߊ߫ ߡߊߡߙߊ߬ ߟߊ߫ ߞߎ߲߬ߠߊ߬ߛߌ߮ ߓߟߏ߫ ߊ߬ ߢߊ ߡߊ߬، ߞߏ ߟߎ߬ ߞߍ ߢߎߡߍߙߋ߲ߡߊ ߘߌ߫߸ ߏ߬ ߕߊ߬ߡߌ߲߬ ߘߊ߫ ߕߋߟߋ߲ ߣߌ߫ ߜߍߦߊ ߝߊ߲߬ߞߊ ߟߊߥߙߊ߬ ߟߊ߫، ߖߡߊ߬ߣߊ ߟߊ߫ ߝߘߏ߬ߓߊ߬ ߛߐߘߐ߲ ߛߌߟߊ ߝߍ߬߸ ߖߌ߬ߣߍ߬ ߖߌ߬ߣߍ߬ ߦߋ߫ ߕߊ߬ߡߌ߲߬ ߠߊ߫ ߦߟߍ߬ ߟߊ߫ ߟߋ߬ ߕߎ߲߫، ߓߊߏ߬߸ ߔߌߓ ߕߍ߬ߘߍ߫ %߅،߅ ߟߋ߬ ߘߐ߫ ߂߀߂߂ ߟߊ߫߸ ߞߊ߬ ߞߍ߫ %߅،߇ ߘߌ߫ ߂߀߂߄ ߠߊ߫، ߊ߬ ߞߍߣߍ߲߫ ߦߏ߫ ߊ߬ ߦߋ߫ %߆،߅ ߟߋ߬ ߘߐ߫ ߂߀߂߅ ߢߌ߲߬ ߠߊ߫، ߓߘߍ߬ ߕߍߣߵߊ߬ ߖߊ߲߬ ߠߊ߫ %߁߀ ߠߊ߫ ߂߀߂߆ ߣߌ߫ ߂߀߂߇ ߟߊ߫߸ ߘߊ߬ߡߊ߲߬ ߞߏ ߟߊ߫ ߥߙߎߞߌ ߛߌߟߊ ߝߍ߬، ߝߣߊ߫߸ ߖߌ߬ߣߍ߬ ߛߋ߫ ߘߴߊ߬ ߘߐߖߊ߬ ߟߊ߫߸ ߟߊ߬ߖߏ߰ߙߏ߬ߟߌ ߖߌ߰ ߘߊ߫ %߉ ߞߘߐ߫߸ ߖߌ߬ߣߍ߬ ߕߊߡߊ߲ ߛߋ߫ ߘߴߊ߬ ߟߐ߬ ߟߊ߫ ߈߅߀߀ ߘߐ߫ ߊߡߙߌߞߌ߬ ߘߟߊ߫ ߁ ߣߊ߰ߟߊ߫، ߞߏ߲߬ߘߏ߬ߘߐ ߡߊߞߊ߬ߝߏ߬ ߘߊ߫ ߕߣߐ߬ ߞߏ ߛߌߟߊ ߝߍ߬߸ ߞߊ߬ ߕߊ߬ߡߌ߲߬ ߊߘߡߊߦߊ ߓߘߍ߬ߓߘߍ߬ߟߌ ߞߣߐ ߘߐߥߙߊ߬ ߟߊ߫.
ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߘߐ߬ߕߊߡߌ߲ ߞߎ߲߬ߕߊ߮ ߞߣߐ߫߸ ߊ߬ ߣߊ߲߬ߝߟߏ߬ ߛߌߦߊߡߊ߲߫ ߘߏ߲߬ ߛߌߟߊ߫ ߞߏ ߘߟߊ߫، ߘߐ߬ߕߊߡߌ߲ ߠߊ߫ ߢߣߊߕߊߟߌ ߢߍߥߟߊ ߘߐ߫߸ ߛߌߟߊ ߞߎߘߍ߫ ߂ ߂߅߀ ߛߋ߫ ߘߊ߫ ߟߊ߫ ߟߊ߫ ߂߀߂߁ ߣߌ߫ ߂߀߂߅ ߕߍߟߊ ߘߐ߫، ߞߐߣߊߞߙߌ߫ ߦߋߢߊ ߡߊߝߊ߬ߟߋ߲߬ ߘߊ߫߸ ߞߊ߬ ߝߊ߬ߟߋ߲߬ߕߍ ߟߎ߬ ߟߐ߬، ߓߊ߲߬ߓߋߕߏ߬ ߝߊ߬ߟߋ߲߬ߕߍ ߓߌ߬ߟߊ߬ ߘߊ߫ ߖߊ߬ߡߊ ߛߊ߬ߥߏ߬ ߘߐ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߟߏ߫ ߂߀߂߅ ߣߍߣߍߓߊ ߟߊ߫߸ ߏ߬ ߓߍ߯ ߦߴߊ߬ ߟߊ߫ ߛߌߟߊ߫ ߘߐߓߍ߲ ߝߊ߲߬ߝߘߊ ߟߋ߬ ߘߌ߫، ߝߊ߬ߟߋ߲߬ߕߍ ߏ߬ ߘߏ߲߬ ߝߣߊ߫ ߟߐ߬ߣߍ߲߬ ߢߊ ߡߍ߲ ߡߊ߬߸ ߓߍ߯ ߢߊ߯ ߏ߬ ߟߊ߫ ߥߍ߫، ߏ߬ ߖߊ߬ߕߋ߬ߘߐ߬ߛߌ߮ ߣߊ߲߬ߝߟߏ߬ߦߊ ߥߊ߫ ߘߊ߫ ߟߋ߬ ߤߊ߲߯ ߖߌ߬ߣߍ߬ ߕߊߡߊ߲ ߥߟߎ߬ߡߊ߫ ߃߄߀߸ ߡߍ߲ ߓߐ߫ ߘߊ߫ ߞߏߥߍߕ ߡߊߣߊ߲ߞߎ߲ߘߊ ߘߏ߫ ߓߟߏ߫߸ ߊ߬ ߓߊ߯ߙߊ ߞߍ߫ ߘߊ߫ ߛߌߣߏߤߌߘߙߏ ߟߋ߬ ߓߟߏ߫߸ ߞߊ߬ ߡߐ߱ ߟߎ߬ ߟߊ߫ ߖߌ߰ߣߍ߬ߦߟߍ ߟߊߣߐ߰ߦߊ߬ ߞߐߣߊߞߙߌ߫ ߞߣߐ߫߸ ߞߊ߬ ߕߊ߬ߡߌ߲߬ ߛߏ ߟߊߗߋ߲߰ߧߊ߬ ߟߊ߫.
ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߘߐ߬ߕߊߡߌ߲ ߘߐ߫߸ ߛߌߡߊ߲ߘߎ߯ ߂߀߄߀ ߢߍߥߟߊ ߛߌ߰ ߘߊ߫ ߛߋ߲߬ߠߊ߫߸ ߏ߬ ߦߋ߫ ߘߊ߬ߡߊ߲߬ ߞߏ ߖߊ߬ߕߋ߬ߘߐ߬ߛߌ߰ߓߊ߫ ߟߋ߬ ߘߌ߫، ߛߌߡߊ߲ߘߎ߯ ߞߎ߬ߙߎ ߣߌ߲߬ ߦߋ߫ ߣߍ߰ ߘߊߡߊ߲ ߠߋ߬ ߘߌ߫ (ߣߍ߱ ߞߙߌߕߌ߫ ߥߟߎ߬ߡߊ߫ ߂ ߘߌ߫ ߛߐ߬ߘߐ߲߬ ߡߍ߲ ߘߐ߫)߸ ߡߍ߲ ߓߊ߯ߙߊ ߞߍ߫ ߘߊ߫ ߕߙߎ߬ ߘߌ߫ ߞߊ߬ ߣߍ߰ߛߌߟߊ ߘߏ߫ ߟߊ߫ ߡߏ߬ߙߌ߬ߓߦߊ߬ ߘߊ߲ߞߊ߲ ߣߌ߫ ߛߌߡߊ߲ߘߎ߯ ߕߍ߫߸ ߞߎߘߍ߫ ߆߅߀ ߢߐ߲߰ ߠߊ߫߸ ߡߍ߲ ߖߐ߰ߣߍ ߥߊߣߍ߲߫ ߝߏ߯ ߘߟߊ ߥߟߎ߬ߡߊ߫ ߂߀، ߛߌߡߊ߲ߘߎ߯ ߓߊ߯ߙߊ ߘߊߡߌ߬ߣߊ߬ ߘߴߊ߬ ߢߊ ߖߍ߬ߘߍߖߍ߬ߘߍ ߡߊ߬ ߂߀߂߅ ߣߍߣߍߓߊ ߟߋ߬ ߟߊ߫، ߊ߬ ߖߍ߬ߘߍ߸ ߜ߭ߊߓߐ߲߫ ߞߊ߲ߕߌ߮ ߣߌ߫ ߙߎߥߊ߲ߘߊ߫ ߞߊ߲ߕߌ߮ ߓߍ߯ ߣߊ߬ ߘߊ߫ ߟߋ߬ ߏ߬ ߝߍ߬߸ ߏ߬ ߟߏ߲ ߞߍ߫ ߘߊ߫ ߛߋ߲߬ߕߊ߬ ߞߎߘߊ߫ ߟߋ߬ ߘߌ߫ ߖߌ߬ߣߍ߬ ߟߊ߫ ߛߐ߬ߘߐ߲ ߛߌߟߊ ߝߍ߬، ߊ߬ ߘߏ߲߬߸ ߛߌߡߊ߲ߘߎ߯ ߢߍߥߟߊ ߣߌ߲߬ ߘߐ߫߸ ߛߌߟߊ߫ ߓߊ߯ߙߊ ߟߎ߬ ߦߴߊ߬ ߘߐ߫߸ ߊ߬ ߓߍߣߊ߬ ߦߟߍ߬ߡߊ߲ ߠߊߘߏ߲߬ ߞߏ߫ ߛߌߦߊߡߊ߲߫ ߘߐ߫ ߖߡߊ߬ߣߊ ߞߣߐ߫.
ߞߍ߲ߘߍߦߊ ߛߌߟߊ ߝߍ߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߴߊ߬ ߟߊ߫ ߞߎ߲߬ߠߊ߬ߛߌ߮ ߞߊ߬ ߖߊ߬ߕߋ߬ߘߐ߬ߛߌ߰ ߛߌߦߊߡߊ߲߫ ߛߌ߰ ߛߋ߲߬ߠߊ߫ ߞߊ߲ߘߍߦߊ ߟߊߕߊ߲߬ߞߊ ߛߌߟߊ ߞߊ߲߬، ߊ߬ߟߎ߫ ߞߊ߬ ߘߐ߲ߞߊ߬ ߟߊߞߎߘߦߊ߫ ߂߀߂߂ ߘߓߊ߬ߓߌߟߊ ߟߊ߫߸ ߛߌ߬ߟߊ߬ߡߊ ߟߎ߬ ߟߊ߫ ߥߙߎߞߌ ߜߍߓߏ߲ ߠߊ߫ ߘߍ߬ߡߍ߲ ߞߣߐߡߊ߬، ߘߐ߲ߞߊ ߟߊߞߎߘߦߊ߫ ߘߊ߫ ߞߊ߬߸ ߞߊ߬ ߓߊ߯ߙߊ߫ ߞߍߘߊ߫ ߃߁ ߓߌ߬ߟߴߊ߬ ߞߣߐ߫߸ ߊ߬ ߣߌ߫ ߘߐ߬ߓߛߏ߬ߟߌ߬ ߓߏ߲߫ ߁߅߸ ߖߌ߬ߦߊ߬ߣߙߌ߬ߕߊ߬ ߕߊ߲ߓߊ߲߫ ߞߋߟߋ߲߫߸ ߞߵߏ߬ ߟߊ߫ ߕߌߙߌ߲ߘߊ ߟߎ߬ ߣߌ߫ ߟߊ߫ ߦߙߐ ߟߎ߬ ߞߊ߲߬߸ ߞߊ߬ ߞߍ߲ߘߍߦߊ ߟߊߛߐ߬ߘߐ߲߬ ߦߙߐ߫ ߓߟߏߡߊߞߊ߬ߣߍ߲ ߠߎ߬ ߟߊߛߌߦߊߦߊ߫߸ ߊ߬ ߣߌ߫ ߞߊ߬ ߛߋ߫ ߓߟߏߘߐߓߍ߲߫ ߞߍ߫ ߟߊ߫ ߝߎ߬ߖߎ߰ߖߎ ߟߎ߬ ߦߋ߫، ߂߀߂߅ ߜߋߙߋ߲ߜߋߙߋ߲ߧߊ߫ ߕߊ߲ߓߊ߲ ߘߏ߫ ߟߐ߬ ߘߊ߫ ߞߐ߬ߓߊ߰ߦߊ߬߸ ߡߍ߲ ߕߐ߯ߟߊ߫ ߘߊ߫ ߟߏߙߌߦߊߣ ߘߎ߲߬ߓߎ߬ߦߊ߬ ߟߊ߫، ߏ߬ ߟߐ߬ ߘߊ߫ ߞߵߊ߬ ߞߍ߫ ߓߏ߲ߓߊ߫ ߝߌ߬ߟߊ߫ ߟߋ߬ ߘߌ߫߸ ߞߊߓߋ߫ ߝߌ߬ߟߊ߬ ߟߊ߫߸ ߝߘߏ߬ߡߊ߬ ߡߊ߬ߝߟߍ߬ߟߌ ߣߌ߫ ߓߟߏߡߞߊߟߌ، ߞߊ߬ߕߎ߲߯߸ ߘߐ߬ߓߛߏ߬ߟߌ߬ ߦߙߐ ߦߋ߫ ߦߋ߲߬߸ ߖߌ߬ߓߊ߬ߓߊ߬ߛߏ ߦߋ߫ ߦߋ߲߬߸ ߕߌߙߌ߲ߘߊ ߦߋ߫ ߦߋ߲߬߸ ߊ߬ ߣߌ߫ ߟߊ߫ ߦߙߐ ߟߎ߬، ߊ߬ ߦߋ߫ ߛߌߡߊ߲ߘߎ߯ ߂߀߄߀ ߢߍߥߟߊ ߘߏ߫ ߟߋ߬ ߘߌ߫، ߞߵߊ߬ ߟߴߊ߬ ߞߊ߲߬߸ ߘߊ߲ߘߊߛߏߓߊ߫ ߣߊ߯ߣߌ߲߫ ߟߐ߬ ߞߏ ߦߋ߫ ߛߋ߲߬ߠߊ߫߸ ߊ߬ ߣߌ߫ ߞߊ߬ߙߊ߲߬ߕߊ߫ ߗߡߍ߬ ߦߙߌߞߊ߫.
ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߖߊ߬ߡߊߙߌ ߞߣߐ߫߸ ߟߞߊ߬ߙߊ߲߬ߠߌ߲ ߞߏߕߌ߯ߘߊ ߞߊ߬ ߓߏ߲߬ߓߊ߬ ߞߍ߫ ߞߊ߬ߙߊ߲߬ ߞߏ ߟߊߥߙߎߞߌ ߘߐ߫، ߞߊ߬ߕߎ߲߯߸ ߊ߬ߟߎ߬ ߓߘߊ߫ ߞߊ߬ߙߊ߲߬ߕߊ߬ ߂ ߂߀߀ ߢߎߡߍߙߋ߲ߧߊ߫ ߞߏ ߓߌ߬ߟߊ߬ ߢߍߥߟߊ ߘߐ߫߸ ߞߊ߬ ߟߞߊ߬ߙߊ߲߬ߠߌ߲߬ߠߊ߫ ߆߀߀ ߢߐ߲߰ ߓߟߏߘߏ߲߬ ߥߟߊ߬ߝߘߍ߬ߟߋ߲ ߠߎ߬ ߟߊߓߊ߯ߙߊ߫ ߢߊ ߟߊ߫ ߟߊ߬ߞߟߏ߬ߞߟߏ߬ߟߌ ߘߊߞߎ߲ ߘߐ߫، ߊ߬ߟߎ߬ ߓߘߊ߫ ߟߊ߬ߞߐ߰ߟߌ߬ ߓߟߏߕߍ߰ߓߊߟߌ߫ ߘߏ߫ ߟߎ߫ ߛߌ߰ ߛߋ߲߬ߠߊ߬ ߞߊ߲ߞߊ߲߫߸ ߊ߬ ߣߌ߫ ߞߊ߬ ߞߊ߬ߙߊ߲߬ߓߏ߲ ߘߏ߫ ߟߎ߫ ߟߐ߬ ߞߙߎ߬ߛߊ߬ ߛߏ ߞߣߐ߫، ߞߊ߲ߕߌ߮ ߟߊ߫ ߖߊ߬ߕߋ߬ߘߐ߬ߛߌ߰ ߢߌߡߊ ߞߏߛߐ߲߬߸ ߂߀߂߅ ߞߋߟߋ߲߫ ߔߋ߫ ߟߊ߫߸ ߞߊ߬ߙߊ߲߬ߓߏ߲߫ ߅߆߆ ߟߐ߬ ߘߊ߫߸ ߞߵߊ߬ߟߎ߬ ߓߍ߯ ߞߣߐߞߍ߫ ߟߞߊ߬ߙߊ߲߬ߠߌ߲ ߘߐ߬ߛߙߋ ߟߎ߬ ߟߊ߫، ߊ߬ߟߎ߬ ߛߋ߫ ߘߊ߫ ߢߍ߲߯ ߁ ߁߃߂ ߟߐ߬ ߟߊ߫߸ ߡߍ߲ ߣߊ߲߬ߝߟߏ߬ߦߊ߬ ߘߊ߫ ߞߌߢߍ߲߫ ߜߍߓߏ߲ ߓߟߐ߫، ߊ߬ ߘߊ߲߬ ߕߴߏ߬ ߘߌ߫ ߘߋ߬߸ ߞߊ߬ߙߊ߲߬ߕߊ߬ ߓߊߖߎߟߞߊ߫ ߃߇ ߟߐ߬ ߘߊ߫߸ ߡߍ߲ ߦߙߌߞߊ ߦߋ߫ ߓߍ߲߬ ߠߊ߫ ߞߊ߬ߙߊ߲߬ߓߏ߲߫ ߁߂߀ ߡߊ߬߸ ߏ߬ ߞߍ߫ ߘߊ߫ ߖߌ߬ߣߍ߫ ߞߐ߰ߖߌ߬ߘߊ߬ߟߊ ߟߋ߬ ߘߐ߫، ߊ߬ߟߎ߫ ߞߊ߬ ߖߌ߫ ߥߙߏߝߋ߫ ߇߅ ߝߣߊ߫ ߟߐ߬. ߊ߬ߟߎ߬ ߞߊ߲߫ ߞߏ߫ ߛߌߡߊ߲ߘߎ߯ ߖߊ߬ߕߋ߬ߘߐ߬ߛߌ߮ ߣߌ߲߬ ߘߐ߫߸ ߘߋ߲ߣߍ߲ ߠ߬ߎ ߟߊ߫ ߟߐ߲ߠߌ߲߫ ߛߐߘߐ߲ ߓߍߣߊ߬ ߡߊߞߊ߬ߝߏ߬߸ ߝߏ߫ ߞߊ߬ߙߊ߲ ߓߊ߯ ߓߊ߲߫߸ ߓߊ߯ߙߊ߫ ߞߏߖߊ ߘߌ߫ ߞߟߍ߬.
ߞߎ߲߬ߠߊ߬ߛߌ߮ ߣߌ߲߬ ߡߴߊ߬ ߕߏߟߏ߲߫ ߛߍ߬ߣߍ ߟߊ߫߸ ߊ߬ߟߎ߫ ߞߵߏ߬ ߟߋ ߦߋ߫ ߓߟߏߞߏߟߏ߲ߧߊ ߞߟߍ߬ ߝߋ߲ ߘߌ߫߸ ߞߊ߬ ߓߊߟߞߏ ߟߊߣߐ߰ߦߊ߬، ߏ߬ ߟߋ ߘߐ߫߸ ߞߎ߲߬ߠߊ߬ߛߌ߮ ߣߌ߫ ߖߎ߬ߟߦߊ߬ ߓߏ߲ߘߋ߲ ߠߎ߬ ߞߊ߬ ߓߍ߲߬ߞߊ߲ ߘߏ߫ ߞߟߊ߬ߣߐ߬ߦߊ߬ ߂߀߂߄ ߠߊ߫߸ ߛߊ߫ ߖߡߊ߬ߣߊ ߘߌ߫ ߛߋ߫ ߓߊߟߏ߫ ߓߊߖߎߟߞߊ ߛߌߦߊߡߊ߲߫ ߛߐ߬ߘߐ߲߬ ߠߊ߫، ߒ߬ߓߊ߬߸ ߂߀߂߂ ߣߌ߫ ߂߀߂߃ ߟߊ߫߸ ߡߊ߬ߟߏ߬ ߟߊ߬ߛߣߍ ߖߌ߰ ߘߊ߫ %߉ ߟߊ߫߸ ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߊ߫߸ ߖߌ߬ߣߍ߫ ߖߡߊ߬ߣߊ ߟߋ߬ ߝߊߣߌ߲߫ ߛߣߍߟߓߊ ߟߎ߬ ߘߐ߫ ߝߟߐߡߊ ߘߌ߫ ߘߎߢߊ߫ ߞߣߐ߫، ߖߡߊ߬ߣߊ ߟߊ߫ ߡߊ߬ߟߏ߬ ߛߓߍ ߞߛߊߞߊ ߦߟߍ߬ ߘߊ߫ %߂߄ ߠߋ߬ ߟߊ߫ ߂߀߂߄ ߠߊ߫، ߞߎ߲߬ߠߊ߬ߛߌ߮ ߛߋ߫ ߘߴߊ߬ ߘߐߖߊ߬ ߟߊ߫߸ ߞߊ߬ ߛߌ ߞߙߌߕߌ߫ ߆ ߅߅߀ ߟߋ߬ ߘߐߕߟߊ߫، ߊ߬ߟߎ߫ ߞߊ߬ ߖߌ߬ߣߍ߬ ߕߊߡߊ߲ ߥߟߎ߬ߡߊ߫ ߂߃߄ ߝߣߊ߫ ߓߌ߬ߟߊ߫ ߛߣߍ߬ߞߍ߬ߟߊ ߟߎ߫ ߛߊ߬ߥߏ߬ ߘߐ߫ ߖߟߎ߬ߕߊ߬ ߓߟߏ ߡߊ߬، ߘߎ߰ߘߐ߬ߞߌߛߊ ߛߍ߬ߣߍ ߞߊ߬ ߝߊ߲߬ߞߊ߫ ߛߐ߬ߘߐ߲߫ ߊ߬ߟߎ߫ ߕߋ߬ߟߋ ߣߌ߲߬ ߘߐ߫߸ ߞߙߌߕߌ߫ ߅߀ ߀߀߀ ߟߋ߬ ߕߍ߬ߘߍ߫ ߛߣߍ߬ ߟߊ߫ ߛߊ߲߭ ߞߣߐ߫߸ ߏ߬ ߓߘߊ߫ ߛߋ߫ ߞߙߌߕߌ߫ ߉߅ ߀߀߀ ߘߐ߫߸ ߝߏ߫ ߊ߬ ߛߐ߲߬ߞߐ ߓߘߊ߫ ߖߌ߰، ߞߎ߲߬ߠߊ߬ߛߌ߮ ߟߊ߫ ߡߊ߬ߘߍ߬ߡߍ߲߬ߠߌ߲ ߞߊ߬ ߘߏ߫ ߓߐ߫ ߞߎ ߛߐ߲߬ߞߐ ߝߣߊ߫ ߟߊ߫، ߊ߬ߟߎ߬ ߟߊ߫ ߘߐ߬ߖߊ ߞߏߛߐ߲߬߸ ߓߊߟߞߏ ߦߴߊ߬ ߞߊ߲߬ ߞߊ߬ ߣߐ߰ߦߊ߫߸ ߛߣߍ߬ߞߍ߬ߟߊ ߟߎ߬ ߝߣߊ߫ ߟߊ߫ ߕߐ߬ߣߐ ߦߋ߫ ߕߊ߬ߡߌ߲߬ ߠߊ߫ ߥߙߊ߬ ߟߊ߫.
ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߞߊߘߊ߲߫ ߝߣߊ߫߸ ߞߊ߬ ߖߌ߬ߣߍ߬ ߣߌ߫ ߖߡߊ߬ߣߊ߬ ߛߌߦߊߡߊ߲߫ ߓߟߏߘߏ߲߬ ߢߐ߲߯ ߓߟߏ߫، ߊ߬ߟߎ߬ ߣߌ߫ ߞߏߥߍߕ ߞߵߊ߬ߟߎ߬ ߓߟߏ߫ ߘߌ߫ ߢߐ߲߯ ߡߊ߬߸ ߏ߬ ߟߋ ߞߵߏ߬ ߟߎ߫ ߟߐ߬ ߓߊ߲߬ߓߋߕߏ߬ ߝߊ߬ߟߋ߲߬ߕߍ ߣߊ߲߬ߝߟߏ ߓߐ߫ ߟߊ߫، ߊ߬ ߣߴߊ߬ߟߎ߫ ߞߊ߬ ߖߌ߬ߣߍ߬ ߡߊߘߍ߬ߡߍ߲߬ ߘߊߞߎ߲߫ ߜߘߍ߫ ߟߎ߫ ߘߐ߫߸ ߡߊ߬ߘߏ߬ߣߌ߲߬ߠߌ߲ ߕߊ߫ ߓߟߏ ߡߊ߬߸ ߖߌ߫ ߞߏ߸ ߢߎߡߍ߫ ߞߏ߸ ߞߍ߲ߘߍߦߊ ߣߌ߫ ߟߊ߬ߞߟߏ߬ߞߟߏ߬ߟߌ ߘߊߞߎ߲ ߘߐ߫، ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߴߊ߬ ߟߊ߫ ߡߐ߱ ߟߎ߬ ߛߋ߫ ߘߊ߫߸ ߡߊߣߊ߲ߞߎ߲ߕߌ߯ ߛߌߦߊߡߊ߲߫ ߞߵߊ߬ ߟߊ߫ ߟߊߒߠߦߊ ߟߊ߫ ߖߡߊ߬ߣߊ ߘߐ߫ ߘߐ߬ߕߊߡߌ߲ ߥߊ߯ߕߌ ߢߌ߲߬ ߠߊ߫، ߝߘߊ߬ߝߌ߲߬ߠߊ߬ ߕߊ߲ߓߊ߲ ߞߊ߲ߕߌ߮ ߘߏ߫ ߟߎ߫ ߟߊ߫ ߣߊ߬ߟߌ ߛߌߡߊ߲ߘߎ߯ ߖߊ߬ߕߋ߬ߘߐ߬ߛߌ߮ ߓߌ߬ߟߊ߬ ߥߊ߯ߕߌ ߟߊ߫ ߛߋ߲߬ߠߊ߫߸ ߏ߬ ߦߋ߫ ߟߊߒߠߦߊ ߕߐ߰ߡߊ߬ߛߙߋ ߘߏ߫ ߟߋ߬ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߖߌ߬ߣߍ߬ ߣߌ߫ ߖߡߊ߬ߣߊ ߟߎ߬ ߓߟߏ ߦߋ߫ ߢߐ߲߯ ߓߟߏ߫.
ߟߊ߬ߞߊ߲߬ߘߊ߬ߟߌ ߛߌߟߊ ߝߍ߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߴߊ߬ ߟߊ߫ ߞߎ߲߬ߠߊ߬ߛߌ߮ ߞߵߊ߬ߟߎ߬ ߘߐߖߊ߬ ߞߊ߬ ߖߡߊ߬ߣߊ ߟߊ߫ ߛߋߓߊ߯ߦߊ ߟߊߥߙߎߞߌ߫ ߛߏ߬ߙߌ߬ߡߊ߬ߘߋ߲߬ ߞߎ߲ߘߊ߫، ߊ߬ߟߎ߫ ߞߊ߬ ߣߊ߲߬ߕߌ߯ ߛߍ߰ߣߍ߲ ߛߌߦߊߡߊ߫ ߓߌ߬ߟߊ߬߸ ߞߵߏ߬ ߟߎ߬ ߟߊߣߡߐ߬߸ ߞߊ߬ ߘߏ߫ ߓߐ߫ ߛߙߊ߬ ߝߌ߬ߟߊ߬ ߕߊ߬ߟߊ ߟߎ߬ ߟߊ߫، ߣߊ߲߬ߕߌ߰ߘߊ ߓߍ߯ ߛߋ߫ ߘߊ߫ ߡߊߛߐ߫ ߟߊ߫ ߡߎ߬ߙߊ߲߬ ߢߣߊߡߊ ߟߎ߬ ߟߊ߫߸ ߞߵߊ߬ߟߎ߬ ߟߊ߫ ߞߏ ߟߎ߬ ߡߊߝߊ߬ߟߋ߲߬ ߝߋߎ߫، ߞߊ߬ ߘߋ߲ߡߌߛߍ߲ ߠߎ߬ߎ ߕߊ߬ ߓߊߞߍ߭߸ ߞߵߊ߬ߟߎ߬ ߦߋߝߊߘߌ ߓߍ߯ ߡߊߝߊ߬ߟߋ߲߬، ߞߵߊ߬ߟߎ߬ ߛߋߞߏߦߊ ߡߊߞߊ߬ߝߏ߬߸ ߝߏ߫ ߖߡߊ߬ߣߊ ߓߘߊ߫ ߓߊߛߌ߰.
ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߘߊ߫ ߛߋ߫ ߡߍ߲ ߞߍ߫ ߟߊ߫ ߂߀߂߁ ߣߌ߫ ߛߌߛߍ߲߬ ߕߍ ߘߐ߫߸ ߏ߬ ߝߊ߲߬ߞߊ ߓߘߊ߫ ߥߙߊ߬، ߞߊ߬ߕߎ߲߯߸ ߊ߬ ߞߍ ߡߎߣߎ߲߬ ߞߊ߬ ߖߡߊ߬ߣߊ ߓߌ߬ߟߊ߬ ߛߌߟߊ߫ ߞߋߟߋ߲߫ ߞߊ߲߬ ߓߘߍ߬ߓߘߍ߬ߟߌ ߘߊߞߎ߲ ߘߐ߫߸ ߞߊ߬ ߡߊ߲߬ߞߊ߲ ߡߊߘߐ߯ߦߊ߫߸ ߞߊ߬ ߝߎ߬ߙߎ߲߬ߞߎ߬ߟߌ߬ ߞߏ ߞߍ߫ ߛߊ߲߬ߘߊ ߘߌ߫، ߊ߬ ߓߘߊ߫ ߦߙߎ߬ߞߎ߬ߦߙߎߞߎ ߞߟߍ߬ ߝߙߍ ߟߎ߬ ߛߌ߰ ߛߋ߲߬ߠߊ߫߸ ߞߊ߬ ߓߊ߯ߙߊ߫ ߦߙߐ ߟߎ߬ ߢߊߞߎߘߦߊ߫، ߛߌߟߊ ߡߍ߲ ߓߘߊ߫ ߓߊ߯ߙߊ߫߸ ߦߙߐ߫ ߞߎߘߊ ߡߍ߲ ߠߎ߬ ߓߘߊ߫ ߟߐ߬߸ ߛߌߡߊ߲ߘߎ߯ ߞߏ ߣߌ߲߬ ߣߊ߬ߕߐ߬ ߤߙߍ ߡߍ߲ ߠߎ߬ ߘߌ߫߸ ߛߍ߬ߣߍ ߣߌ߫ ߟߊ߬ߞߟߏ߬ߞߟߏ߬ߟߌ ߓߘߊ߫ ߝߊ߲߬ߞߊߘߏ߲߬ ߢߊ ߡߍ߲ ߡߊ߬߸ ߓߍ߯ ߢߊ߯ ߏ߬ ߟߊ߫ ߓߌ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.