ߗߍ߬ ߛߊ߲߭ ߂߆ ߘߏ߫ ߟߋ߬ ߦߋ߫ ߓߏ߬ߙߌ߬ ߥߊ ߟߊ߫ ߕߋ߲߬߸ ߊ߬ߟߋ ߡߊߝߌ߲߬ߣߍ߲߫ ߓߋ߬ߒ߬ߞߊ߲߬ߠߌ߲߬ ߖߎ߰ ߞߏ ߟߋ߬ ߘߐ߫ ߘߋ߲ߡߛߏߣߍ߲߫ ߛߊ߲߬ ߁߄ ߘߏ߫ ߞߊ߲߬߸ ߊ߬ ߞߊ߬ ߡߙߎ߬ߓߊ ߞߍ߫ ߞߵߏ߬ ߡߍ߲ ߡߊߛߌߟߊ߲߫، ߌߞߏߡߌ߲߬ ߊ߬ ߦߋߣߍ߲߫ ߕߍ߫ ߡߎߣߎ߲߬߸ ߊ߬ ߟߊ߫ ߞߕߌ ߓߘߊ߫ ߟߴߊ߬ ߞߐߝߍ߬ ߏ߬ ߟߋ ߘߐ߫ ߣߌ߲߬ ߓߐ߬ߓߐ߫ ߖߎ߬ߟߊ߬ߛߏ߫ ߞߕߌߘߊ ߦߌߟߡߊ߫ ߝߟߐ߫ ߓߏ߲߬ߓߊ ߞߎ߲߬ߞߏ߬ߓߊ߬ߕߐ߬ߦߊ ߓߏߏ߲ߘߋ߲ ߓߟߏ߫، ߊ߬ ߟߊ߫ ߞߕߌ ߕߍ߱ ߓߘߊ߫ ߟߐ߯ߟߊ߫ ߞߵߊ߬ ߕߏ߫ ߂߀߂߆ ߞߊ߬ߙߌ߬ߝߐ ߕߟߋ߬ ߁߃ ߣߊ߬ߕߐ ߟߊ߫.

ߞߏߢߊ ߣߌ߲߬ ߞߍ߫ ߘߊ߫ ߞߊ߬ߦߌ߯ ߂߀߂߃ ߞߊ߬ߙߌ߬ߝߐ ߕߟߋ߬ ߅ ߟߋ߬ ߡߊ߬߸ ߓߡߊ߫ ߝߊ߲߭ ߝߍ߬، ߘߋ߲ߡߛߏߣߍ߲߫ ߛߊ߲߬ ߁߄ ߘߏ߫ ߟߋ߬ ߕߊ߯ߣߍ߲߫ ߕߍ߬ߘߍ߫ ߛߋ߬ߞߟߏ߬ ߡߊ߬ߕߐ߬ߡߐ߲߬ ߦߌߟߊ ߘߐ߫ ߥߊ߭ ߘߐ߫߸ ߊ߬ ߣߌ߫ ߞߊ߲ߡߋߙߋ߲ ߘߏ߫ ߞߊ߬ ߢߐ߲߯ߓߍ߲߬߸ ߏ߬ ߞߵߊ߬ ߝߐ߫ ߞߏ߫ ߝߏ߫ ߊ߬ ߦߴߊ߬ ߟߊ߫ ߜߋߟߋ߲ߜߋߟߋ߲߫ ߝߙߍߕߍ ߘߴߊ߬ ߡߊ߬، ߘߋ߲ߡߛߏ ߡߊ߫ ߛߐ߲߬ ߏ߬ ߡߊ߬، ߏ߬ ߞߍ߸ ߞߊ߲ߡߋߙߋ߲ ߞߵߊ߬ ߛߋ߲߬ߝߌ߬ߟߊ߬ߡߊߕߍ߰ ߌߞߘߐ߫ ߞߵߊ߬ ߜߋ߬ߙߋ߲߬ߜߊߛߌ߫ ߘߎ߱ ߟߊ߫߸ ߞߵߊ߬ ߡߊߛߌߟߊ߲߫ ߊ߬ ߟߊ߫ ߡߙߎ߬ߓߊ ߟߊ߫߸ ߞߊ߬ ߓߋ߬ ߊ߬ ߞߊ߲߬ ߦߙߐ ߏ߬ ߘߐ߫ ߦߋ߲߬ ߞߵߊ߬ ߛߊ߬ߥߏ ߞߍ߫ ߞߊ߬ ߥߴߊ߬ ߦߋ߫.

ߘߋ߲ߡߛߏ ߝߊ߬ ߞߍ ߏ߬ ߞߊ߬ߟߊߡߊ߬߸ ߏ߬ ߞߵߊ߬ ߞߊ߲ߠߊߘߌ߫ ߓߙߎߞߌߣߊ߫ ߝߊ߬ߛߏ ߡߞߊߘߊ߲ ߞߊ߬ߣߌ߲߬ߦߋ (ߝߡߞ) ߟߎ߫ ߡߊ߬، ߏ߬ ߟߎ߬ ߝߣߊ߫ ߞߵߊ߬ߟߎ߬ ߕߍ߯ ߞߍ߫ ߛߌߞߊߒߡߊߓߊ߯ߕߐ ߘߐ߫ ߝߋߎ߫߸ ߞߵߊ߬ ߡߌ߬ߣߊ߫ ߞߵߊ߬ ߘߌ߫ ߓߡߊ߫ ߘߎ߰ߞߣߍ ߞߟߍ߬ߡߐ߰ߘߊ ߓߙߌ߬ߝߐߝߐ ߡߊ߬، ߞߏߢߊߢߌߣߌ߲ߠߊ ߏ߬ ߟߎ߬ ߢߊߞߘߐ߫ ߦߋ߲߬߸ ߊ߬ ߞߵߊ߬ ߛߐ߬ߛߐ߫ ߊ߬ ߞߏ ߓߍ߯ ߟߊ߫߸ ߞߏ߫ ߊ߬ ߟߐ߲ߞߏ߫ ߛߌ߫ ߕߴߏ߬ ߘߐ߫، ߊ߬߬ ߞߵߊ߬ ߟߐ߬ ߦߙߐ ߘߏ߫ ߟߎ߫ ߟߊ߫، ߓߊߏ߬߸ ߊ߬ ߞߵߊ߬ ߟߐ߬ ߊ߬ ߟߊ߫ ߞߏ߫ ߊ߬ ߛߋ߫ ߘߊ߫ ߘߋ߲ߡߛߏ ߡߊ߬߸ ߓߊ߬ߙߌ߬ ߞߏ߫ ߊ߬ ߡߊ߫ ߞߍ߫ ߘߌߦߊߜߏߦߊ߫ ߘߌ߫߸ ߘߋ߲ߡߛߏ ߘߌ߬ߢߍ߬ ߘߊ߫ ߟߋ߬ ߝߛߊߦߌ߫.

ߊ߬ߟߎ߫ ߞߵߊ߬ ߓߌ߬ߟߊ߬ ߞߕߌ߫ ߡߊߞߐߣߐ߲߫ ߥߛߎ ߟߊ߫ ߏ߬ ߟߋ ߘߐ߫߸ ߦߊ߬ߣߴߊ߬ ߟߊ߫ ߞߕߌ ߦߋ߫ ߟߊ߫، ߞߐ ߟߊ߫߸ ߊ߬ߟߎ߫ ߞߵߊ߬ߟߎ߬ ߓߟߏߓߐ߫ ߊ߬ ߘߐ߫߸ ߞߏ߫ ߊ߬ ߦߋ߫ ߝߢߐ ߦߴߊ߬ ߢߊ ߟߊ߫߸ ߊ߬ߟߎ߫ ߡߊ߬ߞߏ ߓߊ߯ ߛߴߊ߬ ߡߊ߬ ߞߵߊ߬ ߟߊ߫ ߞߕߌ ߞߍ߫߸ ߊ߬ ߦߋ߫ ߣߊ߬، ߒ߬ߓߊ߬߸ ߊ߬ߟߋ ߓߐ ߢߊ ߡߍ߲ ߏ߬ ߘߐ߫ ߌߞߘߐ߫߸ ߊ߬ ߞߵߊ߬ ߛߋ߲߬ߕߍ ߟߋ߬ ߟߴߊ߬ ߞߎ߲߬ ߞߵߊ߬ ߓߏ߬ߙߌ߬، ߞߕߌߘߊ ߝߣߊ߫ ߞߵߊ߬ ߕߎߣߎ߲߫ ߞߏ ߟߊߛߋ߫߸ ߞߵߊ߬ ߢߌߣߌ߲߫ ߞߏ ߛߌ߰ ߛߋ߲߬ߠߊ߫ ߏ߬ ߟߋ ߘߐ߫.

ߌߞߏߡߌ߲߬ ߊ߬ ߦߋߣߍ߲߫ ߕߍ߫ ߡߎߣߎ߲߬߸ ߊ߬ߟߎ߬ ߓߘߴߊ߬ ߟߊ߫ ߞߕߌ ߘߊߡߌ߬ߣߊ߬، ߞߕߌ߫ ߘߊߞߎ߲ ߘߐ߫߸ ߊ߬ ߟߊ߫ ߞߏ ߓߘߊ߫ ߕߊ߬ߡߌ߲߬ ߖߎ߯ߦߊ߫ ߟߊ߫ ߘߋ߬، ߓߊߏ߬߸ ߊ߬ ߟߊߞߙߐ߬ߛߌ߬ ߘߊ߫ ߞߏ߫ ߊ߬ ߛߐ߲߭ ߦߋ߫ ߞߏ߫ ߝߌ߬ߟߊ߬ ߜߘߍ߫ ߘߐ߫߸ ߏ߬ ߓߍ߯ ߦߋ߫ ߓߋ߬ߒ߬ߞߊ߲߬ߠߌ߲߬ ߞߏ ߟߋ߬ ߘߌ߫ ߞߊ߬ߝߏ߬ߢߐ߲߰ߦߊ ߛߌߟߊ ߝߍ߬، ߌߞߏߡߌ߲߬ ߊ߬ ߓߘߊ߫ ߦߋ߫ ߞߏ߫ ߊ߬ ߥߊ߫ ߢߊ ߟߴߊ߬ ߘߌ߫߸ ߊ߬ ߘߏ߲߬ ߦߋ߫ ߡߙߊ߬ߒ߬ߡߊ߬ߝߋ߲ ߠߋ߬ ߟߊߓߊ߯ߙߊ߫ ߟߴߊ߬ ߟߊ߫ ߓߋ߬ߒ߬ߞߊ߲߬ߠߌ߲ ߘߐ߫߸ ߞߕߌߓߋߟߋ߲ ߝߣߊ߫ ߞߊ߲߫ ߞߏ߫ ߞߊ߬ ߛߊ߲߬ ߁߅ ߥߛߎߖߌ߲߫ ߓߊߟߊ߲ߣߍ߲ ߟߴߊ߬ ߞߎ߲߬߸ ߞߊ߬ ߓߊ߲߫ ߞߊ߬ ߢߌߣߌ߲ߠߌ߲߫ ߛߓߍ ߓߌ߬ߟߴߊ߬ ߞߐ߫.