ߞߊ߲ߞߊ߲߫ ߡߊ߬ߡߙߊ߬ߟߌ߬ ߞߏߟߊߕߍ߮ ߟߎ߬ ߣߌ߫ ߞߕߌ ߝߊ߰ߡߊ ߟߎ߫ ߕߊ߬ߣߍ߲ ߞߵߊ߬ ߟߊ߫ ߜߋߙߋ߲ߜߋߙߋ߲ߧߊ ߕߊ ߟߎ߫ ߞߊ߲߬߸ ߏ߬ ߟߎ߫ ߣߐ߬ ߥߟߏߒߘߐ ߝߎߝߎ߫ ߂߇߁ ߠߋ߬ ߖߋ߬ߣߌ߲߫ ߞߐ߬ߓߌߞߐ߬ߙߐ߫ ߛߎ߬ߣߎ߲߬ߞߎ߲߬ߓߊ ߟߊ߫ ߂߀߂߆ ߘߓߊ߬ߕߊ ߕߟߋ߬ ߁߁ ߣߌ߲߬ ߡߊ߬߸ ߞߊ߲ߞߊ߲߫ ߞߊ߬ߝߏ߬ߙߋ߲ ߞߣߐ߫߸ ߊ߬ߟߋ߬ ߥߟߏߒߘߐ߫ ߞߏߙߏ߲ ߠߎ߬ ߦߌ߬ߘߊ ߞߐ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߞߎ߲߬ߢߐ߲߯ ߕߊ߬ߡߌ߲߬ߣߍ߲ ߡߊ߬.

ߕߊ߬ߡߌ߲߬ߘߊ ߟߊ߫ ߟߊ߬ߞߊ߲߬ߘߊ߬ߟߌ ߖߊ߲߬ߕߏ߬ߒ߬ߘߐ ߗߍ߬ߘߋ߲ ߠߎ߫ ߟߋ߬ ߞߵߊ߬ߟߎ߬ ߕߍ߯ ߞߍ߫ ߥߟߏߒߘߐ ߢߌ߲߬ ߠߎ߬ ߘߐ߫، ߏ߬ ߦߌ߬ߘߊ߬ ߘߊ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߘߓߊ߬ߕߊ ߕߟߋ߬ ߇ ߕߊ߬ߡߌ߲߬ߣߍ߲ ߡߊ߬߸ ߏ߬ ߡߍ߲ ߓߍ߲߬ ߘߊ߫ ߓߌߟߏ߲ ߡߊ߬، ߏ߬ ߞߍ߫ ߘߊ߫ ߞߊ߲ߞߊ߲߫ ߕߌ߲߬ߞߎߘߎ߲ ߕߊ߬ߡߌ߲߬ߘߊ ߝߊ߲ߓߊ ߟߋ߬ ߟߊ߫ ߞߊ߲ߞߊ߲ߞߎߘߊ߫، ߒ߬ߓߊ߬߸ ߟߊ߬ߤߘߌ ߡߍ߲ ߕߊ߬ ߘߊ߫ ߦߋ߲߬ ߞߏ߫ ߕߊ ߘߌߣߊ߬ ߛߎ߫ ߥߟߏߒߘߐ ߏ߬ ߟߎ߬ ߟߊ߫߸ ߏ߬ ߟߋ ߡߙߌߦߊ ߓߐߣߍ߲߫ ߜߍߟߊ߫ ߞߐ߬ߓߊ߬ߟߏ߲ ߣߌ߲߬ ߡߊ߬߸ ߞߵߊ߬ߟߎ߬ ߓߍ߯ ߖߋ߬ߣߌ߲߬ ߞߎߙߍ߫߸ ߞߊ߬ ߡߌ߬ߙߌ߲߬ߘߌ ߟߊ߫ ߞߍ߲ߘߍߦߊ ߟߊߕߊ߲߬ߞߊ߬.

ߒ߬ߓߊ߬߸ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߕߌߞߊ߲ߘߊ ߣߐ߬ߞߊ߲߬ߛߌ߮߸ ߓߊ߲߬ߜ߭ߊߟߌ߬ ߝߍ߲߬ߘߎ߬ߣߏ߫ ߞߵߊ߬ ߦߌ߬ߘߊ߬ ߞߏ߫ ߖߋ߬ߣߌ߲߬ߠߌ߲ ߣߌ߲߬ ߞߍߣߍ߲߫ ߞߊ߲ߓߍ߲ ߞߕߌߞߊ߲ߘߊ ߝߏߘߋ߬ ߓߌ߲ߕߎ߬ ߞߋߕߊ߬ ߟߊ߫ ߖߊ߬ߡߊߙߌ ߟߋ߬ ߞߣߐߡߊ߬.

<<ߊ߲ ߣߐ߬ ߕߊ ߞߍ߫ ߟߊ߫ ߥߟߏߒߘߐ ߘߏ߫ ߟߎ߫ ߟߋ߬ ߘߐ߫ ߓߌ߬߸ ߡߍ߲ ߥߊߣߍ߲߫ ߝߏ߯ ߥߟߏߒߘߐ߫ ߝߎߝߎ߫ ߂߇߁ ߢߐ߲߰߸ ߡߍ߲ ߠߎ߬ ߕߍ߫ ߓߍ߲߬ ߘߊߥߎ߲ߠߌ߲ ߘߐ߫ ߝߋߎ߫، ߊ߬ߟߋ߬ ߥߟߏߒߘߐ ߢߌ߲߬ ߠߎ߫ ߡߌ߬ߣߊ߬ ߕߟߋ߬ ߘߊ߲ߘߐ ߟߋ߬ ߕߋ߲߬߸ ߘߏ߫ ߟߎ߫ ߖߍ߬ߘߍ ߡߌ߬ߣߊ߬ ߘߊ߫ ߞߊ߲ߞߊ߲߫ ߟߎ ߘߏ߫ ߞߣߐ߫߸ ߊ߬ ߣߌ߫ ߘߏ߫ ߝߣߊ߫ ߦߋ߫ ߘߊ߫ ߛߏߝߍߞߎߟߎ߲ ߘߏ߫ ߞߣߐ߫ ߕߊ߬ߡߌ߲߬ߘߊ߬ߕߌ߮ ߟߎ߬ ߟߊ߫ ߢߟߊߘߌߦߊ ߡߊ߬ߣߊߡߊ߬.>> ߊ߬ ߞߵߏ߬ ߦߌ߬ߘߊ߬.

ߛߊ߬ߙߌ߬ߦߊ߬ߓߊ߰ߙߊ߬ߟߊ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߞߕߌ ߟߊߥߌ߬ߟߌ߫ ߣߌ߲߬ ߕߌߢߍߟߌߟߊ ߟߎ߬ ߞߐ߫߸ ߡߐ߱ ߡߍ߲ ߠߎ߬ ߛߋ߲߬ ߦߴߊ߬ߟߋ߬ ߘߓߌ߬ߘߓߌ ߘߐ߫߸ ߊ߬ߟߎ߬ ߓߘߊ߫ ߣߐ߬ߡߌ߬ߣߊ߬ߟߌ ߟߊߥߌ߬ߟߌ߫ ߊ߬ߟߎ߬ ߞߐ߫ ߞߋߟߋ߲ߞߋߟߋ߲߫، ߊ߬ ߞߊ߬ ߝߏ߬ߟߌ ߟߊߛߋ߫ ߕߊ߬ߡߌ߲߬ߘߊ ߡߊ߬ ߊ߬ ߟߊ߫ ߛߙߊ߬ߣߎ߲ ߘߐ߫: <<ߕߐ߲ߓߟߏߡߊ ߟߎ߬߸ ߞߟߍ߬ߡߐ߮ ߟߎ߬߸ ߊ߬ ߣߌ߫ ߕߊ߬ߡߌ߲߬ߘߊ߸ ߏ߬ ߟߎ߫ ߝߏ߬ߕߊ ߟߋ߬ ߞߏߛߓߍ߫، ߊ߬ߟߎ ߟߋ߬ ߞߊ߬ ߛߊ߬ߙߌ߬ߦߊ߫ ߘߍ߬ߡߍ߲߫ ߣߌ߲߬ ߞߏ ߘߐ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬.>> ߊ߬ ߞߵߏ߬ ߦߌ߬ߘߊ߬ ߞߎߡߊ ߘߐ߫߸ ߞߊ߬ ߓߍ߲߬ ߞߏ߫ ߞߏߙߏ߲ ߠߎ߬ ߞߍ߬ߟߍ ߓߟߏ߫ ߘߌ߫ ߢߐ߲߰ ߡߊ ߡߊ߬.

ߡߊ߬ߡߊ߬ߘߌ߫ ߓߊ߰ߦߐ߬ ߡߍ߲ ߦߋ߫ ߓߊߛߌߦߟߊ ߓߟߏߡߊߘߍߡߍ߲ ߘߌ߫ ߞߊ߲ߞߊ߲߫ ߡߙߊ߬ߘߊ߬ߓߊ ߜߋߙߋ߲ߜߋߙߋ߲ߧߊ ߗߋߕߌ߯ߘߊ ߟߊ߫ (ߡߜߗ)߸ ߏ߬ ߞߵߊ߬ ߦߌ߬ߘߊ߬ ߞߏ߫ ߞߙߎ߫ ߟߊߘߍ߬ߣߍ߲ ߘߏ߫ ߟߎ߫ ߟߋ߬ ߟߊߥߟߌ߬ ߘߊ߫߸ ߞߊ߬ ߓߊߛߌ ߢߌ߲߬ ߠߎ߬ ߡߊߝߟߍ߫ ߞߵߊ߬ߟߎ߬ ߖߎ߯ߓߍ߫ ߞߵߊ߬ߟߎ߬ ߡߊߟߐ߲߫.

<<ߊ߲ ߓߊ߲ ߞߐ ߝߋ߲ ߠߎ߬ ߛߙߊߛߌ߰ ߟߊ߫߸ ߊ߲ ߞߵߊ߬ ߦߋ߫ ߞߏ߫ ߓߊߛߌ߫ ߛߎ߯ߦߊ߫ ߂߂ ߟߋ߬߸ ߡߍ߲ ߦߋ߫ ߓߍ߲߬ ߠߊ߫ ߝߎߝߎ߫ ߁߇߁ ߡߊ߬߸ ߣߴߊ߬ ߖߌߘߊ߲ ߦߋ߫ ߞߌߘߊ߫ ߂ ߂߃߄ ߘߌ߫، ߡߊ߬ߝߟߍ߬ߟߌ ߓߍ߯ ߞߐ ߘߐ߫߸ ߝߋ߲߫߫ ߛߎ߯ߦߊ߫ ߝߌ߬ߟߊ߬ ߔߋ߫ ߟߋ߬ ߕߍ߬ߘߍ߫ ߊ߬ ߘߐ߫߸ ߡߍ߲ ߘߌ߫ ߛߋ߫ ߟߊߓߊ߯ߙߊ߫ ߟߊ߫، ߊ߬ ߕߐ߭ ߛߌ߫ ߡߊ߫ ߢߌ߲߬.>> ߊ߬ ߞߵߏ߬ ߦߌ߬ߘߊ߬.

ߞߍ߲ߘߍߦߊ ߞߏߟߊߕߍ߮ ߣߌ߲߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ߟߎ߫ ߞߊ߬ ߓߊߛߌ߫ ߜߘߍ߫ ߦߴߊ߬ ߘߐ߫߸ ߊ߰ ߝߐ߫ ߟߊ߫ ߡߍ߲ ߡߊ߬ ߞߏ߫ ߘߊߝߘߎߓߊߣߍ߲߸ ߣߴߊ߬ ߟߐ߲ߞߏ߫ ߕߐ߮ ߦߋ߫ (ߘߍߜ߭ߑߖ߭ߊߡߋߕߊߖ߭ߏߣ) ߘߌ߫߸ ߏ߬ ߦߋ߫ ߟߊߓߊ߯ߙߊ߫ ߡߐ߰ ߛߌߦߊߡߊ߲߫ ߓߟߏ߫߸ ߊ߬ ߦߋ߫ ߛߐ߬ߘߐ߲߬ ߠߊ߫ ߞߌ߲߬ߘߊ߬ ߞߣߐ߬ߟߊ ߟߎ߫ ߟߋ߬ ߘߐ߫ ߓߊߞߍ߬.

ߊ߬ ߞߵߊ߬ ߦߌ߬ߘߊ߬ ߘߊߝߘߎߓߊߣߍ߲ ߠߊ߫ ߞߏ ߘߐ߫߸ ߞߏ߫: <<ߓߊߛߌ߫ ߟߵߏ߬ ߘߌ߫߸ ߡߍ߲ ߡߊ߲߫ ߘߌ߫ ߞߍ߲ߘߍߦߊ ߟߊ߫߸ ߊ߬ ߦߋ߫ ߗߊߥߎ߲ ߛߓߊߓߎߦߊ߫ ߟߊ߫߸ ߞߊ߬ ߝߊ߬ߘߌ ߓߐ߫ ߊ߬ ߖߘߍ߬ ߓߟߏ߫ ߝߋߎ߫.>> ߊ߬ ߞߵߏ߬ ߟߊ߬ߛߏ߬ߓߌ߬ߟߌ ߞߍ߫ ߞߵߊ߬ ߦߌ߬ߘߊ߬ ߞߏ߫ ߜߋߣߎ߲ ߘߏ߫ ߟߎ߫ ߝߣߊ߫ ߕߘߍ߬ ߓߊߛߌ ߢߌ߲߬ ߠߎ߬ ߘߐ߫߸ <<ߡߍ߲ ߠߎ߬ ߕߍ߫ ߓߊߛߌ߫ ߡߊߟߐ߲ߣߍ߲߫ ߘߌ߫ ߞߎ߲߬ߠߊ߬ߛߌ߮ ߓߟߏ߫ ߞߍ߲ߘߍߦߊ ߞߊߡߊ߲ ߞߣߐ߫>> ߊ߬ ߘߏ߲߬ ߡߊ߫ ߢߌ߲߬ ߘߋ߲ߣߍ߲ ߠߎ߬ ߡߊ߬ ߝߋߝߋ߫.

ߊ߬ߙߊ߬ߝߊ߲߬ ߡߎߛߊ߫ ߞߎ߬ߟߌߓߊ߬ߟߌ߬ ߡߍ߲ ߦߋ߫ ߞߊ߲ߞߊ߲߫ ߗߋߘߋ߲߫ ߓߟߏߡߊߞߊ߬ߣߍ߲ ߠߎ߬ ߞߊ߲ߕߌ߮ ߘߌ߫߸ ߏ߬ ߞߵߊ߬ ߞߊ߲ߠߊߘߌ߫ ߘߎ߰ߘߋ߲ ߠߎ߬ ߡߊ߬ ߖߊ߲߬߬ߕߏߒߖߘߍ߬ߘߐ ߟߋ߬ ߘߌ߫߸ ߊ߬ ߣߌ߫ ߞߏ߫ ߓߍ߯ ߦߴߊ߬ ߛߋߞߏ߫ ߞߍ߫ ߞߍ߲ߘߍߦߊ ߟߊߕߊ߲߬ߞߊ ߘߐ߫ ߞߊ߬ ߞߏߙߏ߲ߧߊ ߞߏ ߓߍ߯ ߞߎ߲߬ߘߐߦߌ߬ߘߊ߬.

<<ߞߍ߲ߘߍߦߊ ߟߊߕߊ߲߬ߞߊ ߦߋ߫ ߓߍ߯ ߞߎ߲߬ߞߊ߲߬ߞߏ ߟߋ߬ ߘߌ߫، ߣߌ߫ ߥߟߏߒߘߐ߫ ߞߏߙߏ߲߫ ߛߎ߮ ߢߌ߲߬ ߠߎ߬ ߟߛߊߙߌ߫ ߘߊ߫ ߛߏ ߟߊ߫߸ߡߐ߰ ߛߌ߫ ߕߍ߫ ߛߴߊ߬ ߖߍ߬ߘߍ߫ ߕߊ߲߬ߞߊ߬ ߟߴߊ߬ ߡߊ߬، ߊ߲ ߧߋ߫ ߡߍ߲ ߢߌߣߌ߲߫ ߠߊ߫ ߓߍ߯ ߝߍ߬߸ ߓߍ߯ ߦߋ߫ ߞߏߙߏ߲ߧߊ߫ ߞߏ ߟߎ߬ ߟߊ߫ ߕߋ߬ߟߋ ߟߊ߫߸ ߡߍ߲ ߺ ߍ ߺ ߡߍ߲߫ ߘߌ߫ ߝߘߏ߬ߓߊ߬ ߞߍ߲ߘߍߦߊ ߡߊߣߐ߯.>> ߊ߬ ߞߵߏ߬ ߦߌ߬ߘߊ߬.

ߖߋ߬ߣߌ߲߬ߠߌ߲ ߡߍ߲ ߦߋ߫ ߕߋ߲߬߸ ߊ߬ ߞߍ߫ ߘߊ߫ ߞߐ߬ߓߌߞߐ߬ߙߐ߫ ߛߎ߬ߣߎ߲߬ߞߎ߲߬ߓߊ ߟߋ߬ ߟߊ߫߸ ߟߊ߬ߞߊ߲߬ߘߊ߬ߟߌ ߘߝߊߣߍ߲ ߘߐ߫، ߞߊ߬ߕߎ߲߯߸ ߓߊߛߌ߫ ߝߙߋ ߘߓߌ߬ߘߐ߬ߕߊ ߓߘߊ߫ ߛߌߦߊߦߊ߫ ߓߊߟߋ߬߸ ߏ߬ ߡߍ߲ ߦߋ߫ ߣߊ߬ ߟߊ߫ ߓߊߛߌ߫ ߞߏߙߏ߲ ߛߌߦߊߡߊ߲߫ ߘߌ߫ ߟߐ߯ߝߍ ߞߣߐ߫.