ߖߌ߬ߣߍ߬ ߞߙߎߞߓߊ߫ ߛߓߊ߬ ߓߘߊ߫ ߟߊߘߎ߲߫ ߕߟߋ߬ ߉߀ ߖߊ߬ߕߋ߬ ߞߘߐ߫، ߘߎ߰ߞߣߍ ߡߊ߬ߡߙߊ߬ߟߌ ߣߌ߫ ߕߊ߲ߓߊ߲ߓߐߟߌ ߞߏߕߌ߮ ߓߘߴߊ߬ ߦߌ߬ߘߊ߬ ߞߏ߫ ߊ߬ߟߎ߬ ߕߍ߫ ߛߊ߬ߙߌ߬ߦߊ߬ ߖߐ߲ߖߐ߲߫ ߠߋ߬ ߞߣߐ߫، ߟߊ߬ߘߎ߲߬ߠߌ߲ ߢߌ߲߬ ߘߏ߲߬ ߞߍߣߍ߲߫ ߞߊ߲ߘߟߌ߫ ߢߣߊߕߊߟߌ ߢߊߞߘߐߟߊ ߟߋ߬ ߘߐ߫ ߕߋ߲߬.
ߡߊߡߊߘߎ߫ ߛߋߟߎ߫ ߘߊߟߍ߲߬ ߖߊߟߏ߫ ߟߊ߫ ߞߙߎߞߊ߸ ߖߌ߬ߣߍ߬ ߓߍ߯ߦߊ ߝߊ߲߬ߞߊ ߘߍ߭ ߣߌ߫ ߞߊ߬ߙߊ߲߬ߝߊ ߊߟߌߝߊ߫ ߞߐ߲ߘߍ߫ ߟߊ߫ ߞߙߎߞߊ߸ ߖߌ߬ߣߍ߫ ߡߌ߬ߙߌ߲߬ߘߌ߬ ߟߊ߬ߘߍ ߣߌ߫ ߢߍߕߊ߮ ߣߌ߫ ߟߊ߬ߞߎ߬ߘߦߊ߬ߟߌ ߞߙߎߞߊ ߟߎ߬ ߓߘߊ߫ ߟߊߘߎ߲߫ ߞߊߙߏ߫ ߘߓߊ߬ ߞߣߐ߫߸ ߞߵߊ߬ߟߎ߫ ߛߋ߲߬ߓߐ߫ ߖߌ߬ߣߍ߫ ߓߘߍ߬ߓߘߍ߬ߟߌ߬ ߢߍߥߟߊ ߓߍ߯ ߟߊߘߍ߬ߣߍ߲ ߘߐ߫ ߞߎ߲߬ߕߊ߮ ߏ߬ ߞߣߐ߫، ߡߙߌߘߐ ߏ߬ ߡߍ߲ ߞߟߊ߬ߣߐ߬ߦߊ߬ ߘߊ߫ ߖߌ߬ߣߍ߫ ߘߎ߰ߞߣߍ ߡߊ߬ߡߙߊ߬ߟߌ ߣߌ߫ ߕߊ߲ߓߊ߲ߓߐߟߌ ߞߏߕߌ߮ ߓߟߏ߫߸ ߌߓߙߊߤߌߡߊ߫ ߞߊߟߌߟ ߞߐ߲ߘߍ߫، ߊ߬ ߘߏ߲߬߸ ߟߊ߬ߘߎ߲߬ߠߌ߲߬ ߞߏ ߣߌ߲߬ ߝߐ ߌߞߘߐ߫߸ ߏ߬ ߟߋ ߞߍߣߴߊ߬ ߟߊߓߊ߯ߙߊ ߘߊߡߌ߬ߣߊ߬ ߢߊ ߘߌ߫.
ߞߏߕߌ߯ߘߊ ߟߊ߫ ߝߐߟߌ߫ ߘߐ߫߸ ߞߏ߫ ߡߙߌߘߐ ߣߌ߲߬ ߡߊ߫ ߕߊ߬ ߦߋ߲߬ ߕߋ߲߬ ߜߊ߲ߛߊ߲߫߸ ߊ߬ ߕߊ߬ߣߍ߲߫ « ߞߏߟߊߕߋߟߋ߲ߓߊߟߌߦߊ ߘߏ߫ ߟߎ߫ ߟߋ߬ ߞߏߛߐ߲߬ » ߡߍ߲ ߠߎ߬ ߟߊߕߋߟߋ߲ ߦߴߊ߬ߟߎ߫ ߞߊ߲߬ ߘߌߦߊߜߏߦߊ ߘߌ߫ ߞߊ߬ߣߌ߲߬، ߏ߬ ߡߍ߲ ߞߎߡߊ ߝߐߣߍ߲߫ ߓߘߍ߬ߓߘߍ߬ߟߌ߬ߟߊ ߟߎ߬ ߟߊ߫ ߞߙߎߞߊ߫ ߞߏ ߓߊߛߌ߰ ߞߊ߲ ߞߣߐ߫، ߊ߬ߟߎ߬ ߟߊߛߏ߬ߓߌ߬ ߘߊ߫ ߞߊ߬ ߕߟߋ߬ ߄߅ ߘߴߊ߬ߟߎ߫ ߡߊ߬ ߥߊ߯ߕߌ߫߸ ߊ߬ߟߎ߬ ߡߊ߫ ߛߋ߫ ߞߏ ߟߎ߬ ߓߐ߫ ߟߴߊ߬ ߛߌߟߊ ߝߍ߬ ߏ߬ ߛߌ߫ ߘߐ߫، ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߊ߬ߟߎ߬ ߟߊ߫ ߞߏ ߟߎ߬ ߕߍ߫ ߞߊ߬ߟߊ߫ ߞߊ߲߬ ߡߊ߬ߡߙߊ߬ߟߌ߬ ߞߎ߲ߘߊ߫.
ߊ߬ߟߎ߬ ߟߊ߫ ߞߙߎߞߊ ߟߎ߬ ߟߊߘߎ߲ߣߍ߲߫ ߏ߬ ߟߋ ߘߐ߫ ߞߏߕߌ߯ߘߊ ߓߟߏ߫، ߟߊ߬ߘߎ߲߬ߠߌ߲ ߞߎ߲߬ߕߊ߮ ߣߌ߲߬ ߞߣߐ߫߸ ߊ߬ߟߎ߬ ߕߴߛߋ߫ ߟߊ߬ߘߍ߬ ߞߍ߫ ߟߊ߫، ߊ߬ߟߎ߬ ߕߴߛߋ߫ ߔߊߞߌߛߦߊ߫ ߞߍ߫ ߟߊ߫، ߊ߬ߟߎ߬ ߕߴߛߋ߫ ߓߘߍ߬ߓߘߍ߬ߟߌ߬ ߟߊ߬ߛߋ߬ߟߌ ߛߎ߯ ߺ ߎ ߺ ߛߎ߯ ߟߋ߬ ߞߍ߫ ߟߊ߫߸ ߊ߬ߟߎ߬ ߟߊ߫ ߝߊ߲ߓߊ ߟߊ߫ ߓߊ߬߸ ߥߟߊ߫ ߝߊ߲߬ ߜߘߍ߫، ߣߌ߫ ߛߊ߬ߙߌ߬ߦߊ ߏ߬ ߘߏ߲߬ ߝߣߊ߫ ߛߐ߬ߛߐ߬ ߘߴߊ߬ߟߎ߬ ߓߟߏ߫߸ ߏ߬ ߘߌ߫ ߛߋ߫ ߞߍ߫ ߟߴߊ߬ߟߎ߫ ߞߊ߲߬ ߓߌ߲߬ߓߊߥߏ ߘߌ߫߸ ߡߍ߲ ߝߐߣߴߊ߬ߟߎ߬ ߟߊ߫ ߛߊ߬ߙߌ߬ߦߊ߬ ߛߓߍ ߞߣߐ߫߸ ߊ߬ ߣߌ߫ ߓߌ߲߬ߓߊ߬ߥߏ߬ ߛߊߙߌߦߊ.
ߕߟߋ߬ ߉߀ ߟߋ߬ ߘߌߣߴߊ߬ߟߎ߫ ߡߊ߬߸ ߊ߬ߟߎ߬ ߦߴߊ߬ߟߎ߬ ߞߊߘߊ߲߫ ߞߊ߬ ߞߍߕߊ ߟߎ߬ ߞߍ߫ ߏ߬ ߞߣߐ߫߸ ߞߵߊ߬ߟߎ߫߫ ߓߌ߬ߟߊ߬ ߢߊ߫ ߡߊ߬߸ ߦߏ߫ ߛߊ߬ߙߌ߬ߦߊ ߢߌߣߌ߲ߣߴߊ߬ ߡߊ߬ ߢߊ ߡߍ߲ ߡߊ߬، ߣߴߏ߬ ߝߣߊ߫ ߕߊ߬ߡߌ߲߬ ߘߊ߫ ߞߵߊ߬ ߛߐ߬ߘߐ߲߬ ߞߌ߬ߛߍ߬ ߡߊ߫ ߦߋ߫ ߖߓߊ߬ ߘߐ߫߸ ߢߊ ߘߌ߫ ߡߊߖߌ߰ ߊ߬ߟߎ߬ ߟߊ߫ ߞߏ ߝߍ߬ ߏ߬ ߘߐ߫ ߓߘߍߞߍ߭ ߡߎ߬ߕߎ߲߬߸ ߓߍ߲߬ ߓߊ߯ ߞߍ߫ ߡߍ߲ ߡߊ߬ ߝߊ߰ߡߊ ߟߎ߬ ߓߟߏ߫ ߏ߬ ߘߐ߫߸ ߏ߬ ߟߋ ߟߊߕߊ߯ߡߊߕߐ߫.
ߟߊ߬ߘߎ߲߬ߠߌ߲ ߡߍ߲ ߦߋ߫ ߣߌ߲߬߸ ߏ߬ ߞߍߣߍ߲߫ ߠߋ߬ ߞߵߊ߬ ߛߐ߬ߘߐ߲߬ ߊ߬ ߓߘߊ߫ ߝߐ߫ ߝߊ߲߬ߞߊߛߌ߬ߣߊ ߘߏ߫ ߟߎ߫ ߓߟߏ߫ ߖߌ߬ߣߍ߬ ߞߣߐ߫߸ ߞߏ߫ ߊ߬ߟߎ߬ ߦߋ߫ ߓߐ߫ ߔߊߞߌߛߦߊ ߘߌ߫ ߕߎߟߊߝߌ߲ ߕߟߋ߬ ߅ ߡߊ߬، ߏ߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߘߊߟߍ߲߬ ߠߊ߫ ߞߙߎߞߊ ߦߋ߫ ߜߟߍ߬ߦߊ ߘߏ߫ ߘߐ߫߸ ߊ߬ߟߎ߫ ߜߊ߲߬ߛߊ߲ ߛߋߣߍ߲߫ ߕߍ߫ ߓߍ߲߬ ߠߊ߫ ߞߋߟߋ߲߫ ߘߐ߫ ߡߎߣߎ߲߬߸ ߊ߬ߟߎ߬ ߟߊ߫ ߞߎ߲߬ߜߙߊ ߓߘߊ߫ ߘߓߐ߫ ߊ߬ ߞߕߐ߫ ߛߋ߲߬ߢߊ߬ ߛߌߦߊߡߊ߲߫߸ ߞߵߏ߬ ߞߎ߲߭ ߞߍ߫ ߊ߬ߟߎ߬ ߟߊ߫ ߞߎ߲߬ߕߌ߮ ߘߏ߫ ߟߎ߫ ߓߌ߲߬ߓߊߥߏ ߘߴߊ߬ߟߎ߬ ߓߟߏ߫߸ ߦߏ߫ ߡߊ߬ߘߏ߬ߣߌ߲߬ߠߌ߲ ߞߏߕߌ߮ ߦߴߏ߬ ߘߐ߫ ߢߊ ߡߍ߲߸ ߎߛߑߡߊߣߌ߲߫ ߜ߭ߊ߯ߥߊߟ ߖߊߟߏ߫، ߝߏ߫ ߊ߬ߟߎ߬ ߟߊ߫ ߞߎߡߊ ߓߘߊ߫ ߛߋ߫ ߞߕߌߖߌ߲߫ ߛߊ߲ߘߐߕߊ ߟߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
Aucun commentaire pour le moment.