ߝߊߦߌߘߊ߫ ߡߐ߰ ߦߴߊ߬ ߕߟߋ߬ ߝߌ߬ߟߊ߬ ߝߐ ߟߋ߬ ߞߍ߫ ߟߊ߫߸ ߏ߬ ߟߋ ߞߍ߫ ߘߊ߫ ߕߌ߲ߘߌߥߎߟߋ߲߫ ߞߊ߬ߝߏ߬ߙߋ߲߬ߕߌ߰ ߞߏ ߞߊ߲߬߸ ߢߊ߫ ߡߊ߫ ߛߐ߬ߘߐ߲߫ ߊ߬ ߡߊ߬، ߕߌ߲ߘߌߥߎߟߋ߲߫ ߣߌ߲߬ ߦߋ߫ ߞߊ߲ߞߊ߲߫ ߡߙߊ߬ߘߊ߬ߓߊ ߟߋ߬ ߘߐ߫، ߒ߬ߓߊ߬߸ ߜߐ߬ߛߐ߲߬ߞߐ ߓߍ߯ ߞߐ ߘߐ߫߸ ߊ߬ߟߎ߫ ߞߵߊ߬ߟߎ߬ ߟߊ߫ ߞߊ߬ߝߏ߬ߙߋ߲߬ߕߌ߮ ߟߊߛߌ߰ ߛߌ߬ߣߌ߲߬ߟߏ߲ ߂߀߂߆ ߞߊ߬ߙߌ߬ߝߐ ߕߋ߬ߟߋ߫ ߃ ߡߊ߬، ߊ߲߬ߛߎ߬ߡߊߣ ߞߏ߬ߣߊ߬ߕߍ߫ ߡߍ߲ ߦߋ߫ ߖ߭ߋ.ߍߡ.ߘߋ ߛߌ߲߬ߝߏ߲߬ ߘߌ߫ ߦߋ߲߬߸ ߏ߬ ߟߋ ߞߍ߫ ߘߊ߫ ߞߊ߬ߝߏ߬ߙߋ߲߬ߕߌ߮ ߘߌ߫ ߜߎ߲߬ߘߎ߬ ߘߐ߬ ߢߣߊߕߊߟߌ ߘߐ߫߸ ߊ߬ ߦߌ߬ߘߊ߬ߣߍ߲߫ ߞߏ߫ ߞߊ߬ߙߏ߲ ߣߌ߫ ߦߙߎ߬ߞߎ߬ߦߙߎ߬ߞߎ߬ ߞߏ ߟߎ߬ ߣߌ߫ ߡߊ߬ߛߌ߬ߟߊ߲߬ߠߌ߲ ߠߎ߬ ߕߊ߬ߡߌ߲߬ ߘߊ߫ ߡߍ߲ ߘߐ߫.
ߡߊ߬ߝߌ߲߬ߞߊ߲߬ߠߊ ߟߎ߬ ߘߐ߫߸ ߖ߭ߋ.ߍߡ.ߘߋ ߞߎ߲߬ߕߌ߮ ߘߏ߫ ߟߎ߫ ߕߐ߮ ߦߴߊ߬ ߘߐ߫߸ ߡߍ߲ ߠߎ߬ ߓߐ߫ ߘߊ߫ ߞߊ߲ߞߊ߲߫ ߞߊ߬ ߣߊ߬ ߕߌ߲ߘߌߥߎߟߋ߲߫، ߣߊ߬ߓߊ߰ߕߐ ߏ߬ ߟߎ߬ ߘߐ߫߸ ߟߊ߬ߡߌߣ ߟߊߓߏ߫ ߞߙߎ߬ߡߊ߬ ߦߴߏ߬ ߟߋ ߘߐ߫߸ ߊ߬ߟߋ ߡߍ߲ ߦߋ߫ ߞߊ߲ߞߊ߲߫ ߛߏߞߣߐߟߊ ߞߊ߬ߝߏ߬ߙߋ߲߬ߕߌ߮ ߘߌ߫߸ ߊ߬ ߣߴߊ߬ ߟߊ߫ ߛߙߍߞߍ߸ ߟߊ߱ߦߌ߬ ߞߋߕߊ߬.
ߊߟߎ߫ ߦߴߊ߬ ߟߐ߲߫߸ ߊ߬ ߝߐ߫ ߘߊ߫ ߟߋ߬ ߞߏ߫ ߂߀߂߆ ߞߊ߬ߙߌ߬ߝߐ ߕߋ߬ߟߋ߫ ߂ ߡߍ߲ ߓߍ߲߬ ߘߊ߫ ߓߌߟߏ߲ ߡߊ߬߸ ߞߏ߫ ߞߊ߬ ߖߌ߬ߣߍ߫ ߞߊ߬ߝߏ߬ߙߋ߲ ߞߏߟߊߕߍ߯ ߛߎߥߊ߲ߘߌߣߍ߲ ߠߎ߬ ߟߊߛߌ߰߸ ߊ߬ߟߎ߬ ߦߴߊ߬ߟߎ߬ ߟߊ߫ ߞߊ߬ߝߏ߬ߙߋ߲߬ߕߌ߮ ߟߎ߬ ߟߊߛߌ߰، ߒ߬ߓߊ߬߸ ߕߌ߲ߘߌߥߎߟߋ߲߫ ߕߊ ߡߊ߫ ߞߍ߫ ߦߏ߫ ߕߐ߭ ߟߎ߬، ߓߊߏ߬߸ ߞߏߟߊߕߍ߯ ߂߃ ߡߍ߲ ߦߋ߫ ߦߋ߲߬߸ ߢߣߊߕߊߟߌ ߛߋ߲߭ߝߍ߬߸ ߖ߭ߋ.ߍߡ.ߘߋ ߞߊ߬ ߁߃ ߟߋ߬ ߛߐ߬ߘߐ߲߬߸ ߎ߳ߘߌߙ ߞߊ߬ ߁߀ ߛߐ߬ߘߐ߲߬، ߏ߬ ߦߋ߫ ߞߙߎߞߊ߫ ߟߋ߬ ߘߌ߫߸ ߊ߰ ߝߐ߫ ߟߊ߫ ߡߍ߲ ߡߊ߬ ߞߏ߫ ߞߊ߲ߓߍ߲ ߠߊ߫ ߕߣߐ߬ ߡߊ߬ߞߊߘߊ߲ ߞߙߎߞߊ، ߒ߬ߓߊ߬߸ ߏ߬ ߟߎ߬ ߡߊ߫ ߛߋ߫ ߓߍ߲߬ ߠߊ߫ ߞߋߟߋ߲߫ ߘߐ߫ ߟߏ߲߫ ߝߟߐ ߏ߬ ߘߐ߫߸ ߞߊ߬ ߓߍ߲߬ ߊ߬ߟߎ߬ ߟߊ߫ ߞߊ߬ߝߏ߬ߙߋ߲߬ߕߌ߮ ߣߴߊ߬ ߛߙߍߞߍ ߟߎ߬ ߟߊߛߌ߰ ߞߏ ߡߊ߬.
ߊ߲ ߞߊ߬ ߞߊ߬ߝߏ߬ߙߋ߲߬ߕߌ߰ ߞߎߘߊ ߊ߲߬ߛߎ߬ߡߊߣ ߞߏ߬ߣߊ߬ߕߍ߫ ߢߌ߬ߣߌ߲߬ߞߊ߫ ߜߟߍ߬ߦߊ ߣߌ߲߬ ߞߎ߲߭ ߡߊ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ <<ߞߏ ߟߎ߬ ߓߊ߬ߛߊ߲߬ߣߍ߲߫ ߕߘߍ߬ ߣߍ߲ߞߍ߫، ߞߊ߬ߕߎ߲߯߸ ߖ߭ߋ.ߍߡ.ߘߋ ߞߊ߬ ߞߏߟߊߕߍ߯ ߁߃ ߡߍ߲ ߛߐ߬ߘߐ߲߬߸ ߊ߬ ߣߌ߫ ߎ߳ߘߌߙ ߝߣߊ߫ ߞߊ߬ ߞߏߟߊߕߍ߯ ߁߀ ߡߍ߲ ߛߐ߬ߘߐ߲߬߸ ߝߙߋߞߋ ߕߘߍ߬ ߘߏ߫ ߟߎ߫ ߕߐ߯ ߞߏ ߘߐ߫، ߏ߬ ߟߋ ߕߎ߲߬ ߞߊ߬ ߢߣߊߕߊߟߌ߫ ߞߏ ߛߋ߲߬ߠߊߛߘߌ߬ ߣߍ߲ߞߍ߫.>> ߊ߬ ߞߵߏ߬ ߟߊߛߋ߫.
ߞߊ߬ߝߏ߬ߙߋ߲߬ߕߌ߰ ߞߎߘߊ ߞߏ߬ߣߌ߲ ߡߴߊ߬ ߝߐ߫߸ ߊ߬ ߞߊ߬ ߞߊ߲ߢߊ߫ ߖߊ߬ߕߋ ߡߍ߲ ߛߐ߬ߘߐ߲߬߸ ߢߣߊߕߊߟߌ ߞߍ߫ ߘߊ߫ ߝߊ߬ߘߌ ߡߍ߲ ߘߐ߫߸ ߏ߬ ߡߊ߫ ߝߐ߫ ߊ߬ ߓߟߏ߫، ߛߓߍߘߊ ߝߣߊ߫߫ ߛߏ߯ߙߏߣߍ߲߫ ߢߊ ߡߍ߲ ߡߊ߬߸ ߏ߬ ߡߊ߫ ߝߐ߫߸ ߞߊ߬ ߓߍ߲߬ ߞߊ߬ߝߏ߬ߙߋ߲ ߞߏߟߊߕߍ߯ ߛߎߥߊ߲ߘߌߣߍ߲ ߠߎ߬ ߡߊ߬.
ߎ߳ߘߌߙ ߞߐߦߌߘߊ߸ ߡߎߛߊ߫ ߞߊ߲ߕߍ߫ ߡߍ߲ ߦߋ߫ ߞߊ߬ߝߏ߬ߙߋ߲ ߞߏߟߊߕߍ߯ ߘߌ߫߸ ߏ߬ ߞߊ߬ ߢߊߝߐߟߌ߫ ߞߍ߫ ߞߊ߬ ߓߍ߲߬ ߣߌ߲߬ ߞߏ ߡߊ߬، ߊ߬ߟߋ ߦߴߊ߬ ߦߌ߬ߘߊ߬ ߟߴߊ߬ ߟߊ߫ ߞߎߡߊ ߘߐ߫߸ ߞߏ߫ ߢߣߊߕߊߟߌ ߕߎ߲߬ ߞߊ߫ ߞߊ߲߫ ߞߊ߬ ߞߍ߫ ߓߌߟߏ߲ ߠߋ߬߸ ߓߊ߬ߙߵߊ߬ ߡߊ߫ ߛߋ߫ ߞߍ߫ ߟߊ߫، ߓߊߏ߬߸ ߊ߬ ߝߐ߫ ߘߊ߫ ߟߋ߬ ߘߌߌߦߊߜߏߦߊ߫ ߓߟߏ ߡߊ߬ ߞߏ߫ ߝߏ߫ ߘߏ߫ ߟߎ߫ ߓߊ߯ ߡߐ߰ ߜߘߍ߫ ߟߎ߫ ߟߊ߫ ߢߣߊߕߊߟߌ ߞߍ߫ ߊ߬ߟߎ߫ ߣߐ߭ ߘߐ߫߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߢߊ ߦߋ߫ ߜߍ ߘߐ߫، ߊ߬ߟߋ ߟߊ߫ ߝߐߟߌ߫ ߘߐ߫߸ ߏ߬ ߦߋ߫ ߛߊ߬ߙߌ߬ߦߊ߬ ߛߐߛߐ ߟߋ߬ ߘߌ߫߸ ߞߊ߬ ߓߍ߲߬ ߢߣߊߕߊߟߌ ߛߊ߬ߙߌ߬ߦߊ߬ߛߎ߲ ߕߐ߲ߛߋ߲ ߂߃߀ ߝߐ߫ ߞߊ߲ ߡߊ߬.
<<ߡߐ߱ ߢߊ ߦߋ߫ ߜߍ ߘߐ߫߸ ߊ߬ ߟߊ߫ ߢߣߊߕߊߟߌ߫ ߔߊߔߘߊ ߦߴߊ߬ ߓߟߏ߫߸ ߊ߬ ߘߏ߲߬ ߕߐ߮ ߦߋ߫ ߛߓߍ ߞߣߐ߫߸ ߞߴߏ߬ ߕߍ߫ ߝ߭ߏߕߋ߫ ߟߊ߫߸ ߞߏ߫ ߊ߬ߟߎ߬ ߓߘߊ߫ ߛߌߞߊ߫ ߏ߬ ߡߊ߬߸ ߞߏ߫ ߝߏ߫ ߞߊ߬ ߡߐ߰ ߜߘߍ߫ ߟߋ߬ ߕߊ߬ ߛߓߍ ߏ߬ ߞߊ߲߬߸ ߡߐ߰ ߁߀ ߏ߬ ߘߐ߫߸ ߞߴߏ߬ ߦߋ߫ ߝ߭ߏߕߋ߫ ߡߐ߰ ߛߊ߬ߓߊ ߏ߬ ߣߐ߭ ߘߐ߫.>> ߊ߬ ߞߵߏ߬ ߝߐ߫.
ߡߎߛߊ߫ ߞߊ߲ߕߍ߫ ߟߊ߫ ߝߐߟߌ߫ ߘߐ߫߸ ߝߐߢߐ߲߯ߞߐ ߏ߬ ߟߋ ߞߏߛߐ߲߬߸ ߢߣߊߕߊߟߌ ߡߊ߫ ߛߋ߫ ߞߍ߫ ߟߊ߫ ߓߌߟߏ߲ ߡߊ߬، ߊ߬ߟߎ߫ ߞߵߊ߬ ߕߊ߬ ߟߋ߬ ߞߎߡߊ ߟߊ߫ ߦߋ߲߬ ߝߎߚߎ߫ ߝߏ߫ ߞߊ߬ ߂߃ߙߋ߲ ߕߊ߬ߡߌ߲߬߸ ߊ߬ߟߎ߬ ߡߊ߫ ߓߍ߲߬ ߞߋߟߋ߲߫ ߘߐ߫.
ߒ߬ߓߊ߬߸ ߛߌ߬ߣߌ߲߬ߟߏ߲ ߡߊ߬ ߏ߬ ߘߐ߫ ߛߊ߫߸ ߞߏߟߊߕߍ߯ ߂߃ ߘߐ߫߸ ߂߂ ߢߊ ߕߘߍ߬ ߜߍ ߘߐ߫߸ ߡߎߛߊ߫ ߞߊ߲ߕߍ߫ ߞߊ߲߫ ߞߏ߫ ߞߟߊ߬ߕߊ߬ߓߊ߰ߓߐ ߘߝߊ ߟߵߏ߬ ߘߌ߫ ߝߊߦߦߌߘߊ߫߸ ߏ߬ ߟߎ߬ ߘߌ߫ ߛߋ߫ ߢߣߊߕߊߟߌ ߞߍ߫ ߟߊ߫ ߝߛߊߦߌ߫، ߓߊ߬ߙߌ߬ ߏ߬ ߓߍ߯ ߣߴߊ߬ ߕߊ߫߸ ߢߣߊߕߊߟߌ ߡߊ߫ ߛߋ߫ ߞߍ߫ ߟߊ߫߸ ߜߟߍ߬ߦߊ ߕߎ߲߬ ߦߴߊ߬ ߘߐ߫.
ߎ߳ߘߌߙ ߟߊ߫ ߗߍ߭ ߞߊ߲߫߸ ߞߏ߫ ߊ߬ ߝߐ߫ ߘߊ߫ ߞߏ߫ ߊ߬ߟߋ ߕߍ߫ ߘߏ߲߬ ߠߊ߫ ߝߏ߮ ߞߣߐ߫߸ ߓߊߏ߬ ߞߏ߫ ߝߌ߬ߟߌ ߦߴߊ߬ ߕߐ߮ ߘߐ߫ ߊ߬ ߟߊ߫ ߢߣߊߕߊߟߌ߫ ߔߊߔߘߊ ߞߊ߲߬، ߓߊߏ߬߸ ߊ߬ߟߋ ߕߐ߯ ߞߏ߫ ߡߎߛߊ߫ ߞߊ߲ߕߍ߫߸ ߓߊ߬ߙߵߊ߬ ߦߋ߫ ߛߓߍ ߞߣߐ߫ ߟߋ߬ ߞߏ߫ ߡߎߛߊ߫ ߞߏ߬ߣߊ߬ߕߍ߫.
<<ߦߊ߬ߣߴߊ߬ߟߎ߬ ߦߴߊ߬ ߛߓߍ߫ ߞߏ߫ ߡߎߛߊ߫ ߞߊ߲ߕߍ߫߸ ߊ߬ߟߎ߬ ߥߊ߫ ߘߴߊ߬ ߞߍ߫ ߡߎߛߊ߫ ߞߏ߬ߣߊ߬ߕߍ߫ ߘߌ߫، ߞߵߊ߬ ߕߘߍ߬ ߜߎ߸ ߛߐ߬ߘߐ߲߬ ߛߊ߲ ߠߎ߬ ߓߍ߯ ߞߋߟߋ߲߫߸ ߖߌ߬ߦߊ߬ߓߍ ߓߍ߯ ߞߋߟߋ߲߫، ߞߏ߬ߣߵߏ߬ ߓߍ߯ ߣߴߊ߬ ߕߊ߫߸ ߊ߬ߟߎ߬ ߡߊ߫ ߛߐ߲߬ ߊ߬ ߦߋ߫ ߘߏ߲߬ ߝߏ߮ ߞߣߐ߫.>> ߊ߬ ߞߵߏ߬ ߝߐ߫.
ߊ߬ ߞߵߊ߬ ߦߌ߬ߘߊ߬ ߞߏ߫ ߝߍ߬ ߛߎ߮ ߏ߬ ߟߎ߬ ߦߋ߫ <<ߛߋߒߞߏߟߊ ߟߎ߬ ߟߊ߫ ߝߎ߬ߕߎ߲߬ߕߌ ߟߋ߬ ߘߌ߫>> ߛߓߍߟߌ ߕߎ߬ߡߊ ߟߊ߫، ߊ߬ ߝߣߊ߫ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫ ߣߴߊ߬ ߕߊ߬ ߘߴߏ߬ ߡߊ߬߸ ߝߍ߭ ߦߴߏ߬ ߟߎ߬ ߝߣߊ߫ ߟߊ߫ ߛߓߍ ߘߐ߫ ߘߋ߬، <<ߣߴߏ߬ ߕߍ߫߸ ߣߴߊ߲ ߞߵߊ߬ ߟߊߕߊ߯ ߛߊ߬ߙߌ߬ߦߊ ߛߌߟߊ ߝߍ߬߸ ߊߟߎ߬ ߝߣߊ߫ ߟߊ߫ ߡߐ߰ ߁߃ ߡߍ߲ ߠߎ߬ ߦߋ߫ ߕߋ߲߬߸ ߣߌ߲߬ ߞߋ߬ߟߋ߲߬ߞߋ߬ߟߋ߲߬ߠߊ ߟߊ߫ ߛߐ߬ߘߐ߲߬ ߛߓߍ߸ ߞߴߏ߬ ߟߎ߬ ߓߍ߯ ߛߐ߬ߘߐ߲߬ߣߍ߲߫ ߁߉߀߅/߁߉߀߅، ߌ ߘߌ߫ ߟߊ߬ߖߌ߬ߣߍ߬ߞߊ ߖߐ߲߫ ߟߊߓߐ߫ ߊ߬ ߣߌ߫ ߟߊ߫ ߓߌ߬߸ ߞߏ߫ ߊ߬ ߦߋ߫ ߛߋ߫ ߟߊ߫ ߞߏ ߓߍ߯ ߞߍ߫ ߟߴߊ߬ ߖߘߍ߬ ߦߋ߫߸ ߞߏ߫ ߊ߬ ߛߐ߬ߘߐ߲߬ߣߍ߲߫ ߁߉߀؟>> ߊ߬ ߞߵߏ߬ ߢߌ߬ߣߌ߲߬ߞߊ߬ߟߌ ߞߍ߫، ߞߵߊ߬ ߦߌ߬ߘߊ߬߸ ߞߏ߫ ߣߴߌ ߞߵߊ߬ߟߎ ߛߐ߲߬ߣߍ߲ ߦߴߏ߬ ߟߎ߬ ߕߊ ߡߊ߬߸ ߊ߬ ߝߐ߫ ߘߊ߫ ߓߊߘߋ߲ߧߊ ߟߋ߬ ߟߊ߫، ߏ߬ ߟߎ߬ ߝߣߊ߫ ߞߊ߫ ߞߊ߲߫ ߕߍ߬ߘߍ߫ ߞߊ߬ ߛߐ߲߬ ߊ߬ߟߋ ߕߊ ߏ߬ ߡߊ߬.
ߊ߬ ߟߊ߫ ߟߊ߬ߛߙߋ߬ߦߊ߬ߟߌ߬ ߞߊ߲ ߠߎ߬ ߘߐ߫߸ ߞߏ߫ ߕߎ߬ߡߊ ߡߍ߲ ߠߊ߫ ߞߏ ߜߊ߬ߣߍ߲߫ ߥߊ߯ߕߌ ߏ߬ ߟߊ߫߸ ߎ߳ߘߌߙ ߟߊ߫ ߡߐ߱ ߕߎ߲߬ ߕߍ߫ ߓߏ߲ ߞߣߐ߫ ߢߣߊߕߊߟߌ߫ ߞߊ߲ߡߊ߬، ߏ߬ ߥߊ߯ߕߌ ߟߋ߬ ߟߊ߫߸ ߖ߭ߋ.ߍߡ.ߘߋ ߡߐ߱ ߟߎ߫ ߞߵߊ߬ߟߎ߬ ߟߊ߫ ߡߐ߰ ߕߊ߲ ߠߊߘߏ߲߬ ߞߊ߬ ߢߣߊߕߊߟߌ ߞߍ߫߸ ߞߊ߬ ߞߊ߬ߝߏ߬ߙߋ߲߬ߕߌ߮ ߟߊߛߌ߰.
<<ߊ߲ ߕߏ߫ ߘߊ߫ ߏ߬ ߟߋ߬ ߘߐ߫߸ ߊ߬ߟߎ߬ ߓߘߊ߫ ߡߐ߰ ߁߀ ߏ߬ ߟߎ߬ ߟߊߘߏ߲߬ ߓߏ߲ ߞߣߐ߫߸ ߞߴߏ߬ ߟߎ߬ ߦߋ߫ ߝ߭ߐߕ ߞߍ߫، ߣߌ߫ ߡߐ߰ ߁߂ ߟߋ߬ ߛߌߛߍ߲߬߸ ߏ߬ ߞߊ߫ ߢߌ߲߬߸ ߓߊ߬ߙߌ߫߸ ߡߐ߰ ߁߀ ߦߋ߫ ߥߊ߫ ߡߐ߰ ߂߃ ߟߊ߫ ߓߊ߯ߙߊ ߞߍ߫ ߊ߬ ߞߐߝߍ߬؟.>> ߊ߬ ߞߵߊ߬ ߖߍ߬ߘߍ߫ ߢߌ߬ߣߌ߲߬ߞߊ߫ ߏ߬ ߟߊ߫.
ߡߎߛߊ߫ ߞߊ߲ߕߍ߫ ߞߊ߲߫ ߞߏ߫ ߦߙߐ ߡߍ߲ ߞߣߐ߬ߘߐ߬ߝߟߌ ߦߴߊ߬ߟߋ߬ ߟߊ߫߸ ߛߊ߬ߙߌ߬ߦߊ߫ ߢߌ߬ߡߊ߲߫ ߦߋ߲߬߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߢߣߊߕߊߟߌ ߘߌ߫ ߛߋ߫ ߞߍ߫ ߟߊ߫ ߛߌ߰ ߞߋߟߋ߲ ߓߟߏ߫߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߣߌ߫ ߡߍ߲ ߦߋ߫ ߜߊ߬ߛߊ ߡߊ߬߸ ߏ߬ ߟߎ߬ ߢߊ߫ ߕߍ߫ ߜߍ߫ ߘߐ߫، ߤߊ߲߯ ߞߵߏ߬ ߢߣߊߕߊߟߌ ߞߍ߫߸ ߞߊ߬ ߞߊ߬ߝߏ߬ߙߋ߲߬ߕߌ߮ ߟߊߛߌ߰߸ ߞߵߊ߬ ߛߙߍߞߍ ߝߣߊ߫ ߟߊߛߌ߰.
ߡߎߛߊ߫ ߞߊ߲ߕߍ߫ ߞߵߊ߬ ߦߌ߬ߘߊ߬ ߌߞߐ߫߸ ߞߏ߫ ߟߊ߬ߡߌߣ ߟߊߓߏ߫ ߞߙߎ߬ߡߊ߬ ߡߍ߲ ߠߊߛߌ߰ ߛߊ߲ ߦߋ߫ ߕߋ߲߬ ߞߵߊ߬ ߞߍ߫ ߞߊ߲ߞߊ߲߫ ߞߊ߬ߝߏ߬ߙߋ߲߬ߕߌ߮ ߘߌ߫߸ ߏ߬ ߣߊ߬ ߘߊ߫ ߜߍ ߘߐ߫ ߦߋ߲߬߸ ߞߊ߬ ߛߐ߬ߘߐ߲߬ ߢߣߊߕߊߟߌ ߓߊ߯ߙߊ ߟߎ߬ ߘߐ߫ ߤߊ߲߯ ߞߵߊ߬ ߓߊ߲߫، ߞߵߏ߬ ߟߊ߫ ߥߛߊ߬ߘߋ߲ ߘߏ߫ ߞߊ߲߬߸ ߊ߬ ߣߌ߫ ߟߊ߱ߦߌ߬ ߞߋߕߊ߬߸ ߏ߬ ߡߍ߲ ߦߋ߫ ߞߊ߲ߞߊ߲߫ ߞߊ߬ߝߏ߬ߙߋ߲ ߛߙߍߞߍ ߘߏ߫ ߘߌ߫.
ߡߎߛߊ߫ ߞߊ߲ߕߍ߫ ߞߵߏ߬ ߦߋ߫ ߛߊ߬ߙߌ߬ߦߊ߬ ߛߐߛߐ ߟߋ߬ ߘߌ߫߸ ߡߍ߲ ߕߍ߫ ߓߍ߲߬، ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߌߟߋ ߟߊ߫ ߛߏ߫ ߞߣߐ߫ ߡߐ߮ ߟߎ߬ ߓߊ߲߫ ߛߊ߲ ߠߋ߬ ߌ ߟߊߛߌ߰ ߟߊ߫ ߣߌ߲߬߸ ߡߎ߲߬ ߠߊ߫ ߏ߬ ߘߐ߫ ߌ ߦߋ߫ ߣߊ߬ ߟߴߌ ߛߋ߲߭ߓߌ߬ߟߊ߬ ߟߊ߫ ߦߙߐ߫ ߜߘߍ߫ ߕߊ ߘߐ߫ ߝߊ߲߬ߞߊ ߟߊ߫߸ ߞߵߊ߬ ߛߐ߬ߘߐ߲߬ ߌ ߟߊ߫ ߛߏ߫ ߞߣߐ߫ ߞߏ߫ ߕߍ߫؟>> ߡߎߛߊ߫ ߞߊ߲ߕߍ߫ ߞߵߏ߬ ߟߋ ߢߌ߬ߣߌ߲߬ߞߊ߬ߟߌ ߞߍ߫߸ ߞߊ߬ ߓߍ߲߬ ߞߊ߲ߞߊ߲߫ ߞߊ߬ߝߏ߬ߙߋ߲߬ߕߌ߰ ߞߎߘߊ ߟߊ߫ ߞߏ ߡߊ߬.
ߡߎߛߊ߫ ߞߊ߲ߕߍ߫ ߞߵߊ߬ ߦߌ߬ߘߊ߬߸ ߞߏ߫ ߞߊ߲ߞߊ߲߫ ߣߊ߬ߓߊ߰ߕߐ ߢߌ߲߬ ߠߎ߫ ߞߵߊ߬ ߡߊߛߌߟߊ߲߫߸ ߞߊ߬ ߘߐ߬ߛߌ߬ߟߊ߲߬ߠߌ߲߬ ߞߊ߲ ߠߎ߬ ߝߐ߫ ߊ߬ ߡߊ߬.
ߊ߬ ߞߵߊ߬ ߝߐ߫ ߞߏ߫ ߊ߬ߟߎ߬ ߓߊ߲߫ ߘߊ߫ ߞߊ߬ ߞߎߡߊ ߘߏ߫ ߟߎ߫ ߝߐ߫ ߊ߬ ߕߟߏߞߘߐ߫߸ ߛߴߊ߬ ߘߌ߫ ߘߌ߬ߢߍ߬ ߢߊ ߡߍ߲ ߡߊ߬߸ ߞߵߊ߬ ߕߏ߫ ߖ߭ߋ.ߍߡ.ߘߋ ߟߊ߫ ߡߐ߱ ߦߋ߫ ߦߟߍ߬، ߊ߬ ߟߊ߫ ߝߐߟߌ߫ ߘߐ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߛߐ߬ߘߐ߲߬ ߣߊ ߕߐ߮ ߝߐ߫ ߘߴߊ߬ ߦߋ߫߸ ߊ߬ ߣߴߊ߬ ߘߐ߯ߡߛߏ߫߸ ߞߏ߫ ߣߴߊ߬ ߛߐ߲߬ ߘߊ߫߸ ߊ߬ߟߎ߬ ߘߌ߫ ߞߏ ߘߏ߫ ߟߎ߫ ߞߍ߫ ߊ߬ ߦߋ߫.
ߓߊ߬ߙߵߊ߬ ߡߊ߫ ߛߐ߲߬ ߢߊ߫ ߛߌ߫ ߡߊ߬، ߊ߬ ߞߊ߲߫ ߞߏ߫: <<ߡߐ߰ ߄߀߀ ߣߌ߫ ߞߐ߸ ߏ߬ ߟߋ ߦߋ߫ ߞߏߟߊߕߍ߯ ߞߋߟߋ߲ ߘߌ߫߸ ߏ߬ ߡߐ߰ ߛߌ߰ ߁߃߸ ߏ߬ ߓߍ߯ ߣߐ߬ ߊ߬ߟߎ߬ ߟߊ߫ ߟߊߒߘߦߊ ߟߊ߫ ߊ߲ߠߎ߬ ߡߐ߰ ߁߃ ߣߍ߲ ߣߌ߲߬ ߠߋ߬ ߘߐ߫߸ ߞߴߌߟߋ ߏ߬ ߟߎ߫ ߖߊ߲߬ߝߊ߫ ߌ ߞߋߟߋ߲߫ ߠߊ߫ ߣߊ߬ߕߊ ߡߊ߬߸ ߊߟߊ߫ ߒ ߞߛߌ߫ ߏ߬ ߡߊ߬.>> ߊ߬ ߞߵߏ߬ ߦߌ߬ߘߊ߬..
ߡߎߛߊ߫ ߞߊ߲ߕߍ߫ ߞߵߊ߬ ߦߌ߬ߘߊ߬߸ ߞߏ߫ ߞߊ߲ߞߊ߲߫ ߣߊ߬ߓߊ߰ߕߐ ߏ߬ ߟߎ߫ ߞߊ߬ ߞߎߡߊ߫ ߛߌߦߊߡߊ߲߫ ߝߐ߫ ߊ߬ ߕߟߏߞߘߐ߫߸ ߛߴߊ߬ ߘߌ߫ ߘߌ߬ߢߍ߬ ߢߊ ߡߍ߲ ߡߊ߬، ߊ߬ ߞߏ߬ߣߌ߲ ߡߴߏ߬ ߘߊ߬ߟߎ߫ ߦߌ߬ߘߊ߫ ߒ߬ ߠߊ߫ ߜߍ ߘߐ߫߸ ߣߌ߲߬ ߓߍ߯ ߦߴߊ߬ ߖߍ߬ߘߍ ߘߊߘߐ߫ ߞߊ߲ ߠߋ߬ ߘߌ߫.
ߊ߬ ߞߵߊ߬ ߝߐ߫ ߞߏ߫ ߊ߬ߟߎ߬ ߞߐߜߍ߲߫ ߘߊ߫ ߛߌߟߊ ߞߊ߲߬߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߦߴߊ߬ ߝߍ߬ ߞߊ߬ ߥߊ߫ ߞߊ߲ߞߊ߲߫ ߞߊ߬ ߣߌ߲߬ ߞߏ ߢߊߦߌ߬ߘߊ߫ ߊ߬ߟߎ߬ ߛߊ߲ߘߐ߫ ߡߐ߮ ߟߎ߬ ߟߊ߫.
ߡߎߛߊ߫ ߞߊ߲ߕߍ߫ ߞߊ߲ߕߍ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߞߐߜߍ ߘߊߡߌ߬ߣߊ߬ ߘߊ߫ ߛߐ߬ߡߐ ߺ ߞߘߐ߫ ߟߋ߬، ߊ߬ߟߎ߬ ߛߋ ߥߏ߬ߟߏ߲߬ߘߎ߯߸ ߣߊ߲߬ߕߌ߮ ߘߏ߫ ߞߊ߬ ߡߊ߬ߙߌ߬ߝߊ ߟߐ߬ ߊ߬ ߟߊ߫ ߦߋ߲߬، ߘߓߊ߬ߘߎ߯ ߘߏ߲߬ߘߊ ߟߊ߫ ߡߎ߬ߕߎ߲߬ ߛߊ߫߸ ߣߊ߲߬ߕߌ߮ ߘߏ߫ ߣߊ߬ ߘߴߊ߬ ߞߍ߫ ߦߏ߫ ߊ߬ ߦߴߊ߬ ߟߊ߫ ߔߏߔߏ ߜߎ߫ ߟߊ߫.
ߊ߬ ߝߣߊ߫ ߖߌ߰ ߢߊ ߟߋ߬ ߞߍߣߴߏ߬ ߘߌ߫ ߞߵߊ߬ ߞߎ߲߭ߞߊ߬ߙߌ߬ߝߴߊ߬ ߟߊ߫ ߡߐ߱ ߘߏ߫ ߓߘߊ، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߥߊ߫ ߘߴߊ߬ ߛߊ߬ߡߊ߲߫ ߝߊ߲߬ߞߊ ߟߊ߫ ߦߋ߲߬: <<ߒ ߞߊ߬ ߒ ߜߊ߲߫ ߦߋ߲߬߸ ߞߊ߬ ߒ ߞߊ߬ߙߌ߬ߝߊ߫ ߡߐ߰ ߟߎ߬ ߟߊ߫ ߦߋ߲߬߸ ߊ߬ߟߎ߫ ߣߊ߬ ߘߴߊ߬ߟߎ߬ ߗߍ߫ ߒ ߞߊ߲߬߸ ߞߊ߬ ߒ ߛߊ߬ߡߊ߲ߛߊ߬ߡߊ߲߬߸ ߝߏ߫ ߞߊ߬ ߒ ߠߊ߫ ߝߊ߰ߣߌ߲ ߝߙߊ߫. ߞߊ߬ ߓߊ߲߫ ߞߊ߬ ߒ ߜߊ߬ߛߌߜߊ߬ߛߌ ߘߊߡߌ߬ߣߊ߬߸ ߞߊ߬ ߒ ߕߊ߬ ߞߊ߬ ߒ ߠߊߝߟߌ߬ ߡߐ߲ߓߟߌ ߞߣߐ߫.>> ߊ߬ ߞߵߏ߬ ߦߌ߬ߘߊ߬.
ߊ߬ߟߎ߫ ߞߵߊ߬ ߟߊ߫ ߜߋߟߋ߲ߜߋߟߋ߲ ߡߌ߬ߣߴߊ߬ ߟߊ߫߸ ߊ߬ ߞߊ߬ ߜߍ߲ߠߌ߲߫ ߦߙߐ ߟߎ߬ ߖߌ߬ߦߊ߬ߖߟߎ߬ߦߊ߫ ߡߍ߲ ߠߊ߫߸ ߊ߬ߟߏ߫ ߞߵߏ߬ ߡߌ߬ߣߴߊ߬ ߟߊ߫ ߞߵߊ߬ ߟߊ߫ ߖߌ߬ߦߊ߬ߖߟߎ߬ߦߊ߬ߟߌ߬ ߞߍߣߍ߲ ߠߎ߬ ߖߐ߬ߛߌ߫ ߊ߬ ߞߣߐ߫߸ ߞߣߊ߬ߕߏ߫ ߊ߬ ߓߌ߬ߟߊ߬ ߟߊ߫.
ߊ߲ ߠߊ߫ ߛߍߝߍ߲ߘߊ ߞߵߊ߬ ߡߊߝߟߍ߫ ߡߎߛߊ߫ ߞߊ߲ߕߍ߫ ߟߊ߫ ߡߐ߰ ߡߊߝߌ߲߬ߣߍ߲ ߢߌ߲߬ ߠߎ߬ ߞߟߌ߫ ߞߏ ߘߐ߫߸ ߞߊ߲ߞߊ߲߫ ߞߊ߬ߝߏ߬ߙߋ߲߬ߕߌ߮ ߦߴߏ߬ ߟߋ ߘߌ߫߸ ߟߊ߬ߡߌߣ ߟߊߓߏ߫ ߞߙߎ߬ߡߊ߬، ߓߊ߬ߙߌ߬߸ ߊ߲ ߡߊ߫ ߛߴߊ߬ߟߎ߬ ߡߊߛߐ߬ߘߐ߲߬ ߠߊ߫ ߞߊ߬ ߓߍ߲߬ ߞߎߡߘߊ ߣߌ߲߬ ߛߓߍ߫ ߕߎߡߊ ߡߊ߬، ߣߴߊ߬ߟߎ߫ ߣߊ߬ ߘߊ߫ ߡߍ߲ ߝߐ߫ ߞߐߟߊ߫߸ ߏ߬ ߘߌߣߊ߬ ߢߊߦߌ߬ߘߴߊߟߎ߫ ߟߊ߫ ߟߌ߬ߤߟߊ߫ ߣߊ߬ߕߐ ߟߎ߬ ߘߐ߫.
Aucun commentaire pour le moment.