ߖߌ߬ߣߍ߬ ߥߙߊߞߘߊ ߝߟߐߡߊ ߓߌ߬ߟߊ߬ߡߊ ߘߐ߫߸ ߓߌ߬ߟߊ߬ߒ߬ߘߐ߬ߖߎ߮ ߓߘߊ߫ ߥߊ߬ߙߴߊ߬ ߞߊ߲߬ ߞߏߛߓߍ߫߸ ߝߏ߫ ߊ߬ ߤߊߡߌ߲ ߓߘߊ߫ ߛߌ߰ ߖߌ߬ߣߍ߬ߞߊ ߟߎ߬ ߟߊ߫ ߡߎ߬ߕߎ߲߬، ߕߟߋ߬ ߕߊ߲߫ ߔߋ߫ ߞߘߐ߫ ߕߋ߲߬߸ ߡߐ߰ ߂߂ ߓߘߊ߫ ߓߐ߬ߣߐ߫ ߊ߬ ߣߌ ߘߐ߫ ߓߌ߬ߟߊ߬ߒ߬ߘߐ߬ߖߎ߰ߓߊ ߟߎ߬ ߞߏߛߐ߲߬ ߞߐߣߊߞߙߌ߫ ߣߌ߫ ߞߌ߲ߘߌߦߊ߫ ߣߌ߫ ߡߊ߯ߡߎ߲߫ ߕߍߟߊ ߘߐ߫߸ ߞߊ߬ ߓߍ߲߬ ߖߌ߬ߣߍ߫ ߞߌ߬ߓߊ߬ߙߏ߬ߘߊ ߟߎ߬ ߟߊ߫ ߖߊ߬ߕߋ߬ ߝߐߣߍ߲ ߠߎ߬ ߡߊ߬.

ߞߊ߬ ߓߍ߲߬ ߏ߬ ߟߋ ߞߏߢߊ ߡߊ߬ ߛߊ߫߸ ߡߊ߬ߘߏ߬ߣߌ߲߬ߠߌ߲߬ ߞߏߕߌ߮ ߓߘߴߊ߬ ߦߌ߬ߘߊ߬ ߞߏ߫ ߊ߬ ߓߘߴߊ߬ ߘߛߌ ߓߍ߲߭ ߘߊߡߌ߬ߣߊ߬ ߛߌߟߊ ߛߊ߬ߙߌ߬ߦߊ ߡߊߛߐ߬ߛߐ߬ߓߊ߮ ߟߎ߫ ߞߊ߲߬߸ ߞߊ߬ ߢߊ߫ ߖߐ߲ߖߐ߲߫ ߢߌߣߌ߲߫ ߣߌ߲߬ ߞߏ ߡߊ߬، ߞߏ߫ ߊ߬ߟߎ߬ ߓߍߣߊ߬ ߜߋ߬ߟߎ߲߬ߠߌ߲ ߝߊ߲߬ߞߊߘߏ߲߬ ߖߡߊ߬ߣߊ ߛߌߟߓߊ ߟߎ߫ ߞߊ߲߬، ߟߊ߬ߓߏ߬ߙߟߌ߬ߟߊ ߡߍ߲ ߠߎ߬ ߕߍ߫ ߛߊ߬ߙߌ߬ߦߊ߬ ߞߣߐ߫߸ ߥߟߊ߫ ߡߍ߲ ߠߎ߬ ߛߐ߲߭ ߦߋ߫ ߛߊ߬ߙߌ߬ߦߊ߬ ߛߐߛߐ ߘߌ߫߸ ߏ߬ ߟߎ߬ ߟߊ߫ ߟߊ߬ߓߏ߬ߙߌ߬ߟߌ ߖߡߊ߬ߙߌ߬ߛߓߍ ߘߌ߫ ߡߌ߬ߣߴߊ߬ߟߎ߬ ߟߊ߫، ߓߌ߬ߟߊ߬ ߘߌ߫ ߞߍ߫ ߊ߬ߟߎ߬ ߞߐ߫ ߛߊ߬ߙߌ߬ߦߊ߬ ߟߊ߫ ߞߏߟߊߕߊ߯ߡߊ߫ ߢߊ߫ ߖߎ߮ ߟߎ߬ ߞߏߛߐ߲߬߸ ߡߍ߲ ߠߎ߬ ߞߐߝߟߌ ߓߊ߯ ߞߍ߫ ߓߌ߬ߟߊ߬ߒ߬ߘߐ߬ߖߎ߮ ߘߌ߫.

ߡߙߌߘߐ ߡߍ߲ ߦߋ߫ ߕߋ߲߬߸ ߕߊ߯ߡߟߊ ߟߎ߫ ߓߊ߬߸ ߟߊ߬ߓߏ߬ߙߟߌ߬ߟߊ ߟߎ߫ ߓߊ߬߸ ߡߊ߬ߘߏ߬ߣߌ߲߬ߠߌ߲߬ߠߊ ߟߎ߫ ߓߊ߬߸ ߘߎ߬ߞߎ߬ߟߎ߲߬ߕߌ߮ ߟߎ߫ ߓߊ߬߸ ߊ߬ ߓߍ߯ ߟߋ߬ ߞߏ߫ ߦߋ߫ ߣߌ߲߬ ߘߌ߫. ߞߊ߬ߕߎ߲߯߸ ߊ߬ ߕߟߋ߬ ߘߊ߲ߘߐ ߟߋ߬ ߕߋ߲߬߸ ߛߏߝߍߞߎߟߎ߲ ߘߏ߫ ߣߌ߫ ߝߊ߯ߞߊ߲ߓߋ߲ ߘߏ߫ ߞߵߊ߬ ߛߌ߰ ߢߐ߲߮ ߞߎ߲߬ ߞߐ߬ߟߍ߲߬ߕߍ߲߫ ߛߍ߲ߓߊ ߞߊ߲߬߸ ߔߋߞߊ ߕߑߙߊ߲ߛߌߛ ߟߊ߫ ߞߌ߲ߘߌߦߊ߫ ߣߌ߫ ߡߊ߯ߡߎ߲߫ ߛߌߟߊ ߟߊ߫߸ ߡߐ߰ ߇ ߟߋ߬ ߝߊ߰ ߘߴߏ߬ ߘߐ߫ ߂߀߂߆ ߞߊ߬ߙߌ߬ߝߐ ߕߟߋ߬ ߇ ߡߊ߬.

ߞߎ߲߬ߠߊ߬ߛߌ߮ ߦߴߊ߬ ߝߍ߬ ߝߣߊ߫ ߞߊ߬ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߝߊ߲߬ߞߊߘߏ߲߬، ߓߊ߬ߙߌ߬߸ ߊ߬ߟߎ߬ ߞߊ߲߫ ߞߏ߫ ߟߊ߬ߞߊ߲߬ߘߊ߬ߟߌ ߛߌߟߊ ߞߊ߲߬߸ ߏ߬ ߦߋ߫ ߓߐ߫ ߟߊ߫ ߓߏ߬ߙߌ߬ߝߋ߲߬ߕߌ߮ ߞߋ߬ߟߋ߲߬ߞߋ߬ߟߋ߲߬ߠߊ ߞߏߟߊߕߊ߯ߡߊ߫ ߢߊ ߟߋ߬ ߘߐ߫، ߝߊ߰ߓߊ߬ߕߐ ߢߌ߲߬ ߠߎ߬ ߦߙߌߞߊ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߘߊ߲ߘߊߛߏ ߟߎ߬ ߝߊߣߍ߲߫ ߖߐߞߌߓߊ߯ߕߐ ߟߎ߫ ߟߋ߬ ߟߊ߫߸ ߡߍ߲ ߠߎ߬ ߞߍߣߍ߲߫ ߛߌߟߊ ߞߊ߲߬߸ ߞߊ߬ ߡߐ߱ ߟߎ߫ ߓߐ߬ߣߐ߫ ߊ߬ߟߎ߬ ߣߌ ߘߐ߫߸ ߞߊ߬ ߘߋ߲ߓߦߊ ߟߎ߫ ߓߌ߬ߟߊ߫ ߛߏ߰ߟߊ ߣߌ߫ ߛߎ߬ߣߎ߲ ߕߍߡߊ߬، ߏ߬ ߘߐ߫߸ ߊ߬ߟߎ߬ ߦߋ߫ ߡߎ߲߬ ߝߍ߬߸ ߏ߬ ߟߋ߸ ߊ߬ ߞߊߣߊ߬ ߝߐ߫ ߡߎ߬ߕߎ߲߬ ߞߏ߫ ߖߌ߬ߣߍ߬ ߛߌߟߊ ߟߎ߬ ߦߋ߫ ߡߐ߰ ߝߊ߮ ߟߊ߫߸ ߝߏ߫ ߞߵߏ߬ ߟߋ ߟߊߟߐ߬، ߏ߬ ߟߋ ߞߎ߲߬ߠߊ߬ߛߌ߮ ߡߙߌߦߊ ߘߌ߫.