ߢߣߊߕߊߟߌ ߞߐߝߟߌ߫ ߘߍ߲߬ߞߍ߬ߕߎ߬ߣߍ߲ ߡߍ߲ ߠߊߓߐߣߍ߲߫߸ ߘߋ.ߖ߭ߋ.ߕߋ (ߘߝ߭ߋߟߏߔߋߡߊ߲ ߜ߭ߊ߬ߙߊ߲ ߕߐ߲߬ߓߊ߫) ߞߊ߬ ߞߊ߲ߢߊ߫ ߇߆߃ ߟߋ߬ ߛߐ߬ߘߐ߲߬߸ ߛߌ߰ߟߊ߲߫ ߃، ߕߐ߲߬ߓߊ߬ ߞߊ߲ߛߊ߫ ߟߊߥߙߎߞߌ ߘߋ߲ߡߌߛߍ߲ ߠߎ߬ ߞߊ߬ ߞߊ߲ߢߊ߫ ߁ ߂߄߃ ߛߐ߬ߘߐ߲߬߸ ߛߌ߰ߟߊ߲߬ ߄ ߠߵߏ߬ ߘߌ߫، ߖ߭ߋ.ߍߡ.ߘߋ ߛߊ߫߸ ߏ߬ ߞߊ߬ ߞߊ߲ߢߊ߫ ߂ ߇߁߂ ߟߋ߬ ߛߐ߬ߘߐ߲߬߸ ߛߌ߰ߟߊ߲߬ ߁߀.

ߓߊ߬ߙߌ߬߸ ߞߐߝߟߌ ߏ߬ ߟߋ ߡߊ߫ ߓߍ߲߬ ߛߏ߫ ߞߣߐ߫ ߡߐ߮ ߛߌߦߊߡߊ߲߫ ߡߊ߬߸ ߞߵߏ߬ ߞߎ߲߭ ߞߍ߫ ߝߛߏ߬ߝߛߊ߬ ߛߌߦߊߡߊ߲߫ ߘߌ߫ ߢߣߊߕߊߟߌ ߘߐ߫، ߡߎߛߑߕߝߊ߬ ߓߙߋߕߋ߫ ߡߍ߲ ߦߋ߫ ߘߋ.ߖ߭ߋ.ߕߋ ߛߌ߲߬ߝߏ߲ ߘߏ߫ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌ ߡߊ߫ ߞߍ߫ ߊ߬ ߢߌ߬ߡߊ ߟߊ߫ ߤߊߟߌ߬ ߞߋߟߋ߲߫.

<<ߓߍ߯ ߞߵߊ߬ ߟߐ߲߫ ߞߏ߫ ߢߣߊߕߊߟߌ߫ ߡߊ߫ ߞߍ߫ ߕߐ߲߬ߓߊ߬ ߞߊ߲ߛߊ߫، ߊ߲ ߓߍ߯ ߞߵߊ߬ ߟߐ߲߫ ߕߊߦߌ߫߸ ߞߏ߫ ߢߣߊߕߊߟߌ ߡߊ߫ ߘߊߡߌ߬ߣߊ߬ ߖߏߣߊ߫، ߊ߬ ߘߊߡߌ߬ߣߊ߬ ߘߊ߫ ߁߇ߕߎߡߊ߅߀ ߟߋ߬ ߡߊ߬߸ ߞߵߊ߬ ߛߌ߰ ߂߁ߕߎߡߊ߃߀ ߟߊ߫߸ ߊ߬ߟߎ߫ ߞߊ߬ ߢߣߊߕߊߟߌ ߟߊߟߐ߬.>> ߊ߬ ߞߵߏ߬ ߦߌ߬ߘߊ߬.

ߊ߬ ߓߊ߲߫ ߘߊ߫ ߞߵߊ߬ ߟߴߊ߬ ߟߊ߫ ߞߎߡߊ ߞߊ߲߬ ߌߞߐ߫߸ ߞߏ߫ ߢߣߊߕߊߟߌ߫ ߕߍ߯ߟߍ߲߫ ߛߌߦߊߡߊ߲߫ ߡߊ߫ ߥߊ߫، ߊ߬ ߟߊ߫ ߝߐߟߌ߫ ߘߐ߫ ߖߍ߬ߘߍ߸ ߕߍ߯ߟߍ߲ ߟߊߒߡߊ ߡߍ߲ ߠߎ߬ ߕߍ߬ߘߍ߫ ߦߋ߲߬߸ ߏ߬ ߟߎ߬ ߓߊߓߌ߬ߟߊ߬ ߘߊ߫ ߟߋ߬ ߞߵߊ߬ߟߎ߬ ߘߐߝߘߊ߫ ߜߍ߬ߘߍ߲߬ ߓߟߏ ߡߊ߬.

<<ߊ߬ߟߎ߫ ߞߊ߬ ߢߣߊߕߊߟߌ߫ ߕߍ߯ߟߍ߲ ߡߍ߲ ߠߎ߬ ߓߊߓߌ߬ߟߊ߫ ߞߵߊ߬ߟߎ߬ ߘߐߝߘߊ߫ ߜߍ߬ߘߍ߲߬ ߓߟߏ ߡߊ߬߸ ߏ߬ ߝߣߊ߫ ߕߎ߲߬ ߡߊ߲߫ ߛߌߦߊ߫، ߊ߲ ߡߊ߫ ߓߍ߲߬ ߞߐߝߟߌ߫ ߟߊߓߐߣߍ߲ ߡߊ߬ ߝߋߎ߫، ߊ߲ ߠߊ߫ ߞߙߎߞߊ߸ ߡߐ߰ ߛߌ߫ ߡߊ߫ ߥߊߘߌ߫ ߘߏ߲߬ ߊ߲ߠߎ߬ ߘߐ߫߸ ߊ߲ ߖߍ߬ߘߍ ߟߋ߬ ߞߵߊ߬ ߣߊ߲߬ߝߟߏ߬ߦߊ߫، ߏ߬ ߘߐ߫߸ ߘߋ.ߖ߭ߋ.ߕߋ ߡߊ߫ ߓߍ߲߬ ߞߐߝߟߌ ߡߊ߬ ߡߎ߰ߡߍ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߡߎߛߊ߫ ߓߙߋߕߋ߫ ߝߣߊ߫ ߓߏ߬ߙߌ߬ ߘߊ߫ ߛߌߟߊ߫ ߞߋߟߋ߲ ߏ߬ ߟߋ ߞߊ߲߬، ߊ߬ߟߋ ߞߊ߲߫ ߞߏ߫ ߞߏ߫ ߛߌߦߊߡߊ߲߫ ߠߋ߬ ߕߊ߬ߡߌ߲߬ ߘߊ߫ ߕߐ߲߬ߓߊ߬ ߞߊ߲ߛߊ߫ ߢߣߊߕߊߟߌ ߘߐ߫߸ ߡߍ߲ ߕߍ߫ ߞߏ߫ ߓߘߍ߫ ߘߌ߫، <<ߞߊ߬ ߓߍ߲߬ ߕߐ߲߬ߓߊ߫ ߢߣߊߕߊߟߌ߫ ߞߏ ߡߊ߬߸ ߊ߬ ߞߍߣߍ߲߫ ߜߍߙߍ߲ߞߍߟߌ߫ ߢߣߊߕߊߟߌ ߟߋ߬ ߘߌ߫، ߞߎ߲߬ߠߊ߬ߛߌ߮ ߕߎ߲߬ ߦߴߊ߬ ߝߐ߫ ߊ߲ ߧߋ߫ ߞߋߟߋ߲ߘߌ߫߸ ߞߏ߫ ߢߣߊߕߊߟߌ߫ ߕߴߦߋ߲߬߸ ߏ߬ ߘߌߡߴߊ߲ ߧߋ߫ ߞߊ߬ ߕߊ߬ߡߌ߲߬ ߞߏ߫ ߞߎ߲߬ߠߊ߬ߛߌ߮ ߦߴߊ߲ ߠߊ߫ ߥߊߘߌ ߡߌ߬ߣߊ߬ ߞߵߊ߬ ߘߐߖߊߛߌ߫ ߜߍߙߍ߲ߞߍߟߌ߫ ߢߣߊߕߊߟߌ ߢߌ߲߬ ߠߊ߫.>> ߊ߬ ߞߵߏ߬ ߦߌ߬ߘߊ߬.

ߊ߬ ߦߴߊ߬ ߦߌ߬ߘߊ߬ ߟߊ߫ ߝߣߊ߫߸ ߞߏ߫ ߛߏ ߓߍ߲߬ߣߍ߲߫ ߡߐ߱ ߡߍ߲ ߡߊ߬߸ ߏ߬ ߡߊ߫ ߛߎߥߊ߲ߘߌ߫، <<ߊ߬ߟߎ߫ ߣߐ߬ ߡߐ߱ ߟߋ߬ ߟߊߛߎߘߊ߲߫ ߠߊ߫߸ ߡߍ߲ ߡߊ߲߫ ߘߌ߫ ߛߏ߫ ߞߣߐ߫ ߡߐ߮ ߟߎ߬ ߦߋ߫ ߊ߬ߟߎ߫ ߞߎ߲߬ߠߊ߫، ߊ߲ ߕߴߊ߬ ߝߍ߬ ߝߋߎ߫، ߊ߲ ߧߴߊ߬ ߝߐ߫ ߟߊ߫ ߞߎ߲߬ߠߊ߬ߛߌ߮ ߦߋ߫ ߏ߬ ߕߎ߬ߡߊ߸ ߦߊ߬ߣߴߊ߬ ߦߋ߫ ߣߊ߬ ߞߍ߫ ߞߏ߫ ߜߘߍ߫ ߘߌ߫، ߡߐ߱ ߡߍ߲ ߠߎ߬ ߛߎߥߊ߲ߘߌߣߍ߲߫ ߊ߬ߟߎ߬ ߓߟߏ߫߸ ߊ߬ߟߎ߬ ߡߊ߲߫ ߘߴߊ߲ ߧߋ߫، ߊ߲ ߕߴߊ߬ߟߎ߬ ߟߊ߫ ߡߊ߬ߙߊ ߝߍ߬، ߊ߬ߟߎ߬ ߦߴߊ߲ ߠߊߛߊ߬ߦߌ߲߬ ߠߊ߫ ߞߐߝߍ߬ ߟߋ߬ ߘߐߙߐ߲߫.>> ߊ߬ ߞߵߏ߬ ߟߊ߬ߛߏ߬ߓߌ߬ߟߌ ߞߍ߫.

ߓߊߓߊ߫ ߡߎߛߊ߫ ߖߊ߰ߓߌ ߡߍ߲ ߝߣߊ߫ ߦߋ߫ ߔߊߞߌߛߦߊߟߊ ߘߏ߫ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߛߎߥߊ߲ߘߟߌ ߝߛߏ߬ߝߛߊ߬ ߘߊ߫ ߟߋ߬ ߦߙߐ߫ ߛߌߦߊߡߊ߲߫ ߘߐ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌ߫ ߕߍ߯ߟߍ߲߫ ߞߏߖߊ ߕߍ߬ߘߍ߫ ߝߊ߲߭ ߘߏ߫ ߟߎ߫ ߘߐ߫߸ ߝߏ߫ ߟߊߒߡߊ ߟߎ߫ ߟߋ߬ ߓߊߓߌ߬ߟߊ߬ ߘߊ߫.

<<ߞߏ ߡߍ߲ ߕߊ߬ߡߌ߲߬ߣߍ߲߫ ߦߊ߲߬߸ ߏ߬ ߘߏ߲߰ߣߍ߲߬ ߕߍ߫ ߡߐ߰ ߛߌ߫ ߡߊ߬، ߢߣߊߕߊߟߌ߫ ߡߊ߫ ߞߍ߫، ߕߍ߯ߟߍ߲ ߡߍ߲ ߠߎ߬ ߣߊ߬ ߘߊ߫߸ ߊ߬ߟߎ߫ ߞߵߏ߬ ߟߎ߬ ߘߐߞߍ߫ ߊ߬ߟߎ߫ ߛߊ߬ߥߏ ߟߋ߬ ߟߊ߫، ߊ߲ ߡߊ߫ ߕߍ߯ߟߍ߲߫ ߛߐ߬ߘߐ߲߬، ߝߏ߰ߛߌ ߡߍ߲ ߠߎ߬ ߟߊߓߊ߯ߙߊ߫ ߘߴߊ߲ ߓߟߏ߫߸ ߊ߬ߟߎ߫ ߞߵߏ߬ ߘߐߕߟߊ߫ ߢߊ߫ ߟߋ߬ ߡߊ߬߸ ߡߍ߲ ߘߌߦߊ߫ ߘߴߊ߬ߟߎ߬ ߦߋ߫.>> ߊ߬ ߞߵߏ߬ ߟߊߛߋ߫.

ߊ߬ ߟߊ߫ ߝߐߟߌ߫ ߘߐ߫߸ ߢߣߊߕߊߟߌ ߘߊߡߌ߬ߣߊ߬ ߘߊ߫ ߁߈ߕߎߡߊ ߝߊ߲߭ ߝߍ߬ ߟߋ߬߸ ߦߙߐ ߘߏ߫ ߟߎ߫ ߞߵߊ߬ ߕߊ߬ ߢߣߊߕߊߟߌ ߞߊ߲߬ ߤߊ߲߯ ߛߐ߰ߡߊ߬ߟߊ ߃ߕߎߡߊ، ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߘߎ߰ߣߍ߲ ߘߏ߫ ߟߎ߫ ߞߣߐ߫߸ ߡߐ߰ ߣߊ߯ߣߌ߲߫ ߘߐߙߐ߲߫ ߠߋ߬ ߞߊ߬ ߛߏ ߡߎ߰ߡߍ ߟߊ߫ ߢߣߊߕߊߟߌ ߞߍ߫ ߦߋ߲߬.

ߊ߬ߟߎ߬ ߟߊ߫ ߡߊ߬ߝߌ߲߬ߞߊ߲߬ߠߊ ߢߌ߲߬ ߠߎ߬ ߣߴߊ߬ ߕߊ߫߸ ߡߙߊ߬ߓߊ߰ߘߎ߯ߟߊ ߞߵߊ߬ ߦߌ߬ߘߊ߫ ߒ߬ ߠߊ߫ ߟߋ߬ ߞߏ߫ ߢߣߊߕߊߟߌ ߘߊߡߌ߬ߣߊ߬ ߘߊ߫ ߁߀ߕߎߡߊ ߤߊ߲߯ ߁߀ߕߎߡߊ߃߀ ߕߍߟߊ ߟߋ߬ ߘߐ߫، ߞߵߊ߬ ߛߐ߬ߘߐ߲߬߸ ߛߏ߫ ߞߣߐ߫ ߡߐ߮ ߟߎ߬ ߞߊ߲߫ ߠߋ߬ ߞߏ߫ ߢߣߊߕߊߟߌ ߘߊߡߌ߬ߣߊ߬ ߘߊ߫ ߁߈ߕߎߡߊ ߣߌ߫ ߁߉ߕߎߡߊ ߕߍߟߊ ߟߋ߬ ߘߐ߫،  ߊ߬ߟߋ߬ ߟߏ߲߫ ߞߋߟߋ߲ ߠߊ߫߸ ߊ߲ ߞߊ߬ ߡߙߊ߬ߓߊ߰ߘߎ߯ߟߊ ߡߊߛߐ߬ߘߐ߲߬ ߜߋߟߋ߲ߜߋߟߋ߲ ߠߊ߫ ߂߂ߕߎߡߊ߸ ߊ߬ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌ ߓߘߊ߫ ߟߊߟߐ߬߸ ߓߊߏ߬ ߡߐ߰ ߕߍ߫ ߛߊ߬ߙߌ߬ߦߊ߬ ߛߊ߲ߘߐ߫.

ߞߊ߬ ߓߍ߲߬ ߡߞߊ߬ߛߌ߬ߞߊ߲߬ߠߊ ߢߌ߲߬ ߠߎ߫ ߡߊ߬ ߞߊ߬ ߝߘߊ߫ ߔߊߞߌߛߦߊߟߊ ߟߎ߬ ߟߊ߫߸ ߡߙߊ߬ߓߊ߰ߘߎ߯ߟߊ߫ ߖ߭ߏߗ߭ߍߝ ߛߎߡߊ߬ ߞߊ߬ ߔߊߞߌߛߦߊߟߊ ߟߎ߫ ߝߏ߬߸ ߊ߬ߟߎ߬ ߟߊ߫ ߡߊ߬ߝߊ ߟߊ߫߸ ߞߊ߬ ߓߊ߲߫ ߞߵߊ߬ ߝߐ߫ ߊ߬ߟߎ߬ ߦߋ߫ ߞߏ߫ ߊ߬ߟߎ߬ ߦߴߊ߬ߟߎ߬ ߡߊߞߊ߬ߛߌ߬ ߛߌߟߊ߫ ߜߍߣߍ߲ ߝߊ߬߸ ߣߴߏ߬ ߦߋ߫ ߡߞߊ߬ߛߌ߬ߟߌ ߘߌ߫ ߛߊ߬ߙߌ߬ߦߊ߬ ߟߊ߫߸ ߡߍ߲ ߣߴߊ߬ ߞߕߌ ߕߍ߱ ߞߊ߫ ߞߊ߲߫.

<<ߊߟߎ߫ ߦߋ߫ ߒ ߠߊ߫ ߘߎ߰ߘߋ߲ ߠߎ߬ ߟߋ߬ ߘߌ߫، ߒ ߓߘߴߊ߬ ߢߊߦߋ߫ ߒ ߞߏ߫ ߊߟߎ߫ ߕߴߊ߬ ߝߍ߬ ߞߊ߬ ߕߌߢߍߟߌ߫ ߞߍ߫، ߒ ߡߊ߫ ߞߓߊ߫ ߟߊߝߟߌ߫ ߦߴߌߘߐ߫، ߒ ߧߋ߫ ߡߍ߲ ߢߌߣߌ߲߫ ߠߴߊߟߎ߫ ߝߍ߬ ߏ߬ ߘߐ߫߸ ߖߌ߬ߣߍ߬ ߦߋ߫ ߛߊ߬ߙߌ߬ߦߊ߬ ߖߡߊߣߊ ߟߋ߬ ߘߌ߫، ߊߟߎ߫ ߦߋ߫ ߛߓߍ ߞߍ߫ ߞߵߊߟߎ߫ ߟߊ߫ ߡߞߊ߬ߛߟߌ߬ ߞߊ߲ ߠߎ߬ ߛߓߍ߫ ߏ߬ ߞߣߐ߫߸ ߞߵߊ߬ ߟߊߦߟߍ߬ ߛߊ߲ߝߍ߬.>> ߊ߬ ߞߵߊ߬ߟߎ߬ ߟߊߟߌ߫ ߏ߬ ߟߊ߫.

ߔߊߞߌߛߦߊߟߊ ߟߎ߬ ߞߊ߲߫ ߞߏ߫ ߊ߬ߟߎ߬ ߡߊ߫ ߓߍ߲߬ ߞߐߝߟߌ߫ ߟߊߓߐߣߍ߲ ߣߌ߲߬ ߡߊ߬߸ ߊ߬ߟߎ߫ ߘߏ߲߬ ߦߴߊ߬ ߝߍ߬ ߢߊ ߦߋ߫ ߟߐ߬ ߊ߬ߟߎ߬ ߟߊ߫ ߡߞߊ߬ߛߌ߬ߞߊ߲߬ߠߊ ߟߎ߬ ߘߐ߫، ߡߙߊ߬ߓߊ߰ߘߎ߯ߟߊ ߞߏ߬ߣߌ߲ ߣߐ߬ ߞߟߌߟߌ ߞߍ߫ ߟߊ߫ ߡߍ߲ ߡߊ߬߸ ߏ߬ ߟߋ ߞߏ ߟߎ߬ ߞߍ ߘߌ߫ ߊ߬ ߛߌߟߊ߫ ߜߍߣߍ߲ ߞߊ߲߬߸ ߦߏ߫ ߛߊ߬ߙߌ߬ߦߊ߫ ߞߵߊ߬ ߝߐ߫ ߢߊ ߡߍ߲ ߡߊ߬.