ߖߟߊߡߊ߲߫ ߣߝߊ߬ߖߌ߬ ߦߋ߫ ߒߞߏ ߛߍ߬ߘߏ߲߬ߠߊ߫ ߛߊ߲ߞߊߙߊ߲߫ ߖߟߊߡߊ߲߫ ߣߝߊ߬ߖߌ߫ ߛߍ߬ߓߍ߫ ߡߊ߰ߙߊ߬ ߥߟߏߛߟߎ ߟߋ߬ ߘߌ߫߸ ߊ߬ߟߋ ߡߍ߲ ߦߋ߫ ߟߍߙߘߊ߫ ߓߍ߲߬ߞߊߘߌ߫ ߛߌ߲ߘߌߓߊ߮ ߘߌ߫، ߒ߬ߓߊ߬߸ ߘߍ߰ߡߎ߲߬ ߓߟߋߓߟߋ߫ ߟߋ߬ ߞߍ߫ ߘߊ߫ ߦߋ߲߬ ߂߀߂߆ ߘߓߊ߬ߕߊ ߕߟߋ߬ ߃߀ ߡߊ߬߸ ߛߏ߫ ߞߣߐ߫ ߡߐ߮ ߟߎ߬߸ ߡߐ߰ߓߊ ߟߎ߬߸ ߡߏ߬ߛߏ ߟߎ߬߸ ߘߋ߲ߡߌߛߍ߲ ߣߌ߫ ߒߞߏ ߓߊ߯ߙߟߊ ߟߎ߬ ߓߍ߯ ߟߋ߬ ߓߐ߫ ߘߊ߫ ߣߌ߲߬ ߟߏ߲߸ ߞߊ߬ ߝߘߊ߬ߝߌ߲߬ߠߊ߫ ߞߎ߲߬ߠߊ߬ߦߋ߬ߙߋ߲߬ ߛߓߍߟߌ ߣߌ߲߬ ߠߊߥߊ߲߬ߞߊ߲߬.


ߛߊ߲ߞߊߙߊ߲߫ ߞߍߞߋߟߋ߲ߘߌ ߘߍ߭ ߟߊ߫ ߛߌ߲߬ߝߏ߲߬ߧߊ߬ߟߌ ߟߋ߬߸ ߛߊ߫ ߒߞߏ ߞߊߙߊ߲ ߘߌ߫ ߕߊ߬ ߓߊ߫ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߡߊ߲߬ߘߋ߲߬ ߞߎߡߊ ߓߊ߯ ߞߍ߫ ߝߐ߫ ߟߊ߫ ߓߌ߬߸ ߝߏ߫ ߊ߬ ߦߋ߫ ߓߐ߫ ߒߞߏ ߟߋ߬ ߘߊ߫، ߞߊ߬ ߓߊ߲߫ ߞߊ߬ ߘߍ߰ߡߎ߲ ߣߌ߲߬ ߞߍ߫ ߛߌߟߊ߫ ߘߌ߫߸ ߞߊ߬ ߛߊ߲ߞߊߙߊ߲߫ ߞߟߌ߫ ߟߐ߲ߠߌ߲ߦߊ ߟߎ߫ ߕߊ߭ ߡߊ߬ ߓߊ߫ ߘߐ߫، ߘߍ߰ߡߎ߲߬ߦߊ߬ߟߊ ߕߎ߲߬ ߦߋ߫ ߡߐ߰ ߝߌ߬ߟߊ߫ ߟߋ߬ ߘߌ߫߸ ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߓߊ߬߸ ߊ߬ ߣߌ߫ ߝߏߘߋ߫ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬߸ ߏ߬ ߟߎ߬ ߞߎߡߊ߫ ߘߊ߫ ߕߋߟߋ߲ߓߊ߯ߦߊ ߞߊ߲߬߸ ߢߐ߲߯ߘߍߡߍ߲ ߞߊ߲߬߸ ߝߊ߬ߛߏ߬ ߞߊߣߌ߲ ߞߊ߲߬߸ ߊ߬ ߣߌ߫ ߖߘߍ߬ߟߐ߲ ߣߌ߫ ߝߘߊ߬ߝߌ߲߬ߠߊ߬ ߟߐ߲ߠߌ߲ߦߊ ߟߊߞߎߣߎ߲ ߞߊ߲߬ ߕߐ߯ ߞߏ ߡߊ߬ߘߎ߮ ߣߌ߫ ߞߏ߫ ߛߌߦߊߡߊ߲߫ ߠߎ߫ ߘߐ߫.

ߟߊ߬ߡߌߣ ߟߊߣߊߒߕߋ ߞߋߕߊ߬ ߡߍ߲ ߦߋ߫ ߛߊ߲ߞߊߙߊ߲߫ ߞߍߞߋߟߋ߲ߘߌ ߘߍ߭ ߞߊ߲ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߖߊ߲߬ߖߏ߲ ߣߌ߲߬ ߞߍߣߴߊ߬ߟߎ߬ ߓߟߏ߫ ߓߟߏߟߊߕߎ߲߯ߠߌ߲߫ ߞߊ߲ ߠߋ߬ ߡߊ߬ ߒߞߏ ߓߊ߯ߙߟߊ߫ ߞߘߐ ߟߎ߬ ߟߊ߫ ߞߍߣߍ߲ ߠߎ߬ ߟߊ߲ߞߣߍߡߊ ߘߐ߫߸ ߛߴߊ߬ߟߎ߬ ߘߌ߫ ߘߏ߫ ߟߴߊ߬ߟߎ߫ ߘߐ߲߬ߛߋ߲ ߞߊ߲߬. <<ߌ ߓߴߊ߬ ߦߋ߫ ߊ߲ ߞߊ߬ ߡߐ߱ ߟߎ߬ ߟߊߘߍ߬ ߓߌ߬߸ ߏ߬ ߞߎ߲߭ ߦߋ߫ ߒߞߏ ߓߊ߯ߙߟߊ ߟߎ߬ ߞߏߢߌߡߊߟߐ߲ ߠߋ߬ ߘߌ߫߸ ߞߵߊ߬ ߦߌ߬ߘߴߊ߬ߟߎ߬ ߟߊ߫ ߞߏ߫ ߊ߬ߟߎ߬ ߓߘߊ߫ ߘߏ߫ ߞߍ߫.>> ߊ߬ ߞߵߏ߬ ߦߌ߬ߘߊ߬، ߊ߬ߟߋ ߟߊ߫ ߝߐߟߌ߫ ߘߐ߫߸ ߊ߬ߟߎ߫ ߞߊ߬ ߞߐ߲ߘߐ߲ ߘߌ߫ ߡߐ߰ߓߊ ߘߏ߫ ߟߎ߫ ߡߊ߬߸ ߞߵߊ߬ߟߎ߬ ߟߊ߫ ߛߍ߰ ߞߍߣߍ߲ ߠߎ߬ ߦߌ߬ߘߊ߬ ߓߍ߯ ߟߊ߫: <<ߌ ߓߊ߯ ߛߋ߭ ߕߊ߲߬ߘߏ߫ ߊ߬ ߖߎ߭ ߞߘߐ߫߸ ߊ߬ ߘߌ߫ ߘߏ߫ ߜߘߍ߫ ߟߊߓߎ߬ߘߎ߲߬.>>

ߛߊ߲ߞߊߙߊ߲߫ ߖߟߊߡߊ߲߫ ߛߍ߬ߓߍ߫ ߡߊ߰ߙߊ߬ ߡߍ߲ ߦߋ߫ ߒߞߏ ߘߎ߲ߓߎ߫ ߛߌ߲ߝߏ߲ ߣߌ߫ ߞߛߞ ߘߍ߬ߞߙߎ ߟߊ߬ߟߌ߬ߟߌ߬ߟߊ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߝߏ߫ ߞߊ߬ ߟߐ߲ߠߌ߲ ߠߎ߬ ߟߊߕߊ߬ߡߌ߲߬ ߢߐ߲߮ ߡߊ߬ ߟߋ߬߸ ߞߊ߬ ߓߐ߫ ߘߊ߫ ߟߊ߫ ߞߊ߬ ߕߊ߯ ߘߊ߫ ߟߊ߫ ߓߐ߲ߛߐ߲ߘߊ ߟߎ߬ ߣߌ߫ ߢߐ߲߯ ߕߍ߫، <<ߒߞߏߞߏ ߓߘߊ߫ ߞߍ߫ ߥߎ߬ߘߊ߲ ߘߌ߫ ߡߊ߲߬ߘߋ߲߫ ߝߊ߲߭ ߓߍ߯ ߘߐ߫ ߓߌ߬، ߏ߬ ߟߋ ߞߏߛߐ߲߬߸ ߘߋ߲ߣߍ߲߫ ߥߟߌ߬ߕߐ߬ߟߊ ߡߍ߲ ߠߎ߬ ߦߋ߫ ߦߋ߲߬߸ ߝߏ߫ ߞߵߏ߬ ߟߎ߫ ߛߏ߬ߓߌ߬ߟߊ߬ߞߎߣߎ߲߫ ߠߋ߬، ߊ߬ ߣߌ߫ ߞߊ߬ ߡߐ߰ߓߊ ߟߎ߬ ߝߣߊ߫ ߛߏ߬ߓߌ߬ߟߊ߬ߞߎߣߎ߲߫߸ ߊ߬ߟߎ߬ ߦߋ߫ ߘߋ߲ߣߍ߲ ߠߎ߬ ߢߍߛߌ߲߫ ߒߞߏߞߏ ߡߊ߬.>> ߊ߬ ߞߵߏ߬ ߢߊߝߐ߫، ߊ߬ ߞߊ߬ ߒߞߏ ߓߊ߯ߙߟߊ ߓߍ߯ ߞߟߌ߫ ߝߣߊ߫߸ ߞߏ߫ ߓߍ߯ ߦߴߊ߬ ߘߐߖߊ߬ ߞߵߊ߬ ߓߟߏߣߐ ߓߌ߬ߟߊ߬ ߒߞߏ ߘߐ߫ ߊ߬ ߓߐߛߟߎ ߟߊ߫: <<ߌ ߞߍ߫ ߘߊ߫ ߘߎߢߊ߫ ߝߊ߲߬ ߛߌ߫ ߘߐ߫߸ ߌ ߓߐߣߍ߲߫ ߓߎ߰ߘߊ ߘߏ߫ ߟߋ߬ ߟߊ߫، ߌ ߟߊ߫ ߘߎ߰ߣߍ߲ ߏ߬ ߞߍ߫ ߘߊ߫ ߝߊ߲߬ ߛߌ߫߸ ߌ ߞߊ߫ ߞߊ߲߫ ߞߊ߬ ߘߏ߫ ߞߍ߫ ߒߞߏߞߏ ߟߊ߬ߡߊ߮ ߘߐ߫ ߦߋ߲߬.>>

ߖߊ߲߬ߖߏ߲ ߣߌ߲߬ ߘߐ߫߸ ߞߐ߲ߘߐ߲߫ ߘߐߜߍ߫ ߛߓߊ߬ ߝߣߊ߫ ߘߐߕߟߊ߫ ߘߊ߫، ߡߊ߬ߡߊ߬ߘߌ߫ ߡߐ߰ߝߌ߲߫ ߞߙߏ߬ߡߊ߬ ߡߍ߲ ߦߋ߫ ߛߊ߲ߞߊߙߊ߲߫ ߞߍߞߋߟߋ߲ߘߌ ߘߍ߭ ߞߊ߲ߕߌ߯ ߛߙߍߞߍ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߘߓߌ߬ߛߐ߮ ߘߌߣߍ߲߫ ߝߏߘߋ߫ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߟߋ߬ ߡߊ߬߸ ߞߎ߲߬ߝߌ߲߬ߧߊ ߘߌ߬ߓߌ ߝߊߙߊ߲ߛߊ߫ ߞߊ߲ߡߊ߬، ߞߊ߬ ߡߙߎ߬ߓߊ ߘߌ߫ ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߊ߬ߓߊ ߡߊ߬߸ ߊ߬ߟߋ ߡߍ߲ ߦߋ߫ ߥߎ߬ߦߊ߲߬ߞߌ߬ߟߌ ߝߊ߬ ߘߊ߫߸ ߛߴߊ߬ ߘߌ߫ ߥߎ߬ߦߊ߲߬ߞߌ߬ߟߌ ߛߌߟߊ ߟߊߞߊ߬، ߕߟߎߞߟߊ ߘߌ߫ ߘߊ߫ ߛߍ߬ߓߍ߫ ߡߊ߰ߙߊ ߟߋ߬ ߡߊ߬߸ ߞߊ߬ ߓߍ߲߬ ߊ߬ ߟߊ߫ ߞߝߊ߬ ߛߓߍߣߍ߲ ߠߎ߬ ߡߊ߬߸ ߊ߬ ߣߴߊ߬ ߓߘߊ߫ ߛߊ߲ߞߊߙߊ߲߫ ߕߐ߮ ߟߊߓߐ ߡߍ߲ ߞߍ߫ ߊ߬ ߟߊ߫ ߛߓߍߟߌ ߟߎ߬ ߘߐ߫.

<<ߛߏ߬ߙߌ߫ ߡߊ߲߬ߘߋ߲߬ߞߊ ߞߊ߬ߓߊ ߓߘߊ߫ ߘߙߌ߬ߞߌ ߓߐ߫ ߊ߬ ߞߊ߲ߠߊ߫ ߞߎ߲߬ߝߌ߲߬ߧߊ ߞߍ߬ߟߍ ߘߐ߫ ߝߘߊ߬ߝߌ߲߬ߠߊ߬ ߞߣߐ߫.>> ߡߊ߬ߡߊ߬ߘߌ߫ ߡߐ߰ߝߌ߲ ߠߋ߬ ߞߊ߲߫ ߕߋ߲߬߸ ߞߵߊ߬ ߦߌ߬ߘߊ߬ ߞߏ߫ ߞߟߍ߬ ߜߘߍ߫ ߕߴߌߘߐ߫ ߝߘߊ߬ߝߌ߲߬ߠߊ߫ ߟߊ߲߬ߓߋ ߟߊߛߊ߬ߦߌ߲ ߞߍ߬ߟߍ ߞߐ߫.

ߝߏߘߋ߫ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߟߊ߫ ߛߙߊ߬ߣߎ߲ ߘߐ߫߸ ߊ߬ߟߋ ߞߎߡߊ߫ ߘߊ߫ ߕߋߟߋ߲ߓߊ߯ߦߊ ߟߋ߬ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߡߊ߫ ߥߊ߫ ߘߏ߫ ߜߘߍ߫ ߟߊ߫ ߖߟߊߡߊ߲߫ ߣߝߊ߬ߖߌ߬ ߛߏ ߞߣߐ߫߸ ߞߊ߬ ߘߎ߰ߘߋ߲ ߠߎ߬ ߛߏ߬ߓߌ߬ߟߊ߬ߞߎߣߎ߲߫ ߡߊ߲߬ߘߋ߲߬ ߞߏ ߟߊ߫߸ ߞߵߊ߬ߟߎ߬ ߤߊ߲ߞߟߌ ߟߊߡߌ߲߬ ߝߊ߬ߛߏ ߡߞߊߘߊ߲߫ ߢߊ ߣߴߊ߬ ߞߊ߬ߣߌ߲߬ ߢߊ ߟߊ߫، ߓߊߏ߬߸ ߝߊ߬ߛߏ ߟߋ߬ ߞߏ ߓߍ߯ ߛߊ߲ߝߍ߬. ߊ߬ ߓߊ߲߫ ߘߊ߫ ߞߊ߬ ߘߍ߬ߞߙߎ ߟߊ߫ ߘߍ߬ߡߍ߲߬ߠߌ߲߬ ߢߌߣߌ߲ ߝߣߊ߫ ߞߐߡߊߓߌ߲ߓߌ߲߫߸ ߣߊߟߌ߬ߡߎ߲߫ ߘߎ߬ߞߎߘߎ߲ ߘߏ߫ ߛߐ߬ߘߐ߲ ߘߌ߫ ߊ߬ߟߎ߬ ߢߣߊ߫ ߦߙߐ ߘߏ߫ ߘߐ߫ ߛߏ ߞߣߐ߫߸ ߊ߬ߟߎ߬ ߘߌ߫ ߒߞߏ ߞߊߙߊ߲ߓߏ߲ ߟߐ߬ ߦߙߐ ߡߍ߲ ߘߐ߫، <<ߊ߲ ߞߵߊ߬ ߢߌߣߌ߲߫ ߡߐ߰ߓߊ ߟߎ߫ ߝߍ߬߸ ߒ ߞߏ߫ ߊ߬ߟߎ߬ ߦߋ߫ ߘߎ߱ ߘߏ߫ ߘߌ߫ ߒߞߏ ߡߊ߬߸ ߒߞߏ ߘߌ߫ ߞߊ߬ߙߊ߲߬ ߦߙߐ ߡߍ߲ ߘߐ߫.>> ߊ߬ ߞߵߏ߬ ߟߊߛߋ߫.

ߣߝߊ߬ߖߌ߫ ߡߏ߬ߛߏ ߟߎ߬ ߞߵߊ߬ߟߎ߬ ߟߊ߫ ߛߍߥߊ ߦߌ߬ߘߊ߬߸ ߞߵߊ߬ ߟߴߊ߬ ߞߊ߲߬ ߞߏ߫ ߊ߬ߟߎ߬ ߓߌߣߍ߲߫ ߛߎ ߣߌ߬ ߕߋ߬ߟߋ، ߝߊ߲ߕߊ߬ ߖߊߟߏ߫ ߡߍ߲ ߦߋ߫ ߣߝߊ߬ߖߌ߫ ߡߛߏ߬ ߞߎ߲ߕߌ߮ ߣߴߊ߬ ߞߊ߬ߝߏ߬ߙߋ߲߬ߕߌ߮ ߘߌ߫߸ ߞߵߊ߬ ߞߊ߲ߠߊߘߌ߫ ߡߏ߬ߛߏ ߟߎ߫ ߡߊ߬߸ ߊ߬ߟߎ߬ ߘߋ߲ ߠߎ߬ ߘߏ߲߭ ߠߊ߫ ߒߞߏ ߞߊߙߊ߲ߕߊ ߟߊ߫. <<ߕߣߐ߬ߓߊ߫ ߟߋ߬ ߞߊ߬ߙߊ߲ ߠߊ߫، ߌ ߓߴߊ߲ ߠߊߘߍ߬ߣߍ߲ ߦߋ߫ ߦߊ߲߬ ߓߌ߬߸ ߊ߬ ߞߎ߲߭ ߦߋ߫ ߟߐ߲ߠߌ߲ ߠߋ߬ ߘߌ߫.>> ߊ߬ ߞߵߏ߬ ߦߌ߬ߘߊ߬.

ߓߋߟߋ߲ߠߊ ߟߎ߬ ߣߌ߫ ߘߍ߰ߡߎ߲ ߢߌ߲߬ ߠߎ߬ ߓߍ߯ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߖߊ߲߬ߖߏ߲ ߣߌ߲߬ ߞߏ ߡߍ߲ ߠߎ߬ ߞߊ߬ ߖߊ߬ߡߊ ߢߊߞߘߐߛߋ߫߸ ߏ߬ ߟߋ ߞߍ߫ ߘߊ߫ ߡߊ߲߬ߘߋ߲߬ ߟߐ߲ߠߌ߲ߦߊ߫ ߓߐߣߍ߲߫ ߢߐ߲߰ ߡߊ ߟߎ߬ ߟߊߖߊ߲ߞߏ ߘߌ߫ ߣߝߊ߬ߖߌ߬ߞߊ ߟߎ߬ ߓߟߏ߫ ߜߊ߬ߙߊ ߣߌ߲߬ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߡߴߊ߬ߟߎ߬ ߓߟߏߓߐ߫ ߞߘߐ߬ߡߊ߲ ߠߎ߬ ߘߐ߫ ߝߋߎ߫.

ߊ߬ߟߋ߬ ߖߊ߲߬ߖߏ߲߬ ߞߋߟߋ߲ ߣߌ߲߬ ߞߍ߫ ߘߊ߫ ߕߙߎ߬ ߘߌ߫߸ ߛߊ߲ߞߊߙߊ߲߫ ߞߍߞߋߟߋ߲ߘߌ ߞߊ߬ ߘߏ߫ ߝߊ߬ߙߴߊ߬ ߟߊ߫ ߒߞߏߞߏ ߛߍ߬ߘߏ߲ ߞߊ߲߬߸ ߟߐ߲ߠߌ߲ ߠߊߦߙߌߥߊ ߘߐ߫߸ ߞߎ߲߬ߝߌ߲߬ߧߊ ߞߍ߬ߟߍ ߘߐ߫߸ ߊ߬ ߣߌ߫ ߝߘߊ߬ߝߌ߲߬ߠߊ߫ ߟߊ߲߬ߓߋ ߡߞߊߘߊ߲ ߘߐ߫.