ߞߍߙߍ߲ߘߊ ߟߎ߬ ߟߊ߫߸ ߞߊ߲߬ߞߊߟߌ ߛߌ߰ߣߍ߲߬ ߕߊ ߞߊ߲߬߸ ߓߍ߯ ߦߋ߫ ߞߎ߲߬ߝߟߐ ߡߊߞߐ߬ߣߐ߲ ߛߌ߱ ߘߐ߫، ߏ߬ ߡߐ߬ ߘߊ߫ ߌߞߘߐ߫߸ ߞߵߊ߬ ߥߟߊߞߘߊߣߍ߲ ߞߍ߫ ߞߙߏ ߘߐ߫ ߕߋ߲߬߸ ߝߋ߬ߙߋ߲߬ߕߎ߬ߟߌ ߘߊߡߌ߬ߣߊ߬ߣߍ߲ ߓߍ߯ ߟߵߏ߬ ߘߌ߫߸ ߞߊ߬ ߓߊ߬ߘߏ ߞߎ߬ߘߎ߫ ߊ߬ ߡߊ߬، ߌߞߘߐ߫߸ ߓߌ߬ ߕߊ ߣߌ߲߬ ߝߋ߬ߙߋ߲߬ߕߎ߬ ߞߏ߬ ߞߋߟߋ߲߫ ߕߋ߲߬߸ ߘߏ߫ ߞߵߊ߬ ߞߊ߲ ߠߊߢߌ߲߯ ߞߵߊ߬ ߝߐ߫ ߞߏ߫: <<ߓߌ߬߸ ߒߞߏ ߟߊ߫ ߗߋߦߊߟߌ ߕߊ߯ߕߐ߫ ߞߊ߲ߞߊ߲߫....>> ߘߏ߫ ߞߵߊ߬ ߖߋ߬ߓߌ߬ ߒߞߘߐ߫߸ <<ߞߏ߲߬ߣߌ߲߬߸ ߌ ߟߐ߬ ߓߊ߫߸ ߒߞߏ ߡߍ߲ ߦߋ߫ ߣߌ߲߬߸ ߊ߬ ߓߘߊ߫ ߞߍ߫ ߘߌ߯ߣߊ ߟߋ߬ ߘߌ߫ ߓߊ߰ ߥߟߊ߫ ߡߎ߲߬؟.>> ߦߟߍ߫ ߞߊߞߊߞߊ ߟߋ߬ ߘߊߡߌ߬ߣߊ߬ߣߴߏ߬ ߟߊ߫ ߏ߬ ߘߌ߫ ߓߏ߲߬، ߓߊ߬ߙߌ߬߸ ߢߌ߬ߣߌ߲߬ߞߊ߬ߟߌ ߘߎ߲ߣߍ߲߫ ߕߘߍ߬ ߛߊ߲ߝߍ߬ ߖߐ߫.

ߘߏߣߍ߲ߘߏߣߍ߲߫߸ ߓߊ߬ߘߏ ߦߋ߫ ߕߊ߯ߣߌߛߊߦߌ߲ ߞߊ߲߬߸ ߤߊ߲߯ ߓߊ߬ߘߏ ߣߊ߬ ߘߊ߫ ߛߋ߫߸ ߞߏ߫ ߌ ߓߊ߯ ߘߏ߫ ߟߎ߫ ߟߊ߫ ߞߎߡߊ ߟߎ߬ ߡߊߝߟߍ߫ ߝߍߛߑߓߎߞ ߟߊ߫߸ ߊ߬ ߣߌ߫ ߞߊ߬ ߘߏ߫ ߟߎ߫ ߝߣߊ߫ ߞߊ߲ ߡߍ߲߫ ߜߍ ߘߐ߫߸ ߊ߬ ߞߎߡߊ ߞߊ߫ ߛߌߦߊ߫.

ߞߎߡߊ ߛߋ ߦߙߐ ߏ߬ ߘߐ߫߸ ߞߍߙߍ߲ߘߊ ߞߎߡߊ ߛߋ߫ ߘߴߊ߬ ߔߘߋߞߋ߬ߟߋ ߘߐ߫ ߓߌ߲ߢߎ߮ ߘߊߝߍ߬: ߒߞߏ ߦߋ߫ ߞߍ ߟߋ߬ ߞߊ߲߬ ߞߙߎ ߘߌ߫ ߣߌ߲߬ ߓߊ߬߸ ߞߊ߬ ߞߍ߫ ߞߏ ߟߎ߬ ߘߐ߫ ߦߏ߫ ߡߐ߱ ߟߎ߬ ߦߋ߫ ߞߍ߫ ߟߊ߫ ߞߏ ߟߎ߬ ߘߐ߫ ߢߊ ߡߍ߲߸ ߥߟߴߊ߬ ߦߋ߫ ߞߊ߲ ߣߌ߫ ߛߓߍߟߌ ߟߋ߬ ߘߌ߫ ߕߎ߬ߢߊ߬ ߓߟߏ ߡߊ߬؟

ߣߌ߫ ߡߐ߰ ߘߏ߲߬ ߦߴߊ߬ ߝߍ߬ ߞߊ߬ ߣߌ߲߬ ߢߊߦߋ߫߸ ߌ ߦߟߌ ߟߊߕߊ߯ ߞߏߣߍ߲߫ ߞߐ߫ ߕߋ߲߬ ߕߎ߲߫، ߒߞߏ ߡߍ߲ ߦߋ߫ ߣߌ߲߬߸ ߊ߬ ߦߋ߫ ߛߓߍߟߌ ߟߋ߬ ߘߌ߫߸ ߞߊ߲ ߠߋ߬ ߝߣߊ߫ ߦߋ߫߸ ߞߊ߬ ߛߋ߫ ߓߌ߬ߟߊ߬ߢߐ߲߰ߡߊ ߟߊߣߐ߰ߦߊ߬ ߟߊ߫߸ ߞߊ߬ ߟߐ߲ߠߌ߲ ߠߊߕߊ߬ߡߌ߲߬،  ߊ߬ ߕߍ߫ ߘߌ߯ߣߊ߫ ߘߌ߫߸ ߊ߬ ߕߍ߫ ߘߌ߯ߣߊ߫ ߘߐ߫، ߓߘߍ߬ߓߘߍ߬ߟߌ߬ ߞߙߎߞߊ߫ ߘߌ߫߸ ߣߌߡߊ߫ ߝߊ߬ߘߌ߬ߡߊ߬ ߕߍ߫߸ ߘߍ߬ߞߙߎ߬ ߝߣߊ߫ ߕߍ߫، ߓߊ߬ߙߌ߬߸ ߥߊ߯ߕߌ ߟߊ߫ ߕߊ߯ߟߌ ߞߏߛߐ߲߬߸ ߕߏ߰ߝߏ ߟߎ߬߸ ߘߍ߬ߞߙߎ ߟߎ߬߸ ߞߟߊߓߎ߫ ߞߍ߲ߘߍ ߡߍ߲ ߠߎ߬ ߦߴߊ߬ ߘߐ߫߸ ߏ߬ ߟߎ߬ ߘߴߊ߬ߟߎ߬ ߟߊߘߍ߬߸ ߞߵߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬߸ ߛߊ߫ ߢߝߍߟߊ ߘߌ߫ ߟߊߛߐ߬ߘߐ߲߬، ߒ߬ߓߊ߬߸ ߓߊ߬ߛߊ߲ ߓߍ߯ ߦߋ߫ ߝߣߊ߫ ߦߋ߫ ߓߐ߫ ߟߊ߫ ߦߋ߲߬ ߠߋ߬.

ߊ߲ ߠߊ߫ ߞߍߙߍ߲ ߠߊ߫ ߓߌ߬߸ ߡߙߌߦߊ ߟߎ߬ ߝߘߏ߬ߣߍ߲߫ ߕߘߍ߬ ߢߐ߲߯ ߡߊ߬.

ߘߏ߫ ߟߎ߫ ߦߴߊ߬ ߝߐ ߞߊ߲߬: <<ߌ ߦߋ߫ ߞߏ ߡߍ߲ ߛߍ߬ߘߏ߲ ߞߊ߲߬߸ ߊ߬ ߘߌߡߊ߲߫ ߌ ߦߋ߫߸ ߌ ߝߊ߲߬ߞߊ߬ ߓߊ߲ߣߴߊ߬ ߟߊ߫، ߌ ߞߊ߫ ߞߊ߲߫ ߞߊ߬ ߞߎߡߊ߫ ߏ߬ ߟߋ ߕߐ߯ ߘߐ߫ ߞߍ߰، ߊ߬ ߝߐ ߏ߬ ߡߐ߱ ߘߏ߫ ߟߎ߫ ߟߊ߫ ߗߋߦߊߟߌ ߡߊ߬ ߏ߬ ߘߐ߫ ߞߏ߫ ߞߊ߬ߘߌ߬ߛߊ߬ ߗߋߦߊߟߌ߸ ߏ߬ ߕߍ߫ ߕߣߊ߬ ߘߌ߫ ߘߋ߬.>>

ߘߏ߫ ߟߎ߫ ߝߣߊ߫ ߘߴߏ߬ ߟߊߕߊ߲߬ߞߌ߲߬: <<ߤߊߕߍ߫߸ ߒ߬ߞߊ߬߸ ߊ߬ ߝߐ ߟߋ߬ ߛߊ߫ ߞߏ߫ "ߒߞߏ ߗߋߦߊߟߌ"߸ ߡߍ߲ ߠߎ߬ ߦߋ߫ ߞߙߎߞߊ ߘߏ߫ ߞߐߡߊߓߌ߲ߓߌ߲߫ ߠߊ߫߸ ߏ߬ ߦߋ߫ ߓߊ߬ߛߊ߲ ߠߋ߬ ߘߌ߫ ߠߋ߬ ߘߌ߫ ߦߏ߫ ߞߏ߬ߙߏ߲߬ ߞߟߐ.>>

ߊ߲ ߠߊ߫ ߞߍߙߍ߲ ߗߍ߬ߡߐ߮ ߞߵߊ߬ ߞߊ߲߫ ߡߊߛߎߡߊߣߍ߲ ߠߊߓߐ߫ ߕߋ߲߬߸ ߞߏ߫ ߤߍ߲߬ <<ߓߌ߭ߓߌ߭ ߣߌ߲߬ ߘߐ߫ ߓߊ߬߸ ߣߌ߫ ߞߏ ߡߍ߲ ߘߌߡߊ߲߫ ߒߞߏ ߡߐ߮ ߟߎ߬ ߟߊ߫߸ ߊ߬ߟߎ߬ ߦߋ߫ ߞߎߡߊ߫ ߟߊ߫ ߒߞߏ ߟߋ߬ ߕߐ߯ ߘߐ߫ ߦߋ߲߬ ߝߘߏ߬ߓߊ߬ ߓߟߏ ߡߊ߬، ߞߏ߬ߣߌ߲߬ ߤߋߦߌ߬߸ ߣߴߊ߬ ߓߍ߲߬ߣߍ߲߬ ߕߍ߫߸ ߞߏ߫ ߢߣߊߡߊ߫ ߕߍ߫ ߡߍ߲ ߘߴߊ߬ߟߎ߬ ߢߣߊ߫߸ ߊ߬ߟߎ߬ ߘߌ߫ ߒߞߏ ߞߍ߫ ߞߎߛߍ ߘߌ߫ ߗߍ߬، ߘߋ߲ߡߌߛߍ߲߸ ߏ߬ ߕߍ߫ ߞߏ߫ ߓߘߍ߫ ߘߌ߫.>>

ߒ߬ߓߊ߬߸ ߗߍ߬ߡߐ߮ ߟߊ߫ ߞߎߡߊ ߏ߬ ߟߋ ߞߐ ߞߍ߫ ߘߊ߫ ߦߟߌߡߊߟߐ ߘߌ߫ ߛߊ߫߸ ߓߍ߯ ߞߵߊ߬ ߢߊ ߡߊߖߌ߰ ߊ߬ ߝߍ߬.

ߘߏ߫ ߟߎ߫ ߞߊ߲߫߸ ߞߏ߫ ߊߜߊ߫ ߗߍ߬ߡߐ߮߸ ߒߞߏ ߡߐ߮ ߟߎ߬ ߦߋ߫ ߞߍߞߌߦߊ ߟߋ߬ ߟߊߓߊ߯ߙߊ߫ ߟߊ߫، ߞߊ߬ "ߒߞߏ" ߞߍ߫ ߦߏ߫ ߖߏ߲߬ߖߏ߲߸ ߛߊ߫ ߡߐ߱ ߟߎ߬ ߘߌ߫ ߜߘߌ߫ ߢߊ ߡߍ߲ ߡߊ߬، ߤߊߟߌ߬ ߓߘߍ߬ߓߘߍ߬ߟߌ߬ ߘߊߞߎ߲ ߠߋ߬߸ ߊ߬ߟߎ߬ ߦߴߏ߬ ߟߋ ߞߍ߫ ߟߊ߫.

ߞߍߙߍ߲ ߛߐ߬ߛߐ߬ߟߌ߬ߟߊ߬ߓߊ ߞߊ߲߫ ߏ߬ ߘߐ߫߸ ߞߏ߫ ߊ߬ ߘߏ߲߬߸ ߊߟߎ߫ ߦߋ߫ ߡߍ߲ ߡߊߟߍ߬ߟߍ ߞߊ߲߬ ߣߌ߲߬߸ ߣߌ߲߬ ߦߋ߫ ߞߏ߫ ߡߊߛߌߟߊ߲ߣߍ߲ ߠߋ߬ ߘߌ߫ ߘߋ߬، ߓߊߏ߬߸ ߊ߬ߟߎ߬ ߦߴߊ߬ ߝߍ߬ ߟߵߏ߬ ߘߌ߫ ߞߊ߬ ߝߘߏ߬ߓߊ߬ ߡߎߙߊ߲ ߦߟߍ߬ߡߊ߲߫ ߞߵߊ߬ ߞߍ߫ ߓߘߊ߫ ߟߊߝߊ߲߫ ߞߏ ߘߌ߫߸ ߞߵߊ߬ ߞߍ߫ ߓߊߓߏ߲ ߞߏ ߘߌ߫.

ߞߊ߲ߡߋߙߋ߲ ߞߎ߲߭ ߛߊ߬ߣߍ߲ ߡߍ߲ ߦߴߊ߲ ߠߊ߫ ߞߍߙߍ߲ ߠߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߡߐ߱ ߟߎ߬ ߕߍ߫ ߛߋ߫ ߟߊ߫ ߞߕߐߝߍߣߍ߲ߠߌ߲ ߠߋ߬ ߞߍ߫ ߟߊ߫ ߛߐ߲߬ ߘߐߙߐ߲߫، ߞߊ߬ ߕߏ߫ ߞߎߡߊ߫ ߟߊ߫ ߣߌ ߞߊ߬ߣߌ߲ ߡߊ߬߸ ߞߵߊ߬ ߛߐ߬ߘߐ߲߬ ߞߎߡߊߘߋ߲ ߠߎ߬ ߕߍ߫ ߓߌ߬ߟߊ߬ ߟߊ߫ ߖߊ߬ ߟߊ߫ ߞߵߊ߬ߟߎ߫ ߡߊ߲߬ߕߊ߰ߦߊ ߓߍ߬ߙߍ ߟߐ߲߫.

ߣߴߊ߲ ߞߵߊ߬ ߡߊߝߟߍ߫ ߣߊߥߎ߲ߠߌ߲߫ ߓߟߏ ߡߊ߬߸ ߢߊ ߦߋ߫ ߜߊ߲߫ ߠߊ߫ ߟߋ߬ ߛߌߞߊ߫ ߦߙߐ ߟߎ߫ ߞߎ߲߬ߠߊ߫.

ߣߌ߫ ߞߙߎ ߘߏ߫ ߞߊ߬ ߒߞߏ ߟߊߓߊ߯ߙߊ߫ ߞߊ߬ ߓߊ߯ߙߊ ߘߏ߫ ߞߐߡߊߓߌ߲ߓߌ߲߫ ߊ߬ ߘߐ߫߸ ߊ߲ ߧߴߊ߬ ߝߐ߫ ߦߋ߲߬ ߞߏ߫ "ߒߞߏ ߟߊ߫ ߗߋߦߊߟߌ ߓߘߊ߫ ߣߊ߬"

ߓߊ߬ߙߌ߬߸ ߣߌ߫ ߡߐ߰ ߜߘߍ߫ ߞߊ߬ ߞߏ߫ ߘߐߝߌ߲߬ߣߍ߲ ߘߏ߫ ߞߍ߫ ߊ߬ ߘߐ߫ ߟߏ߲ ߡߍ߲߸ ߊ߲ ߧߴߊ߬ ߡߍ߲߫ ߞߏ߫: "ߒߞߏ ߡߴߏ߬ ߞߍ߫ ߘߋ߬߸ ߡߐ߰ ߞߋߟߋ߲ ߠߋ߬ ߞߵߏ߬ ߞߍ߫."

ߞߎߡߟߊߓߊ ߘߏ߫ ߕߍ߬ߘߍ߫ ߦߋ߲߬߸ ߏ߬ ߞߊ߲߫ ߌߞߘߐ߫߸ ߞߏ߫ ߤߍ߬߸ ߊ߲ߠߎ߬ ߟߊ߫ ߞߊ߬ߙߊ߲߬ߡߐ߰ߗߍ ߞߵߊ߬ ߝߐ߫ ߟߋ߬ ߏ߬ ߟߏ߲ ߞߕߎ߬ߓߊ ߘߐ߫߸ ߞߏ߫ ߒߞߏ ߞߊߙߊ߲ ߦߋ߫ ߡߐ߰ ߟߊߝߟߌ߬ ߟߊ߫ ߟߋ߬، ߓߊߏ߬߸ ߞߏ߫ ߗߍ߬ ߘߊߖߟߏߓߊ ߘߏ߫ ߟߊ߫ ߞߎߡߊ ߕߘߍ߬ ߞߊ߲ߡߋߙߋ߲ ߠߎ߬ ߟߊ߫ ߜߋߟߋ߲ߜߋߟߋ߲ ߞߣߐ߫ ߏ߬ ߟߏ߲߸ ߏ߬ ߞߵߊ߬ ߝߐ߫ ߟߋ߬ ߞߏ߫ ߕߎ߬ߢߊ߬ ߕߍ߫ ߖߊ߬ߤߣߊ߬ߡߊ߬ ߞߏ ߘߐ߫߸ ߕߎ߬ߢߊ߬ ߕߍ߫ ߊ߬ߙߌ߬ߖߣߍ߬ ߞߏ ߘߐ߫، ߏ߬ ߘߐ߫߸ ߊ߲ ߠߊ߫ ߢߍߓߊ߮ ߞߊ߲߫ ߞߏ߫ ߡߐ߰ ߞߊ߫ ߒߞߏ ߞߊ߬ߙߊ߲߫ ߘߋ߬.

ߡߐ߱ ߟߎ߬ ߞߵߏ߬ ߟߊ߫ ߞߎߡߊ ߕߏ߫ ߊ߬ ߘߊ߫߸ ߞߏ߫ ߌ ߡߴߊ߬ ߦߋ߫߸ ߒߞߏ ߡߐ߮ ߟߎ߬ ߦߴߊ߬ߟߎ߬ ߢߊ ߟߊߜߊ߲߫ ߠߊ߫ ߦߙߐ ߢߌ߲߬ ߠߋ߬ ߞߎ߲߬ߠߊ߫ ߛߐ߲߬، ߊ߬ߟߎ߬ ߦߴߊ߬ ߝߐ߫ ߟߴߏ߬ ߛߎ߮ ߘߐ߫ ߟߋ߬߸ ߞߏ߫ ߘߊߖߟߏߓߊ ߏ߬ ߞߋߟߋ߲߫ ߠߋ߬ ߞߵߏ߬ ߝߐ߫߸ ߏ߬ ߡߙߌߦߊ ߟߵߏ߬ ߘߌ߫߸ ߒߞߏ ߡߙߌߦߊ߫ ߕߴߏ߬ ߘߌ߫. ߞߵߊ߬ ߛߐ߬ߘߐ߲߬߸ ߊ߬ߟߎ߬ ߦߋ߫ ߞߏ߫ ߜߘߍ ߡߍ߲ ߠߎ߬ ߘߍ߬ߡߍ߲߬ߘߌ߬ ߟߊ߫ ߒߞߏ ߟߊ߫ ߣߌ߲߬߸ ߏ߬ ߦߴߊ߬ ߦߌ߬ߘߊ ߟߋ߬ ߘߌ߫ ߞߏ߫ ߒߞߏ ߦߋ߫ ߞߙߎ ߘߏ߫ ߟߋ߬ ߕߊ߫ ߘߌ߫߸ ߥߟߊ߫ ߒߞߏ ߦߋ߫ ߟߊߖߌ߰ ߟߊ߫ ߞߙߎ ߘߏ߫ ߟߋ߬ ߓߟߏ߫ ߞߵߊ߬ ߟߊߦߟߍ߬، ߞߵߊ߬ ߛߐ߬ߘߐ߲߬߸ ߊ߬ ߜߎ ߦߋ߫ ߓߍ߯ ߕߊ ߟߋ߬ ߘߌ߫، ߏ߬ ߘߐ߫߸ ߣߌ߫ ߡߙߌߦߊ߫ ߛߎ߮ ߣߌ߲߬ ߥߊ߫ ߘߴߊ߬ ߝߍ߬߸ ߊ߬ ߘߌ߫ ߡߐ߰ ߛߌߦߊߡߊ߲߫ ߕߐ߰ߘߐߝߊ߰߸ ߡߍ߲ ߠߎ߬ ߦߴߊ߬ ߝߍ߬ ߞߵߊ߬ ߞߊ߬ߙߊ߲߬ ߥߟߊ߫ ߞߵߊ߬ ߛߓߍ߫.

ߊ߬ ߞߏ߬ߣߌ߲ ߦߋ߫ ߝߐ߫ ߟߊ߫ ߡߐ߰ߓߊ ߟߎ߬ ߓߟߏ߫߸ ߞߏ߫: <<ߣߴߌ ߞߊ߬ ߛߏ ߥߟߊ߬ߥߟߊ߬ ߕߊ߯ߝߋ ߛߘߌ߬߸ ߝߏ߫ ߌ ߦߴߌ ߘߐ߲߬ ߓߍ߯ ߟߋ߬ ߦߋ߫ ߏ߬ ߘߐ߫ ߘߋ߬.>>

ߊ߬ ߕߍ߫ ߛߋ߫ ߝߐ߫ ߟߊ߫߸ ߞߏ߫ ߣߴߊ߲ ߘߌߦߊߣߊ߲ߞߏ ߟߋ߬߸ ߊ߲ ߧߋ߫ ߒߞߏ ߕߐ߮ ߕߊ߬، ߣߴߊ߲ ߜߏߦߊߣߊ߲߫ ߞߏ ߟߋ߬߸ ߊ߲ ߧߋ߫ ߒߞߏ ߕߐ߮ ߓߌ߬ߟߊ߬.

ߞߊ߲߬ߞߊߟߌ ߞߎ߲߬ߝߟߐ ߣߌ߫ ߝߌߟߊߣߊ߲ ߓߊ߲߫ ߘߊ߫ ߟߋ߬ ߡߌ߲߬ ߠߊ߫߸ ߢߌ߬ߣߌ߲߬ߞߊ߬ߟߌ ߖߍ߬ߘߍߖߍ߬ߘߍ ߡߊ߫ ߛߋ߫ ߖߋ߬ߓߌ߬ ߟߊ߫: ߒߞߏ ߞߊ߫ ߞߊ߲߫ ߞߊ߬ ߞߍ߫ ߛߍ߲ ߠߋ߬ ߘߌ߫ ߡߐ߱ ߟߎ߬ ߕߍ߫ ߓߊ߰߸ ߥߟߴߊ߬ ߦߋ߫ ߞߍ߫ ߖߎ߬ߟߎ ߘߌ߫ ߓߍ߯ ߦߴߊ߬ ߛߊ߬ߡߊ߲߫ ߊ߬ ߟߊ߫ ߞߎ߲߬ߠߊ߫؟