ߞߵߊ߬ ߓߍ߲߬ ߂߀߂߅ ߞߏߟߌ߲ߞߏߟߌ߲ ߕߋ߬ߟߋ߫ ߂߈ ߞߊ߲ߕߌ߯ ߢߣߊߕߊߟߌ ߕߊ߬ߡߌ߲߬ ߢߊ ߡߊ߬߸ ߞߊ߲ߞߊ߲߫ ߕߌ߲߬ߞߎߘߎ߲ ߟߊ߬ߟߐ߲߬ߠߌ߲߬ߠߌ߲ ߣߌ߫ ߓߌ߬ߟߊ߬ߢߐ߲߰ߡߊ ߗߋߕߌ߮ ߓߘߊ߫ ߘߌ߲߬ߞߌߙߊ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߊ߯ߙߊ ߕߊ߲߬ߘߏ߬ ߞߏߛߓߍ߫، ߊ߬ ߞߊ߬ ߝߌߘߊ ߓߐ߫ ߟߊ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߊ߯ߙߊ ߢߍߡߊ߬߸ ߊ߬ߟߎ߫ ߞߊ߬ ߡߍ߲ ߞߍ߫ ߖߐ ߟߊߛߓߊ߬ߕߌ ߘߐ߫߸ ߖߛߎ߬ߛߎߡߊ ߓߊ߲ߓߊ߲ ߘߐ߫ ߥߊ߯ߕߌ߫ ߟߊ߫߸ ߡߍ߲ ߢߍ߬ߣߍ߲ ߓߏ߲߬ߓߊ߬߸ ߣߊߟߌ߬ߡߎ߲߬ ߢߣߊߕߊߟߌ ߥߎ߬ߛߎ ߘߌ߫.
ߞߊ߲ߞߊ߲߫ ߕߌ߲߬ߞߎߘߎ߲ ߟߊ߬ߟߐ߲߬ߠߌ߲߬ߠߌ߲ ߣߌ߫ ߓߌ߬ߟߊ߬ߢߐ߲߰ߡߊ ߗߋߕߌ߮ (ߕߟߓߗ)߸ ߡߊ߬ߡߊ߬ߘߌ߬ ߞߊ߲ߛߊ߲ ߘߎ߲ߓߎߦߊ߫ ߞߵߊ߬ ߟߊ߫ ߥߊߟߢߌߡߊߟߐ߲ ߝߏ߬ߟߌ ߟߊߛߋ߫ ߕߎ߲߬ߞߎߘߎ߲ ߝߐ߰ߓߍ߬ߦߊ߬ߟߊ ߟߎ߫ ߡߊ߬߸ ߊ߬ߟߎ߬ ߞߍ ߘߐ߫ ߞߊ߬ ߖߐ ߣߌ߫ ߖߛߎ߬ߛߎߡߊ ߟߊߕߊ߲߬ߞߊ߫ ߢߣߊߕߊߟߌ ߞߎ߲߬ߕߊ߮ ߞߣߐ߫߸ ߂߀߂߅ ߞߏߟߌ߲ߞߏߟߌ߲ ߂߈ ߞߊ߲ߕߌ߯ ߢߣߊߕߊߟߌ ߞߊ߬ߣߌ߲߬.
ߊ߬ ߞߊ߬ ߛߙߊ߬ߣߎ߲ ߕߊ߬ ߞߍ߲ߘߍߟߏ߲ ߣߌ߲߬ ߡߊ߬߸ ߂߀߂߆ ߓߌ߲ߠߊߥߎߟߋ߲ ߕߟߋ߬ ߁߀߸ ߝߐ߰ߓߍ߬ ߜߙߊ ߘߏ߫ ߘߊߞߎ߲ ߘߐ߫߸ ߡߍ߲ ߞߍ߫ ߘߊ߫ ߞߊ߲ߞߊ߲߫ ߕߌ߲߬ߞߎߘߎ߲ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߏ߲ߓߊ ߟߊ߫߸ ߞߵߊ߬ ߛߐ߬ߘߐ߲߬ ߝߐ߰ߓߍ߬ߦߟߊ߬ ߛߌߦߊߡߊ߲߫ ߦߋ߫ ߞߣߍ ߞߊ߲߬ ߞߊ߬ ߝߘߊ߫ ߝߐ߰ߓߍ߬ߘߊ߬ ߓߐߣߍ߲߫ ߢߐ߲߰ ߡߊ ߟߎ߬ ߟߊ߫.
ߗߋߕߌ߯ ߡߊ߬ߡߊ߬ߘߌ߬ ߞߊ߲ߛߊ߲ ߘߎ߲ߓߎߦߊ߫ ߞߵߊ߬ ߦߌ߬ߘߊ߬ ߞߏ߫ ߢߐ߲߯ߦߋ ߣߌ߲߬ ߦߴߊ߬ ߓߟߏ߫ ߞߏߢߌߡߊߟߐ߲ ߢߐ߲߯ߦߋ ߟߋ߬ ߘߌ߫߸ ߞߊ߬ ߝߐ߰ߓߍ߬ߦߊ߬ߟߊ ߟߎ߫ ߝߏ߬ ߊ߬ߟߎ߬ ߟߊ߫ ߢߊߟߐ߲ ߓߊ߯ߙߊ ߟߊ߫ ߢߣߊߕߊߟߌ ߢߍ߫߸ ߊ߬ ߕߎ߬ߡߊ ߟߊ߫߸ ߊ߬ ߣߴߊ߬ ߞߐߝߍ߬، <<ߊ߲ ߞߊ߬ ߝߐ߰ߓߍ߬ߦߊ߬ߟߊ ߟߎ߬ ߦߋ߫ ߟߋ߬߸ ߞߵߊ߬ߟߎ߫ ߝߏ߬߸ ߊ߬ߟߎ߬ ߟߊ߫߫ ߖߋ߬ߓߌ߬ߦߊ߬ߟߌ ߟߊ߫߸ ߊ߬ ߣߴߊ߬ߟߎ߬ ߟߊ߫ ߞߏ߫ ߞߍ ߞߏߛߐ߲߬ ߖߐ ߣߌ߫ ߖߛߎ߬ߛߎߡߊ ߓߊ߲ߓߊ߲ ߘߐ߫ ߢߣߊߕߊߟߌ ߕߎ߬ߡߊ ߟߊ߫߸ ߏ߬ ߡߍ߲ ߢߍ߬ߣߍ߲ ߓߏ߲߬ߓߊ߬.>> ߞߊ߲ߛߊ߲߫ ߠߋ߬ ߞߊ߲߫ ߕߋ߲߬.
ߗߋߕߌ߮ ߟߊ߫ ߝߐߟߌ߫ ߘߐ߫߸ ߞߊ߲ߞߊ߲߫ ߞߌ߬ߓߊ߬ߙߏ߬ߘߊ ߟߎ߫ ߞߊ߬ ߢߣߊߕߊߟߌ ߞߍߞߎߘߊ ߟߎ߬ ߡߊߡߊ߬ߙߴߊ߬ ߢߌ߬ߡߊ ߟߊ߫ ߟߋ߬ ߝߛߊߦߌ߫߸ ߊ߬ߟߎ߬ ߛߋ߫ ߘߊ߫ ߡߊ߲߬ߞߊ߲ ߠߎ߬ ߡߊߝߊ߰ ߟߊ߫ ߥߊ߯ߕߌ߫ ߟߊ߫߸ ߡߍ߲ ߡߊߟߐ߲ߣߍ߲߫ ߡߐ߱ ߟߎ߬ ߓߟߏ߫ ߡߊ߲߬ߞߊ߲ ߕߎ߬ߡߊ ߘߌ߫ ߓߘߍ߬ߓߘߍ߬ߟߌ ߝߐߢߐ߲߯ߞߐ ߟߎ߬ ߞߏߛߐ߲߬. <<ߘߌ߲߬ߞߌߙߊ ߞߌ߬ߓߊ߬ߙߏ߬ߘߊ߬ ߕߴߦߋ߲߬߸ ߞߵߏ߬ ߟߴߊ߬ߟߎ߬ ߓߏߟߏ߲ߝߘߊ ߟߎ߬ ߞߊ߲߬߸ ߡߍ߲ ߠߎ߬ ߞߊ߬ ߞߐߣߌ߲ߧߊ߫ ߞߎߡߊ ߟߎ߬ ߟߊߛߋ߫ ߓߙߊߡߊߖߊ߲ߓߊ߲ ߞߎ߲߬ߕߊ߮ ߞߣߐ߫، ߏ߬ ߦߋ߫ ߖߛߎ߬ߟߊ߬ߖߌ߰ ߞߏ߬ߓߊ߫ ߟߋ߬ ߘߌ߫.>> ߊ߬ ߞߵߏ߬ ߟߴߊ߬ ߟߊ߫ ߛߙߊ߬ߣߎ߲ ߞߊ߲߬.
ߡߊ߬ߡߊ߬ߘߌ߬ ߞߊ߲ߛߊ߲ ߘߎ߲ߓߎߦߊ߫ ߛߙߊ߬ߣߎ߲߬ ߘߊ߫ ߝߐ߰ߓߍ߬ߦߊ߬ߟߌ ߓߊߖߎ ߟߎ߫ ߞߊ߲߬߸ ߣߴߏ߬ ߦߋ߫ ߞߏ ߟߎ߬ ߟߊߛߋ ߘߌ߫ ߦߏ߫ ߊ߬ߟߎ߬ ߞߊ߫ ߞߊ߲߫ ߞߊ߬ ߟߊߛߋ߫ ߢߊ ߡߍ߲ ߡߊ߬߸ ߞߵߊ߬ߟߎ߫ ߓߌ߬ߟߊ߫ ߡߊ߲߬ߕߊ߮ ߟߊ߫߸ ߞߵߊ߬ߟߎ߬ ߟߊߛߋ߫ ߕߍߕߋߟߋ߲ ߠߊ߫߸ ߞߊ߬ ߞߐ ߛߍ߲߬ߓߍ߫ ߓߊ߯ߚߊ ߛߊ߬ߙߌ߬ߦߊ ߟߎ߬ ߟߊ߫، ߊ߬ ߟߊ߫ ߞߎߡߊ߫ ߘߐ߫߸ ߓߙߊߡߊߖߊ߲ߓߊ߲ ߓߋߟߋ߲ߠߊ ߟߎ߬ ߟߊ߫ ߝߐߢߐ߲߯ߞߐ ߣߴߊ߬ߟߎ߬ ߟߊ߫ ߝߊߘߌ߲ߧߊ ߣߴߊ߬ ߕߊ߫߸ ߝߐ߰ߓߍ߬ߦߊ߬ߟߊ ߟߎ߬ ߛߋ߫ ߘߴߏ߬ ߟߎ߬ ߘߐߛߏߘߏ߲ߜߊ߫ ߟߊ߫ ߢߊ߫ ߡߊ߬߸ ߖߌ߰ ߕߍ߫ ߞߍ߫ ߡߐ߰ ߟߊ߫ ߡߍ߲ ߘߐ߫߸ ߞߎߡߊߕߍ߫ ߞߊ߬ ߢߊ߬ߡߊ߲߫ ߓߌ߬ߟߴߊ߬ߟߎ߬ ߟߊ߫.
ߊ߬ ߞߊ߬ ߕߊ߲߬ߘߏ߬ߟߌ߬ ߞߋߟߋ߲ ߏ߬ ߟߊߛߋ߫ ߢߣߊߕߊߟߌ ߘߐ߫ ߘߏߣߍ߲߫ ߞߍߟߊ ߓߍ߯ ߡߊ߬߸ ߛߌ߲߬ߝߏ߲߬ߘߊ ߟߎ߫ ߓߊ߬߸ ߟߊ߬ߞߊ߲߬ߘߊ߬ߟߌ ߣߌ߫ ߡߊ߬ߞߊ߲߬ߞߊ߲߬ߠߌ߲ ߝߊ߲߬ߞߊ ߟߎ߬ ߓߊ߬߸ ߘߎ߰ߘߋ߲ ߠߎ߬߸ ߡߍ߲ ߠߎ߬ ߛߋ߫ ߘߴߊ߬ ߞߍ߫ ߟߊ߫߸ ߤߊ߲߯ ߢߣߊߕߊߟߌ ߕߊ߬ߡߌ߲߬ ߘߴߊ߬ ߢߌ߬ߡߊ ߟߊ߫ ߕߌ߲߬ߞߎߘߎ߲ ߞߣߐ߫، ߊ߬ ߞߊ߬ ߟߞߊ߬ߟߌ߬ߕߊ߬ ߢߌ߬ߣߌ߲߬ߠߊ ߟߎ߬ ߝߣߊ߫ ߝߏ߬߸ ߛߋߒߞߏߟߊ ߟߎ߬߸ ߘߐ߬ߡߙߌ߬ߟߌ߬ߟߊ ߟߎ߬߸ ߏ߬ ߟߎ߬ ߡߍ߲ ߛߋ߫ ߘߊ߫ ߓߊ߯ߙߊ߫ ߟߊ߫ ߝߘߏ߬ߓߊ߬ߦߊ ߟߊ߫߸ ߞߊ߬ ߛߋ߫ ߡߌ߬ߙߌ߲߬ߘߌ ߟߊߟߐ߲ߠߌ߲߫ ߠߊ߫ ߢߊ߫ ߡߊߟߐ߲ߣߍ߲߫ ߡߊ߬.
ߘߎߢߊ߫ ߓߌ߬ߟߊ߬ߢߐ߲߰ߡߊ߬ ߕߟߋ ߣߌ߲߬ ߘߐ߫߸ ߗߋߕߌ߮ ߛߙߊ߬ߣߎ߲߬ ߘߊ߫ ߞߌ߬ߓߊ߬ߙߏ ߟߎ߬ ߟߊ߫ ߛߋ߲߬ߠߊ߬ߞߊߟߌߦߊ ߞߊ߲߬، ߏ߬ ߟߋ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߞߊ߬ ߞߊߘߊ߲߫ ߞߍ߫ ߞߊ߬ ߛߋ߫ ߟߌ߬ߤߟߊ ߟߎ߬ ߓߐߛߎ߲߫ ߞߏ ߢߊߢߌߣߌ߲߫ ߠߊ߫ ߖߌ߫ ߢߡߊߟߐ߬ߣߍ߲߬ ߞߘߐ߫߸ ߛߊ߫ ߡߊ߲߬ߞߊ߲߬ ߝߎ ߟߎ߬ ߞߊߣߊ߬ ߥߌ߬ߟߌ߫ ߕߋ߲߬ ߝߎ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߝߐ߰ߓߍ߬ߦߊ߬ߟߊ ߦߋ߫ ߕߊ߲ߓߊ߲ ߠߋ߬ ߘߌ߫߸ ߞߊ߬ ߖߊ߬ߡߊ ߞߎ߲߬ߠߊ߬ߝߏߣߌ߲߫߸ ߞߊ߬ ߖߡߊ߬ߣߊ߬ߘߋ߲ ߠߎ߬ ߞߍ߫ ߞߟߊ߬ߡߊ߬ߓߊ߮ ߘߌ߫.
ߢߐ߲߯ߓߍ߲߫ ߞߋߟߋ߲ ߣߌ߲߬ ߘߐ߫߸ ߡߊ߬ߡߊ߬ߘߌ߬ ߞߊ߲ߛߊ߲ ߘߎ߲ߓߎߦߊ߫ ߞߵߏ߬ ߓߍ߲߬ߒ߬ߛߋ߲߬ߡߊ ߕߣߐ߬ߓߐ߫߸ ߞߊ߬ ߖߡߊ߬ߣߊ ߝߊ߰ߡߊ ߟߎ߫ ߝߏ߬ ߞߵߊ߬ߟߎ߬ ߞߎߟߎ߲ߖߋ߫߸ ߊ߬ߟߎ߬ ߟߊ߫ ߓߊ߯ߙߊ߫ ߓߘߍ ߘߏ߫ ߟߊ߫ ߖߌ߬ߣߍ߫ ߖߌ߬ߦߊ߬ߞߊ߲߬ߛߏ߬ߓߊ ߝߐ߰ߓߍ߬ߦߊ߬ߟߊ ߘߏ߫ ߟߊ߫ ߞߐߙߍ ߦߋ߫߸ ߛߊ߬ߓߊ߰ߕߐ߫ ߘߊߥߎߘߊ߫ ߕߊ߬ߓߊ߲߫ ߛߌ߬ߟߊ߬߸ ߏ߬ ߡߍ߲ ߛߊ߬ ߘߊ߫ ߂߀߂߅ ߘߓߊ߬ߕߊ߫ ߕߊ߬ߡߌ߲߬ߣߍ߲ ߠߊ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߟߎ߫ ߢߣߊߡߊ߫ ߟߐ߬ ߘߴߏ߬ ߦߋ߫߸ ߓߏ߲ߞߣߐ߫ ߟߏ߯ߟߎ߫߸ ߡߍ߲ ߟߐ߬ ߘߊ߫ ߞߐ߬ߓߊ߬ߦߊ߫، ߟߎ ߏ߬ ߞߏ߲ߢߌ߲ ߓߘߊ߫ ߟߊߕߊ߬ߡߌ߲߬ ߞߐߙߍ ߡߊ߬߸ ߖߊ߲߬ߖߏ߲߬ ߘߐ߫߸ ߡߍ߲ ߞߎ߲߬ߠߊߛߌ߰ ߘߊ߫ ߞߌ߬ߓߊ߬ߙߏ߬ߦߊ߬ߟߌ ߞߏߕߌ߮ ߝߊߣߊ߬ ߛߎߡߊ߬ ߓߟߏ߫߸ ߊ߬ ߣߌ߫ ߝߊ߲߬ߝߘߊ߬ߦߊ߬ߟߌ ߞߏߕߌ߮ ߌߛߑߡߊߍߟ ߣߊ߬ߓߋ، ߊ߬ ߞߵߊ߬ ߦߌ߬ߘߊ߬ ߞߏ߫ ߓߊ߯ߙߊ߫ ߓߛߍ ߡߍ߲ ߞߍߣߍ߲߫ ߏ߬ ߘߌ߫߸ ߏ߬ ߦߋ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߓߊ߯ߙߊ߫ ߓߘߍ ߞߐߝߟߌ ߟߋ߬ ߥߊߟߢߌߡߊߟߐ߲ ߘߌ߫ ߞߎ߲߬ߠߊ߬ߛߌ߮ ߓߟߏ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߝߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.