ߔߊߞߌߛߦߊ ߟߋ߬ ߕߎ߲߬ ߦߋ߫ ߛߋ߲߬ߠߊ߫ ߞߊ߲ߞߊ߲߫ ߞߣߐ߫ ߓߌ߬߸ ߡߍ߲ ߞߍ߫ ߘߊ߫ ߟߐ߯ ߞߣߐ߫ ߡߛߏ ߟߎ߬ ߓߟߏ߫، ߞߊ߬ߕߎ߲߯߸ ߖߍ߯ ߝߙߋߟߊ ߟߎ߬ ߣߌ߫ ߛߌ߬ߛߍ߬ ߟߊߛߣߍߣߍ߲ ߝߙߋ߬ߟߊ ߟߎ߫ ߕߊ߬ߣߍ߲ ߞߵߊ߬ ߟߊ߫ ߖߎ߬ߟߊ߬ ߜߘߍ߫ ߟߎ߫ ߞߊ߲߬߸ ߏ߬ ߟߎ߫ ߟߋ߬ ߖߌ߰ߣߍ߲߫ ߝߏ߲߬ߘߏ ߞߊ߲߬ ߓߌ߬ ߞߵߊ߬ߟߎ߬ ߟߊ߫ ߡߐߣߍ ߦߌ߬ߘߊ߫ ߞߵߊ߬ ߓߍ߲߬ ߛߐ߲߬ߞߐ߬ ߦߟߍ߬ ߓߊ߲ߓߊߟߌ ߣߌ߲߬ ߡߊ߬، ߣߴߊ߬ ߡߊ߫ ߢߊ߬ ߞߏ߫ ߛߎ߲ߞߊߙߏ ߓߘߊ߫ ߛߎ߬ߘߎ߲߬ߧߊ߫.
ߊ߬ߟߎ߬ ߟߊ߫ ߡߞߊ߬ߛߟߌ߬ ߞߊ߲ ߠߎ߬ ߘߐ߫߸ ߣߍߣߍߘߊ߯ߕߌ߮ ߟߎ߫ ߟߋ߬ ߕߐ߮ ߦߴߊ߬ߟߎ߬ ߘߊ߫߸ ߏ߬ ߟߎ߫ ߟߋ߬ ߡߊߝߌ߲߬ߣߴߊ߬ߟߎ߬ ߓߟߏ߫ ߛߌ߬ߛߍ߫ ߣߌ߫ ߖߍ߮ ߛߐ߲߬ߞߐ ߟߊߦߍ߬ߟߍ ߘߐ߫ ߘߊ߲߬ߠߕߊ߬ߡߌ߲߬ ߓߟߏ ߡߊ߬ ߟߏ߲ ߓߍ߯߸ ߣߌ߫ ߘߊ߬ߟߎ߬ ߕߍ߫߸ ߣߌ߫ ߢߊߝߐߟߌ߫ ߜߘߍ߫ ߕߍ߫، ߊ߬ߟߋ߬ ߔߊߞߌߛߦߊߟߊ ߢߌ߲߬ ߠߎ߬ ߟߊ߫ ߝߐߟߌ߫ ߘߐ߫߸ ߏ߬ ߓߘߊ߫ ߛߴߊ߬ߟߎ߬ ߣߌߡߊ߫ ߦߙߐ ߡߊ߬߸ ߊ߬ߟߎ ߖߎ߬ߟߊ߬ ߡߌߛߍ߲ ߠߎ߬ ߡߊߣߊ߲ߞߎ߲ ߠߎ߬ ߓߘߊ߫ ߓߋ߬߸ ߞߊ߬ ߞߍ߫ ߊ߬ߟߎ߫ ߞߊ߲߬ ߕߙߐߦߊ߫ ߘߍ߬ߜߍ ߘߌ߫.
ߛߊ߬ߙߊ߲߬ ߛߘߌ߬ߓߋ߫ ߞߵߊ߬ ߦߌ߬ߘߊ߬ ߞߏ߫: <<ߤߊߟߌ߬ ߛߐ߱ ߣߌ߲߬ ߡߊ߬߸ ߘߏ߫ ߓߘߊ߫ ߟߴߊ߬ߟߎ߫ ߛߐ߲߬ߞߐ ߞߊ߲߬، ߊ߬ ߓߘߊ߫ ߞߍ߫ ߊ߬ߟߎ߬ ߥߊ߫ ߢߊ ߟߋ߬ ߘߌ߫ ߛߍߣߍ߲߬، ߊ߲ߠߎ߬ ߕߍ߫ ߕߣߐ߬ ߝߏߦߌ߬ ߛߐ߬ߘߐ߲߬ ߠߊ߫ ߡߎ߬ߕߎ߲߬، ߊ߲ ߠߊ߫ ߓߐߟߌ ߣߌ߲߬ ߞߎ߲߭ ߦߴߊ߬ ߢߌߣߌ߲ ߠߋ߬ ߘߴߊ߬ߟߎ߫ ߝߍ߬߸ ߊ߬ߟߎ߬ ߦߋ߫ ߘߏ߫ ߓߐ߫ ߊ߬ߟߎ߫ ߛߐ߲߬ߞߐ ߟߊ߫߸ ߛߊ߫ ߒ߬ ߘߌ߫ ߒ߬ ߘߋ߲ ߠߎ߬ ߓߊߟߏ߫߸ ߊ߲ߠߎ߬ ߦߋ߫ ߘߋ߲߫ ߠߊߓߐߒߘߐ ߟߋ߬ ߟߊ߫، ߊ߬ ߞߏ߬ߣߌ߲߸ ߝߊ߬ߣߌ߫ ߘߏ߫ ߡߊ߫ ߓߐ߫ ߊ߬ߟߎ߫ ߛߐ߲߬ߞߐ ߟߊ߫߸ ߊ߲ ߕߍ߫ ߝߙߋ߬ ߞߍ߫، ߖߎ߬ߟߎ ߓߘߊ߫ ߦߟߍ߬ ߊ߲ ߠߊ߫ ߛߐ߲߬ߞߐ߬ ߟߊ߬ߦߟߍ ߣߌ߲߬ ߞߏߛߐ߲߬ ߓߌ߬.>>
ߟߐ߯ߝߍ ߟߎ߬ ߞߣߐ߫߸ ߞߣߐ߬ߘߐ߬ߝߟߌ ߣߌ߲߬ ߦߋ߫ ߓߍ߯ ߟߋ߬ ߞߊ߲߬، ߡߛߏ߬ ߛߌߦߊߡߊ߲߫ ߓߍ߫߸ ߡߍ߲ ߠߎ߬ ߞߊ߲߫ ߞߏ߫ ߊ߬ߟߎ߬ ߟߊߡߌߣߌ߲ߣߍ߲߫ ߠߋ߬ ߖߎ߬ߟߎ ߟߊ߫ ߕߋ߲߬߸ ߛߓߊ߬ߕߌ ߛߌߟߊ߫ ߛߌ߫ ߕߴߊ߬ߟߎ߬ ߞߘߐ߫.
ߛߊߙߊ߲߬ ߛߘߌ߬ߓߋ߫ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫ ߝߣߊ߫߸ ߞߏ߫: <<ߖߎ߬ߟߎ ߓߘߊ߫ ߦߟߍ߬ ߊ߲ ߓߍ߯ ߟߊ߫، ߊ߲ߠߎ߬ ߡߏ߬ߛߏ ߟߎ߬ ߤߌߣߊ ߞߊ߫ ߞߊ߲߫ ߞߊ߬ ߘߏ߲߬ ߊ߬ߟߎ߬ ߟߊ߫ ߛߍߣߍ߲߬߸ ߊߟߊ߫ ߞߏߛߐ߲߬، ߊ߬ ߕߙߐߦߊ ߓߘߊ߫ ߥߙߊ߬.>> ߊ߬ ߞߊ߬ ߣߌ߲߬ ߦߙߐ ߡߊߜߟߍ߬ߦߊ߬.
ߊ߬ ߦߌ߬ߘߊ߬ ߘߊ߫ ߘߏ߫ ߟߎ߫ ߓߟߏ߫߸ ߞߏ߫ ߛߐ߲߬ߞߐ߬ ߟߊ߬ߦߟߍ ߣߌ߲߬ ߦߋ߫ ߓߌ߬ߟߊ߬ߒ߬ߘߐ ߟߋ߬ ߘߴߊ߬ߟߎ߬ ߓߟߏ߫، ߝߊߕߎߡߊߕߊ߬ ߛߘߌ߬ߓߋ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߕߴߏ߬ ߢߊߦߋ߫ ߟߊ߫ ߝߋߝߋ߫.
<<ߖߍ߮ ߝߎߝߎ ߡߍ߲ ߕߎ߲߬ ߦߋ߫ ߛߊ߲߬ ߠߴߊ߲ ߓߟߏ߫ ߃߀߀ ߀߀߀ ߟߊ߫ ߖߌ߬ߣߍ߬ ߕߊߡߊ߲ ߘߐ߫߸ ߏ߬ ߦߋ߫ ߝߙߋ߬ ߟߊ߫ ߄߆߀ ߀߀߀ ߟߋ߬ ߟߊ߫ ߕߋ߲߬، ߊ߲ ߓߘߊ߫ ߛߍ߰، ߣߍߣߍߘߊ߯ߕߌ߮ ߟߎ߬ ߦߴߊ߬ߟߎ߫ ߛߊ߬ߥߏ ߟߋ߬ ߞߍ߫ ߟߊ߫ ߡߎ߬ߕߎ߲߬.>> ߊ߬ ߣߡߌߛߊߣߍ߲ ߠߋ߬ ߞߊ߲߫ ߕߋ߲߬.
ߗߍ߭ ߡߍ߲ ߠߎ߬ ߝߣߊ߫ ߦߋ߫ ߖߍ߯ ߝߙߋ ߣߌ߫ ߛߌ߬ߛߍ߬ ߝߙߋ ߘߊߞߎ߲ ߣߌ߲߬ ߘߐ߫߸ ߏ߬ ߟߎ߬ ߝߣߊ߫ ߞߵߊ߬ߟߎ߬ ߟߊ߫ ߣߌߛߐߜߏߦߊ ߦߌ߬ߘߊ߬، ߎߡߊߙ ߕߎ߬ߙߋ ߦߋ߫ ߖߍ߯ ߝߙߋߟߊ ߟߋ߬ ߘߌ߫߸ ߊ߬ ߣߌ߫ ߛߌ߬ߛߍ߬ ߝߙߋ߬ߟߊ߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߡߍ߲ ߠߎ߬ ߦߋ߫ ߛߌ߬ߛߍ߬ ߝߙߋ ߟߊ߫ ߓߊ߬߸ ߡߍ߲ ߠߎ߬ ߦߴߊ߬ ߛߊ߲߬ ߠߊ߫ ߓߊ߬߸ ߣߌ߲߬ ߞߏ ߕߙߐߦߊ ߦߴߊ߬ߟߎ߬ ߓߍ߯ ߟߋ߬ ߞߊ߲߬.
<<ߊ߲ ߓߐߣߍ߲߫ ߠߋ߬߸ ߓߊߏ߬ ߖߍ߮ ߣߌ߫ ߛߌ߬ߛߍ ߛߐ߲߬ߞߐ ߦߋ߫ ߕߊ߬ߡߌ߲߬ ߠߊ߫ ߦߟߍ߬ ߟߊ߫ ߟߋ߬، ߖߍ߯ ߝߎߝߎ ߡߍ߲ ߕߎ߲߬ ߦߋ߫ ߝߙߋ߬ ߟߊ߫ ߂߂߀ ߀߀߀ ߠߊ߫ ߝߟߐ߫߸ ߏ߬ ߦߋ߫ ߃߀߀ ߀߀߀ ߣߌ߫ ߄߀߀ ߀߀߀ ߕߍߟߊ ߟߋ߬ ߘߐ߫ ߕߋ߲߬، ߛߌ߬ߛߍ߬ ߝߎߝߎ ߝߣߊ߫߸ ߏ߬ ߕߎ߲߬ ߦߋ߫ ߂߁߀ ߀߀߀ ߠߋ߬ ߘߌ߫߸ ߏ߬ ߝߣߊ߫ ߓߘߊ߫ ߛߋ߫ ߂߅߀ ߀߀߀ ߤߊ߲߯ ߃߆߀ ߀߀߀ ߘߐ߫، ߛߎ߲ߞߊߙߏ ߘߏ߲߬ ߓߘߊ߫ ߛߎ߬ߘߎ߲߬ߧߊ߬߸ ߖߡߊ߬ߣߊ߬ߘߋ߲ ߠߎ߬ ߡߊ߬ߞߏ ߦߴߊ߬ ߟߊ߫ ߞߵߊ߬ ߘߊߥߎ߲߫߸ ߊ߲ ߕߍ߫ ߕߣߐ߬ ߛߌ߫ ߛߐ߬ߘߐ߲߬ ߠߴߊ߬ ߟߊ߫.>> ߊ߬ ߞߵߏ߬ ߟߋ ߝߐ߫.
ߊ߬ߟߎ߬ ߟߊ߫ ߓߐߟߌ ߣߌ߲߬ ߞߎߡߊ ߕߊ߬ߡߌ߲߬ ߘߊ߫ ߛߌߦߊߦߊ߫ ߟߊ߫، ߞߊ߬ߕߎ߲߯߸ ߔߊߞߌߛߦߊ ߣߌ߲߬ ߘߐ߫߸ ߊ߬ߟߎ߫ ߞߊ߬ ߖߍ߯ ߟߊߡߙߊ߫ ߦߙߐ ߣߌ߫ ߛߌ߬ߛߍ߬ ߟߊ߬ߡߙߊ߬ ߦߙߐ ߛߌߦߊߡߊ߲߫ ߘߊ ߣߍ߰ ߟߋ߬ ߜߏ߯ߙߏ ߟߊ߫߸ ߞߊ߬ ߦߙߐ ߏ߬ ߟߎ߬ ߘߊߕߎ߲߯ ߛߏ ߝߊ߲߬ ߛߌߦߊߡߊ߲߫ ߘߐ߫، ߔߊߞߌߛߦߊߟߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߛߐ߰ߟߌ ߏ߬ ߘߏ߲߬ ߥߊߕߐ߫ ߊ߬ ߡߊ߬ ߟߋ߬ ߡߎߣߎ߲߬ ߝߛߊߦߌ߫.
<<ߣߍߣߍߘߊ߮ ߟߎ߬ ߘߊ ߣߍ߰ߣߍ߲ ߕߏߕߐ߫ ߟߋ߬ ߝߎߚߎ߫ ߝߏ߫ ߘߏ߫ ߦߋ߫ ߓߐ߫ ߛߐ߲߬ߞߐ ߟߊ߫ ߕߎ߬ߡߊ ߡߍ߲ ߠߊ߫، ߟߊ߬ߢߌ߬ߣߌ߲߬ ߞߋߟߋ߲߫ ߔߋ ߡߍ߲ ߦߴߊ߲ ߠߊ߫߸ ߏ߬ ߟߋ ߖߡߊ߬ߣߊ߬ߘߋ߲ ߠߎ߬ ߖߎ߬ߛߎ ߛߎߡߊ ߘߌ߫.>> ߎߡߊߙ ߕߎ߬ߙߋ ߟߋ߬ ߞߊ߲߫ ߕߋ߲߬.
ߝߊ߰ߡߊ ߟߎ߬ ߟߊ߫ ߞߎ߲߬ߠߊ߫߸ ߏ߬ ߟߎ߬ ߡߊ߫ ߜߟߋ߬ߞߋ߫ ߓߌ߬ߟߴߊ߬ߟߎ߫ ߢߌ߲ ߝߍ߬ ߡߎߣߎ߲߬، ߞߐ߰ߖߌ߬ߘߊ߬ߟߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߓߊߡߐ߯ߦߊ ߕߌ߲߬ߞߎߘߎ߲ ߜߋ߬ߟߎ߲߬ߠߌ߲߬ߘߊ ߡߊߢߌߣߌ߲߫ ߘߊ߫ ߒ߬ ߠߊ߫ ߛߍߝߍ߲ߘߊ ߓߟߏ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߡߊ߫ ߞߏߟߊߒߞߘߐߢߐ߲߯ߦߊ߫ ߣߌ߲߬ ߞߏ ߘߐ߫ ߡߎߣߎ߲߬.
ߔߊߞߌߛߦߊ ߣߌ߲߬ ߦߋ߫ ߕߐ߰ߡߊ߬ߛߙߋ߫ ߟߋ߬ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߜߟߍ߬ߦߊ ߦߋ߫ ߞߏ߫ ߛߌߦߊߡߊ߲߫ ߘߐ߫߸ ߖߎ߬ߟߊ߬ ߡߌߛߍ߲ ߠߎ߬ ߛߍ߰ߣߍ߲߫ ߞߏߛߓߍ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.