ߊ߬ ߛߊ߲߬ ߘߊ߲ߘߐ ߟߋ߬ ߕߋ߲߬߸ ߞߊ߲ߞߊ߲߫ ߞߐߙߐ߲ߘߌߓߐ߫ ߞߏߟߊߘߍ ߟߊ߫ ߓߊ߯ߙߊ ߟߎ߫ ߛߋ߲߬ߠߊ߬ߛߎߡߊ߲ߡߊ߲߫ ߦߙߍߕߍߕߍ߫، ߒ߬ߓߊ߬߸ ߊ߬ߟߎ߬ ߓߘߊ߫ ߛߋ߲߬ߕߊ߬ ߞߎߘߊ߫ ߟߋ߬ ߘߊߡߌ߬ߣߊ߫ ߕߋ߲߬߸ ߡߍ߲ ߞߍߕߐ߫ ߕߙߎ߬ ߘߌ߫ ߞߊ߬ ߖߌ߬ߣߍ߬ ߜߍߞߊ߲ߠߊ ߞߐߙߐ߲ߘߌ߫ ߞߏ ߛߌ߰ ߞߟߊ߬ ߞߋߟߋ߲߫ ߞߊ߲߬، ߞߏߟߊߘߍ ߣߌ߲߬ ߞߏߟߊߕߍ߮ ߟߎ߬ ߓߘߴߊ߬ ߦߌ߬ߘߊ߬߸ ߞߏ߫ ߊ߬ߟߎ߬ ߓߘߊ߫ ߥߌ߬ߟߌ߫ ߥߟߌ߬ߟߌ ߖߍ߬ߘߍߖߍ߬ߘߍ ߘߌ߫ ߡߎ߬ߕߎ߲߬߸ ߞߊ߬ ߞߐߙߐ߲ߘߌ߫ ߛߣߍ ߝߊ߲߬ߞߊߘߏ߲߬߸ ߡߞߊ߬ߛߟߌ߬ ߞߊ߲ ߡߍ߲ ߠߎ߬ ߦߋ߫ ߞߐߙߐ߲ߘߌ߫ ߛߣߍߟߊ ߟߎ߬ ߘߊ߫߸ ߞߊ߬ ߛߴߏ߬ ߟߎ߫ ߖߌ߱ ߡߝߊ߫ ߟߊ߫߸ ߛߊ߫ ߓߊ߯ߙߊ ߞߊߣߊ߬ ߟߊߣߐ߯ ߢߊ ߡߍ߲ ߡߊ߬.
ߏ߬ ߟߋ ߞߏߛߐ߲߬߸ ߊ߬ߟߎ߫ ߞߊ߬ ߟߏ߲߫ ߞߋߟߋ߲߫ ߞߙߍߞߙߍ߫ ߞߵߏ߬ ߘߌ߫ ߝߐ߰ߓߍ߬ߦߊ߬ߟߊ ߟߎ߫ ߡߊ߬߸ ߊ߬ߟߎ߬ ߦߋ߫ ߕߊ߯ ߦߋ߲߬ ߞߎ߲ߝߊ߲ߓߐ߫ ߞߵߊ߬ ߟߐ߲߫ ߞߏ ߟߎ߬ ߦߋ߫ ߘߊߞߎ߲ ߡߍ߲ ߘߐ߫، ߏ߬ ߓߍ߲߬ߒ߬ߛߋ߲߬ߡߊ ߟߋ߬ ߞߏߛߐ߲߬߸ ߞߏߟߊߘߍ ߣߌ߲߬ ߡߙߊ߬ߓߊ߰ ߓߐߣߍ߲߫ ߢߐ߲߰ ߡߊ ߟߎ߬ ߞߵߊ߬ߟߎ߬ ߟߊ߫ ߓߊ߯ߙߊ ߞߊߓߋ ߟߎ߬ ߦߌ߬ߘߊ߬߸ ߓߟߏߝߋ߲ ߠߎ߬ ߟߊ߫ ߞߏ ߞߊߡߊ߲ ߞߣߐ߫߸ ߓߊ߯ߙߊ߫ ߡߎߙߊ߲ ߠߎ߬߸ ߟߊ߬ߕߟߐ߬ߟߊ߲ ߠߎ߬߸ ߔߏߔߏߕߎߙߊ ߟߎ߬߸ ߏ߬ ߟߎ߬ ߡߍ߲ ߠߎ߬ ߘߌߕߐ߫ ߛߣߍ߬ߞߍ߬ߟߊ ߟߎ߫ ߡߊ߬߸ ߊ߬ߟߎ߬ ߦߋ߫ ߛߴߊ߬ߟߎ߬ ߟߊ߫ ߓߊ߯ߙߊ ߟߎ߬ ߞߍ߫ ߟߊ߫ ߟߊ߬ߝߙߍ ߘߐ߫߸ ߞߵߊ߬ ߟߐ߲߫ ߞߏ߫ ߓߊ߯ߙߊ ߘߊߡߌ߬ߣߊ߬ߣߍ߲߬ ߓߘߍߓߘߍ ߟߋ߬ ߕߋ߲߬ ߛߍߣߍ߲߬.
ߡߎߛߊ߫ ߞߋߕߊ߬ ߟߋ߬ ߘߐ߱ߘߏ߲߬ߣߍ߲߫ ߛߍ߬ߣߍ ߟߊ߬ߥߟߏ߬ߟߌ ߟߊ߫ ߞߏߟߊߘߍ ߣߌ߲߬ ߞߣߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߋ߫ ߓߟߏߘߐߓߍ߲ ߖߍ߬ߘߍߖߍ߬ߘߍ ߟߋ߬ ߞߊ߲߬ ߕߋ߲߬߸ ߞߵߊ߬ ߓߍ߲߬ ߛߣߍ߬ߞߍ ߓߙߊߡߊߖߊ߲ߓߊ߲߫ ߥߟߌ߬ߕߐ ߡߊ߬߸ ߊ߬ߟߎ߬ ߓߘߊ߫ ߖߊ߲߬ߝߊ߫ ߏ߬ ߓߊ߯ߙߊ ߘߐ߫ ߞߏߛߓߍ߫.
ߊ߬ߟߋ ߟߊ߫ ߝߐߟߌ߫ ߘߐ߫߸ ߞߏ ߡߍ߲ ߦߋ߫ ߞߏ ߓߍ߯ ߢߍ߫ ߕߋ߲߬߸ ߏ߬ ߟߋ ߞߐߙߐ߲ߘߌ߫ ߛߣߍߟߊ ߟߎ߬ ߦߋ ߘߌ߫߸ ߞߵߊ߬ߟߎ߫ ߓߊ߬ߘߏ߬ߢߐ߲߰ߦߊ߫ ߞߏ߲ߞߏ߫ ߞߣߐߟߊ ߟߎ߬ ߣߌ߫ ߛߏ߫ ߡߌߛߍ߲ߣߍ߲ ߠߎ߬ ߞߣߐ߫߸ ߞߵߊ߬ߟߎ߬ ߟߊߛߌ߲߫ ߓߊ߯ߙߊ ߞߍߢߊ߫ ߓߘߍ ߟߎ߬ ߟߊ߫߸ ߛߊ߫ ߘߐ߰ߘߏ߲߬ ߘߌ߫ ߞߍ߫ ߞߐߙߐ߲ߘߌ߫ ߛߣߍ ߟߊ߫ ߢߊ ߡߍ߲ ߡߊ߬.
<<ߝߊߦߌߘߊ߫߸ ߛߣߍ߬ߞߍ ߓߙߊߡߊߖߊ߲ߓߊ߲ ߠߋ߬ ߘߊߡߌ߬ߣߊ߬ߕߐ߬ߟߊ ߦߋ߫ ߕߋ߲߬، ߓߊߏ߬߸ ߝߏ߫ ߞߊ߬ ߥߊ߫ ߟߋ߬ ߛߣߍ߬ߞߍ߬ߟߊ ߟߎ߬ ߦߋ߫߸ ߞߵߊ߬ߟߎ߬ ߞߎߡߊߢߐ߲߯ߦߊ߫߸ ߞߵߊ߬ߟߎ߬ ߟߊߟߐ߲ߠߌ߲߫ ߞߏ ߟߎ߬ ߥߊ߫ ߢߊ߫ ߞߎߘߊ ߟߊ߫߸ ߡߙߌߦߊ ߡߍ߲ ߠߎ߬ ߦߋ߫ ߞߐߙߐ߲ߘߌ߫ ߞߏߟߊߘߍ ߟߊ߫߸ ߞߵߏ߬ ߢߊߝߐ߫ ߊ߬ߟߎ߬ ߦߋ߫، ߊ߬ ߘߏ߲߬߸ ߊ߲ ߘߊߘߐߞߊ߲ ߛߊߣߌ߲ߡߊ߲߫ ߠߋ߬ ߛߎߋ߫: ߊ߲ ߓߘߊ߫ ߓߌ߫߸ ߞߊ߬ ߞߐߙߐ߲ߘߌ߫ ߛߣߍ ߘߊߡߌ߬ߣߊ߬.>> ߊ߬ ߞߵߏ߬ ߢߊߝߐ߫.
ߊ߬ ߞߵߊ߬ ߦߌ߬ߘߊ߬ ߞߏ߫ ߞߐߙߐ߲ߘߌ߫ ߛߣߍ߫ ߕߊ߬ߡߌ߲߬ߣߍ߲ ߠߎ߬ ߞߍ߫ ߘߊ߫ ߛߣߍ߬ߞߍ߬ߟߊ ߟߎ߫ ߡߊ߬ ߕߙߐߦߊ߫ ߛߌߦߊߡߊ߲߫ ߠߋ߬ ߘߌ߫߸ ߞߵߏ߬ ߞߎ߲߭ ߞߍ߫ ߛߣߍ߬ߞߍ߬ ߡߎߙߊ߲ ߠߎ߬ ߞߏߖߊ ߘߌ߫߸ ߝߍߘߍ߲ߝߋ߲߫ ߘߊ߲ߘߊߟߊ߲ ߠߎ߬ ߜߟߍ߬ߦߊ߸ ߞߵߏ߬ ߟߊ߫ ߕߐ߬ߣߐ߫ ߛߐ߬ߘߐ߲߬ߣߍ߲ ߠߎ߬ ߛߙߊ߬ߓߊߟߌߦߊ ߞߊ߲߬ ߖߏߣߦߊ߫ ߓߟߏ ߡߊ߬.
<<ߛߊ߲߭ ߘߏ߫ ߟߎ߫ ߓߘߊ߫ ߕߊ߬ߡߌ߲߫ ߦߊ߲߬߸ ߏ߬ ߟߎ߬ ߞߍ߫ ߘߊ߫ ߜߟߍ߬ߦߊ߬ߓߊ߫ ߟߋ߬ ߘߐ߫ ߛߣߍ߬ߞߍ߬ߟߊ ߟߎ߫ ߞߊ߲߬، ߓߊ߬ߙߌ߬ ߓߌ߬߸ ߊ߲ ߓߘߊ߫ ߞߊߘߊ߲ ߓߍ߯ ߞߍ߫߸ ߝߏߦߌ߬ ߣߌ߫ ߞߍߟߌ ߦߊ߫ ߞߊ߲߫߸ ߞߊ߬ ߛߴߏ߬ ߟߎ߬ ߞߍ߫ ߟߊ߫߸ ߖߐ߲߰ߛߊ߫ ߢߌ߬ߣߊ߲߫ ߛߣߍ߬ߞߍ ߘߌ߫ ߞߍ߫ ߟߊ߬ߝߙߍ ߘߐ߫߸ ߞߊ߬ ߟߊߒߠߦߊ ߟߊߛߊ߬ߦߌ߲߫ ߊ߬ ߢߊ߫ ߞߘߐ ߡߊ߬.>> ߊ߬ ߞߵߏ߬ ߟߊߕߍ߰ ߝߋߎ߫.
ߞߏ ߟߎ߬ ߘߊߡߌ߬ߣߊ߬ߕߐ߬ߟߊ ߣߌ߲߬ ߘߐ߫ ߞߏߞߎߘߊ߫߸ ߊ߲ ߢߊ ߛߙߋߦߊ߫ ߘߊ߫ ߔߏߔߏߕߎߙߊ ߘߏ߫ ߟߎ߫ ߡߊ߬ ߦߋ߲߬߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߡߍ߲ ߠߎ߬ ߦߙߌߞߊ ߘߌ߫ ߅߀ ߓߐ߫، ߏ߬ ߟߎ߬ ߞߍߕߐ߫ ߛߣߍ߬ߞߍ߬ߟߊ ߟߎ߬ ߡߊߘߍ߬ߡߍ߲߬ ߝߋ߲ ߠߋ߬ ߘߌ߫߸ ߛߴߊ߬ߟߎ߬ ߘߌ߫ ߛߋ߫ ߜߍߞߣߍ߫ ߛߌߦߊߡߊ߲߫ ߛߣߍ߬ ߟߊ߫ ߢߊ ߡߍ߲ ߡߊ߬، ߏ߬ ߟߋ ߘߐ߫߸ ߡߎߛߊ߫ ߞߋߕߊ߬ ߞߵߊ߬ ߦߌ߬ߘߊ߬߸ ߞߏ߫ ߓߊ߯ߙߊ߫ ߡߎߙߊ߲ ߏ߬ ߟߎ߬ ߞߍߕߐ߫ ߛߣߍ߬ߞߍ߬ߟߊ ߟߎ߬ ߡߊߘߍ߬ߡߍ߲߬ߝߋ߲߬ߓߊ߫ ߟߋ߬ ߘߌ߫߸ ߡߍ߲ ߘߴߊ߬ ߞߍ߫߸ ߓߊ߯ߙߊ߫ ߛߌߦߊߡߊ߲߫ ߘߌ߫ ߛߋ߫ ߞߍ߫ ߟߊ߫ ߥߊ߯ߕߌ߫ ߞߎߘߎ߲ߣߍ߲ ߞߘߐ߫.
<<ߔߏߔߏߕߎߙߊ ߏ߬ ߟߎ߬ ߛߘߊ߫ ߘߐ߫߸ ߛߣߍ߬ߞߍ߬ߟߊ ߘߌ߫ ߛߋ߫ ߓߋ߬ߝߘߍ߫ ߛߓߊ߬߸ ߤߊ߲߯ ߟߏ߯ߟߎ߫ ߛߣߍ߬ ߟߊ߫߸ ߡߍ߲ ߘߴߊ߬ ߞߍ߫ ߊ߬ ߕߍ߫ ߥߊ߯ߕߌ߫ ߖߊ߲߫ ߕߊ߬߸ ߏ߬ ߣߐ߰ߡߊ߲߫ ߣߌ߬ߛߌ ߟߎ߬ ߕߊ ߘߌ߫ ߛߋ߲߬ߢߊ߬ ߦߙߌߞߊ߫߸ ߊ߬ ߜߋ߲ߜߋ߲߫ ߛߌ߫ ߡߊߞߍ߫ ߥߊ߯ߕߌ ߟߊ߫ ߖߍ߬ߘߍ.>> ߊ߬ ߞߵߏ߬ ߔߘߋߔߘߋߟߊߕߍ߰.
ߕߙߏ߬ߞߏ ߡߍ߲ ߠߎ߬ ߦߋ߫ ߦߋ߲߬ ߕߋ߲߬߸ ߏ߬ ߟߎ߬ ߘߌߕߐ߫ ߛߣߍ߬ߞߍ߬ߟߊ ߟߎ߫ ߡߊ߬ ߛߐ߲߬ߞߐ߬ ߣߐ߲߮ ߠߋ߬ ߟߊ߫߸ ߡߍ߲ ߕߍ߫ ߛߙߊ߬ ߟߊ߫ ߞߋߟߋ߲ߘߌ߫ ߝߣߊ߫.
ߞߊ߲ߞߊ߲߫ ߞߐߙߐ߲ߘߌߓߐ߫ ߞߏߟߊߘߍ ߣߌ߲߬ ߝߘߏ߬ߓߊ߬ ߗߋߕߌ߮߸ ߡߎߛߊ߫ ߘߎ߲ߓߎߦߊ߫ ߕߊ߫ ߖߊ߬ߕߋ߬ ߘߐ߫߸ ߞߏ߫ ߢߌ߬ߣߊ߲߫ ߛߣߍ߬ߞߍ ߟߊ߫ ߛߎߘߊ߲ ߓߕߐ߫ ߡߎ߲߬ ߘߐ߫߸ ߏ߬ ߟߋ ߟߊߒߠߦߊ ߘߌ߫ ߛߣߍ߬ߞߍ߬ߟߊ ߟߎ߬ ߓߘߊ߫ ߝߊ߲߭ ߝߍ߬، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߦߋ߫ ߓߊ߯ߙߊߘߋ߲ ߠߎ߬ ߟߋ߬ ߘߌ߫߸ ߞߊ߬ ߛߋ߫ ߛߣߍ߬ߞߍ߬ߟߊ ߟߎ߬ ߡߊߘߍ߬ߡߍ߲߬ ߠߊ߫߸ ߊ߬ߟߎ߬ ߦߋ߫ ߓߊ߯ߙߊ߫ ߊ߬ߟߎ߬ ߛߋߞߏ ߟߊ߫.
<<ߝߊ߲ߓߏ߲ ߠߊߥߌ߬ߟߌ ߡߍ߲ ߦߋ߫ ߕߋ߲߬߸ ߡߐ߰ ߛߌߦߊߡߊ߲߫ ߠߋ߬ ߣߐ߬ ߘߏ߫ ߞߍ߫ ߟߴߊ߬ ߘߐ߫߸ ߞߊ߲ߓߍ߲ ߞߊ߲ߕߌ߮ ߦߴߏ߬ ߟߋ ߘߐ߫߸ ߊ߬ ߞߊ߬ ߖߡߊ߬ߙߌ߬ ߜߍߟߍ߲ ߘߌ߫߸ ߞߏ߫ ߛߌߞߊ߫ ߞߊߣߊ߬ ߓߌ߬ߟߊ߬ ߞߐߙߐ߲ߘߌ߫ ߝߊ߲ߓߏ߲ ߘߐ߫ ߡߎ߬ߕߎ߲߬، ߏ߬ ߘߐ߫߸ ߊ߬ߟߎ߬ ߦߋ߫ ߟߊߒߠߦߊ ߟߊ߫ ߞߏߟߊߘߍ ߘߐ߫߸ ߞߵߊ߬ ߟߐ߲߫ ߞߏ߫ ߣߌ߲߬ߛߋ߲߬ ߕߊ ߣߌ߲߬ ߦߋ߫ ߕߏߒߡߕߊ ߟߋ߬ ߘߌ߫.>> ߗߋߕߌ߮ ߟߋ߬ ߞߊ߲߫ ߕߋ߲߬.
ߡߊ߬ߡߊ߬ߘߌ߫ ߞߓߊ߬ ߡߍ߲ ߦߋ߫ ߖߌ߬ߣߍ߬ ߞߐߙߐ߲ߘߌߛߣߍߟߊ ߟߎ߬ ߟߊ߫ ߞߙߎߝߊ ߞߊ߲ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߓߘߊ߫ ߟߊߒߠߦߊ ߛߐ߬ߘߐ߲߫ ߣߌ߲߬ߛߋ߲߭߸ ߞߏ߫ ߓߊ߯ߙߊ ߘߊߡߌ߬ߣߊ߬ߕߐ ߟߵߏ߬ ߘߌ߫ ߝߋߝߋ߫.
<<ߊ߲ߠߎ߬ ߞߐߙߐ߲ߘߌ߫ ߛߣߍߟߊ ߟߎ߬ ߓߌߣߍ߲߫ ߠߋ߬ ߛߎ ߣߌ߫ ߕߋ߬ߟߋ، ߣߌ߫ ߓߊ߯ߙߊ߫ ߡߎߙߊ߲ ߠߎ߬ ߓߊ߲߫ ߘߊ߫ ߛߋ߫ ߟߴߊ߲ ߓߟߏ߫߸ ߞߊ߬ ߟߊ߬ߕߟߐ߬ߟߊ߲߬ ߞߏ ߟߎ߬ ߢߊߓߐ߫߸ ߞߐߙߐ߲ߘߌ ߛߊ߲߬ ߞߏ ߕߡߊ߬ߖߌ߬ ߕߴߦߋ߲߬߸ ߊ߬ ߥߊߘߌ ߛߐ߬ߘߐ߲߬ ߞߏ ߕߡߊ߬ߖߌ߬ ߕߴߦߋ߲߬߸ ߛߣߍ߬ߞߍ߬ߟߊ ߟߎ߬ ߘߌ߫ ߛߍ߬ߣߍ ߘߊߡߌ߬ߣߴߊ߬ ߢߌ߬ߡߊ ߟߊ߫ ߝߋߝߋ߫߸ ߞߵߊ߬ߟߎ߬ ߞߐߛߊ߬ߦߌ߲߫ ߛߍ߬ߣߍ ߘߐ߫.>> ߊ߬ ߞߵߏ߬ ߦߌ߬ߘߊ߬.
ߊ߬ ߞߵߊ߬ ߦߌ߬ߘߊ߬ ߞߏ߫ ߞߐߙߐ߲ߘߌ߫ ߝߊ߲ߓߏ߲ ߓߊ߯ߙߊ ߟߊߟߐ߭ ߞߍ߫ ߘߊ߫ ߕߙߎ߬ ߘߌ߫߸ ߞߊ߬ ߛߣߍ߬ߞߍ߬ߟߊ߬ ߛߌߦߊߡߊ߲߫ ߠߋ߬ ߞߐߘߏ߲߬ ߞߐߙߐ߲ߘߌ߫ ߛߣߍ ߟߊ߫߸ ߞߊ߬ ߥߊ߫ ߘߊ߬ߡߊ߲߬ߘߊ ߟߎ߬ ߟߊ߫ ߦߙߐ߫ ߛߌߦߊߡߊ߲߫ ߘߐ߫.
ߡߙߌߦߊ ߡߍ߲ ߠߎ߬ ߕߊ߬ߣߍ߲߫ ߞߵߊ߬ ߓߍ߲߬ ߓߊ߯ߙߊ ߟߊߟߐ߬ߓߊߟߌߦߊ ߡߊ߬ ߡߎߕߎ߲߬߸ ߗߋߕߌ߯ߘߊ ߞߵߏ߬ ߟߎ߬ ߛߌߝߊ߫، ߞߊ߬ߕߎ߲߯߸ ߞߏ߫ ߛߣߍ߬ߞߍ߬ߟߊ ߟߎ߬ ߟߊ߫ ߖߟߎ߬ ߛߌߌߦߊߡߊ߲߫ ߠߋ߬ ߕߘߍ߬ ߞߏߟߊߘߍ ߟߊ߫، ߝߘߏ߬ߓߊ߬ ߗߋߕߌ߮ ߞߊ߲߫߸ ߞߏ߫ ߛߣߍ߬ߞߍ߬ߟߊ ߘߏ߫ ߟߎ߫ ߕߎ߲߬ ߓߘߊ߫ ߛߊ߲߬ ߦߙߌߞߊ߫ ߞߍ߫߸ ߊ߬ߟߎ߬ ߓߟߏ ߡߊ߫ ߟߴߊ߬ߟߎ߬ ߟߊ߫ ߥߊߘߌ ߘߐ߫. <<ߊ߲ ߣߊ߭ ߡߍ߲ ߞߍ߫ ߘߊ߫߸ ߛߣߍ߬ߞߍ߬ߟߊ ߘߏ߫ ߟߎ߫ ߛߌ߰ߣߍ߲߫ ߕߍ߬ߘߍ߫ ߊ߬ߟߎ߬ ߟߊ߫ ߥߊߘߌ߫ ߡߊߞߐߣߐ߲ ߞߊ߲߬߸ ߞߊ߬ߦߌ߯ ߛߊ߲߭ ߛߓߊ߬ ߊ߬ߟߎ߬ ߟߊ߫ ߥߊߘߌ ߡߊ߫ ߛߙߊ߬، ߓߌ߬ ߢߐ߲߰ ߟߏ߲߫߸ ߊ߲ ߓߘߊ߫ ߖߎ߬ߟߎ ߏ߬ ߡߎ߰ߡߍ ߛߙߊ߬.>> ߏ߬ ߝߐ߫ ߘߊ߫ ߡߎߛߊ߫ ߘߎ߲ߓߎߦߊ߫ ߟߋ߬ ߓߟߏ߫.
ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߞߐߙߐ߲ߘߌ߫ ߛߌߦߊߡߊ߲߫ ߠߋ߬ ߕߏ߲߬ߣߍ߲߫ ߛߣߍ߬ߞߍ߬ߟߊ ߘߏ߫ ߟߎ߫ ߓߟߏ߫߸ ߡߍ߲ ߠߎ߬ ߡߊ߫ ߛߋ߫ ߛߊ߲߬ ߠߊ߫، ߞߏ߫ ߊ߬ߟߎ߬ ߘߴߏ߬ ߟߎ߬ ߓߍ߯ ߕߊ߬߸ ߞߵߊ߬ߟߎ߬ ߥߊߘߌ ߟߎ߬ ߝߣߊ߫ ߛߙߊ߬ ߦߊ߬ߣߌ߫ ߞߊߙߏ߫ ߛߊ.
ߡߍ߲ ߓߍ߲߬ߕߐ߫ ߞߐߙߐ߲ߘߌ ߓߊ߯ߙߊ߫ ߞߏ ߡߊ߬߸ ߞߊ߲ߞߊ߲߫ ߞߐߙߐ߲ߘߌ߫ ߞߏߟߊߘߍ ߞߊ߲߫ ߞߏ߫ ߓߊ߯ߙߊ߫ ߡߎߙߊ߲ ߓߍ߯ ߘߝߊߣߍ߲߫߸ ߝߊ߲ߓߏ߲ ߦߋ߫ ߓߊ߯ߙߊ߫ ߟߊ߫ ߝߋߝߋ߫߸ ߡߍ߲ ߘߌ߫ ߛߋ߫ ߞߐߙߐ߲ߘߌ ߓߊ߯ߙߊ߫ ߟߴߊ߬ ߢߌ߬ߡߊ ߟߊ߫ ߡߎ߬ߕߎ߲߬.
ߞߊ߬ߓߊ߫ ߞߡߊ߬ߙߊ߬ ߡߍ߲ ߘߐ߱ߘߏ߲߬ߣߍ߲߫ ߘߍ߲߰ߦߊ߬ߟߌ ߓߏ߲ߘߋ߲ ߠߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߓߊ߯ߙߊ߫ ߡߎߙߊ߲ ߠߎ߬ ߡߊߝߟߍ߫ ߞߵߊ߬ߟߎ߬ ߓߍ߯ ߓߌ߬ߟߴߊ߬ߟߎ߫ ߓߌ߬ߟߊ߬ ߦߙߐ ߘߐ߫.
<<ߝߊ߲ߓߏ߲ ߦߋ߫ ߝߊ߬ߘߌ ߡߍ߲ ߘߐ߫ ߓߌ߬߸ ߊ߬ ߘߌ߫ ߛߋ߫ ߞߐߙߐ߲ߘߌ ߓߐ߫ ߟߊ߫ ߝߛߊߦߌ߫، ߊ߲ ߓߘߊ߫ ߓߊ߯ߙߊ߫ ߡߎߙߊ߲ ߓߍ߯ ߡߊߝߟߍ߫ ߞߋߟߋ߲ߞߋߟߋ߲߫، ߊ߲ ߘߌ߫ ߛߋ߫ ߞߐߙߐ߲ߘߌ ߞߙߌߕߌ߫ ߄߀ ߀߀߀ ߢߐ߲߰ ߓߐ߫ ߟߊ߫ ߛߊ߲߭ ߞߣߐ߫.>> ߊ߬ ߞߵߏ߬ ߦߌ߬ߘߊ߬.
ߞߘߐ߬ߡߊ߲߬߸ ߝߊ߲ߓߏ߲ ߦߋ߫ ߓߊ߯ߙߊ߫ ߟߊ߫ ߞߙߎ߫ ߣߊ߯ߣߌ߲߫ ߠߋ߬ ߓߟߏ߫߸ ߡߍ߲ ߞߋ߬ߟߋ߲߬ߞߋ߬ߟߋ߲߬ߠߊ ߦߋ߫ ߓߊ߯ߙߟߊ߫ ߡߐ߰ ߈߅ ߘߌ߫߸ ߞߊ߬ ߛߋ߫ ߓߊ߯ߙߊ߫ ߟߊ߫ ߛߎ ߣߌ߫ ߕߋ߬ߟߋ، ߓߊ߬ߙߌ߬ ߓߌ߬ ߢߐ߲߰ ߟߏ߲߫߸ ߞߵߊ߬ ߓߍ߲߬ ߞߐߙߐ߲ߘߌ߫ ߛߣߍ ߟߊ߫ ߘߐ߯ߦߊ ߡߊ߬߸ ߞߙߎ߫ ߞߋߟߋ߲߫ ߔߋ߫ ߟߋ߬ ߓߊ߯ߙߊ߫ ߟߊ߫ ߕߋ߲߬߸ ߞߵߊ߬ ߛߐ߬ߘߐ߲߬ ߓߊ߯ߙߊ ߞߍߓߊ߮ ߟߎ߬ ߦߋ߫ ߦߋ߲߬ ߝߋߎ߫.
ߜߟߍ߬ߦߊ ߘߏ߫ ߟߎ߫ ߛߐ߬ߘߐ߲߬ ߘߊ߫ ߛߊ߲߬ ߠߊ߬ߓߊ߲ ߣߌ߲߬ ߞߣߐ߫߸ ߏ߬ ߓߍ߯ ߣߴߊ߬ ߕߊ߫߸ ߞߏߟߊߘߍ ߞߵߊ߬ ߞߊ߲ߠߊߘߌ߫ ߛߣߍ߬ߞߍ߬ߟߊ ߟߎ߫ ߡߊ߬߸ ߞߏ߫ ߊ߬ߟߎ߬ ߦߋ߫ ߞߐߙߐ߲ߘߌ߫ ߛߣߍ ߕߊ߬ ߛߓߍ߬ ߟߊ߫.
<<ߊ߲ ߞߵߊ߬ ߟߐ߲߫ ߝߋߎ߫߸ ߞߏ߫ ߞߐߙߐ߲ߘߌ߫ ߛߣߍߟߊ ߟߎ߫ ߖߌ߰ ߘߴߊ߲ ߠߊ߫ ߥߊ߯ߕߌ߫ ߕߊ߬ߡߌ߲߬ߣߍ߲ ߠߎ߬ ߘߐ߫، ߓߊ߬ߙߌ߬ ߓߌ߬ ߢߐ߲߰ ߟߏ߲߫߸ ߊ߬ߟߎ߬ ߦߴߊ߬ ߟߐ߲߫ ߞߏ߫ ߊ߲ ߓߘߊ߫ ߓߌ߫߸ ߞߏߟߊߘߍ ߖߍ߬ߘߍ ߜߎ ߓߘߊ߫ ߓߌ߫߸ ߞߊ߬ ߞߏ ߟߎ߬ ߘߊߡߌ߬ߣߴߊ߬ ߢߊ ߡߊ߬، ߊ߬ߟߎ߬ ߦߴߊ߬ߟߎ߬ ߟߊ߫ ߟߊߒߠߦߊ ߟߊߞߎߘߦߊ߫ ߒ߬ ߘߐ߫.>> ߝߘߏ߬ߓߊ߬ ߗߋߕߌ߮ ߟߋ߬ ߞߊ߲߫ ߕߋ߲߬.
ߕߋ߲߭ߕߋ߲߭ ߣߌ߲߬ ߞߏ߬ߣߌ߲ ߘߐ߫߸ ߓߊ߯ߙߊ ߟߎ߬ ߘߌ߫ ߛߋ߫ ߘߊߡߌ߬ߣߊ߬ ߟߊ߫ ߢߊ ߡߍ߲ ߡߊ߬߸ ߣߌ߫ ߟߊ߬ߣߐ߯ ߕߍ߫߸ ߏ߬ ߓߘߊ߫ ߢߊߓߐ߫ ߝߋߎ߫، ߊ߬ ߘߏ߲߬߸ ߞߊ߲ߞߊ߲߫ ߕߌ߲߬ߞߎߘߎ߲ ߞߐߙߐ߲ߘߌ߫ ߞߏ ߟߋ߬ ߢߊߓߐߣߴߏ߬ ߘߌ߫߸ ߞߵߊ߬ ߕߏ߫ ߛߣߍ߬ߞߍ߬ߟߊ ߟߎ߬ ߕߊ߫ ߝߊ߲߭ ߡߊ߬ ߛߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬߸ ߛߌߕߊ߲߬ ߞߊ߬ߓߊ߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.