ߕߋ߬ߟߋ ߓߘߊ߫ ߡߊߖߌ߰ ߞߌ߲߬ߘߊ ߞߣߐ߫ ߣߍ߲ߞߍ߫߸ ߒ߬ߞߊ߬ ߞߟߊߦߊ ߡߍ߲ ߦߴߊ߬ ߞߘߐ߫߸ ߏ߬ ߞߢߊ߬ߣߍ߲߬ ߥߊ߫ ߟߴߊ߬ ߓߘߊ، ߓߍ߯ ߛߌ߰ߣߍ߲߬ ߞߏ߲ߕߏ ߞߊ߲߬߸ ߡߎߛߊ߫ ߦߋ߫ ߞߊ߲߬ߞߊߟߌ ߘߐߓߎߙߎ߲ߘߎ ߞߊ߲߬߸ ߞߵߊ߬ ߞߊ߲߬ߞߊ߬ߣߍ߲߫ ߗߋ߲߱ ߓߐ߫ ߞߏߢߊ߬، ߞߊ߲߬ߞߊߟߌ ߛߎߡߊ߫ ߘߌߡߊ߲ߣߍ߲ ߦߋ߫ ߓߐ ߞߊ߲߬ ߛߌ߲ߞߏ߲ ߓߘߊ߫ ߝߊ߲߭ ߝߍ߬߸ ߓߊ߬ߘߏ ߘߊ ߟߊߞߊ߭ ߦߴߌߘߐ߫، ߓߌ߬ ߓߊ߬ߘߏ ߘߐ߫߸ ߞߎߡߊ߫ ߡߊ߫ ߞߍ߫ ߕߏ߬ߟߊ߲߬ ߞߏ߫ ߞߊ߲߬߸ ߞߎߡߊߕߍ߫ ߡߊ߬ߟߏ߬ ߓߘߐ߬ ߞߏ ߟߌ߬ߤߟߊ ߡߊ߬ ߛߏ ߞߣߐ߫، ߞߎߡߊ߫ ߞߍ߫ ߘߊ߫ ߡߎ߲߬ ߞߊ߲߬߸ ߊ߲ ߧߋ߫ ߕߋ߬ߟߋ߲ ߓߊ߲߫ ߠߊ߫ ߓߊ߬ߘߏ ߡߍ߲ ߠߊ߫ ߜߞߋ߬ߘߊ ߟߊ߫߸ ߞߊ߲ ߡߍ߲ ߦߋ߫ ߝߐ߫ ߟߴߊ߲ ߓߟߏ߫ ߦߋ߲߬߸ ߏ߬ ߛߋߕߐ߫ ߛߓߍ߫ ߟߊ߫ ߛߓߍߝߌߘߊ ߞߊ߲߬ ߘߌ߬، ߒ߬ߓߊ߬߸ ߗߍ߬ߡߐ߰ߓߊ ߘߏ߫ ߣߴߊ߬ ߟߊ߫ ߝߎ߯ߟߊ ߕߘߍ߬ ߊ߲ ߕߍߡߊ߬ ߓߌ߬߸ ߏ߬ ߞߵߊ߬ ߝߐ߫ ߕߋ߲߬ ߞߏ߫: <<ߡߎߎ߲߬ ߠߊ߫ ߓߍ߯ ߞߊ߲߫ ߒ߬ ߓߘߊ ߦߊ߲߬ ߞߏ߫ ߝߏ߫ ߊ߬ߟߎ߬ ߓߴߊ߬ߟߎ߬ ߕߊ߫ ߛߓߍߟߌ߫ ߟߊߘߊ߲߫؟>>

ߊ߮߹ ߏ߬ ߟߋ ߞߍ߫ ߘߊ߫ ߓߊ߬ߘߏ ߘߊ ߟߊߞߊ߬ߣߍ߲ ߘߌ߫، ߡߍ߲ ߓߊ߯ ߞߊ߲߬ߞߊߟߌ ߝߋ߬ߙߋ߲߬ߕߎ߫ ߕߋ߲߬߸ ߏ߬ ߘߌ߫ ߘߐ ߘߟߊߡߌ߬ߣߊ߬، ߞߊ߬ߕߎ߲߯߸ ߓߍ߯ ߕߍ߬ߘߍ߫ ߢߌ߬ߣߌ߲߬ߞߊ߬ߟߌ ߡߍ߲ ߠߎ߬ ߞߍ ߞߊ߲߬߸ ߏ߬ ߘߏ߫ ߦߋ߫ ߡߎ߲߬ ߘߌ߫، ߛߓߍߟߌ ߟߊ߫ ߛߌߦߊߦߊ ߡߍ߲ ߦߋ߫ ߖߌ߬ߣߍ߬ ߞߣߐ߫ ߕߋ߲߬߸ ߏ߬ ߦߋ߫ ߥߊߛߏ߫ ߞߏ ߟߋ߬ ߘߌ߫ ߓߊ߰ ߥߟߴߊ߬ ߦߋ߫ ߕߍߝߘߊߟߌ ߣߌ߫ ߗߋ߫ ߟߊߛߌߦߊߦߊ ߟߋ߬ ߘߌ߫ ߝߎ߮ ߞߎ߲߬ߠߊ߫، ߝߏ߫ ߊ߬ ߦߋ߫ ߝߐ߫ ߟߋ߬ ߞߏ߫ ߓߍ߯ ߕߊ߫ ߛߓߍߟߌ߫ ߦߴߊ߬ ߓߟߏ߫ ߓߊ߰ ߥߟߊ߫ ߡߊ߬ߞߏ ߦߋ߫ ߢߌߣߌ߲ߞߏ ߓߐߢߟߊ ߟߋ߬ ߟߊ߫، ߓߊߏ߬߸ ߓߍ߯ ߞߢߊ߬ߣߍ߲߫ ߘߍ߬ ߟߊ߫ ߝߋ߲߫ ߠߊ߫߸ ߡߍ߲ ߓߘߴߊ߬ ߛߋߞߏ ߦߌ߬ߘߊ߬ ߓߍ߯ ߟߊ߫ ߞߊ߬ߓߊ߲߫، ߏ߬ ߘߐ߫߸ ߊ߲ ߧߋ߫ ߥߊ ߟߊ߫ ߛߌߟߊ߫ ߞߋߟߋ߲߫ ߢߌ߬ߡߊ߲߫ ߞߊ߲߬ ߕߌ߯ߕߌ߯ߦߊ߫ ߓߟߏ ߡߊ߬؟

ߊ߲ ߓߍ߯ ߦߴߊ߬ ߞߊ߬ߟߊߡߊ߬߸ ߁߉߄߉ ߟߊ߫߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫߸ ߞߵߊ߬ ߛߐ߬ߘߐ߲߬ ߊ߬ ߓߘߊ߫ ߛߍ߰ ߊ߬ ߟߊߡߍ߲ ߘߐ߫߸ ߞߏ߫ ߝߘߊ߬ߝߌ߲ ߖߘߍ߬ ߛߓߍߟߌ߫ ߕߴߊ߬ ߓߟߏ߫، ߊ߬ ߝߣߊ߫ ߣߊ߬ ߢߊ ߟߋ߬ ߞߍߣߍ߲߫ ߒߞߏ ߛߓߍߟߌ ߘߌ߫ ߏ߬ ߘߌ߫، ߏ߬ ߡߊ߫ ߞߍ߫ ߛߓߍߟߌ߫ ߜߊ߲ߛߊ߲߫ ߘߌ߫ ߛߌߦߊ߫ ߞߋߟߋ߲߫ ߢߍ߫ ߦߋ߲߬ ߕߋ߲߬ߘߋ߬߸ ߊ߬ ߞߍ߫ ߘߊ߫ ߛߓߍߟߌ߫ ߞߊ߲ߡߊߛߙߋߡߊ ߟߋ߬ ߘߌ߫߸ ߡߍ߲ ߦߋ߫ ߛߋ߫ ߟߊ߫ ߡߍ߲ߞߊ߲ ߓߍ߯ ߛߓߍ߫ ߟߊ߫، ߞߵߊ߬ ߛߐ߬ߘߐ߲߬߸ ߊ߲ ߓߊߘߋ߲߫ ߝߎߟߊ ߟߎ߬ ߓߘߊ߫ ߣߊ߬ ߊߘߑߟߊߡ ߘߌ߫߸ ߊ߲ ߓߊߘߋ߲߫ ߛߏ߬ߛߏ ߟߎ߬ ߝߣߊ߫ ߓߘߊ߫ ߣߊ߬ ߞߏߙߋߛߓߍߟߌ ߘߌ߫، ߓߍ߯ ߦߴߊ߬ ߕߊ߫ ߛߌߟߊ߫ ߓߐ ߞߊ߲߬ ߛߓߍߟߌ߫ ߞߏ ߘߐ߫.

ߒ߬ߓߊ߬߸ ߜߞߋ߬ߘߊ ߟߊ߫߸ ߓߍ߯ ߦߴߊ߬ ߕߊ߫ ߝߐ ߞߊ߲߬، ߘߏ߫ ߟߎ߫ ߢߣߊ߫߸ ߊ߬ ߞߏ ߢߊ ߦߋ߫ ߜߍ ߟߋ߬ ߘߐ߫: <<ߊ߬ ߦߋ߫ ߟߋ߬ ߦߏ߫ ߞߐߣߊߞߙߌ߫ ߞߌ߲߬ߘߊ ߓߍ߯ ߦߴߊ߬ ߝߐ߫ ߛߌ߬ߛߍ߲߬ ߞߏ߫ ߝߏ߫ ߞߵߊ߬ߟߎ߫ ߖߘߍ߬ߞߊ߬ߣߌ߲߬ ߥߊߘߌ߫ ߟߋ߬ ߟߊߓߐ߫.>> ߞߊ߬ߙߊ߲߬ߠߊ߬ߘߋ߲ ߘߏ߫ ߟߋ߬ ߞߵߏ߬ ߝߐ߫، ߊ߬ߟߎ ߢߣߊ߫߸ ߒߞߏ ߓߘߊ߫ ߞߍ߫ ߓߐߘߊ߫ ߖߐ߲ߖߐ߲߫ ߘߌ߫߸ ߡߍ߲ ߘߌ߫ ߛߋ߫ ߟߊߓߊ߯ߙߊ߫ ߟߊ߫ ߓߍ߯ ߓߟߏ߫، ߓߊߏ߬߸ ߊ߬ ߦߋ߫ ߛߓߍߟߌ߫ ߟߋ߬ ߘߌ߫߸ ߡߍ߲ ߘߌ߫ ߛߋ߫ ߞߊ߲ ߓߍ߯ ߛߓߍ߫ ߟߊ߫߸ ߊ߬ ߘߌ߫ ߛߋ߫ ߝߎߟߊ߫ ߞߊ߲ ߛߓߍ߫ ߟߊ߫߸ ߞߊ߬ ߛߏ߬ߛߏ߬ ߞߊ߲ ߛߓߍ߫߸ ߞߊ߬ ߜߙߍ߬ߛߍ߬ ߞߊ߲ ߛߓߍ߫߸ ߞߊ߬ ߤߊߟߌ߬ ߡߊ߬ߣߌ߲߬ߞߊ߬ ߞߊ߲ ߛߓߍ߫، ߊ߲ ߘߏ߲߬ ߦߴߊ߬ ߡߍ߲߫ ߠߊ߫ ߓߊ߬ߘߏ ߟߎ߬ ߘߐ߫߸ ߞߏ߫ ߋߙߐߔߎ߬ ߓߍ߯ ߘߍ߬ߣߍ߲߫ ߟߊ߬ߕߍ߲ ߛߓߍߟߌ ߟߋ߬ ߟߊ߫߸ ߊ߬ߟߏߡߊ߲ ߣߌ߫ ߝߊ߬ߙߊ߲߬ߛߌ ߝߏߦߌ߬ ߕߴߏ߬ ߦߋ߫ ߟߊ߫ ߟߊ߬ߜߊߛߌ߫ ߘߌ߫، ߡߎ߲߬ ߠߊ߫߸ ߊ߲ߠߎ߬ ߝߣߊ߫ ߕߍ߫ ߛߴߏ߬ ߢߐ߲߰ ߞߍ߫ ߟߊ߫ ߛߟߏ߬ߡߣߊ߬ ߟߊ߫ ߛߓߍߟߌ߫ ߛߌ߲ߘߌߣߍ߲ ߢߌ߲߬ ߠߊ߫ ߞߏ ߘߐ߫؟

ߣߴߊ߲ ߞߵߊ߬ ߟߊߞߙߐ߬ߛߌ߫ ߊ߬ ߢߌ߬ߡߊ ߟߊ߫߸ ߛߓߍߟߌ߫ ߟߊߛߌߦߊ ߡߍ߲ ߦߋ߫ ߣߌ߲߬߸ ߊ߬ ߡߊߞߎ߲߬ߣߍ߲߬ ߕߍ߫ ߘߏ߫ ߜߘߍ߫ ߡߊ߬، ߓߍ߯ ߦߴߊ߬ ߖߌ߰ ߟߊ߫ ߟߋ߬ ߞߏ߫ ߒ ߓߊ߯ ߘߐ ߏ߬ ߟߎ߬ ߕߊ ߕߊ߬ ߛߌߛߍ߲߬߸ ߏ߬ ߦߴߊ߲ ߠߊߕߎߣߎ߲߫ ߠߊ߫ ߟߋ߬߸ ߞߵߊ߲ ߞߍ߫ ߡߐ߰ߝߍ߬ߡߐ߮ ߘߌ߫، ߞߏ߫ ߖߘߍ߬ߞߊ߬ߣߌ߲߬ ߛߓߍ߬ߟߌ߬ ߞߏ ߦߋ߫ ߟߋ߬߸ ߦߏ߫ ߖߏ߲߬ߖߏ߲߬ ߞߏ ߦߋ߫ ߢߊ ߡߍ߲، ߘߏ߫ ߟߎ߫ ߦߴߊ߬ ߖߌ߰ ߟߴߏ߬ ߟߋ ߘߐ߫߸ ߞߏ߫ ߌ ߓߊ߯ ߒߞߏ ߕߊ߬ ߞߵߌ ߟߊ߫ ߞߊ߲ ߛߓߍ߫ ߊ߬ ߟߊ߫߸ ߏ߬ ߦߋ߫ ߟߋ߬ ߦߏ߫ ߌ ߓߊ߯ ߘߏ߲߬ ߌ ߛߌ߰ߢߐ߲߮ ߛߌ߬ߓߏ߲ ߞߣߐ߫، ߓߊ߬ߙߌ߬߸ ߘ߫ߏ ߜߘߍ߫ ߟߎ߫ ߕߍ߬ߘߍ߫ ߜߞߋ߬ߘߊ ߟߊ߫ ߓߌ߬߸ ߏ߬ ߟߎ߫ ߞߵߊ߬ ߝߐ߫ ߟߋ߬ ߞߏ߫ ߒߞߏ ߦߋ߫ ߟߐ߲ߞߏ ߡߎ߬ߙߊ߲ ߠߋ߬ ߘߌ߫߸ ߛߋߒߞߏߟߊߘߐߦߊ ߡߎ߬ߙߊ߲ ߠߋ߬߸ ߡߍ߲ ߦߋ߫ ߝߘߊ߬ߝߌ߲߬ߠߊ߬ ߓߍ߯ ߕߊ ߘߌ߫. ߊ߬ ߜߎ ߦߋ߫ ߛߍ߲ ߠߋ߬ ߘߌ߫߸ ߞߵߊ߲ ߠߊߕߊ߬ߡߌ߲߬߸ ߊ߲ ߡߊ߬ߞߏ ߕߴߛߋ߫ ߓߊ߲߫ ߠߊ߫ ߞߵߊ߬ ߘߍ߲߫ ߥߊߟߌ߫ ߛߓߍߟߌ߫ ߛߌ߫ ߟߊ߫߸ ߞߊ߬ ߒߞߏ ߕߏ߫ ߊ߲ ߞߍ߬ߙߍߝߍ߬.

ߊ߬ ߘߏ߲߬ ߜߎ߸ ߛߓߍߟߌ߫ ߟߊߛߌߦߊߦߊ ߡߍ߲ ߦߋ߫ ߕߋ߲߬߸ ߊ߲ ߛߍ߰ ߞߏ ߟߋ߬ ߦߴߊ߬ ߘߌ߫، ߡߊ߬ߡߊ߬ߘߌ߫ ߞߵߏ߬ ߟߋ ߝߐ߫ ߊ߬ ߟߊ߫ ߞߎߡߊ ߘߐ߫، ߞߏ߫ ߣߴߊ߬ ߝߐ߫ ߘߊ߫ ߞߏ߫ ߓߍ߯ ߦߴߊ߬ ߕߊ߫ ߛߓߍߟߌ߫ ߟߊߘߊ߲߫߸ ߊ߲ ߘߋ߲ ߡߍ߲ ߓߊ߯ ߥߊ߫ ߖߡߊ߬ߣߊ ߕߌ߲߬ߞߎ߬ߘߎ߲߬ ߜߘߍ߫ ߞߊ߲߬ ߟߏ߲ ߡߍ߲߸ ߝߏ߫ ߌ ߦߋ߫ ߕߌ߲߬ߞߎߘߎ߲ ߏ߬ ߝߣߊ߫ ߛߓߍߟߌ ߟߋ߬ ߞߊ߬ߙߊ߲߫ ߦߋ߲߬، ߊ߬ ߝߐ߫ ߡߐ߰ ߘߴߊ߬ ߟߊ߫ ߘߎߢߊ߫ ߓߊ߲߫ ߖߡߊ߬ߣߊ߬ ߞߋߟߋ߲ ߣߌ߫ ߜߙߋ߫ ߞߋߟߋ߲ ߛߓߍߟߌ߫ ߛߌߦߊߡߊ߲߫ ߞߊߙߊ߲ ߏ߬ ߟߊ߫؟ ߒ߬ߓߊ߬߸ ߊ߲ ߧߴߊ߲ ߠߊ߫ ߟߐ߲ߠߌ߲ ߛߐ߬ߘߐ߲߬ ߛߌߟߊ ߟߎ߬ ߟߋ߬ ߡߊߣߐ߮ ߞߊ߲߬ ߕߋ߲߬߸ ߞߵߊ߲ ߕߊ߯ߡߊ߫ ߥߊߟߌ߫ ߞߊ߲ ߣߌ߫ ߥߊߟߌ߫ ߛߓߍߟߌ ߟߎ߬ ߟߊ߫ ߛߌߟߊ߫ ߞߋߟߋ߲ ߏ߬ ߞߊ߲߬ ߝߣߊ߫.

ߊ߬ ߘߏ߲߬ ߝߐߣߍ߲߫ ߠߋ߬ ߞߏ߫: <<ߣߌ߫ ߓߍ߯ ߞߵߊ߬ ߝߐ߫ ߞߏ߫ ߝߏ߫ ߊ߬ ߓߊ߯ ߓߌߘߌ߲ߞߊ߲ ߛߊ߬ߡߊ߲߫ ߊ߬ ߛߊ߬ߥߏ߬ߣߊ߲߬ ߢߊ ߡߊ߬߸ ߘߏ߫ ߞߊ߲߬ߞߏߟߏ߲ ߘߌ߫ ߛߌ߬ ߣߍߣߍ ߟߊ߫.>>

ߒ߬ߓߊ߬߸ ߞߊ߲߬ߞߊߟߌ ߞߎ߲߬ߝߌߟߊߣߊ߲ ߣߊ߬ ߕߎߡߊ ߟߋ߬ ߟߊ߫߸ ߏ߬ ߡߍ߲ ߘߌߡߊ߲߫ ߘߊ ߘߐ߫߸ ߞߎߡߊ ߟߊߘߎ߲߫ ߘߴߊ߬ ߞߙߋ ߟߊ߫ ߡߌ߲߫: ߊ߲ ߘߴߊ߬ ߟߐ߲߫ ߓߊ߬ ߞߏ߫ ߒߞߏ ߕߍ߫ ߞߙߎ߫ ߞߋߟߋ߲߫ ߘߎ߲߬ߘߎ߬ߡߊ߬ ߘߌ߫߸ ߊ߬ ߦߋ߫ ߜߙߋ߫ ߞߋߟߋ߲ ߡߎ߰ߡߍ ߞߎ߲߬ߠߊ߬ߦߋ߬ߙߋ߲߬ ߛߓߍߟߌ ߟߋ߬ ߘߌ߫؟ ߥߟߴߊ߲ ߘߴߊ߬ ߕߏ߫ ߥߊߛߏ߫ ߦߊߙߊ߲ ߡߊ߬ ߦߋ߲߬ ߕߋ߲߬ ߞߏ߫ ߊ߲ ߝߣߊ߫ ߟߊ߫ ߛߓߍߟߌ ߟߋ߬ ߣߌ߲߬ ߞߵߊ߬ ߛߐ߬ߘߐ߲߬ ߊ߲ ߧߴߊ߲ ߖߘߍ߬ ߟߊߕߏ ߟߋ߬ ߞߊ߲߬ ߊ߬߬ ߘߐ߫ ߏ߬ ߘߌ߫ ߡߐ߰ ߕߴߊ߲ ߠߊ߫ ߛߓߍߟߌ ߟߎ߫ ߖߊ߬ߕߋ߫؟