ߞߊ߲ߞߊ߲߫: ߞߊ߬ߝߏ߬ߙߋ߲߬ߕߌ߮ ߟߎ߬ ߥߊ߫ ߢߊ ߓߘߊ߫ ߡߊߞߕߌ߫ ߞߊ߲ߞߊ߲ߞߊߘߋ߲ ߘߏ߫ ߓߟߏ߫

[audio_player id=4209]

ߞߊ߲ߞߊ߲߫ ߡߍ߲ ߦߋ߫ ߖߌ߬ߣߍ߬ ߛߏߓߊ ߝߌߟߊߣߊ߲ ߘߌ߫߸ ߞߎߡߊ ߓߘߊ߫ ߓߌ߬ߟߊ߬ ߏ߬ ߞߊ߬ߝߏ߬ߙߋ߲ ߡߊߡߙߊ߬ߓߊ߮ ߟߎ߫ ߟߋ߬ ߥߊ߫ ߢߊ ߘߐ߫ ߣߌ߲߬ ߛߊ߫߸ ߞߵߏ߬ ߞߎ߲߭ ߞߍ߫ ߊ߬ߟߎ߫ ߣߐ߭ ߦߋߓߊߟߌߦߊ ߘߌ߫ ߊ߬ ߢߊ ߡߊ߬. ߊ߬ߟߎ߬ ߞߊߙߏ߫ ߁߄ ߠߋ߬ ߛߏ ߞߎ߲߬ߠߊ߫ ߕߋ߲߬߸ ߡߊ߬ߞߕߌ߬ߟߌ ߝߊ߲߬ߞߊ ߦߋ߫ ߕߊ߬ߡߌ߲߬ ߠߊ߫ ߥߙߊ߬ ߟߴߊ߬ߟߎ߫ ߞߊ߲߬߸ ߞߵߏ߬ ߞߎ߲߭ ߞߍ߫ ߞߏ߫ ߦߋߓߊߟߌߦߊ ߘߌ߫ ߊ߬ߟߎ߫ ߣߐ߭ ߘߐ߫߸ ߞߏ ߟߎ߬ ߟߊߜߍߓߊߟߌߦߊ߸ ߊ߬ ߣߌ߫ ߊ߬ߟߎ߬ ߟߊ߫ ߡߊ߬ߞߎ߲߫ ߞߎ߲߬ߘߐ߬ߖߊ߲ ߞߊ߲ߞߊ߲ߞߊ ߟߎ߬ ߦߋ߫.

ߝߘߏ߬ߓߊ߬ ߞߍ߲ߘߍߦߊ ߓߟߏߡߞߊߓߊ߮ ߣߌ߫ ߞߝߊ߬ ߛߓߍ߬ߟߊ߬ ߥߣߊ߸ ߞߏ߲߬ߓߏ ߞߊ߬ߙߊ߲߬ߡߐ߯ ߞߊ߬ߓߊ ߓߘߊ߫ ߘߏ߫ ߝߐ߫ ߞߊ߲ߞߊ߲߫ ߞߊ߬ߝߏ߬ߙߋ߲ ߘߏ߲߬ߞߏ ߟߎ߫ ߡߊ߬߸ ߊ߬ ߞߵߊ߬ ߦߌ߬ߘߴߊ߬ ߟߊ߫ ߞߎߡߊ ߘߐ߫ ߞߏ߫ ߌ ߓߴߊ߬ ߡߍ߲߫ ߞߏ߫ ߞߊ߬ߝߏ߬ߙߋ߲ ߡߊߡߙߊ߬ߓߊ߮߸ ߏ߬ ߦߋ߫ ߡߐ߰ ߟߎ߫ ߟߋ߬ ߘߌ߫߸ <<ߡߍ߲ ߠߎ߬ ߦߴߊ߬ߟߎ߫ ߖߘߍ߬ ߞߍ߫ ߟߊ߫ ߛߘߊߞߊ ߘߌ߫߸ ߞߵߊ߬ ߟߊ߫ ߞߍߕߊ ߟߎ߬ ߞߍ߫ ߞߵߊ߬ ߓߐ߫ ߊ߬ ߛߌߟߊ ߝߍ߬߸ ߞߊ߬ ߥߍ߬ߣߍ ߕߊ߬߸ ߢߌߣߌ߲ߞߏ߫ ߖߐ߲ߖߐ߲߫ ߦߋ߫ ߞߴߦߋ߲߬ ߡߙߌߘߐ߫ ߖߐ߲ߖߐ߲ ߠߎ߬ ߕߊ߭ ߘߐ߫߸ ߞߵߏ߬ ߟߊ߫ ߛߏ߫ ߞߣߐ߫ ߡߐ߮ ߟߎ߬ ߟߊߡߍ߲ ߞߊ߲߬>> ߊ߬ ߣߌ߫ ߝߣߊ߫߸ ߞߏ߫ ߞߎ߲߬ߕߌ߰ ߓߘߍ ߕߴߊ߬ ߖߘߍ߬ ߦߋ߫ ߟߊ߫ ߓߍ߯ ߛߊ߲ߝߍ߫ ߡߐ߯ ߘߌ߫.

ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߓߊ߯ߙߊ ߓߍ߯ ߟߊߘߍ߬ߣߍ߲ ߛߌ߰ߣߍ߲߫ ߓߊ߬ߙߏ߬ߡߊ߫ ߛߊ߬ߓߊ߫ ߟߋ߬ ߞߊ߲߬: ߟߐ߲ߠߌ߲߸ ߣߊ߬ߕߊ߸ ߛߋߓߊ߯ߦߊ. ߌ ߓߊ߯ ߊߘߡߊߦߊ ߕߊ߬߸ ߞߊ߬ ߘߊ߲ߘߊߟߌ ߕߊ߬߸ ߏ߬ ߟߎ߬ ߓߍ߯ ߟߊߘߍ߬ߣߍ߲ ߦߋ߫ ߡߋ߬ߘߋ ߡߊߕߊ߲߬ߞߊ߬ ߟߊ߫߸ ߏ߬ ߟߋ ߜߟߍ߬ߦߊ ߘߌ߫.

ߒ߬ߓߊ߬߸ ߞߊ߬ߙߊ߲߬ߡߐ߯ ߞߊ߬ߓߊ ߞߊ߲߫ ߞߏ߫ ߞߊ߬ߦߌ߯ ߞߊ߬ߝߏ߬ߙߋ߲ ߛߘߍ ߢߌ߲߬ ߠߎ߫ ߣߊ߬ ߘߊ߫ ߛߏ ߞߎ߲߬ߠߊ߫߸ ߊ߬ߟߎ߬ ߡߊ߫ ߛߋ߫ ߞߏ߫ ߘߐߜߍ߫ ߝߏߦߌ߬ ߞߍ߫ ߟߊ߫ ߡߎߣߎ߲߬߸ ߊ߬ߟߎ߬ ߡߊ߫ ߛߋ߫ ߥߊߘߌ߫ ߟߊߘߏ߲ߘߊ߫ ߖߐ߲ߖߐ߲߫ ߝߏߦߌ߬ ߛߌ߰ ߟߊ߫ ߛߋ߲߬ߠߊ߫ ߡߎߣߎ߲߬߸ ߊ߬ߟߎ߬ ߡߊ߫ ߛߋ߫ ߓߊ߯ߙߊ߫ ߡߎߙߊ߲߫ ߝߏߦߌ߬ ߟߋ߬ ߢߊߢߌߣߌ߲߫ ߠߊ߫ ߦߟߍ߬ߡߊ߲ ߞߊ߲ߡߊ߬ ߡߎߣߎ߲߬، <<ߞߊ߲ߞߊ߲߫ ߘߋ߲ߡߌߛߍ߲ ߠߎ߬ ߦߋ߫ ߞߊ߬ߝߏ߬ߙߋ߲ ߠߊ߫ ߦߙߌ߫ ߞߎߘߎ߲ߧߊ ߞߊ߬ߟߊߡߊ߬߸ ߞߏ߫ ߛߌ߫ ߓߐ߬ߘߍ߬ ߕߴߊ߬ߟߎ߬ ߦߋ߫.>>

ߊ߬ߟߎ߬ ߕߴߛߋ߫ ߟߊ߫ ߤߊߟߌ߬ ߞߎߡߊ߫ ߟߊ߫ ߛߏ߫ ߞߣߐ߫ ߡߐ߮ ߟߎ߫ ߝߍ߬ ߜߊ߲ߛߊ߲߫: ߊ߬ߟߎ߬ ߟߊ߫ ߝߍߛߑߓߎߞ ߖߊ߬ߕߋ߬ߘߊ ߟߊ߫߸ ߊ߬ߟߎ߬ ߟߊ߫ ߟߊ߬ߖߍ߲߬ߛߍ߲߬ߠߌ߲߬ ߟߊ߬ߓߊ߲ ߞߍ߫ ߘߊ߫ ߦߋ߲߬ ߂߀߂߅ ߥߊ߬ߛߌ߬ߥߙߊ ߕߋ߬ߟߋ߫ ߂߃ ߟߋ߬ ߡߊ߬߸ ߊ߬ߟߋ߬ ߞߐߜߍ ߘߏ߲߬ ߞߊ߲߬߸ ߤߊߟߵߊ߬ ߡߊߝߘߎߓߊ߮ ߡߊ߫ ߛߋ߫ ߡߐ߰ ߈߀߀ ߘߐ߫، ߏ߬ ߡߍ߲ ߦߋ߫ ߞߎ߲߬ߠߊ߬ߖߌ߰ ߖߡߊ ߘߌ߫ ߛߏ߫ ߡߎ߯ߡߍ ߞߊ߬ߝߏ߬ߙߋ߲ ߠߊ߫ ߞߐߜߍ ߖߡߊ߬ ߞߏ ߘߐ߫.

ߞߏ߲߬ߓߏ߫ ߞߊ߬ߙߊ߲߬ߡߐ߯ ߞߊ߬ߓߊ ߞߊ߲߫ ߞߏ߫ ߘߐ߬ߕߊߡߌ߲ ߞߎ߲߬ߠߊ߬ߛߌ߰ߟߌ ߛߌ߰ߣߍ߲߫ ߞߐߝߟߌ߫ ߞߏ ߟߋ߬ ߞߊ߲߬߸ ߏ߬ ߟߋ ߘߐ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߫ ߞߊ߲߫ ߞߊ߬ ߞߊ߲ߞߊ߲߫ ߞߊ߬ߝߏ߬ߙߋ߲ ߞߣߐߟߊ ߡߊߝߟߍ߫߸ ߞߵߊ߬ ߞߏ ߟߊߕߊ߬ߡߌ߲߬ ߘߋ߲ߡߌߛߍ߲߫ ߠߎ߫ ߡߊ߬߸ ߊ߬ ߟߐ߲ߠߌ߲ ߦߋ߫ ߡߍ߲ ߠߎ߬ ߟߊ߫߸ ߊ߬ ߣߌ߫ ߡߍ߲ ߠߎ߬ ߘߌ߫ ߛߋ߫ ߞߏ ߟߎ߬ ߟߊߞߎߘߦߊ߫ ߟߊ߫، ߞߊ߬ߙߊ߲߬ߡߐ߯ ߞߊ߬ߓߊ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߣߴߌ ߞߊ߬ ߞߊ߲ߞߊ߲߫ ߡߊߝߟߍ߫߸ ߓߊ߯ߙߓߊ߫ ߛߌߦߊߡߊ߲߫ ߠߋ߬ ߓߘߊ߫ ߛߌ߰ ߛߋ߲߬ߠߊ߫ ߕߋ߲߬߸ ߡߊ߲߬ߞߊ߲ ߦߋ߫ ߡߍ߲ ߠߎ߬ ߟߊ߫ ߘߎߢߊ߫ ߢߊߝߍ߬߸ ߦߏ߫ ߦߙߐ߫ ߕߋ߫ ߛߌߦߊߡߊ߲ ߡߍ߲ ߕߊ߬ߡߌ߲߬ ߛߊ߲ ߦߋ߫ ߕߋ߲߬߸ ߞߎ߲߬ߠߊ߬ߛߌ߮ ߟߊ߫ ߦߙߐ ߟߎ߬ ߟߊߡߌ߬ߘߊ ߡߐ߰ ߟߎ߬ ߟߊ߫߸ ߡߍ߲ ߛߌ߰ߣߴߊ߬ ߞߊ߲߬߸ ߣߴߊ߬ ߓߊ߯ߙߊ ߟߎ߬ ߛߌ߰ߣߍ߲߫ ߛߋ߲߬ߠߊ߫ ߛߏߟߐ ߞߏߕߌ߯ߘߊ ߓߟߏ߫، ߓߊ߬ߙߌ߬ ߥߊߦߌߞߊ߫߸ ߞߊ߲ߞߊ߲߫ ߞߊ߬ߝߏ߬ߙߋ߲ ߡߊ߫ ߛߋ߫ ߝߏߦߌ߬ ߞߍ߫ ߟߴߏ߬ ߞߏ ߘߐ߫ ߓߏ߲߬߸ ߊ߬ ߣߐ߬ ߛߌ߫ ߡߊ߫ ߦߋ߫ ߏ߬ ߞߏ ߘߐ߫، ߊ߬ߟߎ߬ߎ ߡߊ߫ ߛߋ߫ ߞߊ߲ߞߊ߲ߞߊ ߟߎ߫ ߛߏ߬ߓߌ߬ߟߊ߬ߞߎߣߎ߲߫ ߠߊ߫߸ ߊ߬ߟߎ߬ ߡߊ߫ ߛߋ߫ ߞߊ߲߫ ߘߐߜߍ߫ ߝߏߦߌ߬ ߟߋ߬ ߛߐ߬ߘߐ߲߬ ߠߊ߫ ߛߏ߫ ߞߣߐ߫ ߡߐ߮ ߟߎ߬ ߦߋ߫.

ߞߎߡߊ ߞߎ߲߬ߘߏ߲ ߘߐ߫߸ ߞߊ߬ߙߊ߲߬ߡߐ߯ ߞߊ߬ߓߊ ߞߊ߲߫ ߞߏ߫ ߊ߬ ߦߋ߫ ߡߍ߲ ߢߌߣߌ߲߫ ߠߊ߫߸ ߏ߬ ߟߋ ߥߙߎߞߌ߫ ߓߟߏߕߍ߰ߓߊߟߌ ߛߌߟߊ ߟߎ߬ ߛߊ ߘߌ߫ ߞߊ߲ߞߊ߲߫ ߞߏ ߘߐ߫ ߛߍߣߍ߲߬߸ ߞߊ߬ ߝߘߊ߫ ߞߏ ߟߎ߬ ߓߍ߲߬ ߠߊ߫ ߡߐ߰ ߘߊ߲߬ߘߐ߬ߣߍ߲߫ ߡߊ߬ ߕߋ߲߬.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.