ߞߊߙߏ߫ ߡߎ߬ߥߊ߲ ߣߌ߫ ߥߐߙߐ߲ߝߌ߬ߟߊ߬ ߞߍ ߞߐ߫߸ ߊ߬ ߕߍ߫ ߕߏ߬ߟߊ߲߬ ߕߊ߲߫ ߠߊ߫߸ ߊ߬ ߟߊ߫ ߕߏ߬ߟߊ߲߬ߕߊ߲ ߖߍ߬ߘߍ ߓߌ߬ߟߊ ߛߊ߲߫ ߣߌ߫ ߘߎ߰ ߕߍ߫߸ ߖߐߞߟߌ ߟߎ߬ ߞߐߝߍ߬߸ ߞߕߌ ߞߐߝߍ߬߸ ߥߊ߯ߕߌ߫ ߖߊ߲߫ ߡߊ߬ߞߎ߲ ߞߐߝߍ߬߸ ߔߏ߬ߜߊ߬ ߓߘߊ߫ ߥߟߌ߬، ߞߎߣߎ߲߬ ߞߍ߲ߘߍߟߏ߲߸ ߂߀߂߅ ߣߍߣߍߓߊ ߕߋ߬ߟߋ߫ ߂߂ ߡߊ߬߸ ߔߏߟ ߔߏ߬ߜߊ߬ ߦߋ߫ ߘߊ߫ ߡߊ߲߬ߛߊ߬ߓߌ߲ ߞߊ߲߬߸ ߊ߬ ߓߊ߯ߙߊ ߘߊߡߌ߬ߣߊ߬ ߞߊ߲ߡߊ߬ ߖߡߊ߬ ߢߊߞߘߐ߫߸ ߊ߬ ߟߊ߫ ߛߊ߲߭ ߝߌ߬ߟߊ߬ ߕߎߣߎ߲ ߡߴߊ߬ ߟߊ߫ ߞߏ ߢߊߞߍ߫ ߡߍ߲ ߠߎ߬ ߡߊ߬.
ߕߏ߬ߟߊ߲ ߕߏ߫ ߘߊ߫ ߡߌ߬ߛߍ߲ ߈߅߲ ߠߋ߬ ߘߐ߫ ߙߏߥߊߖ߭ߐ߲߫ ߔߊߙߞ߸ ߔߏߟ ߔߏ߬ߜߊ߬ ߟߊߘߏ߲߬ ߘߊ߫ ߓߙߊ ߞߣߐ߫߸ ߕߍ߯ߝߐ߫ ߞߊ߲ ߠߎ߬ ߦߋ߫ ߥߊߘߏߥߊߘߏ߫، ߞߵߊ߬ ߛߐ߬ߘߐ߲߬ ߡߏߣߊߞߏ ߘߐߥߊ߬ߟߏ߲߬ߣߍ߲߫ ߕߎ߬ ߄-߀ ߞߊ߲߬، ߊߟߎ߫ ߦߴߊ߬ ߟߐ߲߫߸ ߞߊ߬ߦߌ߯ ߟߊ߬ ߔߌߦߐߛ߭ ߛߋ߲߭ ߓߐ߫ ߘߊ߫ ߕߏ߬ߟߊ߲ ߞߊ߲߬ ߂߀߂߃ ߕߎߟߊߝߌ߲ ߕߋ߬ߟߋ߫ ߃ ߡߊ߬߸ ߕߎ߲߬ ߡߊ߫ ߕߏߟߏ߲߫ ߏ߬ ߞߐ߫، ߏ߬ ߟߏ߲ ߠߋ߬ ߞߍ߫ ߘߴߊ߬ ߟߊ߫ ߕߏ߬ߟߊ߲߬ ߠߊ߬ߓߊ߲ ߕߊ߲ ߘߌ߫߸ ߞߵߊ߬ ߛߐ߬ߘߐ߲߬ ߊ߬ ߦߋ߫ ߖ߭ߎ߳ߝ߭ߍ߲ߕߎ߳ߛ߸ ߊ߬ ߖߊ߲߬ߞߌ߲߬ ߘߊ߫ ߟߊ߬ߛߏ߬ߓߌ߬ߟߊ߲߬ߕߊ߬ ߞߏ ߘߐ߫.
ߒ߬ߓߊ߬߸ ߞߊߙߏ߫ ߁߈ ߟߊ߬ߘߎ߲߬ߠߌ߲ ߡߍ߫ ߟߊ߫ ߘߴߊ߬ ߞߎ߲߬߸ ߊ߬ ߟߊ߫ ߞߎߣߎ߲߬ ߕߏߟߏ߲ ߠߋ߬ ߞߵߏ߬ ߟߊߛߴߊ߬ ߘߊ߲߭ ߠߊ߫، ߊ߬ ߟߊ߫ ߖߐߞߟߌ ߣߴߊ߬ ߕߊ߫߸ ߓߋ߲߬ߒ߬ߞߊ߲߬ߠߌ߲߬ ߞߏ߬ ߝߙߋߞߋ ߘߏ߫ ߟߎ߫ ߞߐߝߍ߬ ߊ߬ ߣߴߊ߬ ߓߊߘߋ߲ߡߊ ߘߏ߫ ߕߍ߫، ߏ߬ ߕߎ߬ߡߊ ߟߋ߬ ߟߊ߫߸ ߔߏߟ ߔߏ߬ߜߊ߬ ߣߌ߫ ߕߏ߬ߟߊ߲ ߕߍ ߖߊ߲߰ߧߊ߬ ߘߊ߫߸ ߦߋߟߋ߲ ߝߊ߬ߟߋ߲߬ ߘߊ߫ ߘߌ߬ߓߌ ߟߴߊ߬ ߟߊ߫ ߞߏ ߘߐ߫، ߊ߬ ߞߊߙߏ߫ ߟߏ߯ߟߎ ߟߋ߬ ߕߋ߲߬߸ ߊ߬ ߞߊ߬ ߛߊߛߋ ߘߏ߫ ߞߟߊ߬ߣߐ߬ߦߊ߫ ߊ.ߍߛ ߡߏߣߊߞߏ߸ ߞߵߊ߬ ߟߊ߫߫ ߕߏ߬ߟߊ߲ ߓߊ߯ߙߊ ߘߊߡߌ߬ߣߊ߬߸ ߛߴߊ߬ ߘߴߊ߬ ߖߘߍ߬ߡߊߛߐ߬ߘߐ߲߬ ߓߘߍߞߍ߭.
ߞߎߡߊ ߘߌߣߴߊ߬ ߡߊ߬ ߝߐ߰ߓߍ߬ߦߊ߬ߟߊ ߟߎ߬ ߢߊߞߘߐ߫߸ ߔߏ߬ߜߊ߫ ߞߵߊ߬ ߡߙߌߦߊ ߘߌ߫: <<ߊ߬ ߕߘߍ߬ ߒ ߢߣߊ߫ ߞߏ߫ ߒ ߕߊ ߓߘߊ߫ ߓߊ߲߫… ߕߎ߬ߢߊ ߟߋ߬ ߝߛߊߦߌ߫ ߔߏߟ ߔߏߜߊ߫ ߓߘߴߊ߬ ߞߐߛߊ߬ߦߌ߲߬߸ ߒ ߧߋ߫ ߕߏߟߏ߲߫ ߠߊ߫ ߡߏߣߊߞߏ ߟߋ߬߸ ߒ ߘߏ߲߬ ߕߴߊ߬ ߝߍ߬ ߞߊ߬ ߓߣߐ߬، ߒ ߛߣߐ߬ߡߍ ߘߐ߫ ߕߋ߲߬߸ ߒ ߓߘߊ߫ ߛߍߥߊ߫߸ ߒ ߓߘߊ߫ ߖߌ߰ߡߝߊ߬߸ ߞߏ ߟߎ߬ ߥߊ߫ ߢߊ ߣߌ߲߬ ߞߊ߫ ߢߌ߲߬߸ ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߞߐߝߟߌ ߡߊ߫ ߞߍ߫ ߒ ߛߊ߬ߥߏ߬ ߘߌ߫.>>
ߊ߬ ߟߊ߫ ߞߏ ߛߍߥߊ ߞߍߢߊ ߖߊ߬ߡߊ ߓߟߏ߫߸ ߏ߬ ߛߍߥߊ ߕߍ߬ߘߴߊ߬ ߟߊ߫ ߞߎߣߎ߲߬ ߞߏߛߓߍ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ <<ߏ߬ ߘߏ߲߬ ߘߊ߫ ߒ ߡߊ߬ ߛߊ߫.>>
ߊ߬ ߦߋ߫ ߕߏߟߏ߲߫ ߠߊ߫ ߡߏߣߊߞߏ ߡߍ߲ ߘߐ߫ ߕߋ߲߬߸ ߣߴߏ߬ ߦߋ߫ ߕߏߟߏ߲߫ ߠߊ߫ ߟߌߜ߭ ߘߍ߫ ߛ߭ߊ߲ߔߌߦߐ߲ ߘߐ߫ ߋߙߐߔߎ߬ ߞߣߐ߫، ߔߏ߬ߜߊ߬ ߦߴߊ߬ ߝߍ߬ ߞߊ߬ ߞߵߊ߬ ߖߘߍ߬ߡߊߛߐ߬ߘߐ߲߫ ߠߋ߬ ߡߎߣߎ߲߬ ߝߛߊߦߌ߫߸ ߊ߬ ߞߏ߬ߣߌ߲ ߕߍ߫ ߛߐ߲߬ ߠߊ߫ ߞߎߡߊ߫ ߟߊ߫ ߖߊ߯ߓߊ߫ ߖߌߟߊߝߍ߫ ߞߏ ߞߊ߲߬ ߓߊߞߍ߭߸ ߏ߬ ߡߍ߲ ߓߍߣߊ߬ ߕߊ߲߫ ߛߊ߲߬ߘߐ߬ ߂߀߂߆ ߟߊ߫. ߏ߬ ߟߋ ߘߐ߫߸ ߊ߬ ߢߌ߬ߣߌ߲߬ߞߊ߬ߣߍ߲ ߏ߬ ߡߊ߬߸ ߊ߬ ߞߵߊ߬ ߦߌ߬ߘߊ߬ ߞߏ߫: <<ߏ߬ ߕߎ߬ߡߊ ߞߊ߫ ߖߊ߲߬ ߡߎߣߎ߲߬߸ ߡߍ߲ ߤߊߡߌ߲ ߦߋ߫ ߒ ߠߊ߫ ߕߋ߲߬ ߡߎߣߎ߲߬߸ ߒ ߧߋ߫ ߞߍ߫ ߒ ߢߊ ߡߊ߬߸ ߞߊ߬ ߝߊ߲߬ߞߊ߫ ߛߐ߬ߘߐ߲߬ ߡߏߣߊߞߏ ߞߣߐ߫ ߦߊ߲߬، ߓߊ ߣߌ߫ ߒ ߡߊ߫ ߕߏߟߏ߲߫ ߊ߬ ߢߊ ߡߊ߬߸ ߝߊ߬ߙߊ߲߬ߛߌ߬ ߛߘߍߞߎߘߎ߲ ߠߊ߫ ߞߏ ߓߊ߬߸ ߝߏ߫ ߣߌ߫ ߢߌ߬ߣߊ߬ ߞߍ߫ ߘߴߏ߬ ߞߐ߫.>> ߂߀߁߈ ߞߟߏߞߏ߬ߕߏ ߟߋ߬ ߞߊ߲߫ ߕߋ߲߬.
ߊ߬ ߟߊ߫ ߞߐߛߊߦߌ߲ߠߌ߲ ߡߍ߲ ߦߋ߫ ߣߌ߲߬߸ ߡߐ߰ ߕߴߛߋ߫ ߞߊ߲߫ ߞߋߟߋ߲߫ ߛߌ߫ ߟߊߕߍ߰ ߟߴߊ߬ ߟߊ߫ ߞߏ ߞߊ߲߬ ߡߎߣߎ߲߬، ߓߊ߬ߙߌ߬߸ ߊ߬ ߟߊ߫ ߘߎߢߊߘߐߕߍ߮ ߞߐߜߍ ߘߏ߫ ߟߋ߬ ߦߟߍ߬ߡߊ߲߬ߣߍ߲߫ ߕߋ߲߬: ߊ߬ ߦߋ߫ ߕߏ߬ߟߊ߲߬ߕߊ߲߬ߠߊ߫ ߟߋ߬ ߘߌ߫ ߕߋ߲߬߸ ߡߍ߲ ߦߴߊ߬ ߝߍ߬ ߞߊ߬ ߞߍ߫ ߊ߬ ߢߊߞߘߐ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.