ߊ߬ ߡߊ߫ ߡߍ߲߫ ߡߎߣߎ߲߬߸ ߖߟߊߞߘߐ߫ ߞߍ߫ ߡߙߊ߬ߘߊ߬ߓߊ ߘߌ߫، ߒ߬ߓߊ߬߸ ߏ߬ ߟߋ ߛߍߥߊ ߕߎ߲߬ ߦߋ߫ ߛߏ ߣߌ߲߬ ߞߣߐ߫ ߞߊ߯ߙߌ ߣߌ߲߬ ߡߊ߬߸ ߂߀߂߆ ߘߓߊ߬ߓߌߟߊ ߕߟߋ߬ ߃߀، ߛߏ߫ ߞߣߐ߫ ߡߐ߮ ߟߎ߫ ߟߋ߬ ߣߐ߬ ߛߍߥߊ ߏ߬ ߛߌ߰ ߟߊ߫ ߛߋ߲߬ߠߊ߫߸ ߞߵߏ߬ ߞߍ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߥߊߟߢߌߡߊߟߐ߲ ߘߌ߫߸ ߊ߬ߟߎ߫ ߝߊ߬ ߓߘߊ ߞߍ ߞߏߛߐ߲߬ ߡߙߊ߬ߘߊ߬ߓߊ ߘߌ߫߸ ߏ߬ ߡߍ߲ ߛߐߢߐ߲ ߕߍ߬ߘߍ߫ ߊ߬ߟߎ߬ ߘߐ߫ ߛߊ߲߬ ߓߌ߫ ߦߙߌߞߊ ߣߌ߲߬ ߞߘߐ߫، ߊ߬ߟߎ߬ ߟߊ߫ ߛߍߥߊ ߣߌ߲߬ ߞߍ߫ ߘߊ߫ ߢߍߥߟߊ߫ ߘߊ߲ߘߐ߫ ߟߋ߬ ߞߊ߲߬: ߞߊ߬ ߛߐ߰ ߛߏ ߛߊߣߌ߲ߧߊ ߡߊ߬߸ ߞߊ߬ ߞߎ߬ߙߣߊ߬ ߞߊߙߊ߲ ߞߍ߫߸ ߞߊ߬ ߓߊ߲߫ ߞߊ߬ ߣߌ߬ߛߍ߫ ߗߡߍ߬ ߣߌ߫ ߞߐ߫ ߞߊ߲ߠߊߕߍ߰ ߖߐ ߣߌ߫ ߖߛߎ߬ߛߎߡߊ ߞߏߛߐ߲߬ ߖߌ߬ߣߍ߫ ߖߡߊ߬ߣߊ ߦߋ߫.

ߊ߬ ߓߘߊ߫ ߛߊ߲߬ ߦߙߌߞߊ߫ ߓߐ߫߸ ߖߟߊߞߘߐ߫ ߕߎ߲߬ ߦߋ߫ ߡߙߊ߬ߘߊ߬ߙߋ߲ ߠߋ߬ ߘߌ߫߸ ߡߊ߲߬ߖߊ߲߬ߠߊ߫ ߡߙߊ߬ߘߊ߬ߓߊ ߕߎ߲߬ ߦߋ߫ ߡߍ߲ ߡߙߊ߬ ߟߊ߫، ߒ߬ߓߊ߬߸ ߖߟߊߞߘߐ߫ ߏ߬ ߟߋ ߝߣߊ߫ ߞߍߣߴߊ߬ ߕߊ߫ ߡߙߊ߬ߘߓߊ߬ ߘߌ߫߸ ߞߊ߬ ߓߊ߲߫ ߞߵߊ߬ ߝߙߊ߬ ߛߌ߯ߙߌ߲߫ ߕߌ߲߬ߞߎߘߎ߲ ߞߊ߲߬߸ ߞߵߊ߬ ߓߐ߫ ߞߊ߲ߞߊ߲߫ ߞߊ߲߬، ߞߊ߬ ߓߍ߲߬ ߔߊ߬ߔߘߊ߬ ߟߊߓߐߣߍ߲ ߡߊ߬߸ ߡߍ߲ ߦߋ߫ ߘߴߊ߲ ߓߟߏ߫ ߕߊ߲ߓߊ߲ߓߐߟߌ ߞߏߕߌ߯ߘߊ ߟߊ߫ ߝߍߛߑߓߎߞ ߖߊ߬ߕߋ߬ߘߊ ߟߊ߫، ߒ߬ߓߊ߬߸ ߖߟߊߞߘߐ߫ ߟߊ߫ ߡߙߊ߬ߘߓߊ߬ߦߊ ߏ߬ ߟߋ ߘߌߦߊߣߴߊ߬ߟߎ߬ ߦߋ߫߸ ߡߍ߲ ߞߍߕߐ߫ ߛߌߟߊ ߟߊߞߊ߬ ߟߴߊ߬ߟߎ߬ ߦߋ߫ ߥߙߎߞߌ߫ ߘߐ߫ ߞߏ ߛߌߦߊߡߊ߲߫ ߘߐ߫.

ߌߞߏߡߌ߲߬ ߞߏ߫ ߟߋ߬ ߞߍߣߍ߲߫ ߏ߬ ߘߌ߫߸ ߊ߬ߟߎ߫ ߕߘߍ߬ ߞߊ߬ߛߌ߬ ߟߊ߫ ߡߍ߲ ߞߐ߫߸ ߊ߬ ߣߌ߫ ߡߍ߲ ߕߍ߫ ߓߐ߫ ߊ߬ߟߎ߬ ߤߊ߲ߞߟߌ߫ ߟߊ߫ ߏ߬ ߞߐ߫߸ ߖߟߊߞߘߐߞߊߘߋ߲ ߠߎ߬ ߣߐ߬ ߏ߬ ߟߋ ߛߍߥߊ ߟߊߥߟߌ߬ ߟߊ߫߸ ߖߟߊߞߘߐߞߊ ߡߍ߲ ߠߎ߬ ߦߋ߫ ߖߌ߬ߣߍ߫ ߝߊ߲߭ ߠߎ߬ ߘߐ߫߸ ߓߍߍ߯ ߞߵߊ߬ ߞߎ߲߬ߛߌ߲߫ ߊ߬ߟߎ߫ ߝߊ߬ ߓߘߊ ߟߊ߫ ߣߌ߲߬ ߞߏ ߛߍߥߊ ߟߋ߬ ߞߊ߲ߡߊ߬، ߣߌ߬ߛߌ߫ ߗߡߍ߬ ߣߌ߫ ߞߐ߫߸ ߡߍ߲ ߝߊ߰ ߘߴߊ߬ߟߎ߬ ߓߟߏ߫߸ ߞߵߏ߬ ߞߍ߫ ߛߘߊߞߊ ߘߌ߫ ߞߎߣߎ߲߬ ߞߊ߯ߙߌ ߡߊ߬߸ ߞߵߊ߬ ߦߌ߬ߘߊ߫ ߝߊ߰ߡߊ ߟߎ߬ ߟߊ߫ ߞߏ߫ ߊ߬ߟߎ߬ ߛߍߥߊߣߍ߲߫߸ ߊ߬ ߣߌ߫ ߞߵߊ߬ ߞߍ߫ ߓߍ߲߭ ߣߌ߫ ߖߛߎ߬ߛߎߡߊ ߛߘߊߞߊ ߘߌ߫ ߖߡߊ߬ߣߊ ߦߋ߫߸ ߓߊߘߋ߲ߧߊ ߘߐߞߙߊ ߛߘߊߞߊ.

ߊ߬ߟߎ߫ ߞߊ߬ ߛߏ߫ ߛߊߣߌ߲ߧߊ ߞߍ߫߸ ߞߊ߬ ߞߎ߬ߙߣߊ߬ ߞߊߙߊ߲ ߞߍ߫، ߛߍߥߊ ߣߌ߫ ߢߊ߰ߢߊ߮ ߟߋ߬ ߕߘߍ߬ ߖߟߊߞߘߐ߫ ߛߏ ߞߣߐ߫ ߞߎߣߎ߲߬߸ ߊ߬ ߢߊ ߖߍ߬ߘߍߖߍ߬ߘߍ ߡߊ߬.

ߞߎߡߊ ߕߊ߬ߣߍ߲ ߣߊߡߏ߬ߙߌ߫ ߞߎ߬ߟߌߓߊ߬ߟߌ߬ ߓߟߏ߫߸ ߊ߬ߟߋ ߡߍ߲ ߦߋ߫ ߞߊ߬ߝߏ߬ߙߋ߲ ߛߙߍߞߍ߫ ߝߌߟߊߣߊ߲ ߘߌ߫ ߖߟߊߞߘߐ߫ ߛߏߓߊ ߞߊ߬ߝߏ߬ߙߋ߲߬ ߞߎߘߊ ߞߣߐ߫߸ ߊ߬ ߞߵߊ߬ ߟߊ߫ ߛߍߥߊ ߟߋ߬ ߦߌ߬ߘߊ߬.

<<ߓߌ߬ ߞߊ߯ߙߌ߸ ߘߓߊ߬ߓߌߟߊ ߕߟߋ߬ ߃߀ ߞߍߣߍ߲߫ ߟߏ߲߫ ߠߋ߬ ߘߌ߫ ߖߟߊߞߘߐ߫ ߞߣߐ߫߸ ߡߍ߲ ߕߍ߫ ߓߐ߫ ߡߐ߰ ߤߊ߲ߞߟߌ߫ ߟߊ߫، ߦߏ߫ ߊ߲ ߕߎ߲߬ ߞߵߊ߬ ߝߐ߫ ߊ߲ ߠߊ߫ ߟߊ߬ߥߊ߲߬ߞߊ߲߬ߠߌ߲ ߠߎ߬ ߘߐ߫ ߢߊ ߡߍ߲ ߡߊ߬߸ ߊ߬ ߣߴߊ߲ ߠߊ߫ ߟߊ߬ߛߋ߬ߟߌ ߟߎ߬߸ ߒ ߞߏ߫ ߖߟߊߞߘߐ߫ ߓߘߊ߫ ߡߙߊ߬ߘߊ߬ߓߊ ߘߌ߫߸ ߊ߲ ߣߐ߬ ߏ߬ ߟߋ ߛߍߥߊ ߣߴߊ߬ ߢߊ߰ߢߊ߮ ߛߌ߰ ߟߊ߫ ߛߋ߲߬ߠߊ߫߸ ߞߵߏ߬ ߞߍ߫ ߞߊ߲ߓߍ߲ ߞߊ߲ߕߌ߮ ߟߊ߫ ߓߏ߲߬ߧߊ ߞߣߐߡߊ߬.>> ߊ߬ ߞߵߏ߬ ߟߊߛߋ߫.

ߊ߬ ߟߊ߫ ߝߐߟߌ߫ ߘߐ߫߸ ߓߊ߯ߙߊ ߣߌ߲߬ ߘߊߡߌ߬ߣߊ߬ ߘߊ߫ ߛߏ߫ ߛߊߣߌ߲ߧߊ ߟߋ߬ ߝߟߐ߫ ߡߊ߬ ߡߎߣߎ߲߬߸ ߞߣߊ߬ߕߏ߫ ߞߎ߬ߙߣߊ߬ ߞߊߙߊ߲ ߞߍ߫ ߟߊ߫߸ ߊ߬ ߣߌ߫ ߛߘߊߞߊߓߐ߸ ߞߊ߬ ߣߛߌ߬ ߛߌߦߊߡߊ߲߫ ߞߊ߲ߠߊߕߍ߰.

ߞߊ߬ߝߏ߬ߙߋ߲ ߛߙߍߞߍ߫ ߝߌߟߊߣߊ߲ ߞߵߊ߬ ߦߌ߬ߘߊ߬ ߞߏ߫: <<ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߋ߬ ߞߏߛߐ߲߬߸ ߖߟߊߞߘߐ߫ ߓߘߊ߫ ߦߟߍ߬ ߞߊ߬ ߞߍ߫ ߡߙߊ߬ߘߊ߬ߓߊ ߘߌ߫، ߡߙߌߦߊ ߡߍ߲ ߏ߬ ߘߌ߫߸ ߊ߬ ߦߙߌߞߊ߫ ߖߊ߲ ߠߋ߬ ߕߋ߲߬߸ ߖߟߊߞߘߐߞߊ ߛߌ߰ߣߍ߲߫ ߕߍ߬ߘߍ߫ ߞߵߏ߬ ߡߊߞߐ߬ߣߐ߲߬، ߏ߬ ߘߐ߫߸ ߊ߲ ߧߋ߫ ߞ߲ߊߕߌ߯ ߡߊ߬ߓߏ߲߬ߧߊ߬ߕߊ߫ ߡߊ߬ߡߊ߬ߘߌ߬ ߘߎߎ߲ߓߎߦߊ߫ ߝߏ߬ ߟߊ߫߸ ߊ߬ ߟߊ߫ ߡߙߌߦߊ߫ ߓߘߍ ߏ߬ ߟߊ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߣߊߡߏ߬ߙߌ߫ ߞߎ߬ߟߌߓߊ߬ߟߌ߬ ߡߊ߫ ߘߊ߲߬ ߏ߬ ߘߐߙߐ߲߫ ߡߊ߬ ߘߋ߬߸ ߊ߬ ߞߊ߬ ߝߏ߬ߟߌ ߟߊߛߋ߫ ߖߟߊߞߘߐߞߊ ߟߎ߫ ߡߊ߬߸ ߡߍߍ߲ ߠߎ߬ ߦߋ߫ ߛߏ ߞߣߐ߫߸ ߊ߬ ߣߌ߫ ߡߍ߲ ߠߎ߬ ߓߐߣߴߊ߬ߟߎ߫ ߛߌ߰ ߦߌߟߊ ߘߐ߫ ߞߊ߬ ߣߵߊ߬ߟߎ߫ ߝߊ߬ߛߏ ߟߊ߫ ߖߟߊߞߘߐ߫߸ ߊ߬ߟߎ߬ ߛߌߦߊߡߊ߲߫ ߠߋ߬ ߓߐ߫ ߘߊ߫ ߖߡߊ߬ߣߊ ߦߙߐ߫ ߛߌߦߊߡߊ߲߫ ߘߐ߫ ߞߊ߬ ߣߊ߬߸ ߊ߬ ߞߵߏ߬ ߟߎ߫ ߝߏ߬.

<<ߖߟߊߞߘߐߞߊ ߟߎ߫ ߣߊ߬ߣߍ߲߫ ߠߋ߬ ߞߊ߬ ߓߐ߫ ߦߙߐ߫ ߛߌߦߊߡߊ߲߫ ߘߐ߫߸ ߞߵߊ߬ ߕߊ߬ ߞߐߣߊߞߙߌ߫ ߡߊ߬߸ ߞߵߊ߬ ߛߌ߰ ߒߛߙߍߜߘߍ߬ ߟߊ߫߸ ߊ߬ ߣߌ߫ ߖߌ߬ߣߍ߬ ߛߏߓߊ߫ ߛߌߦߊߡߊ߲߫߸ ߊ߬ߟߎ߫ ߣߊ߬ ߘߊ߫ ߞߊ߬ ߓߐ߫ ߦߋ߲߬ ߠߎ߬ ߓߍ߯ ߟߋ߬ ߘߐ߫، ߞߊ߬ߕߎ߲߯߸ ߖߟߊߞߘߐߞߊ ߦߋ߫ ߝߊ߲߬ ߛߌߦߊߡߊ߲߫߸ ߊ߬ߟߎ߫ ߣߊ߬ ߘߊ߫ ߞߊ߬ ߣߊ߬ ߛߐ߬ߘߐ߲߬ ߛߘߊߞߊߓߐ ߘߐ߫.>> ߊ߬ ߞߵߏ߬ ߟߊߛߙߋߦߊ߫.

ߓߌ߬ ߞߐ߬ߓߊ߬ߟߏ߲ ߢߌ߲߬ ߝߣߊ߫ ߡߊ߬߬߸ ߖߊ߲߬ߖߏ߲ ߦߴߌߘߐ߫ ߖߟߊߞߘߐ߫߸ ߓߊ߯ߙߊ߫ ߛߌߦߊߡߊ߲߫ ߦߋ߫ ߡߍ߲ ߘߐ߫، ߊ߬ߟߎ߬ ߘߌ߫ ߓߐ߫ ߞߵߊ߬ߟߎ߬ ߕߊ߯ߡߊ߫ ߛߏ ߞߣߐ߫ ߞߵߊ߬ ߘߐߦߊ߯ߟߊ߫߸ ߞߊ߬ ߓߊ߲߫ ߞߊ߬ ߓߙߊߘߐߦߊ ߟߎ߬ ߞߍ߫߸ ߊ߬ ߣߌ߫ ߟߐ߲ߠߌ߲ߦߊ߫ ߕߏߟߏ߲߫ ߜߘߍ߫ ߟߎ߫.

ߡߍ߲ ߠߎ߬ ߣߐ߬ ߣߌ߲߬ ߞߏ ߛߌ߰ ߟߊ߫ ߛߋ߲߬ߠߊ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߓߊ߯ߙߊ߫ ߛߌߦߊߡߊ߲ ߡߍ߲ ߓߍ߯ ߞߍߣߴߊ߬ߟߎ߬ ߓߟߏ߫ ߢߊ߰ߢߊ߮ ߣߌ߲߬ ߘߐ߫ ߕߋ߲߬߸ ߏ߬ ߦߋ߫ ߟߋ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߛߍߥߊߣߍ߲߫، ߡߍ߲ ߞߍߣߍ߲߫߸ ߊ߬ ߞߵߊ߬ߟߎ߬ ߝߊ߫.

ߣߊߡߏ߬ߙߌ߫ ߞߎ߬ߟߌߓߊ߬ߟߌ߫ ߞߵߊ߬ ߝߐ߫ ߊ߬ ߟߊ߫ ߞߎߡߊ ߟߊߓߊ߲ ߘߐ߫ ߏ߬ ߟߋ ߘߐ߫߸ ߞߏ߫: <<ߖߟߊߞߘߐ߫ ߦߋ߫ ߛߏ߫ ߟߋ߬ ߘߌ߫߸ ߡߍ߲ ߣߌ߫ ߡߙߊ߬ߘߓߊ߬ߦߊ ߞߊ߫ ߞߊ߲߫ ߕߘߍ߬ ߞߊ߬ߦߌ߯ ߥߊ߯ߕߌ߫ ߖߊ߲߫.>> ߊ߬ ߞߵߏ߬ ߞߍߍ߫ ߞߎߡߊ ߞߎ߲߬ߝߊ߮ ߘߌ߫.

ߌߓߙߊߤߌߡߊ߬ ߞߊߡߊ߲߫ ߝߙߊ߬ߓߊ߫ ߞߡߊ߬ߙߊ߬ ߓߟߏ߫.