ߓߊ߲߬ߞߐ߬ ߦߋ߫ ߡߏ߬ߙߌ߬ߓߊ߬ߦߊ߫ ߡߙߊ߬ߘߊ߬ߙߋ߲ ߣߐ߬ߘߎ߮ ߟߋ߬ ߘߌ߫ ߞߎߘߍ߫ ߆߀ ߖߊ߬ߕߋ߬ ߟߊ߫ ߞߊ߲ߞߊ߲߫ ߡߙߊ߬ߘߊ߬ߓߊ ߘߐ߫، ߒ߬ߓߊ߬߸ ߊ߬ߟߎ ߛߊ߲߭ ߛߊ߬ߓߊ ߟߋ߬ ߕߋ߲߬߸ ߝߢߐߞߏߙߏ߲ ߦߋ߫ ߕߍ߰ ߟߴߊ߬ߟߎ߫ ߝߍ߬ ߦߋ߲߬߸ ߞߊ߬ ߕߌߢߍߟߌ ߖߍ߬ߘߍߖߍ߬ߘߍ ߞߍ߫߸ ߞߵߊ߬ߟߎ߬ ߓߟߏߝߋ߲߫ ߛߌߦߊߡߊ߲߫ ߕߌߢߍ߫߸ ߞߵߊ߬ߟߎ߬ ߕߏ߫ ߞߣߍߡߊ߬، ߏ߬ ߓߍ߯ ߣߴߊ߬ ߕߊ߫ ߏ߬ ߘߐ߫߸ ߊ߬ߟߎ߬ ߡߊ߫ ߘߍ߬ߡߍ߲߬ߠߌ߲߫ ߞߌ߬ߛߍ߬ ߞߋߟߋ߲ ߛߐ߬ߘߐ߲߬ ߡߎߣߎ߲߬߸ ߊ߬ߟߎ߬ ߟߊ߫ ߛߏ ߞߏߟߊߕߍ߮ ߟߎ߬ ߟߊ߫ ߝߐߟߌ߫ ߘߐ߫ ߞߊ߬ߣߌ߲߬.

<<ߊ߬ ߛߋ߲߬ߢߊ߫ ߛߊ߬ߓߊ ߟߋ߬ ߕߋ߲߬߸ ߝߢߐߞߏߙߏ߲ ߦߋ߫ ߕߌߢߍߟߌ ߞߍ߫ ߟߊ߫ ߦߊ߲߬.>> ߎߡߊߙ ߕߙߊߥߟߋ߫ ߟߋ߬ ߞߊ߲߫ ߕߋ߲߬߸ ߊ߬ߟߋ ߡߍ߲ ߦߋ߫ ߓߊ߲߬ߞߐ߫ ߖߡߊ߬ߣߊ߬ߕߌ߮ ߘߌ߫، ߛߊ߲߭ ߕߊ߬ߡߌ߲߬ߣߍ߲߸ ߝߢߐߞߏߙߏ߲ ߞߊ߬ ߓߏ߲߫ ߆߀ ߟߋ߬ ߟߊߓߋ߬ ߓߊ߲߬ߞߐ߬ ߞߣߐ߫߸ ߞߵߏ߬ ߟߊ߫ ߞߊ߬ߙߊ߲߬ߕߊ ߞߊ߲߬߸ ߝߘߏ߬ߓߊ߬ ߕߊ ߣߌ߫ ߊߙߊߓߎ ߣߌ߫ ߝߊ߬ߙߊ߲߬ߛߌ߸ ߊ߬ ߓߍ߯ ߟߋ߬ ߞߊ߬ ߝߍ߬ ߛߐ߬ߘߐ߲߬، ߡߞߊ߬ߛߟߌ߬ ߛߌߦߊߡߊ߲ ߣߌ߫ ߞߟߌߟߌ߫ ߛߌߦߊߡߊ߲ ߠߎ߬ ߓߍ߯ ߣߴߊ߬ ߕߊ߫߸ ߖߐ߲߰ߛߊ߫ ߢߊ ߘߌ߫ ߡߊߖߌ߰ ߣߌ߲߬ ߞߏ ߝߍ߬ <<ߊ߲ ߡߊ߫ ߝߏߦߌ߬ ߛߐ߬ߘߐ߲߫ ߘߍ߬ߡߍ߲߬ߠߌ߲߬ ߘߐ߫ ߡߎߣߎ߲߬>>. ߊ߬ ߞߵߏ߬ ߝߐ߫ ߛߎ߬ߣߎ߲ ߘߌ߫.

ߞߊ߬ ߓߍ߲߬ ߘߍ߬ߡߍ߲߬ߠߌ߲ ߛߐ߬ߘߐ߲߬ߓߊߟߌߦߊ ߏ߬ ߡߊ߬߸ ߛߏ߫ ߞߣߐ߫ ߡߐ߮ ߟߎ߬ ߞߵߊ߬ߟߎ߫ ߥߌ߬ߟߌ߫ ߊ߬ߟߎ߫ ߖߘߍ߬ ߦߋ߫ ߞߊ߬ ߘߏ߫ ߞߍ߫߸ ߊ߬ ߣߴߊ߬ߟߎ߬ ߟߊ߫ ߡߐ߱ ߡߍ߲ ߠߎ߬ ߦߋ߫ ߛߌ߱ ߘߐ߫ ߞߐߞߊ߲߬߸ ߏ߬ ߟߎ߬ ߝߣߊ߫ ߞߵߊ߬ߟߎ߬ ߡߊߜߍ߲߫، ߓߊ߬ߙߌ߬߸ ߏ߬ ߓߍ߯ ߣߴߊ߬ ߕߊ߫߸ ߓߊ߲߬ߞߐ߬ߞߊ ߟߎ߫ ߡߊ߬ߞߏ ߡߊ߫ ߢߊ߬ ߡߎߣߎ߲߬. <<ߞߊ߬ߙߊ߲߬ߕߊ ߓߏ߲ߞߣߐ߫ ߞߋߟߋ߲߫ ߦߋ߫ ߦߋ߲߬ ߡߎߣߎ߲߬߸ ߏ߬ ߡߊ߫ ߟߊߓߊ߲߫߸ ߞߵߏ߬ ߟߊ߫ ߗߋߕߌ߯ߘߊ ߝߣߊ߫ ߞߊ߲߬߸ ߏ߬ ߟߊߓߊ߲ߣߍ߲߫ ߕߍ߫.>> ߖߡߊ߬ߣߊ߬ߕߌ߮ ߣߌ߲߬ ߞߵߏ߬ ߦߌ߬ߘߊ߬.

ߝߢߐߞߏߙߏ߲ ߡߍ߲ ߕߍ߰ ߘߊ߫ ߞߎ߲߬ߢߐ߲߯ ߕߊ߬ߡߌ߲߬ߣߍ߲߸ ߝߣߊ߫ ߥߙߊ߬ ߘߊ߫ ߟߋ߬ ߢߊ ߓߍ߯ ߡߊ߬، ߞߊ߬ߕߎ߲߯߸ ߓߏ߲߫ ߛߌߦߊߡߊ߲߫ ߠߋ߬ ߥߊ߫ ߘߊ߫ ߝߢߐ ߓߟߏ߫߸ ߖߡߊ߬ߣߊ߬ߕߌ߮ ߖߍ߬ߘߍ ߟߊ߫ ߓߏ߲ ߦߴߏ߬ ߟߋ ߘߐ߫. <<ߒ ߓߊ߲߫ ߛߊ߲ ߦߋ߫ ߕߏ߬ߝߊ߬ ߥߎ߬ߟߋ߲߬ ߓߏ߲ ߡߍ߲ ߟߐ߬ ߟߊ߫ ߣߌ߲߬߸ ߏ߬ ߓߍ߯ ߕߌߢߍ߫ ߘߊ߫ ߟߋ߬ ߝߢߐ ߓߟߏ߫߸ ߞߵߊ߬ ߛߐ߬ߘߐ߲߬ ߊ߲ ߓߘߊ߫ ߞߓߊߡߎ߮ ߡߍ߲ ߏ߬ ߟߊ߫߸ ߊ߬ ߘߌ߫ ߓߐ߬ߘߐ߫ ߂߀߀ ߢߐ߲߰ ߓߐ߫.>> ߊ߬ ߞߵߏ߬ ߦߌ߬ߘߊ߬.

ߝߢߐߞߏߙߏ߲ ߠߊ߫ ߕߌߢߍߟߌ ߛߋ߫ ߘߊ߫ ߟߋ߬ ߛߣߍ߬ߝߋ߲ ߠߎ߬ ߝߣߊ߫ ߡߊ߬، ߎߡߊߙ ߕߙߊߥߟߋ߫ ߟߊ߫ ߝߐߟߌ߫ ߘߐ߫߸ ߛߡߐ߬ ߝߍ ߓߋ߬ߝߘߍ߫ ߂߀ ߕߌߢߍ߫ ߘߊ߫ ߟߋ߬ ߝߢߐ ߓߟߏ߫ ߏ߬ ߦߋ߫ ߛߊߡߊ߲߫ ߓߊߞߊߙߌ߬ ߞߐ߲ߘߍ߫ ߕߊ ߟߋ߬ ߘߌ߫، ߞߓߊߓߏ ߡߍ߲ ߦߴߏ߬ ߘߐ߫߸ ߛߡߐ߬ ߖߎ ߘߏ߫ ߟߎ߫ ߓߐ߬ ߘߊ߫ ߟߋ߬ ߝߢߐ ߓߟߏ߫ ߞߵߏ߬ ߟߎ߫ ߝߟߌ߬ ߤߊ߲߯ ߜߟߊ߬ߜߟߊ߬ ߓߌ߫ ߦߙߌߞߊ߫ ߟߊ߫، ߞߊ߬ ߘߏ߫ ߟߎ߫ ߓߐ߫ ߝߏ߫ ߊ߬ߟߎ߬ ߟߌߟߌ߲߸ ߞߊ߬ ߦߙߌߓߊ ߘߏ߫ ߟߎ߫ ߓߏߟߏ߲߫ ߞߎ߲ߓߊ ߟߎ߬ ߞߊߘߌ߫ ߊ߬ ߟߊ߫، ߤߊߟߌ߬ ߛߏ ߖߍ߬ߘߍ ߞߣߐ߫߸ ߘߋ߲ߡߌߛߍ߲ ߠߎ߬ ߟߋ߬ ߟߊߓߐ߫ ߘߴߊ߬ߟߎ߬ ߓߟߏ߫߸ ߞߵߏ߬ ߟߎ߫ ߟߐ߬ ߛߌߟߊ ߟߊߞߊ߬ ߟߊ߫߸ ߛߊ߫ ߟߐ߯ߝߍ ߞߊߣߊ߬ ߕߌߢߍ߫ ߢߊ ߡߍ߲߸ ߓߊߏ߬ ߓߊ߲߬ߞߐ߬ ߟߐ߮ ߦߋ߫ ߟߐ߬ ߟߊ߫ ߛߌ߬ߣߌ߲߬ߟߏ߲ ߠߋ߬ ߡߊ߬.

ߎߡߊߙ ߕߙߊߥߟߋ߫ ߢߌ߬ߣߌ߲߬ߞߊ߬ߣߍ߲ ߞߊ߬ ߓߍ߲߬ ߝߢߐߞߏߙߏ߲ ߣߌ߲߬ ߞߎ߲߭ ߡߊ߬߸ ߖߡߊ߬ߣߊ߬ߕߌ߮ ߞߊ߲߫ ߞߊ߲߫ ߞߏ߫ ߊ߬ߟߋ ߕߍ߫ ߛߴߏ߬ ߢߊߝߐ߫ ߟߊ߫. <<ߊ߲ ߕߍ߫ ߛߴߊ߬ ߝߐ߫ ߟߊ߫ ߞߏ߫ ߦߙߌ߫ ߕߍ߮ ߟߋ߬ ߣߐ߬ ߥߟߊ߫ ߞߏ߫ ߜߘߍ߫߸ ߓߊߏ߬ ߊ߲ߠߎ߬ ߟߊߡߌߣߌ߲ߣߍ߲߫ ߠߋ߬ ߕߎ ߟߊ߫ ߦߊ߲߬.>> ߊ߬ ߞߵߏ߬ ߦߌ߬ߘߊ߬.

ߣߴߌ ߥߊ߫ ߘߊ߫ ߞߊ߬ߙߊ߲߬ߕߊ ߟߊ߫ ߞߎ߲߬ߠߊ߫߸ ߏ߬ ߝߣߊ߫ ߡߊ߬ߢߌ߬ߡߊ߬ߞߏ߬ ߘߊ ߓߏ߲߬ߓߴߊ߬ ߕߐ߭ ߓߍ߯ ߘߌ߫، ߞߊ߬ߙߊ߲߬ߕߊ ߗߋߕߌ߮߸ ߣߊ߬ߓߌ ߟߊ߯ߦߌ߬ ߡߎߛߊ߫ ߕߙߊߥߟߋ߫ ߞߵߊ߬ ߦߌ߬ߘߊ߬ ߞߏ߫ ߞߊ߬ߦߌ߯ ߂߀߂߅ ߣߍߣߍߓߊ ߟߋ߬ ߟߊ߫߸ ߝߢߐߞߏߙߏ߲ ߞߵߊ߬ߟߎ߬ ߟߊ߫ ߞߊ߬ߙߊ߲߬ߓߏ߲߬ ߛߌߦߊߡߊ߲߫ ߞߍ߫ ߊ߬ ߛߊ߬ߥߏ ߘߌ߫.

<<ߝߟߊߝߟߊ ߝߏߦߌ߬ ߦߋ߫ ߞߊ߬ߙߊ߲߬ߕߊ ߞߎ߲߬ߠߊ߬߸ ߝߢߐ ߥߊ߫ ߘߴߊ߬ ߡߎ߰ߡߍ ߟߋ߬ ߘߌ߫، ߤߊߟߌ߬ ߗߋߕߌ߯ߘߊ߸ ߝߏߦߌ߬ ߡߊ߫ ߕߏ߫ ߦߋ߲߬ ߝߏ߫ ߝߍ߬ߘߍ߫ ߝߌ߬ߟߊ߬ ߔߋ߫..>> ߊ߬ ߞߵߏ߬ ߢߊߝߐ߫.

ߜߟߍ߬ߦߊ ߏ߬ ߓߍ߯ ߣߴߊ߬ ߕߊ߫߸ ߞߊ߬ߙߊ߲ ߡߊ߫ ߓߟߏߞߊ߬، <<ߖߡߊ߬ߣߊ߬ߕߌ߮ ߞߵߊ߬ ߛߋߞߏ ߖߍ߬ߘߍߖߍ߬ߘߍ ߞߍ߫߸ ߞߊ߬ ߛߋ߫ ߝߟߊߝߟߊ ߟߊ߫ ߟߊ߫ ߞߊ߬ߙߊ߲߬ߓߏ߲߫ ߝߌ߬ߟߊ߫ ߞߎ߲߬ߠߊ߫، ߏ߬ ߘߏ߲߬ ߖߍ߬ߘߍ ߝߣߊ߫ ߕߍ߫ ߟߌ߬ߤߟߊ߬ ߢߌߡߊ߫.>> ߗߋߕߌ߮ ߞߵߏ߬ ߦߌ߬ߘߊ߬.

ߞߊ߬ߙߊ߲߬ ߖߐ߯ߙߊ߲ ߠߎ߬ ߝߣߊ߫ ߞߊ߬ ߕߌߢߍߟߌ ߛߐ߬ߘߐ߲߫ ߠߋ߬: <<ߞߏ߲ߕߏ ߟߎ߬ ߕߌߢߍ߫ ߘߊ߫ ߟߋ߬߸ ߞߊ߬ ߘߐ߬ߛߙߋ ߟߎ߬ ߛߎߡߊ߫.>> ߊ߬ ߞߵߏ߬ ߝߊ߬ߙߴߊ߬ ߞߊ߲߬.

ߊ߬ߟߎ߬ ߟߊ߫ ߞߊ߬ߙߊ߲߬ߕߊ ߟߊ߫߸ ߡߐ߰ ߅߄ ߠߋ߬ ߞߊ߬ߙߊ߲߬ ߠߊ߫ ߦߋ߲߬߸ ߡߍ߲ ߠߎ߬ ߘߐߝߘߊߣߍ߲߫ ߞߊ߬ߙߊ߲߬ߓߏ߲߫ ߛߓߊ߬ ߕߍ߫، ߊ߬ߟߎ߬ ߟߊ߫ ߞߊ߬ߙߊ߲߬ߕߊ ߦߋ߫ ߜߟߍ߬ߦߊ߬ߓߊ߫ ߟߋ߬ ߕߍߡߊ߬ ߣߌ߲߬ ߥߊ߯ߕߌ ߟߊ߫߸ ߊ߬ߟߎ߫ ߟߌ߬ߤߟߊ ߓߍ߲߬ߣߍ߲߬ ߕߍ߫ ߝߋߎ߫.

ߗߋߕߌ߮ ߞߊ߲߫ ߞߏ߫ ߊ߬ߟߎ߬ ߓߘߊ߫ ߗߋߟߊ ߟߊߕߊ߯ ߞߊ߬ߙߊ߲ ߞߏߟߊߕߍ߮ ߟߎ߫ ߡߊ߬ ߛߊ߲ߘߐ߫߸ ߞߊ߬ ߛߓߍߟߌ ߞߍ߫ ߞߵߊ߬ ߟߊߕߊ߯ ߊ߬ߟߎ߫ ߡߊ߬߸ ߞߊ߬ ߟߊ߬ߖߍ߲߬ߛߍ߲߬ߠߌ߲ ߠߎ߬ ߝߣߊ߫ ߞߍ߫ ߘߍ߬ߞߙߏߝߏ ߟߎ߬ ߞߊ߲߬߸ ߊ߬ߟߎ߬ ߡߊ߫ ߓߐߘߊ߫ ߝߏߦߌ߬ ߛߐ߬ߘߐ߲߬ ߤߊ߲߯ ߕߋ߲߬ ߡߎߣߎ߲߬.

ߕߌߢߍߟߌߓߊ ߢߌ߲߬ ߠߎ߬ ߓߍ߯ ߣߴߊ߬ ߕߊ߫ ߓߊ߲߬ߞߐ߬ ߞߣߐ߫߸ ߡߐ߰ ߡߊ߫ ߓߐ߬ߣߐ߫ ߊ߬ ߣߌ ߘߐ߫߸ ߏ߬ ߦߋ߫ ߛߏ߫ ߡߐ߮ ߟߎ߬ ߓߟߏ߫ ߞߎ߲߬ߠߊ߬ߘߌߦߊ ߟߋ߬ ߘߌ߫. ߞߊ߬ ߓߍ߲߬ ߝߢߐߞߏߙߏ߲ ߠߊ߫ ߕߍ߰ߟߌ ߣߌ߲߬ ߞߎ߲߭ ߡߊ߬ ߛߊ߫߸ ߖߡߊ߬ߣߊ߬ߕߌ߮ ߞߵߊ߬ ߦߌ߬ߘߊ߬ ߞߏ߫ <<ߓߊ߲߬ߞߐ߬ ߓߊ߲ߘߊ ߟߌ߬ߤߟߊ ߞߊ߫ ߢߌ߲߬ ߝߋߎ߫.>> ߏ߬ ߘߐ߫߸ ߊ߬ߟߎ߬ ߡߴߊ߬ ߞߎ߲߬ ߟߐ߲߫߸ ߓߊ߬ߙߵߊ߬ߟߎ߬ ߕߴߊ߬ ߖߊ߬ߕߋ߬ ߟߊ߫ ߓߐ߰ߝߍ ߟߌ߬ߤߟߊ߬ ߘߌ߫.

ߞߊ߬ ߓߍ߲߬ ߜߟߍ߬ߦߊ ߣߌ߲߬ ߡߊ߬߸ ߊ߬ߟߎ߫ ߞߊ߬ߟߌߟߌ ߟߊߛߋ߫ ߝߊ߰ߡߊ ߟߎ߫ ߡߊ߬ ߘߍ߬ߡߍ߲߬ߠߌ߲߬ ߞߏ ߘߐ߫، <<ߊ߲ ߘߴߊ߲ ߕߍ߮ ߘߐߛߌ߰ ߊ߬ߟߎ߬ ߦߋ߫ ߞߏߞߎߎߘߊ߫߸ ߛߴߊ߲ ߘߌ߫ ߓߐ߫ ߜߟߍ߬ߦߊ ߣߌ߲߬ ߘߐ߫.>> ߎߡߊߙ ߕߙߊߥߟߋ߫ ߞߵߏ߬ ߦߌ߬ߘߊ߬߸ ߞߏ߫ ߝߊ߰ߡߊ ߟߎ߬ ߦߋ߫ ߛߏ߫ ߞߣߐ߫ ߡߐ߮ ߟߎ߬ ߡߊߘߍ߬ߡߍ߲߬.