ߞߊ߬ߝߏ߬ߙߋ߲߬ ߢߣߊߕߊߟߌ ߡߍ߲ ߟߐ߯ߟߊߣߍ߲߫ ߖߌ߬ߣߍ߬ ߞߣߐ߫ ߞߵߊ߬ ߕߏ߫ ߘߓߊ߬ߕߊ ߕߟߋ߬ ߃߁ ߠߊ߫߸ ߞߎ߲߬ߢߐ߲߰ ߘߊ߲ߘߐ߫ ߟߋ߬ ߕߏߣߴߏ߬ ߟߊ߫ ߡߎ߬ߕߎ߲߬، ߒ߬ߓߊ߬߸ ߡߊ߲߬ߞߊ߲ ߓߘߊ߫ ߥߟߌ߬ ߢߣߊߕߊߟߌ ߏ߬ ߟߋ ߘߌ߲߬ߞߌߙߊ ߘߏ߫ ߟߎ߫ ߘߐ߫ ߛߓߊ߬ߘߎ߰ ߓߙߊߣߊ߬ߡߊ߫ ߡߙߊ߬ߘߊ߬ߙߋ߲ ߞߣߐ߫ ߞߎߘߍ߫ ߇߅ ߢߐ߲߰ ߠߊ߫ ߞߊ߲ߞߊ߲߫ ߡߙߊ߬ߘߊ߬ߓߊ ߘߐ߫، ߡߎ߲߬ ߞߏߛߐ߲߬߸ ߊ߬ߟߎ߫ ߞߊ߬ ߛߙߍߘߍ ߡߍ߲ ߠߊߕߊ߯߸ ߡߍ߲ ߠߎ߬ ߞߊ߫ ߞߊ߲߫ ߞߊ߬ ߞߍ߫ ߊ߬ߟߎ߬ ߟߊ߫ ߡߊ߬ߡߌ߬ߣߊ߬ߟߌ߬ߟߊ ߟߎ߬ ߘߌ߫ ߞߊ߬ߝߏ߬ߙߋ߲߬ ߢߣߊߕߊߟߌ߫ ߣߊ߬ߕߐ ߘߐ߫߸ ߊ߬ߟߎ ߟߊ߫ ߛߙߍߘߍ ߏ߬ ߟߋ ߢߍߟߐ ߡߊߦߟߍ߬ߡߊ߲߬ߣߍ߲߬، ߏ߬ ߟߋ ߡߊ߫ ߓߍ߲߬ ߊ߬ߟߎ߫ ߡߊ߬ ߢߊ߫ ߛߌ߫ ߡߊ߬.

ߒ߬ߓߊ߬߸ ߛߓߊ߬ߘߎ߰ ߓߙߊ߬ߣߡߊ߬ߞߊ ߘߏ߫ ߟߎ߫ ߞߵߊ߬ߟߎ߬ ߟߊߘߍ߬ ߞߊ߲ߞߊ߲߫ ߥߞߓ ߝߊ߲ߓߊ ߟߊ߫ ߏ߬ ߟߋ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߦߋ߫ ߛߓߊ߬ߘߎ߰ ߓߙߊߣߡߊ߬ ߣߴߊ߬ ߘߎ߰ ߃߃ ߓߍ߯ ߟߋ߬ ߞߐߦߌߘߊ ߘߌ߫، ߏ߬ ߘߐ߫߸ ߞߏ߫ ߊ߬ߟߎ߫ ߣߐ߬ ߞߎߘߍ߫ ߓߌ߫ ߦߙߌߞߊ ߣߌ߲߬ ߓߏ߬ߙߌ߬ ߟߊ߫ ߞߊ߬ ߣߵߊ߬ߟߎ߬ ߡߊߝߐߦߌ߲ߝߐߦߌ߲߫ ߠߋ߬߸ ߖߐ߲߰ߛߴߊ߬ߟߎ߫ ߛߊ߬ߥߏ ߘߌ߫ ߞߍ߫.

ߏ߬ ߟߋ ߘߐ߫߸ ߞߎߡߊ ߕߊ߭ ߊߓߘߎߟߊߦߌ߬ ߞߡߊ߬ߙߊ߬ ߓߟߏ߫߸ ߊ߬ߟߋ ߡߍ߲ ߦߋ߫ ߛߓߊ߬ߘߎ߰ ߓߙߊߣߡߊ߬ ߓߞߥ ߞߊ߲ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߣߴߌ ߞߵߊ߲ ߓߐߣߍ߲ ߦߋ߫ ߛߓߊ߬ߘߎ߰ ߓߙߊߣߊ߬ߡߊ߫ ߞߊ߬ ߣߊ߬ ߞߊ߲ߞߊ߲߫߸ [...] ߊ߲ߠߎ߬ ߟߋ߬ ߞߵߊ߲ ߠߊߘߍ߬ ߞߊ߬ ߛߙߍߘߍ ߘߏ߫ ߟߊߘߊ߲߫߸ ߞߊ߬ ߝߊ߬ߞߐߟߌ߫ ߞߙߎ߬ߡߊ߬ ߞߍ߫ ߊ߲ ߠߊ߫ ߛߙߍߘߍ ߏ߬ ߢߍߟߐ ߘߌ߫߸ ߓߍ߯ ߟߋ߬ ߘߏ߲߬ ߓߍ߲߬ ߘߴߏ߬ ߡߊ߬.>>

ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߞߊ߬ ߡߐ߰ ߂߃ ߓߍ߯ ߟߋ߬ ߕߐ߮ ߛߙߍߘߍ ߟߊߘߊ߲߫߸ ߞߵߊ߬ ߟߊߣߊ߬ ߡߙߊ߬ߘߊ߬ߓߊ ߛߓߍߘߊ ߟߊ߫߸ ߞߣߊ߬ߕߏ߫ ߊ߬ ߟߊߕߊ߯ ߟߊ߫ ߞߐߣߊߞߙߌ߫.

ߊ߬ߟߋ߬ ߡߐ߬ߝߐ߬ߦߌ߲߬ߝߐ߬ߦߌ߲߬ߓߊ߰ߕߐ ߢߌ߲߬ ߠߎ߬ ߟߊ߫ ߝߐߟߌ߫ ߘߐ߫߸ ߛߙߍߘߍ ߏ߬ ߟߋ ߥߟߏߡߊߣߍ߲߫ ߢߊ߫ ߡߊ߬߸ ߊ߬ߟߎ߫ ߛߊ߬ߥߏ߬ ߕߍ߫ ߡߍ߲ ߘߌ߫، <<ߊ߲ ߞߊ߬ ߞߋ߲߬ߥߟߎ߬ ߃߅ ߛߊ߬ߙߊ߫ ߟߋ߬߸ ߞߵߏ߬ ߞߍ߫ ߒ߬ ߠߊ߫ ߡߊ߬ߡߌ߬ߘߊ߬ߟߌ߬ߟߊ߫ ߝߊ߬ߞߐߟߌ߫ ߟߊ߫ ߞߎ߲߬ߞߘߐ߬ߛߌ߮ ߛߊ߬ߙߊ ߘߌ߫ [...] ߓߊ߬ߙߌ߬ ߊ߲ ߣߊ߬ ߘߊ߫ ߡߎ߲߬ ߦߋ߫߸ ߡߐ߰ ߜߘߍ߫ ߟߋ߬ ߓߌ߬ߟߊ߬ߣߍ߲߫ ߒ߬ ߠߊ߫ ߛߙߍߘߍ ߢߍߝߍ߬߸ ߡߍ߲ ߣߴߊ߲ ߠߊ߫ ߓߍ߲߬ߞߊ߲߬ߡߊ ߕߍ߫ ߞߋߟߋ߲߫ ߘߌ߫.>> ߊߓߘߎߟߊߦߌ߬ ߞߡߊ߬ߙߊ߫ ߟߋ߬ ߞߊ߲߫ ߣߌ߲߬ ߓߍ߯ ߘߌ߫.

ߛߓߊ߬ߘߎ߰ ߓߙߊ߬ߣߡߊ߬ߞߊ ߟߎ߬ ߦߋ߫ ߡߎ߲߬ ߢߌߣߌ߲߫ ߠߊ߫߸ ߏ߬ ߟߋ ߊ߬ߟߎ߬ ߟߊ߫ ߛߙߍߘߍ ߢߍߟߐ ߟߊߛߊ߬ߦߌ߲ ߘߴߊ߬ ߣߐ߭ ߘߐ߫߸ ߏ߬ ߡߍ߲ ߣߐ߬ߘߐߓߌ߬ߟߊ߬ߣߍ߲߬ ߎߛߑߡߊߣ ߞߙߎߡߊ߫ ߕߐ߮ ߘߏ߫ ߟߊ߫߸ ߊ߬ߟߎ߫ ߛߊ߬ߥߏ߬ ߕߴߏ߬ ߡߍ߲ ߘߌ߫.

ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ߟߎ߬ ߡߊ߫ ߞߏߟߊߒߞߘߐߢߐ߲߯ߦߊ߫ ߕߐ߯ ߡߝߊߟߋ߲ ߣߌ߲߬ ߘߐ߫߸ ߊ߬ߟߎ߬ ߡߊ߫ ߟߊߟߐ߲ߠߌ߲߫ ߊ߬ ߟߊ߫ ߝߣߊ߫، ߊ߬ߟߎ߬ ߞߊ߲߫ ߞߏ߫ ߡߝߊ߬ߟߋ߲߬ߠߌ߲ ߓߐߣߍ߲߫ ߞߐߣߊߞߙߌ߫ ߟߋ߬.

ߊ߬ߟߎ߫ ߞߊ߬ ߞߟߌߟߌ ߞߍ߫ ߡߊ߬ߝߊ ߟߋ߬ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߝߊ߰ߡߊ ߟߎ߬ ߦߴߊ߬ߟߎ߫ ߛߋ߲߭ߓߌ߬ߟߴߊ߬ ߞߏ ߘߐ߫߸ ߛߴߊ߬ ߘߌ߫ ߘߐߛߎߡߊ߫. <<ߖߌ߬ߣߍ߬ ߦߋ߫ ߛߊ߬ߙߌ߬ߦߊ߬ ߖߡߊߣߊ ߟߋ߬ ߘߌ߫ [...] ߊ߲ ߧߴߊ߬ ߢߌߣߌ߲߫ ߠߊ߫ ߝߊ߰ߡߊ ߟߎ߫ ߝߍ߬߸ [...] ߊ߬ߟߎ߬ ߦߋ߫ ߣߌ߲߬ ߞߏ ߞߕߌߕߍ߰.>> ߊߓߘߎߟߊߦߌ߬ ߞߡߊ߬ߙߊ߫ ߞߵߏ߬ ߝߣߊ߫ ߟߊ߫ ߞߎߡߊ ߞߊ߲߬߸ ߞߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߝߣߊ߫ ߕߐ߮ ߟߊߘߏ߲߬ ߊ߬ ߘߐ߫߸ ߖߐ߲߰ߛߊ߫ ߣߌ߲߬ ߞߏ ߘߌ߫ ߢߊߓߐ߫ ߢߊ ߡߍ߲ ߡߊ߬.

ߊ߬ߟߎ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ߟߎ߬ ߟߊ߫ ߞߎߡߊ ߡߍ߲ ߦߋ߫ ߕߋ߲߬߸ ߣߴߊ߬ ߡߊ߫ ߕߊ߬ ߓߊ߫ ߘߐ߫߸ ߣߌ߫ ߢߊ߫ ߡߊ߫ ߢߌߣߌ߲߫ ߊ߬ ߡߊ߬ ߞߵߊ߬ߟߎ߬ ߟߊ߫ ߡߐ߱ ߕߐ߮ ߟߊߣߵߊ߬ ߢߊ ߡߊ߬߸ ߓߎ߬ߘߎ ߘߌ߫ ߓߌ߬ߟߊ߫ ߛߓߊ߬ߘߎ߰ ߓߙߊߣߡߊ߬ ߢߣߊߕߊߟߌ߫ ߞߏ ߘߐ߫، <<ߣߴߊ߲ ߠߊ߫ ߛߙߍߘߍ ߡߊ߫ ߞߍ߫ ߊ߬ ߢߊ ߡߊ߬߸ ߢߣߊߕߊߟߌ߫ ߕߍߣߊ߬ ߞߍ߫ ߟߊ߫ ߛߓߊ߬ߘߎ߰ ߓߙߊߣߡߊ߬.>>

ߊ߲ ߛߋ߫ ߘߊ߫ ߛߊߟߌߡߎ߫ ߞߌߛߑߡߊ߬ ߝߏߝߣߊ߫ ߞߟߌ߫ ߟߊ߫ ߜߋߟߋ߲ߜߋߟߋ߲ ߠߊ߫߸ ߊ߬ߟߋ ߡߍ߲ ߦߋ߫ ߥߞߓ ߓߙߊߡߊߖߊ߲ߓߊ߲ ߗߋߕߌ߯ ߡߙߊ߬ߘߓߊ߬ߟߊ߬ߞߊ ߘߌ߫߸ ߊ߬ ߏ߬ ߦߌ߬ߘߊ߬ ߞߏ߫ ߊ߬ ߡߊ߫ ߟߊߟߐ߲ߠߌ߲߫ ߣߌ߲߬ ߞߏ ߟߊ߫، ߊ߬ ߞߏ߬ߣߌ߲ ߞߵߊ߬ ߟߴߊ߬ ߞߊ߲߬߸ ߞߏ߫ ߢߊ߫ ߘߌ߫ ߛߐ߬ߘߐ߲߫ ߊ߬ ߞߏߢߊ ߡߊ߬ ߞߊ߬ ߓߐߘߊ߫ ߖߐ߲ߖߐ߲߫ ߛߐ߬ߘߐ߲߫ ߊ߬ ߟߊ߫.

ߏ߬ ߘߐ߫߸ ߟߊ߬ߛߋ߬ߟߌ߬ ߞߟߊߒߞߋ߫ ߡߊ߫ ߞߍ߫ ߊ߬ߟߎ߬ ߓߟߏ߫ ߣߌ߲߬ ߞߏ ߞߊ߲߬ ߡߎߣߎ߲߬߸ ߣߌ߫ ߛߙߍߘߍ ߓߘߊ߫ ߟߊߛߊ߬ߦߌ߲߫ ߊ߬ ߢߊ ߡߊ߬߸ ߥߟߴߊ߬ ߦߋ߫ ߢߊ߫ ߜߘߍ ߡߍ߲ ߡߊ߬.