߂߀߂߅ ߞߏߟߌ߲ߞߏߟߌ߲ ߕߟߋ߬ ߁߈ ߣߌ߲߬ ߡߊ߬߸ ߛߙߎߓߊ߲ߣߍ߲߫ ߛߊ߲߭ ߝߌ߬ߟߊ߬ ߣߌ߫ ߕߟߊ ߘߏ߫ ߕߎߣߎ߲߫ ߘߊ߫ ߡߌ߬ߛߍ߲߬ ߘߊ߲ߘߐ߫ ߞߘߐ߫ ߕߋ߲߬߸ ߊ߬ߟߋ ߡߍ߲ ߠߊߕߊ߯ߣߍ߲߫ ߕߘߍ߬ ߓߙߎ߫ ߛߊ߲߫ ߦߌߟߊ ߘߐ߫ ߞߊ߬ߣߌ߲߬، ߒ߬ߓߊ߬߸ ߏ߬ ߛߘߌ߬ߣߍ߲ ߠߋ߬ ߥߊߣߍ߲߫ ߦߋ߫ ߟߊ߫ ߓߏ߲߫ ߞߎߘߎ߲ ߘߏ߫ ߞߣߐ߫߸ ߊ߬ ߕߊ߬ ߘߊ߫ ߞߊ߬ ߥߴߊ߬ ߘߌ߫ ߘߊ߲ߘߊߟߌ߫ ߕߊ߲ߓߊ߲ ߠߊ߫߸ ߞߣߊ߬ߕߏ߫ ߊ߬ ߟߊߕߊ߯ ߟߊ߫ ߘߊ߲ߘߊߛߏߓߊ ߟߊ߫ ߏ߬ ߞߐߝߍ߬.

߂߀߂߅ ߞߏߟߌ߲ߞߏߟߌ߲ ߕߟߋ߬ ߁߈ ߡߊ߬߸ ߏ߬ ߡߍ߲ ߓߍ߲߬ ߘߊ߫ ߓߌߟߏ߲ ߡߊ߬ ߞߊ߬ߣߌ߲߬߸ ߖߣߍߓߎ߬ ߘߎ߲ߓߎߦߊ߫ ߡߍ߲ ߛߌ߬ߞߛߊߓߎ ߦߋ߫ ߛߊ߲߭ ߝߌ߬ߟߊ߬ ߣߌ߫ ߕߟߊ߫ ߘߐ߫߸ ߏ߬ ߟߋ ߕߎߣߎ߲߫ ߘߊ߫ ߁߇ߙߋ߲ ߡߊ߬، ߏ߬ ߞߍ߫ ߘߊ߫ ߕߌ߰ߓߙߌ߬ ߞߎߘߊ߫ ߟߋ߬߸ ߏ߬ ߦߋ߫ ߣߐ߬ߘߎ߮ ߘߏ߫ ߟߋ߬ ߘߌ߫ ߛߌ߯ߙߌ߲߫ ߡߙߊ ߘߐ߫، ߊ߬ ߝߊ߬ ߛߌ߬ߘߌߞߌ߬ ߘߎ߲ߓߎߦߊ߫ ߟߊ߫ ߝߐߟߌ߫ ߘߐ߫߸ ߞߏ߫ ߘߋ߲ߣߍ߲ ߞߊ߬ ߞߐ߲ߞߐ߫ ߞߏ ߟߋ߬ ߝߐ߫ ߊ߬ ߦߋ߫߸ ߞߏ߫ ߞߊ߬ ߓߙߎ ߛߊ߲߬ ߊ߬ ߦߋ߫، ߊ߬ ߝߣߊ߫ ߞߊ߬ ߥߊߘߌ ߘߌ߫ ߛߙߎߓߊ߲ߣߍ߲ ߞߘߐ߬ߡߛߏ߫ ߡߊ߬߸ ߞߏ߫ ߊ߬ߟߎ߬ ߦߋ߫ ߥߊ߫ ߓߙߎ ߛߊ߲߬ ߞߋߟߋ߲ߘߌ߫߸ ߊ߬ߟߎ߬ ߟߊ߫ <<ߟߎ ߘߊߝߍ߬ ߦߋ߲߬ ߌߞߘߐ߫.>>

ߘߏߣߍ߲߫ ߞߍ ߕߋ߲߬ ߞߘߐ߬ߡߛߏ߬ߣߍ߲ ߣߌ߫ ߓߙߎ߫ ߛߐ߲ߞߐ ߟߋ߬ ߞߵߊ߬ ߞߐߛߊ߲߬ߦߌ߲߬߸ ߞߵߊ߬ ߝߐ߫ ߞߏ߫: <<ߓߙߎ߫ ߡߊ߫ ߛߐ߬ߘߐ߲߬.>>߸ ߖߣߍߓߎ߬ ߘߏ߲߬ ߦߋ߫ ߞߊ߬ߛߌ ߞߊ߲߬ ߞߏ߫ <<ߝߏ߫ ߓߙߎ ߟߋ߬ ߓߊ߯ ߛߊ߲߬ ߕߘߋ߫>>، ߊ߬ ߝߊ߬ ߞߊ߲߫ ߞߏ߫ ߏ߬ ߟߋ ߘߐ߫ ߛߊ߫߸ ߞߏ߫ ߊ߬ ߦߋ߫ ߖߣߍߓߎ߬ ߞߟߌ߫߸ ߊ߬ߟߎ߬ ߦߋ߫ ߣߊ߬، ߏ߬ ߥߊߣߍ߲߫ ߏ߬ ߟߋ ߘߐ߫߸ ߏ߬ ߞߐߛߊߦߌ߲߫ ߦߋߣߍ߲߫ ߕߍ߫، ߝߊ߭ ߕߊ߫ ߖߊ߬ߕߋ߬ ߘߐ߫ ߡߎ߬ߕߎ߲߬ ߛߊ߫߸ ߞߏ߫ ߊ߬ ߟߐ߬ߣߍ߲߬ ߘߌ߫ ߞߍ߫ ߞߏ߫ ߘߐߜߍ ߟߋ߬ ߟߊ߫ ߦߋ߲߬، ߓߊߏ߬߸ ߓߙߊߡߊߖߊ߲ ߠߋ߬ ߕߎ߲߬ ߦߴߌߘߐ߫ ߦߋ߲߬ ߏ߬ ߟߏ߲߸ ߏ߬ ߘߐ߲߬ߞߟߌ߬ ߟߊ߬ߞߊߛߌ ߟߎ߫ ߕߎ߲߬ ߦߴߌߘߐ߫߸ ߘߋ߲ߣߍ߲ ߛߌߦߊߡߊ߲߫ ߕߘߍ߬ ߞߏ߫ ߘߐߜߍ ߟߊ߫ ߦߋ߲߬.

ߡߌ߬ߛߍ߲߬ ߓߌߛߊ߬ߓߊ߫ ߢߐ߲߰ ߞߍ߫ ߘߊ߫ ߏ߬ ߟߋ ߘߐ߫ ߛߊ߫߸ ߊ߬ ߡߊ߫ ߦߋ߫، ߊ߬ߟߋ ߛߌ߰ߣߴߊ߬ ߟߊ߫ ߓߊ߬ߘߏ ߟߊ߫، ߓߊߏ߬߸ ߊ߬ ߦߟߌ߫ ߕߎ߲߬ ߕߍ߫ ߘߋ߲ ߕߎߣߎ߲߫ ߞߏ߫ ߟߊ߫، ߞߏ߬ߣߌ߲߬߸ ߊ߬ߟߋ ߝߡߊ߬ߣߍ߲߫ ߠߋ߬ ߕߋ߲߬߸ ߡߐ߱ ߟߎ߬ ߦߋ߫ ߣߊ߭ ߞߊ߲߬߸ ߊ߬ ߘߋ߲ ߦߴߏ߬ ߟߎ߬ ߓߟߏߟߊ߫، ߝߊ߭ ߟߋ߬ ߣߌ߲߬ ߓߍ߯ ߝߐ ߞߊ߲߬، ߏ߬ ߟߎ߫ ߞߵߊ߬ ߝߐ߫ ߊ߬ ߦߋ߫ ߞߏ߫ ߊ߬ߟߎ߬ ߕߊ߯ߣߍ߲߫ ߘߋ߲ ߛߐ߬ߘߐ߲߬ ߠߊ߫ <<ߓߏ߲߫ ߞߎߘߎ߲ ߘߏ߫ ߟߋ߬ ߞߣߐ߫߸ ߊ߬ ߛߋ߲߭ ߣߴߊ߬ ߓߟߏ ߓߍ߯ ߛߘߌ߬ߣߍ߲߬߸ ߞߵߊ߬ ߘߊ ߣߙߊ߫ ߣߙߊߟߊ߲ ߠߊ߫߸ ߞߓߊߞߎߘߎ߲ ߟߊߣߴߊ߬ ߞߐ ߘߐ߫.>>

ߏ߬ ߞߍ߸ ߊ߬ߟߎ߫ ߞߊ߬ ߛߙߎߓߊ߲ߣߍ߲ ߕߊ߬ ߞߊ߬ ߥߴߊ߬ ߘߌ߫ ߕߌ߰ߓߙߌ߬ ߘߊ߲ߘߊߛߏߣߍ߲ ߠߊ߫߸ ߞߣߊ߬ߕߏ߫ ߊ߬ ߟߊߕߊ߯ ߟߊ߫ ߛߌ߯ߙߌ߲߫ ߘߊ߲ߘߊߛߏߓߊ ߟߊ߫ ߡߎ߬ߕߎ߲߬ ߛߊ߫. <<ߊ߲ ߛߌ߬ ߘߊ߫ ߦߋ߲߬ ߠߋ߬ ߤߊ߲߯ ߛߐ߱ (ߣߌ߲߬) ߡߊ߬.>> ߛߌ߬ߘߌߞߌ߬ ߘߎ߲ߓߎߦߊ߫ ߟߋ߬ ߞߊ߲߫ ߕߋ߲߬، ߛߌ߯ߙߌ߲߫ ߘߊ߲ߘߊߛߏߓߊ ߡߐ߱ ߟߎ߬ ߓߊ߲ ߡߊ߬ߝߟߍ߬ߟߌ ߟߎ߬ ߓߍ߯ ߟߊ߫߸ ߏ߬ ߟߎ߫ ߞߊ߬ ߕߡߊ߬ߖߌ ߓߐ߫ ߊ߬ߟߎ߬ ߘߐ߫، ߞߵߊ߬ ߦߌ߬ߘߊ߬ ߞߏ߫ <<ߓߋ߬ ߡߊ߫ ߞߍ߫ ߊ߬ ߞߊ߲߬߸ ߊ߬ ߡߊ߫ ߝߙߋߞߋ߫ ߜߘߍ߫ ߛߐ߬ߘߐ߲߬.>> ߝߊ߭ ߞߵߊ߬ ߦߌ߬ߘߊ߬ ߞߏ߫ <<ߒ ߧߋ߫ ߞߎߡߊ߫ ߟߴߊߟߎ߫ ߦߋ߫ ߦߙߐ ߡߍ߲ ߘߐ߫ ߕߋ߲߬߸ ߊ߬ ߣߴߊ߬ ߘߍ߬ߢߐ߲߮ ߦߋ߫ ߕߏߟߏ߲ ߠߋ߬ ߞߊ߲߬ ߟߎ ߞߣߐ߫ ߕߋ߲߬.>>

ߦߙߐ ߏ߬ ߟߋ ߘߐ߫߸ ߘߋ߲ߓߦߊ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߡߴߊ߬ ߞߍߓߊ߯ ߟߐ߲߫ <<ߊ߲ ߡߴߊ߬ ߟߐ߲߫ ߡߐ߰ ߛߌ߫ ߣߐ߬ ߞߏ߫ ߛߎ߮ ߣߌ߲߬ ߞߍ߫ ߟߊ߫.>> ߏ߬ ߟߋ ߘߐ߫߸ ߝߊ߭ ߞߊ߲߫ ߞߏ߫ ߊ߬ ߦߋ߫ ߡߍ߲ ߢߌߣߌ߲߫ ߠߊ߫ ߣߌ߲߬ ߞߏ ߘߐ߫߸ ߏ߬ ߟߋ ߊ߬ ߞߏ ߟߊߜߍ ߘߌ߫.

ߌߓߙߊߤߌߡߊ߬ ߝߙߊ߬ߓߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߞߐߦߌߘߊ ߛߌ߯ߙߌ߲߫.