ߖ߭ߊ߲ߓߌ߫ ߞߊ߲ߕߌ߯ ߞߘߐ߫ ߋߘߑߜ߭ߊߙ ߟߎ߲ߜ߭ߎ߫ ߟߊ߫ ߛߊ߬ߦߊ ߛߊ߲߬ ߞߋ߬ߟߋ߲߬ ߡߊ߬ߜߍ߲ ߠߋ߬ ߕߋ߲߬ ߝߊߦߌߘߊ߫߸ ߊ߬ ߡߊ߲߬ߞߊ߲ ߕߍ߫ ߕߊ߬ߡߌ߲߬ ߠߊ߫ ߛߎߡߊ߫ ߟߊ߫߸ ߝߏ߫ ߞߊ߬ ߕߊ߬ߡߌ߲߫ ߥߙߊ߬ ߟߊ߫، ߞߊ߬ߕߎ߲߯߸ ߖ߭ߊ߲ߓߌ߫ ߞߎ߲߬ߠߊ߬ߛߌ߮ ߕߎ߲߬ ߓߘߴߊ߬ ߟߊߛߋ߫߸ ߞߏ߫ ߛߎ߭ ߓߘߊ߫ ߛߴߊ߬ߟߎ߬ ߕߊ߫ ߓߟߏ߫ ߡߊ߬، ߓߊ߬ߙߌ߬ ߥߙߏ߬ߘߎ߰ ߊߝߙߌߞߌ߬ ߞߕߌߘߊ ߓߘߊ߫ ߡߙߌߘߐ ߏ߬ ߟߊߥߟߌ߬ ߘߏߦߌ߲߫߸ ߞߊ߬ ߛߌߟߊ ߕߍ߰ ߛߎ߭ ߟߊߛߊ߬ߦߌ߲߬ ߞߏ ߢߍ߫.

ߖ߭ߊ߲ߓߌ߫ ߝߊ߰ߡߊ ߟߎ߬ ߟߊ߫ ߝߐߟߌ߫ ߘߐ߫߸ ߛߎ߭ ߟߊߡߙߊ߬ߣߍ߲߫ ߕߘߍ߬ ߔߙߋߕߏߙߌߦߊ߫ ߛߎ߬ߡߙߊ߬ ߦߙߐ ߡߍ߲ ߘߐ߫߸ ߊ߬ߟߎ߬ ߓߘߴߊ߬ ߟߊߓߐ߫ ߦߋ߲߬ ߞߵߊ߬ ߟߊߣߊ߬ ߓߏ߲ߓߊ߫ ߜߘߍ߫ ߞߣߐ߫، ߓߊߏ߬߸ ߊ߬ߟߎ߬ ߣߌ߫ ߥߙߏ߬ߘߎ߰ ߊߝߙߌߞߌ߬ ߞߕߌߘߊ ߓߘߊ߫ ߓߍ߲߬ ߞߋߟߋ߲߫ ߘߐ߫.

ߓߊ߬ߙߌ߬߸ ߞߎߡߊ ߏ߬ ߝߐ ߢߊ ߡߍ߲ ߌߞߘߐ߫߸ ߛߊ߬ߓߊ߰ߕߐ ߟߊ߫ ߘߋ߲ߓߦߊ ߞߵߊ߬ߟߎ߫ ߥߟߌ߬߸  ߞߏ߫ ߊ߬ߟߎ߬ ߡߊ߫ ߓߍ߲߬ ߏ߬ ߡߊ߬، ߊ߬ߟߎ߬ ߥߊ߫ ߘߴߊ߬ߟߋ߬ ߞߕߌߓߏ߲߫ ߞߋߟߋ߲ ߠߊ߫ ߌߞߐ߫߸ ߣߊߟߌ߬ߡߎ߲߫ ߔߙߋߕߏߙߌߦߊ߫ ߞߕߌߖߌ߲ ߛߊ߲ߘߐߕߊ ߘߌ߫߸ ߞߏ߫ ߞߵߊ߬ߟߎ߫ ߝߊ߬ ߛߎ߭ ߟߊߕߊ߯ ߞߏ ߓߐ߫ ߊ߬ ߡߊ߬ ߖ߭ߊ߲ߓߌ߫ ߌߞߘߐߞߘߐߣߌ߲߬، ߏ߬ ߞߍ߸ ߞߕߌߕߍ߯ߟߊ߫ ߙߏߛ߭ߍߟ ߝߊߙߊ߲ߛߌߛ ߛߎߓߌߦߊ߫ ߞߵߊ߬ ߦߌ߬ߘߊ߬߸ ߞߏ߫ ߞߏߢߊ ߣߌ߲߬ ߦߋ߫ <<ߞߏ߫ ߘߐߜߊ߬ߣߍ߲ ߖߍ߬ߘߍߖߍ߬ߘߍ>> ߟߋ߬ ߘߌ߫، ߏ߬ ߟߋ ߘߐ߫߸ ߞߏ߫ ߊ߬ߟߎ߬ ߓߘߊ߫ ߛߎ߭ ߘߏ߲߬ ߥߊߟߌߘߊ ߘߏ߫ ߓߟߏ߫߸ ߥߊߟߌߘߊ ߡߍ߲ ߘߐ߰ߘߏ߲߬ߣߍ߲߫ ߛߎ߬ ߟߊ߬ߡߙߊ ߟߊ߫، ߞߐߙߍ ߓߍ߲߬ߣߍ߲߫ ߛߎ߬ ߟߊ߬ߡߙߊ߬ߟߊ ߏ߬ ߟߎ߬ ߡߍ߲ ߠߎ߬ ߡߊ߬߸ ߞߏ߫ ߊ߬ߟߎ߬ ߓߘߊ߫ ߛߎ߭ ߘߏ߲߬ ߏ߬ ߓߟߏ߫ ߤߊ߲߯ ߘߓߊ߬ߕߊ ߕߋ߬ߟߋ߫ ߂߁ ߣߊ߬ߕߐ.

ߏ߬ ߢߊ߫ ߞߋߟߋ߲ ߠߋ߬ ߡߊ߬ ߌߞߐ߫߸ ߛߊ߬ߓߊ߰ߕߐ ߞߐߙߍ ߞߊ߬ ߖߡߊ߬ߙߌ߬ ߛߓߍ߬ ߜߘߍ߫ ߟߊߘߊ߲߫߸ ߞߏ߫ ߛߎ߭ ߕߘߍ߬ ߦߙߐ߫ ߝߟߐ ߡߍ߲ ߘߐ߫ ߊ߬ ߟߊߡߙߊ߬ ߞߊ߲ߡߊ߬، ߓߊߏ߬߸ ߊ߬ ߕߘߍ߬ ߛߎ߬ߓߏ߲ ߏ߬ ߟߋ ߟߊ߫ ߞߵߊ߬ ߕߊ߬ ߛߊ߬ߦߊ ߞߍ߫ ߟߏ߲ ߡߊ߬ ߤߊ߲߯ ߕߋ߲߬߸ ߞߏ߫ ߞߵߊ߬ ߟߊߞߐߛߊ߬ߦߌ߲߫ ߦߋ߲߬ ߠߋ߬ ߕߘߋ߫، ߏ߬ ߟߵߊ߬ ߦߌ߬ߘߊ߬ ߟߊ߫߸ ߞߏ߫ ߖ߭ߊ߲ߓߌ߫ ߞߎ߲߬ߠߊ߬ߛߌ߮ ߟߊ߫ ߕߊ߯ߡߊ ߏ߬ ߕߴߊ߬ߟߎ ߢߍߛߌߟߊ߫ ߘߐ߫.

ߣߌ߲߬ ߓߘߊ߫ ߕߊ߬ߡߌ߲߬ ߗߍ߭ ߛߎ߬ ߘߏ߲߬ ߞߏ ߣߴߊ߬ ߓߊߘߍ߫ ߞߏ ߣߊ߲߯ߛߊ߫ ߟߊ߫، ߞߊ߬ߕߎ߲߯߸ ߖ߭ߊ߲ߓߌ߫ ߞߊ߲ߕߌ߮ ߤߊߞߍ߲ߘߋ ߤߛ߭ߌߟߋߡߊ߫ ߞߊ߲߫ ߠߋ߬߸ ߞߏ߫ ߞߊ߬ ߞߊ߲ߕߌ߯ ߞߘߐ ߛߎ߬ߞߏ߬ߦߊ ߞߍ߫ ߖߌ߲ߘߊ߲ߓߊ߫ ߘߐ߫ ߟߎߛߞߊ߫ ߘߎ߱ ߞߣߐ߫، ߓߊ߬ߙߌ߬ ߞߐߙߍ ߞߊ߲߫ ߠߋ߬ ߞߏ߫ ߝߍ߲ߝߍߘߍ߲߫߸ ߊ߬ߟߎ߫ ߝߊ߬ ߛߎ߭ ߕߍ߫ ߓߌ߬ߟߊ߬ ߖ߭ߊ߲ߓߌ߫߸ ߝߏ߫ ߞߵߊ߬ ߘߏ߲߬ ߥߙߏ߬ߘߎ߰ ߊߝߙߌߞߌ߬ ߟߋ߬ ߕߘߋ߫.

ߊ߬ߟߋ߬ ߝߐߢߐ߲߯ߞߐ߫ ߞߋߟߋ߲ ߣߌ߲߬ ߘߐ߫߸ ߊ߬ ߞߎ߲߭ ߘߏ߫ ߟߋ߬ ߞߊ߲ߕߌ߮ ߖߍ߬ߘߍ ߟߊ߫ ߛߙߊ߬ߒ߬ߞߊ߲߬ߠߊ ߘߌ߫، ߓߊߏ߬߸ ߓߘߍ߬ߓߘߍ߬ߟߌ ߛߌ߬ߣߊ߬ߢߐ߲߰ߦߊ ߡߍ߲ ߦߋ߫ ߞߊ߲ߕߌ߯ߦߊ߫ ߢߌߣߌ߲ߠߊ ߟߎ߬ ߕߍ߫߸ ߊ߬ߟߋ ߗߌߙߏ߲ ߡߍ߲ ߞߍ߫ ߘߊ߫ ߂߀߂߁ ߢߣߊߕߊߟߌ ߘߐ߫߸ ߏ߬ ߡߊ߫ ߘߌߦߴߊ߬ ߦߋ߫، ߏ߬ ߟߋ ߘߐ߫߸ ߊ߬ ߞߵߊ߬ ߣߕߊ߬ ߞߏ߫ ߊ߬ ߕߴߊ߬ ߝߍ߬߸ ߊ߬ ߛߌ߬ߣߊ ߏ߬ ߟߎ߬ ߦߋ߫ ߛߐ߬ߘߐ߲߫ ߊ߬ ߛߎ߬ ߞߏ ߘߐ߫ ߡߎ߰ߡߍ߫߸ ߖߡߊ߬ߣߊ ߘߏ߲߬ ߦߴߏ߬ ߟߎ߫ ߟߋ߬ ߕߊ߫ ߓߟߏ ߡߊ߬، ߞߐߙߍ ߝߣߊ߫ ߞߊ߲߫߸ ߞߏ߫ ߊ߬ߟߎ߫ ߝߊ߬ ߡߊ߫ ߛߐ߲߬ ߡߍ߲ ߡߊ߬߸ ߊ߬ߟߎ ߕߍ߫ ߛߐ߲߬ ߏ߬ ߡߊ߬߸ ߤߊ߲߯ ߗߍ߭ ߛߎ߭ ߓߘߊ߫ ߛߊ߲߬ ߞߋߟߋ߲߫ ߞߍ߫ ߓߟߏߟߊ߫ ߢߊ ߣߌ߲߬ ߡߊ߬.

ߛߊ߬ߦߊ ߞߍ ߡߍ߲ ߞߍ߫ ߘߊ߫߸ ߞߎ߲߬ߠߊ߬ߛߌ߮ ߞߊ߬ ߝߙߌ߬ߦߊ ߛߌ߰ ߛߋ߲߬ߠߊ߫ ߖߡߊ߬ߣߊ ߞߣߐ߫، ߓߊ߬ߙߌ߬߸ ߊ߬ߟߋ߬ ߝߐߢߐ߲߯ߞߐ ߓߘߊ߫ ߞߍ߫ ߕߙߎ߬ ߘߌ߫߸ ߞߎ߲߬ߠߊ߬ߛߌ߮ ߟߊ߫ ߖߊ߲߬ߖߏ߲ ߡߍ߲ ߟߐ߯ߟߊ߫ ߘߊ߫ ߛߎ߬ߞߏߏ߬ߦߊ ߞߍ߫ ߞߊ߲ߡߊ߬߸ ߏ߬ ߓߐ߫ ߘߴߊ߬ ߡߊ߬، ߡߊ߬ߝߌ߲߬ߞߊ߲߬ߠߊ ߘߏ߫ ߟߎ߫ ߖߍ߬ߘߍ ߝߣߊ߫ ߦߋ߫ ߛߋ߲߬ߠߊ߫߸ ߞߏ߫ ߛߋߓߊ߯ߦߊ ߕߌ߰ߟߊ߬ߡߐ߮ ߢߌ߲߬ ߠߎ߫ ߕߍ߬ߘߍ߫ ߊ߬ ߝߍ߬ ߟߋ߬ ߞߊ߬ ߞߊ߲ߕߌ߯ ߞߘߐ ߣߌ߲߬ ߣߐ߬ߝߍ߬ߜߍ߲߫߸ ߣߴߊ߬ ߕߎ߲߬ ߡߊ߫ ߛߊ߬ ߞߊ߬ߣߌ߲߬.

ߊ߬ ߛߊ߬ ߘߊ߫ ߂߀߂߅ ߥߊ߬ߛߌ߬ߥߙߊ ߟߋ߬ ߟߊ߫߸ ߔߙߋߕߏߙߌߦߊ߫ ߓߎ߬ߙߋ ߘߏ߫ ߞߣߐ߫߸ ߞߵߊ߬ ߛߌ߬ߞߛߊߓߌ ߕߏ߫ ߛߊ߲߬ ߆߈ ߘߐ߫، ߋߘߑߜ߭ߊߙ ߟߎ߲ߜ߭ߎ߫ ߛߎ߭ ߡߊ߫ ߘߏ߲߬ ߏ߬ ߟߋ ߘߐ߫ ߣߌ߲߬ ߤߊߟߌ߬ߛߊ߫.