ߡߊ߬ߛߎ߬ߓߊ ߟߋ߬ ߕߍ߰ߣߍ߲߫ ߓߍ߯ߦߊ߫ ߞߏ߲߬ߞߏ߫ ߕߟߋ߬ߓߐ߬ ߝߊ߲߬ߝߍ߬ߟߊ ߘߎ߰ ߛߌߦߊߡߊ߲߫ ߞߣߐ߫߸ ߦߙߐ߫ ߟߎ߫ ߟߋ߬ ߦߋ߲߬ ߠߎ߬ ߘߌ߫߸ ߡߙߎߕߌߓߊ߮ ߟߎ߬ ߟߊ߫ ߞߙߎ߫ ߓߍ߯ߦߊ ߝߊ߲߬ߞߊ߬ ߟߊߞߊ߬ߝߏ߬ߣߍ߲ ߠߎ߬ ߦߋ߫ ߡߙߊ߬ߒ߬ߡߊ߬ߟߌ߬ ߛߎߡߊ߲߫ ߖߐ߲ߖߐ߲ ߞߍ߫ ߟߊ߫ ߦߙߐ ߡߍ߲ ߠߎ߬ ߘߐ߫ ߞߊ߬ ߛߌߦߊߦߊ߫ ߛߐ߲߬، ߘߌ߲߬ߞߌߙߊ ߣߊ߲߬ߒ߬ߕߊ߲߬ ߘߍ ߟߊ߫ ߝߐߟߌ߫ ߘߐ߫߸ ߞߍߒߞߊ߲ߠߌ߲ ߛߎߡߊߒߘߐߓߊ߯ߕߐ ߢߌ߲߬ ߠߎ߫ ߞߵߊ߬ߟߎ߬ ߞߍ߫ ߡߐ߱ ߟߎ߬ ߡߊߞߍ߫ ߦߙߐ ߟߎ߫ ߟߋ߬ ߞߊ߲߬߸ ߞߊ߬ ߕߊ ߛߎ߫ ߓߏ߲ ߠߎ߬ ߟߊ߫، ߞߊ߬ ߓߊ߲߫߸ ߊ߬ߟߎ߫ ߓߏ߬ߙߌ߬ߕߐ߬ߟߊ ߞߊ߬ ߡߐ߱ ߟߎ߬ ߓߟߏߝߋ߲߫ ߛߌߦߊߡߊ߲߫ ߕߊ߬ ߞߊ߬ ߥߴߊ߬ ߘߌ߫ ߊ߬ߟߎ߬ ߓߟߏ߫.

ߓߌߟߏ߲ ߡߍ߲ ߕߊ߬ߡߌ߲߬ߣߍ߲߫ ߣߌ߲߬߸ ߛߎ߬ ߛߌߦߊߡߊ߲߫ ߕߊ߬ ߘߊ߫ ߞߊ߬ ߥߴߊ߬ ߘߌ߫ ߏߦߌߛ߭ߊ߫ ߘߎ߰ߣߍ߲ ߛߎ߬ߓߏ߲ ߠߊ߫߸ ߞߐߙߍ߫ ߛߎ߬ߣߎ߲߬ߣߍ߲ ߛߌߦߊߡߊ߲߫ ߥߊ߫ ߘߴߊ߬ ߟߊ߫ ߝߎ߬ߙߋ߫ ߕߊ߬ ߦߋ߲߬ ߠߋ߬߸ ߡߍ߲ ߠߎ߬ ߝߊ߰ ߘߊ߫ ߡߙߊ߬ߒ߬ߡߊ߬ߟߌ ߣߌ߲߬ ߘߐ߫.

ߛ߭ߊߙߌߕߋ߫ ߓߊ߲߬ߖ߭ߊ߬ ߟߊ߫ ߝߐߟߌ߫ ߘߐ߫߸ ߊ߬ߟߋ ߦߋ߫ ߌߕߎߙߌ߫ ߣߊ߲߬ߒ߬ߕߊ߲߬ ߘߍ ߛߌ߲߬ߝߏ߲ ߘߏ߫ ߟߋ߬ ߘߌ߫߸ ߊ߬ ߣߌ߫ ߞߌߣߐߛ ߞߊߕߎߥߊ߫߸ ߏ߬ ߝߣߊ߫ ߦߋ߫ ߕߌ߲߬ߞߎߘߎ߲ ߏ߬ ߣߊ߲߬ߒ߬ߕߊ߲߬ ߘߍ߬ ߞߋߟߋ߲ ߏ߬ ߛߌ߲߬ߝߏ߲ ߘߏ߫ ߟߋ߬ ߘߌ߫߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߡߙߊ߬ߒ߬ߡߊ߬ߟߌ ߣߌ߲߬ ߞߍ߫ ߘߊ߫ ߞߎߣߎ߲ߟߏ߲ ߛߎ ߟߋ߬ ߘߐ߫ ߞߵߊ߬ ߘߎ߰ߛߊ ߜߍ߫ ߓߌߟߏ߲ ߠߊ߫߸ ߤߊ߲߯ ߕߟߋ߬ ߞߎߣߊ ߘߐ߫، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ߬ ߡߙߊ߬߬ߒ߬ߡߊ߬ߟߌ ߞߍ߫ ߘߊ߫ ߓߍ߯ߦߊ ߝߊ߲߬ߞߊ߬ ߟߊߘߍ߬ߣߍ߲ ߠߎ߬ ߟߋ߬ ߓߟߏ߫ (ߓߝߟ)، ߏ߬ ߦߋ߫ ߡߙߎߕߌߓߊ߯ ߞߙߎ߫ ߟߋ߬ ߘߌ߫߸ ߡߍ߲ ߕߐ߮ ߦߋ߫ ߡߙߊ߬ߒ߬ߡߊ߬ߟߌ߬ ߞߏ߫ ߛߌߦߊߡߊ߲߫ ߘߐ߫ ߣߊ߲߬ߒ߬ߕߊ߲ ߠߎ߬ ߞߊ߲ߡߊ߬ ߞߏ߲ߞߏ߫ ߕߟߋ߬ߓߐ ߘߐ߫.

ߡߙߊ߬ߒ߬ߡߊ߬ߟߌ ߣߌ߲߬ ߞߍ߫ ߘߊ߫ ߘߌ߲߬ߞߍߙߊ ߡߍ߲ ߘߐ߫߸ ߏ߬ ߘߎ߰ߘߋ߲ ߠߎ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߖߎ߬ߛߎߞߊ߬ߛߌ߬ߣߍ߲߬ߓߊ ߟߋ߬ ߕߋ߲߬߸ ߞߵߏ߬ ߞߎ߲߭ ߞߍ߫ ߟߊߞߊ߲ߘߓߊߟߌߦߊ ߣߌ߫ ߞߎ߲߬ߠߊ߬ߛߘߌ ߥߊ߬ߙߊ ߘߌ߫، ߛߊߡߎ߳ߍߟ ߡߊߤߊ߲ߓߊ߫ ߡߍ߲ ߠߊ߫ ߡߐ߱ ߘߏ߫ ߕߏߣߴߊ߬ ߘߐ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߝߊ߰ߡߊ ߟߎ߬ ߕߴߛߋ߫ ߟߊ߫ ߘߎ߰ߘߋ߲ ߠߎ߬ ߟߊߕߊ߲߬ߞߊ߬ ߟߊ߫ ߡߎ߬ߕߎ߲߬.

<<ߓߊ߰ߓߊ߰ߟߌ߬ߟߊ ߢߌ߲߬ ߠߎ߬ ߕߍ߫ ߥߊ߬ ߘߐ߫ ߡߎ߬ߕߎ߲߫ ߘߋ߬߸ ߊ߲ ߧߋ߫ ߟߏ߲ ߡߍ߲ ߘߐ߫ ߦߏ߫ ߓߌ߬߸ ߊ߲ ߖߍ߬ߘߍ ߡߴߊ߬ ߟߐ߲߫ ߊ߬ߟߎ߬ ߦߋ߫ ߓߐ߫ ߟߊ߫ ߝߊ߲߬ ߞߋߟߋ߲ ߡߍ߲ ߠߎ߬ ߘߐ߫.>> ߊ߬ ߞߵߏ߬ ߦߌ߬ߘߊ߬.

ߊ߬ ߞߵߊ߬ ߞߊ߲ߠߊߘߌ߫ ߝߊ߰ߡߊ ߟߎ߫ ߡߊ߬ ߝߣߊ߫߸ ߞߏ߫ ߊ߬ߟߎ߬ ߦߴߊ߬ߟߎ߬ ߘߐߖߊ߬ ߞߊ߬ ߛߋ߫ ߟߊߞߊ߲ߘߊ ߓߊ߲ߓߊ߲߫ ߠߊ߫.

<<ߊ߲ ߡߊ߫ ߝߏߦߌ߬ ߜߘߍ߫ ߢߌߣߌ߲߫ ߊ߬ߟߎ߫ ߝߍߍ߬߸ ߝߏ߫ ߖߛߎ߬ߛߎߡߊ، ߓߊ߬ߙߌ߬߸ ߊ߬ ߥߊ߯ߕߌ߫ ߖߊ߲ ߠߋ߬ ߕߋ߲߬߸ ߊ߲ ߧߴߊ߲ ߡߊߞߊ߬ߛߌ߬ ߟߊ߫ ߖߛߎ߬ߛߎ߬ߡߊ߬ ߞߏ ߢߌ߲߬ ߠߊ߫߸ ߞߏ߫ ߕߍ߫ ߓߐ߫ ߟߴߊ߬ ߘߐ߫، ߊ߲ ߓߘߊ߫ ߞߢߊ߬߸ ߊ߲ ߖߍ߬ߘߍ ߡߴߊ߬ ߟߐ߲߫ ߛߍߣߍ߲߬ ߊ߲ ߘߌ߫ ߡߍ߲ ߜߘߍ߫ ߞߍ߫߸ ߣߌ߫ ߛߐ߲߬ߖߊ ߕߍ߫ ߝߌ߬ߟߊ߬ ߘߌ߫ ߝߏ߫ ߞߋߟߋ߲߫߸ ߘߏ߫ ߓߘߊ߫ ߞߍ߫ ߏ߬ ߘߐ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߓߍ߯ߦߊ߫ ߞߏ߲߬ߞߏ߬ ߞߊ߲ߓߍ߲ ߞߏ߲߬ߞߏ߬ ߝߍ߬ ߡߙߊߓߏߟߏ߲ ߘߏ߫ ߟߎ߫ ߓߍ߫߸ ߣߊ߲߬ߕߌ߮ ߟߎ߬ ߦߋ߫ ߦߋ߲߬ ߠߎ߬ ߘߐ߫ ߝߋߎ߫، ߒ߬ߞߊ߬ ߥߊ߯ߕߌ ߓߍ߯ ߡߊ߲߬ߞߊ߲ ߠߋ߬ ߦߋ߲߬، ߡߙߎߕߌߓߊ߯ ߞߙߎ ߡߍ߲ ߦߋ߫ ߕߋ߲߬߸ ߣߴߊ߬ ߟߊߘ߲ߊ߲߫ ߘߊ߫ ߎߜ߭ߊ߲ߘߊ߫߸ ߊ߬ߟߎ ߟߋ߬ ߢߐ߲߰ ߡߙߊ߬ߒ߬ߡߊ߬ߟߌ߬ ߖߎ߯ ߞߍ߫ ߟߊ߫ ߕߍ߫ ߖߡߊ߬ߣߊ ߦߙߐ ߣߌ߲߬ ߘߐ߫߸ ߡߊ߬ߛߎߓߊ ߣߌ߫ ߜߊ߬ߟߏ ߟߊ ߘߐ߫ ߣߊ߬ߒ߬ߕߊ߲ ߠߎ߫ ߞߊ߲߬.