ߖߌ߬ߦߊ߬ߖߟߎ ߘߏ߫ ߟߋ߬ ߝߌߙߌ߲ߝߌߙߌ߲ ߞߊ߲߬ ߘߍ߬ߞߙߏߝߏ ߟߎ߫ ߞߊ߲߬ ߕߋ߲߬߸ ߡߍ߲ ߜߊ߬ߣߍ߲߫ ߒߞߏ ߛߍ߬ߘߏ߲߬ߠߊ߬ ߛߌߦߊߡߊ߲߫ ߠߊ߫ ߞߵߊ߬ߟߎ߬ ߕߙߐ߫ ߊ߬ ߢߊ ߡߊ߬، ߒ߬ߓߊ߬߸ ߛߌߟߊߓߐߛߐ߯ߣߊ߫ ߛߋ߫ ߘߊ߫ ߤߊߓߌ߫ ߛߋߞߎ߫ ߛߊ߬ߞߐ ߞߟߌ߫ ߟߊ߫߸ ߊ߬ ߞߊ߬ ߢߊߝߐߟߌ߫ ߞߟߊ߬ߟߡߊ߬ ߞߍ߫ ߞߊ߬ ߓߍ߲߬ ߊ߬ ߟߊ߫ ߞߎߡߊ߫ ߝߐߣߍ߲ ߡߊ߬.
ߖߌ߬ߦߊ߬ߖߟߎ ߣߌ߲߬ ߦߋ߫ ߘߊ߫ ߕߌߞߑߕߐߞ ߟߋ߬ ߞߊ߲߬߸ ߒߞߏ ߞߊߙߊ߲ߡߐ߯ ߗߋߘߊߕߌ߮ ߣߌ߲߬ ߦߴߊ߬ ߦߌ߬ߘߊ߬ ߟߊ߫ ߡߍ߲ ߘߐ߫߸ ߞߏ߫ ߛߏ߬ߛߏ߬ ߞߊ߲ ߠߋ߬ ߞߊ߫ ߞߊ߲߫ ߞߊ߬ ߞߍ߫ ߓߊ߬ߘߏ߬ ߞߊ߲ ߘߌ߫ ߖߌ߬ߣߍ߬ ߞߐߞߊ߲ߠߊ ߟߎ߬ ߘߐ߫، ߞߊ߬ߕߎ߲߯߸ ߞߏ߫ ߞߊ߲߫ ߠߋ߬ ߓߍ߲߬ߣߍ߲߫ ߡߌ߬ߙߌ߲߬ߘߌ ߕߎ߲ߞߊߙߊ߲ߞߋ ߟߎ߬ ߟߊ߫ ߞߎߡߊߢߐ߲߯ߦߊ ߘߐ߫ ߜߎ߲߬ߘߎ߬ ߘߊߞߎ߲ ߠߎ߬ ߘߐ߫߸ ߞߊ߲ ߡߍ߲ ߡߊ߫ <<ߓߐߕߏ߲ ߞߐߛߊ߬ߥߏ߬>>، ߊ߬ ߟߊ߫ ߛߙߊ߬ߣߎ߲ ߏ߬ ߟߋ ߡߊ߫ ߢߊߦߋ߫ ߒߞߏ ߛߍ߬ߘߏ߲߬ߠߊ ߟߎ߬ ߓߟߏ߫߸ ߊ߬ ߖߊ߬ߕߋ߬ ߘߊ߫ ߛߏ߬ߛߏ߬ ߞߊ߲ ߛߍ߬ߘߏ߲߬ߠߊ߬ ߞߎߘߊ ߣߌ߫ ߒߞߏߞߏ ߟߊߜߊ߬ߛߌ߬ߓߊ߮ ߘߌ߫ ߏ߬ ߟߋ ߘߐ߫، ߓߊߏ߬߸ ߊ߬ ߟߊ߫ ߞߎߡߊ ߞߵߊ߬ ߦߌ߬ߘߊ߫ ߟߋ߬ ߞߏ߫ ߛߏ߬ߛߏ߬ ߞߊ߲ ߠߋ߬ ߘߌ߫ ߛߋ߫ ߖߌ߬ߣߍ߬ ߞߐߦߌ߬ߘߊ߬ ߟߊ߫ ߞߐߞߊ߲ߠߊ ߟߎ߬ ߘߐ߫߸ ߝߊߦߌߘߊ߫ ߊ߬ߟߋ ߟߋ߬ ߖߌ߬ߣߍ߫ ߡߊ߲߬ߕߏ߲߬ߕߍ߬ ߞߊ߲ ߘߌ߫.
ߒ߬ߓߊ߬߸ ߛߍߝߍ߲ߘߊ ߞߵߊ߬ ߞߊ߲ߠߊߘߌ߫ ߤߊߓߌ߫ ߛߋߞߎ߫ ߛߊ߬ߞߐ ߡߊ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߡߴߊ߬ ߦߌ߬ߘߊ߬ ߟߏ߲߫ ߞߋߟߋ߲߫ ߟߏ߲߫ ߕߟߊ߫߸ ߞߏ߫ ߛߏ߬ߛߏ߬ ߞߊ߲ ߠߋ߬ ߞߊ߫ ߞߊ߲߫ ߞߊ߬ ߞߍ߫ ߞߎ߲߬ߠߊ߬ߛߌ߰ ߞߊ߲ ߘߌ߫ ߖߡߊ߬ߣߊ ߞߣߐ߫، ߓߊ߬ߙߵߊ߬ ߞߎߡߊߣߍ߲߫ ߖߌ߬ߣߍ߬ߞߊ߬ ߞߐߞߊ߲߫ ߡߐ߮ ߟߎ߫ ߟߋ߬ ߡߊ߬.
<<ߒ ߠߊ߫ ߖߌ߬ߦߊ߬ߖߟߎ ߞߍߣߍ߲߫ ߟߊ߬ߛߏ߬ߓߌ߬ߟߌ߫ ߟߋ߬ ߘߌ߫ ߊ߲ ߝߊ߬ߛߏ߬ߘߋ߲߬ߢߐ߲߯ ߕߎ߲ߞߊߙߊ߲ߞߋ ߟߎ߬ ߦߋ߫ ߘߐߙߐ߲߫߸ ߡߍ߲ ߠߎ߬ ߛߌ߰ߣߍ߲߫ ߝߊ߬ ߖߡߊߣߊ ߞߐߞߊ߲߬، ߒ ߞߏ߫ ߊ߬ߟߎ߬ ߦߋ߫ ߛߏ߬ߛߏ߬ ߞߊ߲ ߝߐ߫ ߊߟߎ߫ ߣߌ߫ ߢߐ߲߯ ߕߍ߫߸ ߞߏߛߴߊߟߎ߫ ߜߎ߲߬ߘߎ ߞߊߣߊ߬ ߓߐ߫ ߞߣߍߡߊ߬، ߊߟߎ߫ ߦߴߊߟߎ߫ ߢߐ߲߮ ߢߊߦߋ߫ ߞߊ߬ ߢߐ߲߮ ߞߐߡߊߓߌ߲ߓߌ߲߫ ߢߊ ߡߍ߲ ߡߊ߬߸ ߟߏ߲ߟߊ߲ ߠߎ߬ ߞߊߣߵߊ߬ ߢߊߦߋ߫.>> ߊ߬ ߟߊ߫ ߞߎߡߊ߫ ߝߟߐ ߟߵߏ߬ ߘߌ߫.
ߊ߬ ߟߊ߫ ߝߐߟߌ߫ ߘߐ߫߸ ߊ߬ ߣߐ߬ ߟߊ߬ߞߙߐ߬ߛߌ߬ߟߌ ߞߍ߫ ߟߊ߫ ߞߵߊ߬ ߓߍ߲߬ ߘߎߢߊ߫ ߛߌ߰ ߢߊ ߟߋ߬ ߜߎ ߡߊ߬، ߓߊߏ߬߸ ߝߘߊ߬ߝߌ߲߬ߠߊ߬ ߞߊ߲ߓߊ߲߫ ߛߌߦߊߡߊ߲߫ ߠߋ߬ ߓߍ߫߸ ߦߏ߫ ߡߊ߬ߣߌ߲߬ߞߊ߬ ߞߊ߲ ߣߌ߫ ߤߊߥߎߛߊ ߣߌ߫ ߛߎߥߊߤߟߌ ߣߌ߫ ߝߎߟߊ߫ ߞߊ߲߸ ߏ߬ ߟߎ߬ ߦߋ߫ ߞߊ߲߫ ߠߎ߫ ߟߋ߬ ߘߌ߫ ߓߌ߬ ߢߐ߲߰ ߟߏ߲߫߸ ߡߍ߲ ߠߎ߬ ߦߋ߫ ߝߐ߫ ߟߊ߫ ߝߘߊ߬ߝߌ߲߬ߠߊ߬ ߜߙߋ ߞߐߝߍ߬ ߦߙߐ߫ ߛߌߦߊߡߊ߲߫ ߣߌ߫ ߛߌߦߊ߫ ߜߘߍ ߛߌߦߊߡߊ߲߫ ߓߟߏ߫، ߏ߬ ߘߐ߫߸ ߛߏ߬ߛߏ߬ ߞߊ߲ ߡߍ߲ ߝߐߟߌ ߘߊ߲߬ߣߍ߲߫ ߖߡߊ߬ߣߊ ߞߣߐߟߊ ߘߐ߫߸ ߏ߬ ߟߋ ߘߌ߫ ߛߋ߫ ߞߍ߫ ߟߊ߫ ߜߎ߲߬ߘߎ߬ߢߐ߲߰ߦߊ߬ ߞߊ߲ ߘߌ߫ ߖߡߊ߬ߣߊ߬ߘߋ߲ ߠߎ߬ ߓߟߏ߫ ߕߎ߲ߞߊ߲ ߠߊ߫.
<<ߊ߲ ߧߴߊ߬ ߞߊ߬ߟߊߡߊ߬ ߞߏ߫ ߕߟߋ߬ߖߌ߰ߟߊ߫ ߕߐ߲ߓߟߏߡߊ ߛߌߦߊߡߊ߲߫ ߓߍ߫߸ ߡߍ߲ ߠߎ߬ ߦߋ߫ ߝߘߊ߬ߝߌ߲߬ ߞߊ߲ ߘߏ߫ ߟߎ߫ ߢߊߦߋ߫ ߟߊ߫، ߏ߬ ߞߊߡߊ߲ ߠߋ߬ ߞߣߐ߫߸ ߒ ߞߊ߬ ߒ ߝߊ߬ߛߏ߬ߘߋ߲߬ߢߐ߲߮ ߠߎ߬ ߟߊߟߌ߫߸ ߒ ߞߏ߫ ߊ߬ߟߎ߬ ߦߋ߫ ߛߏ߬ߛߏ߬ ߞߊ߲ ߞߍ߫ ߊ߬ߟߎ߬ ߟߊ߫ ߞߎߡߊߢߐ߲߯ߦߊ߫ ߝߋ߲ ߘߌ߫ ߊ߬ߟߎ߫ ߜߊ߲߰ߛߊ߲ ߣߌ߫ ߢߐ߲߯ ߕߍ߫، ߓߊߏ߬߸ ߊ߬ߟߋ ߟߋ߬ ߦߋ߫ ߞߊ߲߫ ߘߌ߫߸ ߡߍ߲ ߝߐߟߌ ߡߊ߫ ߕߊ߬ߡߌ߲߫ ߖߌ߬ߣߍ߬ ߞߐߞߊ߲߬߸ ߞߊ߬ ߛߋ߫ ߖߡߊ߬ߣߊ߬ ߜߘߍ߫ ߟߎ߫ ߘߐ߫.>>
ߤߊߓߌ߫ ߛߋߞߎ߫ ߛߊ߬ߞߐ ߟߊ߫ ߞߎߡߊ ߡߍ߲ ߡߊ߫ ߓߍ߲߬ ߡߐ߰ ߛߌߦߊߡߊ߲߫ ߡߊ߬ ߕߋ߲߬߸ ߊ߬ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫ ߞߊ߲ ߝߐߓߊ߮ ߟߊ߫ ߛߌߦߊߦߊ ߕߴߊ߬ ߞߍ߫ ߟߊ߫ ߖߡߊ߬ߣߊ ߕߐ߰ߡߊ߬ߛߙߋ߬ ߘߌ߫ ߞߐߞߊ߲ߠߊ ߟߎ߬ ߘߐ߫ ߘߋ߬، ߓߊ߬ߙߌ߬߸ ߞߊ߲ ߓߐߓߊߟߌߦߊ ߖߡߊ߬ߣߊ ߞߐߞߊ߲߬߸ ߡߍ߲ ߡߊ߫ ߓߐߕߏ߲߫ ߞߐߛߊ߬ߥߏ߬߸ ߞߊ߲ ߡߍ߲ ߘߊ߲߬ߣߍ߲߫ ߖߡߊ߬ߣߊ ߘߎ߰ߞߣߍ ߖߍ߬ߘߍ ߞߊ߲߬߸ ߏ߬ ߟߋ ߞߊ߫ ߞߊ߲߫ ߞߊ߲߫ ߞߊ߬ ߞߍ߫ ߖߡߊ߬ߣߊ ߡߊ߲߬ߕߏ߲߬ߕߍ߬ ߞߊ߲ ߘߌ߫.
<<ߞߊ߲ ߕߍ߫ ߛߎߥߊ߲ߘߌ߫ ߟߊ߫ ߞߊ߬ ߓߍ߲߬ ߊ߬ ߝߐߓߊ߮ ߟߊ߫ ߛߌߦߊߦߊ ߡߊ߬ ߘߋ߬߸ ߓߊ߬ߙߌ߬ ߡߍ߲ ߦߋ߫ ߖߡߊ߬ߣߊ ߕߐ߰ߡߊ߬ߛߙߋ ߣߴߊ߬ ߟߊ߫ ߟߐ߲ߠߌ߲ߦߊ ߟߎ߬ ߛߌ߲ߞߐ߲ ߘߌ߫߸ ߊ߬ ߓߊ߯ ߝߐ߫ ߌߞߘߐ߫߸ ߌ ߘߌ߫ ߖߡߊ߬ߣߊ ߏ߬ ߛߌ߲ߞߐ߲ ߦߴߊ߬ ߘߐ߫.>> ߊ߬ ߞߵߊ߬ ߦߌ߬ߘߊ߬ ߖߌ߬ߦߊ߬ߖߟߎ ߘߐ߫ ߞߏ߫ ߞߊ߲߫ ߛߎ߮ ߏ߬ ߟߋ ߞߊ߫ ߞߊ߲߫ ߞߊ߬ ߞߍ߫ ߡߊ߲߬ߕߏ߲߬ߕߍ߬ ߞߊ߲ ߘߌ߫.
ߓߊ߬ߙߌ߬߸ ߞߎߡߊ ߓߌ߬ߟߊ ߞߐ ߘߐ߫ ߊ߬ ߖߌߟߊ߫߸ ߊ߬ ߣߴߊ߬ ߘߐ߯ߦߊ߫ ߛߌߦߊߡߊ߲ ߢߌ߲߬ ߠߎ߬ ߞߐߝߍ߬ ߘߍ߬ߞߙߏߝߏ ߟߎ߫ ߞߊ߲߬߸ ߊ߬ ߛߊ߬ߦߌ߲߬ ߘߴߊ߬ ߟߊ߫ ߞߎߡߊ ߣߌ߲߬ ߞߊ߲߬ ߛߌߟߊߓߐߛߐ߯ߣߊ߫ ߦߋ߫߸ ߞߏ߫ ߊ߬ ߟߊ߫ ߞߐߡߊ ߟߐ߬ߣߍ߲߬ ߕߍ߫ ߖߡߊ߬ߣߊ ߞߎ߲߬ߠߊ߬ߛߌ߰ ߞߊ߲߬ ߞߏ߫ ߡߊ߬ ߘߋ߬߸ ߊ߬ ߟߐ߬ߣߍ߲߫ ߡߊ߲߬ߕߏ߲߬ߕߍ߬ ߞߊ߲ ߠߋ߬ ߡߊ߬.
<<ߒ ߡߴߊ߬ ߖߌ߰߸ ߒ ߘߏ߲߬ ߠߊ߫ ߞߎߡߊ ߟߊ߬ߢߌ߬ߣߌ߲߬ ߕߍ߫߸ ߞߏ߫ ߛߏ߬ߛߏ߬ ߞߊ߲ ߦߋ߫ ߞߍ߫ ߖߌ߬ߣߍ߬ ߞߊ߲ߓߍ߲ ߞߎ߲߬ߠߊ߬ߛߌ߰ ߞߊ߲ ߘߌ߫، ߏ߬ ߕߍ߫ ߒ ߠߊ߫ ߞߎߡߊ ߞߘߐ߫ ߘߌ߫ ߡߎ߰ߡߍ߫.>>
ߊ߬ ߞߵߊ߬ ߘߊ߬ߟߎ ߞߍ߫ ߡߍ߲ ߘߌ߫ ߞߎߡߊ ߣߌ߲߬ ߞߐߡߊߓߌ߲ߓߌ߲ ߘߐ߫߸ ߏ߬ ߞߍ߫ ߘߊ߫ ߟߊߒߡߊ ߘߏ߫ ߟߎ߫ ߟߋ߬ ߕߊ߭ ߘߴߊ߬ ߓߟߏ߫ ߓߊ߯ߙߊ߫ ߘߊߞߎ߲ ߘߏ߫ ߟߎ߫ ߘߐ߫ ߣߊ߲߬ߕߌ߰ ߞߎ߲ߘߊ߫߸ ߊ߬ ߣߌ߫ ߝߊ߬ߘߌ߬ߡߊ߬ߞߟߏ߬ ߞߎ߲ߘߊ߫.
<<ߝߊ߬ߘߌ߬ߡߊ߬ߞߟߏ ߘߐ߫߸ ߖߌ߬ߣߍ߫ ߕߏ߬ߟߊ߲߬ߕߊ߲߬ߠߊ ߟߎ߬ ߦߋ߫ ߛߏ߬ߛߏ߬ ߞߊ߲ ߠߋ߬ ߟߊߓߊ߯ߙߊ߫ ߟߊ߫ ߕߎ߬ߡߊ߬ ߛߌߊߦߡߊ߲߫ ߞߵߏ߬ ߞߍ߫ ߊ߬ߟߎ߬ ߟߊ߫ ߞߎߡߊߢߐ߲߯ߦߊߟߊ߲ ߘߌ߫ ߓߙߊ ߞߣߐ߫، ߏ߬ ߢߊ߫ ߞߋߟߋ߲ ߠߋ߬ ߝߣߊ߫ ߡߊ߬߸ ߣߊ߲߬ߕߌ߮ ߟߎ߬ ߓߊ߯ ߕߊ߯ ߗߋߦߊߟߌ ߟߊ߫ ߖߡߊ߬ߣߊ߬ ߜߘߍ ߟߎ߫ ߞߊ߲߬߸ ߊ߬ߟߎ߬ ߦߋ߫ ߞߎߡߊ߫ ߟߊ߫ ߞߊ߲߫ ߠߋ߬ ߘߐ߫߸ ߡߍ߲ ߕߍ߫ ߢߊߦߋ߫ ߟߊ߫ ߕߎ߲ߞߊ߲߫ ߠߊ߫ ߡߐ߮ ߏ߬ ߟߎ߬ ߓߟߏ߫ ߓߊߞߍ߫.>>
ߒߞߏ ߘߋ߬ߙߌ߬ߘߊ߫ ߡߊ߲߬ߘߋ߲߬ ߗߋߕߌ߮ ߞߵߊ߬ ߟߊ߫ ߞߎߡߊ ߟߊߓߊ߲߫ ߊ߬ ߦߌ߬ߘߊ ߟߋ߬ ߡߊ߬߸ ߞߏ߫ ߊ߬ ߓߘߊ߫ ߛߊ߲߭ ߂߈ ߞߍ߫ ߒߞߏ ߞߊ߬ߙߊ߲ ߣߴߊ߬ ߞߐߡߊߓߌ߲ߓߌ߲ ߘߊߞߎ߲ ߘߐ߫، ߏ߬ ߘߐ߫߸ ߊ߬ ߦߋ߫ ߒߞߏߞߏ ߛߊ߲ߞߘߐߕߊ߬ߓߊ߮ ߘߏ߫ ߟߋ߬ ߘߌ߫ ߡߊ߬ߞߟߐ߬ ߞߎ߲ߘߊ߫.
<<ߣߌ߫ ߡߐ߰ ߓߘߊ߫ ߒߞߏ ߞߐߡߊߓߌ߲ߓߌ߲߫߸ ߞߊ߬ ߓߊ߲߫ ߞߵߊ߬ ߛߘߊߟߊ߫ ߡߊ߬ߞߟߐ ߟߎ߬ ߘߐ߫߸ ߌ ߓߊ߯ ߏ߬ ߟߎ߬ ߕߐ߮ ߡߊߘߊ߲߫߸ ߌ ߘߌ߫ ߒ ߕߐ߮ ߦߴߊ߬ ߘߐ߫، ߒߞߏ ߛߘߊߟߊ߫ ߞߏ߫ ߕߴߦߋ߲߬߸ ߒ ߕߍ߫ ߛߐ߬ߘߐ߲߬ ߠߊ߫ ߡߍ߲ ߘߐ߫، ߒߠߋ ߖߍ߬ߘߍ ߦߋ߫ ߒߞߏ߫ ߡߐ߮ ߟߋ߬ ߘߌ߫، ߏ߬ ߘߐ߫߸ ߒߠߋ ߟߊ߫ ߞߏ ߓߍ߯ ߦߋ߫ ߒߞߏ ߟߋ߬ ߘߌ߫، ߞߎߡߊ ߟߊߥߟߌ߬ߣߍ߲߬ ߡߍ߲ ߡߊ߬߸ ߜߎ߲߬ߘߎ ߞߊߣߊ߬ ߓߐ߫ ߞߣߍߡߊ߬ ߊ߲ ߣߌ߫ ߢߐ߲߯ ߕߍ߫ ߊ߲ ߠߊ߫ ߡߎߣߊ߲ߝߊ߲߫ ߢߌߣߌ߲߫ ߥߊ߯ߕߌ ߟߎ߬ ߟߊ߫ ߕߎ߬ߓߊ߬ߓߎ߬ߟߊ߫، ߊ߬ ߞߎ߲߭ ߓߍ߯ ߟߵߏ߬ ߘߌ߫.>>
ߢߐ߲߯ߢߊߦߋߓߊߟߌߦߊ ߣߌ߲߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߝߊ߬ߛߏ߬ ߞߊ߲߬ ߞߏ߬ ߞߎߡߊ ߦߋ߫ ߞߎߡߊ߫ ߢߍ߬ߣߍ߲߬ߡߊ߬ߓߊ߫ ߟߋ߬ ߘߌ߫ ߖߌ߬ߣߍ߬ ߞߣߐ߫ ߕߋ߲߬، ߓߊߏ߬߸ ߞߊ߲߫ ߕߌ߮ ߓߍ߯ ߞߐ߲߬ߞߐ߲ ߘߐߛߌ߰ߣߍ߲߫ ߊ߬ ߟߊ߫ ߞߊ߲ ߠߋ߬ ߞߘߐ߫ ߜߡߊ߫، ߏ߬ ߘߐߦߏߙߏ߲߫ ߦߙߐ ߡߍ߲ ߓߊ߯ ߦߋ߫ ߌߞߘߐ߫߸ ߏ߬ ߦߋ߫ ߢߊߢߌߣߌ߲߫ ߠߊ߫ ߟߋ߬ ߞߵߏ߬ ߘߐߖߊ߬ ߖߏߣߊ߫߸ ߖߐ߲߰ߛߊ߫ ߛߎߘߊ ߛߌߟߊ ߞߊߣߊ߬ ߕߍ߰.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.