ߢߐ߲߯ߓߍ߲ߓߊ߫ ߟߋ߬ ߞߍߣߍ߲߫ ߞߊ߲ߞߊ߲߫ ߞߣߐ߫ ߂߀߂߆ ߓߌ߲ߠߊߥߎߟߋ߲ ߕߟߋ߬ ߁߅ ߡߊ߬߸ ߞߵߊ߬ ߟߊߥߟߌ߬ ߞߕߌ ߕߐ߲ߓߟߏߡߊ߫ ߛߏߝߊ ߟߎ߬ ߟߊ߫ ߣߌ߫ ߛߊ߬ߙߌ߬ߦߊ߬ߓߊ߰ߙߊ߬ߟߊ ߟߎ߬ ߟߊ߫ ߓߟߏ߫ ߘߌ߫ ߢߐ߲߰ ߡߊ ߝߊ߲߬ߞߊߘߏ߲߭ ߡߊ߬، ߏ߬ ߡߍ߲ ߦߋߣߍ߲߫ ߞߍߕߊ߫ ߘߌ߫߸ ߞߵߊ߬ ߓߍ߲߬ ߡߐ߰ߦߊ ߤߊߞߍ ߟߊߕߊ߲߬ߞߊ ߡߊ߬ ߞߏߟߊߕߐ߲ ߛߌߟߊ ߝߍ߬، ߏ߬ ߡߙߌߘߐ߫ ߛߊߣߌ߲ ߝߘߊ߫ ߘߊ߫ ߝߘߏ߬ߓߊ߬ ߞߕߌ߬ߞߊ߲߬ߘߊ߬ ߞߎߘߊ ߟߋ߬ ߟߊ߫߸ ߡߊߙߑߥߊߣ ߓߊߟߑߘߋ߬߸ ߛߊ߫ ߢߊ ߘߌ߫ ߡߊߖߌ߰ ߝߙߋߞߋ߫ ߡߌߛߍ߲ ߘߏ߫ ߟߎ߫ ߝߍ߬ ߞߕߌ ߞߏ߫ ߟߊߕߊ߯ߡߊ߫ ߢߊ ߟߎ߬ ߘߐ߫߸ ߊ߬ ߣߌ߫ ߛߴߊ߬ߟߎ߬ ߘߌ߫ ߞߍ߫ ߢߐ߲߮ ߠߊ߫ ߞߏ ߟߎ߫ ߞߊ߬ߟߊߡߊ߬.
ߞߊ߲ߞߊ߲߫ ߞߕߌ߫ ߡߊߛߊߦߌ߲ߘߊ ߝߘߏ߬ߓߊ߬ ߞߕߌߓߋߟߋ߲ ߞߵߊ߬ߟߎ߬ ߟߊߘߍ߬ ߓߌߟߏ߲߫ ߕߊ߬ߡߌ߲߬ߣߍ߲ ߡߊ߬߸ ߂߀߂߆ ߓߌ߲ߠߊߥߎߟߋ߲ ߕߟߋ߬ ߁߅߸ ߞߕߌ ߕߐ߲ߓߟߏߡߊ߫ ߛߏߝߊ ߡߍ߲ ߺ ߍ ߺ ߡߍ߲߫ ߦߋ߫ ߞߊ߲ߞߊ߲߫ ߠߊ߫ ߡߊ߬ߙߊ ߞߣߐ߫߸ ߝߙߊߣߊ߫߸ ߊ߬ ߣߌ߫ ߒߛߙߍߜߘߍ߬߸ ߏ߬ ߟߎ߬ ߓߍ߯ ߟߋ߬ ߟߊߘߍ߬ ߘߊ߫ ߜߍ߫ ߞߋߟߋ߲߫ ߘߐ߫ ߣߌ߲߬ ߟߏ߲، ߏ߬ ߢߐ߲߯ߓߍ߲ ߞߍ߫ ߘߊ߫ ߞߕߌ߫ ߡߛߊߦߌ߲ߘߊ ߟߊ߬ߥߟߍ߬ߟߌ߬ ߝߏ߮߮ ߟߋ߬ ߞߣߐ߫߸ ߡߊ߬ߡߙߊ߬ߟߌ߬ ߞߏߟߊߕߍ߮ ߟߎ߬ ߢߊߞߘߐ߫߸ ߞߊ߬ ߝߘߊ߫ ߞߕߌ߫ ߞߎ߲ߘߊ߫߸ ߊ߬ ߣߌ߫ ߕߌ߲߬ߞߎߘߎ߲߫ ߛߊ߬ߓߊ ߣߊ߲߬ߕߌ߰ ߞߎ߲ߘߊ߫.
ߕߎ߬ߡߊ߬ߙߋ߲߬ ߦߙߌߞߊ߫ ߘߊߘߐߖߊߥߏ ߟߎ߬ ߘߐ߫߸ ߝߘߏ߬ߓߊ߬ ߞߕߌߓߋߟߋ߲ ߞߊ߬ ߟߊ߬ߛߌ߲߬ߠߌ߲ ߘߏ߫ ߟߎ߫ ߞߍ߫ ߞߵߊ߬ ߓߍ߲߬ ߞߏߟߊߕߐ߲ ߡߊ߬߸ ߦߏ߫ ߝߘߏ߬ߓߊ߬ ߓߊ߯ߙߊ ߟߎ߬߸ ߡߞߊ߬ߛߌ߬ߟߌ ߟߎ߬ ߡߌ߬ߣߊ߬ ߢߊ߸ ߊ߬ ߣߌ߫ ߞߎ߲߬ߘߐ߬ߦߌ߬ߘߊ߬ߟߌ ߕߊ߬ߣߍ߲ ߞߵߊ߬ ߟߊ߫ ߘߐ߬ߛߙߋ߬ ߟߊ߬ߕߊߡߌ߲ ߞߍߢߊ ߟߎ߫ ߞߊ߲߬߸ ߞߕߌߓߋߟߋ߲ ߞߊ߬ ߘߏ߫ ߝߐ߫ ߣߌ߲߬ ߓߍ߯ ߟߋ߬ ߞߊ߲߬، ߟߊ߬ߢߌߣߌ߲ ߕߘߍ߬ ߡߍ߲ ߘߌ߫߸ ߊ߬ߟߎ߬ ߟߊ߫ ߓߊ߯ߙߊߢߐ߲߯ߦߊ ߟߎ߬ ߘߌ߫ ߝߊ߲߬ߞߊߘߏ߲߬ ߢߊ ߡߍ߲ ߡߊ߬߸ ߞߕߌ ߓߊ߯ߙߟߊ ߓߍ߯ ߦߋ߫ ߛߋ߫ ߓߌ߬ߟߊ߬ ߟߊ߫ ߞߊߡߊ߲߫ ߞߋߟߋ߲߫ ߞߣߐ߫ ߞߏߢߊߢߌߣߌ߲ ߘߐ߫.
ߡߊߙߑߥߊߣ ߓߊߟߑߘߋ߬ ߡߍ߲ ߦߋ߫ ߞߊ߲ߞߊ߲߫ ߞߕߌ߫ ߡߛߊߦߌ߲ߘߊ ߝߘߏ߬ߓߊ߬ ߞߕߌߞߊ߲ߘߊ ߘߌ߫߸ ߏ߬ ߞߊ߬ ߞߕߌ ߕߐ߲ߓߟߏߡߊ߫ ߛߏߝߊ ߟߎ߬ ߟߊ߫ ߓߊ߯ߙߊ ߟߎ߬ ߝߐ߫ ߞߵߊ߬ ߡߊߜߟߍ߬ߦߊ߬، ߞߵߊ߬ ߦߌ߬ߘߊ߬ ߞߏ߫ ߡߐ߰ߦߊ ߤߊߞߍ ߦߋ߫ ߡߊߓߏ߲߬ߧߊ߬ߕߊ ߟߋ߬ ߘߌ߫ ߢߊߢߌߣߌ߲ߠߌ߲ ߞߎ߲߬ߕߊ߮ ߞߣߐ߫߸ ߊ߬ ߣߌ߫ ߞߊ߬ ߡߊ߬ߞߊ߲߬ߞߊ߲߬ߠߌ߲ ߤߊߞߍ ߟߊߕߏ߫߸ ߞߊ߬ ߟߊ߬ߛߏ߬ߓߌ߬ߟߌ ߤߊߞߍ ߟߊߕߏ߫߸ ߞߏ ߦߋ߫ ߡߐ߱ ߡߍ߲ ߞߎ߲߭ߞߊ߲߬߸ ߏ߬ ߦߋ߫ ߛߋ߫ ߟߊߛߏ߬ߓߌ߬ ߟߴߊ߬ ߞߎ߲߬ߞߊ߲߬ ߞߏ ߟߊ߫߸ ߞߎߡߊߕߍ߫ ߖߍ߬ߘߍ߸ ߞߊ߬ ߡߐ߰ߦߊ ߟߊ߲߬ߓߋ ߟߊߕߏ߫߸ ߊ߬ ߝߊ߬ߘߌ߬ߞߟߏ ߣߴߊ߬ ߡߙߌߟߞߊ ߓߍ߯ ߟߊߘߍ߬ߣߍ߲ ߞߐߘߍ߫.
ߛߊ߬ߙߌ߬ߦߊ߬ߓߊ߰ߙߊ߬ߟߊ ߟߎ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߓߍ߯ ߞߊ߫ ߞߊ߲߫ ߞߵߊ߬ ߖߊ߲߬ߕߏ߫ ߡߎ߲߬ ߘߐ߫߸ ߏ߬ ߘߏ߫ ߟߋ߬ ߘߊ߲߬ߕߍ߰ߟߌ ߘߌ߫، ߞߕߌ ߕߐ߲ߓߟߏߡߊ߫ ߛߏߝߊ ߟߎ߬ ߦߋ߫ ߛߋ߫ ߘߊ߲߬ߕߍ߰ߟߌ ߞߍ߫ ߟߊ߫ ߞߊ߲ߓߍ߲ ߞߕߌߞߊ߲ߘߊ ߟߎ߬ ߦߋ߫ ߊ߬ ߢߊ ߡߊ߬، ߞߊ߬ߕߎ߲߯߸ ߊ߬ ߦߴߏ߬ ߟߎ߫ ߞߊ߲߬ ߘߌߦߊߜߏߦߊ ߟߋ߬ ߘߌ߫߸ ߞߊ߬ ߡߌ߬ߣߊ߬ߞߊ߲ ߠߎ߬ ߘߝߊ߫ ߞߊߟߌߦߊ߫ ߘߐ߫߸ ߏ߬ ߖߍ߬ߘߍ ߟߋ߬ ߦߴߊ߬ߟߎ߬ ߟߊ߫ ߞߍߕߊ ߓߍ߯ ߘߐ߫ ߞߘߎ߬ߜߍߟߍ߲ ߘߌ߫، ߊ߬ߟߋ߬ ߛߊ߬ߙߌ߬ߦߊ߬ߓߊ߰ߙߊ߬ߟߊ ߟߎ߬ ߟߊ߫ ߞߎߡߊ߫ ߘߐ߫߸ ߞߏ߫ ߣߌ߫ ߡߍ߲ ߞߊ߬ ߞߘߎ߬ߜߍߟߍ߲ ߏ߬ ߘߏ߫ ߕߏ߫ ߦߋ߲߬ ߥߟߊ߫ ߞߵߊ߬ ߡߊߓߌ߬ߟߊ߬߸ ߖߏ߯ߘߏ߲ ߓߌ߲߬ߓߊߥߏ ߟߵߏ߬ ߘߊ ߝߍ߬߸ ߝߏ߫ ߊ߬ ߖߍ߬ߘߍ ߘߌ߫ ߞߍ߫ ߕߙߎ߬ ߘߌ߫ ߞߵߌ ߝߐ߫ ߡߐ߬ߟߐ߲ ߠߊ߫ ߌߞߘߐ߫.
ߡߊߙߑߥߊߣ ߓߊߟߑߘߋ߬ ߣߐ߬ ߛߙߊ߬ߣߎ߲ ߕߊ߬ ߟߊ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߖߊ߲߬ߕߏ߬ ߞߊ߫ ߞߊ߲߫ ߞߊ߬ ߞߍ߫ ߟߐ߬ߘߎ߰ ߡߊ߬ߓߏ߲߬ߧߊ߬ߓߊߟߌߦߊ ߣߌ߫ ߞߏߟߊ߲ߘߌߦߊ߫ ߞߏ ߟߎ߬ ߘߐ߫ ߡߊ߬ߡߙߊ߬ߟߌ ߘߐ߫ ߛߐ߲߬، ߞߏ ߡߍ߲ ߡߊ߲߫ ߞߊ߲߫ ߞߊ߬ ߡߊߡߙߊ߬ ߌ ߟߊ߫ ߞߎ߲߬ߠߊ߫߸ ߌ ߣߴߏ߬ ߢߊߓߐ ߡߊ߲߫ ߞߊ߲߫ ߞߏߟߊ߲ߘߌߦߊ߫ ߛߌ߫ ߡߊ߬، ߡߊߙߑߥߊߣ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߖߊ߬ߡߊ ߟߊ߫ ߓߊ߯ߙߊ ߛߋ߲߬ߠߊߛߌ߬ߘߌ ߦߋ߫ ߞߊߘߊ߲ ߠߋ߬ ߓߌ߬ߟߊ߬ߣߍ߲ ߘߌ߫ ߖߡߊ߬ߣߊ ߟߊ߫ ߥߙߎߞߌ ߟߊ߫، ߊ߬ ߞߎߡߊ߫ ߘߊ߫ ߞߟߏߜߍ ߘߏ߫ ߟߎ߫ ߞߊ߲߬߸ ߡߍ߲ ߠߎ߬ ߦߋ߫ ߞߕߌ ߕߐ߲ߓߟߏߡߊ߫ ߛߏߝߊ ߟߊ߫ ߓߊ߯ߙߊ ߟߎ߬ ߝߐ߫ ߟߊ߫، ߞߏ߫ ߣߌ߫ ߡߍ߲ ߞߊ߬ ߡߌ߬ߣߊ߬ߞߊ߲ ߘߏ߫ ߟߥߊߟߌ߫ ߢߊ ߝߘߏ߬ ߛߊ߬ߙߌ߬ߦߊ߬ ߟߊ߫ ߝߐ߫ ߢߊ ߡߊ߬߸ ߏ߬ ߞߍߓߊ߮ ߣߌ߫ ߣߐ߬ߝߍ߬ߜߍ߲߬ߠߌ߲߬ ߠߋ߬ ߦߊ߫ ߞߊ߲߫ ߞߕߌ ߣߐ߬ߝߍ߬ߜߍ߲߬ߠ߲ ߠߊ߫߸ ߞߵߊ߬ ߓߍ߲߬ ߞߏߟߊߕߐ߲ ߛߊ߬ߙߌ߬ߦߊ߬ߛߎ߲ ߠߊ߫ ߝߐߟߌ ߡߊ߬.
ߞߟߍ߬ߡߐ߰ߘߊ ߕߐ߯ ߘߐ߫߸ ߊߡߊߘߎ߫ ߎ߯ߙߌ߬ ߖߊߟߏ߫ ߡߍ߲ ߞߊ߲߬ߕߐ߮ ߦߋ߫ ߊ.ߏ߬.ߓߋ ߘߌ߫߸ ߏ߬ ߞߊ߬ ߢߐ߲߯ߓߍ߲ ߣߌ߲߬ ߕߐ߬ߣߐ ߟߊߞߊ߬ߟߌ߬߸ ߞߵߊ߬ ߦߌ߬ߘߊ߬ ߞߏ߫ ߢߐ߲߯ ߢߊߦߋ ߓߘߊ߫ ߞߍ߫ ߊ߬ ߘߐ߫ ߞߵߊ߬ ߓߍ߲߬ ߛߊ߬ߙߌ߬ߦߊ߬ ߓߊ߯ߙߊ ߡߊ߬، ߞߏ߫ ߊ߬ߟߎ߬ ߓߘߊ߫ ߞߏ߫ ߛߌߦߊߡߊ߲߫ ߢߊߦߋ߫߸ ߞߵߊ߬ ߘߊߡߌ߬ߣߊ߬ ߕߐ߲ߓߟߏߡߊ ߟߎ߬ ߟߊ߫ ߞߎ߲߬ߠߊ߫߸ ߤߊ߲߯ ߞߊ߬ ߥߴߊ߬ ߛߌ߰ ߞߕߌ ߟߊ߫، ߊ߬ ߞߵߊ߬ ߘߡߊߞߊ߬ߛߌ߬߸ ߞߏ߫ ߊ߬ߟߎ߬ ߞߊ߫ ߞߊ߲߫ ߞߊ߬ ߞߊߘߊ߲ ߓߍ߯ ߞߍ߫߸ ߞߕߌߓߋߟߋ߲ ߛߊ߬ߙߌ߬ߦߊ߬ߓߊ߰ߙߊ߬ߟߊ ߟߎ߬ ߣߌ߫ ߞߟߍ߬ߡߐ߰ߘߊ ߛߊ߬ߙߌ߬ߦߊ߬ߓߊ߰ߙߊ ߟߎ߬߸ ߊ߬ ߣߌ߫ ߞߕߌ ߕߐ߲ߓߟߏߡߊ߫ ߛߏߝߊ ߟߎ߬߸ ߏ߬ ߟߎ߬ ߓߟߏ ߞߊ߫ ߞߊ߲߫ ߠߋ߬ ߞߊ߬ ߘߌ߫ ߢߐ߲߮ ߡߊ߬߸ ߞߊ߬ ߛߴߊ߬ߟߎ߬ ߕߍߟߊ ߝߊ߲߬ߞߊߘߏ߲߬ ߠߊ߫ ߞߏߛߓߍ߫߸ ߖߐ߲߰ߛߊ߫ ߓߊ߯ߙߊ ߓߍ߯ ߟߊߘߍ߬ߣߍ߲ ߘߌ߫ ߞߍ߫ ߖߌ߬ߣߍ߫ ߓߌ߲߬ߓߊ߬ߥߏ߬ߟߌ߬ ߜߙߋ ߛߊ߬ߙߌ߬ߦߊ߬ߛߎ߲ ߡߊߓߏ߲߬ߧߊ ߞߊ߬ߘߊ߲ ߞߣߐ߫.
ߞߊ߲ߞߊ߲߫ ߞߕߌ ߕߐ߲ߓߟߏߡߊ߫ ߛߏߝߊ ߟߎ߬ ߟߊ߫ ߞߎߡߊ ߘߐ߫߸ ߕߐ߲ߓߟߏߡߊ ߟߎ߬ ߟߊ߫ ߕߊ߲ߓߊ߲ ߕߐ߲ߕߌ߮߸ ߌߓߙߊߤߌߡߊ߬ ߤߊߡߘߌ߫ ߕߎ߬ߙߋ ߞߊ߬ ߛߙߊ߬ߣߎ߲ ߕߊ߬߸ ߞߊ߬ ߝߘߏ߬ߓߊ߬ ߞߕߌߓߋߟߋ߲ ߕߊ߲߬ߘߏ߫ ߞߵߊ߬ ߞߎߟߎ߲ߖߋ߫، ߞߵߊ߬ ߦߌ߬ߘߊ߬ ߞߏ߫ ߞߊ߲ ߡߍ߲ ߠߎ߬ ߝߐߣߍ߲߫߸ ߊ߬ߟߎ߬ ߓߟߏ߫ ߝߌ߬ߟߊ ߦߴߊ߬ ߞߘߐ߫߸ ߊ߬ ߣߌ߫ ߝߣߊ߫߸ ߞߏ߫ ߝߙߋߞߋ ߘߏ߫ ߦߴߊ߬ߟߎ߫ ߞߊ߲߬߸ ߊ߬ߟߎ߬ ߓߊ߯ ߘߐ߬ߛߙߋ ߡߍ߲ ߠߎ߬ ߟߊߕߊ߯ ߞߕߌߓߋߟߋ߲ ߡߊ߬߸ ߏ߬ ߛߌߦߊߡߊ߲ ߞߐߝߟߌ߫ ߕߍ߫ ߟߊߛߋ߫ ߟߴߊ߬ߟߎ߫ ߡߊ߬ ߜߘߍߞߍ߫ ߡߎ߬ߕߎ߲߬߸ ߏ߬ ߦߴߊ߬ߟߎ߫ ߛߍ߰ ߟߴߊ߬ߟߎ߬ ߟߊ߫ ߓߊ߯ߙߊ ߘߐ߫ ߞߏߛߓߍ߫.
ߢߐ߲߯ߦߋ ߣߌ߲߬ ߞߍ߫ ߘߊ߫ ߢߐ߲߯ ߠߊߡߍ߲ ߢߐ߲߯ߦߋ ߟߋ߬ ߘߌ߫߸ ߊ߬ ߞߍ߫ ߘߊ߫ ߛߌ߰ߞߊ߬ߝߐ ߣߌ߫ ߤߊ߲ߞߟߌ߫ ߛߐߘߐ߲ ߢߐ߲߯ߦߋ ߟߋ߬ ߘߌ߫߸ ߡߍ߲ ߡߊߡߙߊ߬ ߘߊ߫ ߞߊ߲ߞߊ߲߫ ߞߕߌ߫ ߡߛߊߦߌ߲ߘߊ ߞߕߌߞߊ߲ߘߊ ߓߟߏ߫߸ ߡߊߙߑߥߊߣ ߓߊߟߑߘߋ߬، ߊ߬ ߕߘߍ߬ߒ߬ߘߐ߬ߓߊ߮ ߟߎ߬ ߝߣߊ߫ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߎ߫ ߣߊ߬ߕߊ ߦߋ߫ ߡߍ߲ ߘߌ߫߸ ߣߌ߲߬ ߢߐ߲߯ߦߋ߫ ߛߎ߮ ߦߋ߫ ߝߊ߲߬ߞߊߘߏ߲߬߸ ߊ߬ ߦߋ߫ ߞߍ߫ ߞߏ߫ ߟߊߓߊ߲ߕߊ ߘߌ߫߸ ߛߊ߫ ߕߋߟߋ߲ߓߊ߯ߦߊ ߘߌ߫ ߖߘߌߖߘߌ߫߸ ߞߊ߬ ߖߡߊ߬ߣߊ ߛߊ߬ߙߌ߬ߦߊ߬ ߓߊߖߎ ߟߎ߬ ߞߍ߫ ߡߊ߬ߓߏ߲߬ߧߊ߬ߕߊ ߘߌ߫߸ ߞߊ߬ ߖߡߊ߬ߣߊ߬ߘߋ߲ ߠߎ߬ ߟߊ߫ ߟߊ߬ߞߊ߲߬ߘߊ߬ߟߌ ߝߊ߲߬ߞߊߘߏ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.