ߢߣߊߕߊߟߌ߫ ߝߌ߬ߟߊ߬ߣߍ߲ ߡߍ߲ ߦߴߌߘߐ߫ ߖߌ߬ߣߍ߬ ߞߣߐ߫߸ ߣߊߟߌ߬ߡߎ߲߫ ߥߛߊ߬ߘߋ߲߬ߧߊ߬ ߛߎߥߊ߲ߘߟߌ ߣߌ߫ ߞߊ߬ߝߏ߬ߙߋ߲߬ ߛߎߥߊ߲ߘߟߌ ߘߌ߫߸ ߏ߬ ߟߎ߬ ߦߴߊ߬ ߞߊ߲߬ ߕߐ߲߬ߓߊ߬ ߞߊ߲ߛߊ߫ ߛߏ ߞߣߐ߫ ߂߁ߙߋ߲߅߀ ߡߊ߬ ߝߛߊߦߌ߫، ߕߐ߲߬ߓߊ߬ ߞߊ߲ߛߊ߫ ߣߌ߲߬ ߦߋ߫ ߡߙߊ߬ߘߊ߬ߙߋ߲ ߠߋ߬ ߘߌ߫ ߛߌ߯ߙߌ߲߫ ߡߙߊ߬ߘߊ߬ߓߊ ߘߐ߫ ߞߎߘߍ߫ ߁߆߀ ߖߊ߬ߕߋ߬ ߟߊ߫، ߖߌ߬ߦߊ߬ߖߟߎ ߡߍ߲ ߠߎ߬ ߟߊߛߐ߬ߘߐ߲߬ ߘߴߊ߲ ߠߊ߫ ߛߍߝߍ߲ߘߊ ߓߟߏ߫ ߂߁ߕߎߡߊ߅߀ ߟߊ߫߸ ߏ߬ ߞߵߊ߬ ߛߐ߬ߘߐ߲߫ ߠߋ߬ ߢߣߊߕߊߟߌ ߦߴߊ߬ ߕߊߥߛߎ ߘߐ߫ ߦߋ߲߬، ߊ߬ ߘߏ߲߬ ߝߐ߫ ߘߊ߫ ߟߋ߬ ߞߏ߫ ߢߣߊߕߊߟߌ ߞߊ߫ ߞߊ߲߫ ߞߊ߬ ߟߊߟߐ߬ ߁߈ߕߎߡߊ ߟߋ߬ ߟߊ߫߸ ߣߴߏ߬ ߞߕߐߙߐ߲ߘߓߐ߫ ߘߴߊ߬ ߞߐ߫ ߞߵߊ߬ ߟߊߕߊ߯ ߁߉ߕߎߡߊ߃߀ ߘߐ߫.

ߘߎ߰ ߡߐ߮ ߛߌߦߊߡߊ߲߫ ߘߊߘߐߢߌ߬ߣߌ߲߬ߞߊ߬ ߘߴߊ߲ ߓߟߏ߫ ߜߎ߬ߕߙߎ ߘߐ߫߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌ߫ ߛߓߍߘߊ ߟߎ߬ ߡߊ߫ ߟߊߞߵߊ߬ ߕߎ߬ߡߊ ߟߊ߫߸ ߞߵߏ߬ ߞߎ߲߭ ߞߍ߫ ߢߣߊߕߊߟߌ߫ ߕߍ߯ߟߍ߲ ߠߎ߬ ߟߊߛߐ߬ߘߐ߲߬ߓߊߟߌߦߊ ߘߌ߫، ߊ߬ߟߎ߬ ߟߊ߫ ߟߞߊ߬ߟߌ߬ ߞߊ߲߬ߠߊ ߟߎ߬ ߘߐ߫߸ ߢߣߊߕߊߟߌ ߘߊߡߌ߬ߣߊ߬ ߘߊ߫ ߕߎ߬ߡߊ߬ ߓߐߣߍ߲߫ ߢߐ߲߰ ߡߊ ߟߎ߫ ߟߋ߬ ߞߘߐ߫߸ ߘߏ߫ ߟߎ߫ ߘߊߡߌ߬ߣߊ߬ ߘߊ߫ ߁߈ߕߎߡߊ߸ ߘߏ߫ ߟߎ߫ ߁߉ߕߎߡߊ߸ ߘߏ߫ ߜߘߍ߫ ߟߎ߫ ߖߍ߬ߘߍ߸ ߂߀ߕߎߡߊ.

ߊ߬ߟߋ߬ ߡߙߊ߬ߘߊ߬ߙߋ߲ ߘߎ߰ߘߋ߲ ߘߏ߫ ߞߵߊ߬ ߦߌ߬ߘߊ߬ ߞߏ߫: <<ߞߊ߬ߦߌ߯ ߛߐ߱ߡߊ߬߸ ߊ߲ ߧߋ߫ ߢߣߊߕߊߟߌ߫ ߕߍ߯ߟߍ߲ ߡߊߞߐ߬ߣߐ߲ ߞߊ߲߬.>>  ߘߎ߰ߘߋ߲ ߠߎ߬ ߦߴߊ߬ ߦߌ߬ߘߊ߬ ߟߊ߫ ߝߣߊ߫߸ ߞߏ߫ ߤߊߞߍߕߏ߫ ߢߣߊߕߊߟߌ߫ ߕߍ߯ߟߍ߲߫ ߞߏ ߝߙߋߞߋ߫ ߘߊ߫߸ ߊ߬ߟߎ߬ ߟߊ߫ ߝߊ߰ߡߊ ߟߎ߫ ߞߵߊ߬ ߝߐ߫ ߞߏ߫ ߞߊ߬ ߢߣߊߕߊߟߌ߫ ߕߍ߯ߟߍ߲ ߟߊߒߡߊ ߟߎ߬ ߓߊߓߌ߬ߟߊ߬߸ ߛߊ߫ ߢߣߊߕߊߟߌ ߘߌ߫ ߞߍ߫ ߏ߬ ߟߊ߫. ߊ߲ ߞߏ߬ߣߌ߲ ߡߊ߫ ߟߌ߬ߤߟߊ ߏ߬ ߢߊߢߌߣߌ߲߫ ߊ߬ ߢߊ ߡߊ߬߸ ߞߵߊ߬ ߟߐ߲߫ ߣߌ߫ ߛߥߊ߬ߓߊ ߟߵߏ߬ ߘߌ߫.

ߊ߲ ߠߊ߫ ߛߍߝߍ߲ߘߊ ߛߋ߫ ߘߊ߫ ߕߐ߲߬ߓߊ߬ ߞߊ߲ߛߊ߫ ߝߊ߰ߡߊ ߘߏ߫ ߟߊߛߐ߬ߘߐ߲߬ ߠߊ߫߸ ߡߍ߲ ߞߵߊ߬ ߟߊߢߌߣߌ߲߫ ߞߏ߫ ߊ߬ ߕߴߊ߬ ߝߍ߬ ߞߊ߬ ߞߎߡߊ߫ ߝߊ߲ߞߊߢߊ߲߫ ߓߟߏ ߡߊ߬߸ ߝߏ߫ ߜߎ߬ߕߙߎ ߞߣߐ߫، ߏ߬ ߞߵߊ߬ ߦߌ߬ߘߊ߬ ߞߏ߫ ߟߊ߬ߣߐ߮ ߘߏ߲߬ ߘߊ߫ ߞߏ ߟߎ߬ ߘߊߡߌ߬ߣߊ ߘߐ߫ ߝߋߎ߫߸ ߓߊ߬ߙߵߊ߬ ߟߊߥߙߊ߬ߣߍ߲߫ ߘߎ߰ߘߋ߲ ߠߎ߬ ߓߟߏ߫ ߢߊ ߡߍ߲ ߛߊ߫߸ ߊ߬ߟߋ ߞߊ߲߫ ߞߏ߫ ߛߥߊ߬ߓߊ߬ ߕߴߏ߬ ߟߋ ߘߐ߫.

<<ߕߎ߬ߢߊ ߟߋ߬ ߝߋߎ߫߸ ߟߊ߬ߣߐ߮ ߘߏ߲߬ ߘߊ߫ ߓߊ߯ߙߊ ߘߊߡߌ߬ߣߊ ߘߐ߫، ߏ߬ ߟߋ ߞߵߊ߬ ߞߍ߫߸ ߊ߲ ߛߋ߫ ߘߴߊ߲ ߛߋߞߏ ߞߍ߫ ߟߊ߫ ߏ߬ ߘߐ߫߸ ߢߣߊߕߊߟߌ߫ ߕߍ߯ߟߍ߲ ߡߍ߲ ߓߊ߯ ߟߊߛߐ߬ߘߐ߲߬ ߊ߲ ߓߟߏ߫ ߌߞߘߐ߫߸ ߊ߲ ߘߴߏ߬ ߟߊߕߊ߯ ߢߣߊߕߊߟߌ߫ ߛߓߍߘߊ ߟߊ߫، ߊ߬ ߓߍ߯ ߞߍ߫ ߘߊ߫ ߢߐ߲߮ ߞߐ߫ ߕߋ߲߬ ߠߋ߬.>> ߊ߬ ߞߵߏ߬ ߦߌ߬ߘߊ߬.

ߊ߬ߟߋ ߟߊ߫ ߝߐߟߌ߫ ߘߐ߫߸ ߛߓߍߘߊ߫ ߝߟߐ ߟߎ߬ ߞߊ߬ ߓߊ߯ߙߊ ߘߊߡߌ߬ߣߊ߬ ߁߀ߕߎߡߊ ߟߋ߬ ߟߊ߫߸ ߝߏߦߌ߬ ߞߏ߬ߣߌ߲ ߡߊ߫ ߓߊ߯ߙߊ ߘߊߡߌ߬ߣߊ߬ ߁߀ߕߎߡߊ ߢߍ߫، <<ߕߍ߯ߟߍ߲ ߡߍ߲ ߠߎ߬ ߟߊߛߐ߬ߘߐ߲߬ ߘߊ߫߸ ߏ߬ ߟߎ߬ ߘߐߝߘߊ߫ ߘߊ߫ ߞߊ߬ ߊ߬ߟߎ߫ ߣߊ߬ ߢߊ ߟߋ߬ ߡߊ߬ ߢߐ߲߮ ߞߐ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌ ߦߴߌߘߐ߫ <<ߡߊ߬ߝߊ ߟߋ߬ ߘߐ߫.>> ߞߏ߫ ߊ߬ߟߎ߬ ߡߊ߫ ߖߘߐ߬ߞߏ߫ ߛߐ߬ߘߐ߲߫ ߊ߬ ߘߐ߫.

ߊ߬ ߟߊ߫ ߦߟߌߟߊߕߍ߯ߟߌ ߏ߬ ߓߍ߯ ߣߴߊ߬ ߕߊ߫߸ ߟߌ߬ߤߟߊ ߡߍ߲ ߠߎ߬ ߦߋ߫ ߛߐ߬ߘߐ߲߬ ߠߴߊ߲ ߓߟߏ߫ ߘߎ߰ߘߋ߲ ߠߎ߬ ߟߊ߫߸ ߏ߬ ߟߎ߬ ߣߌ߫ ߝߊ߰ߡߊ ߟߎ߬ ߟߊ߫ ߞߎߡߊ ߟߎ߬ ߦߋ߫ ߝߏ߫ ߟߊ߫ ߢߐ߲߮ ߞߐ߫ ߞߏߛߓߍ߫، ߖߌ߬ߦߊ߬ߖߟߎ ߡߍ߲ ߠߊߛߐ߬ߘߐ߲߬ ߘߴߊ߲ ߓߟߏ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߂߁ߕߎߡߊ߅߀ ߞߵߊ߬ ߛߐ߬ߘߐ߲߫ ߠߋ߬߸ ߡߐ߱ ߟߎ߬ ߦߋ߫ ߢߣߊߕߊߟߌ ߞߊ߲߬ ߘߌ߬ߓߌ ߘߐ߫߸ ߝߏ߫ ߘߓߌ߬ߛߐ߮ ߡߍ߲ ߘߐߙߐ߲߫ ߠߊߡߍߣߍ߲ߣߍ߲߫ ߊ߬ߟߎ߬ ߓߟߏ߫.

ߊ߲ ߧߋ߫ ߣߌ߲߬ ߛߓߍ ߞߊ߲߬ ߕߎ߬ߡߊ ߡߍ߲ ߠߊ߫ ߣߌ߲߬߸ ߢߣߊߕߊߟߌ ߓߘߊ߫ ߟߊߟߐ߬ ߘߌ߲߬ߞߌߙߊ ߝߊ߬ߡߊ ߟߎ߬ ߟߊ߫ ߖߊ߬ߡߊߙߌ ߟߊ߫߸ ߓߊߏ߬ <<ߡߐ߰ ߕߍ߫ ߛߊ߬ߙߌ߬ߦߊ ߛߊ߲ߘߐ߫>>

ߏ߬ ߟߋ ߝߐ߫ ߘߊ߫ ߘߌ߲߬ߞߌߙߊ ߝߊ߰ߡߊ ߣߌ߲߬ ߓߟߏ߫߸ ߏ߬ ߘߏ߲߬ ߝߣߊ߫ ߟߊߛߙߋߦߊ߫ ߘߊ߫ ߘߎ߰ߘߋ߲ ߠߎ߬ ߓߟߏ߫߸ ߞߏ߫ <<ߞߟߌߟߌ ߓߘߊ߫ ߞߍ߫ ߢߣߊߕߊߟߌ߫ ߛߓߍߘߊ ߟߎ߬ ߟߊ߫߸ ߞߊ߬ ߛߎߥߊ߲ߘߟߌ ߟߊߟߐ߬>> ߊ߬ ߦߌ߬ߘߊ߬ ߘߊ߫ ߞߏ߫ ߢߣߊߕߊߟߌ ߡߊ߫ ߓߊ߲߫߸ ߓߊ߬ߙߵߊ߬ ߟߊߟߐ߬ߣߍ߲߫ ߠߋ߬.