ߖߋ߬ߟߌ߬ߓߟߊ߬ߞߊ߬ ߘߋ߲ߡߛߏߣߍ߲ ߘߏ߫ ߟߋ߬ ߓߌ߬ߟߊ߬ ߛߊ߲ ߦߋ߫ ߕߋ߲߬߸ ߞߵߊ߬ ߛߐ߬ߘߐ߲߬ ߊ߬ ߓߘߊ߫ ߕߟߋ߬ ߦߙߌߞߊ߫ ߞߍ߫ ߗߍ߬ߣߌ߬ߡߛߏ߬ߦߊ ߓߊ߯ߙߊ ߘߊߞߘߐ߫ ߡߐ߱ ߘߏ߫ ߟߎ߫ ߓߟߏ߫، ߊ߬ ߝߙߋ߬ ߘߊ߫ ߖߋ߬ߟߌ߬ߓߊ߬ߟߊ߫ ߟߋ߬߸ ߡߐ߰ ߟߎ߫ ߞߵߊ߬ ߛߊ߲߬߸ ߡߍ߲ ߠߎ߬ ߗߋ ߦߋ߫ ߡߐ߰ ߘߐ߬ߛߏߘߏ߲ߜߊ ߘߌ߫ ߘߊ߬ߡߊ߲߬ߘߊ߬ ߓߏߟߏ߲ ߠߎ߬ ߟߊ߫ ߛߐ߲߬߸ ߏ߬ ߟߎ߫ ߞߵߊ߬ ߕߊ߬ ߞߊ߬ ߣߵߊ߬ ߘߌ߫ ߛߣߍ߬ߜ߭ߊߟߌ߫߸ ߞߵߊ߬ ߕߏ߫ ߝߊߕߎߦߊ ߘߊߞߘߐ߫ ߘߊ߬ߡߊ߲߬ߘߊ ߟߊ߫.
ߒ߬ߓߊ߬߸ ߂߀߂߆ ߞߏ߲ߞߏߜߍ ߕߋ߬ߟߋ߫ ߂ ߟߋ߬ ߡߊ߬߸ ߡߏ߬ߛߏ ߘߏ߫ ߟߊߣߊ߬ ߘߊ߫ ߞߊ߲ߓߍ߲ ߞߕߌߞߊ߲ߘߊ ߢߊߞߘߐ߫ ߗߍ߬ߘߎ߯ ߞߕߌߘߊ ߦߌߟߡߊ߫ ߝߟߐ߫ ߓߟߋ߬ߓߟߋ ߟߊ߫߸ ߡߐ߰ ߞߏ߬ߙߏ߲߬ ߘߍ ߞߏߛߐ߲߬߸ ߊ߬ ߣߌ߫ ߥߎߦߊ ߛߋ߲߬ߘߏ߲߬ߢߐ߲߰ߦߊ ߣߌ߫ ߡߊ߬ߞߘߐ߬ߦߊ ߣߌ߫ ߡߐ߰ ߘߐ߬ߛߏߘߏ߲ߜߊ ߞߏߛߐ߲߬، ߛߌߞߊ߫ ߞߍߣߴߊ߬ߟߋ ߟߋ߬ ߡߊ߬ ߖߋ߬ߟߌ߬ߓߟߊ߬ߞߊ߬ ߘߋ߲ߡߛߏߣߍ߲ ߣߌ߲߬ ߕߊ߬ ߞߏ ߘߐ߫ ߞߵߊ߬ ߕߣߐ߬ߓߐ߫ ߗߍ߬ߣߌ߬ߡߛߏ߬ߦߊ߬ ߓߊ߯ߙߊ ߘߊߞߘߐ߫ ߓߊߦߕߌߟߊߦߌ߫ ߘߎ߰ߣߍ߲ ߞߣߐ߫߸ ߗߍ߬ߘߎ߯ ߕߌ߲߬ߞߎߘߎ߲ ߘߐ߫߸ ߦߋ߲߬ ߡߍ߲ ߦߋ߫ ߘߊ߬ߡߊ߲߬ߘߊ߬ ߓߏߟߏ߲ ߘߌ߫ ߞߊ߬ߣߌ߲߬.
ߟߊ߬ߛߏ߬ߓߌ߬ߟߌ ߘߏ߫ ߟߋ߬ ߞߍ߫ ߘߊ߫߸ ߞߏ߫ ߖߡߊ߬ߣߊ߬ ߜߘߍ߫ ߘߋ߲ߡߛߏߣߍ߲ ߘߏ߫ ߦߋ߫ ߟߊ߬ߡߙߊ ߘߐ߫ ߣߴߊ߬ ߛߊ߬ߥߏ߬ ߕߍ߫߸ ߞߊ߬ ߓߊ߲߫ ߞߵߊ߬ ߟߐ߬ ߝߊߕߎߦߊ ߟߊ߫ ߞߘߊߡߊߟߌ߫ ߓߟߏ ߡߊ߬، ߏ߬ ߝߐ߸ ߝߎߘߟߌߟߊ ߟߎ߬ ߘߓߌ߬ߘߓߌ ߞߍ߬ߟߍ ߦߋ߫ ߝߊ߬ߛߏ ߦߙߍߞߍߟߌ ߡߍ߲ ߓߟߏ߫߸ ߏ߬ ߟߎ߫ ߞߵߊ߬ߟߎ߫ ߟߐ߭ ߘߊߡߌ߬ߣߴߊ߬ߟߎ߫ ߟߐ߬ ߦߌߟߊ߸ ߞߊ߬ ߘߋ߲ߡߛߏ ߓߐ߫ ߓߟߏ߫ ߘߐ߫߸ ߞߵߊ߬ ߟߊߖߌ߰ߦߊ߬ߓߊ߮ ߝߣߊ߫ ߡߌ߬ߣߊ߬ ߗߐߞߎ߬ߡߐ߬.
ߢߊߢߌߣߌ߲ߠߌ߲ߠߊ ߏ߬ ߟߎ߬ ߢߊߞߘߐ߫ ߦߋ߲߬߸ ߡߏ߬ߛߏ ߞߵߊ߬ ߦߌ߬ߘߊ߬ ߞߏ߫ ߊ߬ ߞߊ߬ ߘߋ߲ߡߛߏ ߏ߬ <<ߛߊ߲߬>> ߛߍߝߊ ߅߀߀ ߀߀߀ ߟߋ߬ ߟߊ߫ (ߕߊߡߊ߲߫ ߥߊ߯ ߗߡߍ߬)߸ ߏ߬ ߡߍ߲ ߦߋ߫ ߓߍ߲߬ ߠߊ߫ ߖߌ߬ߣߍ߬ ߕߊߡߊ߲ ߈ ߇߀߀ ߀߀߀ ߡߊ߬ ߝߊ߬ߟߋ߲ ߞߊߓߋ ߢߐ߲߰ ߠߊ߫ ߓߌ߬، ߊ߬ߟߎ߬ ߦߋ߫ ߕߌߢߍߟߌ߫ ߞߙߏߝߏ ߡߍ߲ ߘߐ߫߸ ߏ߬ ߟߎ߫ ߟߋ߬ ߞߊ߬ ߕߊ߯ߡߊ߫ ߞߏ ߓߍ߯ ߝߊ߲߬ߝߘߊ ߡߊߗߍ߲߬߸ ߞߊ߬ ߕߊ߬ߡߌ߲߬ ߓߋߣߍ߲߫ ߝߍ߬߸ ߞߊ߬ ߣߊ߬ ߡߊ߬ߟߌ ߟߊ߫߸ ߞߣߊ߬ߕߏ߫ ߘߏ߲߬ ߠߊ߫ ߛߣߍ߬ߜ߭ߊߟߌ߫ ߝߍ߬ ߘߏ߲߰ߠߌ߲߬ ߓߟߏ ߡߊ߬.
ߘߋ߲ߡߛߏ ߘߏ߲߬ ߘߊ߫ ߗߍ߬ߘߎ߯ ߂߀߂߆ ߓߌ߲ߠߊߥߎߟߋ߲ ߕߋ߬ߟߋ߫ ߂߆ ߟߋ߬ ߡߊ߬، ߊ߬ ߟߊߘߏ߲߭ ߊ߬ ߖߌ߰ߦߊ߬ߓߏ߲ ߠߊ߫ ߢߊ ߡߍ߲߸ ߊ߬ ߝߐ߫ ߘߴߊ߬ ߦߋ߫ ߞߏ߫ ߊ߬ ߞߊ߫ ߞߊ߲߫ ߞߊ߬ ߛߍߝߊ ߁ ߅߀߀ ߀߀߀ (ߕߊߡߊ߲߫ ߥߊ߯ ߗߍ߬ߡߍ߫ ߛߊ߬ߓߊ߫) ߟߋ߬ ߢߌߣߌ߲߫߸ ߞߵߊ߬ ߟߊߘߏ߲߬، ߏ߬ ߡߍ߲ ߦߋ߫ ߓߍ߲߬ ߠߊ߫ ߖߌ߬ߣߍ߬ ߕߊߡߊ߲ ߂߆ ߁߀߀ ߀߀߀ ߢߐ߲߰ ߡߊ߬ ߞߊ߬ߣߌ߲߬، ߞߏ߫ ߥߊߘߌ ߏ߬ ߟߋ ߞߍߕߐ߫ ߊ߬ ߟߊ߫ ߕߊ߬ߛߙߊ߬ߟߊ ߖߐ߰ߣߍ ߘߌ߫، ߞߣߍ ߞߊ߲߬ ߦߋ߲߬ ߛߊ߫߸ ߞߎߡߊ ߏ߬ ߞߘߐ ߕߍ߫ ߘߏ߫ ߜߘߍ߫ ߘߌ߫: ߊ߬ ߦߋ߫ ߓߊ߯ߙߊ ߟߋ߬ ߞߍ߫ ߟߊ߫ ߟߏ߲ ߓߍ߯߸ ߛߙߊ߬ ߕߴߊ߬ ߦߋ߫.
ߢߊߢߌߣߌ߲ߠߌ߲ ߛߋ߫ ߘߊ߫ ߞߏ ߡߍ߲ ߠߎ߬ ߟߊߓߐ߫ ߟߊ߫߸ ߊ߬ ߦߋ߫ ߘߊ߫ ߞߏ߫ ߘߋ߲ߡߛߏ ߓߊ߯ ߥߊߘߌ߫ ߝߏߦߌ߬ ߛߐ߬ߘߐ߲߫ ߕߋ߬ߟߋ ߞߘߐ߫߸ ߊ߬ ߓߍ߯ ߦߋ߫ ߘߌ߫ ߟߴߊ߬ ߖߋ߬ߕߌ߮ ߏ߬ ߟߋ ߡߊ߬، ߕߟߋ߬ ߣߊ߯ߣߌ߲߫ ߘߐߙߐ߲߫ ߞߘߐ߫߸ ߘߋ߲ߡߛߏ ߛߋ߫ ߘߊ߫ ߛߍߝߊ ߂߅ ߀߀߀ ߟߊߘߏ߲߬ ߠߊ߫ (ߕߊߡߊ߲߫ ߥߊ߯ ߟߏ߯ߟߎ߫)߸ ߏ߬ ߡߍ߲ ߦߋ߫ ߓߍ߲߬ ߠߊ߫ ߖߌ߬ߣߍ߬ ߕߊߡߊ߲ ߄߃߅ ߀߀߀ ߡߊ߬، ߖߎ߬ߟߎ ߡߍ߲ ߟߊߣߴߊ߬ ߞߎ߲߬߸ ߥߊߘߌ ߏ߬ ߡߊ߫ ߞߍ߫ ߏ߬ ߛߙߊ߬ ߘߌ߫ ߘߋ߬߸ ߊ߬ ߝߐ߫ ߘߊ߫ ߞߏ߫ ߞߵߏ߬ ߛߊ߲߬ ߝߊߘߌߦߊߓߐ ߟߋ߬ ߟߊ߫ ߡߎߣߎ߲߬߸ ߊ߬ ߦߴߏ߬ ߘߏ߲߬ ߊ߬ ߝߊ߬ߘߌ ߡߊ߬߸ ߛߴߊ߬ ߘߌ߫ ߛߋ߫ ߡߐ߱ ߟߎ߬ ߟߊߞߎ߲ߝߊ߲߫ ߠߊ߫ ߢߊ ߡߍ߲ ߡߊ߬ ߞߵߊ߬ ߦߋߝߊߘߌ ߟߊߗߋ߲߰ߧߊ߬߸ ߞߊ߬ ߛߋ߫߫ ߕߣߐ߬ ߛߌߦߊߡߊ߲߫ ߛߐ߬ߘߐ߲߬ ߠߊ߫.
ߢߊߢߌߣߌ߲ߠߌ߲ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߞߙߏ߬ߝߏ ߘߏ߫ ߟߋ߬ ߟߊߘߊ߲ߣߍ߲߫ ߛߣߍ߬ߜ߭ߊߟߌ߫ ߣߌ߫ ߖߋ߬ߟߌ߬ߓߟߊ߬ ߕߍߟߊ ߣߌ߲߬ ߘߐ߫߸ ߡߍ߲ ߛߌ߲߬ߝߏ߲߬ߧߊ߬ߣߍ߲߫ ߡߐ߰ ߘߐ߬ߛߏߘߏ߲ߜߊ ߞߊ߲ߡߊ߬ ߞߏߛߓߍ߫، ߊ߬ߟߎ߬ ߟߊ߫ ߓߏߟߏ߲ ߘߏ߫ ߟߎ߫ ߛߌ߰ߣߍ߲߫ ߞߕߏߣߎ߫߸ ߊ߬ ߣߌ߫ ߓߡߊ߬ߞߐ߫߸ ߏ߬ ߟߎ߫ ߟߋ߬ ߘߐ߬ߛߙߋ߬ ߝߏߝߏ ߟߎ߬ ߟߊߘߊ߲߫ ߠߊ߫ ߛߐ߲߬߸ ߞߊ߬ ߡߌ߬ߣߊ߬ߓߊ߰ߕߐ ߟߎ߬ ߟߊߖߌ߰ߦߊ߬߸ ߞߵߊ߬ߟߎ߬ ߣߌ߫ ߡߐ߰ ߜߘߍ߫ ߟߊߘߍ߬ ߝߏ߫ ߞߵߊ߬ߟߎ߬ ߟߊߘߏ߲߬ ߗߍ߬ߘߎ߯، ߊ߬ߟߎ߬ ߦߋ߫ ߓߊ߯ߙߊ߫ ߟߊ߫ ߦߋ߲߬ ߠߋ߬ ߛߍߣߍ߲߬߸ ߞߊ߬ ߖߘߍ߬ ߝߙߋ ߞߍ߫ ߛߋߞߏߕߍߘߐߦߊ߫ ߓߟߏ ߡߊ߬.
ߢߊߢߌߣߌ߲ߠߌ߲ߠߊ ߟߎ߬ ߞߊ߲߫ ߞߏ߫ ߡߐ߱ ߢߌ߲߬ ߠߎ߬ ߦߋ߫ ߓߊ߯ߙߊ߫ ߟߊ߫ ߞߊ߲ߞߋߦߊ ߡߍ߲ ߠߊ߫߸ ߊ߬ߟߎ߫ ߛߌ߲߬ߝߏ߲߬ߧߊ߬ߣߍ߲߫ ߠߋ߬ ߝߋߝߋ߫، ߊ߬ߟߎ߬ ߦߋ߫ ߞߐߞߊ߲߫ ߘߋ߲ߡߛߏߣߍ߲߫ ߜߊ߲߰ߛߊ߲߫ ߠߋ߬ ߕߊ߬ ߟߊ߫ ߛߐ߲߬߸ ߞߊ߬ ߣߵߏ߬ ߟߎ߬ ߘߐߖߊ߬ߥߏ߫ ߘߊ߬ߡߊ߲߬ߘߊ ߟߊ߫ ߦߋ߲߬، ߞߊ߬ߕߎ߲߯߸ ߜߋ߬ߟߎ߲߬ߠߌ߲߬ ߖߐ߲ߖߐ߲߫ ߕߍ߫ ߞߍ߫ ߟߊ߫ ߝߊ߲߬ߞߣߐ ߏ߬ ߟߎ߬ ߘߐ߫ ߦߋ߲߬. ߊ߬ ߞߏ߬ߣߌ߲߸ ߘߋ߲ߡߛߏ ߘߐ ߣߌ߲߬ ߓߘߊ߫ ߓߌ߬ߟߊ߫ ߟߊ߬ߞߊ߲߬ߘߊ߬ߟߌ ߞߣߐ߫߸ ߞߵߊ߬ ߘߌ߫ ߡߐ߰ ߟߎ߫ ߡߊ߬߸ ߡߍ߲ ߠߎ߬ ߣߴߊ߬ ߞߊ߫ ߞߊ߲߫߸ ߏ߬ ߟߎ߬ ߦߴߊ߬ ߞߏ ߛߍ߲߬ߛߍ߲߬ ߞߏߢߊ߬، ߊ߬ߟߎ߬ ߓߘߊ߫ ߘߐ߬ߛߏ߰ߙߋ߬ߟߌ ߛߌ߰ ߛߋ߲߬ߠߊ߫߸ ߛߊ߫ ߞߙߏ߬ߝߏ ߣߌ߲߬ ߛߌ߲߬ߝߏ߲ ߕߐ߭ ߟߎ߬ ߘߌ߫ ߡߌ߬ߣߊ߬ ߢߊ ߡߍ߲ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.