ߒ߬ߓߊ߬߸ߒߞߏ ߛߓߍߛߎ߲ ߛߌ߲ߘߌ ߛߊ߲߬ ߇߇ ߢߊ߰ߢߊ߮ ߓߍ߲߬ߒ߬ߛߋ߲߬ߡߊ ߞߏߛߐ߲߬ ߒߞߏ ߘߍߞߙߎ߫ ߥߐ߯ߙߐ߫ ߟߎ߬ ߓߟߏ߫، ߣߊߟߌ߬ߡߎ߲߫ :( ߛߍ߲ߓߊ ߸ߒ. ߓ. ߘ. ߸ ߟ. ߞ.ߝ.߸ߒ.ߢ.ߦ.ߘ.߸ߞߙߏ߬ߝߏ) ߟߎ߬ ߘߌ߫߸ ߏ߬ ߟߎ߫ 

ߟߋ߬ ߣߐ߬ ߛߌ߲߬ߝߏ߲߬ߧߊ߬ߟߌ ߏ߬ ߓߍ߲߬ߒ߬ߛߋ߲߬ߡߊ ߕߣߐ߬ߓߐ߫ ߟߊ߫ ߖߌ߬ߣߍ߫ ߡߌ߬ߙߌ߲߬ߘߌ ߟߊ߫ ߞߎߓߋ ߟߊ߫ ߞߐߣߊߞߙߌ߫ ߞߐ߬ߟߏ߲ ߂߀߂߆ ߞߏ߲ߞߏߘߓߌ߫ ߕߟߋ߬ ߁߄ ߡߊ߬. 

ߖߊ߲߬ߖߏ߲ ߏ߬ ߡߍ߲ ߢߣߊߓߊ߯ߦߊ߫ ߟߊ߫ ߡߐ߰  ߛߘߍߡߊ߲߫ ߓߟߏ߫ ߞߊ߬ ߓߐ߫ ߘߎߢߊ߫ ߘߌ߲߬ߞߌ߬ߙߊ߬ ߛߘߍߡߊ߲߫ ߘߐ߫߸ߊ߬ ߣߌ߫ ߖߌ߬ߣߍ߫ ߕߌ߲߬ߞߎ߬ߘߎ߲߬ ߄ ߓߍ߯ ߘߏ߫ ߘߐ߫߸ ߏ߬ ߡߐ߱ ߘߏ߫ ߟߋ߬ ߖߌ߬ߣߍ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߘߌ߫߸ ߛߟߊߕߌ߯ ߓߊ ߎߙߌ߬ ߕߘߍ߬ ߞߣߍ ߞߊ߲߬߸ߛߟߊߕߌ߯ ߘߊ߲߬ߛߊ߫ ߞߙߏ߬ߡߊ ߞߐߦߌߘߊߓߊ߮ ߕߘߍ߬ ߞߣߍ ߞߊ߲߬߸ ߞߵߏ߬ ߟߊ߫ ߒߞߏ ߘߍߞߙߎ߫ ߛߘߍߡߊ߲߫ ߣߌ߫ ߒߞߏ߫ ߞߊߙߊ߲ߡߐ߮ ߟߎ߬ ߣߌ߫ ߒߞߏ ߞߊߙߊ߲ߘߋ߲ ߠߎ߬ ߣߌ߫ ߝߘߊ߬ߝߌ߲߬ߧߊ ߟߊߥߙߎߞߌ ߣߴߊ߬ ߞߊ߬ߣߌ߲߬ߓߊ߮ ߟߎ߬ ߓߍ߯ ߟߊߘߍ߬ߣߍ߲ ߞߊ߲߬߸ ߢߊ߰ߙߊ߬ ߛߘߍߡߊ߲߫ ߠߋ߬ ߝߣߊ߫ ߕߘߍ߬ ߞߣߍ ߞߊ߲߬ ߞߵߏ߬ ߟߊ߫ ߛߞߎ߬ߦߊ߬ߟߊ ߟߎ߬ ߝߣߊ߫ ߞߊ߲߬߸ߞߊ߬ ߥߎ߬ߦߊ߲߬ߞߌ߬ߟߌ߬ ߛߞߎ ߟߎ߬ ߟߊ߫ ߕߘߍ߬ߒ߬ߘߐ߬ߓߊ߮ ߟߎ߬ ߢߍ߫. 

ߖߊ߲߬ߖߏ߲ ߣߌ߲߬ ߘߊߡߌ߬ߣߊ߬ ߘߊ߫ ߁߄ ߕߎߡߊ ߟߋ߬ ߟߊ߫߸ߛߐ߰ ߞߍ߫ ߘߊ߫ ߖߊ߲߬ߖߏ߲ ߛߌ߲߬ߝߏ߲߬ߧߊ߬ߟߌ ߝߘߏ߬ߓߊ߬ ߕߐ߲ߕߌ߮ ߟߊ߫ ߟߊ߬ߛߣߍ߬ߟߌ߬ ߓߋߟߋ߲ߠߊ ߟߋ߬ ߟߊ߫ ߕߊ߲߬ ߘߐ߫.

 << ߓߊߘߋ߲߫ ߢߣߊߓߊ߯ ߓߘߍ ߟߎ߬،ߊߟߎ߫ ߣߌ߫ ߛߣߍ߫ ߒߞߏ ߛߓߍߛߎ߲ ߛߌ߲ߘߌ ߛߊ߲߬ߞߎ߲߬ߢߐ߲߮ ߇߇߲ ߘߐ߫߸ ߖߊ߲߬ߖߏ߲ ߣߌ߲߬ ߛߌ߲߬ߝߏ߲߬ߧߊ߬ߟߌ ߘߍ߬ߘߊ ߕߐ߯ ߘߐ߫،ߊ߬ ߣߌ߫ ߒߞߏ߫ ߞߊߙߊ߲ߘߋ߲ ߡߎ߰ߡߍ߫߸ߊߟߎ߫ ߣߌ߫ ߛߣߍ߫.

ߒ ߧߋ߫ ߓߊߙߌߞߊ߫ ߓߌ߬ߟߊ߬ ߟߴߊߟߎ߫ ߧߋ߫ ߊߟߎ߫ ߕߏ߲߬ߘߊ ߕߊ߭ ߟߊ߫ ߞߊ߬ ߣߊ߬ ߊ߲ ߠߊ߫ ߞߟߌߟߌ ߣߌ߲߬ ߢߣߊߓߊ߯ߦߊ߫ ߖߐ߲߰ߛߊ߫ ߊ߲ ߘߌߣߵߊ߲ ߠߊ߫ ߞߋ߬ߟߋ߲߬ߧߊ ߟߊߒߞߣߍߡߊ߫߸ߘߟߊߘߍߟߌ ߞߊ߲߬ ߖߊ߲߬ߖߏ߲ ߞߟߊ߬ߟߊ߬ߡߊ ߡߍ߲ ߘߐ߫߸ߖߊ߲߬ߖߏ߲ ߏ߬ ߡߍ߲ ߞߎ߲߬ߕߐ߮ ߦߋ߫ ߞߏ߫ ߝߊ߬ߛߏ߬ ߞߊ߲ ߠߎ߬ ߟߊߞߎ߲߬ߠߊ߬ߛߌ߰ߦߊ، ߏ߬ ߦߋ߫ ߞߘߎ߬ߜߍߟߍ߲ ߘߏ߫ ߘߊ߲ߘߊ ߟߋ߬ ߘߌ߫>>

ߊ߬ ߞߊ߬ ߝߏ߬ߟߌ ߟߊߛߋ߫ ߒߞߏ߫ ߘߍߞߙߎ߫ ߥߐ߯ߙߐ߫ (߆) ߛߌ߲߬ߝߏ߲ ߠߎ߬ ߓߍ߯ ߟߊߘߍ߬ߣߍ߲ ߡߊ߬. 

ߣߊߟߌ߬ߡߎ߲߫ :( ߛߍ߲ߓߊ ߸ߒ. ߓ. ߘ. ߸ ߟ. ߞ.ߝ.߸ߒ.ߢ.ߦ.ߘ.߸ߞߙߏ߬ߝߏ) ߟߎ߬ ߘߌ߫߸ ߞߊ߬ ߡߐ߱ ߟߎ߬ ߦߟߌ ߓߌ߬ߟߊ߬ ߒߞߏ ߛߓߍߛߎ߲ ߛߌ߲ߘߌ ߕߎ߬ߡߊ ߞߐ߫߸ ߏ߬ ߡߍ߲ ߞߍ߫ ߘߊ߫ ߞߏ߲ߞߏߘߓߌ ߕߟߋ߬ ߁߄ ߡߊ߬߸ ߞߵߊ߬ ߟߴߊ߬ ߞߊ߲߬ ߞߏ߫ ߡߝߊ߬ߟߋ߲߬ߣߌ߲߬ ߛߘߍߡߊ߲߫ ߓߘߊ߫ ߘߏ߲߬ ߒߞߏߞߏ ߘߐ߫ ߘߊߞߎ߲߫ ߛߌߦߊߡߊ߲߫ ߘߐ߫.

ߊ߬ ߞߵߊ߬ ߟߊ߫ ߟߊ߬ߛߣߍ߬ߟߌ߬ ߓߋߟߋ߲ߠߊ ߞߎ߲߭ߘߏ߲߬ ߒߞߏ ߡߐ߮ ߟߎ߬ ߟߊ߫ ߓߍ߲߭ ߠߋ߬ ߝߊ߲߬ߞߊ ߘߏ߲߭ ߡߊ߬߸ߓߊߏ߬ ߞߏ߫ ߡߊ߲߰ߘߋ߲߫ ߛߊ߲߬ߘߊ ߓߘߊ߫ ߏ߬ ߦߌ߬ߘߊ߬ ߘߊߞߎ߲߫ ߛߌߦߊߡߊ߲߫ ߘߐ߫ ߞߏ߫ :

 << ߓߟߏߞߐߣߍ߲߫ ߞߋߟߋ߲߫ ߕߍ߫ ߓߍ߬ߙߍ ߕߊ߬߸ߊ߬ ߣߌ߫ ߞߏ߫ ߖߊ߬ߡߊ ߕߍ߫ ߘߍ߲߬ ߞߊ߬ ߝߋ߲߫ ߞߡߊ߫ ߘߊ߬ߡߎ߲߬ >>

ߏ߬ ߟߋ߬ ߞߐߝߍ߬ ߛߊ߫ ߖߌ߬ߣߍ߫ ߞߎ߲߬ߠߊ߬ߛߌ߮ ߞߎ߲߬ߕߌ߮߸ ߛߟߊߕߌ߯ ߓߊ ߎߙߌ߬  ߝߣߊ߫ ߞߊ߬ ߛߙߊ߬ߣߎ߲ ߕߊ߬،ߞߊ߬ ߛߐ߰ ߊ߬ ߝߐ߫ ߡߊ߬ ߡߊ߬ߣߌ߲߬ߞߊ߬ߞߊ߲ ߘߐ߫ ߡߎߣߎ߲߬ ߞߏ߫:

<< ߊߟߎ߫ ߣߌ߫ ߗߋ߫ >>. 

ߒ߬ߓߊ߬߸ߊ߬ ߟߊ߫ ߛߙߊ߬ߣߎ߲ ߓߏ߬ߙߌ߬ ߘߊ߫ ߝߊ߬ߛߏ߬ ߞߊ߲ ߠߎ߬ ߕߐ߬ߣߐ ߟߋ߬ ߞߊ߲߬،ߊ߬ ߜߋ߲ߜߋ߲߫ ߒߞߏ ߟߊ߫ ߛߋߞߏߦߊ߫ ، ߏ߬ ߘߏ߫ ߟߋ߬ ߞߏ߫ :

ߞߊ߬ߦߌ߯ ߁߉߄߉߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߞߊ߬ ߥߎߟߊ߫ ߖߊ߲߫ ߞߏ ߘߏ߫ ߦߋ߫ ߞߊ߬ ߣߊ߬ ߓߐߘߊ߫ ߖߐ߲ߖߐ߲߫ ߘߌ߫߸ ߒߞߏ ߛߍ߬ߘߏ߲߬ߠߊ ߟߎ߬ ߝߣߊ߫ ߞߵߏ߬ ߛߌߟߊ߫ ߞߋߟߋ߲ ߕߊ߯ߡߊ߫ ߥߊ߯ߟߌߥߊ߯ߟߌ߫ ߖߌ߰ߡߊ߬ߝߊ ߟߊߘߏ߲߬ ߞߊ߲ߡߊ߬.

ߓߊ߯ߙߊ ߏ߬ ߘߏ߲߬ ߡߊ߫ ߞߍ߫ ߞߟߐ߬ߞߟߐ߬ ߓߊ߯ߙߊ߫ ߘߌ߫، ߘߏ߫ ߟߎ߫ ߕߎ߲߬ ߦߴߊ߬ ߖߌ߰ ߟߊ߫ ߞߏ߫ ߘߐߞߏߟߏ߲ ߠߋ߬ ߘߌ߫، ߓߊ߬ߙߌ߬ ߓߌ߬߸ ߒߞߏ ߕߐ߬ߣߐ ߓߘߊ߫ ߦߋ߫ ߟߋ߬ߟߋ ߓߍ߯ ߘߏ߫ ߘߐ߫.

ߊ߲ ߓߘߊ߫ ߒߞߏ ߛߓߍߟߌ ߛߎߥߊ߲ߘߌ߫ ߞߏߕߌ߯ߝߟߐߘߊ ߟߊ߫ ߝߐ߰ߓߍ߬ߝߐ߯ߓߍ ߟߎ߬ ߛߓߍ ߘߐ߫߸ ߓߊߏ߬߸ ߊ߬ ߞߊ߬ߙߊ߲߬ߓߊ߮ ߞߊ߫ ߛߌߦߊ߫.

ߡߊ߬ߣߋ߲߬ߞߊ߬ ߞߊ߲ ߛߓߍ ߘߐ߫߸ ߏ߬ ߛߓߍߟߌ߫ ߕߴߦߋ߲߬߸ ߡߍ߲ ߘߴߊ߬ ߛߎߡߊ߲߫ ߒߞߏ ߘߐ߫.

 ߌ ߓߊ߯ ߖߌ߬ߣߍ߬ ߡߊߝߟߍ߫ ߓߌ߬߸ ߝߊ߬ߛߏ߬ ߞߊ߲ ߠߎ߬ ߓߘߊ߫ ߓߌ߬ߟߊ߫ ߖߡߊ߬ߣߊ ߛߌ߰ߞߊ߲ ߞߣߐ߫.

ߊ߬ ߓߘߊ߫ ߞߍ߫ ߛߋ߲ߛߋߘߋ߲ ߘߌ߫ ߡߊ߬ߡߙߊ߬ߟߌ߬ ߞߎ߲ߘߊ߫ ߡߎ߬ߕߎ߲߬߸ ߞߊ߬ ߞߎߡߊ߫ ߖߡߊ߬ߣߊ߬ߘߋ߲ ߠߎ߫ ߝߍ߬ ߊ߬ߟߎ߫ ߕߏ߬ ߛߎ߲߬ ߞߊ߲ ߘߐ߫߸ ߊ߬ߟߎ߬ ߦߋ߫ ߡߍ߲ ߢߊߦߋ߫ ߟߊ߫>>

ߛߟߊߕߌ߯ ߓߊ ߎߙߌ߬ ߟߊ߫ ߓߋߟߋ߲ߠߊ ߞߐߝߍߟߊ ߟߋ߬ ߘߐ߫ ߛߊ߫ ߸ߖߊ߲߬ߖߏ߲ ߕߘߍ߬ߒ߬ߘߐ߬ߓߊ߮ ߟߎ߬ ߞߵߊ߬ߟߎ߬ ߟߊ߫ ߓߋߟߋ߲ߠߊ ߘߐߞߊ߬ߙߊ߲߬ ߞߵߊ߬ߟߎ߬ ߟߊ߫ ߘߍ߬ߞߙߎ ߣߴߊ߬ߟߎ߬ ߟߊ߫ ߕߌ߲߬ߞߎߘߎ߲ ߠߎ߬ ߞߐߦߌ߬ߘߊ߬ ߦߏ߫ :

ߡߎߛߊ߫ ߓߊߟߊ߲ߘߎ߫ ߖߊߟߏ߫߸ ߏ߬ ߟߊ߫ ߓߋߟߋ߲ߠߊ ߞߎߡߊ߫ ߘߊ߫ ߞߏ߫ ߛߘߍߡߊ߲߫ ߠߋ߬ ߞߊ߲߬߸ ߞߊ߬ ߛߐ߰ ߝߏ߬ߟߌ ߡߊ߬߸

ߝߏ߬ߟߌ ߏ߬ ߟߋ߬ ߞߐߝߍ߬ ߛߊ߫߸ߊ߬ ߘߏ߲߬ ߘߊ߫ ߛߟߏ߬ߡߣߊ߬ ߞߊ߲ߕߍ߫ ߣߌ߫ ߟߌߓߊ߲ߞߊߞߍ ߟߊ߫ ߘߐ߬ߝߐ ߘߐ߫،ߞߊ߬ ߞߎߡߊ߫ ߒߞߏ ߛߌ߲ߘߌ ߢߊ߫ ߘߐ߬ߝߐ ߞߊ߲߬ ߸ߡߐߣߍ߫ ߣߌ߫ ߞߎ߲߭ ߡߍ߲ ߞߵߊ߬ ߟߐ߬ ߒߞߏ ߢߊߢߌߣߌ߲߫ ߠߊ߫߸ߞߵߏ߬ ߦߌ߬ߘߊ߫ ߖߊ߬ߡߊ ߟߊ߫. 

 ߞߵߊ߬ ߟߊ߫ ߓߋߟߋ߲ߠߊ ߏ߬ ߞߎ߲߭ ߘߏ߲߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߝߣߊ߫ ߞߎߟߎ߲ߖߋ߫ ߡߵߊ߬ ߣߴߊ߬ ߟߊ߫ ߞߏߕߌ߯ ߝߟߐ ߓߊ ߎߙߌ߬ ߣߌ߫ ߘߊ߲߬ߛߊ߫ ߞߙߎ߬ߡߊ߫ ߣߴߊ߬ ߞߐ ߟߎ߬... 

ߞߊ߲ߞߊ߲߫ ߕߌ߲߬ߞߎߘߎ߲ ߓߋߟߋ߲ߠߊ ߘߐߞߊ߬ߙߊ߲߬ߓߊ߮ ߞߍ߫ ߘߊ߫ ߛߟߊߕߌ߯ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߟߋ߬ ߘߌ߫.

ߏ߬ ߟߊ߫ ߓߋߟߋ߲ߠߊ ߞߎ߲߬ߕߐ߮ ߟߋ߬ ߕߘߍ߬ ߞߏ߫:

<< ߞߊ߬ ߝߊ߬ߛߏ߬ߞߊ߲ ߠߎ߬ ߞߊ߬ߙߊ߲߬߸ߍ߲߬ߍ߲߫،ߞߏ߬ߣߌ߲߬ ߞߊ߬ ߞߊ߬ߙߊ߲ ߞߍ߫ ߝߊ߬ߛߏ߬ߞߊ߲ ߘߐ߫ >>

ߊ߬ ߓߊ߲߫ ߘߊ߫ ߝߣߊ߫  ߞߊ߬ ߖߡߊ߬ߣߊ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߝߏ߬ ߕߊ߲߬ ߘߐ߫ ߞߏ߫ :

<<ߒ ߧߋ߫ ߒ ߠߊ߫ ߓߋߟߋ߲ߠߊ ߟߊߝߟߐ ߟߊ߫ ߖߌ߬ߣߍ߫ ߞߊ߬ߝߏ ߞߎ߲߬ߕߌ߮ ߝߏ߭ ߡߊ߬߸ ߏ߬ ߡߍ߲ ߞߋߟߋ߲߫ ߔߋ߫ ߝߏ߭ ߘߌ߫ ߡߌ߬ߙߌ߲߬ߘߌ ߓߍ߯ ߥߛߊ߬ >>

ߊ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߞߏ߫ :

<<ߡߌ߬ߙߌ߲߬ߘߌ ߓߊ߯ ߞߊ߬ߛߌ߬ ߞߏ ߘߏ߫ ߞߐ߫ ߞߏߕߊ߲߫ ߸ߞߵߊ߬ ߟߴߊ߬ ߢߊ ߞߊ߲߬ ߞߏ߫ ߊ߬ ߣߌߞߊ߲ߞߏ ߟߋ߬߸ ߢߍߡߐ߯ ߓߘߍ ߟߴߏ߬ ߞߎ߬ߘߎ ߕߋ߬ ߟߊ߫ ߞߵߊ߬ ߓߐ߫ ߊ߬ߟߎ߬ ߞߊ߲ߠߊ߫ >>

ߛߟߊߕߌ߯ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߟߋ߬ ߞߊ߲߫ ߕߋ߲߬߸ ߞߊ߲ߞߊ߲߫ ߣߌ߫ ߞߘߏ߬ߛߊ߬ ߓߋߟߋ߲ߠߊ ߘߐߞߊ߬ߙߊ߲߬ߓߊ߮. 

ߡߎߛߑߕߝߊ߬ ߛߎߥߊ߲ߘߌ߫ ߛߊ߰ߣߐ߫  ߝߣߊ߫ ߞߊ߬ ߛߙߊ߬ߣߎ߲ ߕߊ߬߸ߊ߬ߟߋ ߟߋ߬ ߡߍ߲ ߞߊ߬ ߒߛߙߍߜߘߍ߬ ߟߊ߫ ߓߋߟߋ߲ߠߊ ߘߐߞߊ߬ߙߊ߲߬ ߸ߞߊ߬ ߛߐ߰ ߒߞߏ߫ ߡߊ߬ߞߟߐ ߟߎ߬ ߣߌ߫ ߒߞߏ߫ ߘߍ߬ߞߙߎ߬ ߥߐ߯ߙߐ߫ ߟߎ߬ ߕߊ߲߬ߘߏ ߡߊ߬ ߞߵߊ߬ ߓߍ߲߬ ߒߞߏ ߛߓߍߛߎ߲ ߛߌ߲ߘߌ ߛߊ߲߬ ߇߇ ߢߊ߰ߢߊ߮ ߛߌ߲߬ߝߏ߲߬ߧߊ߬ߟߌ ߡߊ߬ ߓߍ߲߭ ߣߌ߫ ߢߐ߲߯ ߝߊ߯ߡߎ߲ ߞߣߐߡߊ߬. 

ߟߊ߱ߦߌ߬ ߒߞߏ ߞߐ߲ߘߍ߫߸ߊ߬ߟߋ ߟߋ߬ ߝߣߊ߫ ߞߍ߫ ߘߊ߫ ߡߊ߲߬ߖߊ߬ߣߊ߫ ߣߌ߫ ߛߌߙߌ߲߫ ߓߋߟߋ߲ߠߊ ߘߐߞߊ߬ߙߊ߲߬ߓߊ߮ ߘߌ߫߸ߏ߬ ߝߣߊ߫ ߛߐ߰ ߘߊ߫ ߘߍ߬ߞߙߎ ߛߌ߲߬ߝߏ߲ ߠߎ߬ ߓߍ߯ ߟߊߘߍ߬ߣߍ߲ ߝߏ߭ ߡߵߊ߬ߟߎ߬ ߟߊ߫ ߘߐ߬ߖߊ ߟߊ߫ ߝߘߊ߬ߝߌ߲߬ߠߊ߬ ߢߍ߫߸ߊ߬ ߣߴߊ߬ߟߎ߫ ߕߏ߲߬ߘߊ ߕߊ߭ ߟߊ߫ ߞߊ߬  ߣߊ߬ ߒߞߏ ߛߌ߲ߘߌ ߛߊ߲߬ߞߎ߲߬ߓߍ߲ ߇߇߲ ߞߣߍ ߞߊ߲߬. 

ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߞߏ߫ ߛߌߙߌ߲߫ ߣߌ߫ ߡߊ߲߬ߖߊ߬ߣߊ߫ ߞߊ߬ߙߊ߲߬ߕߊ ߓߘߊ߫ ߛߋ߫ ߆߂߃ ߘߐ߫߸ ߏ߬ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߒߞߏ ߓߘߊ߫ ߛߋ߲߬ߕߊ߬ ߞߎ߬ߘߊ߬ ߛߌߦߊߡߊ߲߫ ߞߍ߫ ߕߋ߲߬. 

ߛߟߊߕߌ߯ ߊߟߑߝߊ߫ ߞߊ߬ߓߊ߸ ߝߙߊߣߊ߫ ߕߌ߲߬ߞߎߘߎ߲ ߓߋߟߋ߲ߠߊ ߘߐߞߊ߬ߙߊ߲߬ߓߊ߮.

ߏ߬ ߞߵߊ߬ ߦߌ߬ߘߴߊ߬ ߟߊ߫ ߓߋߟߋ߲ߠߊ ߘߐ߫ ߞߏ߫ ߟߊ߬ߢߌߣߌ߲ ߛߊ߬ߓߊ ߟߋ߬ ߦߴߊ߬ߟߎ߬ ߟߊ߫ ߸ߏ߬ ߝߟߐ ߟߋ߬:

<< ߖߡߊ߬ߣߊ ߦߋ߫ ߛߴߊ߬ ߖߍ߬ߘߍ ߓߊߟߏ߫ ߟߴߊ߬ ߖߍ߬ߘߍ ߟߊ߫ ߛߣߍ߬ ߛߎߡߊ߲ ߘߐ߫>>. 

ߊ߬ ߝߌߟߊߣߊ߲ ߠߋ߬:

 <<ߖߡߊ߬ߣߊ ߦߋ߫ ߛߴߊ߬ ߖߍ߬ߘߍ ߘߊ߲ߘߊ߫ ߟߴߊ߬ ߖߍ߬ߘߍ ߟߊ߫ ߦߙߌ ߟߎ߬ ߟߊ߫ ߸ߊ߬ ߣߌ߫ ߖߡߊ߬ߣߊ ߦߋ߫ ߛߋ߫ ߝߊ߬ߛߏ߬ߞߊ߲ ߠߎ߬ ߞߊ߬ߙߊ߲߬ ߠߊ߫ ߖߐ߲߰ߛߊ߫ ߞߊ߬ ߓߐ߫ ߞߊ߲ ߠߊ߫ ߖߐ߲߬ߧߊ ߘߐ߫ >> 

ߖߊ߲߬ߖߏ߲ ߞߎ߲߭ ߝߊ߰ ߘߊ߫ ߞߏߢߌߡߊߟߐ߲߫ ߛߙߍߓߍ ߟߊߕߊߡߌ߲߫ ߠߋ߬ ߡߊ߬ ߞߵߊ߬ ߘߌ߫ ߖߡߊ߬ߣߊ ߡߊ߬ߞߟߐ ߛߊ߬ߓߊ ߟߎ߫ ߡߊ߬ ߸ߣߊߟߌ߬ߡߎ߲߫ ߖߡߊ߬ߣߊ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߌ߫߸ߞߏ߫ ߞߏߕߌ߯ ߝߟߐ ߦߴߏ߬ ߓߏ߲߬ߧߊ ߟߊߛߋ߫ ߊ߬ ߡߊ߬߸ߞߊ߬ ߘߏ߫ ߘߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߡߊ߬،ߛߟߊߕߌ߯ ߓߊ ߎߙߌ߬ ߞߊ߬ߣߌ߲߬ ߸ ߊ߬ ߣߌ߫ ߞߏ߲߬ߓߏ߫ ߘߊ߲߬ߛߊ ߞߙߏ߬ߡߊ߸ߛߟߊߕߌ߯ ߣߝߊ߬ߖߌ߫ ߛߏ߬ߙߌ߬ ߞߐ߲ߘߍ߫ ߟߋ߬ ߞߊ߬ ߞߏߢߌߡߊߟߐ߲߫ ߛߓߍߓߍ ߢߌ߲߬ ߟߊߕߊ߬ߡߌ߲߬.

ߖߊ߬ߡߊ ߟߊߓߌ߬ߟߊ߬ ߘߊ߫ ߁߆ ߕߎߡߊ ߟߋ߬ ߖߌ߬ߣߍ߫ ߡߌ߬ߙߌ߲߬ߘߌ ߟߊ߫ ߞߎߓߋ ߟߊ߫ ߞߐߣߊߞߙߌ߫. 

 ߣߊߡߊ߲߬ߖߊ߲߫ ߡߐ߰ߟߊ߲߬ߘߌ߫ ߡߊ߰ߛߎߓߊ߫ ߓߟߏ߫ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫