ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߟߊ߬ߕߍ߰ߦߊ ߘߏ߫ ߟߋ߬ ߞߟߊ߬ߣߐ߬ߦߊ߫ ߂߀߂߆ ߞߏ߲ߞߏߘߓߌ ߕߟߋ߬ ߁߇ ߡߊ߬߸ ߞߊ߬ ߓߍ߲߬ ߞߊ߲ߕߌ߯ߘߊ ߓߌ߬ߟߊ߬ߢߐ߲߰ߡߊ ߗߋߕߌ߯ߘߊ ߞߣߐ ߛߌ߲߬ߝߏ߲߬ߧߊ ߡߊ߬، ߢߊߞߎߘߦߊߟߌ߫ ߛߌߦߊߡߊ߲߫ ߘߏ߲߬ ߘߴߊ߬ ߘߐ߫: ߞߊ߬ ߡߐ߬ߟߐ߲ ߖߍ߬ߘߍߖߍ߬ߘߍ ߘߌ߫ ߝߊ߬ߛߏ߬ ߞߊ߲ ߠߎ߬ ߡߊ߬߸ ߞߊ߬ ߝߘߊ߬ߝߌ߲߬ ߛߓߍߟߌ ߟߎ߬ ߛߊ߲ߞߘߐߕߊ߬߸ ߦߏ߫ ߒߞߏ ߛߓߍߟߌ߸ ߞߵߏ߬ ߟߎ߬ ߝߣߊ߫ ߓߌ߬ߟߊ߬ ߞߊ߲ߕߌ߯ߘߊ ߓߌ߬ߟߊ߬ߢߐ߲߰ߡߊ ߢߍߥߟߊ ߘߐ߫. ߞߊ߲ߕߌ߯ߘߊ ߟߊ߫ ߞߎߡߊ ߓߍ߯ ߦߋ߫ ߟߊߕߊ߬ߡߌ߲߬ ߠߊ߫ ߛߌ߲߬ߝߏ߲߬ߘߊ ߡߍ߲ ߓߟߏ߫ ߣߌ߲߬߸ ߏ߬ ߟߎ߬ ߣߌ߫ ߡߍ߲ ߞߍߟߌ ߞߊ߫ ߞߊ߲߫ ߟߊ߬ߛߋ߬ߟߌ ߞߍߢߊ ߟߎ߬ ߘߐ߫߸ ߏ߬ ߢߊߝߐ߫ ߘߊ߫ ߟߊ߬ߕߍ߰ߦߊ ߢߌ߲߬ ߠߋ߬ ߘߐ߫، ߒ߬ߓߊ߬߸ ߊ߬ ߦߌ߬ߘߊ߬ ߘߴߊ߬ߟߎ߬ ߟߊ߫ ߘߌߦߊߜߏߦߊ߫ ߓߟߏ ߡߊ߬߸ ߞߏ߫ ߝߏ߫ ߖߡߊ߬ߣߊ߬ߘߋ߲ ߠߎ߬ ߦߴߊ߬ߟߎ߬ ߟߊ߫ ߞߎߡߊ ߓߍ߯ ߟߋ߬ ߢߊߦߋ߫߸ ߞߵߊ߬ ߟߐ߲߫ ߞߊ߲ߕߌ߮ ߦߋ߫ ߡߎ߲߬ ߝߐ߫߸ ߡߙߌߦߊ߫ ߢߌ߬ߡߊ߲߬ ߦߋ߫ ߕߊ߬ ߟߊ߫߸ ߖߐ߲߰ߛߊ߫ ߓߍ߯ ߘߌ߫ ߕߊ߲߬ߞߊ߫ ߒ ߞߵߊ߬ ߡߍ߲ ߡߊ߬.

ߟߊ߬ߕߍ߰ߦߊ ߣߌ߲߬ ߞߵߊ߬ ߝߐ߫ ߞߵߊ߬ ߟߊߕߍ߰߸ ߞߏ߫ ߞߊ߲ߕߌ߯ߘߊ ߓߌ߬ߟߊ߬ߢߐ߲߰ߡߊ ߗߋߕߌ߯ߘߊ ߦߴߊ߬ ߞߊߘߊ߲߫ ߊ߬ ߟߊ߫ ߓߊ߯ߙߊ ߟߎ߬ ߘߐ߫ <<ߞߊ߬ ߞߊ߲ߕߌ߮ ߟߊ߫ ߛߙߊ߬ߣߎ߲ ߠߎ߬ ߟߊߛߋ߫ ߝߊ߬ߛߏ߬ ߞߊ߲ ߠߎ߬ ߘߐ߫ (ߦߏ߫ ߝߎߟߊ߫ ߞߊ߲߸ ߡߊ߬ߣߌ߲߬ߞߊ߬ ߞߊ߲߸ ߛߏ߬ߛߏ߬ ߞߊ߲߸ ߊ߬ ߣߌ߫...)>> ߟߊ߬ߛߌ߲߬ߠߌ߲ ߏ߬ ߦߋ߫ ߞߊ߲ߕߌ߮ ߡߙߌߦߊ ߟߋ߬ ߘߌ߫߸ ߖߐ߲߰ߛߊ߫ ߖߡߊ߬ߣߊ߬ߘߋ߲ ߠߎ߬ ߞߎ߲߬ߞߊ߲߬ߞߏ ߞߊߣߊ߬ ߘߏ߲߰ ߊ߬ߟߎ߫ ߡߊ߬߸ ߊ߬ ߣߌ߫ ߞߎ߲߬ߠߊ߬ߛߌ߮ ߘߴߊ߬ ߡߊߘߏ߲߬ ߊ߬ ߟߊ߫ ߞߎ߲߬ߠߊߛߌ߰ߣߍ߲ ߠߊ߫ ߢߊ ߡߍ߲ ߡߊ߬.

ߟߊ߬ߕߍ߰ߦߊ ߣߌ߲߬ ߘߏ߲߬ ߖߊ߲߬ߝߊ߬ ߘߊ߫ ߟߋ߬ ߘߋ߬، ߓߊߏ߬߸ ߊ߬ ߦߌ߬ߘߊ߬ ߞߏ߫ ߞߊ߲ߕߌ߯ߘߊ ߓߌ߬ߟߊ߬ߢߐ߲߰ߡߊ ߗߋߕߌ߯ߘߊ ߟߊ߫ ߓߊ߯ߙߊ߫ ߞߘߎ߬ߜߍߟߍ߲ ߘߏ߫ ߦߋ߫ ߡߎ߲߬ ߘߌ߫߸ ߞߊ߬ ߞߊ߲ߕߌ߮ ߟߊ߫ ߞߎߡߊ ߓߍ߯ ߦߟߍ߬ߡߊ߲߫ ߝߊ߬ ߓߘߊ ߛߓߍߟߌ ߟߎ߬ ߘߐ߫، ߞߊ߬ߕߎ߲߯߸ ߞߏ߫ ߞߊ߬ ߡߐ߰ ߟߎ߬ ߢߌߣߌ߲߫߸ ߡߍ߲ ߠߎ߬ ߘߌ߫ ߛߋ߫ <<ߞߎ߲߬ߠߊ߬ߛߌ߮ ߟߊ߫ ߛߓߍ߫ ߞߘߎ߬ߜߍߟߍ߲ ߠߎ߬ ߘߟߊߡߌ߬ߣߊ߬ ߟߊ߫ ߝߊ߬ߛߏ߬ ߞߊ߲ ߠߎ߬ ߘߐ߫>> ߞߵߏ߬ ߟߊ߫ <<ߡߙߌߦߊ߫ ߟߊߖߍ߲ߛߍ߲ߕߊ ߘߏ߫ ߟߎ߫ ߝߣߊ߫ ߞߊ߲߬ ߛߐ߲߬.>> ߟߊ߬ߢߌߣߌ߲ ߡߍ߲ ߘߏ߲߬ ߦߴߏ߬ ߟߊ߫߸ ߏ߬ ߟߋ ߝߘߏ߬ߓߊ߬ ߟߌߤߟߊ ߟߎ߫ ߓߌ߬ߟߊ ߘߌ߫ ߓߍ߯ ߛߊ߬ߥߏ߬ ߘߐ߫߸ ߘߏ߫ ߞߊߣߊ߬ ߘߏ߫ ߢߌ߬ߣߌ߲߬ߞߊ߬ ߞߏ߫ ߡߎ߲߬ ߝߐߣߍ߲߫، ߓߊߏ߬߸ ߖߡߊ߬ߣߊ ߣߌ߫ ߖߡߊ߬ߣߊ߬ߘߋ߲ ߛߌ߫ ߕߍ߫ ߝߊ߬ߙߊ߲߬ߛߌ߬ ߘߌ߫.

ߝߊ߬ߛߏ߬ ߞߊ߲ ߠߎ߬ ߞߐߡߊߓߌ߲ߓߌ߲߫ ߞߏ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߟߊ߬ߕߍ߰ߦߊ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߕߣߐ߬ߓߊ߫ ߟߋ߬ ߓߌ߬ߟߊ߬ߢߐ߲߰ߡߊ ߢߊߦߋ ߟߊ߫ ߓߍ߯ ߓߟߏ߫ ߖߡߊ߬ߣߊ ߞߣߐ߫߸ ߞߎߡߊߕߍ߫ ߟߐ߬ߦߙߌ߬ߕߐ ߟߎ߫ ߡߊ߬، ߊ߬ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫ ߞߏ߫: <<ߞߊ߬ ߟߊ߬ߛߋ߬ߟߌ ߟߎ߬ ߞߍ߫ ߝߊ߬ߛߏ ߛߓߍߟߌ ߟߎ߬ ߘߐ߫߸ ߡߍ߲ߞߊ߲ߡߊ ߟߎ߬ ߕߊ߬ߣߍ߲ ߞߵߊ߬ ߟߊ߫ ߞߘߐߛߓߍߟߌ ߟߎ߫ ߞߊ߲߬.>> ߛߊ߫ ߓߍ߯ ߘߌ߫ ߢߊߦߋߟߌ ߞߍ߫߸ ߞߊ߬ ߞߊ߲߫ ߞߏ ߖߐ߬ߘߐ ߓߐ߫ ߡߐ߱ ߟߎ߬ ߟߊ߫ ߖߡߊ߬ߣߊ ߞߊ߲ߕߌ߮ ߟߊ߫ ߞߏ ߟߎ߬ ߢߊߦߋ ߘߐ߫.

ߣߌ߲߬ ߦߋ߫ ߞߏ߫ ߞߎߘߊ߫ ߟߋ߬ ߘߌ߫߸ ߊ߬ ߣߴߊ߬ ߦߋ߫ ߞߏ߫ ߝߟߐ ߟߋ߬ ߘߌ߫ ߖߌ߬ߣߍ߫ ߓߌ߬ߟߊ߬ߢߐ߲߰ߡߊ ߞߊߡߊ߲ ߞߣߐ߫ ߞߎ߲߬ߠߊ߬ߛߌ߮ ߟߊ߫ ߞߎ߲߬ߠߊ߫، ߘߎߢߊ߫ ߢߎߡߍߙߋ߲߫ ߕߟߋ ߡߍ߲ ߦߋ߫ ߣߌ߲߬߸ ߞߏ߫ ߞߊ߬ ߝߊ߬ߛߏ߬ ߞߊ߲ ߠߎ߬ ߘߊ߲ߞߎ߲߫ ߏ߬ ߟߎ߬ ߓߍ߯ ߘߐ߫، ߊ߬ ߘߏ߲߬߸ ߒߞߏ ߛߓߍߟߌ ߛߊ߲ߞߘߐߕߊ߬ ߢߊ߬ ߛߎ߮ ߡߍ߲ ߦߋ߫ ߣߌ߲߬߸ ߏ߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߊ߬ ߛߍ߬ߘߏ߲߬ߠߊ ߟߎ߬ ߛߎ ߣߌ߫ ߕߋ߬ߟߋ ߓߊ߯ߙߓߊ ߟߎ߬ ߦߋ߫ ߓߐ ߞߊ߲߬ ߜߍߟߊ߫، ߡߍ߲ ߕߏߣߍ߲߫ ߘߐߙߐ߲߫߸ ߞߊ߬ ߝߊ߬ߛߏ߬ ߞߊ߲ ߓߊߓߋ߬ߓߊ߰ ߖߐ߲ߖߐ߲ ߠߎ߬ ߡߊߘߏ߲߬ ߊ߬ߟߎ߬ ߟߊ߫߸ ߡߍ߲ ߠߎ߬ ߘߌ߫ ߛߋ߫ ߓߊ߯ߙߊ ߞߍ߫ ߟߴߊ߬ ߢߌ߬ߡߊ ߟߊ߫߸ ߞߊ߬ ߖߡߊ߬ߣߊ߬ߘߋ߲ ߠߎ߫ ߥߛߊ߬.

ߓߊߏ߬߸ ߊ߲ ߛߋ߫ ߘߊ߫ ߡߐ߱ ߘߏ߫ ߟߎ߫ ߝߍ߬߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߝߌ߬ߟߊ߫ ߟߋ߬ ߤߊߡߌ߲ ߦߴߊ߬ߟߎ߬ ߟߊ߫:

߁߭ ߺ <<ߊ߬ ߞߊߣߊ߬ ߘߌ߫ ߡߐ߰ ߟߎ߫ ߡߊ߬߸ ߡߍ߲ ߠߎ߬ ߟߐ߲߫ ߞߏ ߕߴߊ߬ ߘߐ߫، ߡߍ߲ ߖߍ߬ߘߍ ߘߌ߫ ߞߍ߫ ߕߙߎ߬ ߘߌ߫ ߞߊ߬ ߞߊ߲ߕߌ߮ ߟߊ߫ ߞߎߡߊ ߟߎ߬ ߘߐߝߌ߲߬ ߡߌߡߐ߫.>>

߂߲ ߺ <<ߊ߬ ߞߊߣߊ߬ ߕߏ߫ ߝߐ ߘߐ߫߸ ߊ߬ ߦߋ߫ ߓߌ߬ߟߊ߬ ߞߍߟߌ ߡߎ߬ߙߊ߲ ߞߣߐ߫.>> ߖߡߊ߬ߣߊ߬ߘߋ߲ ߘߏ߫ ߟߎ߫ ߞߎߡߊ߫ ߞߊ߲ ߠߵߏ߬ ߘߌ߫ ߜߎ߬ߕߙߎ ߞߣߐ߫.

ߒ߬ߓߊ߬߸ ߝߊ߬ߛߏ߬ ߞߊ߲ ߠߎ߬ ߣߌ߫ ߝߊ߬ߛߏ ߛߓߍߟߌ ߟߎ߬ ߓߘߊ߫ ߘߏ߲߬ ߖߡߊ߬ߣߊ ߟߥߊ߬ߟߌ߬ߟߌ ߛߋߓߊ߯ߦߊ ߓߏ߲ߓߊ ߞߣߐ߫߸ ߞߊ߬ ߟߐ߲ߠߌ߲ ߠߎ߬ ߟߊߕߊ߬ߡߌ߲߬߸ ߞߊ߬ ߟߐ߲ߠߌ߲ߦߊ ߟߎ߬ ߟߊߥߙߎߞߌ ߞߍ߫ ߢߍߕߊ ߘߌ߫.