߂߀߀߈ ߞߏߟߌ߲ߞߏߟߌ߲ ߕߋ߬ߟߋ߫ ߂߂ ߟߋ߬ ߡߊ߬߸ ߟߊ߲߱ߛߣߊ߬ ߞߐ߲ߕߍ߫ ߝߊߕߏ߫ ߘߊ߫ ߞߐߣߊߞߙߌ߫߸ ߞߊ߬ ߘߊ߲߭ߛߌ߰ ߛߊ߲߭ ߂߄ ߞߊ߲ߕߌ߯ߦߊ ߟߊ߫߸ ߡߍ߲ ߡߊ߫ ߘߐߕߟߴߊ߬ ߣߌ߫ ߡߐ߰ ߕߍ߫، ߛߊ߲߬ ߕߊ߲߫ ߣߌ߫ ߥߐߙߐ߲ߝߌ߬ߟߊ߫ ߟߋ߬ ߓߘߊ߫ ߞߍ߫ ߣߌ߲߬ ߏ߬ ߘߐ߫߸ ߊ߬ ߕߍ߫ ߘߎߢߊ߫ ߣߌ߲߬ ߘߐ߫ ߡߎ߬ߕߎ߲߬، ߒ߬ߓߊ߬ ߤߊ߲߯ ߕߋ߲߬߸ ߖߌ߬ߣߍ߬ ߦߴߊ߬ ߡߙߌ ߞߊ߲߬ ߊ߬ ߟߊ߫ ߞߍߣߍ߲ ߠߎ߬ ߡߊ߬߸ ߞߵߊ߬ ߝߐ߫ ߞߏ߫ ߊ߬ߝߐ߫ ߞߐ߲ߕߍ߬ ߛߋ߲߬ ߕߍ߫ ߖߡߊ߬ߣߊ ߟߊߣߐ߮ ߘߐ߫ ߓߊ߬؟ ߡߍ߲ ߣߊ߬ ߘߊ߫ ߛߋߓߊ߯ߦߊ ߟߊ߫ ߡߙߊ߬ߒ߬ߡߊ߬ߝߋ߲ ߠߊ߫߸ ߞߊ߬ ߕߏ߫ ߦߋ߲߬ ߝߊ߲߬ߞߊ ߞߏߛߐ߲߬߸ ߞߊ߬ ߥߊ߫ ߡߎ߬ߕߎ߲߬ ߛߊ߫ ߞߊ߬ ߖߡߊ߬ߣߊ ߕߏ߫ ߟߓߏߟߓߏߦߊ ߘߐ߫.
ߊ߬ ߛߐ߬ߘߐ߲߬ ߘߊ߫ ߁߉߃߄ ߝߊ߲߭ ߠߋ߬ ߝߍ߬ ߡߎߛߦߊ߫߸ ߘߎ߬ߓߙߋߞߊ߬ ߡߙߊ߬ߓߊ߰ߘߊ ߘߐ߫، ߟߊ߲߱ߛߣߊ߬ ߞߐ߲ߕߍ߬ ߦߋ߫ ߗߍ߬ߓߊ߫ ߟߋ߬ ߘߌ߫߸ ߡߍ߲ ߕߘߍ߬ ߥߙߎߣߍߦߊ ߣߊ߲߬ߕߌ߰ߦߊ ߘߐ߫߸ ߞߣߊ߬ߕߏ߫ ߘߏ߲߬ ߠߊ߫ ߖߌ߬ߣߍ߫ ߣߊ߲߬ߕߌ߰ߦߊ ߘߐ߫ ߖߘߍ߬ߕߌ߰ߦߊ ߕߊ߭ ߞߐߝߍ߬، ߁߉߈߄ ߞߏ߲ߞߏߘߓߌ ߕߋ߬ߟߋ߫ ߃ ߟߋ߬ ߡߊ߬߸ ߞߊ߲ߕߌ߯ ߊߤߑߡߍߘ ߛߋߞߎ߫ ߕߎ߬ߙߋ߬ ߟߊ߫ ߛߊ߬ߦߊ ߞߐ߫ ߞߎ߲߬ߢߐ߲߰ ߞߋߟߋ߲߫ ߠߊ߫߸ ߞߐ߲ߕߍ߬ ߞߊ߬ ߛߋߓߊ߯ߦߊ ߕߊ߬߸ ߊ߬ ߣߴߊ߬ ߘߍ߬ߢߐ߲߮ ߡߍ߲ ߠߎ߬ ߞߵߊ߬ ߕߊ߬߸ ߊ߬ߟߎ߫ ߕߍ߬ߘߍ߫ ߘߍ߭ ߘߏ߫ ߟߋ߬ ߕߐ߮ ߞߘߐ߫߸ ߊ߰ ߝߐ߫ ߟߊ߫ ߡߍ߲ ߡߊ߬ ߞߏ߫: ߡߊ߲߬ߕߏ߲ ߡߊߕߋߟߋ߲ ߣߊ߲߬ߕߌ߰ ߘߍߘߊ (Comité militaire de redressement national)، ߛߊ߲߬ ߝߟߐ ߏ߬ ߟߊ߫߸ ߊ߬ߟߎ߫ ߞߵߊ߬ߟߎ߬ ߓߟߏߓߐ߫ ߓߘߍ߬ߓߘߍ߬ߟߌ ߥߛߎߟߊߘߋ߲ ߠߎ߬ ߘߐ߫߸ ߞߵߏ߬ ߟߎ߬ ߞߊ߲ߠߊߓߌ߬ߟߊ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߍߣߊ߬ ߖߡߊ߬ߣߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߠߊߕߊ߯ߡߊ߫ ߢߡߊߟߐ ߘߐ߫߸ ߞߊ߬ ߞߏ ߟߎ߬ ߕߊ߲ߓߊ߲ߓߐ߫ ߞߵߊ߬ ߓߐ߫ ߡߙߊ߬ߞߊ߲߬ ߞߘߐ߫ ߕߊ߫ ߢߊ ߏ߬ ߞߊ߲߬ ߝߋߎ߫.
߁߉߉߀ ߘߊߡߌߣߊ ߟߋ߬ ߟߊ߫߸ ߖߌ߬ߣߍ߫ ߛߐ߲߬ ߘߊ߫ ߞߙߎߞߊ߫ ߛߌߦߊߡߊ߲߫ ߞߏ ߡߊ߬߸ ߞߊ߬ ߛߌ߰ߞߊ߲߬ ߞߎߘߊ ߟߊߘߊ߲߫، ߥߊ߯ߕߌ ߏ߬ ߟߊ߫߸ ߡߐ߱ ߟߎ߫ ߖߌ߰ߡߊ߬ߝߊ ߘߊߡߌ߬ߣߊ߬ ߘߊ߫، ߒ߬ߞߊ߬ ߌߞߘߐ߫ ߕߋ߲߬߸ ߞߏ ߟߎ߬ ߥߟߏ߫ ߘߴߊ߬ ߢߊߖߎ߮ ߡߊ߬߸ ߞߊ߬ ߖߌ߬ߟߊ߬ߝߐߦߊ ߘߊߡߌ߬ߣߊ߬، ߢߣߊߕߊߟߌ ߟߎ߬ ߡߊߞߕߌ ߘߊߡߌ߬ߣߊ߬ ߘߊ߫߸ ߞߏ߫ ߕߋߟߋ߲߫ ߕߴߊ߬ ߘߐ߫، ߝߏ߫ ߞߊ߬ ߛߌ߰ߞߊ߲߬ ߡߊ߬ߝߊߟߋ߲ ߠߎ߬ ߞߍ߫߸ ߛߊ߫ ߞߊ߲ߕߌ߮ ߘߌ߫ ߡߍ߲߫ ߛߋߓߊ߯ߦߊ ߟߊ߫ ߥߊ߯ߕߌ߫ ߞߎ߲߬ߘߐ߬ߖߊ߲߬ ߞߘߐߐ߫ ߢߊ ߡߍ߲ ߡߊ߬، ߏ߬ ߟߋ ߡߊ߫ ߡߍ߲߫߸ ߖߡߊ߬ߣߊ ߕߏ߫ ߘߊ߫ ߡߐ߰ ߘߊ߲ߘߐ߫ ߕߊ߫ ߓߟߏ߫ ߞߊ߲߬߸ ߡߍ߲ ߠߎ߬ ߡߊ߬ߞߏ ߕߍ߬ߘߴߊ߬ߟߎ߫ ߖߘߍ߬ߓߊ߬ߞߎ߲ ߠߊ߫، ߒ߬ߓߊ߬߸ ߂߀߀߇ ߟߋ߬ ߟߊ߫߸ ߜߋ߬ߟߎ߲߬ߠߌ߲ ߘߏ߫ ߟߎ߫ ߞߍ߫ ߘߊ߫߸ ߡߍ߲ ߠߎ߬ ߞߵߊ߬ ߦߌ߬ߘߊ߬ ߖߡߊ߬ ߥߊߘߌ ߛߌߦߊߡߊ߲߫ ߓߘߊ߫ ߞߎ߲߬ߡߙߎ߬، ߏ߬ ߥߊ߯ߕߌ ߟߊ߫߸ ߖߡߊ߬ߣߊ߬ߘߋ߲ ߠߎ߬ ߕߎ߲߬ ߓߘߊ߫ ߛߍ߰߸ ߞߏ ߓߍ߯ ߜߍ߬ߟߍ߲߬ߡߊ߫ ߕߘߍ߬߸ ߘߐ߱ ߕߊ߬ߡߌ߲߬ ߘߊ߫ ߥߙߊ߬ ߟߊ߫.
ߖߊ߲߬ߞߊߙߏ߫ ߝߌ߬ߟߊ߫ ߟߋ߬ ߞߊ߬ ߞߐ߲ߕߍ߬ ߛߍ߰߸ ߖߋ߬ߟߌ߬ߥߊ߲߬ߞߏ߲߬ߢߊߡߊ߲߸ ߊ߬ ߣߌ߫ ߗߊߥߎ߲߸ ߊ߬ ߕߍ߬ߘߍ߫ ߖߊ߲߬ߞߊ߬ߙߏ߬ ߟߴߏ߬ ߟߎ߬ ߓߟߏ߫ ߕߎ߬ߡߊ߬ ߛߌߦߊߡߊ߲߫، ߊ߬ ߕߎ߲߬ ߕߍ߫ ߛߋ߫ ߟߊ߫ ߖߡߊ߬ߣߊ ߡߊ߬ߙߊ ߡߊߣߐ߬ ߟߊ߫ ߡߎ߬ߕߎ߲߬߸ ߊ߬ ߕߘߍ߬ ߡߙߌߦߊ߫ ߛߌߦߊߡߊ߲߫ ߕߊ߬ ߟߋ߬ ߟߊ߫ ߞߵߊ߬ ߛߐ߬ߘߐ߲߬ ߊ߬ ߕߍ߫ ߞߏ ߟߎ߬ ߘߊߞߎ߲ ߘߐ߫، ߒ߬ߞߊ߬߸ ߛߴߊ߬ ߟߊ߫ ߞߊ߲ߕߌ߯ߦߊ ߞߊߣߊ߬ ߕߌߢߍ߫ ߢߊ ߡߍ߲ ߡߊ߬߸ ߊ߬ ߞߵߊ߬ ߓߊ߲ߓߊ߲߫ ߣߊ߲߬ߕߌ߮ ߟߎ߫ ߟߋ߬ ߞߊ߲߬߸ ߞߵߊ߬ ߛߐ߬ߘߐ߲߬ ߓߍ߲߬ߓߊ߫ ߕߎ߲߬ ߕߴߏ߬ ߟߎ߫ ߜߊ߲߬ߛߊ߲ ߝߣߊ߫ ߣߌ߫ ߢߐ߲߯ ߕߍ߫، ߏ߬ ߟߋ ߓߍ߯ ߞߐ߫߸ ߔߊߞߌߛߦߊ ߟߎ߬ ߣߌ߫ ߝߎ߬ߙߎ߲߬ߞߎ߬ߟߌ ߟߎ߫ ߝߊ߲߬ߞߊ ߥߙߊ߬ ߘߊ߫߸ ߏ߬ ߟߎ߫ ߘߏ߲߬ ߕߘߍ߬ ߟߊߓߍ߲߬ ߠߊ߫ ߢߊ߫ ߟߋ߬ ߡߊ߬ ߝߣߊ߫߸ ߡߍ߲ ߖߎ߯ߡߊ߲߫ ߕߘߍ߬ ߞߏߛߓߍ߫، ߓߊߏ߬߸ ߜߊ߬ߟߏ ߟߋ߬ ߕߘߍ߬ ߟߊ߫ ߟߊ߫ ߖߡߊ߬ߣߊ߬ߘߋ߲ ߠߎ߬ ߞߊ߲߬، ߊ߬ ߖߍ߬ߘߍ߸ ߡߍ߲ ߞߍ߫ ߘߊ߫ ߂߀߀߇ ߟߊ߫߸ ߏ߬ ߦߴߏ߬ ߘߊ߬ߟߎ ߘߏ߫ ߟߋ߬ ߘߌ߫߸ ߣߌ߫ ߡߐ߰ ߓߌ߫ ߦߙߌߞߊ߫ ߓߣߐ߬ ߘߴߊ߬ ߣߌ ߘߐ߫. ߣߴߏ߬ ߕߍ߫߸ ߁߉߉߀ ߟߊ߫߸ ߖߡߊ߬ߣߊ ߟߊ߫ ߛߐ߬ߘߐ߲ ߦߟߍ߬ ߟߋ߬ ߣߍ߲ߞߍ߫، ߓߊ߬ߙ߬ߌ߸ ߏ߬ ߓߍ߯ ߣߊ߬ ߘߊ߫ ߞߍ߫ ߟߋ߬ ߖߌ ߟߊ߫߸ ߞߵߏ߬ ߞߎ߲߭ ߞߍ߫ ߖߡߊ߬ߣߊ ߡߙߊ߬ߞߏ߬ߖߎ߰ߦߊ ߘߌ߫߸ ߊ߬ ߣߌ߫ ߓߘߍ߬ߓߘߍ߬ߟߌ ߓߊߛߌ߯ߓߊߟߌߦߊ.
ߊ߬ ߟߊ߫ ߛߊ߬ߦߊ ߞߐߝߍ߬߸ ߛߌ߰ߞߊ߲ ߝߐ߫ ߞߊ߲ ߡߊ߫ ߡߊߓߏ߲߬ߧߊ߬، ߊ߬ ߝߐ߫ ߘߊ߫ ߞߏ߫ ߣߌ߫ ߞߊ߲ߕߌ߮ ߛߊ߬ ߘߊ߫߸ ߞߊ߲ߕߌ߯ߦߊ ߞߊ߫ ߞߊ߲߫ ߞߊ߬ ߟߊߕߊ߬ߡߌ߲߬ ߢߊ ߡߍ߲ ߡߊ߬߸ ߏ߬ ߡߊ߫ ߓߐ߫ ߊ߬ ߛߌߟߊ ߝߍ߬، ߣߊ߲߬ߕߌ߮ ߟߎ߫ ߟߋ߬ ߣߊ߬ ߘߊ߫ ߝߊ߲߬ߞߊ ߕߊ߬߸ ߏߏ߬ ߣߊ߬ ߘߊ߫ ߛߌߞߊ ߘߌ߫ ߡߐ߱ ߟߎ߬ ߟߊ߫ ߞߏߛߓߍ߫، ߒ߬ߓߊ߬߸ ߞߐ߲ߕߍ߬ ߟߊ߫ ߛߊ߬ߦߊ ߓߘߊ߫ ߛߊ߲߬ ߁߇ ߓߐ߫߸ ߒ߬ߞߊ߬ ߡߐ߱ ߟߎ߬ ߡߙߌߦߊ ߕߍ߫ ߞߋߟߋ߲߫ ߘߌ߫ ߊ߬ ߟߊ߫ ߞߏ ߘߐ߫، ߘߏ߫ ߟߎ߫ ߞߊ߲߫ ߠߋ߬ ߞߏ߫ ߊ߬ߟߋ ߟߋ߬ ߞߍ߫ ߘߊ߫ ߕߙߎ߬ ߘߌ߫ ߞߊ߬ ߖߡߊ߬ߣߊ ߕߏ߫ ߞߐ ߘߐ߫߸ ߞߊ߬ ߓߍ߯ߦߊ ߘߊߝߘߌ߫߸ ߞߊ߬ ߛߐ߬ߘߐ߲ ߣߊ߰ߛߌ߬، ߓߊ߬ߙߌ߬߸ ߘߏ߫ ߟߎ߫ ߝߣߊ߫ ߞߊ߲߫ ߠߋ߬߸ ߞߏ߫ ߊ߬ߟߋ ߟߋ߬ ߞߊ߬ ߖߡߊ߬ߣߊ ߞߛߌ߫ ߛߏߞߣߐ߫ ߞߟߍ ߡߊ߬، ߏ߬ ߘߏ߲߬ ߓߍ߯ ߣߴߊ߬ ߕߊ߫߸ ߖߡߊ߬ߣߊ ߥߙߎߞߌߣߍ߲߫ ߘߎ߰ ߞߘߐ߬ ߣߊ߲߬ߝߟߏ߬ ߞߏ ߘߐ߫ ߞߊߕߌ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.