ߊ߬ ߞߊ߫ ߛߌߦߴߊߟߎ߫ ߘߐ߫߸ ߡߍ߲ ߠߎ߬ ߦߴߊ߬ ߝߍ߬ ߞߊ߬ ߖߌ߬ߣߍ߬ ߞߊ߲ߕߌ߯ߦߊ߫ ߢߌߣߌ߲ߠߊ ߟߎ߬ ߟߐ߲߫ ߞߏߟߌ߲ߞߏߟߌ߲߫ ߣߊ߬ߕߐ ߢߣߊߕߊߟߌ ߘߐ߫، ߒ߬ߓߊ߬ ߓߌ߬߸ ߊ߲ ߘߴߊ߬ ߝߐ߫ ߊߟߎ߫ ߦߋ߫߸ ߗߍ߭ ߕߘߍ߬ ߝߊ߬ߙߊ߲߬ߛߌ߫ ߞߟߍ߬ߘߋ߲ ߘߌ߫ ߢߊ ߡߍ߲߸ ߊ߬ ߣߌ߫ ߕߍߓߊ߯ߦߟߊ ߡߍ߲ ߠߎ߬ ߦߴߊ߬ ߘߐ߫߸ ߞߵߏ߬ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲߬ߠߊ߬ ߟߊߞߐ߯ߣߍ߲ ߠߎ߬ ߞߊ߲߬ ߜߊߟߌߜߊߟߌ߫߸ ߡߍ߲ ߠߎ߬ ߞߊ߬ ߞߊ߬ߙߊ߲ ߞߍ߫ ߛߐߙߑߓߐߣ ߖߊ߯ߓߘߊ ߟߊ߫߸ ߊ߬ ߣߌ߫ ߡߍ߲ ߠߎ߬ ߞߊ߬ ߞߊ߬ߙߊ߲ ߞߍ߫ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲ ߞߣߐ߫߸ ߡߊ߬ߡߌ߬ߘߊ߬ߟߌ߬ߟߊ߫ ߞߐ߬ߣߐ߲߬ߘߐ ߡߍ߲ ߠߎ߬ ߦߋ߫ ߣߌ߲߬ ߖߐ߫߸ ߊ߲ ߘߴߊߟߎ߫ ߟߊߟߐ߲ߠߌ߲߫ ߊ߬ߟߎ߬ ߟߊ߫ ߞߏ ߟߊ߫ ߛߌߛߍ߲߬ ߘߏߣߍ߲߫߸ ߛߴߊߟߎ߫ ߘߴߏ߬ ߓߌ߬ߟߴߊߟߎ߫ ߞߌ߬ߦߊ߬ ߓߟߏ ߞߊ߲߬ ߞߊ߬ ߞߐ߲߰ ߂߀߂߅ ߞߏߟߌ߲ߞߏߟߌ߲ ߂߈ ߢߣߊߕߊߟߌ ߢߍ߫.
ߞߏߟߌ߲ߞߏߟߌ߲ ߕߋ߬ߟߋ߫ ߂߈ ߣߊ߬ߕߐ ߦߋ߫ ߟߏ߲ߓߊ߫ ߟߋ߬ ߘߌ߫ ߖߌ߬ߣߍ߬ ߞߣߐ߫߸ ߞߊ߲ߕߌ߯ ߞߋߟߋ߲߫ ߛߎߥߊ߲ߘߌߕߐ߫ ߏ߬ ߟߏ߲ ߠߋ߬ ߖߡߊ߬ߣߊ ߟߊߕߊ߯ߡߊ߫ ߞߊ߲ߡߊ߬، ߂߀߂߁ ߕߎߟߊߝߌ߲ ߕߟߋ߬ ߅ ߞߊ߬ߝߏ߬ ߖߊߛߏ߲ ߞߍ߸ ߊ߲ ߧߴߏ߬ ߛߊ߲߬ ߣߊ߯ߣߌ߲ ߠߋ߬ ߘߐ߫ ߕߋ߲߬، ߒ߬ߓߊ߬߸ ߖߡߊ߬ߣߊ ߓߕߐ߫ ߟߋ߬ ߣߊ߲߬ߕߌ߰ ߕߟߋ ߘߐ߫ ߕߋ߲߬߸ ߞߊ߬ ߘߏ߲߬ ߓߍ߯ߦߊ߫ ߕߟߋ ߘߐ߫߸ ߞߊ߬ ߘߐ߬ߕߊ߬ߡߌ߲߬ ߕߟߋ ߓߊ߲߫߸ ߞߊ߬ ߘߏ߲߬ ߟߐ߬ߒ߬ߞߋ߬ߟߊ߬ ߕߟߋ ߘߐ߫، ߒ߬ߓߊ߬߸ ߡߊ߬ߡߌ߬ߘߊ߬ߟߌ߬ߟߊ߫ ߡߐ߰ ߅߁ ߡߍ߲ ߠߎ߬ ߞߵߊ߬ߟߎ߬ ߕߐ߮ ߟߊߘߏ߲߬ ߞߊ߲ߕߌ߯ߦߊ ߢߌߣߌ߲߫ ߞߊ߲ߡߊ߬߸ ߉ ߟߋ߬ ߛߋ߫ ߘߊ߫ ߕߊ߬ ߟߊ߫ ߞߕߌߖߌ߲ ߛߊ߲ߘߐߕߊ ߓߟߏ߫، ߏ߬ ߡߍ߲ ߞߎߡߊ ߛߌߦߊߦߊ߫ ߘߊ߫߸ ߞߵߏ߬ ߞߎ߲߭ ߞߍ߫ ߊ߬ ߞߏ ߘߐߝߌ߲߭ ߘߌ߫ ߡߐ߰ ߛߌߦߊߡߊ߲߫ ߡߊ߬ ߡߌߡߐ߫، ߤߊߟߌ߬ ߛߌߣߌ߲߫߸ ߘߏ߫ ߟߎ߫ ߦߴߊ߬ߟߎ߫ ߖߘߍ߬ ߡߊߢߌ߬ߣߌ߲߬ߞߊ߬ ߟߊ߫ ߡߎߣߎ߲߬، ߒ߬ߓߊ߬߸ ߛߌߟߊߓߐߛߐ߯ߣߊ߫ ߦߴߊ߬ ߝߍ߬ ߞߵߊߟߎ߫ ߓߐ߫ ߡߐ߰ ߞߐ߬ߣߐ߲߬ߘߐ ߢߌ߲߬ ߠߎ߬ ߟߊ߫ ߞߏ ߞߣߐ߬ߘߐ߬ߝߟߌ ߘߐ߫.
ߡߊ߬ߡߊ߬ߘߌ߬ ߘߎ߲ߓߎߦߊ߫: ߊ߬ߟߋ ߦߋ߫ ߖߘߍ߬ߦߋ߬ ߡߊ߬ߡߌ߬ߘߊ߬ߟߌ ߟߋ߬ ߘߌ߫ ߣߌ߲߬ ߞߏ ߘߐ߫߸ ߛߘߊ ߦߴߊ߬ߟߋ ߟߋ߬ ߟߊ߫ ߢߣߊߕߊߟߌ ߢߌ߲߬ ߘߐ߫ ߦߏ߫ ߞߏ߲߬ߘߋ߲، ߒ߬ߓߊ߬߸ ߊ߬ ߛߐ߬ߘߐ߲߬ ߘߊ߫ ߁߉߈߀ ߠߋ߬ ߟߊ߫߸ ߓߊ߬ߣߊ߲߬ߞߘߐ߬ߘߊ ߞߌ߲߬ߘߊ ߟߊ߫߸ ߞߊ߲ߞߊ߲߫، ߊ߬ߟߋ ߦߋ߫ ߣߊ߲߬ߕߌ߮ ߟߋ߬ ߘߌ߫߸ ߡߍ߲ ߞߊ߬ ߝߊ߬ߙߊ߲߬ߛߌ߫ ߞߟߍ߬ߘߋ߲߬ߧߊ ߞߍ߫߸ ߞߣߊ߬ߕߏ߫ ߘߏ߲߬ ߠߊ߫ ߝߊ߬ߛߏ ߟߊ߫ ߖߌ߬ߣߍ߬ ߞߣߐ߫ ߂߀߁߂ ߟߊ߫، ߊ߬ ߞߵߊ߬ ߡߊߣߊ߬ߙߏ߲߬ ߝߎߚߎ߸ ߝߏ߫ ߊ߬ ߣߊ߬ ߘߊ߫ ߞߍ߫ ߝߊ߲߬ߞߊ߬ ߓߟߏߡߊߞߊ߬ߣߍ߲ (ߥߟߊ߫ ߝߊ߲߬ߞߊ߬ ߝߌ߲) ߡߙߊ߬ߓߊ߰ ߘߌ߫، ߂߀߂߁ ߕߎߟߊߝߌ߲ ߕߟߋ߬ ߅ ߟߋ߬ ߡߊ߬߸ ߊ߬ ߞߊ߬ ߞߊ߬ߙߊ߲߬ߝߊ ߊߟߌߝߊ߫ ߞߐ߲ߘߍ߫ ߟߊߥߟߏ߫ ߘߏߦߌ߲߫߸ ߞߊ߬ ߣߊ߬ ߞߍ߫ ߖߡߊ߬ߣߊ ߘߐ߫߬ߕߊߡߌ߲ ߞߊ߲ߕߌ߮ ߘߌ߫، ߊ߬ ߟߊߞߐ߯ ߘߊ߫ ߝߊ߬ߙߊ߲߬ߛߌ߫ ߟߋ߬߸ ߊ߬ ߣߴߌߛߌ߬ߙߊ߬ߌߟߊ߫ ߣߌ߫ ߡߊ߲߬ߛߟߊ߬ ߟߊߘߍ߬ߣߍ߲߸ ߊ߬ ߣߌ߫ ߝߘߊ߬ߝߌ߲߬ߠߊ߫ ߖߍ߬ߘߍ ߥߙߏ߬ߘߎ߮، ߊ߬ ߦߋ߫ ߝߐ߫ ߟߴߊ߬ ߟߊ߫ ߘߐ߬ߛߙߋ߬ ߛߓߍߣߍ߲ ߠߎ߬ ߞߣߐ߫߸ ߞߏ߫ ߛߟߊߕߌ߯ߓߦߊ ߖߐ߲ߓߐ߲ ߦߴߊ߬ ߓߟߏ߫߸ ߞߊ߬ ߝߘߊ߫ ߔߊ߬ߙߌ߬ ߖߊ߯ߓߘߊ ߔߊ߲ߕߋߥߐ߲ ߊߛߊߛ ߟߊ߫، ߊ߬ ߞߵߊ߬ ߟߊ߫ ߡߊ߬ߡߌ߬ߘߊ߬ߟߌ ߟߊߘߏ߲߬ ߖߘߍ߬ߦߋ߬ ߓߟߏ ߟߋ߬ ߡߊ߬߸ ߕߐ߮ ߘߏ߫ ߞߎ߲߬ߞߘߐ߫߸ ߞߏ߫: <<ߊ߲ ߧߴߊ߲ ߟߐ߬ ߢߐ߲߮ ߝߍ߬.>> ߊ߬ ߡߊߝߌ߲߬ߣߍ߲߬ ߞߏߛߓߍ߫߸ ߞߵߏ߬ ߞߎ߲߭ ߞߍ߫ ߞߏ ߘߏ߫ ߟߎ߫ ߞߍ ߘߌ߫ ߊ߬ ߕߋ߬ߟߋ ߣߌ߲߬ ߘߐ߫߸ ߦߏ߫ ߡߐ߱ ߘߏ߫ ߟߎ߫ ߟߊߕߎߣߎ߲߸ ߛߌ߰ ߞߍ ߡߐ߱ ߟߎ߬ ߘߊ ߞߊ߲߬߸ ߞߌ߬ߓߊ߬ߙߏ߬ߦߊ߬ߟߌ ߘߟߊߛߌ߬ߘߌ ߣߴߊ߬ ߢߐ߲߱ ߠߎ߬.
ߊߓߘߎߟߊߦߌ߫ ߦߋߙߏ߬ ߓߊߟߑߘߋ߬߸ ߊ߬ߟߋ ߣߊ߬ߣߍ߲߬ ߞߙߎߞߊ ߘߏ߫ ߟߋ߬ ߕߐ߯ ߞߘߐ߫߸ ߞߏ߫ ߖߌ߬ߣߍ߬ ߓߍ߯ߦߊ ߞߟߊߘߊ (ߖߓߞ)߸ ߞߊ߬ ߛߊ߲߬ ߣߊ߯ߣߌ߲߫ ߞߍ߫ ߟߞߊ߬ߙߊ߲߬ߠߌ߲ ߛߊ߲ߘߐߕߊ ߞߏߕߌ߯ߦߊ ߟߊ߫ ߊߟߌߝߊ߫ ߕߟߋ ߘߐ߫ (߂߀߁߆-߂߀߂߀)߸ ߊ߬ ߓߙߐߕߐ߫ ߘߊ߫ ߞߊ߬ ߓߐ߫ ߊߟߌߝߊ߫ ߟߊ߫ ߞߎ߲߬ߠߊ߬ߛߌ߮ ߘߐ߫ ߞߎ߲߬ ߞߋߟߋ߲߫ ߔߋ߫ ߟߋ߬ ߞߏߛߐ߲߬߸ ߏ߬ ߟߋ ߞߍ߫ ߘߊ߫ ߟߐ߬ߒ߬ߞߋ߬ߟߊ߬ ߛߓߊ߬ߣߊ߲߬ ߞߏ ߘߌ߫، ߊ߬ ߦߋ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲߬ߠߊ ߟߋ߬ ߘߌ߫ ߟߊ߬ߞߐ߰ߟߌ ߛߌߟߊ ߝߍ߬߸ ߊ߬ ߦߋ߫ ߖߐ߲ߓߐ߲ߕߌ߮ ߟߋ߬ ߘߌ߫ ߞߏߟߐ߲ߓߌ߫߸ ߊ߬ ߣߌ߫ ߛߐߙߑߓߐߣ ߖߊ߯ߓߘߊ ߟߊ߫߸ ߞߵߏ߬ ߟߊ߫ ߔߊ߬ߙߌ߫ ߋ߬ߞߐߟ ߘߍ߬ ߔߐ߲ ߞߊ߲߬، ߊ߬ ߞߊ߬ ߗߋߘߊߕߌ߯ ߛߊ߲ߘߐߦߊ ߞߍ߫ ߟߋ߬ ߞߌߢߍ߲߫ ߜߍߓߏ߲ ߠߊ߫߸ ߞߊ߬ ߞߍ߫ ߜ߭ߑߟߏߓߊߟ ߊߟߎ߳ߡߌߣߊ ߣߊ߲߬ߝߟߏ߬ߦߊ߬ߟߌ ߗߋߕߌ߮ ߘߌ߫߸ ߞߊ߬ ߣߊ߬ ߞߍ߫ ߖߌ߬ߣߍ߬ ߕߊ߲ߓߊ߲߫ ߜߍߓߏ߲ ߞߎ߲߬ߠߊ߬ߛߌ߰ߟߊ߬ ߛߙߍߞߍ ߘߌ߫، ߊ߬ ߞߵߊ߬ ߡߝߊ߫ ߖߌ߬ߣߍ߬ ߜߍߓߏ߲ ߠߎ߬ ߟߊ߫ ߝߘߏ߬ߓߊ߬ ߞߏߟߊߘߍ ߟߊ߫߸ ߊ߬ ߣߌ߫ ߞߏߙߌ ߓߊ߲ߞ، ߊ߬ ߦߋ߫ ߖߊ߬ߕߋ߬ ߟߊ߫ ߛߊ߬ߙߌ߬ߦߊ߬ ߖߡߊ߬ߣߊ߬ ߞߏ ߛߍ߬ߘߏ߲߬ߠߊ ߟߋ߬ ߘߌ߫.
ߤߊߖߊ߬ ߡߊ߰ߞߊߟߋ߫ ߞߡߊ߬ߙߊ߬߸ ߏ߬ ߟߊ߫ ߞߙߎߞߊ ߟߋ߬ ߝߊ߬ߛߏ ߢߌ߲߬ߧߊ ߞߟߊߘߊ ߘߌ߫߸ ߊ߬ ߦߋ߫ ߕߍߓߊ߯ߦߟߊ߫ ߤߏߞߌ ߟߋ߬ ߘߌ߫߸ ߊ߬ ߣߌ߫ ߛߊ߬ߙߌ߬ߦߊ߬ߟߐ߲߬ߠߊ ߟߋ߬ ߝߣߊ߫ ߦߋ߫߸ ߡߍ߲ ߞߍ߫ ߘߊ߫ ߛߍ߬ߣߍ ߣߌ߫ ߞߟߏߝߋ߲ߧߊ ߣߌ߫ ߕߎ ߞߏߕߌ߮ ߘߌ߫ (߁߉߉߄ ߣߌ߫ ߁߉߉߆ ߕߍߟߊ ߘߐ߫)߸ ߞߊ߬ ߣߊ߬ ߞߐߞߊ߲ߞߏ ߟߎ߬ ߞߏߕߌ߯ߦߊ ߟߊ߫ (߂߀߁߅ ߣߌ߫ ߂߀߁߇ ߕߍߟߊ ߘߐ߫)، ߡߏ߬ߛߏ ߤߊߞߍ߫ ߡߞߊߣߌ߲ ߛߍ߬ߘߏ߲߬ߠߊ ߟߋ߬߸ ߊ߬ ߣߴߊ߬ ߦߋ߫ ߡߏ߬ߛߏ ߟߎ߬ ߟߊ߫ ߞߘߐ߬ߓߌߟߊ ߞߍ߬ߟߍ ߥߛߊ߬ߓߊ߰ߦߊ ߛߌ߲߬ߝߏ߲ ߠߋ߬ ߘߌ߫، ߊ߬ ߟߊߞߐ߯ ߘߊ߫ ߖߌ߬ߣߍ߫ ߟߋ߬߸ ߊ߬ ߣߌ߫ ߔߊ߬ߙߌ߬߸ ߊ߬ ߣߌ߫ ߥߊ߲ߛߌ߲ߕߐ߲߫߸ ߊ߬ ߦߋ߫ ߓߊ߲߬ߘߊ߬ߡߌ߬ߣߊ߬ߕߌ߰ ߞߘߐ ߟߋ߬ ߘߌ߫ ߤߎ߲ߝߙߋߦߌ߫ ߢߍߥߟߊ ߘߐ߫، ߊ߬ ߞߍ߫ ߘߊ߫ ߟߋ߬ ߡߊ߬ߡߌ߬ߣߊ߬ߟߌ߬ߟߊ ߘߌ߫ ߂߀߂߀ ߢߣߊߕߊߟߌ ߘߐ߫߸ ߞߊ߬ߦߌ߯ ߕߎ߬ߡߊ ߏ߬ ߟߋ ߟߊ߫߸ ߊ߬ߟߋ ߟߋ߬ ߝߊ߬ߛߏ ߢߌ߲߬ߧߊ ߞߟߊߘߊ ߞߊ߲ߕߌ߯ߦߊ ߟߊ߫.
ߊߓߋ߬ ߛߌ߬ߟߊ߸ߏ߬ ߣߊ߬ߣߍ߲߫ ߞߙߎߞߊ ߡߍ߲ ߕߐ߮ ߞߘߐ߫߸ ߏ߬ ߟߋ ߞߊ߲ߓߍ߲ ߓߐ߲ߛߐ߲ߘߊ߫ ߞߎߘߊ ߟߎ߬ ߘߌ߫߸ ߊ߬ߟߋ ߛߐ߬ߘߐ߲߬ ߘߊ߫ ߞߌ߲ߘߌߦߊ߫ ߟߋ߬ ߁߉߅߁ ߠߊ߫߸ ߊ߬ ߦߋ߫ ߢߎߡߍߙߋ߲ߦߊߟߌ ߗߋ߬ߥߎ߬ߣߍ߲߬ߗߋߥߎ ߟߋ߬ ߘߌ߫߸ ߡߍ߲ ߠߊߞߐ߯ ߘߊ߫ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲ ߞߣߐ߫، ߊ߬ ߓߘߊ߫ ߓߊ߯ߙߊ߫ ߦߙߐߓߊ߫ ߛߌߦߊߡߊ߲߫ ߘߐ߫ ߢߎߡߍߞߏ ߡߊ߬ߘߎ߮ ߘߐ߫߸ ߊ߬ ߣߌ߫ ߥߎߟߊߟߊ ߓߌߟߊߢߐ߲߯ߡߊ ߘߐ߫ ߊߡߙߌߞߌ߬ ߞߣߐ߫، ߞߏߟߊߘߍ߫ ߝߌ߬ߟߊ߬ ߦߴߊ߬ ߓߟߏ߫ ߊߡߙߌߞߌ߬ ߞߣߐ߫߸ ߡߍ߲ ߠߎ߬ ߦߋ߫ ߓߊ߯ߙߊ߫ ߟߊ߫ߢߎߡߍߞߏ ߘߊߞߎ߲ ߘߐ߫߸ ߊ߬ ߣߌ߫ ߘߊ߬ߡߊ߲߬ ߞߏ ߣߌ߫ ߓߌ߬ߟߊ߬ߢߐ߲߰ߡߊ ߘߊߞߎ߲ ߘߐ߫، ߊ߬ ߞߍ߫ ߘߊ߫ ߟߋ߬ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߂߀߁߀ ߞߊ߲ߕߌ߯ߦߊ߫ ߢߌߣߌ߲ ߝߍ߬߸ ߊ߬ ߞߊ߬ ߟߐ߬ߘߎ߮ ߆߲ ߠߋ߬ ߕߊ߬ ߖߡߊ߬ߓߊ ߕߍߡߊ߬ ߏ߬ ߕߎ߬ߡߊ ߟߊ߫، ߊ߬ ߣߊ߬ ߘߊ߫ ߟߋ߬ ߂߀߂߀ ߞߊ߲ߕߌ߯ ߢߣߊߕߊߟߌ ߝߣߊ߫ ߘߐ߫، ߊ߬ ߞߍ߫ ߘߊ߫ ߜߟߐߡߌ߲ ߞߏߕߌ߮ ߘߌ߫ ߂߀߂߁ ߠߊ߫߸ ߞߵߊ߬ ߛߌ߰ ߂߀߂߂ ߟߊ߫، ߊ߬ ߟߊ߫ ߡߊ߬ߡߌ߬ߘߊ߬ߟߌ ߣߌ߲߬ ߘߐ߫߸ ߊ߬ ߦߋ߫ ߘߊߞߎ߲ߓߊ߫ ߝߌ߬ߟߊ߫ ߟߋ߬ ߘߐ߫߸ ߞߏߢߊߡߐ߮ ߟߋ߬ ߦߴߊ߬ ߘߌ߫߸ ߞߏߕߌ߯ ߞߘߐ ߟߋ߬ ߝߣߊ߫ ߦߴߊ߬ ߘߌ߫.
ߊߓߘߎߟߊߦߌ߬ ߞߙߎ߬ߡߊ߬߸ ߏ߬ ߟߊ߫ ߞߙߎߞߊ ߟߋ߬ ߥߙߎߞߌ ߣߌ߫ ߡߏߦߌߞߎߘߊߘߌ ߟߊ߬ߘߍ (ߥߡߟ)߸ ߊ߬ ߛߐ߬ߘߐ߲߬ ߘߊ߫ ߁߉߈߃ ߟߋ߬ ߟߊ߫ ߒߛߙߍߜߘߍ߬߸ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲߬ߠߊ ߟߋ߬ ߦߴߊ߬ ߘߌ߫߸ ߞߊ߲ߞߊ߲߫ ߖߊ߯ߓߘߊ ߖߐ߲ߓߐ߲ ߦߋ߫ ߡߍ߲ ߓߟߏ߫߸ ߣߴߊ߬ ߥߊ߫ ߘߊ߫ ߟߊ߬ߞߐ߰ߟߌ ߟߊ߫ ߙߎ߬ߛߌ߬߸ ߊ߬ ߣߌ߫ ߛߣߍ߬ߜ߭ߊߟߌ߫، ߜ߭ߑߟߏߓߊߟ ߞߐ߲ߛߎ߳ߟߕߌ߲߬ ߛߌ߲ߘߌߓߊ߮ ߘߏ߫ ߟߋ߬ ߦߴߊ߬ ߘߌ߫߸ ߊ߬ ߣߌ߫ ߥߊߟߌߝߊ، ߞߵߊ߬ ߟߴߊ߬ ߞߊ߲߬߸ ߓߊߟߏߛߣߍߟߊ ߟߋ߬ ߦߴߊ߬ ߘߌ߫߸ ߊ߬ ߘߏ߲߬ ߦߋ߫ ߖߎ߬ߟߊ߬ߦߊ ߘߊߞߎ߲ ߝߣߊ߫ ߘߐ߫ ߖߌ߬ߣߍ߬ ߣߌ߫ ߞߏߙߋ߫ ߕߍߟߊ ߘߐ߫، ߊ߬ ߞߍ߫ ߘߊ߫ ߟߋ߬ ߥߛߊ߬ߘߋ߲ ߘߌ߫ ߂߀߂߀ ߠߊ߫߸ ߞߵߊ߬ ߛߌ߰ ߂߀߂߁ ߠߊ߫߸ ߊ߬ ߦߋ߫ ߓߐ߲ߛߐ߲ߘߊ߫ ߞߎߘߊ߫ ߟߋ߬ ߘߌ߫ ߓߘߍ߬ߓߘߍ߬ߟߌ ߘߐ߫.
ߡߏ߬ߤߊ߬ߡߍߘ ߣߊ߬ߓߋ߸ ߏ߬ ߦߋ߫ ߞߙߎߞߊ ߘߏ߫ ߟߋ߬ ߢߍ߫߸ ߊ߰ ߝߐ߫ ߟߊ߫ ߡߍ߲ ߡߊ߬ ߞߏ߫ ߢߊߞߎߘߦߊߟߌ ߣߌ߫ ߢߍߕߊ߮ ߢߌ߲߬ߧߊ (ߢߢߢ)߸ ߊ߬ߟߋ ߦߋ߫ ߛߓߍߘߊߛߋ߲ߞߏߟߊߡߐ߮ ߟߋ߬ ߘߌ߫، ߊ߬ ߟߊߞߐ߯ ߘߊ߫ ߓߐߛߑߕߐ߲߫߸ ߊ߬ ߣߌ߫ ߔߊ߬ߙߌ߬ ߛߐߙߑߓߐߣ߸ ߞߵߏ߬ ߟߊ߫ ߛߊ߲߫ ߝߊߙߊ߲ߛߌߛߑߞߏ߫ ߞߊ߲߬، ߊ߬ ߞߊ߬ ߘߋ߲ߡߌߛߍ߲ ߠߎ߬ ߟߊ߫ ߕߊ߬ߟߌ߬ ߞߏ ߡߊߣߊ߲ߞߎ߲ߘߊ߫ ߝߊ߬ߛߏ߬ߟߊ߬ߞߊ ߡߊߡߙߊ߬߸ ߊ߬ ߓߊ߯ߙߊ߫ ߘߊ߫ ߜߍߓߏ߲߫ ߞߏ ߡߊ߬ߘߎ߮߮ ߘߐ߫ (ߍߛ.ߖ߭ߋ.ߓߋ.ߖ߭ߋ)߸ ߞߊ߬ ߣߊ߬ ߘߍ߲߰ߦߊ߬ߟߌ ߡߊ߬ߘߎ߮ ߝߣߊ߫ ߘߐ߫ ߞߓߊߡߎ߯ ߞߏ ߘߐ߫، ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߡߊ߬ߞߏ ߦߋ߫ ߞߍ߫ ߟߴߊ߬ ߟߊ߫ ߥߊ߯ߕߌ߫ ߛߌߦߊߡߊ߲߫ ߞߵߊ߬ ߟߊߕߊ߯ ߢߣߊߕߊߟߌ߫ ߞߏ ߟߎ߬ ߘߐ߫، ߊ߬ߟߋ ߢߌߣߌ߲ߞߏ ߦߋ߫ ߢߊߞߎߘߦߊߟߌ ߟߋ߬ ߘߌ߫߸ ߊ߬ ߣߌ߫ ߥߣߊ߬ߦߊ.
ߟߊ߱ߖߌ߬ ߓߎߣߊ߬ ߞߋߕߊ߬߸ ߏ߬ ߣߊ߬ߣߍ߲߫ ߞߙߎߞߊ ߡߍ߲ ߕߐ߯ ߘߐ߫߸ ߏ߬ ߟߋ ߦߋ߫ ߖߌ߬ߣߍ߬ ߤߙߍߟߡߊ ߟߊ߬ߘߍ ߘߌ߫߸ ߥߊߟߌߝߊ ߟߋ߬ ߦߴߊ߬ ߘߌ߫ ߘߊ߬ߡߊ߲߬ ߞߏ ߣߌ߫ ߖߎ߬ߟߊ߬ߦߊ ߞߊߡߊ߲ ߞߣߐ߫߸ ߊ߬ ߘߋ߬ߙߌ߬ߣߍ߲߫ ߓߘߍ߬ߓߘߍ߬ߟߌ ߟߊ߫ ߞߏߛߓߍ߫، ߊ߬ ߞߍ ߘߊߡߌ߬ߣߊ߬ ߘߊ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߞߊ߬ߦߌ߯ ߁߉߉߃ ߟߋ߬ ߟߊ߫߸ ߊ߬ ߛߐ߬ߘߐ߲߬ ߘߊ߫ ߂߀߁߀ ߞߊ߲ߕߌ߯ ߢߣߊߕߊߟߌ ߘߐ߫߸ ߞߊ߬ ߛߌ߰ ߦߙߐ ߛߐ߬ߘߐ߲߬ ߞߎߡߊߞߍߓߏ߲ ߠߊ߫ ߂߀߂߀ ߢߣߊߕߊߟߌ ߞߐ ߘߐ߫، ߊ߬ ߟߊ߫ ߥߊߟߌߘߊ ߟߋ߬ ߓߕߊߞߛ ߓߎߣߊ߬ ߡߊߦߌߣߌ߲ߜ߭ ߘߌ߫߸ ߏ߬ ߦߋ߫ ߣߐ߬ߓߊ߬ߟߌ߬ ߖߊߥߏ ߘߊߞߎ߲ ߠߋ߬ ߘߐ߫، ߞߙߎߞߊ߫ ߄߄ ߡߍ߲ ߠߎ߬ ߟߊߘߍ߬ ߘߊ߫ ߞߵߊ߬ߟߎ߬ ߟߊ߫ ߖߡߟ ߞߟߐ߬ߟߐ߬ߓߊ ߘߌ߫߸ ߊ߬ ߟߊ߫ ߞߙߎߞߊ ߦߴߏ߬ ߘߐ߫ ߟߋ߬.
ߡߏ߬ߤߊ߬ߡߍߘ ߛߋ߬ߙߌߝ ߕߎ߲߬ߞߙߊ߬߸ ߏ߬ ߦߋ߫ ߖߘߍ߬ߦߋ߬ ߡߊ߬ߡߌ߬ߘߊ߬ߟߌ߬ߟߊ ߘߌ߫߸ ߡߍ߲ ߛߐ߬ߘߐ߲߬ ߘߊ߫ ߁߉߅߃ ߟߊ߫ ߓߏ߫߸ ߏ߬ ߦߋ߫ ߛߙߊ߬ߟߏ߲߫ ߠߋ߬ ߘߐ߫، ߊ߬ߟߋ ߛߐ߰ ߘߊ߫ ߥߊߟߌߥߊߟߌ߫ ߓߏߙߌ ߟߋ߬ ߡߊ߬ ߡߎߣߎ߲߬߸ ߤߊ߲߯ ߞߊ߬ ߣߊ߬ ߞߍ߫ ߘߎߢߊ߫ ߖߎ߬ߟߊ߬ߓߊ ߟߎ߬ ߘߏ߫ ߘߌ߫، ߞߊ߬ߕߎ߲߯߸ ߊ߬ ߞߊ߬ ߞߙߎ߬ ߖߎߟߦߊ ߞߍ߫ ߟߋ߬߸ ߤߐ߲ߞߐ߲߫ ߞߣߐ߫߸ ߝߘߊ߬ߝߌ߲߬ߠߊ߫ ߕߟߋ߬ߓߐ ߘߐ߫߸ ߔߊ߬ߙߌ߬߸ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲، ߊ߬ ߞߍ߫ ߘߊ߫ ߟߋ߬ ߥߛߊ߬ߘߋ߲ ߘߌ߫ ߂߀߂߀ ߣߌ߫ ߂߀߂߁ ߕߍߟߊ ߘߐ߫߸ ߘߊ߬ߡߊ߲ ߣߌ߫ ߘߍ߲߰ߦߊ߬ߟߌ ߥߛߊ߬ߓߊ߰ߦߊ ߘߐ߫، ߊ߬ ߢߐ߲߰ ߡߊ߬ߡߌ߬ߘߊ߬ߟߌ߬ߟߊ ߞߊ߫ ߘߐ߯߸ ߡߍ߲ ߓߘߊ߫ ߘߎߢߊ߫ ߓߌ߬ߟߴߊ߬ ߛߋ߲߬ߞߘߐ߫ ߞߏߢߊߓߐ ߛߌߟߊ ߝߍ߬߸ ߞߵߊ߬ ߛߐ߬ߘߐ߲߬ ߊ߬ ߟߊ߫ ߞߊ߬ߙߊ߲ ߜߎ ߡߊ߫ ߖߊ߲߬ߝߊ߬ ߢߊ ߏ߬ ߡߊ߬.
ߝߊ߭ߦߊ߬ ߟߊ߲߱ߛߊ߬ߣߊ߫ ߡߟߌ߬ߡߣߏ߬߸ ߏ߬ ߦߋ߫ ߞߊ߲ߠߊߓߌߟߊ ߘߍ߭ (ߓߑߟߐߞ ߟߌߓߋߙߊߟ) ߞߙߎߞߊ ߟߊ߫ ߡߊ߬ߡߌ߬ߘߊ߬ߟߌ߬ߟߊ ߟߋ߬ ߘߌ߫، ߡߍ߲ ߥߊ߫ ߘߊ߫ ߞߣߊߘߊ߫ ߟߊ߬ߞߐ߰ߟߌ ߟߊ߫߸ ߊ߬ ߦߋ߫ ߟߊ߬ߞߟߏ߬ߞߟߏ߬ߟߌ ߡߊ߬ߡߙߊ߬ߟߌ ߞߏ߲߬ߓߏ ߟߋ߬ ߘߌ߫، ߊ߬ ߞߊ߬ ߟߞߊ߬ߙߊ߲߬ߠߌ߲ ߘߊߡߌ߬ߣߊ߫ ߡߊ߬ߣߍ߬ߦߊ߫ ߋߞߐߟ ߣߐߙߑߡߊߟ ߟߊ߫ ߞߊ߬ߦߌ߯ ߁߉߈߇ ߟߋ߬ ߟߊ߫߸ ߊ߬ ߓߊ߯ߙߊ߫ ߘߊ߫ ߞߌߢߍ߲߫ ߜߍߓߏ߲ ߠߊ߫، ߊ߬ ߘߏ߲߬ ߘߊ߫ ߓߘߍ߬ߓߘߍ߬ߟߌ ߘߐ߫ ߁߉߉߁ ߠߋ߬ ߟߊ߫߸ ߞߊ߬ ߓߑߟߐߞ ߟߌߓߋߙߊߟ ߟߊߘߊ߲߫ ߂߀߁߃ ߟߊ߫، ߕߋ߲߭ߕߋ߲߭ ߣߌ߲߬ ߘߐ߫߸ ߡߐ߰ ߕߴߦߋ߲߬ ߡߍ߲ ߦߋ߫ ߘߐ߬ߕߊߡߌ߲ ߡߊߓߎ߬ߙߎ߲߬ߕߌ߬ ߟߊ߫ ߞߊ߬ ߛߴߊ߬ ߘߐ߫، ߊ߬ ߟߊ߫ ߛߍ߬ߘߏ߲ ߞߎ߲߭ ߘߏ߫ ߟߋ߬ ߞߎߡߊߞߍߓߏ߲߫ ߡߙߊߞߊ߲߫ ߞߏ ߘߌ߫߸ ߊ߬ ߣߌ߫ ߞߊ߬ ߦߟߍ߬ߡߊ߲ ߘߏ߲߬ ߞߊ߲ߞߋߦߊ ߛߌߦߊߡߊ߲߫ ߘߐ߫.
ߡߐ߰ ߞߐ߬ߣߐ߲߬ߘߐ ߡߍ߲ ߠߎ߬ ߦߋ߫ ߕߋ߲߬߸ ߡߙߌߦߊ߫ ߓߐߣߍ߲߫ ߢߐ߲߰ ߡߊ߫ ߜߊ߲߰ߛߊ߲߫ ߠߋ߬ ߢߌ߲߬ ߠߎ߬ ߟߊ߫߸ ߡߍ߲ ߠߎ߬ ߦߴߊ߬ ߝߍ߬ ߞߊ߬ ߖߡߊ߬ߣߊ ߟߊߥߙߎߞߌ߫ ߊ߬ ߕߊ߫ ߦߋߢߊ߫ ߡߊ߬، ߓߊߏ߬߸ ߛߓߍߘߊߛߋ߲ߞߏߟߊߡߐ߮ ߦߴߊ߬ ߘߐ߫߸ ߣߊ߲߬ߕߌ߮ ߦߴߊ߬ ߘߐ߫߸ ߛߍ߬ߘߏ߲߬ߠߊ ߟߎ߬ ߦߴߊ߬ ߘߐ߫߸ ߞߎߡߊߕߍ߫ ߥߊߟߌߝߊ ߟߎ߫ ߡߊ߬߸ ߓߍ߯ ߣߴߊ߬ ߦߋߝߊߘߌ߫ ߟߋ߬، ߒ߬ߓߊ߬߸ ߞߏߟߌ߲ߞߏߟߌ߲ ߕߋ߬ߟߋ߫ ߂߈ ߣߊ߬ߕߐ ߡߊ߬߸ ߖߌ߬ߣߍ߬ߞߊ߬ ߢߣߊߕߊߟߌߟߊ߫ ߞߋ߲߬ߥߟߎ߬ ߆،߇ ߟߋ߬ ߓߍߣߊ߬ ߕߊ߯ ߞߋߟߋ߲߫ ߛߎߥߊ߲ߘߌ߫ ߢߌ߲߬ ߠߎ߬ ߘߐ߫߸ ߞߊ߬ ߖߡߊ߬ߣߊ ߘߴߏ߬ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.