߂߀߂߆ ߘߓߊ߬ߕߊ ߕߟߋ߬ ߁߁ ߣߌ߲߬ ߡߊ߬߸ ߖߌ߬ߣߍ߫ ߞߊ߬ߣߎ߲߬ߕߋ߬ߦߊ ߕߏ߰ߝߏ ߞߵߊ߬ ߛߌ߲ߘߌ ߛߊ߲߬ ߞߋߟߋ߲ ߛߊ߲߬ߞߎ߲߬ߓߍ߲ ߞߍ߫ ߟߋ߬، ߛߊ߲߬ ߞߋߟߋ߲߫ ߓߍߓߊ߯ߦߊ ߓߍ߲߬ߒ߬ߛߋ߲߬ߡߊ ߏ߬ ߟߋ ߞߏߛߐ߲߬߸ ߊ߬ ߞߊ߲ߕߌ߯ ߛߙߍߞߍ ߝߌߟߊߣߊ߲߸ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߞߊ߬ ߕߏ߰ߝߏ ߟߊ߫ ߞߍߣߍ߲ ߘߏ߫ ߟߎ߫ ߝߐ߫ ߞߵߊ߬ ߕߊ߬ ߛߌ߲ߘߟߌ ߕߎ߬ߡߊ ߡߊ߬ ߞߵߊ߬ ߛߌ߰ ߛߌߛߍ߲߬ ߠߊ߫߸ ߊ߬ߟߎ߬ ߓߘߊ߫ ߛߋ߫ ߡߍ߲ ߞߍ߫ ߟߊ߫ ߝߊ߬ߛߏ߬ ߞߊ߲ ߠߎ߬ ߞߐߡߊߓߌ߲ߓߌ߲ ߘߐ߫ ߖߌ߬ߣߍ߬ ߞߣߐ߫.

ߞߊ߲ߕߌ߯ ߛߙߍߞߍ߫ ߝߌߟߊߣߊ߲ ߠߊ߫ ߟߊ߬ߛߋ߬ߟߌ ߣߌ߲߬ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ <<ߖߌ߬ߣߍ߫ ߞߊ߬ߣߎ߲߬ߕߋ߬ߦߊ ߦߋ߫ ߓߘߍ߬ߓߘߍ߬ߟߌ߬ ߕߏ߯ߝߏ ߟߋ߬ ߘߌ߫߸ ߡߍ߲ ߦߋ߫ ߝߊ߬ߛߏ߬ ߞߊ߲ ߠߎ߬ ߞߐߡߊߓߌ߲ߓߌ߲߫ ߕߏ߯ߝߏ ߘߌ߫ [...] ߞߵߊ߬ߟߎ߫ ߣߌ߭ ߡߞߊߘߊ߲߫ ߖߡߊ߬ߣߊ ߡߊ߬ߡߙߊ߬ߟߌ ߘߐ߫...>> ߡߍ߲ ߠߊ߫ ߟߊ߬ߢߌߣߌ߲ ߦߋ߫ <<ߖߡߊ߬ ߟߎ߬ ߟߊߘߍ߭ ߘߌ߫߸ ߡߍ߲ ߠ߬ߎ ߦߴߊ߬ ߝߍ߬ ߝߊ߬ߛߏ߬ ߞߊ߲ ߠߎ߬ ߦߴߊ߬ߟߎ߫ ߟߐ߬ ߊ߬ ߟߐ߬ߘߎ߮ ߘߐ߫ ߝߊ߬ ߖߡߊߣߊ ߞߣߐ߫.>>

ߊ߬ߟߋ ߟߊ߫ ߝߐߟߌ߫ ߘߐ߫߸ ߖߌ߬ߣߍ߫ ߞߊ߬ߣߎ߲߬ߕߋ߬ߦߊ ߕߏ߰ߝߏ ߞߵߊ߬ ߘߏ߲߬ߞߊ߲ ߠߊߓߐ߫ ߂߀߂߅ ߘߓߊ߬ߕߊ ߁߁ ߠߋ߬ ߡߊ߬ ߞߙߎ߬ߛߊ߫߸ ߞߵߏ߬ ߞߍ߫ ߊ߬ ߟߊ߫ <<ߝߘߏ߬ߓߊ߬ ߟߊ߬ߥߊ߲߬ߞߊ߲߬ߠߌ߲ ߘߌ߫߸ ߞߊ߬ ߘߎߢߊ߫ ߟߊߞߍ߫ ߊ߬ ߞߊ߬ߟߊߡߊ߬.>> ߞߏ߫ ߓߘߍ߬ߓߘߍ߬ߟߌ߬ ߕߏ߯ߝߏ߫ ߓߘߊ߫ ߟߊߥߟߌ߬߸ ߝߊ߬ߛߏ߬ ߞߊ߲ ߠߎ߬ ߡߞߊߘߊ߲߫ ߞߊ߲ߡߊ߬.

ߕߏ߰ߝߏ ߣߌ߲߬ ߓߘߴߊ߬ ߦߌ߬ߘߊ߬߸ ߞߏ߫ ߊ߬ߟߎ߫ ߞߊ߬ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߟߊ߬ߖߊ߲߬ߞߏ߬ߟߌ߬ ߛߌߦߊߡߊ߲߫ ߠߋ߬ ߞߍ߫ ߖߡߊ߬ߣߊ ߘߎ߰ߓߊ߬ ߛߌߦߊߡߊ߲߫ ߣߴߊ߬ ߘߎ߰ߣߍ߲߬ ߛߌߦߊߡߊ߲߫ ߞߣߐ߫߸ ߓߎߛߎ߬ߙߊ߬ ߦߴߏ߬ ߘߏ߫ ߟߋ߬ ߘߌ߫ ߞߊ߲ߞߊ߲߫߸ ߊ߲ߕߊ ߞߌ߲߬ߘߊ ߟߊ߫ ߞߐߣߊߞߙߌ߫߸ ߞߎߡߊߕߍ߫ ߡߊ߯ߡߎ߲߫ ߣߌ߫ ߞߌ߲ߘߌߦߊ߫ ߡߊ߬߸ ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫ ߕߍ߫، ߛߊ߲߬ ߞߋߟߋ߲ ߣߌ߲߬ ߞߣߐ߫߸ ߕߏ߰ߝߏ ߣߌ߲߬ ߓߘߊ߫ ߛߋ߫ ߡߊ߬ߡߙߊ߬ߟߌ߬ <<ߛߓߍߘߊ߫ ߂߄ ߟߋ߬ ߛߏ߯ߙߏ߫ ߖߌ߬ߣߍ߬ ߛߏ߫ ߞߎ߲ߓߊ ߣߴߊ߬ ߛߏ߫ ߡߌߛߍ߲ ߠߎ߬ ߟߊ߫.>>

ߟߊ߬ߞߟߏ߬ߞߟߏ߬ߟߌ ߣߌ߫ ߓߟߐߟߐ ߟߊ߬ߥߊ߲߬ߞߊ߲߬ߠߌ߲ ߠߎ߬ ߘߊߞߎ߲ ߘߐ߫߸ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߞߵߊ߬ ߦߌ߬ߘߊ߬ ߞߏ߫ ߕߏ߰ߝߏ ߣߌ߲߬ ߓߘߊ߫ ߛߋ߫ ߓߊ߬ߘߏ߬ߢߐ߲߰ߦߊ߬ ߞߟߊߒߞߋ߫ ߛߌ߰ ߟߊ߫ ߛߋ߲߬ߠߊ߫ ߕߎ߬ߡߊ߬ߙߋ߲߬ ߞߋߟߋ߲߫ ߖߊ߬ߕߋ߬ ߞߘߐ߫ ߟߏ߲ ߓߍ߯ ߡߊ߬ ߥߛߊߔ ߞߙߎߓߊ߫ ߝߌ߬ߟߊ߫ ߞߊ߲߬ ߊ߬ߟߎ߬ ߓߟߏ߫߸ ߛߊ߫ ߞߊ߬ ߝߊ߬ߛߏ߬ ߞߊ߲ ߠߎ߬ ߟߊߥߊ߲߬ߞߊ߲ ߞߎߡߊ ߟߋ߬ ߟߊߛߐ߲ߞߐ߫ ߞߘߊߎ߫، ߊ߬ ߟߊ߫ ߝߐߟߌ߫ ߘߐ߫߸ ߡߙߌߦߊ ߏ߬ ߓߘߊ߫ ߛߋ߫ ߓߐ߫ ߟߊ߫ ߜߍߟߊ߫߸ <<ߊ߲ ߓߘߊ߫ ߛߋ߫ ߕߎ߬ߡߊ߬ߙߋ߲߫ ߂߈߃ ߟߋ߬ ߞߍ߫ ߟߊ߫ ߛߊ߲߬ ߞߋߟߋ߲߫ ߣߌ߲߬ ߞߘߐ߫، ߏ߬ ߘߴߊ߬ ߦߌ߬ߘߊ߬ ߞߏ߫ ߊ߲ ߓߘߊ߫ ߟߏ߲߫ ߂߈߃ ߟߋ߬ ߞߍ߫ ߟߊ߫ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߘߐ߫ ߓߟߐߟߐ ߞߊ߲߬߸ ߡߍ߲ ߡߊ߫ ߓߟߏߕߍ߰ ߝߋߎ߫.>> ߊ߬ߟߎ߬ ߦߴߏ߬ ߞߊ߲߬ ߠߋ߬߸ ߖߐ߲߰ߛߊ߫ <<ߝߊ߬ߛߏ߬ ߞߊ߲ ߠߎ߬ ߦߋ߫ ߛߋ߫ ߊ߬ߟߎ߫ ߟߐ߬ߘߎ߮ ߛߐ߬ߘߐ߲߬ ߠߊ߫ ߝߊ߬ ߖߡߊߣߊ ߞߣߐ߫߸ ߞߊ߬ ߛߋ߫ ߓߊ߯ߙߊ ߞߍ߫ ߟߴߊ߬ ߘߐ߫ ߞߊ߬ ߛߋ߫ ߞߊ߬ߙߊ߲ ߞߍ߫ ߟߴߊ߬ ߘߐ߫.>> ߊ߬ ߞߵߏ߬ ߦߌ߬ߘߊ߬.

<<ߣߴߊ߲ ߞߊ߬ߛߌ߬ ߘߊ߫ ߞߏ߫ ߞߊ߬ ߓߊ߯ߙߊ ߞߍ߫ ߊ߬ ߘߐ߫߸ ߣߌ߫ ߞߊ߬ߙߊ߲ ߝߟߐ߫ ߡߊ߫ ߛߋ߫ ߞߍ߫ ߟߴߊ߬ ߘߐ߫߸ ߏ߬ ߦߋ߫ ߞߎߡߊ߫ ߕߐ߬ߞߊ߬ߖߍ ߟߋ߬ ߘߌ߫.>> ߊ߬ ߞߵߏ߬ ߦߌ߬ߘߊ߬߸ ߞߵߊ߬ ߝߐ߫ ߞߏ߫ ߝߊ߬ߛߏ߬ ߞߊ߲ ߠߎ߬ ߟߊߘߏ߲߭ ߞߊ߬ߙߊ߲߬ߕߊ ߟߎ߬ ߟߊ߫߸ ߏ߬ ߦߋ߫ ߞߍߕߊ߫ ߛߋ߲ߛߋߘߋ߲ ߠߋ߬ ߘߌ߫߸ ߊ߬ ߣߌ߫ <<ߝߊ߬ߛߏ߬ ߞߊ߲ ߠߎ߬ ߝߣߊ߫ ߞߊ߫ ߞߊ߲߫ ߠߋ߬ ߞߊ߬ ߞߊ߬ߙߊ߲߬߸ ߞߊ߬ ߓߊ߲߫ ߞߊ߬ ߞߊ߬ߙߊ߲ ߞߍ߫ ߊ߬ ߘߐ߫.>> ߏ߬ ߟߋ ߘߴߊ߬ ߞߍ߫߸ ߊ߬ ߘߌ߫ ߦߋ߫ ߡߌ߬ߙߌ߲߬ߘߌ ߝߍ߬ ߞߏ ߟߎ߬ ߘߐ߫ ߓߊ߯ߙߊ߫ ߘߊߞߎ߲ ߠߎ߬ ߓߍ߯ ߟߊߘߍ߬ߣߍ߲ ߘߐ߫.

ߕߏ߰ߝߏ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߫ ߞߊ߬ ߟߊ߬ߥߊ߲߬ߞߊ߲߬ߠߌ߲߬ ߓߟߋߓߟߋ߫ ߝߣߊ߫ ߞߍ߫ ߂߀߂߅ ߕߎߟߊߝߌ߲ ߕߟߋ߬ ߁߅ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߋ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߐߡߊߓߌ߲ߓߌ߲߫ ߠߊ߫߸ ߝߊ߬ߛߏ߬ ߞߊ߲ ߠ߬ߎ ߟߊߞߎ߲߬ߠߊ߬ߛߌ߰ߦߊ ߞߏߛߐ߲߬ ߊ߬ ߓߟߏ߫.

ߊ߬ ߞߊ߬ ߕߏ߬ߝߏ ߞߊ߲ߕߌ߮ ߛߎߝߌߦߣߊ߫ ߞߊ߲ߕߍ߫ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߕߊ߲߬ߘߏ߫ ߕߏ߰ߝߏ ߟߊ߫ ߢߍߥߟߊ ߟߎ߬ ߓߐߢߟߊ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߘߍ߬ߞߙߎ ߕߍߣߊ߬ ߡߊ߬ߡߌ߬ߣߊ߬ߟߌ߬ߟߊ߫ ߓߐ߫ ߟߊ߫ ߢߣߊߕߊߟߌ߫ ߣߊ߬ߕߐ ߢߌ߲߬ ߠߎ߬ ߘߐ߫߸ ߥߛߊ߬ߘߋ߲߬ߧߊ ߕߊ ߣߌ߫ ߞߊ߬ߝߏ߬ߙߋ߲ ߕߊ߸ ߞߵߏ߬ ߞߎ߲߭ ߞߍ߫ <<ߞߵߏ߬ ߞߎ߲߭ ߞߍ߫ ߞߏ߫ ߛߌߦߊߡߊ߲߫ ߘߌ߫>>߸ ߏ߬ ߡߍ߲ ߟߊ߬ߛߋ߬ߟߌ ߕߎ߲߬ ߓߘߊ߫ ߞߍ߫ ߊ߬ߟߎ߬ ߓߟߏ߫ ߞߊ߬ߞߘߐ߬߸ ߛߌߟߊߓߐߛߐ߯ߣߊ߫ ߞߊ߬ <<ߛߓߍ߫ ߛߐߘߐ߲ߓߊߟߌߦߊ>> ߞߎߡߊ ߡߍ߲߫ ߏ߬ ߞߣߐ߫.